قصة حب الطخاطيخ – الجزء الاول

قصة حب الطخاطيخ – الجزء الاول كاملة مكتوبة

تابعة لقصة حبة فوق – الجزء الأول

وبعد ما شافتني سهر هي وصديقتها نجوى عند بيت ابو طخه شوفوا وش صار

وعلى بوابة أبو طخه .وقفت أنا ودحيم قدام الحارس الصعيدي المصري (هريدي )

هريدي : أنتو مين وعاوزين ايه ..عاوزين تخشوا تئابلوا مين ولا عاوزين تئابلوا العم راكان

أنا : لا احنا جايين نقابل العم أبو طخه الكبير في موضوع شخصي ..

هريدي : في موعد هو ئالوا لك تيجوا ولا أنتم جيتم من نفسيكم …

أنا : لا من نفسينا هو موضوع كبير كبير ئوي واخد بالك ولا يستحملشي انهي تأخير

هريدي : بصم أنتم تيجوا بعد العشا وئتها أشوف العم أبو طخه حيئابلوكوا ولا لئه هو ما بيبحش يئابل حد من غير ميعاد غير يوم الجمعه بعد العصر يعني بيجوا الناس عنده

أنا : لا لازم ندخل عليه قلت لك يا هريدي موضوع كبير كبير

هريدي : ما فيش يفتح الله ئولت لكوا تعالوا بعد العشاء ونشوف يئبل ولا لاء

أنا : يا هريدي يا حبيبي اسمع كلامي بكرة بصير واحد من أهل البيت يعني اشتر رضاي من بدري يا هريدي افهمني

هريدي : من أهل البيت أزاي يعني هاه نفسي افهم وضح لي أكتر ..

أنا : يا هريدي واضحة زي الشمس الله يرضى لي عليك خلنا ندخل وبعدين بتفهم كل شي ..

هريدي : بصم حدخلكم بس لو سألني العم أبو طخه حئوله أنتم ئولتوا لي أنكم جماعه ئرايبه جايين له من البلد

أنا : والله أنك تلقطها وهي طايرة احنا بالفعل تقريبا قرايبه …

ودخلنا أنا و دحيم للعم أبو طخه لمجلسه الخاص وكان وهو واحد من الشياب جالسين يشربون شاهي ..

أبو طخه : هلا والله من أنتم يا عيالي ما عرفتكم …

أنا : أنا عبدالعزيز ….. وهذا صديق عمري ورفيق دربي من أيام الطفولة دحي… قصدي عبدالرحمن …..

أبو طخه : هلا بكم والله يا كومار تعال صب للضيوف شاهي …ايوة يا عيالي بغيتوا شي آمروا .. وش طلبتم ..

أنا : الله يسلمك الموضوع شوي خاص ما نحب نقوله قدام أغراب ..يعني إذا خلصت من الضيف اللي عندك وصرنا بروحنا نتكلم فيه بالتفصيل الممل

أبو طخه : هذا أبو فهد رفيق دربي وحسبت أخوي اللي ما جابوه والديني ..ولا في شي عندي يخفى عنه

أنا : ولو طال عمرك يعني على عيني ورأسي رفيق دربك بس يعني الموضوع شوي خاص وحساس على العموم احنا ما ورانا شي نقدر ننتظركم لين تخلصون

دحيم : أخاف مستحين مني ..ترى السالفة أني جاي نيابة عن أهله ولا …

أنا : واضح واضح الله يسلمك ما يحتاج تعليق ..خلاص ننتظرهم لين يخلصون وراك شي

دحيم : لا والله بس يعني الواحد وده يخلص بدري ..

أبو طخه :أقول إذا في شي عندكم قولوه الآن ولا توكلوا ما في أسرار بيني وبين أخوي أبو فهد فهمتوا

أنا : بصراحة يا عمي وبدون أدنى مقدمات أنت شايف بعينك كاملين والكامل وجه الله و الشاب مننا مهما راح وجاء لا بد له أن يكمل دينه بالزواج فعلشان كذا احنا طالبين القرب منك في كريمتكم …

أبو طخه : طالبين القرب مني ..وفي بنتي بس ما عندي بنات للزواج ..

دحيم : لا لا لا يا عمي مو احنا بس هو أنا توني يعني نبي بنت واحدة … الموجود عندك

أبو طخه : ولا بنت عندي أنا أصلا ما عندي إلا بنت واحدة بس ..

أنا : ايه هذي هي وصلت خير .. طالبك القرب فيها ..لا تردني تكفى قل تم ..تراها تحبني وأحبها ..والله يا عمي نموت في بعض يمين بالله .. ما تتخيل وشلون بس هي مستحية تقول لك.

أبو فهد : وش تقول أنت ..يعجبك هالحكي يا أخوي يا محمد يا أبو طخه .. وعيني عينك هالحكي قدامي

أنا : شفت يا عمي شفت قايل لك ما أبى أحكي في الموضوع قدام أغراب .. أنت وش دخلك يا أبو فهد أحبها أعرس عليها .. أبي افهم مضايقينك في شي إحنا ..تبي أموتك قهر ايه تحبني وأحبها و أموت فيها عندك مانع

أبو طخه : أقول انطم طمك الله بعد يا قليل الحياء ياللي ما تستحي على وجهك بنتي أشرف من حركاتك يالهيس و بنتي متزوجة من فهد ولد أبو فهد ..عرفت ليه ثار وله حق يقطع رقبتك .

أنا : يا أخ دحيم ما تشاطرني الرأي أننا كبينا العشاء بقوة …

دحيم : أي والله حتى رجلي أحسها باردة شكلك كاب اللبن تحت رجولي … وش السواة

أبو فهد : الحين البنت مسويه نفسها زعلانة يا أخوي يا محمد وجايين نصالح بينها وبين الولد وأثاري البنت مطيحة بغراميات مع شباب

أبو طخه : افا بس يا أبو فهد وأنت تصدق هالخبل شكله شارب له شي ولا بالع له حبه ولا لو هو صاحي ما جا يتبلى على بنات الناس أنت يالخبل بنات الناس مو لعبة عندك فاهم ولا لا

دحيم : شكلهم عصبوا من جد أنا أقول نطلع الحين نرجع لهم بعدين يمكن يغيرون رأيهم

أنا : مستحيل يا عمي اسمع بنتك والله ما تحبه ما تحبه تحبني أنا ..ليه تغصبونها على واحد بدون مشاعر بدون أحاسيس لازم تدور على سعادة بنتك يا عمي وتطلقها من هالظالم وولده أرجوك يا عمي لا تضيع مستقبل بنتك بيدك

أبو طخه : أقول أقلب وجهك وأطلع برى البيت لا بارك الله فيك ..وخذ معك صديقك وأن شفتكم مقربين من البيت قصيت رجولكم قص يا هريدي تعال خذ هالسكارى وطلعهم من البيت ..

دحيم : طيب يا عمي أرجوك طلب قبل ما نطلع الله يخليك ..

أبو طخه : نعم وعما وش تبي أخلص

دحيم : الله يخليك ترى نجوى مالها دخل فلا يوصل الكلام لأهلها يعني يمكن ترجع تحبني وش يدريك …

أبو طخه : نجوى مين بعد أنت وجهك.. ما قلت لك يا أبو فهد شكلهم سكارى وجايين يستهبلون ..برى هريدي تعال شلهم ..وارمهم برى البيت ..وشالنا هريدي وبقية العمال في القصر ورمونا في الشارع ..

دحيم : حصل خير حصل خير أهم شي لا تتوصخ الملابس تراها مو لنا الحمدلله على السلامة

أنا : شف ولو أنا من أول يعني أبي البنت لفلوسها بس الحين صرت أحبها البنت تعاني في صمت ولا أحد حاس فيها يا قلبي تبي تترك الدنيا وتكون معي … ما راح أخيب ظنها فيني

دحيم : يعني وش بتسوي فهمني ..

أنا : بعدين بتعرف … بس هات جوالك … وفي هالاثناء .سهر وصديقتها نجوى في الطرف الآخر ..

سهر : مابي مابي مابي لا تحاولين أنا ما أمشي ورى واحد باعني برخيص …وتبيني أنا أدق عليه

نجوى: يا بنت الحلال دقي وسوي نفس زعلانة وعاتبيه العبي عليه ببوسة ولا شي ترى العيال ما يخققهم إلا هالاشياء ووقتها العبي عليه على كيفك وش يدريك يمكن يعرس عليك

سهر : لا لا أصلا أنا ما أبيه ما أحبه خلاص كرهته الغشاش الخاين لو حابه لي ولد ضعوف أصرف لي على الأقل ما يخونني .آبي أعرف ليه عيال النعمة يأخذون البنات مثل السيارات يجمعون فيهم الواحد يتعرف على عشر

نجوى : الضعوف على قولتك يا حياتي ما يتحمل فاتورته وهو يكلم واحدة تبينه هالمرة يكلم عشر أن تلقينها في السجن وتطلبه شركة الاتصالات فلوس وعيال النعمة هدايا وتليفونات وسعة صدر ولا همهم شي الكل يبي يعيش وقته يا عيوني وينك فيه اصحي

سهر : يعني مصممة أني أكلمه ..طيب هاتي رقمه شورك وهداية الله ..ويرن التليفون .ويرد راكان ولد أبو طخه

راكان : هلا مرحبا من معي

سهر : ( لنجوى ) مو هو مو هو الصوت متغير وش السالفة واحد حنجرته مليانة نشا مضخم كل الحروف

راكان : الو من معي ..وينك ..أنت ليه ما ترد هاه

سهر : ( لنجوى) نشب نشب وش أقول له أصكها في وجهه هاه دبريني

نجوى : اسأليه عن راكان قولي له وين راعي الجوال تلقينه واحد من الجحلط اللي يتلزقون به علشان يصرف عليهم

سهر : أنت مين أنت هاه من أنت,, وليه ترد على الجوال

راكان : نعم أنا مين أنتي اللي مين ومن تبين يوم تدقين على الرقم

سهر : ممكن أعرف أنت بأي حق تسألني هالسؤال وبأي حق ترد على جوال مو جوالك وين راعي الجوال ..هاه وينه

راكان : أقول بدينا باللكاعة الحين أنتي مستخفة ولا تستخفين دمك …

سهر : (لنجوى ) بدى يغلط هو وجهه يقول أنتي مستخفة ولا تستخفين دمك .. بالله وش أقول له هذا قليل الأدب

نجوى : جيبي التليفون ..الحين أنت يا حمار ليه ما تترك الجوال ترى والله لا نعلم راعيه أنك ترد على جواله من وراه

راكان : ( لصديقه سلطان) ياخوك شكلنا طحنا في بنات مستخفات مدري شكل أحد لاعب عليهم ومرقمهم برقمي .. ولا ملكعات يعرفون بنات من اللي كنت أعرفهم

سلطان : والله وناسة بالله عطهم رقمي ولا أحسن خل نواعدهم ..خلها في المملكة ولا الفور سيزون

راكان : ( لصديقه ) اصبر أنا أوريك فيهم .. ( للبنات ) بصراحة بصراحة صاحب الجوال هو عطاني الجهاز وقال صرف أي واحد يتصل على هالرقم ..بيني وبينك هو غرقان لشوشته مع بنت هبلت فيه وطيرت النوم من عينه وتارك الدنيا علشانها عاد هو يكلمها من رقم ثاني وهالرقم وبقية الأرقام طنشهم علشانها ..

سهر : ( لنجوى ) يا بعد قلبي يا راكان هو يحبني من قلبه موت وأنا ظلمته …الولد يقول أن راكان عاف النوم من بعدي وحالته تصعب على الكافر …وطنش كل البنات والأرقام كلها علشاني ..

نجوى : في ذمتك ..هين يا لميوه تآخذين مني خمسمية ريال على رقم صاحبه ناطله عند واحد من شلته أن ما طلعتها من عيونك ..المهم أنتي حاولي تجرجرين خويه في الحكي شوفي وش السالفة

سهر : أقول لو سمحت يعني يا أخوي يعني هو من متى يحبها ..وهو يحبها مرة ولا شوي

راكان : اوووه لهم تقريبا شهر, شهر ونص ..من هالقبيل يمكن أكثر بس ما عرفت أنا إلا من هالمدة ليه في شي

سهر : ( لنجوى) يا بعد قلبي يا راكونتي يقول من شهر أو شهر ونص يقصدني ولا علم ربعه لين حبينا بعض مرة … ودي أشوفه وأكله تبويس

نجوى : بالله دامهم طلعوا صدق كاش وراعين حب اسأليه عن صديقه فارس وش صار عليه

سهر : طيب صديقكم فارس وش صار عليه هو بعد ما حب ..ولا مشتغل في اسهمه وتارك الدنيا

راكان : ( لسلطان ) يا أخوك شكل اثنين من عيال الشفاء مرقمين برقمي وصديقه بعد فارس يقول لهم أنه في الأسهم ومدري وش يسوي بعد وفوق هذا كله قالط على رقمي

سلطان : هههههههههه يا أخوي طلبتك خل نهبل فيهم شوي قل فارس راعي بنات متعرف له على مغربية

راكان : والله بصراحة مدري وش أقول فارس هذا مو راعي حب بالمرة ..تصدقين طايح له على مغربية وكل يوم والثاني تلقينه طامر عندها في الشقة يتعشون وأنتي تدرين يعني حركات الشباب ..

نجوى: ( مو حاطة أذنها على الجوال أبد ) الخاين الحمار قليل الأدب الشرهة مو عليه على اللي تعطيه وجه أصلا بس هين والله لو أشوفه أني لا أزنطه بيديني الثنتين … وفي نفس الوقت من جوال دحيم ( فارس ) أدق على جوال سهر

سهر : وش هذا الحين الحقي يا نجوى راكان بدى يدق علي من جوال فارس تهقين خويه دق عليه ولا وش القصة

نجوى : هاتي الجوال هاتي الجوال أنا أبي أتفاهم مع هالفارس ..الو نعم …

سهر : ( لراكان ) أنت شوي بس بخليك على الهولد لا تسكر ولا أقول لك سكر وبعد شوي بدق عليك وأسكر وترجع تدق أنت علي أوكيه ..

أنا : مرحبا هلا نجوى .. وش القصة ليه معصبة وين سهر .. ( حركات يعني ما طلعت اسمها من الهاتف )

نجوى : أول عطني فارس أبي أتفاهم معه أبي أقول له شي

أنا : الحق يا دحيم نجوى تبي تكلمك من قدك

دحيم : والله أحلف .. والله وصبرنا ونلنا ..هلا حياتي كيفك ..

نجوى : حياتي قل آمين بلاّ حية تلدغك وترقد أسبوعين في المستشفى ثم تموت يا رب يا راعي المغربية ياللي ما تستحي على وجهك ليتك طالع على صديقك اللي جنبك اللي يوم حب من قلب ترك الدنيا كلها لحبيبته مو أنت اللي غرتك قريشاتك وقمت تلعب في بنات العالم وتنقل لهم الأمراض

دحيم : وش السالفة وش مغربيته ..وش القصة ممكن أفهم يعني وشو

نجوى : أرجوك أنساني ولا تجيب طاريي على لسانك النجس فاهم ولا لا يا حمار ..وخل صديقك يكلم حبيبته

دحيم : بس وش سويت ..طيب وش ..بس بس

أنا : وش قالت لك هاه ولهانة عليك مرة صح ..

دحيم : مدري يا آخي البنات عليهم شغلات غريبة خذ كلم خويتك بس …

أنا: هلا قلبي وش أخبارك وحشتيني وحشتيني موت موت

سهر : لا أنا زعلانة منك أنت قاسي مرة قاسي .. تقول لي بتعتمد على نفسك ومدري ايش من هالحكي يعني تبي تتركني بس بذوق ولا ايش ماني فاهمة ..اخس عليك بس

أنا : لا يا قلبي اكتشفت أني ما أقدر أعيش بدونك لو لحطة في حياتي ..عرفت ليه يا قلبي تحاولين تبعدين عني من قبل وعذرتك صدقيني يا قلبي عذرتك ..

سهر : وش عذرتني عليه ثانيا وش ظروفي يا قلبي ذكرني أخاف أكون ناسية

أنا: يا قلبي خلينا من ظروفك وظروفي أهم شي إحنا الآن مع بعض صح ولا لا مشتاق لك موت يا حياتي

سهر: وأنا بعد يا عمري تصدق يوم شفتك قبل فترة بالصدفة عند بيتكم خنقتني العبرة .. بغيت أنزل لك و أحضنك

أنا : بيتنا .. وش بيتنا يا قلبي ملخبطة يا عمري قصدكم عند بيتكم ترى ما صار في أسرار والله أحبك

سهر : وشو بيتنا وش عرفك ببيتنا وشلون هاه وش تعرف عني بعد قل بسرعة يالله تكلم

أنا : يا قلبي اللي أعرفه أني ما أقدر أستغني عنك ولا أعيش بدونك طول العمر أنا بس بنتظرك تخلصين علشان أتقدم لك على طول يا حياتي

سهر : حبيبي أنت شارب شي وش أخلص منه فهمني يعني …وفي هالوقت راكان يدق على سهر ..ويبقى على الويتنج …حبيبي اصبر شوي أمي دقت علي بشوف وش تبي شوي وأرجع أدق عليك واسكر ثم ترجع تدق علي

راكان : هلا والله وغلا وين تأخرتي علي وش دعوى ما أسرع مليتي مني طيب عطيني فرصة نتعرف

سهر : نجوى الحقي صديق راكان رجع يدق علي وش ناوي عليه هالقليل الأدب

نجوى : بدت حركات الشباب كل شوي بيقول لك بأقول لك شي عن خويك لحد ما ينشب لك ويقول لك أني أحبك وأموت فيك وأنه هو يخونك من وراك

سهر : طيب وش السواة وش الدبرة ابلغ راكان عنه بس أخاف يذبحه قولي وش أسوي ..

نجوى : أنا أقول لك أحسن حل تواعدينه في مكان ثم تدقين على راكان وتواعدينه في نفس المكان خليه يشوف صديقه كيف يحاول يخونه وأنتي تطلعين منها وش رأيك بهالفكرة …

سهر : ( لراكان )أقول لك أنا ودي أشوفك عندك مانع بسالك اسأله عن صديقك و أبيك تجاوبني بصراحة

راكان : هلا والله وغلا غالي والطلب رخيص بس و ين تبين ومتى .. يناسبك فندق الانتر كونتيننتال تراه هالأيام صاير صاد ماله حس لا هيئة ولا ملحطين يترززون ..

سهر : ايه مرة كويس حلو خلاص بكرة الساعة 8 المساء ألقاك هناك إن شاء الله إذا وصلت بأدق عليك جوال لا تدق علي أنت لين أدق عليك فاهم ..

وترجع سهر تدق علي …وتسكر وارجع أدق عليها

أنا : هلا حياتي وش كانت تبي منك أمك

سهر : بكرة تروح فندق الانتركونتنيننتال الاستقبال الساعة 8 أبي أشوفك هناك زين …عندك شي ولا مشغول

أنا : يا حياتي أمك تبي كذا يعني ..قصدي لو مشغول أترك الدنيا كلها علشانك يا حياتي ..أموت فيك ..

دحيم : بالله اسألها إذا أقدر أجي ولا لا

أنا : والله يا دحيم عقب الكلام اللي قالته نجوى لك صعبة ..بس بحاول .. سهر حياتي عمري روحي مدري بالنسبة لصديقي فارس أقدر أجيبه معي ولا لا يعني أخاف صديقتك نجوى

سهر : لا ما عليك لا تخاف أنا بجي مع واحدة ثانية ..بس بأفهمها حقيقة صديقك مو يقعد يتغزل فيها

أنا : مو مشكلة بيجي يوم تعرفون أن دحيم كح كح كح قصدي فارس مظلوم وأنه ما عنده ما عند جدتي ..

ومن بكرة أروح أنا و دحيم للانتركونتنينتال .. ونسنتر هناك وكل واحد موزي قارورة موية صحة في جيبه

دحيم : شف من الحين ما راح نطلب ولا طلب حتى لو جوا البنات بنحط القوارير على الطاولة يعني أنا طلبنا وخلصنا

أنا :الحين في فندق يجيب موية في قوارير وين الكيسان ..المهم ما عليه بنقول أننا ما نحب نشربها من كيسان المهم فكر معي وش بأقول لها أقول لها أني عرفت أنك بنت أبو طخه وأنك متزوجة و في مشاكل بينك وبين زوجك ولا أقول لها أني خلاص قررت أنهي هالحب بيننا بالزواج يعني أني ما أدري هي من ولا وش ظروفها ..

دحيم : أنا رأيي يعني بصراحة أنك تقطع عرق وتسيح دم ..طقها في عينها قل لها إذا تبيني اطلبي الطلاق من رجلك واعرس عليك بسرعة ولا تنسى الله يخليك تسألها إذا عندها خبر عن الطقاقة اللي اعرفها هي المغربية ولا والله مو مبين عليها يا أخي ماش حتى لهجتها لهجه منفوحيه ..والله يا هالبنات الواحد ما صار يعرف لهم

أنا : أنت خلني أحل مشاكلي في الأول بعدين أوعدك أن نجوى بنفسها تركض وراك بس أنت ما عليك

دجيم : والله يا خوفي أنها تركض على بطني المهم الساعة 8 ونص والى الآن ما جوا البنات ما في أحد هنا إلا أنا وأنت وهالاثنين المرتزين قدامنا ..وهالأجانب اللي ما يندرى وش وراهم

أنا : تصدق عاد ما خوفني إلا هالمنشيين الاثنين اللي قدامنا ما تشوف الواحد منهم تنشع منه ريحة الفلوس غير كل واحد منهم أملح من الثاني ومو مخربها إلا موقف نجوى منك

دحيم : ما ودك ندق عليهم نشوف وينهم .. بيجون ولا لا

أنا : لا يابن الحلال اصبر شوي نشوف لازم تعرف أنى أحبها صدق مو مطيور مثل أول تعرف لما عرفت ظروفها صار لازم أقدر ظروفها

دحيم : يعني وش نسوي ننطق هنا إلى متى طيب …

وفي الجهة الثانية من الصالة راكان أبو طخه وصديقه سلطان ..ينتظرون سهر

سلطان : يا شيخ واللي يرحم والديك ترى هالمهبولات ما يندرى وش قصة أبو جدتهم دق عليها شف بتجي ولا لا لو رايحين لمملكة كان أونس هناك بنات على كيف كيفك …

راكان : شف على كثر البنات اللي عرفتهم وطلعت معهم بس مدري ليه هالخبلة أحس أن فيها شي يجذبني والله لو يصير اللي يصير أني لا أجيبها واعرف قصتها من طقطق لسلامو عليكم

سلطان: طيب دق عليها الآن شف هي بتجي ولا لا تراني خست في مكاني

راكان :دقيقة خلني أدق عليها وأشوف .. هذا جوالها يرن ..

سهر : الو نعم وش تبي ولك عين تدق يعني

راكان : وش دعوى ..وش دعوى ليه الحلوين قلبوا علينا كذا افا بس يا ذا العلم ما توقعتها منك

سهر : ممكن أعرف ليه أنت داق علي الآن وش تبي مني

راكان : مو إحنا وعدنا اليوم الساعة ثمان في فندق الانتر ولا نسيتي هاه قولي لي وأنا اللي واصل قبل الوعد بنص ساعة علشانك وأنتي ولا على بالك ..

سهر : (لنجوى) معقولة يعني راكوني – تقصدني أنا عبدالعزيز – طنشني و لا راح معقولة يسويها

نجوى : والله يسويها صديق فارس لا تستبعدين عليه شي تلقينهم شافوا لبنانيات ما معهم فلوس ليموزين وقاموا يتميصلون عليهم علشان يوصلونهم ..أحسن حل تدقين على راكان بنفسك وتشوفين وش صار عليه

سهر : أدق عليه على جواله ولا جوال فارس ..هاه قولي لي

نجوى : لا جواله طبعا علشان يعرف أنك ضحيتي وسددتي فاتورته كود يستحي على وجهه شوي

سهر : ( لراكان ) أقول أنت اصبر شوي بشوف السواق وأرجع أدق عليك وأسكر طبعا أنت صرت عارف شغلتك بترجع تدق ترى إذا ما ودك تدق على كيفك منت مغصوب … وتدق سهر علي أنا

أنا : ( لدحيم ) جوالي يرن جوالي يرن ألحق علي يا دحيم جوالي صار يرن رجعت له الروح تهقى الملك سوى مكرمة وقرر يسدد الفواتير عن الشعب ولا وش القصة ولا كمين من الاتصالات علشان يعرفون وين موقعي ويزقطوني علشان أسدد بالقوة

دحيم : رد شف بالله منهو أخاف الوزير يقول سامحناك ما نبيك تسدد ولا يمكنك فايز بأحد هالمسابقات أمهات 700 كود واحدة منهم تطلع صدق مو بس خرط على الفاضي ..

أنا : لا وين هذا رقم سهر غريبة تهقى أنها عميلة سرية للاتصالات

دحيم : يا بنت الحلال ألا أبوها عنده أسهم في الاتصالات له كلمة في الشركة رد عليها بس وشف وش تبي

أنا: هلا حياتي كيفك وينك الله يهديك الساعة ثمان ونص تأخرتي علي يا قلبي

سهر : أتركك مني الحين ما في شي غريب حولك في الفندق طالع زين يا عمري

أنا : لا والله يا حياتي ما في شي الأمن مستتب حتى أنا وفارس نشرب عصير كوكتيل حتى أسمعي حتسس حتسسس نشفط شفط

سهر : ( لنجوى ) وجع وش السالفة الحين قدام بعض ولا يشوفون بعض وش الطاري ( لي ) حياتي تمقل زين ما في أحد تعرفه الله يخليك شف زين

أنا : يا قلبي لحظة أشوف ما في إلا أجانب واثنين مشخصين معطينا مقفاهم بس هذولي كل اللي موجودين هنا

سهر : ايوة ايوة هم تمقل زين يا بعد قلبي شكل شوفك رايح فيها ألبس نظارات خذ دربيل أي شي ناظرهم زين أقرب منهم أكيد بتعرفهم زين يا قلبي يالله باي يا قلبي

أنا: وش السالفة والله أني دخت الحين مدري هالبنت سكرانة ولا طايحة من فوق الدرج

دحيم : وش السالفة تبينا نطمر للشيراتون بعد ولا نروح البطحاء ولا نجوى اكتشفت أني كافل روسية بالسر ولي علاقة غير شرعية فيها

أنا : لا تقول لي تمقل زين في الاثنين اللي قدامكم أكيد بتعرفهم … طيب هي وش دراها أن في اثنين في نفس المكان و وش بيدريها أنني بأعرفهم والله عقلي بيطير من هالبنت ..بالله رح وقف قدامهم كأنك مضيع شي ولا طايح منك شي

ويقوم دحيم يشوفهم ويوقف في وجههم ويتمقل فيهم من فوق لتحت ( حركات عيال السويدي إذا خربوها ) ويرجع لي

دحيم : والله ما عرفتهم يعني هي ما قالت لك يمكن لاعب كورة ولا مطرب ولا دبوس الصراحة كاشخين

أنا : لاعب كورة ..هي وش بيعرفها بلاعب كورة جاي يتقهوى في الانتر لحظة ننادي جيرسون ونسأله ..يا جيرسون

الجيرسون : يس سير وات دو يو وانط

أنا : بليز وي وانت تو نو هوار يو,, ليستن هو ار ذيس تو بويز هو ار كاشخين ؟؟

الجيرسون : وات سير واط دو يو ساي هازا أكيد في كاميرا كفية فني سير فني سير

أنا : لوك لوك فيري ويل ذيس هو تو هو ار ذيس تو

الجيرسون : سوريسير أي دونت نو هو ار ذاي

أنا : اوكيه اوكيه ثانك يو … الحين يالدعلة وش بنسوي تهقى نسويها ونقوم نسألهم من أنتم … وشوي ويدخلون شباب وتوهم بيجلسون ويشوفون الاثنين ويطمرون لهم يسلمون علهم

الشباب : هلا والله بالقاطع هلا والله باللي ما ينشاف هلا براكان ولد أبو طخه الحبيب القاطع يخوى من يوم رجعت من بيروت وأنت لا حس ولا خبر يعني لازم نصير بنات علشان تعبرنا

دحيم : سمعت سمعت هذا راكان أبو طخه أخو ليلى خويتك قصدي سهر ولا ليلى والله مدري وش أسمها

أنا : هذا هو ما غيره أخوها ..طيب وش قصدها يوم تقول تمقل زين في اللي جالسين هناك ..

دحيم : شكل البنت يوم وصلت هنا شافت أخوها فقالت العطة يا بطة وبغتك تعرف السبب وتعذرها

أنا : لا ليه ما يكون قصدها أني مثل ما كلمت أبوها ورفضني وكرشني أني أكلم أخوها واثبت لهم أني ما راح أتنازل عنها مهما يكون

دحيم : وش تكلم أخوها وش تقول له على الأقل ذاك شايب وما فيه حيل طقاق بس هذا والله أن يعفجنا عفج

أنا : أقول خل عنك بس هذا نداء الحب نداء القلب هذا العشق الحقيقي أنا بعون الله بايعها بايعها ..

دحيم : يا خوفي أنها هي مرسلته علشان ينتفك تنتيف شكله راعي شر يخوف والله

أنا : أقول توكلنا على الله بس ..هي خاربة خاربة خلينا نعميها ..وأنطلق جهة ولد أبو طخة وهو وسط ربعه وأقول له.. لو سمحت يا أخ ممكن كلمة على انفراد …

راكان : نعم وش تبي ومن أنت أول

أنا : أنا واحد وعما قريب جدا بأصير واحد من العائلة ..

راكان :أي عائلة وش تخربط أنت وش تبي أخلص علينا مو فاضي لك إذا عندك كلام تبي تقوله قله الحين قدام الشباب

أنا : اوكي على هواك أسمع أنا أبى أتزوج أختك وبصراحة في قصة حب بيني وبينها ولازم نختتمها بالزواج ..

راكان : وشو ..كل تبن بس وش تبي تتزوج أختي وفي قصة حب بينك وبينها أنت شارب شي

أنا : ايه بس موية .. المهم نرجع لصلب الموضوع ياليتك تصير رجال وقد المسئولية وتوقف معانا أنا وأختك

راكان : أنت أن ما سكت ترى بقوم أتوطى في بطنك أنت وش يعرفك بأختي يا ابن ال……. ( محذوف للرقابة )

أنا : مو شغلك المهم لازم تعرف اللي بيننا حب صادق شيء أسمى من أنك تفهمه

راكان :أقول شباب قوموا عليه هذا باللي بأنتفه تنتيف …

دحيم : رجاء خاص أنا اللي بأوصله للمستشفى فياليت ما أحد يتعرض لي توني مخلص من كسور وطيحات

ويقومون الشباب علي ومعهم راكان ويطقوني طق .ويكسروني تكسر ويسحبني راكان معه في سيارته ودحيم يلحقه

دحيم : يا الأخو يالحبيب عنك التوصيل من مسئولياتي

راكان : أقول بتنطم ولا أجي أكوفنك معه الآن أنا بأشوف وش قصة خويك هالسكران بأخذه للبيت و أتأكد من كلامه

دحيم : يابن الحلال خذها مني كل كلامه صدق حتى بالمارية أختك داقة عليه من شوي والله أن أختك تحب الشر

راكان : وشو يالهيس أجل أنت بعد تقول أن أختي تعرفه لا بارك الله فيه ولا فيك ..تعال يابن ال…. معي

ويلقطونا ربعه وفوق ما طقوني رجعوا طقوني مرة ثانية بس هالمرة مع دحيم وحطونا في شنطة سيارة راكان وينطلق بنا لبيتهم و ما وعيت ألا أنا في صالة بيت شكله فخم والأرضية رخام شكله والله أعلم بيت أبو طخه

راكان :يبه يبه شف تعال شف هالحمار اللي يتطاول على أختي لا ويقول أنهم يعرفون بعض ويحبون بعض من زمان

أبو طخه : هذا بعد ما وده يتوب هالولد .الحين يالهيس ما طردتك من بيتي وقلت لك لو أشوف رجلك معتبة مرة ثانية أني لا أقطع رجلك ..وش جابك

أنا : والله يا عمي ما جيت بكيفي توصيل سريع هوم ديليفري ..ولا وش بيجيني بهالحالة كأني بيتزا محيوسة ..

أبو كخه : انطم لا بارك الله فيك من بزر تستهتر بأعراض الناس ..وين لقيته يا راكان لا يكون يدور حول بيتنا

راكان : لا لقيته في فندق وجالس يقول أنه مواعد أختي وأنها جالس ينتظرها ..وبعدين أختي تبيه يكلمني ويفاتحني في موضوع حبهم ..تبيني الحين يا يبه أذبحه بس ..

أبو طخه : لا عنك يا ولدي أنا ناوي افرمه فرم .أنت يالهيس تأخذ حبوب صارحني أنا حسبة عمك

أنا : لاحول ياربيه يا عمي والله وش فيك علي اسألوا البنت يعني كله طق طق حطوا فاصل إعلاني على الأقل

أبو طخه : شف لا تجيب اسم بنتي ليلى على لسانك هي الآن مع رجلها فهد في غرفة الضيوف يتفاهمون الله يصلح بينهم يارب يا راكان خذهم اربطهم في الحوش قبل لا يطلع فهد رجل أختك ويلقاهم ..

وفي هالاثناء .. يطلع وشاب وشابة من أحد الغرف وهم يصارخون ..

البنت : أقول لك طلقني طلقني يا أخي الحياة معك ما تطاق ما تقدر الحياة الزوجية ولا تعرف شي في الرومانسية في النهار في العمل وفي العصر يا في مكاتب العقار يا تطارد في الأسهم .يا أخي الفلوس مو كل شي

الشاب : يا ليلى أفهميني وش تبيني أسوي يعني أرمي هالفلوس وأهملها لا تنسين أنها فلوسي وفلوس أبوي وأخواني ولا تبيني أترك هالملايين للغرب يلعبون فيها

البنت : هذا اللي أنت فالح فيه الملايين وش أسوى فيها تدري لو بيدي حرقتها كلها اصرف أبى أحس انك تحبني وتموت فيني بس أنت و لا تحس

الشاب : يا عمي شف لك صرفة في بنتك هلا راكان ..وش أخبارك من زمان عنك إلا من الأخوان اللي مرمين في الأرض اللي كأنهم ذبايح في عيد الضحية

راكان : هاه هاه وشو لا و لا شي هذولي عمال لنا ما سووا شغلهم خذوا الفلوس و يبون ينحاشون

أنا :آه وش عماله يا أخوي من اللي انطق فينا أنا ولا أنت,أنا المفروض اللي أني فقدت الوعي أنا اللي أبي أتزوج أختك

الشاب : يتزوج أختك وش يقول هذا ممكن أعرف

أنا : لاحول حتى أنت بتعصب

دحيم : عبدالعزيز ممكن أعرف وش توقعاتك ..بننطق و لا لا تصدق عندي إحساس كبير إننا بننطق أراهن على كذا بخمسين ريال أنت وش تقول

الشاب : يا عمي فهمني هالخبل وش يقول وليه راكان يقول هم عمال مع أنهم سعوديين

دحيم : يا أخي أنت وش فيك ما تحب السعودة .. عبدالعزيز سجل اسمه هذا اللي يحارب السعودة

أبو طخه : يا ولدي القصة وما فيها يعني مدري وش أقول لك هالبثر مدري من وين الله بلانا به

أنا : شف أنا أحب بنتهم وهي تحبني وبيني وبينك هي بتتطلق من زوجها وبأعرس عليها بس مدري هم ليه معترضين بذمتك معاهم حق

الشاب : زوجتي تبي تعرس على زوجتي ..وأنتي هذا اللي تبين تتطلقين علشان سواد عينه وش رأيك ما فيه طلاق لو تموتين لو يطلع الشيب في رأسك

البنت : تدري وشلون عاد ايه أموت فيه على الأقل رومانسي ويقدر المشاعر مع كل الطق اللي جاه ولا فكر ينساني ولا يتنازل عني مو مثلك ساعات تنسى أسمي ..ياليتك اعتبرتني قطعة أرض من هاللي تشتري وتبيع فيهم

الشاب : سامع يا عمي سامع يا راكان هذي بنتكم عيني عينك لا وتقول أنها تحبه

أبو طخه : وش هالحكي يا ليلى وش تحبينه أنتي من متى تعرفينه يا بنتي وش تخربطين

البنت : ايه أحبه شوفوا وش تحمل علشاني مو اللي أنا عنده ولا سمعني ولا كلمة حلوة من كم سنة

دحيم : ( لي همسا ) عزيز ما تحس أن صوتها مختلف عن ذيك المرة مو نفس الصوت الأول مو غريبة هالشي

أنا : ( لدحيم ) يا بن الحلال أنت عمرك شفت بنت تكلم ولد بدون ما تنعم صوتها أنا مو قاهرني اللي جسمها وشلون تلعب فيه ما تلاحظ أنها أسمن شوي و أطول شوي بس مغطية وجهها ..تهقى أنها كانت ترسل صديقتها عنها

الشاب : ممكن أعرف كم مرة التقيتوا وكم مرة تكلمتوا وكم مرة طلعتوا مع بعض اعترفي اعترفي

البنت : مو شغلك ..والحين عقب ما سمعت يالله خلك رجال وطلقني …

أبو طخه : انطمي لا بارك الله فيك وأدخلي أما أنت يالهيس باقتلك وأدفنك هنا في البيت .. ولا أحد راح يدري بك

دحيم : لو سمحت ممكن سؤال يعني بتقتله على طول و لابتطقه قبل .مو عن شي بس ودي أتطمن على صديقي

راكان : لحظة أجيب السلاح … جابك الله يالكلب موتتك على يدي

أنا : ( لزوج بنت أبو طخه ) أنت أنت انحش بيقتلونك أنحش تراهم ما يمزحون اسألني ما تشوفني جلدي كله ملون من طقهم ..قشران الله لا يوريك ..

الشاب : عنك يا راكان موتتهم على يدي هو وصديقه ..أنت يالحمار تحكي كذا عن زوجتي وقدامي ..وتبيني أسكت لك صدق أنك ما تستحي

دحيم : شف يا عمي أنا بحكم أني صديقه يعلم الله أننا ما كنا ندري أنها متزوجة ثانيا قصدنا شريف جايين نخطب يعني نفتح البيبان من بيوتها قصدي البيوت من بيبانها

أبو عطة : أنت أنطم وعلى فكرة ترى بقتلك معه وبأدفنك جنبه علشان أنهي هالسالفة كلها

دحيم : لا إذا كذا مع أنه صديقي وعشرة عمر بس الحق ينقال أنه كلب وراعي حريم وداشر أعوذ بالله منه شيطان الله لا يبلانا تبي أدفنه أنا مستعد

ويجي راكان معه الفرد ..وهو متحمس

أبو طخه : هات الفرد وأنا أبوك بقتل هالحمار

الشاب : عنك يا عمي عنك خلني أنا اللي اقتله

دحيم : عبدالعزيز دامك ميت ميت بتزعل مني لو قتلتك يا أخي أحس مسكت المسدس شي

البنت ( ومعها سكينة ) : ترى والله أن قتلتوه بأقتل نفسي وراه إذا تبوني أعيش خلوه يمشي ويروح

الشاب : شفت يا عمي وبكل بجاحة تقولها .تخافين عليه يا مدام وش رأيك أني بأقتله وقدامك الآن

البنت : والله العظيم لو أحد منكم يلمسه أني لا أحط السكين في صدري . خلوه يروح في حال سبيله

أبو طخه : يا بنتي بس ..هالحمار ..لازم من يقطع لسانه لعب عليك وخلاك تطلبين الطلاق من زوجك

البنت: أنا تمنيت الطلاق من ثاني شهر في زواجي ما ادري وش وظيفتي في بيت اللي اسمه زوجي نتقابل في الأسبوع مرة ولا مرتين حتى النوم أنام واصحي وهو ما شرف حضرته

أبو طخه :طيب يا بنتي بنخليه يمشي بس ارمي السكين الله يرضى لي عليك وكل شي تبينه بعدين بيصير لك

البنت : لا أول خلوه يمشي ويروح ثانيا خل فهد يطلقني مليت من حياته وشغله اللي ذبحني به

أبو طخه : خلا ص يا بنتي شوفي بنخلي هالولد يروح بس الطلاق عطي نفسك وعطي زوجك فهد فرصة تفكرون شهر ولا شهرين مو مشكلة يمكن يندم و تتراجعين ترى الطلاق أبغض الحلال يا بنيتي … وش قلت يا فهد

الشاب : أي والله يا عمي أبغض الحلال أنا موافق و اوعدها بعد المهلة لو تبي الطلاق أني بأنفذ رغبتها

البنت : خلاص موافقة بس خلو هالولد وصديقه يمشون مسكين علشانه يحب بصدق تسوون فيه كذا

أبو طخه : خلاص يا بنتي ولا تزعلين ..أنت يالوجه الودر أنت قم خلاص أطلع برى بيتي وخذ معك صديقك .. وش فيك ما تسمع الكلام يالله قم وفارق

أنا : دحيم الو الو حوّل مدري اسمع أصوات هي بعد الموت ولا أنا إلى الآن حيّ وينك

دحيم :علم علم لا مازلت على قيد الحياة بس ودنا نستفسر في طق بننطقه ولا نطلع كذا على طول

أبو طخه : وش تنتظرون يالله طسوا لا بارك الله فيكم بس اسمه يالهيس الأربد أن شفتك موطوط حول بيتنا ولا رافع جوالك على بنتي ولا متكلم عنها قبل ذبحتك وأكلت لحمك للكلاب .. أذا في نصيب لك ببنتي ثق تماما إحنا بنجيبك للبيت وبنفسي بزوجك بنتي وأن شاء الله هاليوم ما يصير فهمت كلامي زين ولا لا

أنا : فهمت والله العظيم فهمت … طال عمرك يعني قد قلت لي كلام من قبل ولا فهمته

وما وعيت إلا أنا و دحيم نطير بدون بساط سحري ولا شي بس ما طولنا على طول سلفحنا ( سلفحة = يدبج ويدبج معناها يصطدم بشي ويحدث صوت ) على الشارع

دحيم : يا أخي إحساس سوبر مان إذا طار رهيب من جد الحمدلله على السلامة ما مت

أنا : الله يسلمك ولا تبي تقتلني مالت عليك …المهم يالله خل نمشي للبيت

دحيم : طيب وسهر قصدي ليلي اللي هي بنت أبو طخه وش بتسوي معها

أنا : ما راح أكلمها ولا أفكر فيها لين يخلص الشهر ونشوف وش يصير والى هالوقت لازم الواحد يمسك أعصابه

تتوقعون أن عبدالعزيز بيصمل ويصبر عن سهر هالشهر ولا لا ووش بيصير تبون تعرفون تابعوا معنا الجزء الثاني

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة