قصة لعيون الأزرق

قصة لعيون الأزرق كاملة مكتوبة

هالقصة للكبار فقط من الذين تجاوزت أعمارهم 55 سنة لأنها تحتوي على شوية مشاهد رعب ..

في غرقة النوم ..ومجمع لي في الحلم 7 بنات ومخربينها في الحفلة ( أحلم بحفلة أنا ومعي سبع بنات بس ما في أحد معنا ) ..وألا ينفتح الباب بقوة ..مو في الحلم هالمرة في الحقيقة وافتح عيوني ألا ست عساكر لبسهم غريب شايليني وحاطيني في سيارة فان سوداء ..اسألهم وش صار وين موديني وش القصة ولا أحد منهم معبرني وكلهم ساكتين ..وتطلع السيارة برى حدود الرياض ..بصراحة في هاللحظة شكيت أنهم ناوين نية شينة ..وأراقب حركاتهم ..وهم تقول أصنام مجمدة ما يتحركون و لا يرمشون لو بعينهم ..وفجأة وقفت السيارة وفتحوا الباب وشالوني مرة ثانية وودوني لداخل مبنى غريب وسط هالبر .. بعد بضعة ثواني عرفت أني في مبنى الأستخبارات العامة السعودية .. طنطن طنططا ..المهم صوروني ..خمسطعش صورة وأخذوا بصماتي .. وشوي ويدخلوني مكتب ..فاضي ..وأنا طول الوقت عظامي ترجف وفجأة انفتح الباب ودخل علي واحد ضابط ما أدري وش رتبته بس شكله نقيب يا رائد يا لواء ..ومعه ثلاث عساكر محترمينه وواحد معه دفتر يبي يكتب … وبدى الضابط يناظر فيني نظرات غريبة ..بحل ياللي كانوا معي في السيارة …( قمت أغار على نفسي من نظراته )

الضابط : أنت عبدالعزيز ..

أنا : أي والله أعترف أني عبدالعزيز خلاص يالله خلوني أطلع هذاني وش زيني اعترفت بسرعة بدون تعذيب

الضابط: تونا ما بدينا التحقيق معك على طول تبي تعترف ..شكلك مقر بغلطتك وعرفت أننا كشفناك

أنا : والله يا طويل العمر اللي أعرفه أنكم كاشفين كل الشعب ..قصدي تعرفون كل شي عن كل أحد .. ولا عمركم تخطون هذا أزين شي فيكم

الضابط : طيب على كذا ابي أعرف وش كنت تسوي أمس الليل .ولا تكذب

أنا : أبد طال عمرك صليت العشاء وتعشيت ورقدت حتى الأخبار ما شفتها ..مواطن شريف من كثر ما شفتها حفظتها أي والله استقبل وتشغلون موسيقى .أقام حفل عشاء وتقهرون الخلق بهالسفرات اللي لها أول مالها آخر ..ودع وصورة واحد في المطار وموسيقى ..والفلسطينين انقتل منهم عشرة . تبي أقلد لك صوت سليمان العيسى ترى صرت اضبطه ..احم احم ..اسعد الله مسائكم…

الضابط : عبدالعزيز ما أبيك تبدى باللف والدوران أنا اسألك وش سويت أمس في الليل علشان أحدد لك,, أكثر شي تستحي منه هاه عرفت ولا أوضح لك ..

أنا : والله فهمت خلاص بلا فضائح .والله أني كنت أمس جالس ولا في بالي شي بالمرة ..وفجأة وأحط على الفضائية المصرية .. ألا وتطلع لك دينا ( الراقصة وليست الرقاصة كما تحب أن ينادوها ) ببدلة الرقص اللي ساترة كل شي الحمدلله تبارك الله وتأجج المشاعر اللتي كادت على وشك أن تنام وفجأة بعد دقيقتين قطعوا الرقصة علشان بيجيبون أذان العشاء في مصر ..حسبي الله ونعم الوكيل أججونا ثم رمونا على صخر قمت تذكرت أن ولد خالي لما سافروا لندن الصيف الماضي الله يهديه ويصلحه بس هالمراهق جاب مجلة من مجلات المراهقين أم صور ونساها في غرفتي قمت عاد يوم أبليس لعب في رأسي الله لا يوريك وقمت طلعت المجلة وقفلت الباب

الضابط : عبدالعزيز وبعدين معك ..متى بتقول الصدق ..

أنا : أنا أنا خلاص حتى ذي دارين عنها ومطنشينها ..أنا اللي جايب المجلات 12 مجلة أعداد السنة اللي كنت فيها هناك بس ليه ما أخذوها قصدي صادروها في الجوازات مو العادة ..العادة أذا أعجبهم شي صادروه ..طيب اكتبوا تحقيق سووا شي يقول لك مو لازم مانبي نفضحك ..وش دخلك أنا أبي أنحرف

الضابط : خل المجلات على جنب عندنا وعندك خير ..ودينا شفتها أمس مع أم العيال قلت لها ارقصي لي مثل هالرقص قالت لو شافونا العيال اها بس … المهم نرجع لموضوعنا أنا أسألك وش سويت في الأنترنت أمس

أنا : اها قصدك على النت ابد طال عمرك كل المسألة شيكت ايميلي و قريت لي كم موضوع بأحد المنتديات وقريت جرائد وطلعت بس هذي كل السالفة …

الضابط : يعني ما تكلمت مع أحد طول ما أنت في النت ..هاه

أنا : ألا والله شفت واحد من الشباب وقمنا نحكي عن أحدث البرامج اللي نزلت سوق الكمبيوتر تعرف مهتم بهالاشياء أنا من زمان .وأحب أعرف الجديد ..

الضابط : قل الصدق حكيت مع مين ..ووش قلتوا هاه اعترف بالشي اللي أنت مستحي منه

أنا : خلاص بتذلني يعني رقمت 3 بنات ..سعودية وبحرينية ومصرية ..بس كل الناس ترقم,, حتى المتزوجين اللي عندهم عيال يعني جت علي أنا ..بس تهقى السعودية تدق .. المصرية تقول بأرسل لك مسج يا حلاوة ..أنا صرت حلاوة ..والله لو تدري البحرينية تقول يا حلوى المحرق أنتا

الضابط : عبدالعزيز يا بريء أجل كلهم يغازلون وأنت سويت مثلهم .. باصيح من برائتك لقط البرائة اللي قامت تتناثر منك .. أنا أقصد وش سويت في البال توك

أنا : احم احم حتى البال توك دريتوا عنه .. قلت أبد شوية شات ,الواحد يقتل الفراغ خبرك الفراغ قاتل ..ولا لا يا طويل العمر والزم ما على الواحد عمره ..بكرة أموت ويقولون الناس وش مات منه ..بالله أهلي بأي وجه يردون عليهم .. يقولون الفراغ قتلة ..طيب فهموها الناس العاديين العجز بيقولون الفراغ هذا من هو ولده حط نفسك مكان أهلي

الضابط : أجل شوية شات هاه من الساعة 8 مساءا الى الساعة 1 ونص الفجر وتقول شوية شات ..طيب ممكن نعرف كنت بأي غرفة … يعني نبي نعرف وش اهتماماتك

أنا : احم احم والله يا طويل العمر مشكلتي أني حياوي ولا أبي أزعل أحد كل ما جيت أطلع يقولون الشباب بدري ثانيا النقاش أمس بالذات كان ساخن الله لا يوريك الواحد ولّع وهو على كرسيه …تعرف غرفة أهل السنة والجماعة عليها زحمة هالأيام ..يالله يالله تلقى لك مكان ..وبعدين لغرفة نور الأسلام ..جزاهم الله خير الواحد من كثر ما تابع تعب .

الضابط : عبدالعزيز قل الصدق بأي غرفة كنت ووش شفت هناك بالضبط ولا تضيع وقتنا …

أنا : كنت في غرفة *** أما وش شفت فشفت أشياء مهولة يبي لك عشرين سنة علشان تشوفهم مع بعض أنا شفتهم مرة واحدة …

الضابط : اها وصلنا للمطلوب .نبي نعرف وش شفت بالضبط ..ولا تنسى شي واحد من اللي شفته

أنا : هاه وش شفت … عادي أقول ما في مشكلة ..المشكلة ما تنقال ..طال عمرك شفت زي اللي شافوه كل من كان غرفة الشات …والله الواحد من أول يسمع كلام وحكي يردده مثل الببغاء بس الشوف غير يعني تتأكد أن اللي سمعته حقيقة ..وكل شوي تشوف حقائق أكثر سبحان الله ..

الضابط : ايوة على فكرة كل اللي شفته كذب مو حقائق فاهم ما فيه أي شي من الحقيقة .

أنا : ألا والله حقيقة ونص بتعلمني أنا كنت أشوف واتأكد بنفسي

الضابط : أنا أخبر منك ومتأكد من اللي أقوله لك اللي شفته زيف وما فيه أي شي من الحقيقة فاهم ولا لا

أنا : واللي يرحم والديك قل غير هالحكي ..يا أخوي شفت كل شي ..فاهم أنت كل شي شفته بعيني ..وتقول مو حقيقة بالله وش الحقيقة ..هاه اللي لاعندي ولا عندك ..خلني ساكت بس اللي شفته أمس كله حقيقي

الضابط : أنا أكبر منك وعندي خبرة أكثر منك …واقدر أقول لك اللي شفته مو حقيقة ..صدقني اعترف أنه انلعب عليك

أنا : لا عاد كونك أكبر مني ومتزوج وعندك عيال على عيني وعلى رأسي بس اللي شفته أمس حقيقي ومتأكد أنه حقيقي مية بالمية ..وكله حقيقة كانت أوضح من الحقيقة اللي قبلها

الضابط : شف أنت شاب مسكين وما تعرف شي علشان كذا سهل يغررون بك ويخدعونك صدقني يا عبدالعزيز كل اللي شفته كذب أنا أعرف الحقيقة

أنا : اتق الله وش كذبه البنت اللي كانت لابسة قميص نوم وردي وكل شوي ترفع شي كذا ..آمنا بالله ..طيب اللي لابسة طقم كحلي وين كذبة منه وكل شي يهز فيها ..هاه جاوبني ..أم اسود سمعت صوتها بنفسي وصورتها واضحة زي الشمس ..خصوصا يوم ما صارت أم أسود بعد ..

الضابط : وش أم وردي وأم كحلي وأم أسود اللي ماصارت أم أسود بعد ..وش تخربط أنت وش تحكي عنه بالضبط

أنا : البنات اللي كنت اشوفهم في البال توك ..على قد ما تعبت من كثر ما أسوي ريفريش بس والله المناظر تستاهل ..مناظر قوية وجامدة جاية في صميم الشاب قصدي القلب .

الضابط : أنا ما أقصد هذولي الله يقرفك ..ملازم سعيد أحذفها من المحظر لا نتوهق بعدين ..أنا أقصد الموقع اللي فتحته ..وجلست فيه 3 دقائق لين احنا قطعنا الاتصال عليك

أنا : أي موقع .. وش موقعه ..والله مدري وش تحكون ..صدق أمس اتصالي انقطع في الأخير ولا قدرت اشبك بس ماني فاهم شي من اللي تقوله ..ما فضيت ألا أفتح مواقع على مناظر أمس

الضابط :الموقع 214.66.325.999 هاه ذكرته ولا لا الموقع اللي كله أرقام ..

أنا : يابن الحلال والله ماني مـتأكد بس شكلي مع كثر ما أسوي ريفريش .والشباب كل شوي واحد حاط موقع يقول افتحوه شوفوه ..كله صور يا بروكسي ..يمكن ضغطت عليه بالغلط .. بس والله أني مو مركز ألا على الصور وكيف اسوي لها ريفريش ..خبرك البال توك بأشتراك وأنتم مسكرين المواقع كلها حقته ..

الضابط : باين أنك تبي تتعبنا معك باللف والدوران ..أنت جلست في هالموقع 3 دقائق ونص قبل ما تسكره وعلى طول قطعنا اتصالك لا تنكر كل شي مسجل عندنا

أنا : يا طويل العمر والله العظيم آخر ما كنت أفكر فيه هو التصفح ,كل المسالة مثل ما قلت لك كنت أسوي تحديث للصور وفجأة لقيت واحد حاط هالموقع قلت شكله موقع كله صور رعصت على اللينك ..ويوم مالقيت صور على طول سكرته حتى ما دريت وش مكتوب فيه ألا هو عن ايش بالضبط هالموقع اللي قايمة الدنيا عليه

الضابط : ابد سلامتك يحكي عن المعارضة وتنظيم القاعدة وطالبان ومن هالحكي فهمت الآن وش هالموقع على العموم احنا بنطلعك منها زي الشعرة من العجينة بس نبي نعرف من المصدر اللي أرسل لك هالموقع

أنا : سم طال عمرك وش شعرته وعجين .أقسم بالله العظيم أني مثل ما قلت لك ما أدري وش الموقع ولا أدري من أرسله طول الله لي عمرك بالعقل واحد داخل غرفة ( اراب ***) وش بترجي منه يدخل مواقع لا وتنظيم القاعدة والله لو يدري ابن لادن أني ادور على مواقع عن القاعدة في هالغرف أن يتفل بوجهي

الضابط: شف يا ورع ( شانت الأخلاق ) هالحركات حافظينها صم طبعا تستغلون مثل هالغرف علشان تلتقون على بالكم بتخدعونا بس عيون الأمن صاحية فاهم فأحسن لك تعترف

أنا : الله يأخذ النت كله وش جاني منه ألا المصايب ..يا طويل العمر شف لزق لي تهمة هاكر أمشيها ..واحد منحرف وتوديني للهيئة أبلعها بس معارضة وقاعدة ..هذي فيها جونتناموا وتطيير رقاب تبي حل أحسن شف أي سيارة مسروقة ولصقوها فيني ..ليه التعب ما تخبرون واحد مفحط وانحاش منكم قولوا أنه أنا بس فكني

الضابط: شوف أنا بغيتك تعترف بالأدب بس أنت مستلكع معي .. بأعطيك مهلة وبأحطك في التوقيف لين تفكر بعقلك وأنت تختار وش الأنفع لك … يا عسكري وده التوقيف لين نحقق معه بكرة ..

ويحطوني في التوقيف معي كم واحد .. منهم واحد وجهه صاير كله أزرق كل ما طالعت فيه يقول تراني هلالي متعصب لا تفكر انهم طقوني ما عاش من يطقني وواحد منحشر في زاوية يناظر في الجدار ويضحك وواحد شكله عربجي هو الوحيد اللي صاحي منهم قام يحكي معي

العربجي : حبوب يالشيخ ..ولا شراب

أنا : سم طال عمرك وش حبوبه ..حقت صداع ولا وش قصدك ترى عندهم صيدلية برى

العربجي : ( بعد ما تلني من ياقة الثوب ) تستخف دمك أنت ووجهك لا أنظف بك البلاط ولا أحشرك بين قضبان السجن .. ولا اربط لك أذنك

أنا : وشوله الله يسلمك البلاط نظيف ويلمع ..أنا بصراحة مدري وش أنت تقول ومرتاع يكفيني اللي فيني تجي أنت بعد تروعني فوق روعتي ترى والله مشتهي أصيح

العربجي : افا يا ضيعة الرجال تصيح يالبزر ..الله يفشلك شفني قدامك أربع صناديق شراب في شنطة السيارة ولا أهتز لي رمش ..لهم يومين يحايلون فيني يبون يعرفون من وين جبتها

أنا : شراب ..وش شرابه .. شراب كحه ..ممكن توضح لي أني من الروعة ما صرت فاهم شي

العربجي : انا مرزوق ولد أبو مرزوق يصيدوني معي شراب كحه وين باشتغل صيدلي على غفلة شراب ما تعرف وش الشراب ..عرق ..خمر فهمت ولا لا

أنا : استغفر الله بس وش لك في الشراب الله يهديك بس .. طيب وش تسوي بالأربع كراتين هاه

العربجي : أنا بدفنك هنا فاهم يعني أربع كراتين شراب ..وش أسوي بهم بأسقي بهم الزرع ..ما سددنا فاتورة الموية قاموا قطعوا الموية عن حديقتنا ..

أنا : لا أتكلم جد يعني على بالك بتلعب علي لو قاطعين عنكم الموية كان جبت لك سيارة تعبي خزانكم موية

العربجي : أقسم بالله بأقتلك أنت أهبل ولا بتهبل فيني هاه وش قصتك أنت معي

أنا : أنت خلك واضح معي وفهمني حبة حبة الله يرضى عليك ..

العربجي : محاكيك يشرب من وقت لوقت تعرف لزوم الخرمة ( الخرمة مرحلة ارتفاع في الدميجة والدميجة هي الراس ) .. وفي نفس الوقت يشتري من ناس ويبيع على ناس زقرت ويربح له كم قرش ..

أنا : الله يهديك بس ما تدري أنه حرام ..يا أخي أشرب لك فيمتو مركز ولا تخلطه مع موية ..محاكيك أذا خلص رمضان يمسك القارورة ..ويشربها سادة .. وبعدها بنص ساعة أبوس الجدران ..والحمدلله حلال في حلال

العربجي : ( خبطني على صدري ) وبعدين معاك أنت خلني أكمل السالفة .المهم واحد من الشباب دلني على واحد واصل أبوه منصبه كبير في وزارة الداخلية ..ويبيع كراتين واعدت الرجال .. وخذيت منه الكراتين على أني أسلمها لناس من الزبائن ما دريت ألا وهم كاشفيني المباحث و أسبوع على تصفيق وتكفخ أعترف من وين جبتها ..وأنا على بالي رجال كتوم … أهيء اهيء اهيء آخرتها قلت باعترف وياليتني ما أعترفت .. توني قايل لهم أسم الولد ,ابن من هو ألا تكفخ فوق الأول ويابن مدري ايش ومن المباحث للمخابرات ..لي أسبوع هنا ما غير أفطر على طراق .وامسي على طراق فيا ابن الحلال اسمع نصيحتي أذا مخبي شي أعترف ألا أذا هالاعتراف بيجي فيه واحد كبير ترى بتأكل تبن فوق العادة .. هذاني قلت لك

أنا : بس الله يسلمك أنا قضيتي غير تماما .تعرف الشبكة العنكبوتية ومشاكلها ..أنا تورطت في مشاكلها

العربجي : أنت يا جحش في احد يتاجر بالعناكب أنت وجبهتك ..وش تسوون فيها تشوونها ثم تشمونها ولا كيف بالضبط ..ولا تأكلونها نية ..يعني أذا قضمت العنكبوت ترتفع يعني ولا كيف

أنا : لا أقصد الأنترنت .. النت وش فيك يا رجال .. ما تعرفها ..

العربجي : لا تغلط علي لا أجلدك هنا فاهم ولا لا وش ما أعرفها ..مو البلاي ستيشن اللي يشبكونها بالتليفون في المقاهي ويجلسون الشباب يلعبون مع البنات صح ولا لا

أنا : ألا بالضبط عليك نور أثرك ذهين ..مرة واحد وأنا في البال توك أطالع بنات .أرسل لي موقع هالموقع سياسي وأنا على بالي أنه موقع يعني من اللي يحبهم قلبك ..فقمت فتحته وطلع سياسي وصادوني

العربجي : أبيه ..مافهمت وش أنت تقول بس أبيه ذا اللي يطلع بنات ..لازم تعطيني واحد فهمت

أنا : يا أخوي وش يطلع بنات ..المهم هم ماسكيني علشان الموقع السياسي وأنا ما أعرف من أرسله لي ويقولون أني أنا مشترك في تنظيم سياسي ولازم أعترف ولا بيوروني النجوم في عز الظهر

العربجي : أترك عنك هالحكي الحين البنات اللي يطلعهم اللي تقول عنه ..حقيقيات يعني تجي تجلس معك وتسولف ولا وشلون يعني بلاستيك ولا كيف ..طيب هي بتلبس على كيفي

أنا : وشلون أفهمه ايه بنت صدقية وتجلس جنبك بس ما تسوي لها شي ولا بتروجع مكان ما جت ..بس الحين وش أسوي يبوني أعترف وأنا ما سويت شي

العربجي : الحين يشوفون معك البنات ولا يقولون شي بس يلومونك على المكان يعني مطلع البنات عند أحد الوزارات ولا كيف .. والحين هالرجال مدري الجهاز اللي يطلع بنات تركوه يعني أقدر أروح له بعدين يطلع لي بنات ..ولا صادروه ولا وشلون ترى عندنا الداخلية كل ما خذوا شي صادروه ..من الشراب للحبوب والأفلام ليتهم على ما يصادرون يتلفون الا يأخذونه لهم

أنا : هم خذوه بس موجود منه واجد الآن شف لي حل ما أبي أخيس هنا وبكرة فضيحتي تصير في جلاجل ..

العربجي : قلت لك أعترف بس أذا فيها كبار بتظطر تأكل تبن وتبلعها بروحك وبس هذا اللي أقدر أقوله لك

مع أنه عربجي بس كلامه منطقي وصل أساس المشكلة ..ما في أحد أساسا أقدر أرمي عليه التهمة لأني أساسا ما أدري من أرسلها لي الواحد من الروعة نسى الصور اللي كان يشوفها أمس ..كنت أمس أسوي تحديث للصور كل شوي وما دريت من وين نط علي هالموقع … يعني لو كانت الصور مباشر بيصير عندي وقت اقرا المواقع اللي تجيني اها ..لو كانت الصور لايف . وواحد أرمي عليه التهمة ..لقيتها يا عسكري يا عسكري يا عسكري

العسكري : ايوة ايش عندك هاه فهمني .ليه تصرخ كذا فيك شي أنت مريض هاه

أنا : ناد لي الضابط قصدي أبي أقابل الضابط ضروري يا عسكري ترى أي تأخير أنت بتكون المسئول عنه

العسكري : الضابط مو فاضي لك انتظر لحد ما ينادوا عليك يا مواطن واسكت أحسن لك

أنا : يا شين قلت لك أبي أقابل الضابط علشان موضوع مهم أبي أعترف ..بسرعة ترى بكرة أقول له أنك رفضت أني أقابله .يالله رح ناد عمك الضابط ووجع

وراح العسكري وعلم الضابط أني أبي أعترف واستدعاني الضابط على طول وبدوا يحققون معي من جديد

الضابط : تدري لو كنت تستهبل ولا على بالك تستخف دمك قسما بالله لا أخلي كل ذرة من جسمك تغني سامري بروحها ..فاهم علي أنت ولا لا

أنا : لا وش دعوى في وسط المخابرات وأستهبل والله ما صارت أبي أعترف ما في فائدة من الأنكار

الضابط : يالله أعترف من وين ومن اللي أرسل لك الموقع وايش كان الهدف

أنا : والله ما أدري طال عمرك ..يعني لو بأدري بأخبي عليك

الضابط : شكلك تستهبل خذوه ودوه لمعمل 3 ج يجرب الطرق الجديدة في الحصول على الاعترافات

أنا : لا لا الله يهديك بس خلني أكمل كلامي أنا كنت أدخل منتدى (*****) الساحة السياسية .ومدري كم واحد اقنعوني أنضم الى تجمعهم للأمانة ما أعرفهم بس قالوا لي بنرسل لك اييميل افهمه زين وبعدين امسحه مرة واحدة ..وبالفعل وصلني الايميل .ومكتوب في الايميل أكون في غرفة ( ***) في البال توك وأكون باسمي اللي صدتوني به ..ويكون معي نيك أزرق زي بقية الزقرت اللي في البال توك ( الزقرت = ناس كشخه بس بلغة من أول ) المشكلة أني ما عندي نيك أزرق ..وحاولت أرد على ايميله أفهمهم هالشي بس التعليمات كانت واضحة أني ما أرسل لهم شي.وبالفعل دخلت على الموعد ..هو شافني وشك بأمري يوم شافني بدون نيك أزرق ..لأنه كان مغير اسمه عن المفروض اللي أعرفه .. فعطاني الموقع على أني اقراه زين وبتمعن .بس أنتم ما قصرتوا وقطعتوا الاتصال ..

الضابط : وش كان المفروض يكون اسمه هاه اعترف ..ووش أهداف هالجماعه؟؟

أنا : المفروض اسمه يكون السنجاب الطائر ..أما أهداف الجماعة متعددة كل شي عمليات انتحارية ودعوية وتفجيرات وانقلابات وشغب ..حتى الدوري وصلوا له على تخطيطهم يفكرون يحتجون على النحكيم بعد كل مباراة لأثارة الشغب

الضابط : السنجاب الطائر أسم كأنه مالوف يا ملازم محمد سو بحث في ملفاتنا عن السنجاب الطائر ..وشف وش نعرف عنه ..شكله خطير هالسنجاب ..طيب الآن وش الخطوة الثانية ..

أنا : أي خطوة ثانية خربتوا السالفة كلها أنتم ..الحين خلاص بح .. يا ويلكم من اللي فوق بيوبخونكم يا كم واحد بيتقاعد منكم ..والله يا شماتة العدويين فيكم

الضابط : احم احم فال الله ولا فالك طيب وش المفروض تسوي لو ما تدخلنا ..

أنا : قلت لي المفروض أني أدبر النيك الأزرق لو أسافر ,استخدم نت سنع من لبنان ولا من أي دولة ثانية وبعدين أدخل البال توك وهو يجي ويقابلني ..بس الآن بيشكون أني انصدت فأكيد راح يغير أسمه .الله أعلم وش بيسمي نفسه ..لحظة هم يقولون لو صار كذا ولا كذا ابقى أدخل في البال توك باسمك واحنا بنعرفك ونكلمك ونقول لك كلمة السر …بس ايه خلاص وش يفيد الحكي الآن كل شيء راح ..الحمدلله موقفي سليم حدي طراقين بس الدور والباقي على اللي بيتوبخون وتوبيخ شديد اللهجة

الضابط : يابن الحلال لا تفاول علينا شف أحنا بنعطيك نيك أزرق واستمر أدخل وقل اشتراكي انقطع قل أي شيء وأجلس أدخل النت لين يجيك السنجاب الطائر وساعتها نتجسس عليكم ونحدد موقعه ونعرف أهداف هالجماعة

أنا : لا يابن الحلال والله ما عندكم ألا الدجة خلاص كل شي راح السنجاب الطائر طار وخلص ..عادي ترى ياما ضباط مخابرات جاهم توبيخ بس قليل منهم اللي استمر في وظيفته ..عندك أبو محمد حارس متوسطتنا كان ضابط في المخابرات ونشط بعد بس كم سنة دارت الدنيا عليه ويجيه ذاك التوبيخ جلس على أثره في المستشفى سنتين ويوم طلع يالله نفع يكون حارس مدرسة متوسطة الله يالدنيا .

الضابط : يابن الحلال والله بتنفع الخطة أذا جربتها بس لا تتشائم الله بيوفقنا انشاءالله مثل ما قلت لك بنرجعك بيتك معزز مكرم وببنعطيك النيك الأزرق ..وتدخل على كيفك لين يقابلونك ويعطونك كلمة السر ألا وش كلمة السر ؟؟

أنا : كلمة السر .. ما عاد بدري .. بس يا حضرة الضابط أخاف يتأخرون علي يعني قالوا يمكن نكلمك بعد شهر ..يعني أخاف أبطي عليكم وكل ليلة لازم أجلس على الأقل 4 ساعات في النت على كلامهم

الضابط: يابن الحلال وش حارق رزك مو شهر خذ شهرين اللي تبي بس لا يجي التوبيخ ترى اللي قبلنا جاهم توبيخ صاروا حراس على مدارس متوسطة قل تم واللي يرحم والديك أحب رأسك

أنا : والله يا حضرة الضابط أنا أهون علي أتعاقب على غلطتي أني صدقت ناس حاقدين على البلد .. ولا أستمر أتعاون معهم بس علشانك والله ..بعد ضابط كبر الدنيا بكرة يجيك توبيخ,, قوية والله على العموم يا حضرة الضابط يعني الآن أقدر أروح لبيتنا …وبالنسبة للنيك الأزرق متى بترسلونه لي

الضابط : ما يمديك توصل للبيت الا بتحصله في ايميلك ..ابشر من عيوني الثنتين وأبيك من الليلة تدخل البال توك بيدينك ورجليك وتجول بين الغرف فاهم علي خذ راحتك لا تستعجل على شي

أنا : أبشر من عيوني الثنتين والله لو ما حلفت علي ولزمت ولا والواحد حامت كبده من اللي شافه في هالبال توك

وأرجع للبيت معزز مكرم وألقى على ايميلي بيانات النيك الأزرق واصلة وأدخل البال توك وأنصا غرفة (***) وسعة صدر الكاميرا طبيعية بدون تقطيع ولا كل شوي تسوي تحديث للصورة ..من زمان يالنيك الأزرق من زمان والله العظيم أثرنا ماحنا عايشين صدق أم أسود طلعت دبة وتحوم الكبد بس أم وردي كلها خير وبركة ..وأحيانا أخف باللي في الغرفة أكتب أن فلانة سوت حركة رهيبة ولا طلعت شي وما أشوف ألا الشباب مطامر يسوون تحديث للصورة وأنا أكرها ضحك ومرات أواعد البنات أدبر لهم نيك أزرق ومشتغل ترقيم والمنة عليهم بعد ..وبعد كم يوم أقول لهم والله البال توك كمبيوتر الأشتراكات حقهم خربان يا عمري ومن يوم للثاني يتصل علي الضابط ويسألني أذا شفت الجماعة وأنا مشتغل فيه تصريف لا والله توهم ما جوا شكلهم شاكين فيني الى الآن اصبر يا حضرة الضابط ..وماشية الأمور كذا ..وفي يوم من الأيام وصلتني فاتورة الجوال ألا صايرة 5000 ريال سعودي مو حامة كبدي وقافلة معي ..يلعن أبو أبليسهم ما يشبعون سرقة, الجوال 5000 ريال والثابت حق الانترنت 3500 ريال ..وغيرنا أنترنت ببلاش هذا وأحنا دولة نفطية وعلى قولتهم المفروض شايفين خير المهم ..دخلت البال توك وأعصابي واصلة حدها .. دخلت غرفة )اراب ***) وأبي أشوف شي ينسيني هم الفواتير غرفة فيها 123 شخص ما فيها ألا بنت واحدة مشغلة الكاميرة ولابسة بنطلون جينز ..بالله مشغلة الكاميرا علشان تورين العالم أن عندك بنطلون جنز ..وكم من واحد فاتحين الكاميرات اللي حاطها على جدار غرفته واللي مطلع شهر صدره فرحان فيه واللي حاط الكاميرا سودا واللي حاطها على ××× وشوي ألا الدلخ اللي حاط الكاميرا على شعر صدره يفتح معي شاشة برايفت

الدلخ : تشوفيني ..هاه وش رأيك بشعر صدري ترى ما خفي أعظم

أنا : روقنا تراني ولد الله يقرفك سو خير وسكر الكاميرا

الدلخ : ايه العبي غيرها .ما أحد يكشف البنات مثلي أنا,, كلكم تقولون كذا علشان تجلسون براحتكم وتستمتعون

أنا : يلعن شكلك وش استمتع حالق لحيتك و ملزق الشعر على صدرك بصمغ ..ولا تسبحت لك فوق شهر علشان ما ينفك الصمغ ..والله حومت كبدي ..

الدلخ : عطيني رقم جوالك ولا وش رأيك نتواعد و أذوقك الدنيا الحقيقية ما راح تنسين هالموعد ابد أوعدك

أنا : أنت يا ثور تراني ولد أشغل لك المايك علشان تتأكد ..واللي يرحم والديك حومت كبدي من جد سكر الكاميرا

الدلخ : على مين تلعبها على مين يابن الناس ..خويك معطيك النيك الأزرق ..أنا مستعد أعطيك شي أحسن تبين أنزل الكاميرا شوي علشان ترتاحين

أنا : واللي يرحم والديك لا الله يخليك لا توني متعشى وقافلة معي من شركة السرقات قصدي الاتصالات تجي أنت بعد مابزيتك يوم بتنزل الكاميرا شوي لا واللي يخليك

الدلخ : لا لازم أوريك يا حياتي شكلك تعبانة ومكبوتة علشان تفكين عن نفسك شوي

أنا : مأنت جاي بالطيب ..أوريك .كم رقمك( جيت برجلك يالسنجاب الطائر ..أخلي الرجال يتفاهمون معك ) هات رقم جوالك يا حبيبي واستناني لين اتصل عليك

الدلخ : رقمي هوا 054/////// يالله يا حياتي استناكي تتصلين علي

وارفع سماعة التليفون أبي أدق على الضابط وأقول ان هالدلخ هو نفسه السنجاب الطائر ..بس في آخر لحظة تعوذت من أبليس مهما كان هذا سعودي يعني حرام بكرة يكبر ويعقل وش ذنبه يروح في خبر كان..و علشان أقصر الشر ومثل ما يقول راشد الماجد ابعد عن الشر يا عمري وغني لوه تركت الغرفة كلها ورحت لغرفة أجنبية وموسع صدري مع أمريكيات و أستراليات الواحدة منهم ما عندها عقد ترمي قطعة الملابس زي الس اس السلامو عليكو وفي الغرفة وسعة صدر ألا شوي ينط لي واحد نشبة شكله ألماني

الألماني : هي بيبي ..تيرن مي اب .ام ويتنج فور يو ( يالله يالبزرة شغلني .قصدي ولعني أنا أنتظرك )

أنا : كش كش ايام نت بيبي أيام مان جو اواي ( اها بس فارق هناك يالله ..قال بزر قال أنا أرجل منك يا دلخ )

الألماني : اوه يو شاي ارنت يو دو يو وانت مي تو ستارت فيرست اوكيه واي نوت واتش ماي كام اند جست دو لايك مي ( مستحية يا بعد قلبي ..تبييني أوريك وش تسوين شوفي كاميرتي وسوي مثلي يالله عفية على الشاطرة )

أنا : لا أنا قهوة ..لحظة أشوف الكاميرا ..وجع .هي ..هي يو يو ستوب ات يو مايك ماي ليفر فلاي اراوند اوفر ستوب جود دام يور بارينتس ( صك الكاميرا واستح على وجهك تراك حومت كبدي صكرها يالله الله يلعن والديك )

الألماني : نو نو يو شو مي فيرست ذين وي كان دو انوذر ستف هي كموون ( لا لا لا علي الطلاق ما أسكرها ألا أذا شفتك أول وبعدين نسوي أشياء يحلبها قلبك )

أنا : أعوذ بالله من الشيطان الرجيم يعني مصر يا أبن اللذين من عيوني الثنتين أنت جاي في وقتك تمام جابك الله يالسنجاب الطائر … أوكيه مان يو وون بت نت هير أي دونت ترست ذا نت بليز جيف مي يور فون نمبر اند يور نيم اند يور ادريس اند يور ايميل باي ذا واي ..جست ويت فور مي ون هاور ذين أي ويل كول يو ذين ويل كوم تو جيرماني نير تو يو .(طيب يالقوي أنت فزت بس شف عاد هالنت ما أثق فيه . أنت عطني رقم تليفونك وعنوانك وايميلك واسمك بالكامل وكلها نص ساعة وأتصل بك يا بعد عمري أنت وبعدها أزورك في ألمانيا بنفسي )

وعطاني هالألماني رقم تليفونه وكل بياناته ..عاد أنا قافلة معي من أول اليوم من يوم ما شفت فواتير التليفون وأتصل على الضابط في المخابرات ..

أنا : أبشرك يا طويل العمر أتصل بي السنجاب الطائر وعطاني عنوانه الكامل تبيه طال عمرك

الضابط : حيالله هالصوت الله يبشرك بالخير .هات البيانات وما عليك ..وأنسى الموضوع كله لا شفناك ولا شفتنا

أنا : هذا هو المطلوب يعني انشاءالله أعطيكم البيانات وخلاص ..بس طال عمرك ياليت بالنسبة للنيك الأزرق في البال توك تطمطمون عليه ولا تقولون أنه أنتهت صلاحيته .تعرف طال عمرك شباب طائش يبي شي يلهيه أحسن من رفقاء السوء ..قل تم طال عمرك

الضابط :ايه يا أبن الحلال أبد هو لك ونكتب في الملف أتلف تحت عنايتنا وخلاص … بس هات البينات حقت السنجاب

وعطيت الضابط بيانات السنجاب قصدي الألماني ..وسكرت السماعة ..وعلى كذا المفروض القصة انتهت بس القصة ابتدت من حيث لا أدري

ثاني يوم الفجر ..لقيت المباحث يقتحمون بيتنا مرة ثانية و هالمرة حتى شباك غرفتي لقت جنديين يدخلون منه .. والضابط اللي كلمته أمس بالليل أولهم

أنا : خير خير يا حضرة الضابط وش فيك رجعت في كلامك أفا بس مو تقول خلاص أنت انتهت علاقتك بالقصة

الضابط : اسكت يا متهم ..أنا أتفق معك أنت يا مجرم ..يا بتاع الأجرام ..ياللي تخون بلدك بالأنضمام للجماعات الملتوية

أنا : أي جماعات الله يسلمك أنت عارف القصة وقلتها لك ..ولا نسيت غورر بي يا حضرة الضابط والله العظيم ولا أنا وين وهالشغلات وين ..أنا كفو تنظيمات وقاعدة .رحم الله أمرء عرف قدر نفسه بركة مني أذا وزعت لحم الضحايا في العيد

الضابط : اسكت أنت كذاب وكل المعلومات اللي تقولها مضللة بس بتوفيق من الله ومن ثم من المسئولين تمكن جهازنا المتين من كشف كذبك وأدعائاتك ..هاه ..

أنا : أي أدعائات والله يا حضرة الضابط ..ماني فاهم وش القصة وش صار مو مسكتوا السنجاب الطائر

الضابط : شوف لا تجلس كذا تأخذني بالحكي أنا ما أعرف ايش بالضبط الأوامر وصلتنا نعتقلك ثم نرحلك

أنا : لا واللي يرحم والديك كل شي الا جونتناموا ..ترى الصور اللي تجي في الانترنت من هناك قسما بالله ما تخلي الواحد يرقد وشلون أروح هناك ..وش فيه الحائر أقله صناعة وطنية

الضابط : جونتناموا لا بس مو مستبعد يودونك هناك بعدين ..هم بيرحلونك للندن علشان الانتربول يبيك

أنا : الله أكبر الأنتربول بكبرة يبيني وش عرفه فيني ..الشرطة وهي الشرطة ما رحت الأ لمركز منفوحة يوم صدمت هندي من ورى .وآخرتها تصالحنا وخلاص ..قسما بالله شرطة الشمال ما أدلها وينها فيه ..وش بيوديني للأنتربول

الضابط : لا تعطلنا يالله ألبس وخذ لك كم غيار وفرشاة أسنان ومعجون قضيتك شكلها مطولة ..يالله في طيارة بتوديك

أنا : طيارة بتوديني بروحي وين الوليد بن طلال على غفلة . واللي يرحم والديك قل لهم مالقيتهم تراهم ما يخالفون .ولا أقول لقيتهم يصلون عليه ..والله خايف الانتربول مرة واحدة ومنها لجوانتاناموا مباشرة ضيعة مستقبل

الضابط : وبعدين يالله لا نتأخر على الطيارة ..والله يرحمك مقدما …. وفعلا خذت شنطة ملابسي ومعجون الأسنان ومصحف .الواحد هناك ماله ألا الله ..و ركبوني الطيارة وعلى لندن ومن مطار هيثرو الى مقر الأنتربول هناك ولقيت ضباط أشكالهم تروع دخلوني مكتب كله أسود في أسود وبدوا التحقيق

( الترجمة هنا فورية )

الضابط الأنجليزي : منذ متى وأنت تنتمي الى تنظيم القاعدة ..وما هي الأدوار اللي يسندوها اليك

أنا : أنا والقاعدة ..هلا والله ..واحد ينادي لي أمي ..وش قاعدته غربلك الله لا يسمعونك الأمريكان بكرة يصدقونك ..أنت ووجهك مدرس التفسير في المتوسط طاردني 6 حصص يقول أني اضحك وسط الحصص .. دولابي في بيتنا مليان أفلام ومجلات من اللي يحبها قلبك أتحداك تلقاها حتى هنا في لندن . خلنا من هذا كله .. شف خشتي تمقل فيني زين هذي سحنة واحد منتمي للقاعدة .

الضابط الأنجليزي : أنت تتعبني ..لقد أعترفت في بلدك أنك على علاقة بالسنجاب الطائر ..ولكنهم لم يأخذوا منك معلومات أكثر من تلك من أجل هذا أحضرناك الى هنا

أنا : واللي يرحم والديك ذوليك مخفات لعبت عليهم علشان أخذ النيك الأزرق وحتى السنجاب الطائر نصبة يوم أزعجوني كل شوي متصل علي الضابط هاه اتصل بك ولا لا ..ساعتها طلع لي ولد الحرام الألماني وحبيت أبلشه بس

الضابط الأنجليزي : ايه ايه أقول يا بو الشباب مو علشان أنجليزي تعتقد أنك بتلعب علي تراني مولود في منفوحة لندن ويوم حرب الخليج جندي سعودي لعب علي قال رح حي النسيم تراه حي راقي .ورحت هناك وعيال النسيم لعبوا بي لعب فاهم أنت ولا لا ..أجل سالفة السنجاب الطائر تلفيق أيه هين هذا وأحنا معتقلينه ومحققين معه وأعترف بكل شي و أنك شريك له و كنتوا تخططون لعملية في وسط لندن على أساس أنك بتجي ألمانيا ومنها على أنجلترا

أنا : نادوا لي أمي من جد فيني صيحة وش السنجاب الطائر اللي ملفقه من رأسي طلع صدق .وش تخربطون أنتم ترى والله ما عندي قلب لمزح ثقيل زي هالمزح ترى أموت خافوا الله فيني .. بالعقل الألماني اللي مسكتوه قال لكم أنه يعرفني ولا قال لكم النيك نيم حقي في البال توك لا بارك الله فيه من نيك أزرق من أخذته ودنياي مختبصة ليتني ما أخذته ولا عرفته صدقني يا الأجودي ..ترى السالفة كلها فيها لبس

الضابط الأنجليزي : أولا السنجاب الطائر مو ألماني هو جزائري الأصل معه جنسية ألمانية ..وما أنكر أي شي من وقت ما أعتقلناه ليه أنت تنكر فهمني هاه ليه

أنا : وطلع جزائري بعد يا سلام يا سلام في جونتاناموا بتصير فلة سعوديين وكويتين وأماراتيين ومن الجزائر بعد .يا طويل العمر أقسم لك بالله أن كل هالسالفة تأليف من رأسي لا بارك الله في هالدميجة …السالفة مثل ما قلت لك حجر لي هالألماني مدري الجزائري اللي هو .وكل شوي يقول شغل لي الكاميرا وورني مقفاك ..وأنت مجرب عيال النسيم وعارف أن المقفى عيب عندنا المهم قلت له لا يابن الناس خلني بروحي تراني توني بكر وراي أهل يذبحوني لو فضحتهم وهو رأسه وألف سيف ألا يشوفني قلت له عطني كل بياناتك وما عليك أنا أجي لعندك وقال لي اسمه أنكر مدري بن ماتيوس ولا ابن من ورقم تليفونه بس وعطيتهم مخابراتنا هذي كل السالفة

الضابط الأنجليزي : قلت لك أنه جزائري الأصل واسمه فارس ..وسبق له أن عمل في أفغانستان لفترة ثم عاد الى بلده حيث اعتقل ومن ثم هرب ولجأ الى ألمانيا وتزوج من سيدة ألمانية وحصل على الجنسية الألمانية

أنا : أجل عمل في أفغانستان ما قال لك على كفالة من اسمها راح يجاهد هناك

الضابط الأنجليزي : أذن أنت تقر بأنك تعرفه اها لقد اعترفت المثير حقا هو أنت ..لقد رجعنا الى شقيقتنا المخابرات الأمريكية وزودونا بمعلومات خطيرة عنك …هل تريد أن اقرئها عليك

أنا : وينتس يا يمّه ولدك عبدالعزيز صار له ملف في المخابرات الأمريكية ..عقبال الهيئة .. ايوة وش قالوا عني

الضابط الأنجليزي: لا افهم لماذا تستمر في الأنكار ..هل تعتقد أنك سوف تستطيع خداعنا ..هاه .( قلب مسلسل عربي ) يا ولد الناس أعترف بالطيب لا نوريك الويل …قالوا أنك تكررت زياراتك الى أمريكا ولك أنشطة مريبة في الانترنت .. بالأضافة أنك سبق أن سجلت في جماعة التوعية في المدرسة في المرحلة المتوسطة

أنا : يا طويل العمر واللي يخليك لعين ترجيك مالت عليك من العين اللي بترجيك .. جيبوا لي ابن اللذين أنا أواجهه بس كذا ما يصير يعني هو يومه أعترف تصدقونه وأنا ولد الشغالة مالي رب تصدقوني

الضابط الأنجليزي : مو أنت أعترفت من قبل للمخابرات ا لسعودية ولا طلعت بزر ترجع في كلامك هاه

أنا : قلت لك حبيت أستخف دمي بس توبة أن طبيت للنت مرة ثانية أذبحوني أجلدوني تفلوا بوجهي خلاص

الضابط الأنجليزي : لن نصل لاتفاق سوف نحتجزك في السجن علشان تراجع نفسك ..أعترف ولا نعرف نخليك تعترف لا يغرك أنجليز ترانا أوصخ من أكبر وصخ في هالدنيا

وخذوني للسجن طبعا سجن كبره 2×3 متر ..وما فيه أي شي من الترفيه وحاطيني بروحي ما غير حارس يمر كل خمس دقائق ..أنا أبي أشوف هالألماني مدري الجزائري وأتوطا في بطنه بس .. ولحسن الحظ موزي في شرابي 50 جنيه استرليني .لما مر الحارس عرضت عليه فلوس بس يخليني أقابل الجزائري ..ووداني ( يقولون أجانب ما يقبلون الرشوة ايه هين) ولما شفته أني باغي أتوطا في بطنه بس يوم تأملته زين في لبس في الموضوع بقوة .. السنجاب الطائر مدري فارس .. عمره بالقليل مرة مرة أن تصاغرته 66 سنة ..ومع أحترامي يعني خشته مو خشة واحد مقبل على النت … قلت للحارس يطس شوي..طبعا أنا معطيه 10 جنيهات أسترلينية وواعده أذا خلصت بأعطيه 10 جنيهات أخرى .وأبدى أتكلم مع فارس

أنا : الحين أنت ياللي ما تخاف الله ..تعرف للنت ولا بس تتبلى علي يوم قالوا لك أعترف أعترفت على طول

فارس : ايش ..شو بتقول هكه ماني فاهم شي شو أنت عربي مثلي بتحكي عربي طب أنت مسلم

أنا : أنا ما تعرفني وتقول ورني مقفاك الى الان مصر يا حظي ..

فارس : شو ماني فاهم شي لو سمحت تشرح لي يا أخي ايش اللي حاصل

أنا : مو أنت اللي تدخل البال توك ..هاه مو أنت في غرفة (***) هاه يوم تنشب لي وتقول لي شغل لي الكاميرا وورني وورني أقول لك أني ولد وتقول ولو ما يخالف أنا أحب العيال هاه ذكرت ولا لا ..ولا من كثر فضايحك على النت ما صرت تذكر

فارس : يا أخي ماذا تقول ما هو البال توك وما هو الانترنت ..أنني لا أعلم عن ماذا تحكي ..

أنا : علي أنا قل الصدق تدخل الانترنت وتزور مواقع بايخه هاه أعترف .ولا بتقول بعد ما عندي كمبيوتر .هذا اللي ناقص .. أبي أعرف ليه بس توهقني هذا اللي ودي أعرفه

فارس : يا ابني علاقتي بالكمبيوتر زي علاقتي باللغة الصينية ممكن نحكي فرنسي أذا بتسمح

أنا : وأنا ناقصك علشان نحكي فرنسي .. أنت مو أعترفت أنك تعرفني وشلون تقول الحين ما أعرف الكمبيوتر ولا النت

فارس : كويلي لي بوغبليم ( وش المشكلة بالفرنسي ) يا أخي عن ايش تقول أقسم بالله لا أعرفك ولم أعترف بشيء من وقت اعتقالي وأنا لم أقابل أحد يفيدني لماذا اعتقلت

أنا : لا يا شيخ مو أنت اللي رحت أفغانستان وجاهدت ورجعت ..وأعرست على ألمانية و تنتمي لتنظيمات أرهابية

فارس : أفغانستان ايش يا بني أنا ركبت على ظهر مركب من الجزائر الى فرنسا وسجنتني الشرطة الفرنسية وعندما حان وقت تسفيري هربت لألمانيا مرة ثانية ..أعتقلوني هنا وحاولوا أن يسألوني ولكن لا أعرف اللغة الألمانية و اضطروا أن يوقفوني الى أن يحضروا مترجم ..بس هذي قصتي …

أنا : لحظة شكله مو أنت بأنادي الشرطي شكله وداني لواحد ثاني ..

وأنادي الشرطي .. اللي يعرف شوية أنجليزي وأكد لي أن ما في عربي في هالسجن غيري أنا وهالفارس .وهو المعني في نفس قضيتي….

وثاني يوم الصبح أزعجهم أبي سفيرنا جيبوا لي السفير ( اللي يسمعني يقول مرة السفير ينتظرني أطلبه علشان يجي ) . ويستدعوني للتحقيق هالمرة والضابط الانجليزي يجيب لي رئيس المخابرات علشان يحقق معي

رئيس الانتربول : قالوا لي أنك أنكرت وتحاول خداعنا ..هل هذا صحيح ..

أنا : أقول اها بس. أهجد أصلا ما سويت شي علشان أنكر أنا بريء ولو سمحتوا يا ترجعوني لديرتنا يا تجيبون السفير

رئيس الانتربول : ولكن نحن لدينا أدلة كافية تدين تورطك بالأضافة الى معلومات من السي أي ءا .. يعني لا فائدة من الأنكار … زين يا روح أمك

أنا : أقول يا بو الشباب تلعب على مين أبي أفهم .. الحين تنصبون النصبة و تصدقونها ..

رئيس الأنتربول : أشوف الأخلاق ما تنفع معك .. وش عندك ..احنا بنلبسك أياها عندك مانع … لاو فوق ذا كله بنقول عنك أنك شاذ ومتعسف وعندك هوس جنسي مع الحيوانات .. وكل العالم بيصدقنا … أبوك لا أبو من جابك … سعودي ما يجي باللين .. تفو على هالوجه

أنا : ممكن اسأل سؤال ..ليه أنتم بتلبسوني أياها ..أحد يعاف الذبيحة ويرضى بالشاورما عندكم تنظيم القاعدة ..حسيتوا الناس ملت دوروا لكم فلسطيني ..زهقتوا منهم ..عراقي بس ليه أنا

رئيس الانتربول : تبيه كاش .. يابو الشباب .. بس ما تضحك علينا ..قول في ذمة أمي وأبوي ما أضحك

أنا : لا منيب ضاحك بس وش السالفة شكله شي يفشل مرة ..

رئيس الانتربول : واحد يهودي أبوه في المخابرات الأمريكة تحاد مع هاكر سعودي على من يخرب مواقع أكثر يعني اليهودي بيخرب مواقع سعودية أسلامية والسعودي بيخرب مواقع يهودية . وقم أنت يالسعودي وفز عليه ..ضف له يجي فوق 20 موقع يهودي ..مير أنت ياليهودي مانتب كفو تراهن وتحديات .. ..أجل تصدق هالرخمة متمعلق في موقع ويالله يالله يسكره …

أنا : وبس هذي كل السالفة …

رئيس الانتربول : اصبر تجيك السالفة ..الولد صار فشيلة ما يقدر يدخل شات الياهو عقب هالفضيحة يوم درى أبوه ..وقم وسووا خطة قال له بنصمم موقع بالعربي على أنه أحد مواقع القاعدة وابن لادن ونعطيك معلومات هالموقع وتتحدى مع السعودي أنك بتخربه في دقيقة ..وقام هالرخمة وتحاد هو معه مير هالسعودي تقول مهوي ..وقم وأسرق الموقع من جديد ولا قدر الرخمة ( اليهودي للي داخت روسهم بس ) أنه يخربه … وقام هالسعودي ينشره في الشات على أنه قدر يسرقه ويسيطر عليه..المهم ربعكم في السعودية ..دروا عن الموقع بس ما دروا عن السالفة

أنا : وأنتم عاد قلدتم وشلون نداري هالفضيحة .. وصارت اللعبة صدق وصار الموقع صدق تبع ابن لادن وربعه .. و على طريقكم ضفيتوا لي هالجزائري في الدرب وأنتم عارفين أنه ما عنده ألا مخالفة أقامة صح

رئيس الانتربول : والله يعني الحق ينقال الواحد ما وده يكذب لا يدخل النار ولا يحط في ذمته أي صح

أنا : كويس طيب عندي لك خبر حلو بما أننا صرنا ربع ..وصداقة أن في شي فعلا اسمه السنجاب الطائر وهو في لندن هنا مو في ألمانيا .. وعنده نيك نيم أزرق وطول الوقت الماضي كنا نحكي مع بعض بالشفرة

رئيس الانتربول : ايه صح صدقت تخف بي أنت ووجهك الحين لا أهفك بأقرب شي عندي قال ايش في سنجاب طائر لا وفي لندن بعد وأحنا ما ندري عنه

أنا : براحتك والله حاولت أساعدك دامها خاربة خاربة خلينا نعميها .. على العموم لا تصدقوني أنا كذاب

رئيس الانتربول : من جدك تتكلم ولا لا طيب وش عنوانه وش اسمه ووش ايميله ترى فيها توبيخ والله العظيم عاد لا يغرك أننا في لندن توبيخنا ما يفرق عن توبيخكم شي واللي يرحم والديك أعترف ونطلعك منها زي الشعرة من العجينة ..هاه وش قلت

أنا : لا يا شيخ على مين تلعبها .. تبي أثق فيكم يالله تقلع هناك بس

رئيس الانتربول :أحب رجولك أستر علي ترى ما بقى لي ألا سنتين وأطلع تقاعد لا تشوه فيني قدام الله وخلقه

أنا :رح للسي أي ءا خلهم ينفعونك ..

رئيس الانتربول : أي مخابرات أمريكية وأية خرابيط والله ما وراهم ألا الدجة لو فيهم خير ما كان تناتقت عمايرهم قدام عيونهم ..الله يستر عليك دنيا وآخرة أستر علي وساعدني ولك اللي تبي ..تبي الجاكوار اللي برى هي لك بس وافق ..لا تكسفني تراني كبر أبوك

أنا : المسألة معقدة يعني لو وافقت أساعدكم لازم أرجع الرياض علشان شفرة التفاهم هناك ..هذا شي غير أن المخابرات السعودية بيقولون هو وش رجعك بدري ..وأن قلت لهم السالفة الحقيقية بيقولون أني أنصب وأدعي عليكم ..ومو بعيدة يتهموني أني منحاش ويرجعوني لكم يعني شغلة ..

رئيس الانتربول : ولا يهمك نقول أنك بريء .. نقول أن الجزائري طلع نصاب .. ويبي يتبلى على أحد علشان التهمة تطيح من عليه ..وش بعد

أنا : لا حرام الجزائري مسكين يا تعطونه أقامة يا ترجعونه ديرته يالله حسن الخاتمة . دوروا لكم واحد من المهطبلين ( المهطبلين جمع مهطبل والمهطبل باللغة العربي الفصحى هو المقلع ..والداج في دنياه وآخرته ) وتلبسونه التهمة وأنه يحاول يشوه سمعة الأسلام والعرب … وتعلمون ربعنا في السعودية .. زين

رئيس الأنتربول : تم وغيره وش تبي أنت بس ..

أنا :وبعد يا طويل العمر تعرف النيك الأزرق حق البال توك اللي عطوني أياه في السعودية ..صادروه وأتلفوه ..فيعني أذا ما عليكم أمر تعطوني واحد جديد بداله .. خصوصا الاشتراكات ممنوعة في السعودية …و أذا ما عليكم أمر بعد مابي أزعاج ولا يحزنون أذا جتني معلومات أرسلتها لكم على الايميل .والله أن أزعجتوني لو بايميل أني ما أتعاون معكم ابد وساعتها السنجاب الطائر يوريكم شغل الله ..أن ما قلب ليلكم نهار ..ما أكون أنا ..

رئيس الانتربول : الله يسلمك ويخليك فوق رأسنا ذخر أنت تآمر أمر …بس لا تتأخر علينا الله يسلمك

أنا : ايه يصير خير انشالله .. وشف في البال توك أحب الخصوصية أذا حسيت أنكم تراقبوني قسما بالله أبطل ( أبطل بالسعودي يعني أصير بزر ولا أكمل لعب معكم ) فهمتوا

رئيس الانتربول : الله يسلمك موافقين وأبشر ما راح تسمع لنا حس ابد في شي ثاني

أنا : لا مالت عليك يالله أبي أرجع لديرتي ولا تنسون تطلعون فارس ترى أعرف رقمه وبأتصل اسأل عنه فاهمين

وطلعت من الانتربول الى مطار هيثرو وعلى أول طيارة للسعوديةبعد ما أكدوا رسميا برائتي واللي حصل مجرد لبس.

أما النيك الأزرق الجديد اللي عطوني اياه فعطيته لهندي كان معي في نفس الطيارة بيتوقف في السعودية بعدين بيروح للهند .. و أول ما وصلت الرياض نصيت الكمبيوتر ودخلت البال توك بأشتراك عادي وعلى نظام الصور الثابتة وكل شوي تفرفشها .. وحفظت لي كم صورة لأم أسود وأم وردي و بعد شهر أرسلتها في ايميل لرئيس الانتربول وقلت له

( هارد لك نيكست تايم ..باي ذا واي يو كان انجوي ذيس فري بيكتشر بيتر ذان باي بلاي بوي مجازين بيهاند يور وايف اني واي ذا بلاك ون از فلاينج سكريول أند ذا بينك ون أز جست جيفت فروم مي تشاو …..) خيرها بغيرها يالداج وفي الايميل شوية صور يمكن يونسونك أحسن من المجلات اللي تشتريه من ورى علم زوجتك زين يا شاطر … ترى أم أسود هي السنجاب الطائر أما أم وردي فهي هدية مني ..والله الله بالفياجرا وكودها تنفع ..والله لا يتكلنا عليها

وبعدها حذفت البال توك كله ..وعلى قولة المثل الباب اللي يجيك منه الريح سده واستريح … صدق الواحد ينبسط بالصور اللي يشوفها وكل شوي يسوي تحديث وكل أمنيته نيك أزرق ..بس في الأخير حمولة ذنوب مجمعه ما تسوى من يضيع وقته يشوفها هذا للي ما فهم المعنى الحقيقي من القصة

أتمنى أن تكون القصة أعجبتكم وحازت على رضاكم

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة