قصة حبة فوق – الجزء الثاني

قصة حبة فوق – الجزء الثاني كاملة مكتوبة

أنا : الحقني يا دحيم الحقني يا دحيم قامت تبوووس دحيم …. ووووويييءءءء طااااااع ونصدم في نخله وتتكرفس فينا السيارة ومدري وش صار فينا ما وعيت إلا أنا في مستشفى الشميسي ..وحاضن الجوال تقول ولدي الصغير من كثر ما حضنته مع الصدمة تكسرت رجولي ويديني ..بس جوالي ما جته حتى الغبرة ..وأقوم ألا وخويي دحيم مسدح جنبي كأنه مومياء بيضا من كثر ما ربطوه وجبسوه

أنا : يا أخي ودي اضحك على شكلك بس بطني يوجعني حتى عيونك كأنك إندونيسية متنقبة …

دحيم : ولا من زين شكلك كأنك اللي يطلع من القبر في أفلام الكرتون ..ألا وش صار يوم تخش بنا في الطريق الثاني وما تردنا إلا نخلة تكرفسنا فوق تحت وش صار

أنا : والله يا أخي ما تحملت بوس فوق العادة لو جايك ربع ما جاني كان تموت أي والله يا دحيم لو والمشكلة الأخيرة كانت طويلة تقول بوسة فرنسية .. تعرف موجة رطوبة وسط هالجفاف خبط العقل عندي …

دحيم : لا والله أفلحنا السيارة وأنعدمت واحنا وتكرفسنا حسبي الله عليك ..

ويرن الجوّال ويطلع لي رقم سهر

أنا : هي هي يا دحيم هي هي ..المشكلة مو قادر أحط الجوال على أذني يا سيستر يا سيستر ..

الممرضة : يس واط هابند واط ديو وانت ( ايس في )

أنا : بت ات هير اب ماي اير اتز امبورتانت كال ( حطي السماعة فوق أذني تراها مكالمة مهمة أمي متصلة )

وتحط الممرضة السماعة فوق أذني وأنا اللي أميل رأسي

أنا : هلا حياتي وحشتيني موت …

سهر : أنت أكثر يا قلبي وحشتني موت موت موت ..بس وينك عسا ما شر آخر خبري بك تقول الحقني يا دحيم من دحيم ووش صار لك يا عمري …

أنا : أبد دحيم هذا سواق خويي فارس .. مدري وش هو بالع مدري وش هو مآكل و أنا أكلمك إلا يخش بنا في الطريق الثاني وما تردنا إلا نخلة الله لا يوريك الله فكني في عسيب بغا يخش في عيني ما بين عيني والعسيب شي

سهر : يا حياتي ما تشوف شر أجل أنتم الآن في المستشفى ..بس أي مستشفى التخصصي ولا المملكة ولا دله

أنا : مدري والله ( مستحي أقول في الشميسي ) كأنه التخصصي والممرضات لابسين ضيق تاك فيهم كأنها حركات المملكة بس ليه تسألين يا قلبي

سهر: لازم أزورك يا روحي و أتطمن عليك والله أني مفتقدتك وخايفة عليك وما تدري وش كثر واحشني اامموووااااههه

أنا : بس بس والله العظيم تراني مجبس كلي وفي أشياء مو قادرة تأخذ راحتها ما في مسافة كافية يعني يصكها الجبس وترجع .. يا سيستر ..ما تقدرين تسوين فتحة للجبس تحت شوي ..

سهر : وشو وش تخربط يا حياتي يالله قول أنتم في أي مستشفى تأكد من الممرضة الآن

أنا : ياربيه احنا في أي مستشفى في أي مستشفى

الممرضة : يو ار هير ان سوميسي ( عسا ما شر أنت في الشميسي )

أنا :احنا في مستشفى المملكة الآن ..بس يا قلبي ماله داعي تجين الآن صبري لين نتعافى شوي وساعتها يحلها حلال ..تجينا وتجيبين معك شوكولاته وكل شي على كيفك …

سهر: والله لا ما في أمل والله ما يرتاح قلبي لين أجي و أشوفك و اتطمن عليك و أبوسك.يا قلبي أنتا يالله باي قلبي

وتسكر سهر السماعة والوضع يزداد صعوبة ..

أنا : تبي تزورنا .البنت تقول أنها تبي تزورنا تسمعني …

دحيم : وش المشكلة حياها الله على قل الكلافة تبي تنشد يعني عن مواعيد الزيارة ..

أنا : بس أنا قلت لها أننا في مسشتفى المملكة مو في الشميسي

دحيم : سامعك بس ليه تكذب أبي أعرف يعني ناقصين

أنا : المهم لا نضيع وقت قم خل ندبر أعمارنا ونروح للمملكة ..

دحيم : أنت صاحي وش نروح وش نتحرك وأنا وأنت مربطين من روسنا إلى رجولنا على قولتك كأننا موميات

أنا : شف ما صدقت على الله أتعرف على بنت واضبطها ..بنت من أول يوم بوسة على التليفون من يطولها قل لي بس المهم خل نتغطى بالكنابل يعني ذابحنا البرد و ننقز برى يعني بنشتري عصير ولا تتن ومنها نخت

دحيم : أي برد في عز الصيف .. طيب وبعدين كيف نخت

أنا : اسكت وما عليك وسو مثل ما أسوي وننقز برى بعد ما حلفنا للسيكورتي أننا بنشتري تتن ( تحذر حكومي التدخين مضر بالصحة = حسب قرارات مجلس الوزراء الأخيرة لا يقولون أني أروج للتتن تر كل شي إلا زعل مجلس الوزراء علينا ) ونوقف ليموزين وأول ما ركبنا وشلنا الكنابل قام السواق يصايح

السواق : بسم الله الرهمان الرهيم ..أنا مئا كائدة أنا في يهب اوسامة الله أكبر بابا زني أنا في وازد خوف أنتا ايس يبقا في ياخود

أنا :جني يشيلك بلا يالله أطلع بنا على مستشفى المملكة يالله بسرعة أنتا في يدل مستشفى المملكة في الثمامة

السواق : بابا زني انتا يبقى يروه أمريكا كزا كزا على تول دكيكة نوص دكيكة ما في مسكلة ..أيس يبقى بليموزين

أنا : لاحوووول وبعديين معاك بتطلع بنا ولا وشلووووون

دحيم : أنا أعرف له صديق صديق ناظرني ناظرني بوووووووووو

السواق : الله أكبر ياااااااء …. ويطلع من السيارة ويهج ويتركنا في السيارة بروحنا وننطلق بسيارته إلى مستشفى المملكة ونوقفها عند مدخل الإسعاف يعني مصابين .. وننطلق داخل المستشفى . أبي أروح لمكان الأجنحة وأشوف ممرضة مصرية دبة ..

أنا : أقول وين الأجنحة بأي طابق ..

الممرضة : بسم الله الرحمن الرحيم ..دستور يا أسيادنا دستور ..حابس حابس

أنا : وش فيك ..ليه خايفة اسمعيني زين ليه تخافين هااه وش فيك ..

الممرضة : واللهي ما عملتش حاجة وحياة ربنا ما تأزينيش ما تعمليش عمل ربنا يخليك ..

أنا : طيب أبيك تطلعين لي …

الممرضة : يا خراشي .واللهي بص يا سيدنا الشيخ العفريت ما خدتش حاجة كتير ..يا دوب كم ئرص اسبرينه ئصل أبو العيال عنده صداع

أنا : أقول بسرعة ما عندي وقت …وين

الممرضة : طاب طاب وحياة ربنا ما تسخطنيش ئردة ربنا يخليك بس الحتتين الشاش دول ئصل الواد تامر كان بيلعب كورة واتعور وعاوزة أعمل له غيار .. والسرنجه ( الأبره ) لأن جارتنا أم أحمد الواد بتاعها بياخد حئن ومامعهاش حئ الحئن ..وآخر حاجة الكيس داه يعني كل عام وأنت بخير يعني أنتا عارف سعر الفوط عندكم غالية حبتين و هرياني البتاعة ..ائوي ائوي ..

أنا : الله يطولك يا روح وبعدين معك أبي أفهم

الممرضة : واللهي خلاص بص بئه آخر كلام الغويشة دي لئيتها في جناح سمو الأميرة مشاعل ..والخاتم الالماز ده لئيته في جناح 12 وائع على الرض يارب اتخن عشرة كيلو لو كنت باكدب .. وآخر حاجة الساعة دي لئيتها في غرف الدكتورات على الأرض ئلت اشيلها أحسن واحدة من بتوع النظافة تسرئها ولا حاجه

أنا : أقول دحيم شف شغلك معها

دحيم : أقول يا سيستر التفتي علي شوي

الممرضة : ايوة حدرتك يا عفريت بيه تأمر حاجه

دحيم : سلامتك بس ….بوووووووه

الممرضة : يا خراشي يا مامتي و تطيح الممرضة في الأرض مغمي عليها .. ووصلنا لمكان الأجنحة ويرن الجوّال وسهر هي اللي تدق

أنا : هلا حياتي وينك يا قلبي

سهر : أنا الحين في الأجنحة أنت وين أي جناح هاه

أنا : لا أنا في السيب أصلي أنا و دحيم ..احم احم قصدي فارس طالعين نتشمس عند النافذة الكبيرة

دحيم : اسألها خويتي جت معها ولا لا قل نجوى معك ولا لا

سهر : ايوة هذا أنتم سلامتك يا قلبي ما تشوف شر وراك متكسر كلك ..كله من دحيم بس لو أشوفه والله لا أقطعه بسنوني بس هو وينه

أنا : في الشميسي ..قلت لهم لا تحطونه معي في نفس المستشفى مو عن المصاريف بس لو بأشوفه قدامي أكيد بأذبحه ولا بأعلقه من رجوله يتدودل ..هالهيس

دحيم : ( بعد ما نغزني ) : سهر وين نجوى ما أشوفها عسا ما شر عسا ما انهارت عقب ما درت أن صار لي حادث

سهر : لا والله يا عمري راحت مع خالتها لبيروت ..بتجلس أسبوع وبترجع ..بس أكيد ضاق صدرها عليك ..حتى بالأمارة تقول عجزت تشرب قهوتها يوم درت بالخبر ويالله يالله شربت عصير كوكتيل

دحيم : اهيء اهيء اهيء ما عندي أحد يواسيني أهلي مسافرين ونجوى مسافرة ..عن أذنكم بروح الحمام أصيح شوي .. أحس أني مخنوق ..

أنا : حبيبتي ممكن أطلب منك طلب .. بس ما ترديني ..

سهر : لا يا قلبي بوسة قدام الناس سوري معصي وش قالوا لك ..علشاني أحبك بتمسكني من يدي اللي توجعني

أنا : الله يهديك وين البوسة بس أصلا ما تشوفيني محاط كليا بطبقة عازلة و بوستك بتسبب لي مشاكل داخليه ..أنا تصعب علي والله شوفتك لي وأنا كذا مكسر ومربط كأني مومياء ..خلينا بس على التليفون لين أتعافي

سهر : افا بس شوفتي لك وزياراتي لك بتضايقك ما دريت ..والله آسفة ..أوعدك ما راح أضايقك ولا راح تشوفني أبد

أنا : لا والله لا والله بس يا قلبي أحبك تشوفيني مثل ما شفتيني أول مرة فارس أحلامك شامخ عالي الهمة

سهر : يا قلبي الشكل ترى مو مهم ..صدق أنك لا طول ولا عرض ولا أنت ذاك الوسيم بالحيل بس يعني عجبتني أول مرة شفتك فهمتني ..يعني حبيتك لذاتك …

أنا : احم احم ..بس يا قلبي يعني أنتي عارفة الآن وفارس في جناح واحد علشان نسلي بعض وكل يوم الشباب مطيحين عندنا ومابي أننا نتقابل في مثل هالاجواء فهمتيني ..

سهر : اها إذا كذا اوكيه تصدق حسبتك مليت مني يا حياتي طيب خلاص على التليفون لين تطلع من المستشفى يا قلبي ..أحبك مووت والله أموت فيك ..

وتطلع سهر من المستشفى ..وأجرجر دحيم من الحمام وهو يشلح مناديل من حمامات مستشفى المملكة ونأخذ وانيت يرجعنا للشميسي وجلسنا هناك 3 أسابيع لين تعافينا من الكسور والرضوض ..وطلعنا ..وأبوي متوعدني إذا رجع بيدخلني المستشفى بكسور أكبر لأني أعدمت السيارة ..وفي الملحق جلسنا نفكر بوضعنا

دحيم : يا أبو الشباب ترى الوضع صار مرة صعب فاتورتك وصلت 3800 ريال ..وسيارة ما عندنا عقب ما انعدمت سيارتكم ورموها في التشليح متى بتفاتحها .. شكلها يا غبية يا تستغبي ..

أنا : بالله عليك وش أقول لها .. إلى الآن تحسب أني ولد نعمة فهي مو دارية عن شي بس لو تدري صدقني بتغرقني بفلوسها وبتشوف جوال برقم مميز وجهاز آخر موديل ..وسيارة كوبيه بعد ..

دحيم :طيب وش رأيك تقول لها الحقيقة ترى بقى يومين ويفصلون جوالك ساعتها أبوك إذا درى عن الفاتورة بيذبحك صدق مو بس بيكسرك …

أنا : وش أقول لها تراني يا قلبي أكذب عليك ..ساعتها هي بترسل لي عشرة من اللي يشتغلون عندها وبتكمل علي

دحيم : أجل وش بتسوي فهمني ..ناوي تتهور

أنا : أنا أقول لك ..بدق عليها ..و أوريك وش أسوى بها ..و أدق عليها وترد علي

سهر : هلا قلبي وحياتي ودنيتي ..وينك يا عيوني ..

أنا : في المزرعة وبروحي وش رأيك تجين عندي الآن أبى أتكلم معك الآن في موضوع ضروري ( لدحيم همسا ) أبيها الآن تطلع من هالورطة أكيد بتخليني أجي بيتهم ولا مزرعتهم ..

سهر : والله يا قلبي مع أنها صعبة مرة مرة بس أبيك توعدني ما يكون أحد بالمزرعة إلا أنت لأني بأجيب بعض صديقاتي معي احتياطا

أنا: هاه وشو بتجيبين صديقاتك مزرعتنا وشهوا له ..يعني ماله داعي

سهر : عزوزي بديت تخوفني ليه تبي تستفرد فيني يعني ..ثانيا خليني أبز بك قدام صديقاتي وأقول لهم من هو حبيبي ..ولا ما ودك أقهرهم بك شوي ..

أنا : طيب وش رأيك تقهريهم فيني عندك في مزرعتكم ولا بيتكم ولا أي مكان بس مزرعتنا صعبة يعني واحدة أقدر أهربك من أي باب .بس بنات وش بيقول عني الحارس والمزارع ..واللي مسئول عن تربية الغزلان

سهر : تحسب أنه ما ودي يا قلبي .. بس مزرعتنا أخوي وولد خالي متسدحين فيها من أول الإجازة مدري وش وراهم عاد هم صايعين خلقة تصدق عافوا سفرة باريس وانطقوا في المزرعة وبيتنا ما طبيته من يوم وصلنا للرياض على مستشفى التخصصي على طول بعدين على بيت خالتي وخالتي كل يوم عندها فوق ألف حرمة واحدة داخله وواحدة طالعة بيتها مرة ما ينفع ..طيب وش رأيك بفندق

أنا : يعني أحجز غرفة بفندق وتجيني ( تفكير منتهين ) مو هذا قصدك

سهر : عزوزي أكيد تمزح معي لا أقصد يعني في لوبي فندق كذا يعني فهمتني ..

أنا : اها لحظة ..شوي طيب ..( لدحيم ) كم بقى معنا فلوس ..يعني في شي يكفي قيمة عصير في فندق

دحيم : أقول انثبر بس وش كم بقى معنا إلا قل كم مديونين به فوق ألف وثلاثمية ريال غير فاتورتك وشغلاتنا الصيفية كرشونا منها يوم نترقد في المستشفى من وين يعني

أنا : لا فندق صعبة يا عيوني ما أقدر بدت الإجازة تخلص وكثير من معارفنا رجعوا للرياض …هاتي مكان ثاني صاد ..

سهر : ياربيه منك اممم خلني أفكر والله أحترت طيب وش الأماكن اللي تقترحها

أنا : خليني أفكر وين نلتقي وين وين ايه في المطار صالة الخطوط الأجنبية وش قلتي ( شكله بيصير أحسن مكان للتدييت في الرياض للسنوات الخمس المقبلة )

سهر : هو المطار ..عاد وصالة الخطوط الأجنبية .ناوي تختطفني ولا تهاجر وش ناوي عليه بالضبط

أنا :لا بس أهلي واهلك يجون مع صالة التشريفات والفي أي بي .والناس اللي يمكن يعرفوننا بيجون على الخطوط السعودية فهمتي الآن

سهر : والله التفكير خلاص الساعة 11 في الليل الوعد …

ونلتقي هناك الساعة 11 وربع ( مواعيد بنات متى جوا على الوقت )

أنا : حبيبتي أبي أقول لك شي بس قبل توعديني وعد ما تزعلين مني مهما يصير

سهر : هاه منهي قليلة الأدب اللي طلعت معها ووش سويتوا هاه ووين رحتوا .. يا خاين يا قليل المروة

أنا : الله يهديك وين رحتي بعيد .تعرفين ليه جبتك المطار هنا …

سهر : لا ليه يا ترى وش القصة …

أنا : الله يسلمك الوالد سمع في الأخبار أن الحكومة بتسمح بشركات طيران خاصة في السعودية ..قامت طنقرت في رأسه قال ما بدها خلاص بنفتح لنا شركة ونحط فيها 30 طيارة منها نستفيد ومنها إذا بغينا نسافر ما نقص تذاكر وحالة نسحب واحدة من طياراتنا .ونقوم وننزل إعلانات طيارين ومضيفين ومضيفات وخلاص تقريبا صملنا و أرسلناهم برى يآخذون دورات تدريبية وقمنا عربنا في في عشرين طيارة بكم مليون ..وخلاص بس تآمروا الكبار على أبوي وقالوا لازم الشركات الطيران الخاصة تكون مملوكة لأكثر من جهة .مع أن أبوي كان ناوي يسويها شركة مغلقة بيننا أحنا عياله وأمي ..حتى بالمارية بيسميها على أسم أمي طيران سوزان .. المهم أبوي أرسلني أتابع أوراق الشركة في المحكمة … يعني سالفة أرض بنبان مع أنها صدق بس ما هي سبب جيتي .. لأن أي واحد من اللي يشتغلون عندنا يقدر يسويها .. المهم وأنا على حطة يدك من قاضي لقاضي ..وكل مرة أدخل للقضاة أقول لهم جزاكم الله خير ترانا عربنا في الطيارات وأرسلنا موظفين ندربهم برى يقولون ولو مو ذنبنا ذنبكم ليه ما تقرون اللوائح ..لين ليلة البارح خسرنا القضية و شركة بوينج ما كذبت خبر وقامت قالت ترى عربوننا لنا مع أننا دافعين فوق نص قيمة الطيارات بس الشكوى لله تصدقين يا قلبي خسرنا فوق 50 مليون دولار غير النتف اللي ما أحصيناهم إلي الآن .

سهر : يا حرام ليه هم يسوون معكم كذا والله حرام المفروض يشجعون الاستثمار

أنا : ايه يشجعونه طل ربعنا شعارهم فيها لا نخفيها يعني بتعطوننا ولا وقفنا مصالحكم ..وأبوي ما يطيق شي كثر الرشوة ..المهم يا قلبي بلغت الوالد وقال لي ابد صف حساباتنا وبع عقاراتنا وبنروح دبي .. على الأقل يقدّرون الاستثمار ولا عندهم التعقيدات اللي عندنا ..وأنا أقول له يا يبه الله يخليك لا تعميك ساعة الغضب وتركب رأسك يعني ينترك ديرتنا وأهلنا علشان مشروع فشل وخمسين مليون دولار راحت بدالها خمسين أخرى ..وأبوي يحلف وعاد أبوي حلف و أبوي إذا حلف خلاص لا يمكن يغير رأيه .. المهم قلت له ترك للرياض ماني تارك لو وش يصير تعرفين ليه

سهر : لا مو عارفة ليه ما تبي تترك الرياض

أنا : علشانك يا قلبي ..وقفت في وجه أبوي علشانك يا حياتي .. وأبوي عاد يعتمد علي كثير في أعماله أكثر من بقية أخواني يوم شافني مصر على رأيي قال ايش بيهددني قال ترى بتركك وما راح أترك لك ولا ريال قلت له ما يخالف بس ما أترك الرياض وقلبي يقول ما أترك سهر ..قال أبوي خل ديرتك تنفعك إذا قرصك الجوع ..ويوم شاف أمي قامت تبتسي قال خلاص بأترك لك بيت في النزهة كنّا مأجرينه لمهندسين أمريكان بس بعد التفجيرات ويوم قامت سفارتهم تجمعهم في مجمعات علشان الحراسة تركوا البيت ..( بيتنا اللي جالسين فيه ) عاد أنا حبيت أعلمك يا قلبي علشان أشوف أنتي بتتخلين عني في محنتي ولا بتجلسين معي ..

سهر : والله يا قلبي حزنتني .مدري وش أقول في عيوني الدمعة ودي أبكي والله من جد

ويرن تليفوني الجوّال و يطلع دحيم على الخط …

دحيم : هاه بشر بتعطيك واحدة من سياراتهم ولا بتعطيك شيك ..علمني وش صار تراني أنتظر على جمر …

أنا : لا يا يسري لا الوالد يقول العمارة اللي على شارع الستين ما تنباع بأقل من ثلاثين مليون ريال .. تبيه يزعل علي فوق ما هو زعلان إذا بعناها ب 28 مليون بيقول عبدالعزيز لهط مليونين في جيبه علشان يبدأ مستقبله لا تدق علي إلا إذا حصلت واحد بيشتريها بثلاثين مليون زين أو أنا أدق عليك

دحيم : أول ما يصير شي عطني خبر زين و أسالها متى بترجع نجوى …ولا تنسى تكلمها عن فاتورة جوالك ..

أنا : إن شاء الله من عيوني الثنتين ..أما بالنسبة للهاتف فشكلي ما راح أقدر أسدد عندي أولويات أهم من الهاتف خلهم يقطعونه وش أسوى عاد ما باليد حيلة

سهر : بيقطعون جوالك يا قلبي ليه كذا كم فاتورتك .. وليه ما قلت لي .. من أول

أنا : أي والله ما حز في قلبي إلا أني أحتاجه علشان أكلمك ولا هو بحد ذاته ما همني .. والفاتورة شديدة 4000 ريال .. بس بشوف إذا اقدر اسددها ولا لا

سهر : اووووف قهر لو الفاتورة معك الآن كان أخذتها وسددتها عنك .. ما أرضى يقطعون جوالك وانحرم من صوتك وأخبارك خصوصا أنت في ظروف صعبة …

أنا : لا هذي هي معي ..تفضلي …والله ما تطاوعني نفسي أخليك تسددين عني بس يا حبيبي حكم الظروف ..

سهر :أي والله هذي فاتورتك ما عليك أن شاء الله ياليوم يابكرة بالكثير أسددها كم عزوزي عندي ..وأنت يا قلبي لا يضيق صدرك في أشياء أهم لازم تركز فيها ..

وراحت سهر وأنا رجعت لدحيم أناقز من الفرحة وأنا أغني بتسدد فاتورتي وأول الغيث قطرة … وثاني يوم الصباح أقوم بأدق على سهر

وانصدم أن الجوال خارج الخدمة مؤقتا واتصل على 902 وأنا أغلي أبي أهوش

موظف الهاتف : هلا والله 902 وش عندك أخلص بس على فكرة ما في خدمة قبل أسبوع عندنا زحمة هاه وش عندك

أنا : وراكم فاصلين جوالي هاه ما تستحون على وجيهكم وبعدين معاكم متى بتصيرين أوادم فشلتونا ..( ما يجون ولا ينضبطون الا بالهواش )

موظف الهاتف : آسف طال عمرك كم رقم جوالكم وأنا أشيك وان شاء الله ما يصير خاطرك إلا طيب

أنا : 053\\\\\\ .. والله ترى أنتم وضعكم ما يطاق بصراحة بكرة داخلة شركات دولية وأنتم على تخلفكم وافصل ولا تفصل وهذا منهو ولده ومزادات على أرقام مميزة قلبتوها حراج ..

موظف الهاتف : أقول ورى ما تنفهق ..لك وجه تتكلم أنت ووجهك فاتورتك وصلت 4100 ريال ولا سددت وتقول ليه فاصلين جوالك لو يحصل لنا فصلنا رقبتك بعد ياقليل الحياء ..

أنا : وشلون ما يصير أمس واحدة قصدي واحد واعدني بيسدد عني قصدي أنا أطالبه فلوس فقلت بفلوسي سدد فاتورتي ووعدني أنه بيسددها أخاف فصلتوا عقب ما سدد ..بالله تأكدوا

موظف الهاتف : أقول لك ما في أحد سدد عنك وش فيك أنت ما تفهم ولك عين تشكك فينا بعد

أنا : أقول طال عمرك ويخليك ربي لعين ترجيك ..تأكد أخاف مسدد عن طريق الانترنت ولا الصراف لأنها بنت قصدي لأنه ولد كشخه وشايف خير …

موظف الهاتف : أقول أقلب وجهك لك وجه تحكي بعد … طوط طوط

دحيم : وش القصة ليه فصلوا جوالك

أنا : يقولون ما أحد سدد ..أنا أقول هالهاتف ما يجي من وراه خير تسدد قبل قطع الخط بيوم ومع هذا يقطعونه طيب ليه حاطين آخر مهلة للسداد

دحيم : أخاف هي ما سددت بس و لا سواقها الصتيمة نسى يسدد

أنا : هقوتك بس يا أخي شكلها حبوبة وهي بنت ناس وشايفة خير تسدد وهي ما تشوف الدرب ..مو تحبني

دحيم : أنا أقول خذ جوالي ودق عليها واسألها كأنك بتعلمها أن جوالك انفصل

أنا : جبتها هات الجوال وأدق عليها ..وترد علي

سهر : هلا حبيبي ودنيتي وغلاي .تصدق بغيت ما أرد يوم شفت رقم غريب بس قلبني نغزني وقلت شكله أنت ( يا كثر ما ينصبون هالنصبة وهم يبون جوالاتهم ترن باللي هي به )

أنا : ابد يا قلبي جوالي فصلوه مدري ليه مع أنك سددتي عني .مو صح سددتي يا حياتي

سهر :آآخخ بس مدري وش أقول لك يا قلبي أمس قلت خلني أسدد عن طريق الانترنت ومدري وش فيه موقع البنك قام يخبط أبد مو راضي واتصل عليهم يقولون صرفيتك في هالشهر كثيرة فشوي الكمبيوتر علق معك قلت يووه و أروح وأطر أخوي وأدخل حسابه ويوم خلاص خلاص بيسدد أثر أخوي شاري بالفيزا أشرطة دي في ديات واجد ولا سدد قيمتها واظطروا يسحبون من الحساب وفي مثل هالحالات يوقفون الحساب شوي والله ثم والله شوف حلفت لك بالله بغيت أدق على أبوي وأدخل من حسابه ولا أخليه يكلم مدير الفرع علشان يسددون فاتورتك وأقول لهم أنك أخو صديقتي وهي مآخذة جوالك ولا تبيه ضروري بس خفت أزعج أبوي وهو نايم وجالس بروحه في أوروبا حرام مو صح حرام .. بس ولا يهمك أنا رايحة الآن للبنك ومسددتها مسددتها الله لا يعوق بشر

أنا : تسلمين يا قلبي بس لا تنسين أول ما تسددين ترسل الفاتورة لهم بالفاكس تعرفين ربعنا يبطون على ما يرجعون الخط وغثا وحالة زين حياتي

سهر : ولا يهمك يا قلبي كم عزوزي عندي أنا أنت تآمر أمر

وأجلس أنتظر في البيت وكل ساعة متصل على الهاتف ويقولون ما في أحد سدد إلى الآن وبعد ست ساعات أدق على سهر ..باسألها وش صار في فاتورتي ..

أنا : هلا حياتي وش صار على اللي قلت ما رجعوا خطي إلى الآن يقولون ما أحد سدد إلى الآن

سهر : الحمدلله أنك اتصلت يا حياتي ضيعت رقم خويك فارس ..أما في البنك فاتك زحمة الله لا يوريك مدري وش عندهم ..بس تدري كله مني ضيعت بطاقتي الماسية وصفيت مع الملحطات في السرى وتجي واحدة دبة وراي خنقتني بريحتها وكل ما تحرك السرى شوي تحركت وصدمتني تكسرت والله يا قلبي المهم وصلت الشباك وتوني بأطلع فاتورتك إلا وش أشوف ما حصلت فاتورتك ألتفت يمين ويسار فرغت شنطتي كلها على الشباك حق الصرافة ولا في فايدة والله أنحرجت بس ما همني كثر أني ما سددت فاتورتك شكلها طاحت مني في السرى المشكلة زحمة وخياس ومالك أمل تحصل ورقة طايحة لو ايش تقول يوم الحشر قعدت أترجى الصرافة أقول ممكن تطلعين لي الفاتورة وبأعطيك اسم صاحب الخط تقول لي لا قالت لي يالفاتورة يا تجيبين رقم الحساب اللي في الفاتورة وتسددينها عن طريق الصراف ولا التليفون ولا الانترنت والله يا حياتي صدق أني انطقيت في السرى والخياس والزحمة ساعة وشوي بس ما همني كثر أني ما سددت فاتورتك يا حياتي …

أنا : افا بدينا بالحركات ..قصدي عادي يا قلبي أهم شي سلامتك ولا ترى الجوال وشوله هاه قولي وشوله علشان أكلمك واسمع صوتك يا حياتي وعمري ودنيتي ..أمسكي عندك رقم الحساب 123\\\\\\\\\

سهر : حتى أنا أكثر يا قلبي والله مشتاقة لك يا عمري ولسواليفك هاه وش أخبارك قول لي

دحيم : يالشيخ أقول ماني ناقص فواتير على ظهري ولا تبي جوالي ينفصل مثل جوالك

أنا : والله يا حياتي ودي أكمل سوالف معك بس عندي موعد مع مهندس كمبيوتر ناوي افتتح مشروع كمبيوتر عالمي إذا خلصت منه أن شاء الله بأكلمك .. وأسكر منها الخط

دحيم : وش قصتها معك بتسدد ولا لا ترى ما صارت كل شوي بتطلع حجة وعذر و بتلعب بك

أنا : يابن الحلال أحسن النية هي شكلها ما هي بسيطة بس وش نسوي ما قدامي إلا هي ثانيا خلني أطلع منها على الأقل بفاتورة جوال تسددها ..شوفة عينك صفصفنا على الحديدة

دحيم : يا خوفي أنها تلعب عليك ولا راح تسد فاتورتك ولا شي لو تبي تسدد سددت من زمان ولا رمت عليك جوال من جوالاتهم الزايدة ..

أنا : هقوتك كذا يعين هي تلعب علي والله بديت اشك

دحيم : شف تعرف منصور ولد خالتي مشتغل في الإجازة في الهاتف في خدمات العملاء أقدر أكلمه يطلع لنا جوالها باسم مين وش قلت ..

أنا : لا أخاف تصير تلعب علي وبعدين انصدم مدري بطني يقرقر ..

دحيم : اها بس ندري أحسن ولا ننصدم بعدين ..ويدق دحيم على ويعطيه الرقم وشوي ويعطينا دحيم اسم صاحبة الجوال ويطلع ليلى بنت محمد بن عبدالله أبو طخه ..

أنا : شفت شفت يعني طلعت بنت رجل الأعمال محمد أبو طخه وأنت جالس تشكك فيني ظلمنا البنت

دحيم : والله حظك يفلق الصخر بنت أبو طخه مرة واحدة ذاك ملياردير يملي مراتبه بأمهات خمسمية ريال من كثرة قروشه .. يقول لك الموكيت حق بيتهم أمهات مية ..وفي رمضان يوزعون زكاياهم بالدولار …بس ليه رقمها عفسة

أنا : بنات العز ما يبون أرقام مميزة لا بعدين تجيهم إزعاجات وشباب ينشبون لهم ما تشوفها قالت لي اسم غير اسمها ..طيب الحين وش أسوى معها يا أخي أحس أني خنتها لما طلعت اسمها من الرقم ضميري بدى يعورني …

دحيم : تدري أحسن شي مع هالناس..أنك تنشب فيهم علشان تعيش طول عمرك في خير …أعرس عليها ..استغل الفرصة مو تدري هي أنك متزاعل مع أبوك وأهلك أنت أعرس عليها بعدين علمها بالحقيقة .. وش قلت

أنا : أروح أخطبها صاحي أنت طيب لازم أقولها أخذ رأيها يمكن هي ما تبي تتزوجني الآن أنشب لها أوهقها

دحيم : يا غبي فكر فيها حتى لو أحرجتها إذا سالت أبوها أبوها هو اللي ينخاف منه يرفض ساعتها هي بتوقف في وجهه زي الأفلام المصرية وتقول بحبه يا بابا بحبه يا بابا

أنا : يا خوفي تقول ما بحبوش يا بابا ساعتها بتحطم ..

دحيم : وليه تقول ما بحبوش يا بابا مو هي ميتة فيك وتطمر علشانك لمستشفى المملكة وكل يوم تكلمك

أنا : ايه بس بتقول ليه طلعت اسمي من رقمي جاهلك حركات البنات ..

دحيم : أنا رأيي تبيعها وتوكل على الله وما يردك ألا قصر أبوها اللي في المعذر المشهور اللي نصه رخام ونصه قزاز مدري كيف اللي قدامه غابات ما تقول في الرياض ألا في باريس

أنا : أنت ووجهك وشلون أروح ناسي أننا على الحديدة وملابسي نصها راحت في حادث السيارة ونصها ما انغسل له شهرين مو يبيلها غسيل الآن يبيلها تعقيم و دمجتي ما سيرت على حلاق من شهر وشوي

دحيم : مو مشكلة نستلف فلوس لو من خالد ولد أبو صالح الحاجة تغصب الواحد …

وفي الجانب الآخر من مدينة الرياض …

سهر : يا نجوى افهميني والله أحسه طيب صحيح شكله نصاب وبكاش ويبي يسوي نفسه رزة بس قلبي أرتاح له

نجوى : وش يعني بتكملين معه ونسيتي اتفاقنا ..ترانا الحين في الجامعة وطلباتنا كثرت ونبي مخفات يشترون لنا ويسددون فواتيرنا مو كل المكافأة تطير بعد أسبوع ترى نص البنات الحين يسون كذا ..

سمر : ما اختلفنا نصهم يسوون كذا بس مدري وشلون جايز لي غباه وكيف يتصرف وكيف يلفق وكيف أبوه كافل الوليد هو يحاول يرضيني بس ما يدري وش يسوي ..

نجوى : بلا هم معجبك الحال جواله مقطوع ولا يقدر يكلمك وفوق ذا كله يبيك تسددين فاتورته …المهم هذا رقم واحد كاش شاريته من لمياء .. بخمسمية ريال ..أسمه راكان .معه شهادة ثانوي وسيارته جيب بي ام دبليو … هو عاطل بس أبوه معطيه ثلاثين مليون يطقطق بهم في العقار والأسهم .. وش قلتي

سهر : أخاف يطلع ثقيل دم ونشبة وكل يوم أبى أشوفك وتعالي مزرعتنا بأوريك حصاني الخاص اللي نسمعه من قصص البنات يضيق الصدر والله

نجوى : كل واحدة عقلها في رأسها يبي شوفة من بعيد حياه الله تركبين معه في السيارة ولفة في شارع العليا وطريق الأمير عبدالله نمشيها ..خربها مرة مرة يمسك يدك فوق ذا معصي وأنتي وشطارتك تخلينه يتزوجك …

سهر : بذمتك سمعتي واحدة من البنات ماشت ولد من هالكاش وأعرست عليه ..يا بنت الحلال كلهم يلعبون على بعض .. والله أني اشتقت للأيام اللي ألعب فيها على هالخبل …

نجوى : ياربييه منك وشلون بتفهمين هذا الرقم بتكلمين راكان ولا أكلمه أنا

سهر: هو وشلون تكلمينه مو أنتي الآن مع راعي الفياجرا الرصاصية في شارع التحلية ..

نجوى : زيادة الخير خيرين لا تنسين دافعة في هذا خمسمية ريال ..خذتهم لمياء لا بارك الله فيها

سهر : لا خلاص هاتيها بس والله قلبي يقطعني على عزوزي الخبل … وجع وش أسمه راكان أبو طخه وش هالاسم اللي يفشل .. ..تعالي لا يكون يقرب لليلى اللي شريت منها الجوال

نجوى : أقول اسكتي بس يا قردي وش جاب ذيك المنتفة لولد العز هذا, هذا أبوه يرقد على فلوس هذا اللي نص الرياض له يقول لك بيتهم في جنيف سايمه ملك إسبانيا بخمسين مليون يورو ورافض يبيعه لأنه مباشرة على البحيرة عيال أبو طخه ذولي ورقة أم خمسين ما يعترفون بها زي الهلل عندنا ..

سهر :معقولة أجل ما تعرف على بنات إلى الآن أكيد شين يوم ولا بنت عبرته

نجوى : الحق ينقال موب شين حليو ما عليه ولا هو ثقيل دم بس دفش شوي وأسبوع أو أسبوعين بالكثير ويمل إذا حب البنت أو حس أنها بتموت عليه جاب لها هدية من الغاليات آخر بنت سورية صاحت يوم قال لها لازم نفترق جاب لها طقم ألماس بعشرين ألف ..نشبته له بعد فترة يعني مرة مجنونة فيه ..وظف كل إخوانها وعمانها في واحدة من مدارسهم

سهر : وجع لهالدرجة .. وشلون عايش ذا

نجوى : قلت لك مضمون وكاش ولا هو يبطي والحق ينقال ما فيه نشابة بعض عيال التخصصي ..يعني من نوعية أنطقي لين يقول لك يا حياتي لازم نفترق ومدري ايش ومن هالحكي ..هو بسرعة ملول ..

سهر : بس ولو يا أختي الواحد هذا يخوف ثانيا ودي أشوف هو أحلى ولا عزوزي .. متحسفة على عزوزي ودي أقول له تراني كلية تربية ومنتفة وعلى الله وعلى باص الجامعة بس برستيجي ما يسمح

نجوى : أقول ثور تقول احلبوه ..عزوزي وعزوزي يالله هزي طولك وسددي فاتورته يالخبلة بالنسبة لراكان سهلة قصرهم في المعذر وأعرف القراش حقهم يا بنشوفه طالع بسيارته يا طالع من المسجد هو ساعات يهديه ربي ويصلي في المسجد خصوصا إذا كان عند أبوه رجال وش قلتي نستر عند قصرهم بعد المغرب

سهر : اوكيه بس أن طلع شين ولا نفسه شينه والله ما أبيه ترى الفلوس مو كل شي خفة الدم والرجة تسوى الدنيا وما فيها هذاني قلت لك ..

وفي الجانب الأول من الرياض …رحت أنا ودحيم لخالد ولد أبو صالح بين قوسين أبو نشقه

خالد : هلا وش تبون بسرعة ترى خويتي بتدق علي الحين نازلة جنيف تسير على خالتها تعرفون الدراسة قربت

أنا : ( قال ايش خويتي قل عمتي) لا سلامتك بس لك ولا للذيب

خالد : للذيب خلاص يالله توكلوا على الله نشوفكم على خير

دحيم : يابن الحلال اصبر وراك عجل ..حنا نبي منك سلف ألفين ريال إذا ما عليك أمر في شي ضروري

خالد : من وين لي ألفين ريال هاه قول لي من وين اسرق يعني ولا اسرق صدق فاضين

أنا : بلا نصب عمتك قصدي خويتك تدحك فلوس لين تقول بس وتسدد فواتيرك ولا أنت وخشتك من متى تلبس بيجامة في البيت يرحم أيام ما تروح وتجي إلا بقميص النوم المهم طال عمرك أبي ألفين الله لا يهينك ضروري

خالد : الحين جايين تتسلفون ولا تحسدون وش قصتكم ..يالله بس

دحيم : طيب شف نبي منك شماغ وطاقية جديدة وألف ريال عبدالعزيز وراه مقابلة ضرورية يمكن يتعين بعدها في وظيفة زينة مستقبل الرجل في يدك ..وصاحب الشركة رجل يعز المناظر والرزة وش قلت

خالد : اوكيه طيب بس عساه يتذكر ويوقف حسد لأنه حسود وإذا بدت الفلوس تمشي في يده يتذكرني ويرجع قروشي وبدال شماغي شماغ جديدة بقراطيسها …

أنا : ( في سري ) ايه هين والله لأشتري بيتكم وأطردك أنت وجه فلوس ..

دحيم : يالله حب رأس عمك خالد جزاه الله وافق يسلفنا .. يالله قم

وأقوم على مضض وأحب رأس هالشين ويعطيني شماغ جديدة وطاقية وعقال و ألف ريال ونروح الحلاق ونستأجر سيارة كابريس ورحنا لجامع أبو طخة على صلاة المغرب نصلي هناك وصلينا في آخر صف ولما قضت الصلاة شفنا محمد أبو طخه طالع من المسجد ومعه رجال وانتظرناه شوي لين يوصل لقصره بعدين بنلحقه علشان نقابله …وبعدين أنطلقنا أنا ودحيم واحنا في كامل سكبتنا …وفي نفس الجانب هالمرة …كانت سمر ونجوى صديقتها في سيارة ليموزين بين المسجد والقصر ينتظرون …

سهر : شفتي شفتي ما طلع أسمه عبدالعزيز الكذاب الخاين ..طلع راكان ولد أبو طخه ..أثر الولد محترف نصب على البنات ..ولما قال أننا فلسنا يعني كان ينصب علي علشان يتركني …

نجوى : يخرب بيته ابن اللذينا طلع ذيب ما هو سهل ..شوفي كل شي قلته لك عن عبدالعزيز قصدي راكان مدري المهم لا تصدقينه ترى أهم شي خفة الدم خفيف دم وملياردير وين تحصلينهم

سهر : صدقيني كرهته والله العظيم كرهته يعني كل شي قاله لي كذب أو يستهبل علي …والله ما صرت فاهمة شي هو عبدالعزيز ولا راكان يبيني ولا يتسلى فيني ..يعني سالفة الجوال مثلا كانت اختبار تهقين انه شاك فيني

نجوى : أقول خل عنك الحكي اللي ماله داعي الحين تطمرين لو نبيع ذهبنا ونسدد فاتورته كل شي ولا هالكاش ولد الكاش تراه ما ينتفوت … صدقيني قولي حبيبي ما أقدر أستغني عنك وإذا طلع كاشفك صدق اعترفي له وتبكبكي كود يطلع لك شي شيك بخمسين ألف ما أنتي أقل من السورية

سهر : معصي والله لا أوريك فيه ..صدق أني نصبت عليه وسويت نفسي شي وشويات بس ولو هو بعد نصب علي وهو اللي يبي فراقي ..على العموم أنا أوريك فيه …

وفي هالأثناء وبعد حبة الرأس دخلنا أنا ودحيم قصر أبو طخه علشان نقابله ..وسهر ونجوى يغلون في السيارة ..

و علشان تعرفون وش صار هذا اللي بتعرفونه في قصة …( في حب الطخاطيخ )

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة