السلام عليكم ورحمة الله وبركاته تم طرح هذه القصة في هذا التوقيت ..مراعاة لبعض الظروف النفسية للكثير من الشباب والشابات …فقط أردت لفت الانتباه الى هذا …
بعد أسبوعين من بداية أجازة الصيف ..وأنا توني مصحصح على الساعة 3 العصر ..وأمي تهاوشني ليه ما تقوم تصلي الظهر في وقتها مو تنتظر وقت العصر يدخل وأنت خايس في مرقدك يا ولدي خاف ربك في الملائكة اللي على كتفك خاسوا من كثر نومك …
أنا : لا حول ولا قوة الا بالله والله يا يمّه عندنا حر يا هقوتي أنه يطير الملائكة من جد .. المهم وش فيتس اليوم مصحيتني بدري ..
أمي : وش بدري جعلك ماني قايلة ما بقى شي اليوم وراح .. وأنت خايس في مرقدك
أنا : بشويش يعني لو قمت بدري غير أني أموت حر وأتصبب عرق وش بأستفيد .. اطلع للكورنيش ولا أمر السينما ولا أتمشى في السوق اللي فاتح طول الوقت ولا أقول لك بروح النادي يا بنت الحلال خليها على الله صيفنا معروف يالله من فضلك هم خمسة شوارع مراكز التجمع وغيرهم وكلا على هواه ..طريق الملك فهد والتخصصي والعليا والأمير عبدالله والأمير سلطان ..والمحششين طريق الثمامة ..واللي ما منهم رجا طريق ديراب ….
أمي : خل عنك الحتسي في السياسة ..وأذا صليت العصر أطمر اشتر مرتبتين و مخدات جديدة وكم شرشف ترى ولد خالك بندر وأخته موضي بيجون من الديرة و بينامون عندنا من بكرة … والله الله وأنا أمك توص لنا في الشي الغالي مو تدور الرخيص وتوفر الباقي في جيبك …
أنا : يا والله عليتس أخو قبل العام رايحين يصيفون في بيشة حسبي الله عليه رايح بقرود والعام حفر الباطن والخفجي طيب يابو الشباب رح للكويت على الدرب … وهالسنة قال لك بيسفر عياله للرياض عسا بنيدر بيأخذ لغة بس في الرياض ..
أمي : بعد ما رجمتني ببيالة عمى يعميك ويقطع آذانيك كل شي الا أنك تحكي في خالك أذا فيك خير أحك في عمانك يا قليل الحياء أما خوالك والله لو تطريهم بشي موب زين لك لا أخليك ترقد برى البيت ..ثانيا عيال خالك عيال خير وعيونهم ممتلية …يحبون السياحة الداخلية …مو مثلك يالداشر أنت وعيال عمك اللي في القاهرة واللي في دبي وأنت رايح جاي على البحرين ..وش عندك في البحرين بكرة أذا جيت بتخطب بنستحي وش نقول للناس أذا شافوا جوازك ..عنده بعثة في البحرين ..
أنا : يا دين الله أذا قلت زوجوني قلتوا اصبر لين تتخرج وتعتمد على نفسك ..وأذا رحت البحرين قلتوا وشلون بنخطب لك ..لا تخافين الله يسلمك عامل حسابي مجمع تذاكر أفلام السينما اللي دخلتها في البحرين كلها وكل واحده عليها التاريخ يعني اللي بيفتح فمه يا ويله …ثانيا انغثينا سياحة داخلية وخراط فاضي أذا رحنا تقولين يهود مو شباب ما فيه كل شي ممنوع ومصكوك بوجيهنا آخرتها في جدة العام يجي هندي يشوفنا نأكل في قسم العزاب قام وأخذ الكراسي قال يبونها في قسم العوائل بالله عليك وش نرد عليه ..وكله كوم والهيئة أذا طلعنا قاموا يبزرون عيونهم ..المشكلة اللي طالع بخويته وسيارته كشف ومشغل مسجل على أعلاه مطنشين ..بس يدورون واحد معه كريسيدا ولا كورولا حتى الماكسيما صاروا يخافون منها
أمي : اها بس لا يكثر أنا سو اللي قلت لك عليه ولا يكثر المهم خالك وراه شغل بيجيبهم بكرة وبيمشي للديرة على طول أبيك أنت عاد تمشيهم وتوسع صدورهم لأنهم بعد بكرة السبت بيروحون للجامعة يقدمون .. انشاءالله
أنا : بس يعني علشان ما يطقون مشوار على الفاضي ..كم نسبهم ترى الجامعة ما صار أحد يدخلها ..العام رافضين واحدة نسبته 90 اقسم بالله الولد انهبل وقام يبيع مناديل وعلوك عند مدخل الجامعة … لا يصيرون عيال أخوك تيوس ..
أنا : وشوله كمبيوتر البلاي ستيشن أونس … ولا ناوية تدخل انترنت ( ياشين اللي يستهبل على أمه وفي الظهر وهو توه قايم من النوم )
أمي : بعد ما أرسلت الأبريق كله في وجهي مع أني ما قلت لها أبي شاهي .. تستخف دمك بنت خالك تبي تدخل كلية الحاسب ..وتطلع دكتورة كمبيوتر الله يحرسها من العين
أنا : أجل دكتورة كمبيوتر زين والله بعد أذا صخن واحد من كمبيوتراتنا بدال ما نوديه للغريب نوديه لها تعالجه ..اسمها مبرمجة كمبيوتر يا يمّه مو دكتور كمبيوتر ..على العموم مو مشكلة اليوم اشتري المراتب والشراشف والمخدات .. هذا مقدور عليها بس وين أمشيهم وين تقترحين علينا نروح في الرياض ..وغير كذا ما تعودت تركب معي بنت يعني والله يمكن أخق وساعتها لو مسكتنا الهيئة وش بأقول ما تعودت شكلي بأصيح ..
أمي : استح على وجهك بنت خالك حسبت أختك المفروض تخاف عليها أكثر من نفسك ..محسوبة عليك وأنا أمك
أنا : أنا أحكي واقع مرير ..المفروض أنتي تعوديني أجلس مع بنيات أذا جت بنت مع أمها تناديني نرقى فوق غرفتي ( أمنيته وأمنية كل شاب سعودي ما عنده أخت ) مو أذا جوتس حريم لحطتيني ( لحط ّ = بتشديد الطاء معنى طنش واحتقر واصتصغر وهنا بمعنى استبعد ) من البيت يالله يالله حدي الملحق .. من كم سنة ما لمست ولا بنت الا أنتي وخالاتي ..جاني مشق يا يمّه , ترى التربية الحديثة تستنكر هذا الأسلوب أعرف واحد من الشباب مثل حالتي أول ما أعرس جلس أسبوع كامل يلمس في زوجته يبي يتعود على النعومة ..خافوا الله فينا يمّه الشغالات صاروا يخافون منا
أمي : ما ودك تنفهق وتطس بس سو اللي قلت لك عليه ولا يكثر …
ورحت جبت اللي وصتني أمي عليه ..وثاني يوم العصر كنت نايم طبعا الى الساعة 5 المغرب ألا خالي جا وراح حط عياله عندنا و هو توكل على الديرة و أنزل الصالة طبعا ما تعودت في صالة بيتنا حريم غير أمي فأنواع التثاوبات بمناسبة توني صاحي من النوم ..ألا اسمع أمي تقول لي أصبر اصبر تغطي يا موضي و واحد هرش ينطلق علي أصبر لا تنزل ..وعيوني مليانة كلها غمص ..و أتمقل في الهرش ألا هو بندر ولد خالي
بندر : هلا عبدالعزيز كيفك وش مسوي عساك بخير أنا الحمدلله بخير وصحة وسلامة والله مشتاق لكم وعارف أني قاطع بس وش أسوي ظروف الدراسة هي اللي كانت مانعتني لا أزوركم .
أنا : من جاب خبرك أساسا ..والزم ما على الواحد دراسته أذا ذاكرت دروسك وقتها اطلع مع ربعك وصع على كيفك .
أمي : عبدالعزيز سلم على بنت خالك موضي ماشالله كبرت عمرها 17 سنة وش زينها وش ملحها
أنا : ابشري حيالله موضي بنت خالي لو سمحت وخر عن طريقي بروح اسلم ..على أختك
بندر : وين وين سلم عليها من مكانك ..ما عندنا بنات يسلمون بالأيدي على عيال عمتهم ..وأذا مرة ذابحك السلام سلم علي وأنا أوصله لها …بس أنت تمسك يدها معصي فاهم
أنا : على هواك ..( وتخنقني العبرة ) ليه كذا وش سويت لك والله أني انرحم .
أمي : عبدالعزيز يالله أنا وأمك خذ عيال خالك ومشهم في الرياض ولا تبخل عليهم بشي أن بغوا يأكلون ولا يشترون شي وهذي خمسمية ريال والله الله فيهم لا تخلي مكان ألا توديهم له
وركبنا السيارة كلنا بندر جلس قدام جنبي يا ليت أخته كانت جنبي و جلست ساعة أدور بهم في الشوارع ( تمشية أهل الرياض وش نسوي تعودنا على كذا ) لين حسيت أن رؤوسهم داخت والبنت وراي يمكن تستفرغ ..ساعتها سالتهم سؤال وين يبون يروحون ..وصدموني بأنهم بنفس واحد جاوبوني يبون يروحون حديقة الحيوان ..يالله أنا هالكلمة مارة علي وعلشان أصرف الموضوع
أنا : تبون تروحون حديقة الحيوان ما قد رحتوا لها من قبل ( بشويش ياللي رحت لها ألف مرة كلها مرة واحد ورحلة مدرسة مدرس القواعد حجر لنا عند الغزلان ويلقي لنا قصائد عن الغزال ومدرس الرياضيات المصري انبسط لما شاف الفيل متذكر خطيبته ..والعرابجة عند الأسد يسوون له حركات مو حلوة ويقولون له لو كنت رجال أطلع لنا )
موضي : لا والله ما عمري رحنا لها أبوي بس قد راح لها من عشرين سنة ويقول أنها حلوة غير أن الواحد يتفكر في روعة خلق الله للحيوانات كيف هي مختلفة وعائشة مع بعض في الطبيعة .
أنا : الله كلامك حلو يا موضي صدق بنت مثقفة
بندر : خل عنك ودي نروح عند قفص القرود العيال في الديرة يقولون أن الشباب كانوا يرجمون القرود بعلب بيبسي وسجاير والقرود يرجمونهم ولا يشربونها وناسة
أنا : هذا اللي قدرك الله عليه ترجم القرود بعلب بيبسي … وتبي طب لا والله لايق على الطب مرة
وأجلس أتذكر وين حديقة الحيوان المهم وصلنا ونزلنا الثلاثة علشان ندخل وألا مكتوب بلوحة كبر الجدار يوم النساء …ونروح للحارس يمكن الحديقة فاضية ما فيها حريم ندخل كلنا مير ما عندك أحد قال لنا بس للنساء التفت عليهم وقلت هاه وش رأيكم …
بندر : خلاص خلها هي تدخل وأحنا ننتظرها برى نشتري لنا بليلة مشتهيها والله ..
أنا : الحين بنتمشى و أبي أوسع صدوركم وكل طموحك بليلة طيب ولا تزعل الله يصبرني عليك خذي يا موضي عشرين ريال أذا جعتي اشتري لك شي من جوا ..وأحنا بننتظرك على العموم لك ساعة علشان ناوي أمشيكم بعد وأوريكم أماكن ثانية في الرياض … وتدخل البنت الحديقة وننصى أنا والأخ عربانة البليلة اشتريت له صحن ..وقلت له وش رأيك نروح ندور لنا شوي بالسيارة منها نتمشى ومنها يمكن الله يرزقنا بصيده
بندر : وش صيدته معك شوزن ..وين يعني هنا ولا في حديقة ثانية
أنا : وش شوزنه صيده يعني بنات من هنا ولا هنا تعرف بداية الصيف الواحد وده ببنية تؤنس وحدته بدال هالفراغ القاتل و مثلك عارف يا عزيزي وابن خالي بندر أن الفراغ يؤدي بالشباب للانحراف ..
بندر : اترك عنك الحكي عمتي تدري أنك تغازل وتلاحق بنات الناس وتؤذيهم … هاه قل لي عمتي تعرف ولا لا
أنا : يا ولد اش بك صدقت امزح تراني بس أبي أشوف ردة فعلك … وش فيك والله العظيم ما أغازل أقسم بالله واللي يرحم والديك أجيب لك بليلة ثالثة بالشطة بس لا تعلم أمي تكفخني
وجلسنا في السيارة وأبو الشباب يتأمل في الشجر اللي على سور حديقة الحيوان ..وجلسنا ساعة وتطلع موضي أخيرا وتركب السيارة وهي تضحك ضحك على القرود أنهم يصفقون وعلى الزرافة لأنها طلعت طويلة صدق مثل أفلام الكرتون ( الحمدلله يا ربي على نعمة العقل ) وأنا واللي جنبي ريحة العرق فايحة مننا وقلت بأسوي لهم مفاجأة
أنا : وش رأيكم بوديكم مكان مرة حلوة و يهبل مكان بارد وفيه أشياء توسع الصدر
بندر : هاه وين بتودينا أكيد حي السفارات يمدحونها الشباب في الديرة كله خضرة و أشجار
أنا : حشا مورد بقر لمزارع الصافي مو أمشي آوادم ياخوي ما عمرك شفت شجر أو أي شي لونه أخضر أرحمني واللي يرحم والديك قسما بالله طفرت شفت معك شجر أكثر من اللي شفته بحياتي أذا أنت كذا أدخل كلية زراعة وأكسب أجر فيهم أحسن من أنك تدخل كلية الطب
موضي : وين تبي تروح بنا أجل يا ليت والله بحكم أنك تعرف الرياض أكثر مننا تورينا الأماكن الحلوة اللي فيها
أنا : والله لو ينزل أخوك و تجين تركبين قدام تصير الرياض كلها أماكن حلوة بس وش أقول ما في حظ
بندر : اها بس وين أحنا تنزلوني وتقعدون مع بعض, أذا أعرست عليها وأنا ركبت معكم هي ما تركب قدام فاهم لا أفقع وجهك ما عندنا بنات يركبون قدام
أنا: اسكت بس واللي يرحم والديك المهم هذي هي الفيصلية أهم معالم الرياض شي بصراحة يمدحونه ناطحة سحاب شفتوا ذيك اللي صكتها الطيارة في أمريكا ترى ما بينها وبين الفيصلية ألا عشرة أمتار بالمارية أذا رقيت فوق في الفيصلية تشرب كابتشينو أبو 350 ريال تقدر تسلم على اللي بعماير نيو يورك ما هنا مسافة يالله بس ننزل علشان تتفرجون وتنبسطون بها ( ما كأنه اللي هو أنا يطبها لأول مرة ومستغل فرصة معه بنت خاله علشان تدخله ومنة الله ولا منة خلقه من الحريم اللي ما طاعو يدخلونه )
ونروح ننصى البوابة اللي على شارع العليا علشان ندخل الا ويحصل اللي ما كان على بالي
السيكورتي : وين يا شباب وين رايحين عسا ما شر
أنا : أبد سلامتك بندخل الفيصلية بنشوفها ونتسوق هذولي عيال خالي جايين من الديرة و ودهم يشوفون الفيصلية ياما سمعوا عنها في السن ان ان
السيكورتي :ألعب غيرها يابو الشباب كم دفعتوا لها علشان تدخلكم هاه أجل ولدين مع بنت متىصارت هذي علشان تصير هالمرة ..ما فيه يا واحد منكم يدخل معها يا لا أنتم ا لاثنين لا وألف لا فاهمين
أنا : واللي يرحم والدينك وش هالحكي ذولي ما يدلون شي في الرياض أول مرة يجون منذ مبطي معتمدين على الله ثم علي تكفى ندخل أحنا الثلاثة شوي عشر دقائق أدلهم الدرب ثم أنا وهالدلخ ندخل بالتناوب قل تم و اللي يرحم و الديك
السيكورتي : معصي واحد منكم يدخل والله أذا بتتناوبون ما أقدر أقول شي بس أنتم الاثنين مع بعض معصي و طولة حكي ما أبي فاهم وانضبط أحسن لك لا أمردغك هنيا …
أنا : بندر حبيب قلبي شفت الفيصلية من برا أحسن من جوا هاه وش رأيك أدخل شوي مع أختك موضي عشر دقائق ونرجع لك والله ما راح تحس فيها صدقني واللي يرحم و الدينك حققت لك أمنيتك وأكلتك بليلة خلني أحقق أمنيتي وأدخل الفيصلية عاد هي في هالوقت مليانة من طايحات الحظ بنات بيصيفون هنا مافي سفر الواحدة منهم أذا راحت الشرقية أسبوع داخت من الفرحة يعني الرقم أذا رميته من فوق بتصير تحت مذبحة
بندر : معصي مع أختي بروحكم أحلق شنبي أنا أصلا كنت بأقول لك لو دخلنا كلنا أنك تتركنا علشان أختي تآخذ راحتها الحين تبي تكون معها وبروحكم هذا اللي ناقص وين العادات والأصول اها بس انتظرنا هنا ولا تروح الساعة الآن 9 كلها نص ساعة بالكثير وطالعين يالله يا موضي حمد ولد أبو سعد يمدح الفيصلية راح لها مع أخواته الصيف
أنا : طيب واللي يرحم والديك أذا شفت بنت تمشي بروحها عطها رقمي تكفى كود ألقى لي أحد في هالصيف
الماضي …ودخلوا هم وجلست أنا أندب حظي العاثر اللي ما في رجا منه مغرز في طعس رملي وبعد ساعتين وربع ..يطلعون عماني كل واحد منهم معه آيسكريم وذرة وأنا اللي شوي وأنفجر ..ويركبون السيارة أني ما حتى تكلمت معهم وبنفس واحد لين وصلنا البيت ..ورقيت غرفتي ..ورحت أدور على أرقام حتى لقيت رقم عبير بنت خبلة كنت أعرفها وجلست أسولف معها ساعتين ..لين نمت الساعة 3 الفجر .. وصحتني أمي ثاني يوم الساعة 6 الفجر
أنا: وشو وش ذا أحد قال لك يمّه تصحيني هالحزة ما تشوفين الساعة 6 الفجر خافي الله فيني وش سويت فيك
أمي: قم يالله علشان تودي عيال خالك اليوم أول أيام التسجيل في الجامعة لا يتأخرون وتروح عليهم الأماكن
أنا : وش دخلني فيهم حريقة تحرقهم أمس أترجى فيهم يدخلوني الفيصلية ومان ولد أخوتس بأخته خليه يأخذ لها ليموزين ..مو موضي بنت محمد ألا ديانا سبنسر …
أمي : اها بس والله أن ما قمت الحين و وديتهم ما أصير أمك ولا تعرفني وتأخذ مني لو ريال واحد ..يالله قم آها وش أنا أقول …عزيز ووجع قم يالله لو والله كأس الموية الباردة الحين يجيك فوق رأسك
أنا : خلاص بقوم الله يعلهم قولي آمين ويعل أخوتس فوقهم هو يجيب عيال وأنا أبزاهم ( أبزاهم = أصاليهم = يعني أكون مسؤول عنهم ) .. وقمت ووديتهم للجامعة موضي رميتها في عليشة مدري وش عندها والأخ وديته لجامعة الملك سعود في صالة الألعاب الرياضية طبعا الأخلاق زفت ومالي خلق قلت له أنزل وبأنتظرك في السيارة ..مع أن ودي أرجع البيت وأنكب عفشه ..بس مدري ضميري صحا المهم خمس دقائق ألا هو راجع لي وكاب خشته ( كاب خشته = مبوز ) وأنواع ضيقة الصدر
أنا : ماشاءالله أمداك تخلص أوراقك ..العادة اللي يقدمون على الكليات الصحية أكثر من اللي يقدمون على الجامعة بذاتها وش صار متى قالوا لك موعد الأختبار والمقابلة
بندر : هزئوني وقالوا اقلب وجهك اليوم اللي نسبتهم فوق 97 % والباقين الى تسعين بكرة وبعد بكرة .. يالله خل نروح نجيب أختي ترى توها داقة علي ..تقول رموا أوراقها في الأرض قالوا لها الآن تسجيل كليات صحية .مع أنها رايحة تسأل بس
أنا : يالله حصل خير خل أختك ترتاح وأنت نشوف لك دبرة بكرة ..ترى الليموزينات من بيتنا للجامعة تقريبا 15 ريال بس ( مو قصده شي بس يلمح )
بندر : والخمسطعش ريال شوية . تعبي البنزين فول امش بس لا نتأخر على أختي
ورحنا الى عليشة وزي العادة ما تعرف وين توقف ولا وين تروح أن مشيت دعست لك بنت ولا صدمت السيارة اللي قدامك ..و بنت خالي ما تعرف شي هناك و ضايعة كأنها مروعة على كلامها فتحت أربع سيارات على ما شافتنا ..المهم قلت بسوي فيهم خير وبأغديهم في مطعم يأكلون همبرجر بيتزا أي شي من أجواء الرياض والدراسة الجامعية فيما لو قبلوهم ( يبي يدخل قسم عوائل هذا أكبر همه )
بندر : صدق أنت موب صاحي أحد يعاف أكل البيت و يأكل همبرجر ما تدري وش لحمه ومتى طابخينها ما غير تأكل مرض جاهز ..أنتي تدري هالفلبنين اللي يطبخون أذا كانوا نظيفين ولا لا تدري راشد ولد سليمان راعي الدكان أن كانك تعرفه يوم يجي الرياض عزمهم أخوهم في مطعم مدري وش أسمه وأكلوا شاورما تدري جاهم تسمم قعدوا في المستشفى 6 ساعات الله فكهم وأنت تبي تمرضنا
أنا : الله يحوم كبدك لي عشر سنين نص أكلي من هناك وأنت تجي تحوم كبدي الله يحوم كبدك و يقرفك أنا وش سويت لك هاه يومك تعذبني هالتعذيب ..يا أخي قل نبي نروح البيت بس لا تقعد تقرق على رأسي .. ورحنا البيت وتغدوا ورقدوا العصر أما أنا سحبتها نوم الى الساعة 9 الليل و أقوم ألقاهم مرتزين في الصالة وأنا نازل لهم ..
بندر : يا أخي أنت وش قصتك يا تنام يا تدخل الصالة بلا احم و لا دستور ترى أختي فيذا أذا أنت ناسي ..المهم نبي نصور شفت الشباب كل واحد معه صور ..علشان التقديم وأختي موضي بعد تبي تصور نبي استوديو نسائي ..
أنا : معليش أنت وعمتك أحد قال لكم أني سواق اها بس عطيتكم وجه عاد بتعقلون ولا جلدتكم هنيا ..أكثر ما كثر الله في الرياض الليموزينات ..
أمي : عبدالعزيز يالله ودهم قبل لا اسحب مفاتيح السيارة منك علشان تعرف تستأدب
أنا : يالله يا حظي تعال أنت وأختك يا رب تحترق صوركم … ورحنا الاستوديو صوروا وثاني يوم وديت بندر هالعلة قدم على الكليات الصحية بالترتيب الطب البشري ثم الأسنان ثم الصيدلة ثم العلوم الطبية ..وعطوه موعد الأختبار التحريري ثم المقابلات حقت الكليات كل واحدة لها موعد ابتداء من السبت أما أخته موضي فموعدها السبت اللي بعده أذا بدى التسجيل لبقية الكليات … الدلخ بندر من يوم ما علموه موعد الأختبار وهو فارش كتب الثانوية من أولى ثانوي وما غير يذاكر مدري يراجع وأخته موضي تسمع عليه وتساعده ..وأنا أتحمد الله على نعمة العقل ..أن جيت أفهمه أن الأختبار التحريري خرطي ولا يهم رد علي من طلب العلا سهر الليالي . بالله وش أقول له الآن ..الى أن جاء يوم السبت وكالعادة أمي صحتني من الساعة خمس
أنا : وش ذا الرحمة يا ناس وش أحد يقوم الساعة 5 الفجر في أجازة الصيف هذا وأنا ما نمت ألا الساعة 4 الرحمة زينة تعالي بعد شوي يمّه البنت جالس تنتظرني في الغرفة ..حلم ابن كلب لا يروح
أمي : وجع يوجع أبليس وتواعد بنات في حلومك والله هذي تاليتها … المهم هذي نتفاهم عليها بعدين قم علشان تودي بندر ولد خالك ناسي عنده اختبار القبول اليوم ..يالله يلحق يروح
أنا: يمّه عسا ما شر الأختبار الساعة 8 والان الساعة خمس ومن بيتنا للجامعة كلها ربع ساعة وشوله أطلع هالوقت
أمي : يالله يوصل الآن ويأخذ له مكان زين المسكين يقول واجد المقدمين على الطب فوق 3000 طالب المسكين خايف ما يلقى مكان ويطردونه من الكلية …
أنا : وش هو لعب عيال في قاعات تكفي لعشرة الآلآف طالب ( والله من النصب ) بس خليني أرقد شوي
أمي : حرام عليك لو تشوف بندر صاحي من أربع الفجر يذاكر منحني على هالكتب والله أنك ترحمه
أنا : أصلا أنا عارف ما راح تخليني لين أقوم حسبي الله ونعم الوكيل …وأنزل وأركب السيارة ويجي معي بندر ومعه خمسطعش كتاب
بندر : ادع لي يا عبدالعزيز والله ما ذاكرت زين باقي لي تفسير أول ثانوي وجيولوجيا ثاني ثانوي ..ورياضات ثالث متوسط غير أني ما حفظت مواضيع التعبير حقت المتوسطة كلها والله يا خوفي يقولون أكتب عن الملك عبدالعزيز ثمانية سطور
أنا : أهم شي علوم رابع ابتدائي في رأسك ولا لا ترى العام نص الأسئلة منها ..يا أخوي ما أنت صاحي هم بيسون أختبار خرطي صدقني ماله علاقة باللي درسته اسألني يا عندهم اسأله ما تجي في برامج الأطفال أهم شي المقابلة الشخصية أما الأختبار انشاءلله سهل
بندر: والله أن قلبي يرجف و مصارين بطني مدري وش فيها خايف من هالأختبار خايف أجيب العيد فيه والله ادع لي بس ..المهم نزلنا للكلية ودليته مكان الأختبار ونزلت الكافتيريا أكلت لي ساندويتش تونة وبعدين جلست أتمشى بسيارتي في طريق الأمير عبدالله .ألى الساعة 11 وقت انتهاء الأختبار واجلس أنتظره والا يطلع لي بندر وهو يشاهق واثنين من الهنود اللي ينظفون في الكلية متشاقلينه وشايلينه ووصلوه للسيارة
أنا : بندر وش فيك تكلم أغمى عليك ولا وش صار لك .. بندر لا تطيح قلبي ابلش بك عند أمي
بندر: سقطت خلاص سقطت ما في أمل أسئلة صعبة أجل يقولون كم فقرة في رقبة الزرافة .شكلك صادق أنهم يركزون على علوم رابع ابتدائي ..ولا سؤال يقول كم شهر فيه 28 يوم أسألتهم نار خل عنك ليتني مذاكر قبل شهر
أنا : يا ابن الحلال لا تخاف صدقني هالأختبار كيف الحال اليوم الليلة عقب العشاء نشوف النتائج وتعرف بنفسك
بندر : ماش حاس أني بأسقط ما في أمل …
أنا: طيب اسكت بس ولا تقول لأمي شي أذا سألتك قل حليت زين وأذا طلعت النتائج نعلمها وش صار عليك
ووصلنا للبيت وبندر شاف أمي ولا ما شافها وهات يا صياح …بأسقط ما ذاكرت زين الناس كلهم حلوا زين ألا أنا .ويا عمتي الحقيني ولا تعلمون أهلي أني فاشل
أمي : يا وليدي تعوذ من أبليس انشاءالله ..يا عبدالعزيز ما تعرف أحد في الكلية من دكاترتك تكلمه عن بندر ..توسط له وأنا أمك لا يموت علينا
أنا : ألا أعرف العميد شخصيا ..يجي معنا الأستراحة نلعب كورة وبلوت لو أعرف أحد كان تخرجت مو مغرز الى الآن يا بنت الحلال صدقيني أنهم ما يجيبون طاري الأختبار التحريري كلها فلسفة وخرابيط ..المهم المقابلة الشخصية اللي بعد بكرة .. نتيجة الأختبار بيطلعونها الليلة بعد العشاء
بندر : ماني رايح مالي خلق أشوف كل الطلاب ناجحين ألا أنا راسب كان أموت تجيني جلطة
أنا : الساعة المباركة المهم بروح أنام وقوموني بعد صلاة العشاء أشوف نتيجته وافتك منه ..ورحت لفراشي وما أمدا المسجد يأذنون للمغرب ألا أمي تجي تصحيني
أمي : قم وأنا أمك بندر ولد خالك يبيك توديه للكلية يشوف نتيجته في الأختبار المسكين أعصابه تعبانه مرة شفه واقف عند الباب
أنا : يا ربييه مو يقول أنه ما يبي يشوف نتيجته ثانيا النتائج ما تطلع ألا عقب العشاء بعد مو على طول ألا بعد ساعة أو ساعتين اصبروا للعشاء طيب
أمي : طلبتك عاد يا وليدي لا تفشلني وأنا أمك وافق علشان خاطري لو تشوف بندر أنك ترحمه
أنا : قم لا بارك الله فيها من ساعة شفت وجهك ..يا رب يا شيخ ولا موب لازم ..ونروح الكلية وننتظر 3 ساعات لين علقوا نتائج الأختبار ويوم شاف اسمه مع الناجحين فشلنا الله يفشله قام يطامر ويحضن فيني
بندر : يس يس ( اخس يالانجليزي ) سويتها وعديت الأختبار كنت عارف أني بأعدي لأني مذاكر زين ومستعد زين عارف أن الله معي ..جايك يالطب هانت عدينا الخطوة الأولى
طبعا أنا قمت أسحبه لا يفشلنا ويسوي لنا بلاوي ورجعته للبيت ودرت أمي وأخته وأنبسطوا ويبون يسوون حفلة وأنا أقنعهم يصبرون الى موعد المقابلة بعد بكرة ..وبناءا على رغبة السادة الأفاضل تعشينا من كنتاكي بمناسبة نجاح بندر في الأختبار التحريري ..ويوم الاثنين رحنا للكلية من الساعة 6 علشان المقابلة الشخصية للكية الطب ..طبعا أنا علاقاتي مرة زين مع جماعة التوعية أقصد النشاط الطلابي حقت الكلية وكلهم حبايبي ( شوي الا يرجموني من الطقاق اللي بيني وبينهم وهم اللي يتولون مسئولية تنظيم دخول الطلاب على لجان المقابلات ) ..قمت أدور على واحد في بيني وبينه ريح علاقة حميمة قد سلمت عليه ..ما لقيت ..بس لقيت واحد اسمه عثمان اخبر أني مرة صليت الظهر متأخر يوم سلمت لقيت وراي اثينين هنود وسوداني وهو ..قمت عاد أتلزق فيه واسلم عليه كود يدخل بندر على لجنة حبيب ..مير هو ما عبرني ..المهم بعد ساعة ونصف نادوا على بندر وقالوا له لجنة رقم خمسة ..طبعا أنا و بندر ما نعرف من لجنة خمسة فرحت أشوف من الدكاترة في لجنة خمسة وياليت ما شفتهم الدكتور عدنان أبو سمرة .. دكتور نساء وولادة طيب لدرجة ما في أحد ينجح من عنده غير حبه اللامتناهي للنجادا ( النجاد = جمع أهل نجد ) ..والدكتور حمد عبدالله الخربوش..دكتور باطنة ..أخر أختبار باطنة أختبر 6 طلاب وسقط 7 بتسألون وشلون .. شاف الطالب اللي جنب طالبه يأخذ تاريخ مرضي دخل عليه واربكه وقام يهوش عليه يقول أنه مو مؤدب مع المريض لين الطالبين ( طالبه والطالب اللي جنب طالبه ) أغمى عليهم كلهم ..المهم يوم شفت هاللجنة حبيت ارفع من معنويات بندر
أنا : الله طيحك في لجنة عسل من افضل اللجنات صدقني بس لا تخاف والدليل بأدخل عليهم معك تراهم يعرفوني كلهم ..بلا فخر أنا طالب مميز عندهم وأدخل عليهم ..والاثنين كل واحد ماشاءالله عليه طاق التكشيرة ..وقال لك بأصير واسطة
أنا : السلام عليكم دكتور عدنان ..ويا دكتور حمد ..كيفكم انشاءالله بخير وصحة وسلامة .أنا عبدالعزيز ما عرفتوني الطالب اللي كنت أدرس عندكم ما تذكرني يا دكتور عدنان ..أنا اللي رسبتني وعطيتني في الأختبار النهائي 3 من 60 الحمدلله لك يا رب بس صدق يا دكتور عدنان كان معك حق المفروض أني ما أنجح ..وأنت يا دكتور حمد ما أنسى يوم كنا طلابك ولا حظرت لنا ولا مرة بس مع الطالبات تحضر قبل بنص ساعة علمتنا وشلون نعتمد على أنفسنا الله يسلمكم بس ويبقيكم ذخر لهالكلية ..هذا ولد خالي بندر ..طالب مجتهد وعلى وجهه سمات الطالب النجيب وقدره قصدي حظه أنه يطيح عندكم ..ألا وش رأيكم أذا ما عندكم مانع أجلس معه لأنه متوتر شوي
الدكتور عدنان : يا واد اخرج و لا تكتر كلام … يالله وقفل الباب وراك
أنا :والله يا دكتور لو مو الولد متوتر شوي صدقني ما كنت طلبت هالطلب بأجلس واشد من أزره ولاني متكلم ولا كلمة
الدكتور حمد: أنت ما تسمع الكلام هاه الدكتور عدنان قال لك تطلع برى يعني تسمع الكلام وتقضب الباب
أنا : ابشروا طال عمركم ..أنتم تأمرون أمر ..واطلع وأهمس في أذن بندر ( أمسك أعصابك معهم وأنا بأجلس ورى الباب أن احتجت مساعدة بأحاول أغششك زين ) ..
وأطلع وأحط أذني على الباب و تبدى المقابلة
الدكتور عدنان: يا بندر ما عندك أقارب في الكلية ولا في الجامعة أعضاء هيئة تدريس
بندر : لا والله الوحيد اللي يقرب لي في الجامعة ولد عمتي عبدالعزيز اللي كان هنا وبس
الدكتور حمد: طيب بنسألك شوية أسئلة علمية وبعدها أسئلة عن حياتك الشخصية … تعرف يا بندر قلب الضفدع كم ينبض من نبضة في الدقيقة ..
أنا : وجع وش ذا السؤال واطمر على صالة الطلاب .واصرخ فيهم ..كم نبضه ينبضها قلب الضفدع في الدقيقة
الطلاب : وشو وشو ( واحد من هم أغمي عليه حسب هذا سؤال أساسي في المقابلات )
أنا : ما في جواب لا بارك الله فيكم ولا في اللي يعتمد عليكم من دبش.وارجع ألى مقر لجنة بندر ومن ورى الباب أهمس له ( دبر عمرك قل أي رقم ما أحد عرف )
بندر : 1617 نبضة .. في الدقيقة
أنا : ( دخلت على اللجنة علشان ما يسمعون هالرقم ) سم يا دكتور أنتم ناديتوني ..
الدكتور عدنان : يخرب بيتك ما في أحد جاب طاريك بالمرة مين نده عليك
أنا : غريبة مع أني سمعت يا عبدالعزيز أدخل فقمت دخلت متأكدين أنكم ما ناديتوني
الدكتور حمد : والله العظيم ما ناديناك ورجاء خاص لا عمرك تدخل علينا ويالله أطلع برا الآن
أنا : آسف والله العظيم آسف يا دكتور أنا طالع على العموم والتفت على بندر وأهمس في أذنه ( قلت لك دبر عمرك قل أي رقم مية ميتين ثلاثمية مو 1617 وشو موب ضفدع هذا ديناصور )
بندر: (همسا ) سمعتك تقول أي رقم وهذا أول رقم طرى في بالي
واطلع وأسكر الباب واجلس عنده أتسمع
بندر : قلب الضفدع ينبض 214 نبضة في الدقيقة .. بس وش علاقتي بالضفادع أنا أبي أدرس طب بشري
الدكتور حمد : احنا نشوف شي أنت ما تشوفه ولنا مغزى من سؤالنا لك ..طيب السنجاب يبيض ولا يولد
أنا : اصبر شوي سو نفسك تفكر لين أرجع لك واطمر مرة ثانية بسرعة الصاروخ الى صالة الطلاب ..واصرخ فيهم يا شببا السنجاب تعرفونه … يبيض ولا يولد
الطلاب : انقسموا قسمين نص يقول يبيض ونص يقول يولد
أنا : الشرهة مو عليكم الشرهة علي يوم أجي أسألكم ..وارجع طيران للجنة بندر ..وأهمس من ورى الباب الثنتين فيهم شك دبر عمرك
بندر : السنجاب كما قرأت أن السنجاب يولد بيضة
أنا : ومرة ثانية أقتحم الباب علشان ما يسمعون الجواب الغبي ..أقول يا دكاترة أنا نازل الكافتيريا توصون على شي ساندويش بيض جبن تونة ترى التونة حقت كافتيريا الكلية رهيبة ما تسمم منها العام ألا اثنين بس عصيرات آمروا وش تبون كوكتيل برتقال أناناس
الدكتور عدنان : الله يخرب بيتك يا شيخ أنت ما تفهم ما نبغا غير راحتك اسكت واطلع برى بس
الدكتور حمد : يا ولد أطلع لا والله أقوم عليك الآن بالعقال وتاليتها معك تراك غثيتنا
أنا : وش دعوى يا دكتور أول شي تعلمناه في هالكلية الفضيلة احترام الدكاترة الأكبر منا سنا .وقبل ما أروح الكافتيريا قلت أشوف أذا تبون شي تأمرون بشي .خلاص ما تبون شي بأطلع .وأهمس (في أذن هالصتيمة بندر أختر يا يبيض يا يولد مو الثنتين يا ذكي .. ) وطلعت
الدكتور عدنان : يا ولدي يا بندر أنت ما تعرف أن الطب صعب ومشواره طويل حتى أذا اشتغلت ما فكرت في حاجة أسهل لك من الطب وشقاه
بندر: لا عادي ما يهمك واللي مشاك انشاء الله يمشينا ما عليك
أنا : ( من ورى الباب الطم ) أحد يقول لاستشاري كبر الدنيا اللي مشاك يمشينا وين احنا فيه
الدكتور حمد : لو جاك رجال معه ولده مريض في الأسعاف وقال لك ما ابي دكتور سعودي يكشف على ولدي ناد لي دكتور أجنبي . كيف بتتعامل معه ..
بندر : اذا حالة الولد خطرة بأسوي نفسي بأروح دكتور أجنبي وأدخل به غرفة وأسوي اللازم أما أذا حالة الولد مو خطرة بأفهمه أني ما صرت دكتور ألا بعد ما بذلت مجهود وكافحت مثل الدكتور الأجنبي ويمكن أكثر بعد
أنا : ( همسا) أحلى يا ولد خالي صكيت عليهم ابن أمه واحد منهم يرد عليك
الدكتور حمد : ما تلاحظ أنك كذا تكذب على المريض وأسرته يعني لو صار شي للولد أبوه يمكن يقاضيك لأنك كذبت عليه ..ساعته بتأخذ الناس عن المستشفى سمعة سيئة كله منك
بندر : يعني أخلي الولد يموت ..ثانيا هالأجانب اللي عندنا كل عشرة أطباء يالله تلقى فيهم واحد صاحي والباقين يالله لا تبلانا والناس عارفين هالشي
الدكتور عدنان : أنت أساسا من فين يا ابني …
أنا : (همسا) احييه جاك الموت يا تارك الصلاة ..قل أي شي حجازي من مكة المدينة رابغ ولا من القصيم ..كود الدكتور حمد يشفع لك أن قلت من حريملاء بنأكل تبن
بندر : وبلا فخر من حريملاء 84 كيلو غرب الرياض .الديرة اللي هاجر لها الشيخ محمد بن عبدالوهاب
الدكتور عدنان : اخرج يا ولدي الله يوفقك في كلية تانية
بندر : ليه وش سويت يا أبو الشباب اصبر شوي وش سويت ما في أسئلة ثانية
الدكتور عدنان : يا ولدي ما تسمع اخرج والله يوفقك في كلية تانية
بندر : ما يصير والله لا أشتكيك مو على كيفكم ..وش ذا أسئلة ما لأمها داعي
أنا : دخلت بافك بينهم أعرف خالي عصبي وخايف بندر يطلع مثله سحبته وطلعته برى وقلت له …يابن الحلال عادي شفت ال3000 وقت التسجيل ينخلونهم هنا نخل اللي معه واسطة يمشي واللي لا أبوه ولا عمه ولا خاله هنا واعزتيي لحاله ثانيا وش زعلان عليه القرف ولا ضيقة الصدر والله لو في اختلاط كان الواحد يحزن بس شوفة عينك كل مالهم يبعدون بكرة بتلقى طريق للأولاد وطريق للبنات يعني وسع صدرك
بندر: يعني ما في أمل خلاص بالطب البشري قهر والله مع أني أنسب واحد لهالكلية ..صدقني يا عبدالعزيز
أنا : أنسب واحد هيّن والله لو أن أبوك دكتور في هالكلية ولا انك بنت صدرها طوله شبرين أذا مشت بهالبالطو قمت قلوب المرضى تطرقع ..يالله الطب البشري راح لا يفوتك طب الأسنان أختبارهم المهاري بكرة الصباح وبعد العصر مقابلتهم الشخصية يعني تو الأمل عندك …
وثاني يوم الصباح رحنا لكلية الأسنان طبعا أنا عارف أختبارهم المهاري حومة كبد الله لا يوريكم قطعة جبص يقولون انحته على شكل ضرس وسيخ سو منه درج بدون ما تعفطه .. طبعا أنا أنتظر برى لين شفت بندر و هو مبرطم ( مبوز ومكشر من الزعل ) يوم شفت هالملامح عرفت أنه خبص في الجبص تخبيص وأن السيخ تكسر ..طبعا خذته وقمت أتمشى به ووديته يتغدى ألى بعد الظهر وقت المقابلة … والأسنان قاسمين الطلاب قسمين اللي مسوين الأسنان رغبة أولى قسم والباقين قسم ثاني ..بدوا باللي حاطين الأسنان رغبة أولى وبعدين الباقين ومن صلاة الظهر ألى الساعة 6 المغرب توه يجي دوره وأنا أنتظر معه وعلى ما نادوه الا أحنا نايمين جزاه الله خير المسئول جاء وصحانا ودخل بندر والظاهر أن الأسنان موسعين صدورهم خلوني أدخل معه المقابلة جلس بندر قدامهم في الطاولة وأنا بعيد
الدكتور : مساء الخير يا بندر كيفك .. وش مسوي
بندر: والله تعبان يا دكتور ابطيتوا علينا والواحد ضايق صدره أمس من مقابلة الطب البشري ..
الدكتور : اها الطب البشري الله يعين الطلاب عليهم كل واحد في رأسه شي اللي بالواسطات يمشي واللي يكره الناس كلهم الله يهديهم بس . بس افهم من كلامك أنك ما توفقت معهم بشكل نهائي
بندر: يالله يا دكتور العوض فيكم انشالله بعد الوالدة من أول تبيني أدخل كلية طب الأسنان شكل هذا من دعوتها
الدكتور : والله ودنا بس تدري يا بندر نظام الكلية من 10 سنين ما نقبل أي طالب مقدم علينا رغبة ثانية ما تشوفنا نقابل الرغبة الأولى قبل
أنا : يعني قبل 7 سنين يوم تخلون كل اللي معي في الاختبار يضحكون علي يوم سويت الجبصة بيضة صعو ..وكسرت السيخ ثلاث كسرات .. وكل شوي يجيني واحد من طرفكم شد حيلك في أمل لا تيئس ويوم جيت بروح لبيتنا قلتوا اصبر للمقابلة ترى الأختبار المهاري مو مقياس وأنطق الى صلاة المغرب آخرتها أسكر الباب مع فراش الكلية وآخرتها أنتم ما تقبلون الرغبة الثانية .بندر عطني شي أجلد أبن الكلب به تراه ثور أعصابي
بندر : يا عبدالعزيز أعصابك مو كذا الرجال ارتاع
الدكتور : أصبر قبل 7 سنين قلت لي ذيك السنة بالذات العميد وأنا قررنا في مجلس الكلية نقبل لنا كم طالب رغبة ثانية بالذات من طلبة الطب بس واللي يرحم والديك الا العقال هد أعصابك تبي نقبل قريبك ذا من عيوني
أنا : ماني تاركك لو تموت فاهم جالدك جالدك بس أبي أحشرك أنت وعميدك وبقية مجلس الكلية وأتمرغ في بطونكم يلعن أبوكم أكتبوا لوحة كبيرة ما نبي الا المقدمين رغبة أولى
الدكتور : توبة والله ما عاد نكررها أمسح في ذا الوجه تبي شهادة بكالوريوس لك أطلعها لك الآن وش بكالوريوس تبي شهادة ماجستير تآمر أمر بس كل المسألة عندنا أربعين كرسي مجهز وما نقبل الأ أربعين طالب على عدد الكراسي والله يا طويل العمر هذي كل السالفة
بندر : يابن الحلال خل نطلع قبل لا تتهور وتسوي جريمة هنا ما يستاهلون أصلا من يجيهم لو فيها أختلاط كان الواحد تندم عليها بس الأولاد في جهة والبنات في جهة وآخرتها تطلطل في خشش خلق الله وسوس وحالة
أنا : لحظة بس خلني أقلب هالطاولة فوق رأس ابن اللذين أجل رغبة أولى لا بارك الله فيكم أنتم كفو طب أسنان حدكم ميكانيكا أسنان من شفت أختبار القبول حقكم فيه زرادية وسكين و أنا غاسل يدي منكم
وطلعنا من الكلية وطبعا بكرة مقابلة الصيدلة والولد متحطم اشد التحطم أخبر أني حطيته عند مدخل الكلية ورحت البنشر أغير كفرات سيارتي على أني أذا رجعت بأدق عليه جوال وأشوف وش صار عليه وعلى ما رجعت من البنشر ودخلت المواقف لقيت الطلاب ماسكين لهم واحد يهدونه ونزلت من السيارة لقيت الولد اللي ماسكينه بقية الطلاب وهو شايل برميل زبالة من الصغار اللي وسط الجامعة ويبي يهبدها على واحد من دكاترة كلية الصيدلة …والشباب و السيكورتي ماسكينه لا يقتل الرجال
أنا : بندر بندر وش فيك يا ولد خالي هد أعصابك وش السالفة فهمني
بندر : ابن اللذين رفع ضغطي وراك مختار الطب رغبة أولى .وش عليك أنت مني ولي أمري على غفلة من زين كليتكم .وليه ما أخترت الصيدلة رغبة أولى
أنا : وينه هالرجال ووراه يقول لك كذا
بندر : هذا الغثيث اللي بيقابلني لا ويوم شافني عصبت يقول ما في أحد راح يفيدني ألا هو لأنه وكيل الكلية ..
وكيل الكلية : ( صوت من بعيد حوله ألف واحد محاوطينه لا يصير فيه شي ) والله مو قصدي بس حبيت أوصل له فكرة أن كلية الطب مو كل شي حتى أحنا كليات عليها القيمة وتسوى الواحد يدخل لها مو كل سنة نقبل رجيع الكليات وكلهم يبون يحولون للطب وطب الأسنان وهذي هي حالتنا
أنا : كأنه قال كلية طب الأسنان وينه ابن الكلب أحد يجيبه لي بالعن والديه ..ما تدري أنهم ما يقبلون ألا اللي مقدمين رغبة أولى ولا تستخف دمك يا ماني بقايل جيبوه لي لا أروح له بنفسي هو اليوم مصلين عليه يعني مصلين
بندر : عبدالعزيز رح هناك حجر له وأنا من الجهة الثانية أنا ناوي اقبره تحت طاولته أجل ليه تفكيرك ضيق ومنحصر على الطب البشري .ما تسمع عن أهمية الصيدلة أنا أعلمك الآن أهمية الصيدلة أن ما طلعت حرة مقابلة الطب على ظهرك يالصيدلاني ما أكون أنا
ويالله يالله جت الشرطة وقوة مكافحة الشغب وفكونا وودونا لمكتب مدير الجامعة ووقعنا تعهد خطي ما نقرب على كلية الصيدلة لا من قريب ولا من بعيد وحتى ما ندخل أي صيدلية أخرى وأذا بغينا أي شي من عند الباب … وانتهى الموضوع على كذا ..أما كلية العلوم الطبية فألغوا المقابلات لأنهم بيطبقون سياسة اقبلوا كل اللي ما لقوا أحد يقبلهم بس المشكلة قبلوا أول ألفين وماكان بندر ضمنهم . المهم بندر قرر أن يقدم على حاسب ثم هندسة وعسكرية وكلهم الأسبوع الجاي مع بداية الوقت اللي بتبدى فيه أخته وطبعا ما كل ما يتمناه المرء يدركه ..
السبت؛ من نفسي صحيت الساعة 4 الفجر غسلت وصليت وأخذت موضي وبندر ..حطيت موضي في عليشة موقع قبول كلية الحاسب وطلعت ببندر على مقر تسجيل بقية الكليات .. وصلنا هناك الساعة 6 الفجر لقينا لوحة كبيرة مكتوب فيها فوق 98 % فقط لا غير غدا بقية النسب الى 92% طبعا استغلينا الوقت طمرنا لكل الجهات العسكرية نعرف متى المواعيد وما فيه واحدة قبل شهر الى شهر ونص حتى الحرس الوطني بعد شهر ..بعد كذا رحنا نفطر وكلمنا دوران ورحنا كوفي شوب وأذن الظهر وطمرنا لعليشة علشان نجيب موضي وانتظرنا الى الساعة 2 ونص طلعوا كل البنات ألا موضي وبندر يدق على جوالها ومقفل ..استاحشنا على البنت نزلنا نكلم السيكورتي رد علينا ما يدري … وقتها قلت لبندر خلني أنا أتصرف ..وأشوف بنت متلثمة رشيقة القوام العيون تذبح توها طالعة وأنصاها
أنا :هلا والله بهالطول ..يا ناس الشمس خبرناها تنور من السماء مو من بوابة الجامعة .ارفقي علي لا تذبحيين بعيونك .. ياليتني الأرض وأنتي تمشين علي
البنت : يا حلوك ويا حلو حكيك ..أخجلتني بس تكفى لا تسكت كمل .. ألا وش اسمك ما تعرفنا على بعض
أنا : كان اسمي عبدالعزيز أما الآن طريح حسنك فديت هالحسن … ممكن طلب يا عيوني
البنت : آمر اطلب اللي تبي اسمي فدوى قل أبي منك طلب يا فدوى .. بس ترى رقم جوالك أنا طالبته يعني ما ينحسب ضمن الطلب …. يوووه استحي
أنا : رقمي 05\\\\\\\\\ ( تشفير بناءا على تعليمات السلطات العليا للانترنت_ مدينة الملك عبدالعزيز_ لا ترقمون في النت لا نفهقه عنكم ) بنت خالي أخت هالولد اللي راكب قدام ..عندها اليوم تقديم على كلية حاسب وصلناها اليوم الصبح والمفروض نأخذها بعد الظهر بس شوفة عينك الآن قربت صلاة العصر وما طلعت وجوالها مقفل يمكن لو تكرمتي يالغزال الممشوق تدخلين داخل وتدورينها يمكن راحت عليها نومة داخل
البنت : بس كذا أنت تأمر أجل الآن طريح حسني مبطية عن هالحكي من ثاني ثانوي قبل ما أترك الخبل خويي علشان أجيب نسبة في ثالث استناني هنا بدخل أدورها لك و ماني طالعة ألا وهي بيدي بس كيف شكلها ووش لابسة علشان أعرفها
أنا: بندر هي وش كانت أختك لابسة اليوم الصبح ووش شكل شنطتها تعال أوصفها لفدوى قصدي القمر علشان تدور أختك وتشوف وش صار عليها
بندر : أختي اسمها موضي لونها قمري شعرها طويل .تنورتها كحلية وبلوزتها بيضا عليها نقشات وردية .. وشنطتها كريستيان ديور صغيرة … وجزمتها
أنا : حلا هو قلت وصف أختك للبنت مو تطقها معها سوالف ثانيا كنا في جرة وطلعنا لبرى أخس يالخمري بشويش لا يمسكونها الهيئة يقولون تهرب … مستحي تقول أختي سمراء على محترقة شوي
البنت : يا ناس دمه خفيف دقيقتين يا قلبي أدورها لك وأجيبها لكم
وشوي وترجع البنت فدوى معها بنت شادتها في يدها شكلها كأنها موضي وما غير تشاهق وتصيح
البنت : لقيتها جالسة جنب أحد الجدران وتصيح سألتها عن اسمها وهي ما غير تبكي ما ردت علي بس نفس المواصفات اللي حكالي عنها ولد خالك ..اسمع يا عزوزي قصدي يا طريح حسني بأدق عليك اليوم واسكر على الساعة 10 الى 11 تعرف عاد مواعيد بنات احبك يا زينك ويا حلو حكيك ..
أنا :من الساعة 9 باسنتر عند التليفون ( ناسي انه جوال ) و مشكورة يا حياتي ما ودك نوصلك معنا على الطريق
البنت : لا مشكور يا عمري السواق ينتظرني وأذا ودك تلحقنا مو مشكلة باسوي نفسي ما دريت أحبك والله
بندر : هي أنت واياها ما تحسون ما تشوفون أختي تشاهق خل نركب السيارة واترك حركات البزارين عنك وأنتي يالله ترى سواقك طبخته الشمس ..,,, وركبنا السيارة ألا وصياح موضي يزيد وتبدى تصيح بأعلى ما عندها ..
أنا : وش فيك يا موضي وش صار .أحد طقتس ..في شي يوجعتس .أحد سارق ساندويشتس ( سؤال أمي لي يومني صغير يا حليل أمي )
بندر : خلك عنك الأسئلة واطمر بنا على اقرب بوفية قبل كل شي بعدين اسأل على كيفك …
أنا : يا أخوي ما تحس أنت أختك تصايح شوي وتموت و أنت ما همك ألا بطنك تبي اقرب بوفيه شوي ونوصل البيت وتبلع على كيفك بش نعرف ليه أختك تبكي
بندر : يابن الحلال أطمر بنا على اقرب بوفية وما عليك أختي وأنا أدرى الناس بها بس لا تضيع وقت وسو اللي أقول لك عليه بسرعة قبل لا يأذن العصر
أنا : والله من قلة الأحساس أخته مقطعة روحها من الصياح و الأخ همه بطنه مع أنه مفطر مرتين بس الشكوى لله ونطمر لأقرب بوفية ويطلب بندر عصير كوكتيل ويعطيه لموضي الا وهي تسكت وتصير تبتسم تقول عرائس من أول , زر يضحكها وزر يصيحها .. وما غير البنت تلط في العصير
أنا : وش القصة وين الصياح اللي بغت تموت نفسها عليه اليوم كله وش صار عليه
بندر : يابن الحلال أبوي معودها من يومها صغيره أذا أحد زعلها ولا ضيق صدرها نراضيها بعصير كوكتيل تحبه موت
أنا : طيب يا موضي بما أنك رقتي وهديتي ليه كنتي تصيحين ومقفلة جوالك وقالبتها مناحة …
موضي : ابد جلست في السرى أنتظر موعد دخولي على المقابلة حقت كلية الحاسب زين ..شوي وتشتغل الواسطات الا بنت الدكتورة فلانة وفلانة بنت فلان ..وفلانة أخت فلان ما دخلت ألا الساعة 11 .يوم دخلت الله لا يوريكم تستلمني الدكتورة ما تدرين أننا ا كتفينا من البنات في كلية الحاسب قلت لها وشلون خبري ما في مقابلة للكلية وباقي بنات واجد مقدمات ,قالت لي وش عليتس أنتي من غيرتس ثانيا من أوراقك عرفنا أنك من حريملاء بتستحملين الغربة والسكن في الرياض ..قلت لها عمتي لها بيت هنا في الرياض واصلا من حريملاء الى الرياض ما تجي نص ساعة أهون من المدرسات اللي يكرفون فوق 400 كيلو كل يوم ..ألا تلتفت علي اللي جنبها وتقول لي يعني أهلك موافقين أنك تدرين حاسب ..ما يعرفون أنه مجال صعب ..قلت عارفين وموافقين وداعية لي أمي أمس بالليل ..قالت خلي المجال للي ناوية تشتغل بعد التخرج ..قلت لها الله لا يعوق بشر بأشتغل بعد التخرج ..قالت وين بتشتغلين من كثر الوظائف بس ثانيا لو فرضنا ولقيتي شغل اهلك بيوافقون يشغلونك مدرسة تكرفين فوق 500 كيلو يوميا ولا تشتغلين في مستشفى مختلط مع رجال ..ولا في بنك ربا وفوائد وحرام واضح أن اهلك محافظين يا بنتي فرصة سعيدة الله يوفقك في كلية ثانية غير كليتنا …ما خلوني أتكلم وبعد ما طلعت عرفت أن هالمقابلة مخصصة للطالبات اللي بيحولون من كليات ثانية للحاسب ,,ورجعت تصيح وتشفط من عصير الكوكتيل ..
أنا : وجع وش دخلهم بتشتغلين ولا لا .. بتسكنين في الرياض ولا في المريخ ..وكلهم الله على خلقه
بندر: يعني الزبدة ما قبلوك في الكلية ..مو يمكن يبون يستفزونك كودك تهونين عن الكلية وبس هذا كل قصدهم
موضي : والله خايفة بقوة ما يقبلوني بعدها خياراتي مو ذيك الدرجة علوم أدارية وأدب انجليزي واللي سمعته من البنات أن في زحمة كبيرة على هالقسمين يعني شكلي ما راح يقبلوني
أنا : المهم يا موضي تماسكي قدام أمي لا تسوين زي أخوك بندر بعد أختبار الطب ترى الوالدة فيها سكر ,,, ودخلنا البيت طبعا أنطلقت موضي على أمي وصياح وضاع مستقبلي يا عمتي ( بشويش يا ذا المستقبل)
أمي : اهدي يا بنتي بس وش فيتس وش صار عليتس ..أذكري الله أول وبعدين مسحي دموعك وساعتها نشوف لك حل انشاءالله ..بس أهدي يا بنيتي تراك روعتيني
أنا : أقول يا وكيلة وزارة التعليم العالي بالنيابة أجل بتشوفين لها حل .. أقول لتس دخليها ..كلية علوم البحار ..ولا هندسة النفط ..ووديها بعثة للخارج هي وأخوها ..أذا تبين بنت أخوك تمشي أمورها افتحي دليل ا لتليفونات شوفي أذا تعرفين واحدة لها أخت تدرس في الجامعة
بندر : الله يستر بس بكرة دوري والله خايف من هالجامعة .. يا خوفي يمرمطون فيني الأرض
أنا : يابن الحلال آها بس أنت توّكل على الله انشاء الله ومني أنا أشتغل رقاصة أحسن لك تطلع ذهب في هالأستراحات ..وعيال النعمة يصرفون عليك وش لك بالجامعة والغثاء
أمي : اها بس فال الله ولا فالك المهم روحوا تغدوا وريحو ترى بكرة وراكم يوم طويل تسجيل بندر ومقابلة موضي في الأدب الأنجليزي . يالله أنك توفقهم يا رب
أنا : يالله أن تدق اللي في بالي يا رب الواحد داخل على أجازة و فضاوة و ضيقة صدر ..يبي له قلب يحن عليه ويا يداريه .. يا ربي كبيرة في حقي فاتورتي في الصيف تنقص وفواتير الخلق تزيد
وثاني يوم ما قومتني أمي بدري لا تستغربون الساعة 5 الفجر طلعنا من البيت بس لأني ما سكرت السماعة مع فدوى الا الساعة 5 ألا ربع على ما صليت الفجر وصلحت لي ساندويش جبن الأ احنا طالعين من البيت وساعة ونص على ما وصلنا لعليشة من زحمة الخلايق هناك وبعدين طيران على الملك سعود ومقر قبول الطلاب ..وقفنا السيارة ونزلنا أنا وبندر ألا مسوين شبابيك للكليات .نقز بندر على شباك الحاسب …بس شوي ما درينا ألا المسئول على الشباك يقوم فوق الطاولة ويصارخ الحاسب قفلت يالله فرصة سعيدة خيرها بغيرها ..طبعا أنا طيرت عيوني وبندر توها بيسأل شاف اللي قدامه في السرى يتناتقون للشبابيك الثانية , كلية الهندسة والعلوم بندر أندحش في صف كلية الهندسة يقال الولد يبي يصير مهندس شوي والمسئول عن استقبال طلبات التقديم للهندسة يرفع لوحة مكتوب عليها جيم أوفر بس الشباب ما هم واقفين في السرى الا يقوم على الطاولة ويصرخ بأعلى حسه يا شباب نشكركم لثقتكم في كليتنا العامرة بس والله كان ودنا نبيضها معكم بس الحمدلله اكتفينا يالله نشوفكم على خير السنة الجاية واستروا على ما واجهتهم
الطلاب : ( بصوت واحد ) وشلون وش صار وش اللي اكتفيتوا وحنا وين نروح
الموظف : اها بس أحد قال لكم ما تذاكرون زين وتجيبون معدل يرفع الرأس سود الله وجيهكم الواحد لازم يكون له طموح أذا ما جاب فوق 98% ما يقبل على الجامعة ..ترى سرى كلية العلوم بدى يمتلي تلاحقوا أعماركم ..
وينتاتقون الشباب يم سرى كلية العلوم .. ما رحمت ألا واحد دب في السرى منحشر مسكين بكل قوته وده يتلفت يشوف وش يصير حاله حال الباقين بس كل ما التفت يسمع واحد يتوجع … شوي و بندر في السرى وأنا انتظره ومنخنق لأن من زحمة ا لمكان ما صار في هوى وصل دور بندر وسجل في كلية العلوم .. المفروض على نظام التسجيل الفوري خلاص بس عطوه أشعار أنه انتظار في كلية العلوم يعني مو أكيد ..هذا اللي ناقص ما صارت جامعة صارت الخطوط السعودية على غفلة ..المهم ما صدقت خلص بندر وطلعنا للهواء الطلق ألا الساعة واحدة وربع الظهر وعلى نلحق موضي ولا ما نلحقها ونطمر على عليشة ويدق بندر على أخته الأ تطلع وهي تشاهق ودموعها أربع أربع ..طبعا أنا عرفت الشغلة ..وعلى اقرب بوفية و عصير كوكتيل ..مو كوب ولا حجم عائلي الأ جيكة صغيرة ..ونوقف على جنب والبنت تشرب شوي وتشاهق شوي ثم تقص لنا
موضي : اليوم رحت أبي أقول لهم أني مو محولة فداخلة المقابلة بالغلط بس مالقيت أحد يعبرني …المهم رحت لوكيلة كلية الحاسب افهمها الوضع ..أول ما دخلت سألتني من أرسلني لها .تحسب أني معي واسطة قلت لها أنا ما أرسلني أحد بس اللي صار لي كذا وكذا أمس وما أبي كلية الحاسب تفوتني ..الأ تناظرني من فوق لتحت وقالت يا بنيتي مو كل شي نبيه نحصله الموضوع طلع من يدي والكلية قفلت ..
بندر : يلعن أبوهم ما صارت كليات ذي صارت شركات مساهمة ..ما قالوا كم وصل سعر الكرسي قصدي السهم
أنا : توك ما شفت شي المهم كملي يا موضي وبعدين وش صار
موضي : ابد صحت عندها ..قالت لي بس يا بنتي ..لا تصيحين وتضيعين وقتك ..أذا بتكسرين قلبي من الآن أنسي دموع الطالبات مثل العسل على القشطة على قلبي أنزلي تحت وعبي استمارة جديدة ألحقي لك على كلية تدخلين فيها قبل لا يفوت الفوت ..المهم ونزلت تحت وعبيت أستمارة من جديد وكل ما أخترت شي قالوا مافي مكان قفلت .. العلوم قفلت .. أدب أنجليزي قفلت يقولون في بنات قراوى واجد يبون بنت أبو سليمان اللي تقدم في الام بي سي مو مصدقين أنها سعودية … لغة عربية باقي فيها مكانين محجوزات لبنات دكتورات ..رياض أطفال عندهم زيادة عدد خمس طالبات الواسطات فيه طق عصي لأن نص دوامهم نوم في نوم اقل بنات يداومون سالت اللي تستقبل الطلبات وش باقي قالت لي علوم أدارية .. قسم محاسبة .. ولا آداب قسم آثار
أنا : طيب ما شفتي فدوى أمس كلمتها تقول بتجي بكرة للجامعة عندها مشكلة هي بعد … قصدي وش فيها العلوم الأدارية ملح وقبلة نوم وفصفص ألى آخر السنة قبل الأختبارات بأسبوع تذاكرين وتنجحين
موضي : لا ما ينفع سمر بنت خالتي دخلتها وهذي هي تلطم .من وكيلة الكلية نوال الى خديجة السودانية اللي نص البنات يدخلون الأختبار النهائي عندها وهم راسبات مافي أمل ينجحون .. ويا قلبي لا تحزن اللي شادة حيلها تخلص الكلية في 6 سنين و المشكلة عميد الكلية متكي في الدرعية و لا يدري عن شي من البلاوي اللي تصير في عليشة كل هذا وتبيني أدخل علوم أدارية قسم محاسبة …
بندر : طيب وش سويتي بكرة بأقدم انشاءالله باتصل على أمي وأبوي أذا يعرفون أحد يدبرون لي مكان لأني سمعت من البنات اللي معها واسطة تدخل أي قسم لو مقفل أطقع ما يشوفون
أنا : الله يطمنتس بالخير أجل بتدقين على خالد ا لعنقري .. يا بنت خالي ابوتس بركة منه أذا يعرف وكيل المتوسطة اللي في حريملاء ..البلا أنه صديق الفراش .. من جد لو محلك سجلت في قسم الأثار ومنه بتقدرين تحولين على أي قسم ثاني
موضي : والله فكرت فيها بس في بنات خوفوني قالوا أن قسم الأثار على شان يقبلونك لازم توقعين أوراق أنك ما تتركينهم وتحولين لقسم ثاني أبد وأذا خالفت هالتعهد يخصمون من معدلي
أنا : الله يا الدنيا قسم الآثار من عقب ما كان رئيس القسم بنفسه يقهوي الطلاب المسجلين في القسم مع أنه عارف أن تسعين بالمية منهم بيحولون والعشرة الباقين بيفصلون من الجامعة كلها ولا بيدخلون العسكرية ..صاروا يخلون الطلاب يوقعون على تعهدات أنهم ما ينقلون .يحق لهم على الفضيحة اللي تصير أول الأجازات ..السنة الجاية يا خوفي يخلون الطلاب يوقعون على شيكات مو تعهدات بس ….
بندر : قولي انشالله يا موضي أبوي يطلع يعرف واحد مهم يسجلنا سوى في الحاسب …
أنا : وشوله هالتواضع يا أخي أغبط زوجتك عليك لأنك متواضع ..لو أنا مكان وأبوك يصير أبوي بأقل من بعثة ما أرضى وفي كلية الطب بعد أقول يا عيال الفقر أنطموا بس ..مواطنين ولهم لسان يحكون بعد
وصلنا البيت وبدى توم وجيري بندر وموضي ينوحون عند أمي ودقوا على أبوهم رئيس مجلس الوزراء على غفلة وعلى قولته أنه بيشوف وبيدبر لهم واحد … حتى أمي ما قصرت ..لقت رقم جارتنا يوم كنا ساكنين في الشميسي قبل 15 سنة ..أم سعد وأم سعد بنت أختها ( فاتن ) على كلام أمي معيدة في كلية التربية ..اتصلت عليها ..طبعا البنت على بالها يومها معيدة صارت شي مهم وجلست تتفلسف على أمي لين داخ رأس أمي آخر شي قالت خلي البنت تسجل أي شي قبل لا ينتهي التسجيل ولا يحولونها انتظار ..بس أمي حجرت لها
أمي : طيب يا فاتن واللي يسلمك لو ما قبلوا البنت في الجامعة يصير نجيبها لك في كلية التربية تقبلونها عندكم هاه ( سلم لي على التحجير يا شيخ )
المعيدة فاتن : هاه ايه ليه لا بس خليها تحاول في الجامعة وتحرص على الجامعة أول لأن الجامعة أحسن وأقوى .ولا تيأس منها ترى كليتنا ما فيها ألا الدجة ( عاش مصرف )
أمي : ( يوم حست ما فيها فائدة) طيب جزاتس الله خير بس قولي لخالتس ترجع باديتنا اللي اللي أرسلت لها فيها مراصيع قبل عشر سنين
المهم جلسنا بعد المغرب كأننا في عزاء طبعا هم في جزء في الصالة وأنا في جزء من الصالة بناءا على أوامر سي بندر علشان ما أشوف أخته موضي والله لو أنها نجوى كرم المهم ..حبيت أحيي عندهم الأمل
أنا : وش رأيكم بجامعة الأمام رهيبة وفيها أماكن واجد وعندهم قسم حاسب صدق مو زي كلية الحاسب بس شي على الأقل خريج جامعة وحاسب بعد
بندر : أولا صعبة كل شهر تحفظ لك جزء قرآن ثانيا مو معترف بها عالميا هنا المشكلة
أنا : بشويش لا يكون بتشتغل انشاءالله في مايكروسوفت ترى بيل غيتس يذرف الدمعة ينتظر طلتك البهية أن لقيت شغلة في الخرخير احمد ربك
بندر : اللي أقصده هو أن متطلبات سوق العمل باتت تفرض على الواحد شهادات عالية ويلحق بالركب العالمي
أنا : يمّه تراه ولد أخوتس قاعد يسب فيني ويقول أني سافل و أنا ساكت احتراما لك
أمي : بندر اها بس وأنا عمتك ما توصل أنك تشتم ولد عمتك عبدالعزيز أولا أكبر منك وثانيا هذا جزاه اللي ماغير يجيبكم ويوديكم اعتذر له
بندر: يا عمتي والله ما قلت له شي اقسم بالله ..أقصد سوق العمل متطلباته باتت تخلي الشاب
أنا : تراك أقلقتنا بسوق العمل حقك اللي يسمعك يحسبك تحكي عن سوق الذهب على غفلة تبون تروحون جامعة الأمام تجربون حظكم ولا لا كثرة حكي ما أبي
موضي : الأ خلنا نروح ما أحد يدري وش بيصير بس أول تحطوني في عليشة تنتظروني شوي بأسجل اسمي على كلام فاتن في أي قسم المهم ما يفوتني التسجيل … وبالفعل رحنا الصبح حطينا موضي عند الجامعة وجلسنا ننتظرها وشوي الا و تجي وهي تصيح صياح غير طبيعي ..المشكلة الطريق زحمة ومسدود من كثر الطالبات اللي يبون يسجلون والبنت تصيح صياح غير طبيعي فلا بد من عصير كوكتيل ..قلت لبندر ينتبه للسيارة فيما بأنزل وأدور مطعم أجيب منه عصير كوكتيل على السريع وبعد جهد جهيد جبت للبنت عصير كوكتيل وعطيته لموضي وهي مشتغلة صياح ومناشق وشرب من هالعصير وبما أننا متحجزين في السيارة ما نقدر نتحرك قمنا التفتنا عليها ..وبما أني رومانسي ورقيق المشاعر يقال لي بأواسي بنت خالي جيت بأحط يدي عليها و أقول لها لا تبكين ما دريت أل بندر ماسك يدي وهي في الهواء ومطير عيونه فيني
بندر : خير وش تبي تسوي أنت ووجهك
أنا : أبد بأطبطب على بنت خالي المسكينة تصيح ما تشوفها ذابحة نفسها من الصياح
بندر : أقول تعاطف معها في نفسك وكثر الله خيرك ..لكن طبطبة لا مأنت أخوها ولا رجلها علشان تطبطب عليها
أنا : يا أخوي أنت ما تحس البنت تبكي وأنت تفكيرك رايح وين ثانيا وش معنى أنا ساكت أذا قمت تحب أمي هاه
أنا : اوكيه أمك أنت مرة خالي شايفني قد حبيتها ..ثانيا ايه مان برأس أمي عندك مانع أجل أنت مان بكتف أختك لو بأبوسه كان بعد قلنا لك حق تمنّ..
بندر : أقول لا يكثر لا نقلبها مجالد هنا وخر يدك ولا تفكر تحطها على كتف أختي مرة ثانية
موضي : يوووه اوف منكم أنا في وادي وأنتم في وادي ..والعصير بعد خلص اهيء اهيء اهيء وااااااااااء
بندر : قم اطمر يالله جب لها عصير ترى شكل المصيبة كبيرة هالمرة بسرعة وش تنتظر جب أكبر حجم .,,, وأطمر أجيب لها هالمرة حبتين عصير كوكتيل ..و ركبت السيارة وبدوا الناس يتحركون شوي ونمشي بالسيارة لين وصلنا مكان فاضي ووقفنا على جنب
موضي : رحت لهم بأسجل علوم أدارية قسم محاسبة ..ردوا علي قالوا توك تتكرمين طال عمرك وتوافقين قفلنا .. قلت طيب قسم آثار قالوا ما عاد يمدي … هذا بعد قفل ..خنقتني العبرة قلت واللي يرحم والديك سجليني أي شي بس أكون في الجامعة ..ترد علي وهي تضحك تقول مو أنتي في الجامعة الحين لا تطمعين عاد تبين تسجلين بعد .. قفلنا يا بنتي الله يعطيتس ..
بندر : طيب يومهم قفلوا هالزحمة كلها ليه أمة محمد منحشرة برى وجوا
موضي : سألتها قلت اليوم طيب زحمة يعني ذولي كلهم مالهم مكان وش جايين يسوون ..ردت علي قالت في بنات بيحولون من كلية لكلية هذا يومهم وفي بنات الأكاديميات اللي ما عندهم نسب تشرف لهم حق التسجيل مهما كانت نسبتهم ..وبقايا عماتك اللي معاهم واسطات وما جوا من قبل لأنهم كانوا منشغلات يا بعروس يا مالهم خلق يجون وهذي كل السالفة يعني جامعة الملك سعود بح ما في أمل
أنا : يا بنت الحلال عساها خيرة بس الحين انشاءالله نروح جامعة الأمام الحين و نسجلك أذا ما قدرتي تحولين لجامعة الملك سعود اسمك جامعية حتى أخوك ماش ماني مرتاح لشغلة الانتظار حقته هو بعد نسجله هناك بس المشكلة ما أدل وين فرع البنات علشان كذا بنروح نسجل بندر ثم نسأل عن قسم البنات
ووصلنا هناك وطبعا حسب ما أسمعه أنهم هناك يتكلمون بلغة عربيبة فصحى ولقيت هناك شاب عند البوابة
أنا : السلام عليكم ورحمة الله وبركاته ..لو سمحت يا أخ العرب هل تسمح لي بسؤال ؟؟
الشاب : وعليكم السلام ورحمة …..ما هذا يا فاسق أوصلت بك الدناءة كي تحضر امرأة الى قسم الرجال أجننت أم تريدون أن تدعون الى الأختلاط أو تفعلون كما فعلتم بالرئاسة العامة لتعليم البنات عليكم اللعنة عندما دمجتموها في وزارة المعارف ماذا جنيتم بفعلتكم هاه أخبروني
أنا : كلا البتة لا تفهمني بعجل بل افهمني بتروي ( أموت في اللغة ) لقد حضرنا هنا لكي نسجل هذا الغلام وتلك الجارية ولكننا لا نعلم أين يقع قسم الجواري هذي كل السالفة ابتدينا بالنظر في سكوت وفي حذر( اشتغل قسم الموسيقى عاش واقف )
الشاب : بماذا تهذري يا فتى أخرج من الكلية قبل أن استدعي لك رجل الأمن هيا أخرج ..
أنا : واللي يرحم والديك أي أباك وأمك امهلني بضعة دقائق ..لكي أسجل هذا الجنط اللذي بجواري فأنه على لائحة الأنتظار أي الويتنج ليست فنريد أن ندعسه في أي كلية قبل فات الآوان
الشاب : الحمدلله أن التسجيل انتهى ولا يوجد مكان لأمثالكم من دعاة الأختلاط هيّا أغربوا عن وجهي
أنا: لا يغرك المظهر خل عينك على الساس ترى الشاب اللذي على ميمنتي كان يأذن في مسجدهم في القرية أحيانا وليس دائما موب تسذا يا بندر
بندر: هاه وشو .وش أقول ايه وهو صادق بس ما هوب دايم الصلوات الجهرية بس ..
أنا : ويقصد أنه يأم بهم أيضا في الصلوات الجهرية غربلك الله في آذان جهري وآذان موب جهري هاه أهناك فرصة
الشاب : اقسم بالله أن لم تنصرفا لسوف استدعي لكم الهيئة .الحمدلله أن التسجيل قد انتهى وأمثالكم ممن يسعون في أرض الله فسادا ليس لهم مكان في جامعتنا
أنا : وش أنتهى التسجيل الله يصلحك تو الناس مستلمين شهاداتهم ما أمداهم حتى الشهادات حارة توها وأنتم خلصتم التسجيل ..
الشاب: أنّ مدة التسجيل الرسمية أسبوعين فقط ولكن اكتفت الجامعة من المتقدمين حيث تقدم لها عدد مهول من الطلبة والطالبات من سيماهم تنضح بالخير وليس مثلكم يا دعاة الاختلاط ..
بندر: تراك أقلقتنا اختلاط واختلاط غربلك الله أختي وين أوديها أرميها في الشارع أصلا أصلا لو جامعتكم يسجلوني برتبية عميد ما قبلتهم الحمدلله مسجليني انتظار في كلية العلوم
أنا : وهو صادق ولد عمي عندكم كلية علوم .. ..هاه رد عندكم كلية طب أسنان يسحبون الخلائق على وجوههم هاه وش فيك ساكت .. ,, واللي يرحم والديك لو كلية شريعة ودعوة ندعس فيها هالغلام وتلك الجارية لا تبدأ السنة الدراسية وهم عاطلون أضحك الله فاك قصدي ثغرك ماذا قلت
الشاب : انصرفوا ..تقلعوا قلع الله روسكم عن أجسادكم هيّا
وننحاش بالسيارة طبعا ما نعرف وين نروح ولأني رقيق المشاعر وحساس اقترحت عليهم نروح مطعم نتغدى ونهدي أعصابنا ثم نفكر وش السواة
بندر: وشلون نفكر وأنت في قسم واحنا في قسم ؟؟
أنا : وليه أنا في قسم وأنتم في قسم ..ما في أزين من الجمعة يا بندر يا ولد خالي
بندر: وأختي وشلون تأكل وتأخذ راحتها وأنت قدامها مطير عيونك هاه وشلون ولا انشاء الله تبيها تكشف لك
أنا : والله أن كشفت لي تراني مو غريب ولد عمتها ..طيب يعني أجلس أنا وهي في نفس الجهة ووعد شرف ما التفت عليها وش قالوا لك ما قد شاف بنات ..شوفة عينك البنات ميتين علي بس أنا مو مهتوي
موضي: بس لقيتها ..عرفت الأمل الأخير ..ما في آلا هي ..معهد الأدارة العامة ..ودوني هناك
أنا : صاحية أنتي يا خبلة تراه صعب مرة وعليه طق عصي ..غير أنهم شديدين مرة في التعامل
بندر : لا شديدين ما أبيهم أجل با أخلي أبوي يسجلني في كلية الأمير سلطان مو أنا ولده لازم يصرف علي
أنا : ما بقى ألا أبوك يصرف عليك 60 ألف ريال في السنة ..خالي لو كل سنة بيدبر 60 ألف كان يا يصيف في لبنان ولا كل سنة معرس له على واحدة شكل ..
بندر : والله مالي شغل ولد خال واحد من الشباب يمدحها مرة ..يقول جدولك على كيفك وأن زعلك الدكتور أتفل بوجهه واطلع مو أنت تدرس بقروشك يعني مال أحد عليك ذلة هاه وش رأيك يا موضي
موضي: أنا مرة في عرس في الرياض أذكر بنتين يحكون عن معهد الأدارة العامة صحيح كلامك يا عبدالعزيز أنه شديد بس حلو ومحترم غير كذا خريجينه مطلوبين بقوة في سوق العمل
أنا : لا سوق العمل ولا سوق الذهب يا شين الطفاسة دوري لك مكان تندحشون فيه بعدين فكري في العمل أذا تخرجتي ..بس خلينا نرجع لسالفة أبو ستين ألف ريال في السنة طيب طال عمرك ..دام الحكي ببلاش لو خالي قرر ان يخربها ووافق ..بتقدر تجاري الشباب اللي هناك الفياجرات واللكازس والاوديات غير راعي البورش الحمرا اللي يداوم يومين في آخر السنة ولا بتداوم بالوانيت حقكم ..ولا كابريس الصابونة حق أبوك
بندر : ليه تبي تسدها في وجهي على العموم رح لمعهد الأدارة العامة خل نسجل هالبنت ونفتك منها …
وعلى ما وصلنا ألا معهد الأدارة كان مسكر بس أشوى توهم ما بدوا التسجيل التسجيل بكرة ..من الساعة 7 الصباح .وثاني يوم من الساعة 6 الصباح وأحنا مسنترين بالسيارة عند البوابة ..وتنزل موضي بأوراقها علشان تسجل واحنا ننتظر وندردش أنا والرفيق بندر
أنا : الله يستر لا ترجع أختك تبي عصير كوكتيل بعد من جت الرياض وهي سامنة 3 كيلو من كثر هالعصير اللي تزطه
بندر : فال الله ولا فالك انشاءالله بترجع وضحكتها توصل لآخر الدنيا ..
أنا : انشاء الله الواحد يبي لها الخير بس تدري معهد الأدارة أحسن من الجامعة مية مرى مع أنهم شديدين مرة
وشوي وترجع موضي وضحكتها ترقع واستبشرنا خير
بندر: ما قلت لك بترجع وضحكتها ..هاه بشري سجلوك خلاص انقبلتي
موضي: ايه يا زينهم ليتنا رايحين لهم من أول ..شفت الطالبات زحمة هناك وصفيت سرى في أحد الصفوف و تجيني واحدة مشرفة من اللي يسجلون الطالبات وجلست تسولف معي يا حليلها .. قالت لي وش تبين أي قسم .قلت لها ماني محددة قالت وش رأيك تأخذين دبلوم .تراها حلوة مرة وسهلة لدرجة سألتها وش الدبلومات اللي عندك.( حشا رايحة سوق مو تسجل بمعهد ) قالت لي في دبلوم سكرتارية ودبلوم آلة كاتبة عاد أنا أخترت سكرتارية ..بس لما لاحظت أن ما عليها سألتها قالت لي هي البنات ينزحمون عندها في الأخير مو أول التسجيل وبس سجلتني وقالت بننتظرك تنورين القسم ..الحمدلله آخرة صبري زين
أنا : بندر تعال ارقص معاي مشتهي ارقص ..اجل سجلتي دبلوم وسكرتارية ..هلا والله وما عندها زحمة ألا في آخر التسجيل وسكرتارية ودبلوم .. موضي تدرين أنتي سجلتي نفسك وين
موضي : طبعا في معهد الأدارة العامة قسم سكرتارية
أنا : يا موضي سجلتي في دبلوم يعني دراسة سنة واحدة . ثانيا بتشتغلين سكرتيرة يا بنت خالي .. ماشاء الله
بندر : كان والله أذبحك وش تشتغلين سكرتيرة بعد أنتي ووجهك هذا اللي ناقص …
أنا : الله حلاة من يبشر خالي بنتك بتدرس سنة واحدة بعدين تجلس عشر سنين على ما تلقى وظيفة سكرتيرة في قسم نسائي ..لكن في قسم رجالي في عشر دقائق ..
موضي : اهيء اهيء يعني لعبت علي هالدبة لاااااء و ااااء اهيء اهيء اهيء
بندر: أسفط على جنب العصير العصير بسرعة أطمر جب كوكتيل البنت حست أنها أكلت مقلب محترم يعني الله يعين على الصيحة ..يالله وش تنتظر
أنا : لحظة يا أخوي احنا في وسط طريق الملك فهد وش تبيني أسوي من وين أجيب العصير .. يا والله البلشة
موضي: يا والله البلشة بعذري قايلة من وين بيسجلوني وتجيني هالخيشة تدحلب فيني وتقنعني آخرتها طلعت كذا وأنا أحسب الدبلوم يعني شهادة أكبر وأقوى
ووصلنا للبيت وبدى مسلسل الصياح الحلقة العشرين موضي ارتمت على حضن أمي والحقي علي يا عمتي ولا يدري أبوي لا يقتلني سجلوني في دبلوم سكرتارية
أمي : دلبوم وش زينة بعد لو يحصل منه لأخوتس بعد ونفتك
أنا : الدبلوم يا حبيبتي دراسة سنة وتصير سكرتيرة ..عاد من قلة السكرتيرات في المملكة وألا من زين رواتبهم المهم لا تخافون ابشروا يا أبناء خالي لقيت حل لمشاكلكم الواسطة مالكم ألا الواسطة
أمي : مالت عليك من عندك بيتوسط لهم .أنت ولا أبوك ولا واحد من ربعك
أنا : لا ولي العهد بكرة نروح الحرس ونرتز عند البوابة مع هالبشرية و نقدم هالمعروض ويصكنا طال عمره بواسطة كبر الجدار تحطهم في وسط الكليات اللي يبونها بعد أنا قايلها حكمة هالديرة ما تمشي ألا بالواسطة
وثاني يوم ننطلق للحرس ونصف مع هالبشرية في الشمس لين دخلونا و شياب وخياس وناس ما تسبحت لها كم شهر وجلسنا لين جا دورنا ..وفهمت بندر أذا جلسنا عند ولي العهد أن يحب يده ويتبكبك ولا يحكي بس يصيح ويطير عيونه .وبالفعل سلمنا عليه وعطيناه الورق وبعدين واحد مستصح دزنا وقومنا يعني خلص دوركم والله لو أني واقف عند … المهم طلعنا ننتظر رد قالوا في شباك وقفوا فيه تلقون الواسطات اللي تبونها ورحنا وانطقينا عند الشباك وجلسنا لين نادوا على أسامينا وطمرنا وخذينا الورقتين ورقة لبندر وورقة لموضي
بندر : والله ما يقصر طويل العمر يروح بنفسه يكتبها ..حريص على خدمة المواطنين
أنا: أقول أمش بس لا توهقنا ..ابتسم وغن سارعي للمجد والعلياء ,,ونطمر للجامعة وندخل عمادة القبول والتسجيل وأقابل موظف أقول له وين عميدكم ..طبعا أول الأمر حسبني متخلف عقليا بس مع شوية تكرار وداني لمكتب العميد وتطاقيت مع مدير مكتبه لين سمعنا هو شخصيا وطلع و شافني وقلت أبيك في شغلة ضرورية
أنا : هع ناس ما تجي ألا بالعين الحمراء هذا ورقة من عمك طويل العمر ولي العهد يالله سجلوا هالولد الزكرتي في كلية الطب …والبنت في كلية الحاسب يالله ولا تضيع وقتنا مواعدهم بأعشيهم في عمو حمزة استاكوزا
العميد : ممكن أشوف الخطابين الله لا يهينك ..ويأخذهم ويناظر فيهم وشو والأ يرميهم على الأرض قدام عيني
أنا : هي وش ذا وش سويت أنت صاحي ترمي ولي العهد قصدي خطاب من ولي العهد على الأرض ولي العهد هذا موب رجل أمك أنت تفهم ولا لا قم يالله بسرعة قبل لا يشوفك أحد
بندر : واحد يتصل على الأستخبارات ولا المباحث شكله معارض
أنا : أنت يا خبل شل الخطاب ترى الولد متهور والله يسويها قم بسرعة شل الخطابين من على الأرض ترى والله أن خست في السجون بكرة عزة نفسك ما راح تنفعك .
العميد : يا حبيبي عندي ألفين خطاب من طويل العمر واثنعشر ألف خطاب من ولد طويل العمر وأربعة الآف خطاب من ولي العهد تبي اكمل لك الليستة ولا لا ..بس عندنا هالورقة تعميم من فوق ما نقبل أي ورقة الأ اللي عليها ختم وتوقيع مع بعض ..فهمت الحين ولا أعيد والحين أنت حر تأخذ خطابك ولا حطيناه في الصناديق الى موعد حرقهم بعد أسبوع في محرقة الحائر تدلها ولا خل السكرتير يدلك عليها والله هذا الناقص صدق عيال فقر
أنا : لا وش دعوة يا طويل العمر كلك خير وبركة ( بندر تبكبك حتى ولي العهد ما يزبن هنا ) طال عمرك يرضيك هالتيس يضيع مستقبلة ولا أحد قبله ..ترى كلية الطب مزحة أنت وضميرك عاد انشالله لو كلية طب أسنان قصدي كلية فراريش ..وأخته شوفة عينك في التسعينات ولا كلية قبلتها وكل اللي صار خلل فني لو تشك توقيعك الله يسلمك على ورقة كل شي يضبط ..هاه وش قلت لا حرمنا الله من هالضحكة
العميد : تشوفون الباب كبير الله يعز الحكومة ياليت بعد ما أعد الى 3 ما أشوفكم هنا في الغرفة 1 ,2
بندر : طيب طال عمرك ما أبيك تسجلني في كلية تعيني مراسل عندك ولا قهوجي على الأقل اسمي استلم راتب ومن الجامعة .. وش قلت الله يسلمك
أنا ك يقول لك الرجال بعد 3 ما يبي يشوفنا في الغرفة .. وتبيه يعينك مراسل عنده .أنا أعرف يا طويل العمر أن العلاقة بينك وبين عميد كلية الهندسة مش ولا بد عين الولد مراسل عنده ترى بندر هذا خبرة في حرق الأعصاب .. أنت تحسبه دلخ بس هو مسوي نفسه دلخ لدرجة أنك تحسبه دلخ حقيقي
العميد : 3 يالله عاد برى أنت وأياه يالله انقلعوا قلعكم الله وسكروا الباب وراكم
ونطلع أنا ويهمس لي بندر وش وده يسوي ( يقول هو موب أنا وده يروح الحرس الوطني بعدين ====== مشفر =====) ما نقدر ننشره بس ترى ما فيه أي شي يعارض سياسة الحكومة
ونرجع البيت يد فوق ويد تحت وتسألني أمي وش صار طبعا قلنا لها السالفة وتقبلتها برحابة صدر لأنها صار عندها تبلد حس ..وقالت لقيت لكم خبر بمليون ريال ولد خالة أمي من الرضاع ولده يدرس في كلية المعلمين روحوا سجلوا بندر عنده توني مكلمته وقال خليه يجني وأن حصل تسجيل لموضي ولا الدلبوم وش زينة بعد تدرس سنة وتنطق سنة ونلقى لها واحد يعرس عليها وتجلس في البيت
أنا : واللي يرحم والديك ما تخبرين عجوز طايحة أسنانها نزوج بندر عليها ..وهي تصرف عليه قسما بالله من كثر ما راح معي وتفشلنا أني كرهته ومليت من وجهه وقريبكم هذا وش اسمه علشان نروح له
أمي: اسمه الأستاذ محمد ويدرس في قسم اللغة العربية
ونروح هناك وندور أحد نسأله ومن زين الطبايع نص كلية المعلمين أسمهم محمد في قسم اللغة العربية بس 4 .. المهم دخلنا القسم ولقينا واحدا دقمة ( دقمة = قصير جدا ,, عاد من طولي ) واسأله وين الأستاذ محمد
الأستاذ : عفوا ولكن أيا محمد أردت ففي قسمنا الرائع أكثر من أستاذ بهذا الأسم
أنا : مدري والله هو على العموم واحد أطول منك ..غير كذا يصير ولد ولد خالة أمي وتو أمي مكلمة عليه مدري على مرته أو على أمه وموصيته وقال لها عقب ما طق صدره أن يجوني الآن فورا
الأستاذ : أذا أنت عبدالعزيز ابن أبنة خالة أبي وهذا بندر ياللفرصة السعيدة أنا قريبكم الأستاذ محمد يا مرحبا يا مرحبا لو كنا نعلم بوصولكم لفرشنا الطريق بالرمال والورود
أنا : بندر يالله مشينا يا أخي هالعائلة تقهر من قلب اللي ما فيها واحد طويل يلعن أبو هالقهر ..أنت بدون مقدمات تقدر تسجل بندر عندكم ولا لا ..اخلص هات الزبدة ..
الأستاذ: استفغر ربك يا بني لا تعترض على قدرك المحتوم …ماذا أفاد عائلة المنصور مع طول قامتهم في الحلقة الأخيرة تفرقوا وتشاجروا وضيقوا صدرونا بعد 31 حلقة من المتابعة الشديدة لهم ..المهم بالنسبة للفتى بندر سوف ابذل قصارى جهدي لكي أسجله هنا ولا يلام المرء بعد اجتهاد ..
أنا : بندر واللي يرحم والديك خل نمشي بس ترى قريبك ذا حوم كبدي ..ولا يلام المرء بعد مادري وش اسمه يابن الحلال ما وراه ألا الدجة
بندر : يابن الحلال مو هو يقرب لنا يعني مضمون سجلني الحمدلله .,,أقسم بالله ما سجلني والله لا أتوطا في بطنه واكسر سيارته تكسير وابن أمه يشتكيني
الأستاذ : بالله عليكا بماذا تتهامسان أخبراني ولا تخجلا ..
أنا : موب أزين لك أذا عرفت ..المهم الحين نعطيك أوراق بندر علشان تسجله ولا كيف ..ولا وش السالفة
الأستاذ : غدا انشاءالله مع التسجيل تأتيان وتكملا الأوراق وبعد ذالك انشاءالله سوف يكون هناك مقابلة شخصية ..وانشاءالله سوف يحالفكما الحظ وتصبح يا بندر طالب عندنا في معهدنا المتميز ..
أنا : هذا اللي صاجتني عمتك به وروحوا له ..ما قصرت يالدقمة ..خلاص بكرة انشاءالله نجي ولا يهمك نصلي الفجر ونطمر لك ..بس من جد موب أزين لك نشوفك بكرة وأنا جايين الصبح وقافلة معنا من قل النوم لأنك لو تقرب مني بأعلمك شغلك فاهم ؟
ونجي ثاني يوم ونقدم أوراق بندر مع الناس ويحددون لنا موعد المقابلة بعد يومين ..وبعد يومين حضرنا للمقابلة .وجلسنا ننتظر وكل شوي يجينا الأستاذ محمد اللي يقرب لنا يسألنا عن نفسيتنا وأعصابنا ..وأحنا نسأله مو أنت اللي بتقابل بندر ويطق صدره ويقول ألا بلا بس أبي أتأكد .وشوي وينادون على بندر يدخل المقابلة قلت في نفسي يا ولد استغل هالفرصة وأروح الكافتيريا ( اخس يالتطور اسمها بوفية) وراجع لمكاني ومعي سندويشة بيض وعصير برتقال ..ألا وأشوف الأستاذ محمد قدامي
أنا : هاه يا أستاذ وش صار على بندر انشاءالله عدى المقابلة على خير ولا غثيتوه ..ألا صدق وين بندر ؟
الأستاذ محمد : في الحقيقة والواقع يؤسفني أنني لم أكن في اللجنة اللي قابلته ولا أعلم بعد ماذا حصل له
أنا : ( وأنا مقهور منه من أول على شكله وخشته وحكيه الماصل ما وعيت بنفسي ألا رامي السندويش والعصير وطاب عليه تكفخ ) .وغاثنا أعصابكم ووشلون نفسيتكم ..وآخرتها يؤسفك أنا أعلمك وشلون يؤسفك صدق أن ما خليت هالعقال يغني على ظهرك واللي يقهر أنك مع خشتك تقرب لنا لا بارك الله فيك ولا في نسب يوصل لك مالت عليك ..
وشوي ويطلع بندر والضحكة شاقة خشته ..ويقول لي يا عبدالعزيز بارك لي قبلوني خلاص ..والأستاذ محمد بين يديني بيفطس من الطق لين طلعوا الدكاترة والمعيدين اللي يدرسون في الكلية وفكوه من بين يدي ..وكان من ضمنهم اللي قابلوا بندر ولما شافوا بندر يناديني بأسمي والأستاذ محمد يستنجد به ..قاموا بصوت واحد قالوا لبندر دور لك مكان ثاني غير كليتنا ..بندر خبري به كان يبي يفك الأستاذ محمد من بيدي لما سمع هالخبر جر المعيد اللي جنبه وطاح تكفخ بمحمد والمعيد ..لين فكونا الناس والباقين ورمونا من الكلية ..
ركبنا السيارة وفي هدوء تام ..ما حكينا أبد ولا فكرنا وش بنقول لأمي أذا رجعنا ..و لا ندري وش بيصير ولا وش القصة هل الفكرة التعجيز ..أو الفكرة أن في ناس غير عن الناس ولا الفكرة الواحد يدرس شي هو مو بس ما يحبه ألا ما عمره فكر فيه ..بندر فقد فرصة في كلية المعلمين ولا زعل عليها ..هل هو تبلد أحساس من اللي صار له ولا أنه فقد فرصة ما كان يفكر فيها ولا يرغب بها أساسا… علشان بندر وموضي وغيرهم ألوف يكسرون الخاطر من اللي تعبوا وشدوا حيلهم وجابوا نسب جيدة في الثانوية اللي أجازتهم الصيفية ممتدة الى ما بعد رمضان هالسنة لظروف خارجة عن الأرادة .. من أجل هذه الأسباب تم تأجيل طرح هذه القصة الى هذا الوقت ……..
أتمنى أن تكون القصة أعجبتكم وحازت على رضاكم
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
