قصة حبة فوق – الجزء الأول

قصة حبة فوق – الجزء الأول كاملة مكتوبة

في قايلة من قوايل الرياض الجميلة وقت الصيف وبالتحديد في الملحق ( أهله مسافرين ومقفلين البيت وتاركين المفاتيح عند مرة الجيران لأنهم ما يثقون فيه ) وأنا منسدح مع صديقي دحيم نتأمل في الحياة ويقال لنا بنقضي وقت بعد العصر ..
أنا :تدري يا عزيزي يا دحيم وش ودي فيه ..
دحيم : أكيد تبي تشتغل .. صح ولا لا
أنا : غربلك الله الحين شفت عمرك واحد مثلي خريج جامعة يشتغل شغلة صيفية وأساسا هو ما عنده دوام بس مسنتر مع طلاب الثانوية وش رأيك أكيد يبي شغل بس مو هذا اللي ودي الآن أفكر في شي ثاني

دجيم : أكيد تبي تعرس .. صكيت ال25 وتوك عزوبي الواحد خلاص ما يقدر يستحمل

أنا : أقول أنطم بس وش أتزوج الآن توني أقول لك على وظيفة صيفية يعني وش أسوى بها في الصيف أجيبها عندي وإذا بدت المدارس أرجعها لأهلها يا أخي فكر بعقلك مو تصير دلخ

دحيم : بس أجل ودك تغير سيارتك وتشتري سيارة جديدة البي ام الجديدة تطير العقل مو سيارة إلا طيارة ماشاء الله

أنا : أقول يا دحيم أطلع بس من بيتنا أطلع مالت عليك وعلى اللي يضيع وقته يتناقش معك أنت كفو من يكلمك أصلا

دحيم : تراك غثيتنا بهالمترين وبيتنا وبيتنا اللي يسمعك يقول مدخلني مجلسكم ولا نسبح في مسبحكم ترانا في الملحق أحمد ربك أني جالس معك ولا من يتحملك ويتحمل ريحة ملابسك اللي مالية الملحق ..أخلص بس وش ودك فيه تراني ما تغديت وما أقدر أفكر

أنا : يا أخي ما تشوف خويلد ولد أبو صالح خوينا ما غيره ..وش صار فيه

دحيم : وش صار فيه عسا ما شر ..

أنا : أي شر أي بطيخ ..تذكر يوم يجي يتسلف مننا قروش علشان يسدد فاتورة جواله ولا يتلزق فينا إذا رحنا نتعشى علشان نعشيه ..أمس شفته يا هو قهرني تصدق فاتورته واصلة 3500 ريال ومسددة بالكامل ..

دحيم : اوووف 3500 ريال وسددها .. من وين له أخبر أبوه اقعط من القعاطة نفسها وهو ما اشتغل في الصيف أصلا وآخر مرة شاف إخوانه الكبار قبل أربع سنين

أنا : لا تقهرني الله يخليك ..ابن اللذين متعرف على واحدة بنت طخاطيخ بنت نعمة ..تدق عليه من جوالها الثالث و إذا دق عليها من جواله هي تسدد عنه ..تصدق هي الحين في ماربيا وتخليه يدق عليها و تاركه له 5000 ريال علشان يسدد فاتورته .شفت هالقهر خويلد هاللي ما يعرف يقول كلمتين على بعض طايح في عز لا واللي يرفع الضغط أمس تسأله قدامي أي والله قدامي على الجوال تقول وش تبي أجيب لك من ماربيا .. المشكلة أنها ما تدري انه ما يعرف ماربيا هذي وين علشان يطلب منها طلب ..وهو يتميصل ويقول على ذوقك يا حياتي ما يقول مشكورة لا وتبي أذبحك بعد تقول له كم مقاس بنطلوناتك ..يرد عليها ما أدري ..بغيت أقول لها أشتري له طواقي ويخب بعد بيتشرط هو ووجهه شفت وش قاهرني . خويلد مطيح على هالعز وأنا مقابل خشتك ..

دحيم : عبدالعزيز رجاء عن الغلط أنت قلت لي وش اللي قاهرك بس سؤالك كان وش ودك؟ لا تخلط بين الشغلتين

أنا : أبي أتعرف على بنت مو أي بنت أبي واحدة أقل شي اقل شي عند أبوها مليار ريال ..

دحيم : يابن الحلال وش فرقت أهم شي بنت .. تسهر معها الليل وتجلس تواعد فيها

أنا : وش أهم شي بنت أنت ووجهك يا أخي أكبر خل عندك طموح .أصلا من شفتك قبل العام فرحان مرقم لك واحدة في عرس بنت خالتك وتطلع الطقاقة وأنا غاسل يدي منك

دحيم : أولا وش دراني أنها طقاقة أنا كنت جالس عند الباب آخر الليل أنتظر أمي وهي الوحيدة اللي يوم ابتسمت لها وهي طالعة ما كشرت ولا هاوشتني بالعكس ابتسمت لي ورقمتها وخذت الرقم …

أنا : والطار جعلهم يصبخونك بطار على رأسك البنت قدام عينك طالعة بالطار قدامك ما شكيت أنها طقاقة

دحيم : كانت الدنيا ظلام ما طرى في بالي أنه طار توقعت أنها صينية حلاو . ولا موديل جديد من الشنط وش يدرين ..

أنا : مالت عليك بس ..المهم يا أخي لما تحب بنت عز تنغنغك ترفعك فوق تطيرك فوق السماء غير لما تحب بنت عادية من نظام دقة وتسكر ..بنات العز ما يدقون ويسكرون هذا أولا .ثانيا كل يوم هدية يا عيد ميلادك يا مناسبة الفالنتاين ..يا شافت شي واشتهته لك .. بنات العز فري يا قلبي مو تنتظر السواق يرجع أمها وبعدين يودي أختها الكبيرة بعدين تقدر تطلع ..عندها سواق بروحها و سواقها رهيب لو تركب معها في السيارة ماهوب يخالف آه يا بنات العز وان طحت لك على واحدة مرة أبوها ما يحتاج في الصيف ابشر بسعدك تذاكر و أقامه في الفندق ببلاش مو تقابلها في شارع الحوامل وتمتير ورى بعض كأنكم في ماراثون ويا ويلك لو طلعت لك الهيئة .

دحيم : يابن الحلال خل عنك الأحلام بس ..الحين دبر لك بنت تكلمك وتعطيك وجه بعدين فكر ببنت نعمة على قولتك

أنا : ترى ما جابنا ورى ألا أنت وإشكالك يا أخي خل عندك طموح ثانيا ..وش ناقصنا الحمدلله البنات على قفى من يشيل ..اوكيه كون علاقتك السابقة كانت مع طقاقة و أنا مع بنت في المتوسطة جوالها سوى وما تصدق على الله أني أدق عليها بس في الأخير اسمهم بنات وش يفرقون عن الباقيات هاه فهمني …

دحيم : هذا أنت قلتها طقاقة علشان أكلمها يبغالي لي مواعيد وقت الإجازات مش خشمك ووقت الأيام العادية تصحى العصر وتنام بعد الفجر وحالة ..وأنت بنت المتوسطة علشان تشوفها تسنتر قدام باب مدرستها كأنك سواق .. ثانيا البنات ما يبوننا يبون واحد طول بعرض وسيم أبيضاني مطخطخ ولد عز سيارته أزفت شي أزفت شي بي أم ..مو أشكالنا ..أنت دوامك صيفي وأنا أعبي أكياس في بنده ..

أنا : شف أنت خلك من المهاترات وكسر المجاديف ..أهم شي العزيمة

دحيم : وساكت ..في أحد عازمنا وأنت ساكت ما تقول يالله خل نقوم

أنا : يا شين انثبر من يبي يقابلك احمد ربك أن الدنيا مقفلة بيبانها في وجهي علشان أقابلك شف أنا قررت أبيعها لو وش يصير لازم أتعرف على بنت نعمة ..

دحيم : طيب وش بتسوي فهمني ..بتسافر وراهم في باريس ولا لندن … ولا بتطق خيمة في جنيف

أنا : يا شينكم يا عيال الفقر لا انقهرتوا من الأغنياء .مطلعينهم ناس متبلدين إحساس يعني مرة من أول الصيف لآخره برى لا ترى فيهم ناس كشخه يحبون السعودية وفيهم ناس عندهم شوية ظروف اللي جدته مريضه واللي حامل وبتولد واللي عنده عسكرية ولا اللي ملوا من السفر تصدق عاد في ناس ملت من السفر الله لا يبلانا بس ..

دحيم : طيب وبعدين وش الخطة فهمني ..تراني تحمست

أنا : جب جوالك أنا أعلمك وش الخطة

دحيم : وش بتسوي بجوالي لا توهقني ..

أنا : شف الناس الهاي يحبون الأرقام المميزة يدفعون اللي قدامهم واللي وراهم علشان يشترون رقم مميز خصوصا البنات تشب في أبوها لين يشتري لها جوال ابو كاميرا برقم مميز .. فاللي بنسويه الآن بنسمي بالله ونختار رقم مميز مثلا 05555055055 وبعدين بنرسل لها مسج حلوة غرامية بعدين إذا هي في الرياض وزهقانة بترد عليك ولا مسافرة ومعممه جوالها ومشتاقة للسعودية بعد بترد عليك والله ما طلعت بنت ولا عندها واحد تحبه ومسوية فيها أخلاق ما تخونه ما راح ترد عليك فهمت الحين

دحيم : لا يا أخوي أخاف أتوهق أرسل لها من جوالك أنت وش فيك مو خطتك

أنا : يابن الحلال هي كذا ناس الله خلقها تفكر وناس تنفذ أفكار الناس الثانيين لا تخرب الخطة سو اللي قلت لك وبس

دحيم : الله يستر ..طيب وش أرسل قل لي

أنا : أكتب ( اشتقت لك ..اشتقت لظلمك قبل عدالتك …أنتي اللي بعيد مهتني وأنا اللي هنا منتظر ) وسم بالله و أرسل ..وشوي ألا تجي دحيم رسالة ونفتحها ( من قال أني بعيد عنك مهتني أنا والشاهد الله ما جفت دموع عيني ..يا ظالمي في الهوى ليتك مرة تسكن قلبي وتشوف وش فيني ) ..

أنا : يا ولد يا ولد والله وباضت لك في القفص يا دحيم يا ولد أم دحيم هذا الحظ ولا فلا ..يلعن أبو أبليسك ناس ترسل مسجات ولا يجيها رزق وأنت من أول محاولة يالله يالله

دحيم : وشو أرسل رسالة ثانية ..

أنا : وش رسالته يا أخي تطور خلاص توكل على الله ودق ..

دحيم : لا أخاف وش أدق وش أقول الدعوى تخوف …

أنا : يابن الحلال شف بينك وبين باب سعدك وحظ دقايق أن ما كانت ثواني ..يا دحيم فكر في الفواتير المدفوعة .فكر في الهدايا اللي بلا حسيب ولا رقيب يا أخي فكر في المواعيد اللي في بيتها ولا في مزرعتهم …

دحيم : طيب وش أقول لها يعني كيف الحال علمني كيف اتصرف

أنا : لحظة أدور مجلة شعر علشان تقرا منها لها كم بيت ..يا أخي المجلات إذا احتجت لها ما تحصلها ..ايوة شف قل لها من بعدك عرفنا طريق الذهب ..يا منصور الاتي من بعدك صاير عجب ..

دحيم : صاحي أنت أقول لها شعر مكتوب في منصور البلوي والاتحاد والله أن تردع ( تردع = يسكر بقوة ويطلع صدى لتسكيرة السماعة ) السماعة في وجهي

أنا : يابن الحلال بنوتة وش بيعرفها في الكورة والخرابيط ولا منصور والاتي أهم شعر والسلام وسع صدرك

دحيم : والله بطني ماغصني يا عزيز مدري ماش .. يعني سمعت قصص بس مو بهالسرعة أشك في شي

أنا : يا دحيم فرصتك تلقاها توها متزاعله مع خويها ولا أكتشفت أنه يخونها ولا واحدة رومانسية تحلم بواحد رومانسي مثلك تصدق أني أشوف الرومانسية تقطر من عيونك ..تسح سحيح حشا دموع ماهي رومانسية يالله أتصل يا روميو

دحيم : طيب الله يستر .. ويرن التليفون ويرد رجال ..

الرجال : هلا وغلا بنور دنياي

دحيم : رجال يا عزيز رجال ..وش أقول له والله التوهيقة …هاه تهقا أنه أخوها

أنا : وش أخوها الله يهديك .الموضوع حصل فيه لبس ..تصرف عادي كأنك غلطان ..

دحيم : الو من تبي بيته ..

الرجال : الحين يا ابن الكلب أنت اللي مرسل لي المسج من شوي هاه أنت .. جاوب أنت ولا مو أنت

دحيم : ( رمى السماعة على الأرض ) عبدالعزيز تصرف قام يهوش …

أنا : ألو الو سم طال عمرك .وش صار

الرجال : لا يا قليلين الأدب وتلعبون بعد لا بارك الله فيكم هين دواكم عندي ..

أنا : لا طال عمرك هذولي البزارين كانوا يلعبون في الجوال ..يا ولد وخر أبعد عن سلك الكهرب ..يا ولد أترك الريموت

الرجال : شف بأسكت هالمرة لكم بس والله أن شفت رقمكم مرة ثانية في جوالي أن تشوفون شي ما شفتوه ..

أنا : وين طاش ما طاش الحلقة الأخيرة ..بس يا ولد لا تتريق على عمك .ترى ذا عمك وتاج رأسك .يالله طال عمرك وآسفين على الإزعاج بس بزارين لا تؤاخذهم الله مير يسلمك …. طاع ( سكرها في وجهي )

دحيم : وش صار بيلغ عنا الشرطة ولا بيقطع رقمي … الله لا يبارك فيك ولا في أفكارك الحين وش بيفكني من أبوي إذا استدعتني الأمارة والله أني رحت ملح الله يلعنك ويلعن البنات كلهم

أنا : وش فيك قو قلبك ما صار شي ..خلاص عدت على خير المهم خل نفكر بطريقة ثانية نتعرف فيها على بنات عز

دحيم : يا أخوي فكني من شرك .ما أبى بنت عز طقاقتي تكفيني وأن ما حصلت أحسن بعد ما تسوى علي روعتي من شوي ..والله أن قلبي صار في … ( كلمة محذوفة عيب بس هو شي بس موجود عند الأولاد )

أنا : صدق يوم الشاعر قال قد فاز باللذات من كان جسورا ومات بالحسرة وش أسمه اللي توزى في حجر أمه

دحيم : أنت الحين وش تبي وش ناوي عليه بصراحة ..

أنا : شف أحنا حاولنا نستدرجهم لين عندنا بس ما نفعت الخطة ..ما عاد بقى لنا ألا الهجوم ..يبيلنا نهجم عليهم .

دحيم : واللي يرحم والديك أحنا ناقصين أنت ووجهك يوم نهجم وما نهجم تبيهم يطلعون صورنا في الأخبار ويقولون إرهابيين ولهم علاقة بالقاعدة عزيز فيك شي صارحني .. ( صارحني كلمة ما تنقال بين الشباب إلا في شي كايد وعواطف جياشة بالحيل )

أنا : ما عليك أنت المهم يا دحيم كم عندك في البنك

دحيم : الحساب الجاري ولا الوديعة .. ولا محفظة الاستثمار حقتي ولا تبي اللي مشتري بهم أسهم … من وين لي كلهم ألفين وخمسمية ريال .. والظاهر عشرين هللة دايما أشوف رقم بعد الفاصلة ولا أدري وش معناته

أنا : حلو وأنا معي أربعة آلاف وشوي ان شاء الله تكفي …

دحيم : تكفي لايش ووش ناوي تسوي … بتستأجر سيارة فخمة وتجلس تدور بها في شارع التخصصي والعليا

أنا : صدق أنك متخلف استأجر سيارة وبعدين فرضا ما في واحدة عطتني وجه ولا تسلطت علينا الدوريات والرخصة والاستمارة وقدام أمة محمد أنت مستأجر السيارة أجل لا يا حبيبي أنا تفكيري غير ..المهم يالله بس بعد المغرب بنطمر نشتري شمغ جديدة وطواقي و مسابح …

دحيم : ليه جاء العيد .أجل يبيلنا نمر الحلاق أول .عسا ما يكون زحمة بس

أنا : تستهبل أنت ووجهك .طبعا لازم نروح الحلاق .بعدين نروح نستأجر جوالات أمهات كاميرا من خوينا وليد في مجمع الاتصالات وبعدها نطمر على فندق المملكة ..

دحيم : لا يا أخوي وش يودينا للمملكة ..غالي حيل .. ودنا شي رخيص شوي

أنا : الشرهة علي أني أكلمك وأبى مصلحتك صدق مو راضي تتطور يا أخي طقاقتك تخب عليك ترى بعد ..أنت كفو أصلا تحب ولا تنحب .صدق واحد ما عندك طموح …

دحيم : وشو لا يا أخي بس يعني مدري وشلون ..خايف بعد ذا التعب كله ما نطلع بشي

أنا : أنت ما عليك بس اسمع كلامي وأبشر بسعدك ..في الصيف في الرياض وين بيروحون يعني ملاهي الحكير لا مالهم إلا هالفنادق يترززون في مطاعمها .. يا والله بنطيح في بنات يا أبو داحم شي يرد الروح صدق ..

المهم من بعد المغرب فرفرة من الحلاق و محل الملابس الرجالية ومرينا مجمع الاتصالات ..ورجعنا للبيت وتسبحنا في حمام الملحق ..صدق ما فيه دش بس فيه شطاف يقوم بالغرض وننطلق بالسيارة لفندق المملكة …

دحيم : عزيز ما تعتقد أن سيارتك مو راكبة على المكان يعني فندق الفور سيزون وكشخه ومنحشرين في صني 88 ما أنت معي في هالشي ..

أنا : شف معك حق بس شي على حساب شي ثانيا إذا ضبطت الأمور أن شاء الله وتعرفنا على بنات مطخطخات هم بيركبونا في سياراتهم صدقني مو مشكلة المشكلة الآن كيف نوصل لهم وهذا شي أشوفه قدام عيني قريب ..ولما قربنا لبرج المملكة ويجينا تفتيش ..

الضابط : الرخصة والاستمارة وافتح الشنطة …

أنا : أبشر الله يسلمك هذي الرخصة والاستمارة .. وهذي الشنطة فتحناها .

الشرطي : شباب انتبهوا شكلهم إرهابيين معهم كرتون وكيس أسود كبير .. استعدوا ..نزلوهم من السيارة ..

دحيم : وشو والله مالي دخل بهالسالفة هو اللي يقول خلنا نهجم عليهم مدري ايش والله أني بريء اقسم برب البيت

الشرطي : أنت وش اللي في الكرتون هاه متفجرات هاه أعترف …

أنا : أي كرتون وشو طال عمرك خلني أشوفه يمكن أذكر مدري والله وش القصة ..

الشرطي : لا يا شيخ علشان تفجرنا هاه تبي تفجرنا ..أكيد صواريخ ار بي جي

أنا : يابن الحلال تعوذ من إبليس لقيت أكل يوم بجيب ار بي جي خاف ربك حتى الشروخة بطلت اشتريها من يوم بدت الأوضاع الاقتصادية تتدهور

الشرطي : اسكت بس وقل بسرعة وش في هالكرتون ترى بثوّر فيك يالله تكلم ..

أنا : والله قسما بالله مدري وش السالفة ..لحظة ذكرت ..هذا كرتون خبز قديم ..أبوي يقول وده لعمك أبو خالد علشان يوديه لمزرعته علشان الغنم يأكلونه اقسم بالله أنه كرتون خبز يابس ..

الشرطي : أي والله صحيح طيب هالكيس الأسود ..وش هو خل افتحه أشوف

أنا : لا لا تفتحه الله يخليك طلبتك

الشرطي : اها أكيد قنابل يدوية ..ولا متفجرات شكلها كذا اعترف ..

أنا : لا والله مو كذا أبدا لا تفهمني غلط … الموضوع شي ثاني تماما

الشرطي : أجل ايش اعترف هاه وليه ما تبي افتحه..وش فيه قول ترى خبير المتفجرات الآن بيجي

أنا : هافات

الشرطي : هافات ايش هذي أسلحة جديدة ولا متفجرات أعترف

أنا: لاحول صح وش بيدريك بالهافات .يعني صراويل سنة وفنايل ..وقمصان نوم ..للغسيل طال عمرك محاكيك عزوبي أهله سافروا وتاركينه بروحه ..عاد راعي المغسلة اللي عندنا كومار جزاه الله خير صابر علي ويغسل لي بالأجل بس يقول لا عمرك تدخل علي بخلاقينك قدام الناس لا يشمون ريحتها ويطفشون فعلشان كذا أجمعها في كيس اسود فهمت الحين ..ليه أقول لك لا تفتح الكيس أخاف عليك تنخنق ..

الشرطي : ولو افتحها قدامي يالله خليني اتأكد ..يالله بسرعة

أنا : شف بس لا طلعت الريحة لا تهاوشني فهمت ..وافتح الكيس … ويسدون كلهم خشومهم بما فيهم دحيم ..ويقولون ووععع ووعع الله يقرفك وش هذا ..هاه يا حضرة الضابط أطلعها علشان تتأكد ترى الشراريب تحت

الشرطي : قفلها قفلها وقفل الشنطة كلها الله يقرفك ويقرف ريحتك معك .يالله اركب السيارة وحرك بسرعة قبل لا نموت من الريحة ..

واركب سيارتي ودحيم يقول لي وش هالخياس اللي في السيارة فضحتنا … وأنا واصلة معي

أنا : بتسكت ولا أنزلك الحين هنا ..تراها واصلة معي ..كل الناس شافوني وشموا ريحة ملابسي انفضحنا .شفت اللي يخربون خطتك في آخر شي هذا هم ..بس ولو عناد فيهم رايح رايح الله لا يعوق بشر ..يا أنا يا..تحقيق حلمي

وندخل فندق الفور سيزون في برج المملكة ويقابلنا موظف الاستقبال ..

موظف الاستقبال : آهلين شباب ممكن أخدمكم

دحيم : ابد سلامتك ..نبي نأكل عندكم وين المطعم …

موظف الاستقبال : شو حضرتك شو بتئول ..

أنا : قصده أحنا تونا واصلين من المطار واشتهينا نمر هنا نأكل الغداء

موظف الاستقبال :ممكن أعرف إذا عندكون حجز ولا لا …

دحيم: أحنا نبي نأكل مو غرفة ثانية إذا طلبنا عطنا رقم ..

أنا : (بكوعي على بطن دحيم ) يحب يستخف دمه لا صراحة ما حجزنا بس يعني لازم نحجز ما في حل ثاني

موظف : يا عيب الشوم ولو بس حبيت اسأل إذا في حجز ولا لا على العموم تفضلوا معاي ..

دحيم : بالله عليك ممكن تخلينا قريب من صالة العوائل …

موظف الاستقبال : شو .ما عنّا عوايل وما عوايل كله على بعضه مدري إذا هالشي ما بيناسبكم يعني ..

أنا و دحيم : لا يناسبنا يناسبنا ما عليك أنت بس أمش قدامنا على المطعم

ودخلنا المطعم ويجي الجيرسون ومعه المنيو ( قائمة الطعام ) ويعطيناها ويمشي .. والتفت على دحيم ..

أنا : شف من الحين لا تقول لي عزيز ولا أقول لك دحيم اسمي أبو ناصر ..وأنت أبو تركي ..فاهم وشغلة ثانية لا تحط شماغك لا على الطاولة ولا على الكرسي اللي جنبك ويستحسن ما تحركها خير شر ما نبي فضايح احنا ..

دحيم : ليه .بتتبرا من نفسك وش فيها أسامينا ..

أنا : شف عيال الكاش الواحد منهم ينادونه بأبو فلان ما ينادونه بأسمه ولا يكسرون اسمه دحيم ولا عزيز ولا عبيد .ز تلقى الواحد منهم طوله شبرين وتوه ما بلغ وتقول عنده عشر عيال أبو فلان وأبو فلان ..وثانيا الأكل هنا غالي مرة بكم مدري بس أكيد أنه غالي وسواءا كان شين زين بتآكل منه بتآكل منه .لسببين يمكن تكون هذي أول مرة وآخر مرة .. والثاني دافعين فيه دم .قلبنا ..

دحيم : طيب الحين أوكيه طلع زين شين بأكله بس أشوف الناس الكشخه في الأفلام يتركون شوي في الصحن يعني شبعنا ولا احنا مشافيح .نسوي زيهم ولا ننظف الصحون تنظيف مثل عادتنا ..

أنا : نقطة جيدة أهنئك عليها من صميم قلبي .. شف الصحن خل فيه شوي أما العصير فعلى راحتك تبي تشفطه كله تخلي شوي … بكيفك ..

الجيرسون : عفوا .. شو بتحبوا تأكلوا حضراتكون ..

أنا : أترك المنيو حقتكم على جنب ..أنت وش تنصح به ..يعني وش لو أنت هنا مكاني وش كنت بتطلب مني لو أنا هناك واقف مكانك

الجيرسون : عفوا شو تفضلت حضرتك …

دحيم : ما عليك منه ..هو يحب يستهبل عندكم بروستد ..

أنا : احم احم جتني الشرقة كاس موية ..أبو تركي قصده يقول أنه يبي طبق اليوم اللي بالدجاج لأنه عنده حساسية من السمك ..قبله الله يعافيه إذا أكل سمك تشب فيه الحساسية ..

الجيرسون : وأنت شو بتحب تطلب .. كمان ما بتحبوا طلبات جانبية شوربات سلطات …أي شي ثاني

أنا : ممكن تقرب رأسك شوي أبيك في كلمة بين وبينك ..( ويقرب الجيرسون رأسه ) أحنا تونا جايين من السفر و قاصين تذاكر درجة أولى وبصراحة أكلونا وشبعنا يعني مو شبعنا مرة نص ونص .. ممكن أنا والأخ يعني إذا نأكل من صحن واحد وش قلت ..ولا تقسم اللي في صحن واحد على صحنين يعني علشان البرستيج ..

الجيرسون : شو ما فهمت عليك ..شو بتئول ..

أنا : عصب عصب شف أنا عاد أحب اللحم عطني الطبق أبو لحم ( علشان أذوق الدجاج واللحم ) و سلطة على ذوقك

الجيرسون : ما بدكون شي ثاني معون

دحيم : الله لا يهينك 2 حمص .. وقل له يكثر الزيت ..

أنا : احم احم .لا بتذبحني الكحة .. أقول توكل خلاص ولا تنسى عصيرين برتقال .. أبو تركي من الطيارة وهو مرتفع ما عليك منه يذب خيط وخيط …

دحيم : عبدالعزيز تدري بكم طلباتنا شف الطبق الرئيسي الواحد بمية ريال والسلطة اللي وهقتنا فيها بخمسين والله يستر لا يجيب صحنين سلطة وكل عصير بعشرين ريال وفوق ذا كله كاتبين تحت رسوم خدمة 15% بالمية يعني تقريبا تقريبا العشاء بيطلع علينا بأربعمية ريال تقريبا الله لا يوفقك .وش لنا بالخسائر هذي كلها

أنا : اترك بكم وما كم شف هذولي اللي اقبلوا ثنتين يطيرون العقل ومبين العز عليهم ..شف كاشفات وطيبهم يشق الجبهة شق ..تمقل فيهم أنا أدفع ألف وأجلس أتفرج على هالأشكال

دحيم : يلعن شكلهم يا شيخ الحين ذولي سعوديات .. شف شف وشعرهم أشقر بعد طبيعي لا لا شكلهم لبنانيات

أنا : أي لبنانيات أنت ووجهك سعوديات ..صدقتني الحين أنت ووجهك عرفت ليه أقول لك هالنوع من البنات غير .. شكل ومضمون ودلع ووسع صدرك

دحيم : طيب الحين أنا و إياك يعني بنطيحهم ايه هين ذولي يبغالهم أمراء مو أنا وأنت

أنا : يا شينك لا افتقدت للطموح والله ما أكون ولد أبوي أن ماجبتهم على روسهم ..يا متر …

الجيرسون : ايوة نعم بدكون شي تاني ولا بدكون تشربوا شي هلاّ

أنا : البنتين اللي جالسات هناك تعرفهم ..لا تخاف تراني بأشوفك ..

الجيرسون : والله ما بعرفون بس مبين علييون أنن شي تئيل مرة ..بس أول مرة أشوفون على فكرة ما صار لي في الرياض إلا أسبوعين بس بدك اسأل لك عنون

أنا : لا ما عليك .. مشكور … المهم يا دحيم ..كح كح قصدي يا أبو تركي أقول كم باقي معنا الآن

دحيم : احنا جينا معنا ألف وخمسمية ريال ..وعشانا تقريبا بيكلف 400 يعني الباقي 1100 ..بس ليه تسأل لا تكون تطلب شي زيادة ترى أذبحك …

أنا : أقول اسكت بس خلني أخطط …وشوي ويجي الأكل وأشوف البنات هم بعد طلباتهم وصلت بس ماشاء الله تقول هم بديرة والريجيم في ديرة وبدوا يأكلون شوي شوي من كل صحن وتطق في رأسي أنادي الجيرسون

الجيرسون : ائمر شو بكون الأكل بوه شي

أنا : شف ياليت تروح للآنستين اللي هناك وتقول لهم ترى طلبهم على حسابنا زين ..وجب لنا مثل اللي عندهم

الجيرسون : ئصدك صحن الئريدس …

أنا : ايوة ما غيره الئريدس

دحيم : وشو وش ئريدسه وشو هذا حلال ولا حرام

أنا : بلا فضايح أنا بعد ما أعرفه ولا أدري حرام ولا حلال بس مأكله مآكله الله لا يعوق بشر ثانيا البنات يحبون الولد اللي يحب اللي يحبونه ويصير مثلهم مو رأسه يابس

الجيرسون : اوكيه زي ما بدك…ثواني شوي ….و يروح ويرجع بعد دقائق ويقول الآنستين بيتشكروكم كتير وبيئولوا كلكم زوء .

أنا : شفت شفت أنت ووجهك هذولي بنات العز يا بعد قلبي يا شيخ روحي تفداهم يقولون كلكم زوء ..لو من بنات الفقر كان لمت عليك المطعم و وشوله ووش شايفني ترى لو ماحنا في الرياض ..كان الين احنا الأربعة جالسين مع بعض على نفس الطاولة

دحيم : طيب وش بنسوي الحين نرقمهم .. نكتب لهم الرقم على المناديل ولا كيف ..

أنا : انطم بس انطم قال ايش قال مناديل .. ما عليك يا جيرسون يا جيرسون

الجيرسون : ائمرني شو بكون

أنا : ( بصوت عالي ) تنزل تحت تلقى فياجرا أسود على كحلي ..فيها شوية لون عنابي ..تلقى السواق مرزوق هناك قل له يسخن السيارة ويقربها من البوابة

الجيرسون : لحظة على رأسي ..وشوي ويرجع الجيرسون عفوا السيكورتي بيئول ما في فياجرا بهاي المواصفات

أنا : شفت يا أبو تركي ( وأنا رافع صوتي ) قلت لك يا أخي نطرده ما نبيه وأنت صاجني وراه عيال قايل لك كور رأسه يابس مسكر بس هين أوريك في مرزوق هذا أقسم بالله شف اقسم بالله أن هذا آخر يوم له فهمت إذا بترجمه خذه أنت ولا عطه أختك مو سواقها الجديد أندونيسي بقرة ما يعرف كوعه من بوعه هو لكم …

الجيرسون : بدك نبلغ الشرطة .. ولا السيكورتي تبعون المجمع يمكن هو نزل للمركز التجاري علشان ياكول هونيك

أنا : لا لا تنادونه ولا شي أنا أعرف أجيبه وأغسل شراعه بالعقال .. ما أقول ألا حلاتها من يطق له سواق أنجليزي يعرف قيمة الوقت وعلى الكلمة الله يرحم أيام لندن تذكر يا أبو تركي يوم نستأجر سيارة بسواق في لندن ..ياهو على الثانية ينتظرنا سواق ..بس الله يهديها الدولة إلا تدخل السعودة في كل شي وأهمس للجيرسون في أذنه ( ما عندكم كروت للترقيم أسمع أن عندكم كروت خاصة ولا ذيك الفيصلية )

الجيرسون : شو الفيصلية ما فشرت الفيصلية ثواني واجيب لكم ا لكروت بتاعت الارئام

وندفع فاتورة قيمتها ألف وخمسة وخمسين ريال و وأمر من جنب طاولة البنتين وأرمي عليهم الكرت بعد ما كتبت لهم رقمي وبيت شعر وتنحنحت وابتسمت ومشيت وميلت العقال ( متأثر بحركات المغازل في شارع الثميري )

ونطلع من الفندق ودحيم يحلطم …

دحيم : الحين هذولي هم بنات الكاش من أولها نحاسب عنهم والله كدينا خير ياليتهم عاد ماكلين في هرفي ولا هارديز كان تهون شقاق يشق بطونهم بنتين يأكلون بفوق خمسمية ريال وجع ماكلين مندي ..وشكلهم بعد هذا كله ما راح يدقون ابئا ئابلني ..

أنا : أسمع متى بتترك حركات القراوى تبيهم يتركون اللي بيديهم ويدقون عليك .. ولا وش رأيك تقوم من طاولتها تشفشفك قدام الخلايق يومك عزمتها بخمسمية ريال يا بابا الحين يقال لهم مرة مرة مقتصدات لا في العادة يطقون ألفين على الطاولة ويمشون ثانيا يلعن إبليسك ما تكفيك ابتسامتها يوم نقول لهم الطاولة على حسابنا ..ولا يوم ازرف لها الكرت ..لو هي من اللي خبرك في سوق الرياض الدولي ولا أسواق المجد كان الهيئة الحين مسنترين فوق رأسك ..بكرة بتشوف وتدعي لي لا جاتك التذاكر لبيروت ببلاش وفاتورة جوالك ببلاش وفوق ذا كله واسطات يعني الوظيفة في مخباتك ..بس اصبر ..يالله نركب السيارة علشان نتوكل قبل لا يطلعون ويعرفون أننا كنا نبكش عليهم في سالفة مروزق والفياجرا

دحيم : لا يا عبدالعزيز تونا مأكلين وأنت حاط في الشنطة قنابل كيماوية خخخخخخخخخ

أنا : أقول أركب بس وأنثبر وطلع جوالك وامسح رقم طقاقتك وجهز شريحتك للأرقام المميزة من اليوم وطالع…

وأحنا في السيارة يرن الجوال ويطلع رقم غريب حوسة ..وأرد من دون نفس إلا وبنت على الخط

البنت :عفوا مو هذا جوال العاشق أبو ناصر

أنا : لا غلطانة يا أختي … عفوا ايه ايه نسيت من أنا أيه أنا أبو ناصر

البنت : لو سمحت أنا أكلمك جد ما أحب التريقة أنت أبو ناصر ولا لا

أنا : والله العظيم أنه أنا … أقسم بالله

البنت : طيب ممكن أعرف أنت من شوي وين كنت ..

أنا : فندق الفور سيزون في برج المملكة في المطعم ..هاه تأكدتي أنه أنا وبالأمارة أنتي واحدة من البنتين اللي كانوا جالسين على الطاولة اللي قبالنا وحاسبنا عنكم ( بيذلها )

البنت : نعم بتمن علينا أنك دفعت يا أخي ما أحد ضربك على يدك كم حسابك علمني وأنا أرسله لك بشيك ..

أنا: والله العظيم أنك فاهمة غلط بس قصدي أبين لك أني عارف أنت مين وأثبت لك أنه أنا هو أنا

البنت : اممم امممم طيب أنا أي واحدة فيهم .من اللي أعجبتك ورقمتها ..

أنا : ( في نفسي ) والله التوهيقة وش أقول لها الحين مرقمين على الله وبالله .أنتي أحلاهم

البنت : خل عنك البكش أحلاهم و أجملهم أنا أي واحدة منهم .اللي كانت حاطه روج بنفسي ولا روج أحمر ولا تقول ما دققت أعرف أنك مصورنا بعيونك تصوير

أنا : ( همسا ) شف يا دحيم بأبيعها بتبن فأبيك تتمالك أعصابي يمكن البنات يطيرون من يدينا بسوي مغامرة ..ايوة أكيد أنت أم روج بنفسجي صح

البنت : يوه أخجلتني كلك ذوق والله وأنت ماشالله عليك وسيم وجريء وملامحك حلوة

أنا : (لدحيم ) شفت وتلومني فيهم صدق عندهم تخيل حلو للملامح مو مثل البنات اللي خبري خبرك ما عندهم إلا جواد العلي وراشد الماجد وخالد عبدالرحمن واللي بتسوي نفسها فاهمة تقول توم كروز لا وطالعين بموضة دايفيد كريغ وتاركان ..ذولي بنات من كثر ما يعرفون سواليف التجميل عيونهم صارت تصيد الملامح … ( للبنت ) أنتي عاد قمر تخلين الأعمى يشوف نورك

البنت : يووه أخجلتني من جد بس مو ملاحظ أنها غريبة جالس في الرياض في هالحر ما سافرت هالصيف

أنا : يووه خليها على ربك شلة القراوى صاروا يسابقوننا على أوروبا ملوا جنيف ولندن وباريس يا شيخ أنتم كفو حدكم جدة وأبها .تصدقين ومالك علي يمين كنت حاجز أطلع للبهاما خبرك هي صايرة الموضة بس صارت ظروف

البنت : وش فيك يا عمري عسا ما شر وش صار

أنا : ( لدحيم ) يا جعلي ما أعدمها من أول مكالمة يا عمري مو مثل طقاقتك شهر على ما تناديك يا دحدح ..بعد ما كانت تناديك يا هييي ( للبنت ) أبد الوالد الله يسلمه ناشب ألا يبيع أرضنا في بنبان وكاتب لي توكيل أبيعها عنه .. تعبت أقول له يا يبه طال عمرك نحتفظ فيها كم سنة ولا نبني فيها منتجعات ..خبرك بنبان بعد خمس سنين بتطق منتجعات بس هو يقول لي ألا بأبيعها هالأرض ما وراها إلا المشاكل خبرك أبوي تطاق مع الوليد بسبتها ..يقول له أدخل بها معي ونبني قرية سياحية كبيرة و أبوي يقول وش لنا بالسياحة خل نشاطنا مقصور على الأسهم والصناعة والبترول ..قام الوليد و كب خشته وزعل ..أي والله كان في المجلس عندنا في البيت ألا ويقوم وهو يناشق من الحنشة يوم أبوي ما عطاه وجه حتى من الصولة ( الصولة = الزعل بالنجدي ) نسى العقال والبشت في مجلسنا خبرك كنا مسوين أربعة بلوت يوم أبوي حلف ألا أنه يبيعها ويفتك منه ..

البنت : واو أجل أبوك شريك الوليد بن طلال

أنا : لا الكذب خيبة مو شريكه شريكه بس بينهم شوية بزنس يعني بس بيني وبينك الوليد ناكر للجميل يعني يا تشاركني يا بأزعل .. يا أخي استح على وجهك أذكر للرجال أنه فزع لك في يوم تصدقين عاد من الدور12 الى الدور 35 في برج المملكة ما فرشه ألا أبوي يوم قصرت فلوس الوليد .. ترى الوليد كان بيأخذ قرض من البنك الأهلي علشان يفرش الأدوار وجا لأبوي علشان يكفله بس أبوي قال ماني أبو عبدالعزيز أجل تتسلف من بنك وأنا موجود ..وفرشها أي والله أني ماشي قدام الدينّات اللي كانت شايلة الموكيت و الصمغ كان معي في السيارة ..

البنت : والله ماله حق يا أخي ما يصير كذا ..تصدق نفس الشي صار لنا ..قبل كم سنة كان عرس أختي وكانت صديقتها بنت العليان ..ما تقدر تحظر رجلها كانت مكسورة قامت أمي حلفت بالمصحف ما يصير العرس إلا لين تطيب صديقتها وما صار عرس أختي إلا في الصيف والناس مسافرين ونقوم نطبع كروت جديدة ونرسل تذاكر سفر للحريم وكل واحدة منهم تقول بيتنا وصخ ونحجز الانتركونتنينتتال كله بأجنحته وحجره ويتطاقون الحريم وش معنى فلانة على جناح وأنا في غرفة ونقوم نحجز أجنحه الشيراتون ويالله تقضي … وتجي الحين بنت العليان إلا بتسوي عرس ولدها في أول الصيف ووين اللهم لك الحمد في بيروت ..وووه وتشب أمي وش يودينا بيروت هالحزة والناس منكبة على بيروت تقل ما شافوا خير وتكلمها أمي وتحاول تقنعها وذيك ما غير راكبة رأسها عاد أمي دواها حلفت ما تحضر عرس ولدها بس علشان أمي طيبة راحت العرس وعلى حسابنا ترى الحمدلله شايفين خير …بس اضطرت أمي تصوم في حر بيروت وينزل عليها السكر وتتعب ونجيب لها طيارة وعلى التخصصي على طول بس الحمدلله أشوى هي الحين

أنا : سلامتها والله ما تشوف شر ..لا حق وواجب نروح لها ونجيب لها أكبر باقة ورد في أي جناح هي بس

البنت : هاه لا وشوله عيب ترى احنا في السعودية والله لو أحنا برى كان عرفتها عليك وأقول لها هذا أبو الذوق كله

أنا : يا بنت الحلال قولي من صديقتك بس أي جناح هي .. عارف أنها في 4D

البنت : لاو الله أم سالم المرافقة اللي معها عندها حساسية من الورد وما أبيها تجلس تعاطس على أمي تذبحها

أنا : أجل شوكولاته الحين أنقز لباتشي و أحلى وأغلى صينية شوكولاته لأمك بس هي أي غرفة

دحيم : أنت الحين خبل البنت ما تبي وشوله تحلف وتصر ولا ناوي مخاسير سو نفسك ما انتبهت ومشها لها

البنت : لا وش دعوى أمي عندها سكر .ثانيا خلك من أمي ما صدقت أطلع من المستشفى واغير جو يووه وش رأيك بس نطلع نشرب قهوة في الجلوب في الفيصلية ولا مشغولين

أنا :أنا علشانك أترك الدنيا وش مشغولين بس الله يهديك … الجلوب الجلوب .. بس وينهو فيه

البنت : الفيصلية وش فيك أنت ما تعرف الجلوب ما عمرك رحت له

أنا : ايه كورة القزاز اللي معلقه في السماء ..بنت أختي تسميها الكورة .. خلاص الوعد هناك في الكوفي شوب.. ونسكر السماعة وينط دحيم في حلقي و أنا أسوق

دحيم : وش جلوبه أنت ووجهك ما بقى معنا فلوس كفاية رصيدنا اليوم كله طيرناه أنت مستوعب هالشي ولا لا

أنا : يابن الحلال باقي على الحلو تكه وش تبي بعد أكثر لا تطمع ترى الطمع شين تبي البنت من أول يوم تشرهك بموتر موديل ألفين و أربعة ما تشوف بعينك البنت سخسخت وركبها قامت ترقل ..وش فيك بس

دحيم : يا عبدالعزيز فلوسنا نجمعها من كم سنة وأخرتها تطير في يوم وليلة

أنا : احترم نفسك أولا باقي ألف ريال ثانيا فدى عمرهم يا أخي وش فيك أنت بكرة بتشوف ورقة الخمسمية وتحتقرها صدقني ..أم خمسين اللي تقوطر سعابيلك عليها إذا أبوك أعطاها لأختك بتصير تمش بها خشمك بس أصبر أنت

ونوصل للجلوب ويستقبلنا واحد نيجيري طول بعرض مدري وش يقول واشك أنه يدري وش احنا كنا نقول بس فهمناه أننا نبي نرقى فوق وبالفعل رقينا ..وجلسنا على طاولة ننتظرهم في صالة السيجار ..و جنبنا اثنين عيال أعمارهم 16 سنة بالكثير ذبحونا بهالسيجار اللي ييتتونه كل واحد يالله يدخله فمه وشوي و يجون البنتين .ويجلسون قدامنا شوي

أنا : هلا باللي لفانا يا هلا به ..عدد دقات قلبي في غيابه ..يا متر ( متأثر بالأفلام المصرية ) بالله شف القمرين اللي جوا وش يبون يشربون

البنت : والله ودي بأسبريسو وصديقتي تبي قهوة سوداء .. وياليت اثنين موس ..وياليت اثنين سلطة فواكه ..

دحيم : ( همسا ) ليه ما قلت لي أن بنات العز مشفوحات كأنهم ما شافوا خير …

أنا : ( همسا ) يابن الحلال هم يطلبون بس يتذوقون ما يأكلون مثل اللي خبري خبرك كأنهم طالعات من مجاعة

البنت : اسمك عبدالعزيز صح … ما عرفتنا على صديقك …

أنا : هذا فارس ..( أول اسم طق في رأسي ) ونناديه أبو تركي.. أحد أكبر مضاربي الأسهم في السعودية

البنت : حتى صديقتي نجوى متولعه بالأسهم يقولون هالأيام طايرة فوق بس خايفة تقدر يا فارس تعلمها على الأسهم وتكون مرشدها

أنا : ( همسا لدحيم ) بالله واحدة من خوياتك قد حكت معك غير أنك تعطيها ألف ريال شف اللي عندها دراهم وتبي تطقطق في الأسهم ..المهم دور لك بكشة وفك عمرك ..

دحيم : بصراحة من يوم صار من هب ودب يطب في الأسهم من عيال أبو 16 سنة إلى الشيبان مرتزين في صالات الأسهم في البنوك وأنا اللي أقوم وأترك الأسهم السعودية وأطب في البورصة العالمية ..تعرف يا عبدالعزيز المليون سهم اللي في الكهرب بعتهم خلاص وشريت بهم أسهم في مايكروسوفت وتقوم ترتفع بعد ما شريتها خمس دولارات ( ما يدري أن السهم بكبره بدولارين وشوي ) ..وناوي أطب في اسهم فورد بس أنتظرهم ينزلون موديلات السنة الجديدة ..علشان يرتفع السهم على طول وأبيع

نجوى : يووووه يعني ما راح تساعدني في الأسهم .خلاص بأحطهم في البنك وهم يشغلونها لي

أنا : لا يا أيو تركي ما يصير زعلت نجوى يا أخوي من بعيد عطها نصايح بس ..يعني ولو أكيد عندك حس سهمي راقي

دحيم : علشانك والله يا أبو ناصر … وعلشان خاطر نجوى وصديقة نجوى إلا وش أسمك

البنت : أنا اسمي سهر بس لا تخاف مالي في الأسهم أنا شغلتي أطير الفلوس .الريال ما يبقى في جيبي ساعة

أنا : (همسا ) جاك يا مهنا ما تمنى ..

دحيم : يا خوفي تطب علينا الهيئة وأحنا كذا طاولتين قبال بعض وطاقينها سوالف وش رأيكم نطلع

نجوى : الله عليك جبتها خلاص نحول مع بعض ونركب سيارتكم ونجلس نتشمى عساها بس مظللة من ورى

أنا : ( همسا لدحيم ) أنت وراك بثر يا أخوي إذا ما تأقلمت عليهم لا ترمي كلام والسلام على بالك طقاقتك اللي تمن عليك لو تبي تشوفك في بنده ذي تزورك في البيت عادي يالله حلها نركبهم في سيارتنا القرمبع علشان تخرب الخطة كلها ويطنشونا وتنبسط أنت

دحيم: ( همسا لي ) والله ما فكرت طيب وش الحل

سهر : يالله وش تنتظرون خل ننزل تحت ونتمشى ..هاه يا متر كم الحساب

أنا : اها بس وش هالكلام وش تحاسبين أنتي ( يلمح يبيها تحلف بس ما عندك أحد ) أجل الرجال وش وظيفتهم .. و نصك 800 ريال والله العالم كم بقى معنا وننزل تحت ونطلع من البرج

سهر : يالله وين سيارتكم ..وش هي أساسا

أنا : أي والله يا أبو تركي وين سيارتنا قايل لك بلا هالكور يسوق لنا ويغثنا وينرفزنا يا ينتق يروح يتغدا يا يرقد والحين يسرق سيارتنا بالله وش أسوي فيه هاه قل لي

سهر : نبلغ الشرطة لازم يمسكونه و يأدبونه ..يا سيكورتي يا سيكورتي اتصل على الشرطة الآن بسرعة يالله

أنا : لا ماله داعي الشرطة والله ما يصير صدق أنه كور وما يفهم بس معنا من فوق عشرين سنة يعني في عشرة

نجوى : لا عشرة ولا تسعة ولا خرابيط هالأشكال لازم تتأدب لو كل سواق بيسرق سيارة و أعمامه بيسكتون له كان ما نلقى في الرياض سيارة باقيه … يا سيكورتي اتصل بالشرطة ضروري

دحيم : طيب أنا أقول بلاها الشرطة هو أكيد بيهديه الله وبيرجع ويرجع بالسيارة أصلا هو متعود يسرق السيارات وبعدين يعقل ويرجعها .. أنا أقول بلا شرطة بلا هم وش رأيكم نركب معكم في سيارتكم أحسن من الجلسة في هالقيظ والسموم .. موب أحسن

أنا : والله أني أشاطرك الرأي يعني بلا شرطة بلا فضايح ولا نكبر السالفة

وتوصل سيارة الشرطة … صدق يا حبهم للمصايب

الشرطي : جانا تبليغ عن سرقة سيارة فياجرا كحلي بأسود والمشتبه به هو السائق صح ولا لا

أنا : لا لا من يقول إشاعات يمكن رايح مشوار وأكيد بيرجع تسهل بس يا ضابط

الشرطي : الحين بلاع وسيارة مسروق ويقولوا الفيصلية وفياجرا وجاي والطبلون على آخره وتقول لي لا مو صحيح الخبر أجل ايش الصحيح .. هاه

أنا : ايه هذي هي لو أن المسروقة سيارة ماكسيما من ظهرة البديعة ولا السويدي ولا عليشة كان قلتوا لصاحبها دور عليها و إذا لقيتها عطنا خبر بس يومها فياجرا جاي طاير..

الشرطي : لا يا شيخ مو كذا أنت فاهم غلط بس المهم بس وش أسم السواق .وكيف شكله

أنا : أقول السيارة سيارتي والسواق سواقي ..أنت وش تبي مرزوق له معنا عمر من يومني بزر وهو قبال عيني يخرع فيني يمون علي وعلى السيارة يالله بس تسهل ..

الشرطي : براحتك طال عمرك ..يالله في أمان الله

سهر : ليه كذا هاه فهمني تفشلني يعني ما صدقت على الله أشوف شرطي واضحك عليه وتقوم تطرده كذا

أنا : لا عاد كل شي ولا مرزوق صحيح أنه غبي وثور وساعات يرقد وهو يسوق بس الصدز أنه وفي وله عندنا فوق عشرين سنة ويوم كان أبوي ينتدب في الطائف هو كان سواقه الخاص وخادمه و سكرتيرة تبيني الآن أبلغ عنه

نجوى: طيب وش بتسون الآن بتستأجرون سيارة تكفون استأجروا بورش أموت وأركبها

دحيم : وين أقرب تأجير سيارات بعيد عن هنا كيليون يبي لنا ليموزين علشان نروح له .. أنتم وين سيارتكم بس ترى البنات المطخطات هالأيام عادي يخلون أخوياهم يركبون معهم في سياراتهم ..

أنا : تعال لا بارك الله في مرزوق وش هالحكي أنا أمشي على رجلي ولا أسوي كذا وأحرجهم هذا اللي ناقص ..

سهر : نجوى تعالي معي بسرعة تذكرت أمي موصيتني أشتري شوية أغراض من الفيصلية وبعدها لازم نروح للمستشفى بسرعة ..عزوزي حياتي سوري ما نقدر نروح مع بعض لا تنتظرونا ..يالله بااااااي

أنا : ( لدحيم ) مبسوط كذا أنت ووجهك وش بقيت الحمدلله ما قلت بنات العز صاروا يرقدون مع أخوياهم عادي ..وراك كبيت العشاء فهمني ..البنات شوية خقوا معنا تقوم تقول لهم وين سيارتكم ..بنركب معكم

دحيم : وش أسوي كنت أحسبهم مستحيات قلت يعني أكسر حاجز الخجل ..

أنا : أنت دخلت عرض في كل الحواجز انعدم البودي كله معك تعال بس لسيارتنا قبل لا يشوفونا وننفضح وندور طريقة مع أن والله خوفي أننا ندق عليهم بعدين يسكرون في وجيهنا ..

وفي السيارة .. فكرت أرسل لسهر كم مسج عاطفي من المخزنات عندي من قبل العام ..وما عندك أحد ولا رد ولا خبر سألتها عن أمها ولا حتى عبرتني ..

أنا : مبسوط طال عمرك أعميتها جعلك ما تربح .. البنت حتى ما صارت ترد علي.. والله ودي أدق عليها بس أخاف تكفخني بالحقيقة المرة على خشتي .. وتقول لو سمحت لا عاد تتصل علي مرة ثانية ..وكله من بركاتك ..

دحيم : خلاص عاد لا تحسسني بالذنب ..إن شاء الله بنلقى حل .ثانيا خلاص عرفنا وشلون نطيح هالمطخطخات ..والله لو أتسلف ولا أشحت أني لا أكرر الخطة كم مرة لين تضبط ونضبط أعمارنا

أنا : يابن الحلال خلك واقعي اللي صار صار .مع أني حاقد عليك وودي أزنطك بس خلاص شكلها طلعت اوت ..عاد هنا الحق ينقال بنات الفقر تطلع ميزتهم ..ينشبون لك بغراء ..تطاق معها ..تزاعلها ..تقول بأعرس تقول أعز ربعي تاب وأبي أتدين تنشب لك لا تخليني تعودت عليك ..قصدها ما في خبل يدق على جوالها مثلك …أما راعيات الكاش لو تكح بغير أذن يالله باي وكل واحد مننا في طريق .. ألا طقاقتك مو عندها بنت عم ناشبة فيها ألا تضبطها خلها تعطيها رقمي .. يالله ظل طقاقة ولا ظل حيطة …

دحيم : والله ما يندرى وش ظروفها .. اسكت بس حتى الطقاقة مانة بنفسها تبيني اشتري لها بطاقات سوى قلت لها بس ماشالله عليك أنتي دخلك الشهري أكثر مني وساعات عملك آخر الليل وطق ووناسة وعشاء مو مثلي وقامت هدت فيني أنت بتحسدني ولا بتحسدني يا أخي كل العيال يصرفون على خوياتهم وش فيك أنت تبيني أصرف عليك لا تكون مان بروحك وأخرتها تصك السماعة في وجهي ..

وشوي ويرن الجوال حقي واحنا في السيارة وأنا أسوق

أنا : هي هي يا دحيم هي … شكلها بتهزء شكلها بتقول أنساني و أنساك ما ادري وش أسوي

دحيم : رد رد شف وش هي تبي

أنا : الو هلا آمري ..

سهر : وش دعوى قلبي زعلان …حياتي وينك فيه ..

أنا : ( لدحيم ) وش القصة تتكسر علي وتقول لي أنت زعلان ..شكلها حست بالذنب بسوي نفسي زعلان ..( لها ) يعني معجبتك حركتك ..كذا تروحين بسرعة لا سلام ولا كلام …

سهر : أولا يا قلبي غصبا عني صديقتي نجوى انحرجت وقامت تقبص فيني تخاف أوافق ..ثانيا لو هي سيارتي وسواقي والله من عيوني .كان خليته يركب ليموزين وخليتك أنت تسوق واركب قدام جنبك ..بس المشكلة أولا أنه سواق أمي من أول والحين سواق أخوي البثر وبصراحة هو سواق ملقوف يعني بيروح يقول لأهلي .يرضيك عاد أهلي يدرون ..هاه يرضيك يا عمري

أنا :لا والله ما يرضيني ..ولا يرضي أحد يخاف الله .. بس يعني تتركيني بسرعة كان ودي أمسك يدك ..و أقول لك أحبك بس كفختي ما صرت أشوف ألا غبارك انحرجت قدام الناس واحنا طالعين قبال البرج و فارس صديقي المسكين جاه اكتئاب وتحطم يحسب أنه يرمي نفسه عليكم ..وأنه صاير ثقيل دم …

سهر : لا لا لا يا قلبي لا تقول كذا ..علشان أثبت لك …اااامممممووواااه لك ..واامموااه لفارس صديقك بس لا تزعلون

بوسة شي حلو بس وش بعد البوسة تبون تعرفون تابعوا معنا الجزء الثاني

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة