ثلاثية طاقية لرأسين – قصة دوام الحال من المحال

ثلاثية طاقية لرأسين – قصة دوام الحال من المحال كاملة مكتوبة

واستلمت السيارة الجديدة وكلمت أمل صديقاتها وصاروا ثلاث منهم يجون معنا وهم ولا أقول لكم نشوف وش صار أول يوم توصيل ..لما اجتمعوا

أمل : عزوووزي شف هذا ابله حصة تدرس رياضيات .. زوجها ملازم في حفر الباطن .يا حليلهم يلتقون في الويك اند استحالة تحضر مناسبة إلا في الإجازات وهذي ابله هدى مدرسة عربي ووقت الأزمات تعجبك تدرس دين و إذا غبت أحيانا تغطيني زوجها يطقطق بين العقار والأسهم بس سبحان الله كل ما جمع قرشين يا شرى ارض جديدة يا يبي يبني بيت علشان يبيعه وهذي ابله موضي مديرة المدرسة اقدم واحدة فينا نسميها المجاهدة خمس سنين ولا نقلوها للرياض ..الله يصبرها ويفرحها بالنقل

أنا : ايه وزوجها وش يشتغل لا تقولين طيار

أمل : احم احم ( همسا لي ) وراك كبيت العشاء … ابله موضي

موضي : إلى الآن آنسة ما بعد جا النصيب يا يجي النصيب يا ينقلوني للرياض أيهم اقرب

أنا : الله كريم إن شاء الله تتسهل وينقلونك للرياض ويخلون أمل مكانك مديرة ..

أمل : فال الله ولا فالك الله لا يقوله مديرة في بير العتش ..إذا مدرسة ويالله مستحمله علشان وقت الاختبارات أرتز من الفجرية استلم الأسئلة استغفر ربك بس …

أنا : ولا يهمك استغفر الله بغيتي تأكليني على هالدعوة المهم يا ابلات إيمان مني بالديموقراطية وسعي لخدمات أفضل مو زي الخطوط السعودية عندي اللي تبون ..تبون تسمعون قرآن ولا أغاني عربية ولا غربية جلسات ..طقاقات تبون نحط على الراديو تآمرون أمر وكل أسبوعين نغير الأشرطة لمزيد من التنويع والإثارة هاه وش تبون

وقاموا المدرسات كل واحدة تبي شي .يا حياتي مبين ما أحد من قبل عطاهم وجه المهم على آخر الرحلة ما سمعتهم إلا يطبلون ويغنون صدق بعض الناس ما ينعطون وجه … واحدة ساكنة في النسيم والثانية في الدخل المحدود والمديرة في الملز .. وأرجع البيت مهدود حيلي بس مبسوط على الأقل شغلة واحدة ومريحة وتعرفت على أهل ديرة بير العتش وصرت أتقضى لهم من الرياض و أبيع عليهم وكل شي بحقه ودخل إضافي وتمشي الأيام ومرة تتصل المديرة موضي تبي نمرها آخر واحدة وبالفعل مريناها آخر واحدة وتجيب معها كيس مليان ساندويشات

موضي : تفضلوا هذي ساندويشات فطور علشان الطريق ..لبنة ومربى مشمش ..

أمل : وش الطاري مو عاداتك أخبرك يالله تقومين من النوم وش مصحيك اليوم بدري على هالنشاط .

أنا : جات في وقتها أنا ميت من الجوع

أمل : و أنت من متى تآكل لبنة مو تقول انك ما تحبها وتذكرك بالشوام .. ودايم تقول غير الجبن كرافت والتونة ما أحب

أنا : ايه ما أحبها بس وش أسوى جوعان ولا صلحتي لي فطور وأمس متعشي مع صلاة المغرب و نمت على طول

موضي : يوووه خلاص يا أمل لا تفشلينه مسكين جوعان خليه يشبع وراه خط طويل

أمل : وش شايفتني زانطته ولا مآخذه اللقمة من فمه بس مستغربة هذا كل ما في الأمر

هدى : لا حول وش فيكم خذيتوا الدعوى جد عبد العزيز الله يخليك شغل لنا سلامة العبدالله يا حمام فوق السطوح

و أنا خلصت ساندويش وتوني بأبدى في الثاني وتنغزني أمل على خصري ..

أمل : ( همس لي ) بس يكفي أكل وش تبيهم يقولون عني أني مجوعتك ما أخليك تأكل خير شر

أنا : ( همس لأمل ) بس هذي والله ميت من الجوع ثانيا توني اكتشف إن اللبنة حلوة على غير ما توقعت

أمل : ( همس لي ) خلاص يالله ذبها من يدك بسرعة لا تخليني أتهور أنت عارفني إذا تهورت

أنا : طيب طيب وابلع الساندويش الثاني بسرعة لين بغيت أغص وقامت أمل تخبطني على ظهري بس بضمير بغت أسناني تطيح من قوة التخبيط ..

موضي : بسم الله عليك المفروض أني جايبه معي موية لا سمح الله لو أحد غص يكون معنا موية

أمل : ( تلتفت عليها ) معه ورى موية في شنطة السيارة صحيح جايبها علشان لو سخنت السيارة بس تفيد وقت الأزمات ( ثم تلتفت علي ) الحين ارتحت صاروا يتعاطفون معك صرت أنا الشينة والكخه في السيارة

أنا : يا قلبي ليه مكبرة السالفة أبى افهم جوعان و أكلت بس مالها أي تفسيرات سياسية أخرى

أمل : بكرة أسوى لك عشر سندويشات علشان تفطر عليهم براحتك وبرواق

أنا : لا خلاص وشوله العنا نصوم أحسن … المهم وصلنا المدرسة على خير و خلصت أشغالي ورجعتهم للرياض وثاني يوم الصباح .. نمر المدرسات من جديد و مرة ثانية ابله موضي تطلب نمرها آخر واحدة ولما مريناها هالمرة معها كيسين .كيس سندويشات تونة وجبنة كرافت والكيس الثاني عصيرات وقامت توزع

أنا : تسلم يدك بس ماله داعي تتعبين نفسك كذا .. هذا واجب علينا إحنا

موضي : لا وش دعوى ما في تكليف ولا شي .. ثانيا تعبكم راحة تستاهلون مفطح

أمل : الحين يوم تعبنا راحة وراك كل 3 أيام ممسكتني مراقبة وتخليني أنطق في الحوش لين كل الطالبات يطلعون

موضي : يا حبيبتي يا أمل هذا غصبا عني مو بيدي والله النظام يقول أول سنة لازم تمسكين المراقبة أسبوعيا وما فيه إلا أنتي و ابلتين بس جدد يعني هذا النظام

هدى : الحين أنتي ووجهك يا أمل وش حارق رزك الحين ما راح نتحرك لين تجين معنا ثانيا المراقبة كلها بالكثير ما تأخذ عشر دقايق ..المهم خلونا نفطر زيزو الله لا يهينك شريط شعبيات على الطاير .. و أنا أكل وأموول تقبص فيني علشان ما أكثر في الأكل بس الجوع كافر .. المهم وصلنا للمدرسة ورحت أخلص كم شغلة في بير العتش والساعة واحدة ونص واقف عند باب المدرسة ويطلعون الابلات والمديرة ونجلس في السيارة ننتظر أمل واشم ريحة كيك

أنا : وش هالريحة في مطعم قريب من هنا

موضي : لا أبد الله بس حسيت نفسي فاضية آخر ساعتين قمت دخلت المطبخ وتمخمخت وصلحة كيك يعني نتسلى بها في الطريق

أنا : خلاص أجل ننتظر أمل تطلع ونأكلها

موضي : أخاف تتأخر أمل حقها محفوظ بس أنت كل وسم بالله

أنا : لا أخاف أمل تزعل بادين نأكل وما أنتظرناها

حصة : يا ابن الحلال كل بس الحين بتجي أمل ..طبعا أنا ما كذبت خبر وبديت أكل وشوي إلا تجي أمل وتفتح الباب بالقوة وتصبخ به بأقوى ما عندها

أمل : اووف ما صارت ذولي ما يدرون في مدرسات وراهم مشوار ساعتين ونص .منطقة أنتظر واحد يجي من مجلس شيخ القبيلة اشتغل عند أبوه ..وجع وش تسوون خيانة ..وش هذا عبد العزيز رايح تجيب لهم كيك وتأكلونه قبل لا أجي وجع إن شاء الله

أنا : لا والله أنتي فاهمة غلط يا قلبي السالفة وما فيها

أمل : عزوووز ما أحبك وخر عني تجيب لهم كيك وتأكلونه قبل ما أجي

موضي : لا يا أمل أنتي فاهمة السالفة غلط أنا اللي سويت الكيك لقيت نفسي فاضية قلت أصلح الكيك

أمل : يوم انك فاضية وما عندك شغل كان الله لا يعافي إبليس مسكتي المراقبة ولا دقيتي على الرجاجيل ياخذون بناتهم مو أنطق نص ساعة ارتز في الساحة وأنت ما صدقت على الله أحد يجيب لك أكل تقوم تبلعه مجوعتك أنا يعني ما صارت قل لا استح على وجهك راع شعوري ..

أنا : خلاص ولا يهمك هذي الكيكة نرميها علشانك ولا تزعلين نفسك يا قلبي .. وننطلق للرياض ..وأمل تحلطم شوي وتآكل شوي و أنا من خوفي منها منزل رأسي في الأرض ..ووصلنا المدرسات ورحنا لشقتنا .. ولما دخلنا عم المكان صمت رهيب وبعدين

أنا : ترى أنا آسف والله يعني مو قصدي أني أكل الكيكة ما توقعت إن هالشي بيضايقك

أمل : لا يا قلبي أنا اللي آسفة كنت متنرفزة شوي من اللطعة انتظر بنتين يجون أهلهم يأخذونهم عادي يا قلبي كل كيكة وانبسط .. أنا يا عمري أغار عليك ..

أنا : الله يسلمك حتى أنا أغار عليك

أمل : عزوز وش تغار علي منه كل اللي معنا حريم تغار علي منهم

أنا : هاه لا بس أحبك مووت والله وعد مرة ثانية ما راح أكثر في الأكل علشان خاطرك .يالله يا قلبي ننام مشتاق لك مرة .. قبل لا يتأخر الوقت

أمل : عزووووز أنا ما صليت الظهر

أنا : قلت لك ألف مرة لا تأخرين الصلاة يالله صليها هي والعصر قبل لا يطلع وقت العصر بعد وتعالي أبى اتسبح قبل صلاة المغرب …

أمل : إن شاء الله بس بعد أسبوع بصليهم كلهم

أنا : بلا استهبال أنا امزح في كل شي إلا اثنين الصلاة والدين وغرفة النوم أظن أني قلت لك هالحكي من قبل

أمل : يا قلبي يعني أعلق لوحة أقول لك ..واضحة زي الشمس ..

أنا : إلى الآن ما فهمت ..طيب لا تصلين الصلاة بينك وبين ربك .. بس تعالي غرفة النوم

أمل : عبد العزيز وش فيك ما اقدر أخبرك فطين ..أنا

أنا : اها فهمت خلاص خلاص مو مشكلة هذا حظي أصلا يعني ما لقت تجي إلا هالوقت يالله أجل بروح أتفرج على التلفزيون … المهم ثاني يوم قومتني أمل من النوم

أمل : قوم يالله لا تتأخر ..آه يا كلي يوجعني يالله قوم

أنا : سلامتك يا قلبي ..تبين أوديك للمستشفى .. وش فيك

أمل : هالكريهة ثاني يوم تذبحني بعدين خلاص تهدا ..المهم يالله قوم لا تتأخر على البنات

أنا : وشلون أروح بهم بروحي يبي لنا محرم ..قصدي يبيلهم محرمة ولا واحدة

أمل : خلاص مر بيت أهلي وخذ الشغالة يالله على الأقل تعلمني وش قلتوا ..ولا أقول لك شغالتنا ما تقدر تروح معك إلا إن كان السواق رجلها بيروح معكم وأهلي يبونه علشان يودي أخواتي للمدارس ..وش رأيك تمر أهلك وتلقط شغالتكم أحسن

أنا : يا سلام يعني سواقكم يغار و سواقنا حمار … لا حبيبتي هو ما يسمح لها تدخل بيتنا إذا أمي طالعة تبيني أخذها معي في السيارة ..لا وبرى الرياض بعد

أمل : تدري وشلون رح بس بروحك طز فيهم أكبر همي يعني يالله بس ولا تتأخر وترجع تنام .. و أقوم وأمر المدرسات وأوديهم للمدرسة وطول الطريق حاط الراديو على إذاعة القرآن الكريم درءا للفتن وفي الرجعة تقول لي ابله هدى إنها تبي ترجع لبيتها أول مدري وش عندها و ابله حصة بعد شبت فيني تبي ترجع بيتها بسرعة وتوني منزلها وبادي أحرك السيارة إلا واسمع صوت صياح وواحدة تبكي ..

أنا : خير خير عسا ما شر يا أبله موضي وش فيك أحد مزعلك

موضي : أرجوك خلني ما أبي أشغلك معي البكاء راحة للنفوس

أنا : يا بنت الحلال وش دعوى لا تكتمين في قلبك احكي بس وتعوذي من إبليس

موضي : إذا تبييني أحكي من جد وقف السيارة علشان أجي قدام لأنه ما ينفع أحكي و أنا جالسة ورى و أنت قدام

أنا : تركبين قدام بس يعني ..ما تحسينها صعبة

موضي : قايلة لك خلني أبكي بروحي بس يالله أطلع بي لبيتنا أرجوك أبي أكمل صياح هناك

أنا : لا خلاص يالله هذاني وقفت يالله تعالي أركبي قدام وقولي لي وش فيك تبكين ..وتركب موضي قدام جنبي

موضي : عبد العزيز أرجوك اعذرني ما أقدر أحكي الموضوع مرة محرج

أنا : طيب خلاص براحتك … بس حاولت أسمع لك و أساعدك

موضي : اهيء اهيء اهيء ما في أحد يهتم فيني ولا وده يعرف ليه ابكي

أنا : مو قصدي والله طيب قولي لي وش فيك صارحيني افتحي لي قلبك

موضي : آآآه وش أقول بس أنك أنت السبب .. أنت خبصت حياتي فوق تحت

أنا : وش سويت الحين وش أنا قايل لك ما أذكر اني زعلتك

موضي : ليتك مزعلني ولا تافل بوجهي أحسن من اللي سويته لي .. أجل يا ظالم تجيني في الحلم وأنت تدري أني واحدة ضعيفة على قد حالي وتبهذلني بهذلة .. أجل تمسك يدي ونجلس نجري على الشاطئ

أنا : أنا و أنتي وعلى شاطئ متى هالحكي ما أذكر والله ..طيب وبعدين وش صار …

موضي : وش بعدين وقمت تدور بي واحنا في الجزيرة ..

أنا : لحظة جزيرة ولا شاطئ تراك ضيعتيني

موضي : ياربيه وش فيك أنت شاطئ في جزيرة ما فيها إلا أنا وأنت … المهم يوم تعبنا من الركض وتقوم وتسدحني

أنا : ايوة وبعدين ..وش صار لا تقطعين شي ترى الحلم أمانة

موضي : لا خلاص وش بقى بعد صحيت من النوم بس كل ما شفتك قلبي يوجعني ..اشتاق للجزيرة تقول كأنها صدق

أنا : الله كريم أجل صحيتي يالله حصل خير حتى في الأحلام ما هنا حظ يالله وبس هذي كل السالفة

موضي : بصراحة صرت أخاف على نفسي من الفتنة معك ومنك شوف لي حل

أنا : وش حله يعني أجيب لك شيخ يقرا عليك ولا موية مقري عليها فهميني

موضي: لا أنا قصدي يعني نتزوج وخلاص تصير حفظتني من الفتنة

أنا : تتزوجيني نسيتي أني متزوج لا وصديقتك بعد ..لا الله يخليك شكلك جوعانة ولا دايخة

موضي : وش فيها الشرع محلل لك أربع وأنت ثنتين يكفونك وزيادة بعد .. ثانيا يا أخي أنت شاب في ريعان الشباب زوجة واحدة ما تكفيك وين بتروح طاقاتك هاه قل لي

أنا : بس يعني أمل ما شفت منها شي غير أن أهلها ساعدوني لا تنسين السيارة اللي اشتغل عليها الآن أبو أمل هو اللي عطاني إياها .. صحيح أنها هي سبب الحادث اللي صار لسيارتي الأولى الله يهديها بس ..

موضي : يعني علشانهم اشتروا لك سيارة بيذلونك يعني ثانيا لو تزوجتني أنا بعد بأصير أعطيك ألفين وخمسمية و أمل تدفع نفس المبلغ لها وتصير تنقل زوجاتك

أنا : حلو حلو وحصة وهدى ..يعني مبلغ محترم

موضي : هي هي وش حصة وهدى وش تخربط أنت اها بس ألزم ما عليك محارمك وش عليك بحريم الناس ..ما أنت محتاج لهم ..هذا اللي ناقص والله هاه موافق يا حياتي ..وترى الشقة بالكامل علي

أنا : المشكلة الحين وشلون أفاتح أمل بتقلب الدنيا على رأسي ..أن قلت لها

موضي : قو قلبك ولازم هي تفهم أنك رجل ولك احتياجاتك هي إذا تحبك بتتفهمها و إذا لا بتصير أنانية المهم متى بتتقدم لأهلي …مشتاقة أركض معك في شقتنا وتسدحني على السرير متى يجي هاليوم

أنا : خليني أحل المشكلة أول مع أمل بعدين يحلها حلال ..ووصلت موضي لبيتها و جلست أفكر وشلون أفاتح أمل في الموضوع لأني أعرفها إذا عصبت ما تشوف اللي قدامها ..وأروح للمطعم واطلب خمس كيلو كباب وخمس كيلو ورق عنب لأني أخبرها تموت في الكباب وورق العنب و أروح لشقتنا ..

أمل : هلا والله وغلا وش هذا اللي معك يا حبيبي

أنا : أبد كباب وورق عنب لأحلى أمولي في الدنيا .. أبيك تتغذين ..يا حياتي ..

أمل : عاد هذا كله وشوله عازم أحد ولا ناوي تعشي أهل الرياض الليلة ..وش السالفة

أنا : اها بس يا قلبي ..يالله بسم الله هذا كله لك بأكلك بنفسي … وأجلس أكلها لين بلعت حوالي كيلوين كباب وكيلوين ونص ورق عنب .

أمل : بس الله يخليك مو قادرة أتنفس أرحمني يا عزوز ما عاد فيني مكان بس مو قادرة لا أتنفس ولا أتحرك ..و أنت ما كلت شي إلى الآن ليه ؟

أنا : حلو هذا أهم شي ..شوفي يا قلبي يا أمولي في موضوع أبي أفاتحك فيه وأعلمك عنه

أمل : خير وش السالفة علمني

أنا : يعني يا قلبي تعرفين أني شاب في ريعان الشباب وفيني طاقات كامنة ..وعلي طلب هاليومين فودي أتزوج

أمل : وشو لعنة تلعن إبليس وش تقول وش تخربط أنت ووجهك لحظة أبي الحقك و أزنطك بس مو قادرة مليت بطني حسبي الله عليك ..ومن تعيسة الحظ اللي بتقبل بك

أنا : زميلتك موضي ..وتقريبا اتفقنا على كل شي

أمل : من موضي لا تكون المديرة ..هالعجوز خطافة الرجاجيل إنا ناغزني قلبي اصلا من يوم صرنا نركب هالعجوز العانس معنا وما لقت غيرك يا حظي ..وش شافت فيك فروسيتك ولا السيارة اللي شريناها لك غرتها

أنا : لا هي عارفة انها تعويض عن سيارتي الأولى واللي صار لها

أمل : وبعد خقيتي يا شاطرة قلتي كل شي .. هذا أنتم يالرجال إذا واحدة قالت لكم كلام حلو تخقون الأول والتالي

أنا : لا المسألة مو كذا .بس يعني والله مدري يا أمل وش فيها ..يعني بأصير يوم عندها ويوم عندك ..وأنا اللي بوديكم وأجيبكم يعني ما في مشكلة محارمي وأوديهم واحفظهم من الفتنة

أمل : إن شاء الله كلمت حصة وهدى بالمرة يتطلقون من رجالهم علشان تعرس عليهم وتكمل الطقم بالمرة تكمل النصاب القانوني ودك بعد تزيدهم ..تحول تصير بوذي وعلى كيفك

أنا : يا قلبي أنا قلت في نفسي استر البنت ومنها أستفيد منها ثانيا أريح لي مو كل واحدة في جهة واحدة في النسيم والثانية مدري وين ..وش قلتي

أمل: لحظة أنا أوريك في خطافة الرجاجيل ( من كثرة الأكل يالله تقوم كأنها حامل ) أن ما لعنت خيرها ..وترفع التليفون وتدق على موضي …أنتي يالسوسة ما لقيتي إلا رجلي يوم تبين تعرسين عليه لا ومسوية عروض خير ما في هالبلد إلا هالولد يعني ..وش تبين … ( تلتفت علي ) طعنة قفلت السماعة في وجهي ..معجبك كذا كرامتي تنهان

أنا : يا قلبي خلك أنتي الكبيرة ..ثانيا أوعدك أني بأكون زوج عادل يعني كل شي بالتساوي

أمل : وجع يمزع تسبدك ..أي أنا أصير الكبيرة هي أكبر مني بخمس سنين الله لا يعافيها بس هين دواكم عندي انتم

وبعد أسبوع في عرس عائلي جدا مريت بيت أبو موضي وأخذتها ورحنا للشقة وتونا داخلين ..

أنا : يالله يا قلبي يالله نخلي الحلم حقيقة ..

موضي : أي حلم وش تقول أنت يا حبيبي

أنا : حلم الجزيرة و الشاطئ يوم ألحقك و أسدحك وكذا تراني متحمس ..

موضي : يوه يا عبد العزيز مو الحين عاد .. تو الناس ماني مستعدة نفسيا

أنا : ( مطير عيوني ) وشو لا الله يخليك وش هالحكي من يوم قلتي لي هالحلم في السيارة و أنا حرارتي مرتفعة والحين تقولين بعدين ..وش دعوى يا موضي ..

موضي : يوووه طيب يا عبد العزيز بس نتعشى أول

أنا : لا اول ذا بعدين العشاء لاحقين عليه إن شاء الله ..يالله غرفة النوم غرفة النوم ..وتونا متوجهين لغرفة النوم إلا يرن تليفون الشقة .. وارد عليه أنا إلا أمل

أمل : ليه مقفل جوالك ..وهالماصلة بعد مقفلة جوالها يا شين السرج على البقر ..سويتوا شي

أنا : لا تونا داخلين الشقة ما لحقنا نسوي شي إلا اتصلتي

أمل : أحسن وراك متحمس ..وليه يوم دخلتنا مسوي فيها مرة مؤدب وتقول لي تصبحين على خير وش فرقت يعني

أنا : يا قلبي يعني الواحد يستفيد من أخطاء اللي قبله .. المهم يا أمل وش بغيتي

أمل : عطني هالبقرة أبى أكلمها في شي ضروري ..

أنا : الله يخليك بلا فاضيح وش ناوية عليه صارحيني ..اللي تبين تقولينه قوليه لي وخلاص

أمل : بأبارك لها وش رأيك يعني .هاتها لا تخاف ماله داعي تخاف عليها أبيها في شي ضروري .

أنا : موضي أمل تبي تكلمك تقول في شي ضروري

موضي : خير وش تبي مني قول لها مو موجودة . ولا طالعة أي شي

أنا : الله يهديك واحدة ليلة دخلتها طالعة وين مواعدة واحد ثاني .. تعالي كلميها شكلها تبي تبارك لك

موضي : طيب يالله مو مشكلة هلا أمل كيفك

أمل : أقول يالبقرة قصدي يا موضي بكرة ما أقدر احضر الحصة الأولى لصف ثاني ثانوي ..

موضي : سلامات وش فيك تعبانة يعني ما راح تجين بكرة خلاص مو مشكلة أسوي لك غياب مرضي

أمل : لا بأجي معكم بس كذا مالي خلق أدرس في الحصة الأولى ولا الثالثة بعد بيني وبينك مالي شهوة تدريس بكرة ..ولا عندك مانع يا ضرتي ..

موضي : طيب مو مشكلة بكرة يحلها حلال .يالله تبين شي ثاني ترى عبد العزيز حبيبي ينتظرني في غرفة النوم يا قلبي قلبه متلفلف باللحاف تقولين عروس مو معرس .

أمل : لا يغرك بس هالسكبة ولا هالحماس الوعد ثلاث دقايق ولا أربع إلا يقول لك تصبحين على خير ..ثانيا خليه يفتح جواله وبلا حركات نص كوم .

موضي : طيب يا قلبي تسلمين يالله مع السلامة ..وتفصل فيش التليفون .وتجيني وهي تحلطم ..ويالله يالله ساعتين على ما أراضيها وثاني يوم الصباح ننزل من شقتنا ونمر شقتي الأولى علشان نأخذ أمل

أمل : خير وش عندك مرتزة قدام أقول ارجعي ورى هالمكان مو لك يالله روقينا

موضي :ليه إن شاء الله وش مزودك ووش منقصني ما أبي أنا راكبة قبلك

أمل : عبد العزيز شف بتخليها ترجع ورى ولا وشلون … ترى أسويها فضيحة

أنا : موضي حبيبتي يعني مشيها اليوم لا تنسين أمس كنّا مع بعض وهي بروحها يعني الواحد يقدر شوي

موضي : طيب مو مشكلة بس هالمرة بس .. وترجع موضي ورى وتركب أمل قدام ونروح للمدرسة .. إلى بعد الظهر على وقت الطلعة ..إلا موضي حاطة أمل مراقبة وفوق ذا كله تستعد للحفل المدرسي اللي يقام لأول مرة السنة الجاية وجلسنا ننتظر أمل ساعة ونص ..ولما طلعت لقت موضي راكبه قدام ..

أمل : وبعدين وش قلت لك ما تفهمين أنتي يالله أرجعي ورى

موضي : لا عاد خلاص ما صارت الصباح مشيتها لك بس الآن لا مستحيل

أمل : تكفين بشويش هذي سيارة أبوي يعني أنا اللي اركب قدام يالله ورى ورى

موضي : لا عاد مصختيها مالك أمل يالله توكلي على الله بس واركبي ورى ..

أمل : أنا وشوله أضيع وقتي معك ..وتنط على موضي ويتطاقون قدام الخلايق ومن شدة الأحراج نزلت من السيارة وتركتهم يكملون ..والناس تجمهرت حولهم ..

أنا : إذا خلصتوا علموني أنا بنتظر برى .. ويتجمعون الناس حولنا ..وكل يسال وش صار و موضي و أمل شد شعور لين تعبوا واخذوا فترة استراحة ..بعدها اقترحت عليهم كلهم يركبون قدام أحسن حل ..وركبنا جميعنا قدام والسيارة على كبرها بس اللي ورى فاضي .

أمل : الحمدلله سيارتنا وراكبين قدام وعند الدريشة أقدر أطل وأتفرج على كيفي مو زي بعض الناس ..

موضي : الحمدلله أنا في النص عند زوجي ودفا زوجي الله لا يخليني منه ولا من فخيذاته اللي لاصقة فيني

أمل : وقف السيارة يا عبد العزيز وقف السيارة .. أبي أجلس في النص مالي شغل

أنا : يا قلبي وش تركبين في النص وش فيك أحد يعاف الدريشة ويجلس في النص وش هالحكي ..

أمل : شف يا عبد العزيز بتوقف السيارة وأجلس في النص ولا والله لا أنط عليك الآن الحين و أنت تسوق ..

موضي : لا لا توقف شف شغل بزارين ما نبي لا تحرمني من دفاك يا حبيبي ..

أمل : من البزارين ..عبد العزيز بتوقف ولا وشلون .طيب أنت أجلس في النص لي فخذ ولها فخذ ..

أنا : يا قلبي وش لك فخذ ولها فخذ ..شايفتني خروف في عيد الضحية خلاص بحط بينها وبيني مخدة زين كذا

أمل : ترى بأجلس أشوف يا ويلك إن لمستها .. ونكمل الطريق على هالحالة لين وصلنا الرياض حطينا موضي في الشقة ورحنا أنا وأمل لشقتنا ..

أنا : أنا لك يا حياتي كلي فخوذي وأكتافي و كل شي بعد

أمل : بشويش قالوا لك ميتة عليك أنا الحين والله صدق مأخذ في نفسك مقلب يالله بس رح نم ولا بعد الزواج الثاني تعودت على التمبلة ..

أنا : افا وش فيك قلبتي علي وين اللي كانت بتموت على فخذي الحين لما صرنا بروحنا صرت كخه ..

أمل : كختين بعد مو كخه … مو أنت اللي تزوجت الثانية .. هاه

أنا : يا بنت الحلال انلعب علي فيها وحبيت أستر عليها هذي كل السالفة ولا أمس ليلة الدخلة عرفت أنها مقلب ذكرتك بالخير ..هو بعدك أنتي يا قلبي في حريم ..

أمل : صدق يا عدووووود ولا تقول كذا علشان تلعب علي قل الصدق

أنا : يا قلبي خليها على الله جسم مترهل وثقيلة ودبة وحالة ما يعلم بها إلا الله بس أنتي شي ثاني ..تصدقين ما قدرت استحملت قمت وقفت و أنا في النص

أمل : الله يأخذك أحبك يا عدود … ودخلنا غرفة النوم وعدت الليلة بسلام وثاني يوم في شقة موضي .. عقب ما نزلنا أمل في شقتها .

موضي : وش فيك مبتسم شايف شي يضحك هاه حسبتك بتبكي على فراقها

أنا : يا شيخه تصدقين عاد أني أمس ماكل حبوب منومة علشان أنوم وافتك منها ومن إزعاجها يالله صحتني علشان أوديكم المدرسة .. ما طقت أشوفها عقب يا قلبي

موضي : ايه العب علي شفتين واحدة مسكينة وضعيفة قلت خلني ألعب عليها

أنا : يا قلبي احد عقب هالجسم اللي يأخذ العقل يحب العصاقيل ثانيا بيني وبينك هي تفشل لازم نسكر النور من أول شي في الليلة يصك رأسي بالسرير ثلاث مرات ولا أربع .. من هالظلما

موضي : الله يقطعك ضحكتني و أنا ما ودي أضحك يعني تنبسط و أنت معي

أنا : ايه أموت من الفرحة .. وندخل غرفة النوم ( أزين ما في القصة غرفة النوم ) ويستمر الحال على كذا لمدة شهر تقريبا و أنا كل ليلة ألعب على واحدة لين حسوا أني مبسوط من الوضع ومطنشهم إذا تطاقوا ..و في المدرسة تروح أمل مكتب موضي ..

أمل : تراك ذبحتيني بالمراقبة كل يوم كل يوم ما صارت ..

موضي : يعني نخلي البنات كذا بدون حسيب ولا رقيب أنتي عارفة لازم أحد يكون معهم وأنتي أجدد مدرسة بالمدرسة .يعني لازم تأخذين أكثر شي

أمل : لا يا حبيبتي أنتي عارفة زين و أنا عارفة ..ترى مو ذنبي أن كنت أحلى منك و عزووزي ما يرتاح معك

موضي : بشويش إلا عبد العزيز يموت فيني وكل ليلة يحلم فيني خليني ساكتة بس لا أموتك من القهر

أمل : يا شين اللي يأخذ في نفسه مقلب أن ما اثبت لك إن عبد العزيز متزوجك علشان يكسب فيك أجر ..

موضي : الله أعلم من اللي يكسب فيها أجر ومن اللي ينسى نفسه معاها

المهم انتظرتهم وركبوا معي وحطينا موضي في شقتها ورحنا لشقتنا أنا و أمل ..

أنا : يالله يا قلبي في هالشتاء الواحد يبيله يتدفا زين اسبقيني على غرفة النوم

أمل : ما قلت لك يا قلبي اليوم في المدرسة توضيت علشان صلاة الظهر بس وفجأة .. و أروح خلاص توني بكبر إلا و يصير ما علي صلاة ..راحت عليك يا قلبي ..

أنا : لا حرام بس اليوم برد ودرجة الحرارة مدري كم ما يصير شيكي زين أخاف حدث عرضي كذا

أمل : لا يا قلبي متأكدة والله العظيم وش دعوى ..تصبر كلها كم يوم وخلاص ..يالله ما راح تجي ننام

أنا : لا بأتفرج على التلفزيون .. إذا جاني النوم دخلت أنام

أمل : طيب يا قلبي تصبح على خير بروح أقرا شوي ثم بنام ..

وأجلس بروحي وتحكني يدي وأدق على موضي ..

موضي :هلا عزوزي وحشتني موت اشتقت لك

أنا :حتى أنا والله وش أخبارك وش أنتي مسوية

موضي : جالسة بروحي مشتاق ذبحني البرد ..بروحي في الشقة ما عندي أحد يونس وحدتي وصدر حنون يدفيني

أنا :عندنا وعندك خير البرد نفض عظامي نفض

موضي : ليه وينها الست هانم ولا متطاقين إن شاء الله .. ولا لاهية بشي

أنا :لا ابد بس مأجزة ما تصلي يعني ما تعرفين هالشغلات …

موضي : اها ..شفت القهر يا قلبي أنت يذبحك البرد هناك و أنا يذبحني البرد هنا وما نقدر ندفي بعض ..لو تدري وش لابسة الحين آه الدنيا ما تنصف أحد

أنا : لا تولعيني يكفيني اللي فيني ..بس وش لابسة بس قولي بدون مؤثرات صوتية

موضي : لا بسة بيجامة سودا زبدة قطعتين .. شفافة مرة وكلها خيوط في خيوط والخيوط اللي على كتفي كل شوي طايحة وأرجع أرفعها آآه ما أقدر أتحمل برا برد وجوا نار

أنا : وش أقول أنا اللي قمت اصب عرق بس يا حبيبي هذا حكم الظروف …

موضي : أنحاش من عندها مو أنا زوجتك ولا تخاف منها ..

أنا : وشو والله صعبة ..بس بحاول انحاش منها شوي وارجع بس شوفي ..ربع ساعة بس يعني أول ما أدخل على طول بدون مقدمات حضن بوسات من هالخرابيط خليها لبكرة زين

موضي : طيب بس بسرعة ماني قادرة ألحق كل ما رفعت خيط من على كتفي يطيح الثاني وعلى هالحالة

أنا : طيب المهم يالله بسرعة .وأروح لأمل في غرفة النوم ..و أقول لها … حبيبتي بروح أجيب عشاء من كودو تبين

أمل : وش الطاري العادة مالك خلق تروح .كله تتصل عليهم وهم يوصلونه .أجلس بس وأتصل عليهم

أنا : لا يا روحي الفرع اللي عندنا شغلهم مو زين يكثرون بصل خليني أروح الفرع اللي بعده أحسن

أمل : من جدك تتكلم بتروح مشوار علشان بصل ..

أنا : ايه كلها عشر دقايق ولا ربع ساعة بالكثير وخالصين إن شاء الله قصدي راجع لك ..يالله يا قلبي باي .. وأطير طيران لشقة موضي وأفتح الباب وهي تنتظرني عند المدخل وألقطها طيران للسرير ..

موضي : يالله يا حبيبي متشاقة لك موت ..

أنا : اها بس وش قلنا ما في لا حكي ولا مقدمات ولا شي يالله بسم الله انبطاح

موضي : طيب بوسني لو بوسات خفيفة علشان أدخل جو معك

أنا : يا شين اللي يرجع في كلامه وش إحنا متفقين عليه ..يعني حبكت طيب يالله هاه امواه امواه ..وشوي ولا شي صوت شي يصطدم بالنافذة و أطنشه إلا شي ثاني وثالث و أروح أبى أشوف وش السالفة …وأسمع صوت من مايكرفون من تحت العمارة .. وأطل إلا ألقاها أمل

أمل: أنزل يا جبان ياللي ما تستحي على وجهك ..يالله أنزل قبل لا أطلع لكم و أسوي فضيحة ..

أنا : (فتحت الدريشة ) طيب بنزل والله ..والتفت على موضي شفتي بوسني خلني أدخل معك جو هاه ارتحتي ضيعتي الليلة يالله مع السلامة و أدعي لي تكفين ..و أنزل إلا أمل جاية مع أخوها محمد اللي توه بالثانوي

محمد : هاه يا أختي تبين شي و لا أمشي مواعد الشباب في ا لقهوة

أمل : لا يا أخوي الله يعطيك العافية أنت رح و أنا خلني مع هالمراهق أشوف شغلي معه ..كودو هاه كودو ياللي ما تستحي على وجهك و الفرع اللي عند بيتنا بصلهم كثير عسا كودو اللي فوق بصلهم مو كثير .. ما تستحي على وجهك هذا كبرك وتسوي هالحركات يا أخي كان صرت رجال وجيت لي وقلت يا أمل أبى أروح لموضي وش فيها

أنا : والله يا عمري أني آسف و ندمان بس خفت أقول لك وترفضين ما دريت انك بتوافقين وانك تتفهمين الوضع

أمل : وضعوك في خلاط اسمنت أنت وهي ..قال ايش قال أوافق معصي ..يا أخي أنت متزوجني على السراء والضراء ..يعني وقت ما أعطل أنت المفروض بعد تعطل يالمراهق يالله بس قدامي على البيت وعقاب لي خلتني أنوم في الصالة على الكنبة ..وثاني يوم دور موضي رحت لموضي و أنا متحمس ..

أنا : يالله يا قلبي جيت لك طاير من الشوق مشتاق لك موت بس ليه لابسة هالقميص حشا تقولين في عز الشتاء طويل وكمومه طويلة عسا ما شر

موضي : اسكت بس رأسي مصدع ولا لي خلق لشي مرة .. تعبانة

أنا : لا واللي يخليك كلي بنادول ولا أسبرين مرة مشتاق لك من زود الشوق شوفي حرارتي مرتفعه

موضي : يعني يرضيك نسوي اللي بالي بالك و أنا مصدعة ومالي خلق مرة

أنا : علشاني الله يخليك .. وأوعدك في بوسات وحضن وسواليف عنك يوم كنتي صغيرة ( مدري ليه الحريم في وقت اللي بالي بالكم يحبون يسولفون عن يوم كانوا صغار ) وش تبين بعد

موضي : يووه يا عبد العزيز لو ما الدين أمرني بطاعتك ولا والله ما اقدر طيب شوي خلني ألبس وأتجهز وارجع لك

أنا : الله لا يهينك من عينة أبو خيوط حق أمس .. وشوي ( بعد ربع ساعة قال ايش شوي ) تطلع لي موضي لابسة الطقم حق أمس ..وتوني بادي أحضنها إلا يرن جوالي و أطالع إلا أمل متصلة علي

موضي : طنشها لا ترد عليها أكيد عندها موضوع تافه ولا تبي تحرق أعصابك وتخرب الليلة

أنا : مو عادتها بس يالله على قولتك إحنا مشغولين بشي أهم وشوي ويرن تليفون الشقة ..

موضي : لحظة أشوف من هاللي متصل ..

أنا : خليه عندنا شي أهم شي …

موضي : أخاف أهلي يبوني في شي ضروري عندهم … وترد ..وشوي ..عبد العزيز كلم أمل تبيك ..اسمع قل لها لا عمرها تدق على شقتي فاهم ولا لا

أنا : ايوة يا أمل وش فيك عسا ما شر

أمل : ( تصرخ في التليفون ) حرامي الحقني يا عبد العزيز حرامي .الحق علي بسرعة يا تلحق علي يا ما تلحق

أنا : وش حراميه فهميني السالفة وشلون دخل هالحرامي وين الحارس ..

أمل : بتجلس تحقق معي ..أنا سمعت أصوات غريبة في ا لشقة وصحون طاحت في المطبخ ..قمت قفلت على نفسي باب غرفتي يالله بسرعة قبل لا يسوي فيني شي

أنا : طيب طيب الحين جايك بسرعة خمس دقايق و أكون عندك ..

موضي : وش السالفة وين رايح و تاركني اشتقت لها هاه

أنا : في شقتي حرامي المسكينة بروحها بروح ألعن و الديه وأرجع لك كلها نص ساعة ..

وأطمر للبيت و أوصل للعمارة وأنادي الحارس ونطلع سوى للشقة وافتح الباب بسرعة ويدخل معي ا لحارس ..وأجلس أنادي وينك يا حرامي إبليس أطلع يا بن الكلب .. ونفتس الشقة ما نلقى شي .. و أروح لغرفة النوم و أنادي على أمل علشان تفتح لي الباب وتفتح لي الباب وادخل والحارس يبي يدخل معي

أنا : خير طال عمرك مدرعم (مدرعم = ماشي بخطوة واثقة ) وين رايح وش بغيت الله يحييك

الحارس : الحرامي مش عاوز نمسكوه ..

أنا : لا بلاشي المرة دي أنا إن شوفتوه حامسكوه و اضربوه أنت بس انزل تحت وفتح عيونك ..ويطلع الحارس من الشقة كلها .. و أمل تبدى تصيح

أمل : عزوز بغى الحرامي يقتلني أشوى أنك لحقت علي الله فكني

أنا : أي حرامي و أي بطيخ ما في شي يدل على أن أحد دخل الشقة

أمل : يعني أنا كذابة ولا داقة أتبلى عليك .. تبيني أحلف لك يعني

أنا : لا لا تحلفين ولا شي المهم حصل خير والحين الحارس بيفتح عيونه طول الليل يالله تصبحين على خير

أمل : وش ذا ماني زوجتك مالي حق عليك يعني ما تخاف علي ..ما عندي أحد يحبني اهيء اهيء اهيء

أنا : يا قلبي أنتي قلبي ونور عيوني بس وش أسوي ما في شي ..و موضي تنتظرني يعني في شي ما كملناه

أمل : ايه قلها ايه ,, قل موضي أغلى مني والله لو أنه قطو ناط على دريشتها أنك ما تتركها أسبوع بس أنا طز هاه

أنا : يا قلبي والله أني احبك ..وشلون اثبت لك

أمل : نام الليلة عندي أحرسني حسسني أنك تخاف علي ومهتم فيني

أنا : بس الليلة دور موضي ..يعني ما راح ترضى أني أتركها وأنام عندك ..

أمل : خلاص نام برى الشقة عند الباب .. منها تحرسني ومنها ما تزعل موضي لأنك ما تصير نمت عندي يالله دق عليها وقل لها زوجتي في خطر و أنا بأجيب لك مطرحة وبطانية ومخدة تفرشهم قدام باب الشقة وتنام ..

وافرش مطرحتي و مخدتي و أنام قدام باب الشقة وأقوم ثاني يوم على أصوات الشغالات وهم ينظفون الشقق وتطلع لي أمل وهي في غاية الفرفشة والسعادة وتركب معي ونروح نمر موضي … علشان نروح المدرسة

أمل : اجمل إحساس في الكون انك تعشئ بجنون ودا حالي معاك

موضي : لا تصدقونه يوم قال ينساني .. والله ما يقدر ابد يوم ينسناني …

أمل : مساكين اللي باني لهم قصور في الهوى ..يحسبون أنهم كل شي وهم يا قلبي لا تحزن

موضي : وش تقصدين يا خطافة الرجاجيل ياللي ما تستحين على وجهك

أمل : أنا خطافة الرجاجيل ..الله أعلم من اللي تلقط أزواج مدرساتها علشان تعرس عليهم ..ومن يدري كم واحد رفضها من قبل

موضي : لا عاد ألزمي حدودك ..مو أنا اللي أدور لي على رجال ..ويلقطون بعض ويبدون يمغطون شعورهم .. وأنا أسوق وشوي وكل شوي لاف يمين ويسار من تأثير طقاقهم وفاتح الدريشة وقافلة معي ..وشوي واسمع صوت دوريات .. يناديني وقف يا راعي السيارة ياللي تلفلف يمين ويسار يالله وقف على جنب ..ووقفت ونزلت لهم

الشرطي : أنت سكران ولا من راعين القضوم والحبوب هاه وش فيك

أنا : ابد طال عمرك حريمي كالعادة تطاقوا وتلاقطوا هذي بس الحكاية ..

الشرطي : حريمك وش تخربط أنت ..الحين أحد مستخف ولا صاحي يوم تركب حريمك الثنتين سوى مع بعض ماش ماني مرتاح لك ..تعال نسألهم سوى .. أنتم حريمه

موضي وأمل : ايه نعم طال عمرك بس إحنا مالنا دخل .نقول له يا رجلنا يا أبو عيالنا لا تسرع ولا تلعب في الطريق .. الطريق لك ولغيرك مع تحيات أسبوع المرور

الشرطي : وتقول حريمي يتطاقون ..بالله ما تستحي هذا كبرك تسوي هالحركات يوم ..ما تقدرين على ثنتين ليه تعرس عليهم ..و إذا عندك مشاكل معهم لا تعرض روحك وأرواح غيرك للخطر يالله الحقني للقسم يالله . ولا أقول لك أنت تعال معي و أنت يا حريم ارجعوا ورى في عسكري بيجي يركب السيارة علشان يوديكم للقسم قال ايش حريمي تطاقوا وتلاقطوا .. بالله ما تستحي أنت ووجهك ..ويتجهون بنا للمركز .. ويأخذوني للتوقيف بسبب الاستهتار وتعريض أرواح الآخرين للخطر إضافة إلى تعطيل السير وبعد ساعة أبو أمل و أبو موضي وصلوا المركز …

الضابط : رجل بنتكم قصدي رجل بنت كل واحد منكم اللي أسمه عبد العزيز شكله متعاطي شي ولما سألناه قال أن حريمه اللي هم بناتكم كانوا يتطاقون في السيارة و هذا اللي خلاه ما يعرف يسوق زين سألنا البنات قالوا انهم مو متطاقين وأنه هو اللي فجأة اللي صار يسوق كذا فجبناكم علشان نسألهم قدامكم وقدامه

وينادوني وينادونهم و أول ما دخلوا أمل و موضي وشافوا آبائهم انطلقوا يصيحون في أحضانهم

الضابط : شوفي يا مدامات عبد العزيز بصراحة أنتم كنتم تتخانقون في السيارة ولا لا وقت ما العسكري وقف زوجكم

أمل : معقولة أنا ازعل من موضي حبيبة قلبي لا لا الله يخليك لا تقول كذا طيب تصدق طال عمرك لو ما هو تزوجها كان أنا زوجتها له بنفسي هذي ..هذي توأم روحي

موضي : يا بعد قلبي أنتي أي والله يا حضرة الضابط ما حبيته إلا لأنه رجل أمل يعني وش أحسن من أني أنا وهو نتشارك في حب أمل . وتقول إننا كنا نتطاق

الضابط : متأكدين من كلامكم .ترى معنى هالحكي أن زوجكم يتعاطى شي ولا من راعين الخرابيط

أمل : لا يا حضرة الضابط لا تقول كذا صحيح ساعات يجي في الليل يتمايل بس والله وجهه مو تبع هالحركات أي والله

موضي : أي والله يا حضرة الضابط هو راعي صلاة ..صحيح ساعات من كثر ما هو مرتفع ما يتوضأ ويصلي الظهر خمس ركعات والعصر ثلاث بس ولو راعي طاعة ماشالله عليه

الضابط : ايوة وش بعد ممكن أعرف إذا حاول يعتدي عليكم بالضرب في أحد المرات أنتي ولا هي

أمل : لا يا حضرة الضابط كل شي ولا الضرب ..ما عمر يده انمدت علينا ..بس يطق بعصا المكنسة مرة تدق علي حبيبتي موضي ونور عيوني تبيني الحقها واطمر من غير وعيي بالبيجامة أي والله ..ولا يشيل بالمكنسة وفوق رأسها

موضي : ايه يا حضرة الضابط ..حتى بالأمارة يوم خنق أمل قبل أسبوعين ما كان شاد الحبل مرة بس الواحدة مهما يصير تبقى لزوجها ومع زوجها

الضابط : أنت يالمجرم وش تعليقك على الكلام اللي يقولون ولا بتنكر

أنا : ( مطير عيوني ) نعم ..ممكن اعرف بسهم يحكون عن مين بس إذا ما عليك أمر أبى اعرف هم يحكون عن مين

ويدخل العسكري .. ويقول للضابط انه لقوا في ملفي ممارسة فعل فاضح في البر قبل فترة

الضابط : ماشالله سجلك ذهبي مالك في الحبوب والقضوم ما جربت تشم

أنا : طال عمرك سيجارة ما عمري حطيت في فمي .بس مدري وش قلبهم علي قبل لا تجون شوي ويذبحون بعض كأنهم ديكين في السيارة والحين تحالفوا ضدي

الضابط : بعد بتنكر أنت ووجهك ما تشوف دموعهم و أنت مصر على إنكارك ثانيا أنت راعي سوابق ..بس فهمني وش نسوي فيك هاه قول

أنا : والله بيني وبينك لو أنا مكانك كان شنقتني من زمان وكسبت فيني أجر ..والله يا طال عمرك الخمر ما أعرف وش طعمه والخرابيط عمري ما خربطتها شف أنا حدي أفلام مسجلينها شباب عندهم كروت واتشقق وان خربت مرة مرة ..تفرجت على دي في في مهرب من برى

الضابط : طيب الحين بنوديك لمستشفى الأمل يسوون لك فحوصات ونشوف النتائج ..ونتأكد بأنفسنا

وودوني لمستشفى الأمل وطلعت كل النتائج سلبية ورجعت للضابط اللي افرج عني بعد ما عطاني محاضرة …

وش تتوقعون طلعت النتائج الله يستر بس ..تبون تعرفون تابعوا معنا قصة نهاية المشوار

تحياتي بلاك هورس

تاريخ كتابة القصة عام 2003م / 1423هـ

جميع قصص بلاك هورس خاصة بموقع قصص قصيمي نت والحقوق محفوظة