السلام عليكم هالقصة فيها شئفة ( أخس ياللبناني شئفة = شوية) أنسانية فلازم تجيبون مناديل تحسبا للصياح والدموع المنهمرة .. ولا تخافون ما فيها مشاهد ساخنة فيمكن اصطحاب الأمهات وصغار السن عند قرائتها .
جاء الصيف وطبعا الملحطين مثلنا ( الملحطين = اللي ما عندهم فلوس يسافرون ) قاضبين الرياض ما غير يحرسونها ويسقون زرع بيوت الجيران .حتى أبها وجدة وين ينراح لهم وهم صايرين أغلى من باريس وجنيف … المهم جلسنا في البيت كالعادة ..الواحد يقابل الكنديشن لا ينقرض من الحر كل هذا عادي والعادي بعد ..أن أول الصيف عمي مساعد ( قوية عمي واسمه مساعد بس علشان القصة, مشوها أن اسمه مساعد ) يجي يزورنا يودعنا علشان يقهرنا لأنه كالعادة يسافر أوروبا هو وعياله ويرجعون بعد بداية الدراسة بيومين .. ويحط جدي عندنا ..جدي اسمه عبدالعزيز على اسمي قصدي أنا على اسمه ..مو جدي الله يسلمكم عقب ما توفت جدتي الله يرحمها بحلنا به أن تركناه بريحاته بيشب علينا يبي يتزوج علشان كذا لازم نلفلف به بين بيوت أعمامي وبيتنا طبعا لكل واحد منهم شهرين وبما أن منطقين في الصيف فهو من دورنا في الصيف .. المهم عمي مساعد مشى وجدي بقى عندنا .. رقى جدي غرفته كالمعتاد وبدى نظام جدي..المشكلة جدي الله يغفر له ما تقدم من ذنبه وما تأخر شوية بثر بس الواحدوش يسوي .مع أن ما أحد معطيه وجه بس هو ما يفهمها ويستبثر زيادة أبوي منشغل في العمل الصباح وبعد المغرب رجل الأعمال يبي يطقطق في العقار في مكتب خويه ..يقضي الصيف كله يالله يالله يبيعون قطعة أرض واحدة والوالدة الله يطول بعمرها هي وحريم الحارة مدري وش يجيهم العصر يدرسون قرآن ويحفظنه في أحد المدارس . وفي الليل عروس وطقطقة قمة التناقض وأخواني اللي متزوجين ..المهم أول أمارات وصول جدي البيت هي تليفون الفجر أذا رن التليفون حق غرفتي في الفجر
أنا : انشاءالله لا تخاف جاي أبشر ..قل للأمام ما يقيمون لين أجي … وأطنش وأقعد أدهر على النت أدور بنات ,مواقع أي شي الواحد يقضي به وقته . وبعد صلاة الفجر يرن التليفون مرة ثانية
جدي : عبدالعزيز و وجع وراك ما قمت تصلي هاه يا جعلك العما ..وش أنا قايل لك ما صحيتك تصلي الفجر ..
أنا : يا جدي واللي يرحم والديك انشالله بأصلي ثاني شي ما كنت نايم أنا صاحي جالس على النت
جدي : وجع يوجعك أنت وخويك النت هذا اللي معطلك عن الصلاة عبدالعزيز قم ووجع لا أقوم عليك أكسرك تكسر بيديني .. يالله قم
أنا : انشالله ( عاد أنت فيك حيل ترقى الدرج علشان تكسرني تكسر الله يهديك بس هذا كبرك وتنصب ) ابشر
وهو يرقد مدري يسنتر في الصالة لين يفطر مع أبوي وأنا على الساعة 6 الفجر أرقد .. ويبدى موال الظهر وتليفون الظهر ..شي كذا يشبه موال الفجر بس على أحلى ..يجي جدي ويدخل غرفتي وأنا نايم ويشغل اللمبات كلها ..ويسكر المكيف ويصب فوق رأسي كأس موية ويفرك خشمي .. أنا ما تهمني الموية قد ما تقهرني فركة الخشم كأني قطوة
جدي : الناس صلوا الظهر وطلعوا من المسجد وأنت خايس في مرقدك الله لا يعطي أبليس العافية
أنا : يا دين البساس والقطوة المنتحرة .. روقنا يا هووه ..
جدي : أنا تقول لي روقنا يا هووه جعلك الماحي .. وين أبوك عنك ما عرف يربيك قم ووجع يوجعك راح اليوم وأنت توك راقد ..متى بتقوم ما صار نوم ذا صار موت
جدي : أجل قم يالله وصل الفروض اللي عليك وأنزل تقهو معنا على بال ما يجي أبوك و نتغدى
أنا : أبشر بس أنت اسبقني ..وشوي وألحقك … وبعد ربع ساعة أنزل لهم في الصالة ألقى عنتر ( جدي ) متوسط الصالة وأمي تقهويه .وأنصاهم
أنا : يمه وش غدانا اليوم … عساه شي يسوى بس
أمي : سليق جدك مشتهي سليق حتى أبوك بعد من زمان وهو وده فيه
أنا : سليق وووععع ..أقول خلي الشغالة تصلح لي همبرجر دجاج وترقيه لي فوق في الغرفة بأكله وأنا على النت
جدي : وجع يوجعك ذي نعمة الله استغفر ربك لا يخسف ربنا بنا نعمة الله ما ينقال لها وع ووش هالنت اللي تربض عليه الفجر والظهر أول ما تصحى من النوم
أمي : يا عمي هالنت مدري وش هو شي بلانا الله به .. ما غير مقابلة أربع وعشرين ساعة
جدي : وش هالنت لا يكون شي حرام بس ولا يشي يجيب ما حرم الله
أنا : يا جدي بعد ما شاب ودوه الكتاب .. خلني بس أرقى أشوف ايميلي واشوف أحد اون لاين أسولف معه يالله باي
ورقيت فوق لغرفتي ..وجلست على النت الى العصر .. ولما جيت بطلع بعد العشر مشوار لقيت جدي ماسك التليفون ويكلم عمتي بالتليفون زي العادة يتشكى …
جدي : والله يا بنيتي ماش ماني مرتاح في هالبيت ..أنا أقول لك أطلع لدار المسنين أصرف لي على الأقل ألقى أحد يهتم فيني ويراعيني
أنا : يالله جدي تبي تروح دار المسنين ألبس ثيابك تراها قريبة من عندنا مرة …
جدي : انطم أنت ووجهك هذا بر الوالدين يالهيس الأربد ترى هذا بيتي قبل لا يكون بيت أبوك ..ألا وين أبوك هالواوي ( الواوي = كلمة قديمة تعني شي لعاب وماله أمان يختفي ويروغ ) ما شفته رجع من الدوام تغدى واختفي وأمك هالمدرعمه بعد وين طست
أنا : رجاءا ولدك سبه على كيفك بس أمي لا تقول عنها مدرعمة ..أما عن الواوي ولدك فهو راح للديرة يقول أنه يبيع استراحة حقت واحد حاطها عنده من كم شهر وأخيرا باع شي .أما ماما فهي راحت للصالون مع خالتي عندهم عرس الليلة وتبيني أجيبها لأن ولد خالتي بيوديهم …عندك اسئلة أخرى
جدي : وأنت وين لابس وطاس هاه
أنا : ما كنك مصختها حاشر نفسك في كل شي ..بروح البقالة باشتري لي تشيبسات و عصيرات وحلاو ..وارجع للنت ما عندي غيره
جدي : يا ولدي وش هالنت اللي أنت مقابلة 24 ساعة ..لا تأكل ولا تشرب ما غير مقابل النت ..وش سالفته أبيك أذا رجعت تعلمني عليه فهمت
أنا : ابشر أنت انتظر ..ورحت البقالة ولقيت واحد من الشباب وقعدت أسولف معاه عن بنات النت طبعا .. وقبل ما تسكر البقالة لصلاة المغرب شريت الأغراض ورجعت البيت لقيت هالشايب طلع للمسجد الحمدلله مو ناشب لي أخاف صدق وده يتعلم النت ..وأروح غرفتي واشغل النت وافتح موقع شات صوتي … في الغرفة واحدة تستهبل مشغلة المايك و26 ولد يغازلونها ويرقمونها ..طبعا من شذ شذ في النار أنا واحد منهم وجالس أكل تشيبس واشرب عصير وأغازل ولا أحلى منها في الدنيا ومشغل السماعات على الآخر شوي ويصير اللي ما كان على البال .. دخل جدي علي وقام يهاوشني ليه ما صليت المغرب في المسجد وليه ما أنتظرته علشان أعلمه على الانترنت وشوي ويطلع صوت من السماعات صوت بنت مايعة
البنت: بس يا شباب يكفي حرام ..ماني قادرة قلبي تعب ما عمركم شفتوا بنت .. ودي أتنهد
جدي : وش هالصوت من ذي الصايعة اللي تحتسي تجيب بنات لغرفتك يالداشر يوم أهلك طلعوا أنت تجيب بني لغرفتك .. وينها وين اللي ما ربوها أهلها
أنا : وشو يا جدي تراك فاهم الموضوع غلط الموضوع مو زي ما أنت فاهم
جدي : وش اللي ما فهمته يا قليل الحياء وتبي تكذب علي يا قليل الحياء
البنت : يووه يا شباب ما فيكم أحد يقدر يفهم أني بنت حارة معقولة ما في أحد يقدّر
جدي : وتقول ماني فاهم ..اطلعي يا قليلة الحياء وين أهلتس اللي ما ربوتس وينتس جعلتس الماحي
أنا : يا جدي لحظة اسكر هالبلية والله لا في بنت ولا يحزنون ..وأسكر الموقع حق التشات وتختفي الأصوات وصوت البنت شفت أنك كنت ظالمني …
جدي : ودامها أنها على قولتك في هالمأخوذ وشوله تروح للبنات الداشرات هاه ..
أنا : يا طويل العمر أنا ما رحت لهم صدقني يا جدي كنا نسوي شات عن الطبيعة واختلاف الطقس ومتى موعد المربعانية و تجي هالبنت الصايعة على قولتك يا جدي هذي أحد عيوب النت ما تقدر تسيطر عليه 100% للأسف
جدي : اترك عنك البربرة المهم أنا زهقت من يوم جيت بيتكم وأنتم مطنشيني حسبي الله عليكم
أنا : عاد يوم كنت عند عماني مرة شايلينك فوق رؤوسهم ..ثانيا يا جدي الله يرحمك ويطول في عمرك يالله حسن الخاتمة وش لك في الانترنت أقضب مسجدك أحسن لك
جدي : شف يا تعلمني على هالمأخوذ يا والله أكسره فوق رأسك أخلص يالله علمني عليه
أنا : الشكوى لله حكم القوي ..تعال أجلس طيب هنا شف طال عمرك هذا موقع يسمونه الياهو موقع بحث
جدي : و أنا جدك حتى المباحث لهم في هذا اللي يسمونه الانترنت ..
أنا : يالله بس توكل على الله ما أنت كفو من يعلمك ويعطل نفسه علشانك يالله هناك
جدي : وجع يوجع مفاصلك أنا جدك خوا يكسر عظامك أني أقوم وأكسر هالجهاز فوق رأسك
أنا : لا خلاص أمزح معك أنت ما عندك روح دعابة شف يا طويل العمر ..الياهو ذا رجال طيب حطه على يمناك وتياسر كله أنجليزي رح موقع اينا ولا موقع الردادي ولا مواقع ثانية يحكون عربي … طيب الحين وش ودك تعرف عنه
جدي : وش ودي أعرف عنه وش تقصد الحين
أنا : من وين بلانا الله بهالشايب ودك تشوف شي مشتهي تشوف شي
أنا : أقول يا روميو مشتهي شي ينشاف أمي سارة وين تشوفها ماتت لها فوق 7 سنين ولا عندها ولا صورة حتى لو نص صورة وهي متلففة بالعباية اقصد شي ينشاف .مثلا نخل ودك تشوف نخل مشتهي نخل
جدي : أي والله مشتهي أشوف نخلة برحي و عذوقها مليانة تبي من يجنيها بس
أنا : شفت هالمربع يا طويل العمر تكتب فيه نخل برحي … و بعدين ارعص على المربع الرمادي اللي جنبه
جدي : وش ذا و أنا جدك طلعت لي صفحة مليانة حكي وين النخل اللي تقول عنه
أنا : هذي الله يسلمك يسمونها لينكات أرعص على أي واحدة منهم تفتح لك موقع وصفحة فيها معلومات وصور عن نخلة البرحي شف هالموقع الله يا سلام شف نخلة البرحية تجنن وهذي بعد ..شفت يا طويل العمر الانترنت سهل مرة ويفتح النفس بس هذا الانترنت يالله ورني مقفاك
جدي : طيب يا وليدي يوم كنت عند عمك أذكر أن مرت عمك دايما تقول لبناتها عيب تدخلون الشات وقاموا البنيات يقولون لها وش فيها عادي نسولف وندردش بس المهم مرت عمك قالت أن بتروحون لذا وش اسمه الشات ترى باصك على الكمبيوتر .. وش الشات وأنا جدك ..
أنا : الشات هاه ..ترى مرة عمي صادقة بالحيل مرة ..وش لك بالشات أن دخلت غرفة يا مسابب يا طقاق يا مغازل وكلام وصخ
جدي : يا بن الحلال مرة عمك ما وراها الأ الدجة اليوم عقب صلاة الظهر أنا وجاركم أبو حمد يمدح لي في الشات
أنا : هالمخرف أبو حمد وش يعرفه بالانترنت يوم يمدح لك في الشات يا جدي أسمعني تراني ما همتني الا مصلحتك اعرف التصفح أول وشف النخل وبكرة الخرفان وبعد بكرة شف التيوس ووعد مني لك أني أسوي لك ايميل ائد الدنيا هاه زين يا جدو
جدي : أقول ما في طلعة من هنا لين تعلمني على الشات فاهم ولا لا
أنا : طيب هالبلية أبو تبن قصدي أبو حمد وش قال لك عن الشات
جدي : أبد يقول ناس تهرج مع بعضها مثلا أبو حمد أمس سهران مع ناس يحتسون عن المأخوذ بوش هو بيضرب العراق ولا لا يقول لك أبو حمد أن واحد من المخابرات الأمريكية كان معهم ويقول لهم بوش ما وراه ألا الدجة بس يهوش كودهم يتبرعون له ولا يمددون له
أنا : لا اله الا الله ومن متى وهالمنتكس أبو حمد يعرف أنجليزي,, عربي ما يقرى
جدي : لا عقب ما دخل محو الأمية وهو يعرف يقرى ويكتب …أما الانجليزي هو ما يعرف له بس يقول أبو حمد أن الأمريكي عنده برنامج يحول كتابته على طول من انجليزي لعربي
أنا : المهم يا طويل العمر ترى اليوم اللي علمتك أياه كفاية وبصراحة تعبت منك بكرة انشاءالله أعلمك على الشات وألا أقول لك أحسن شي بعد الظهر بعد ما تصلون الجماعة تلقط هالسياسي المحنك ابو حمد وهو يعلمك على الشات بصراحة أنا تخصصي شات كورة ورياضة ما أعرف للسياسة اللي يفت فيها خويك أبو حمد
جدي : زين يالهيس دواك عندي أنشاءالله باتسر تشوفني افت في هالنت فت وتجيك العلوم انشالله ..المهم الله لا يهينك تقوم عن الكنبيوتر بسوي بحث عن الأقط وعن حريملاء بشوف وش كاتبين عن ديرتنا في النت
أنا : حريملاء من زين ديرتنا .. المهم أخلص بسرعة لك 10 دقائق وراي شغل كثير البنات قصدي الشباب يبون يناقشون مباراة الشعلة والبرازيل الأسبوع الماضي وش صار فيها يالله يالحبيب ترى العشر دقائق بدت من شوي
المهم طلع جدي بعد ما سوى البحث و بعد ربع ساعة دخلت أنا النت من المغرب الى الساعة 6 الفجر ما قطعني الا نص الساعة اللي رحت أجيب أمي فيها .. ونمت من الساعة 6 الفجر الى الى .. يوم فجأة واحد صفق الباب بكل قوة وفتح الأنوار كلها أنا ارتعت وخصوصا كنت حالم بأني أغتصب واحدة في غابة ( تفكير رايح وطي ) قلت بعد لا يكون تفسير الحلم يصير العكس ساعتها أكل تراب .. المهم فتحت عيوني لقيت جدي معه صحن مليان تمر وجالس قبال الكمبيوتر ويشبك النت ..
أنا : الله يأخذ أبو حمد هالعلة وعلمك كيف تشبك على الانترنت بعد الهي أشوف فيك يومين مو يوم واحد يا أبو حمد .. يا جدي واللي يرحم والديك ما يصير كذا أحد يجي هالحزة ما عندك ساعة تشوف الوقت
جدي : الله أعلم من اللي ما عنده ساعة الساعة الآن 3 العصر يالله بس قم صل الظهر وأنا جدك وأنزل تحت تغد وعين من الله خير
أنا : لا خلاص أخلي الشغالة ترقي لي الغداء ..
جدي : وش ترقي لك الغداء ما عندنا شغالات يرقون الغداء لأحد وخصوصا غرف العزاب تبي تتغدى تنزل تحت بلا دلع
أنا : يالحبيب أنت يا أخ من يوم جيت والغداء يرقونه لي كل يوم يعني وش جد أنت ووجهك ( مطيح الميانة مع جده )
جدي : بصراحة أبي أخذ راحتي على النت أنت بصراحة تضايقني ..
أنا : خيييير معليش وش في غرفتي وأضايقك ركز معي لو سمحت هذي غرفتي يا جدي رح أنت لشايب أبليس اللي خربك أبو حمد زادني قايل من أول أن في بطنك ريح ياذا الآدمي أجل تبي تعرف وش هالانترنت ومتمسكن ومسوي فيها وأثرك أنت وشايب الشر طابخينها من زمان ..المهم يالحبيب توكل أبي أكمل نوم …
جدي : شف بتنزل ولا والله أروح أشتكيك لأبوك وأقول له انك ما تحترمني ولا تحبني هاه بتنزل ولا أوريك شغلك
أنا : الشكوى لله شف بأصلي وأنزل أتغدى تحت و اقعد عند ولدك ومرته ..بعد حول نص ساعة يعني قدامك ساعة بس ساعتها لو رجعت وشفتك على الانترنت صدقني لا أمصع السلك بيديني
جدي : الله يالدنيا آخرة الوقت الدنيا تحدني ..وينك يا أبو حمد ذاك الرجال شاري له تبلب له بريحاته ولا أحد يمنّه ولا شي .. مو أنا حفيدي جالس يمن علي ويهاوشني
أنا : وش التبلب شي ينوكل ؟
جدي : ذاك الكنبيوتر اللي يتسفط الصغير ..أبو حمد شاري له واحد بخمسة الآف ريال
أنا : ما أوصيك اشتر لك واحد مثله وأن بغيت أعطيك كاميرا من عندي نزالة بس مو تجي تروعني من غرقة النوم
جدي : اها بس لا يكثر يالله توكل على الله أبي أخذ راحتي …. وأصلي وأنزل تحت وأتغدى وأجلس مع أمي وأبوي علة فوق رؤوسهم وبعد ساعة ونص أرقي لغرفتي وألقى جدي الى الآن مسنتر على الكمبيوتر ..ويالله يالله أقنعه يترك الجهاز وأني أبي غرفتي
جدي : ما أسرع ما أمداك تصلي وتتغدى وين لعب عيال هو رح بس هناك توني ما قعدت على النت
أنا : يا جدي ترى والله العظيم كذا ما يصير علمناك الطرارة صرت تسابقنا على البيبان …لازم نقسم الوقت ونسوي جدول للنت فاهم …
جدي : مو مشكلة خلاص بس موب الحين ما تشوفني مشغول
أنا : ( بعد ما مصعت السلك وفصلت النت ) لا الحين الوضع لا يطاق شف يا طويل العمر من صلاة العصر الى المغرب لك ومن العشاء للفجر النت لي فاهم علي
جدي : معصي وش اللي أنا للمغرب ..قطوة أنا ثانيا ليه أنت وقتك أطول من وقتي
أنا : مو معجبك خلاص اشتر لك تبلب وقدم على خط ثاني … هذا اللي ناقص بعد ..هاه وش قلت
جدي : طيب للعشاء مو للمغرب ووقت الصلاة ينحسب لي يعني بعد صلاة العشاء بنص ساعة فاهم
أنا : اوكيه اتفقنا يالله تسلك على البراد دوري جاء
جدي : خير و ش دورك جا اصبر الى العشاء أمداك تنسى الاتفاقيات
أنا : يابن الحلال بشيك ايميلي بس وبطلع ( يبي يشوف البنيات على الماسنجر ويواعدهم في الليل )
جدي : لا يمكن شف أن عطيتك الوقت الآن بأخذ من وقتك بعد العشاء علشان أشيك ايميلي
أنا :أحلى وسويت لك ايميل ما شاء لله عطني أياه علشان أرسل لك عليه صور
جدي : لا ما سويت لي ايميل بس وقتي وأنا حر استغله كيف ما أبي …
حسيت لأول مرة أن وجهي صار كبر الزيتونة المهم طلعت من البيت ورحت لمقهى انترنت وشيكت ايميلي ولحقت علي كم بنت وواعدتهم عقب العشاء .. وبعدين رجعت البيت
المهم سرت الاتفاقية بيني و بين جدي ومشت كذا كم يوم وكل يوم عن الثاني وجدي بادي في التذمر وأنا مطنشة ..وفي يوم جلست نص ساعة أقنعه أنه يطلع من النت ومن غرفتي وهو يحلف أن الأمام طول في صلاة العشاء وان و احد كان يلقي كلمة عقب صلاة المغرب جلس 20 دقيقة .. وطقاق لين اقتنع جدي وطلع بالطيب بعد ما شافني عصبت وشبكت أنا النت وجلست وسواليف مع هالبنات وشوي ألا واحد يطق باب غرفتي..قمت فتحت الباب لقيت جدي يقول لي صديقي عند الباب
أنا : وش جابه الحين وليه ما دق على جوالي مو العادة ..ومن هو ..ما قال لك اسمه ثانيا يا جدي وش مصحيك لهالوقت الحين الساعة 11 ونص
جدي: وش يدريني عنك أنت وربعك رح أنزل وشف يالله بروح أتابع قناة الجزيرة بشوف وش رسوا عليه بيضربون العراق ولا لا يقولون باول ماسك بوش ويقول له تعوذ من أبليس ترى صدام بايعها بتبن وبوش رد عليه معصي ضاربه يعني ضاربه الله لا يعوق بشر .. وشارون يقول لهم اضربوا صدام ولكم علي أذبح ألف فلسطيني في اليوم
ونزلت أروح أشوف من هذا اللي من ربعي عند الباب ولا دق على جوالي .وأطلع للشارع ما لقيت أحد والشارع فاضي يصفر ما فيه أثر أن أحد كان هنا ورجعت غرفتي ولقيت المصيبة باب غرفتي مقفول وأطق الباب
أنا : من اللي في غرفتي من اللي قفل الباب
جدي : أنا جدك معليش تعيش وتأكل غيرها بس استفتاء قناة الجزيرة على الانترنت شهواني أدخل النت وأنت يا ولد ولدي فيك عرق نذالة اللهم يا كافي عارف لو قلت لك بتقول لي لا
أنا : يا جدي أطلع بالطيب أحسن لك اللي تسويه يسمونه قلة أدب فاهم ولا لا صاير زي اسرائيل توعد وتخلف أطلع يابن اللذين قبل لا تشين الأخلاق قم طيب خلني أدخل وأنت أكتب مداخلتك وأطلع
جدي : يابن الحلال وراك بثر النقاش سخن على الانترنت اصبر ساعة ولا ساعتين تخلص الحلقة واطلع من النت
واعصب وأروح لغرفة أمي و أبوي واقتحمها بكل قوتي واصرخ فيهم
أنا : يبه شف لك صرفة في هالدايخ أبوك ترى حركات البزارين ما أحبها زين أحسن لك تطلع له وتخليه يطلع من غرفتي الآن ولا بيشوف شي ما عمره شافه فاهم ولا لا
أبوي : الله يقلعك ويقلع جدك معاك والله هالحبة اللي أخذتها بتطير على سواليفكم والانترنت حقكم ( يقصد حبة الفياجرا ) شف و أنا أبوك البوك على التسريحة خذ خمسين ريال وأنطق في أي انترنت كافيه لين تمل بس قومة من هالسرير لا تحلم ما صدقت على الله الحبة يبدا مفعولها تبي تطير مفعولها في مشاوير بين غرفتي وغرفتك وأبوي وأنت يالله يابو الشباب ترى كلها عشر دقائق وتخرب الدعوى كلها توكل
وأروح لغرفتي واطلب من جدي يعطيني المفاتيح حقت السيارة من تحت الباب و طمرت لمقهى أنترنت ..وما رجعت الا الساعة 2 الفجر واستمرينا في كر وفر أنا وجدي على النت مدة أسبوعين أبو الشباب قص نسخه على مفاتيح غرفتي وأنا جبت قفل لغرفتي والأخلاق شانت ما صرنا نسلم على بعض ولا نتواجد في مكان واحد الى بعد أسبوع وبالتحديد يوم الجمعة وراجع من المسجد ومسرع ألا جدي في الصالة وطبعا أمر من عنده وأنا مسرع وغضبان ألا و يناديني
جدي : عبدالعزيز وأنا جدك تعال أبيك في موضوع ضروري
أنا : نعم خير آمر
جدي : مو أنت ودك تسافر بهالصيف وشاب على أبوك يسفرك وأبوك ساحب عليك ولا فكر يعطيك قروش ..وش رأيك باللي يخليك تسافر ويعطيك قروش بعد أسبوع كامل في دبي هاه وش قلت
أنا : والله في ذمتك تتكلم جد … لا يا جدي ما توصل لهالمستوى أذا تبي النت عادي خذ كمبيوتري وأنا أدبر نفسي من بيوت أحد ربعي ولا مقاهي النت على قفا من يشيل ما توصل بيننا لهالمستوى
جدي : ما يخسى ألا أنت ..مو السالفة أني مستحي منك الموضوع شي ثاني تماما شف وأنا جدك تعرف أنا وأبو حمد من كثر مداخلاتنا في المواقع السياسية صار علينا طلب في مواقع الشات العربية وفي يوم من الأيام كانوا يسألوننا عن مصدر فراستنا وبينما كنت أشرح لهم نطت لي بنت حليوة وصار بيننا شوية نقاش وبعدين ارتياح بعدين علمتني على الماسنجر ونزلت الماسنجر عندي و أضافتني في ماسنجرها وتطورت العلاقة بيننا
أنا : ايوة وش بعد ألا بس تعليق يعني قصدك البنت هذي يعني سيدة ناضجة عمرها خمسين سنة ولا أكثر
جدي : أنت ورى ما تصبر بتجيك السالفة كلها لا بنت , بنت عمرها 18 سنة وطالبة بعد بكلية العلوم الطبية يالله أنك توفقها وتنجحها المهم بعد فترة أرتحت لها و أرتاحت لي وبدى الأعجاب يزيد لين صرنا نحب بعض
أنا : يا جدي عمرك 68 والبنت عمرها 18 سنة شكلها يا جدي تلعب عليك يعني ملت من اللكاعة مع الشباب قالت خلني أجرجر هالشايب ولا شكلك أنت لاعب عليها قايل لها أنك شريك الوليد بن طلال والراجحي ..وأن نص عمائر العليا لك .ما تدري أن فلوسك في البنك ما تجي مية ألف على بعض أعترف يا جدو
جدي : الا مصارحها بكل شي وهي صارحتني بكل شي أقول لك حب ما بقى ألا أنت ووجهك تعلمني الحب
أنا : طيب الحين أنا وش دوري يعني تبييني أمدد ساعاتك في الانترنت تبي تبادل تأخذ الليل ولا الفجر من عيوني ..ولا يالخبيث شكلك تبيني أعطيك صورتي علشان ترسلها لها على أنها أنت خلاص أروح أسويها بالسكانر وأعطيك أياها في ديسك غالي والطلب رخيص
جدي : أنطق طقك الله ما بقى ألا أرسل صورتك على أنه أنا من زين خشتك ..ثانيا هي عارفة أن عمري 66 مو 68 يالهيس ..اللي أبيه شي ثاني
جدي : ودي أشوف البنت وهي بعد ودي تشوفني أمس جلسنا نحكي على الجوال ..قصدي الماسنجر وندور طريقة ما لقينا ألا حل واحد
أنا : صبر صبر أنت طلعت جوال ولا أحد يدري في البيت كأن القصة جد متى طلعت الجوّال القصة حب ولهفة
جدي: ايه طلعت جوال بس لا يدري أبوك يسوي لنا أزعاج .. المهم الحل الوحيد أنها تركب معي في السيارة
أنا : يا أبو الشباب وشلون أقنعتها غيرك شباب ويالله يالله سوبر ماركت ومن بعيد هي عند قسم الحلويات وهو عند اللحوم المثلجة يتنافض من البرد … وأنت على طول أقنعتها تركب معك في السيارة ..طيب أنا وش دوري
جدي : خبرك الشوف شجر لو سقت بها يا نصينا عمود كهرب ولا بركز على الطريق ولاني قادر أشوفها ولو رحت بالسواق بيخرها قدام أبوك ولا أمك وساعتها بتصير فضيحة أما أنت حفيدي العزيز والغالي اللي يحبك جدك ..اذا وافقت وأنشاء الله نروح مركز النمر وهي بتطلع لنا وبتركب معنا ونجلس نتمشى شوي
أنا : ولا أكبر مغازلجي في الرياض يضبط هالخطة …طيب هي طبعا أذا ركبت تبي تفتش علشان أنت تقز وش رأيك يا جدي الله يسلمك أظلل السيارة علشان خويتك تأخذ راحتها وأنت تطالع براحتك ..يالله يدك على مية ريال
جدي : أمسك هذي مية ريال ..بس الله الله بالسواقة السنعة ……. المهم بعد العشا وقت الوعد كنت قد ظللت القزاز الخلفي للسيارة ورحنا السوق وجدي عظامه تتنافض المهم وصلنا مركز النمر .. ودق عليها بالجوال وطلعت البنت وركبت معنا ….أنا أول مرة بنت غريبة تركب معي في السيارة بس مسوي نفسي ثقة قلت يمكن تعجب بي ولا تعرفني على واحدة من صديقاتها .. ما دريت ألا جدي ملتفت بكل جسمه ومعطيني مقفاه وجالس يطالع فيها و يسولف معها وكل شوي يقصر صوته …ويوم جيت بالتفت ألا البنت تبي ترفع طرحتها مستحية مني الا ويلتفت جدي
جدي : وبعدين بدينا بالحركات النص كم وش قلة الأدب مو عيب عليك تخرب على غيرك ومن عاد جدك وصلت بك المواصيل لهالدرجة
أنا : يا جدي ترانا كلنا شباب يعني عادي الواحد يشوف خوية صاحبه عاد أنا بفهمك هالأمور
جدي : خوا يخوي عظامك نهلة هذي حبيبتي وحياتي وروحي وعمري … ترى أن شفتك تطل من المراية ولا تلتفت برأسك لأوريك شي ما عمرك شفته خل عيونك على الطريق وبس
أنا : طيب أقول يا جدي ما تلاحظ أنك راز مقفاك في وجهي أقول وراك مستحي بس نط ورى عندها هي ألزم
جدي : والله ما تزعل والله أني أحبك
أنا : هي أمزح معك وش تنط ورى ما تنعطى وجه يا روميو المهم وين تبغاني أوديكم ما أعرف وين الناس تروح في مثل هالمواقف هاه ترى بأوقف لين ترسون على بر
البنت : تمش بنا في طريق التخصصي ومنها على طريق الملك فهد وبعدين شارع التحلية وأذا ودك يا عزوزي بفرابتشينو بالكراميل ترى رهيب مرة نوقف عند ستار بكس
أنا : الله يسلمك والله يا نهولتي الواحد مو مصدق نفسه أنه معك في مكان واحد
البنت : مو أنت عزوزي اقصد جدك يا شين اللي يتلزق الله من المصالة يا ناس
جدي : أنت متى بتستحي على وجهك البنت تعرفك تعرفها علشان تطيح الميانة معك وتقول يا عزوزي هي تقصدني أنا وقلت لك ألف مرة خل عيونك على الطريق فاهم ولا لا أطلع مثل ما قالت نهولتي على شارع التخصصي واطلب لنا اللي تقول عنه نهولتي فشابشتينو
أنا : فرابتشينو الله يسلمك بس بس مو كأنها ماصخة من أول مرة تشوف فيها البنت تطمر بها لكوفي شوب وش بيقولون الناس رجالين وبنت مع بعض
جدي : خير أشوفك بتقلط معنا هونّا ما نبي فشابشتينو ناس ما تنعطى صدق وجه يا نهولتي ألا أنتي يا حياتي ما قلتي لي ايهم أحسن أنا ولا الصورة هاه ولا تجامليني قولي الصدق
البنت : يا شيخ أي صورة أنت في الأصل أحلى أحلى بكثير والله قمر يا ناس قمر يهبل تصدق صكيت على هالبزارين اللي مالين الشوارع والنت ما غير مغازل وترقيم
أنا : لولا الله ثم هالشباب التافهين على قولتك ما كان شفتوا بعض يا قيس وليلى
ونجلس ندور بالسيارة وجدي والبنت سواليف وأنا مطنشيني بقوة ولا كأني موجود معهم وبعد ساعة ونص رجعنا البنت عند مركز النمر هي حولت وأحنا رجعنا للبيت ووصلنا للبيت وقيس هيمان ذابحه الهيام مرة يمسك حزمة جرجير ويجلس يقطع أوراقها ومرة يمسك عذق تمر ويأكل فيه وعيونه سرحانة وطايرة في السقف حتى الانترنت ابتعد عنه شوي وبعد 3 أيام دق علي من جواله الساعة 12 في الليل وقال تعال غرفتي ضروري… ورحت له
أنا : هلا والله يعجبني الرجال اللي يحترم كلمته يالله يا جدو يدك على 5000 الآف ريال علشان أحجز على دبي ترى الرحلات كلها زحمة ورغم أن دبي حر بس يالله أحسن من القعدة في البيت
جدي: أقول يا عبدالعزيز يا ولدي وش رأيك أذا خلينا دبي تصير القاهرة والأسبوع يصير أسبوعين والخمسة الآف تصير عشرة الآف هاه
أنا : والله يا جدي أني مستحي منك بصراحة الواحد مو عارف وين يودي جمايلك ..أنت كبرت بعيني مرة لو داري من زمان كان فريت الأسواق أرقم لك أنت كريم وحنا نستاهل
جدي : بس في شرط الله لا يهينك مو كذا عشرة الآف بلوشي
أنا : افا ما في أحد هالوقت يسوي شي لله ..وش شرطك قل يا جدي
جدي : أنا ونهلة حبيبة قلبي اشتقنا لبعض يا أخي بعد الموعد الأول لا للنت معنى والتليفون اصبح ما يكفينا ..ودي أشوفها يا عبدالعزيز ودي أشوفها ..وهي بعد ودها تشوفني ( جدي يحكي وهو يزحف يمي لين صار بحضني )
أنا : طيب الزبدة وي تبون يا قيس وليلى يعني أنا وش أقدر أسوي لكم
جدي : أبي أشوفها وأمشي معها بروحنا وأمسك يدها ونجلس نسولف بروحنا
أنا : أخس ياذا الحب اللي مقطع بعضه .. وتجلسون في قهوة وتجلسون تبوسون بعض وتتمقلون في بعض مو الدعوى صايرة بربسة ماحنا في الرياض أبد وين تمسك يدها وتمشي بها يا أبو الشباب ترانا ماحنا في باريس
جدي : جاك بالحكي يا شينك أذا استعجلت نهلة تقول لي في حي السفارات الناس تقدر تمشي وتروح وتجي على كيفها بس حي السفارات ما يدخلونه الا عوائل بس فهالمرة بنأخذها من مركز صحارى وبعدين ننطلق لحي السفارات وننزل أنا وهي ونمشي يعني ساعة ساعتين على حسب الجو
أنا : أنت وهي تنزلون أنا وش أسوي أقشر بصل ولا أمشي وراكم كأني حارس شخصي كأنكم بديتوا تخورونها
جدي : والله عاد من بغى الدح ما يقول أح اذا وصلت القاهرة ما أوصيك لا تخلي بنت ألا تمسك يدها وتمشي بها وأنت أصلا مو فارقة معك أنت مو راعي حب .. المهم هاه موافق ترى أن ما وافقت حتى دبي ما فيه .. وش قلت
أنا : خليت لي فيها قول بأشوف وش تاليتها معكم يا روميو وجولييت بس هالعلة أمي وأبوي ترى بدوا يشكون بطلعاتي معك وش أقول لهم لو سألوني
جدي : ما عليك منهم لو قالوا شي أنا باصرفهم بس اعتمد يعني أدق على نهلة حياتي
أنا : دق الله يلعن أبو القهر دق أبو 68 مطيح غراميات ومواعيد وأبو 24 سنة صاير تاكسي الغرام
وفعلا بكرة رحنا لمركز صحارى وركبت معنا ست الحسن والجمال ..وانطلقنا لحي السفارات ونزلوا العاشقان وجلست أنا في السيارة منزل الدرايش أتنسم من البراد وشوي وتوقف جنبي سيارة الهيئة ويسألوني
الهيئة : أنت .. وش موقفك هنا و وش مدخلك ما تدري أنها منطقة ديبلوماسية وللعوائل بس
أنا : يعني يا طويل العمر أذا لا سمح الله ديرة من هالدير أرسلت لنا سفير ولا قنصل عزابي بترجعونه ولا تبونه يداوم من البطحاء ..على العموم جزاك الله خيرا أنا جيت مع خطيبتي وجدي ..على فكرة خطيبتي هي بنت عمي ..يعني جدي مع حفيدته ..ليه أنا أقول لك لأن حصل اختلاف بيني وبينها هي تبي شهر العسل في جنيف وأنا بصراحة ما عندي قلت لها أسبوع في ماليزيا وأسبوع في دبي ..بس هي معاندة قام جدي راح يمشي معها علشان يقنعها ألا أنت وش رأيك وش تقترح
الهيئة : أنت وش تخربط المهم يا تروح معهم تمشي معهم ولا تطلع برى الحي بس وقفتك هنا غلط فاهم ولا لا
أنا : والله ودي طال عمرك بس جدي مزكن أن شافني أوطوط حولهم والله أن يقص رجولي قص يرضيك عاد يقص رجولي طبعا لا لازم تقدر أنت الظروف
الهيئة : شف يا تنزل الآن وتمشي قدامنا ونتأكد أنك جيت مع جدك وبنت عمك اللي هي خطيبتك يعني أنك مع عائلة ولا والله أن تركب هالصالون اللي قدامك وش قلت
أنا : و الله يا طويل العمر أن تحدني على مر الشري .بس أمرك ( يتمنى هاللحظة علشان يخرب على جده ) ألا وشوي وتجي نهلة مسرعة وتقول أنت وش اسمك ..الحق جدك طاح
الهيئة : و شو ما تدري وش اسمك وشلون بنت عمك وخطيبتك هاه
أنا : صدق أنكم بعد ..البنت تقول لك جدي طاح يعني انصدمت انشل تفكيرها بروح أشوف جدي وش صار عليه وأفتك من الهيئة وأوصل لجدي وألقاه متكرفس بين الشجر و ما قهرني ولا حرني ألا أن البنت تصيح عليه من قلب و سيقان جدي ناشبة بين أغصان الشجر
أنا : يا جدي الله يهديك وش صار لك ألبس نظاراتك يعني تخاف ما ينقال عنك جذاب مع النظارات اللي كأنها دريشة مدرسة متوسطة ..
جدي : لا والله بس مدري ما انتبهت لهالشجر اللي نصه ميت وغصونه منثرة في الأرض
أنا :أصلا أنت وش جابك للشجر هم حاطين لك رصيف وش طوله ووش عرضه بس أنت وش اللي موديك تتعمق وسط الشجر وش كنت ناوي عليه يالشيطاني هاه مانت عاقل
البنت : لا والله مو كذا بس هو كان يبي يوريني وشلون العصافير تنصاد من زمان
أنا : وأنتي أي واحد يقول لك تعالي معي بأوريك شي على طول تجين ..بنات آخر زمن وينكم يوم الشباب اللي زي الورد يطرونكم تدخلونهم سوق المملكة والفيصلية ….. تعال يا جدي تسند علي لين أوديك للسيارة ..هذي عواقب المراهقة المتأخرة ..وركبنا السيارة
جدي : أقول يا عبدالعزيز وش رأيك قبل ما تحرك السيارة ترجعني ورى ودي أمدد رجيلاتي ..يوجعوني
أنا: أشوفك ماأنت عاقل يا روميو الجنادرية .. تبي ترجع ورى رجولك توجعك هاه ..مو مشكلة أنت ترجع ورى ونهلة تجي تجلس قدام جنبي علشان تعرف تمدد رجولك صح
جدي : وجع يوجعك وش تجلس جنبك هي فوضى ولا لعب عيال خلاص برجع الكرسي علشان أقدر امدد رجولي
البنت : هذا اللي ناقص اركب قدام جنبه..والله ودي يا عزوزي ..أقصد حبيبي أنك ترجع ورى وتحط رأسك على صدري وتمدد رجولك وترتاح وأحط يدي على رأسك
أنا : تراني أسوق أرفقي علي ..شوي واخش بماصورة ما أتحمل المشاهد الساخنة أرحموا من في الأرض يرحمكم من في السماء ..الله يلعنك يا وفاء ( بنت تعرفت عليها من زمان ) يوم جيت بألمس يدها يوم أشوفها في السيفوي ..بغت تجمع الخلق كلهم علي..ألا أقول يا نهلة..يعني لو شاب مثلي بعقليتي أعجبتك أفكاره وشدك بوسامته .. تقدرين تطلعين معه مثل ما تسوين مع جدي
البنت : أولا أحترم نفسك وناده أبو فلان ولا عزووزي ..ثانيا لا وألف لا أنا ما أثق في شاب ناقص عقل هذا اللي باقي ..عايفة عمري هذا اللي ناقص
أنا : أقول لا يكثر بس وين تبين أنزلك في صحارى ولا وين …طيب ما تعرفيني على واحدة من صديقاتك لو بزر
البنت طنشتني ونزلت السوق ورحت لبيتنا ونزلت جدي وجلست ليلتين ما غير امرخه بزيت الزيتون وهو يونون وبعد ما لانت رجوله شوي ناداني مرة ثانية
جدي : أقول يا عبدالعزيز وشلونك وأنا جدك عساك بخير
أنا : أنا الحمدلله أنت بس اللي عقب ما تكرفست بالشجر في الحي الديبلوماسي ينخاف على عصاقيلك
جدي : لا الحمدلله بخير ..بس ما قلت لي ما ودك تسافر أسبانيا
أنا : افا فيها أسبانيا الله يستر وش ورى أسبانيا ..طبعا أشتقت لحبيبتك صح ولا لا أنا نهايتي على يديكم
جدي : تصدق عاد أنك ذهين .. تصدق يا ولدي يوم قالت نهلة تعال ورى عندي وحط رأسك على صدري ..وأنا الدنيا تلف فيني لف حتى بصلاتي أهوجس ..بها الله لا يوريك …تعرف وش ودي
أنا : يا خبيث يا مجرم تبي تستغل أن أهلي كلهم مسافرين وما في البيت ألا أنا وأنت وتبي تجيب البنت هنا وتستفرد بها هاه ..يا لئيم ..
جدي : انطم لا بارك الله فيك صدق تفكيرك أسود بعذر البنات صاروا يخافون منكم يا عيال هالأيام ما ينلامون
أنا : تبي تحط رأسك على صدرها فهمني وشلون تجي ما لها الأ الطريقة اللي أقولها
جدي : لا في السيارة يا ذكي ..أذا تبي أسبانيا تمشينا زي أول مرة بس أنا أجلس ورى ولا تحكي ولا تقول شي ولا والله أبشر حتى جدة ما أخليك تسافر لها هاه وش قلت
أنا : أنت خليت فيها وش أقول طيب يا ذكي وشلون بتأخذ راحتك في السيارة وأنت عارف أني ما ظللت الأ القزاز الخلفي بينما الأمامي ما ظللته ولا شي
جدي : بسيطة هذي مية ريال وظلل السيارة كل أبوها حتى أنت لا تلتفت فاهم ولا لا
أنا : يالحبيب فيها مخالفات غير يطلع لك شرطي يقول يالله قشع التظليلة كلها ..ناوي تبهذلني قدام الناس
جدي: ما عليك أنا أدفع الغرامة واذا قشعتها أعطيك فلوس وتحطها مرة ثانية ..مو تبي تروح أسبانيا
أنا : يا أسبانيا اللي مدري وش تاليتها ..أوكيه من وين بنأخذها هالمرة ..
جدي : أنا ما أقول مالي وما يدعمني الا حفيدي حبيبي من بندة العزيزية … بس ونجلس ندور ساعتين والبنزين علي بعد و بعدين نرجعها ولا كأن شي صار
أنا : يا والله قلبي يقول نهايتنا كلنا في مركز الهيئة بس وش أسوي شايب وطبت عليه المراهقة المتأخرة ….. المهم ظللت السيارة كلها ورحنا أنا وجدي وهو راكب ورى ..ومرينا بندة العزيزية ..وركبت معنا البنت وجلست أدور بينهم و المراهقين نازلين كلام حب وما غير يمسكون يد بعض ..الله يرحمك يا عبدالحليم حافظ لين وصلت أشارة التخصصي مع التحلية وهناك كان تفتيش وعلى اللي جرا ,,, نبهت المراهقين اللي ورى ..ونزلت طرف الدريشة
الشرطي : وقف على جنب وقشع التظليلة يالله وهات الرخصة والأستمارة يالله
أنا : الله يسلمك ما ودك تمشيها مخالفة وخل التقشيع بعدين الله لا يهينك بلا أحراجات
الشرطي : أنت ما تفهم هاااه يالله هات الرخصة ووقف على جنب وقشع التظليلة قدام عيني
أنا : يا أخي العزيز في ورى … يعني …. وش أقول لك ..لازم تفهم عاد تراني تعبت
الشرطي : لا تقول ولا تعيد ولا تزيد سو اللي قلت لك عليه أحسن لك ولا تبي تكمل مغازل على بالك بهالتظليلة أمير ولا ولد وزير ..أخلص علينا .ما راح يرتاح بالي لين أشوفك مقشع على الأقل نص التظليلة الأمامية وقدامي هالحين ..بعد يالله لا تعطلنا .. وشوي وجدي وينزل الدريشة
جدي : الله يسلمك يا حضرة الضابط ..أنا أقول لو تسامحه تراه ما ظللها ألا يوم قلت له ..يا ولدي أنا رجال كبير وظهري يوجعني لازم بنتي تهمزني كل شوي واستحي وهي تهمزني قمت قلت له يظظلها علشان يستر علي علشان كذا تبي تعطيه مخالفة عطه بس لا تخليه يقشعها وأنا في السيارة
الشرطي : والله يا عمي ما دريت أنا أحسبه من الشباب الطائش هاليومين بس ما دريت أن عنده ظروف على العموم أمشوا ولا مخالفة ولا يحزنون ..في شي اسمه روح القانون و نمشي من التفتيش
أنا : ما شاءالله ويقولون الشباب مراهقين وينصبون ويسوون مشاكل ما يجون يشوفون بعيونهم .أنت يا قيس وراك لاز في ليلى ( لاز = لاصق لصقة ما بينهم لو مليمتترات ) تراني موب الشرطي يا تخليها تعرفني على خويتها ونصير كل واحد وخويته يا تنضبطون وتعقلون دامكم في سيارتي ..
جدي :أنت خلك على جنب وقزز,, نهلة أبي أتزوجك خلاص تعبت من المواعيد وفرخ أبليس ( يقصدني أنا ) فوق رأسنا
أنا : ( ضربت فرامل بقوة بغيت أسبب كارثة في الشارع ) أنت وش فيك خقيت مفطر بيض خايس ما أتفقنا مغازل وتدييت وبس زواج معصي .. وش فيك اندمجت في الدور يا قيس روقنا يا روميو ..
جدي : ما عليك منه وش رأيك يا حياتي
البنت : والله يا حبيبي فاجأتني ماني مصدقة أنك بتقولها ماني قادرة أستوعب من الفرحة … مرة مرة مبسوطة يا قلبي ..الحين كبرت في عيوني أكثر
أنا : هييي وش يكبر أكثر من كذا الرجال شوي ويطق السبعين يكبر أكثر يوصل التسعين ويموت ..وأنت يالرومانسي أطلع من الدور ما بقى الا تكتب لها قروشك اللي في البنك ترانا ما استحملناك ألا علشانها … ياشباب تبون تبوسون بعض وأنزل من السيارة تأخذون راحتكم مو مشكلة بس زواج وخرابيط ما اتفقنا .. أذا رجع أبوي وش يقول عني خربت أبوه ..وزوجته في بنت من معارفي في النت
البنت : بس يا حبيبي في مشكلة صغيرة من ولي أمرك وكيف بتتقدمون لي أهلي صعبة يقبلون بك و أنت بروحك
جدي : بسيطة هالصتيمة اللي يسوق هو ولي أمري نروح لأبوتس ونطلبه منتس
أنا : معصي أخطي معك خطوة واحدة أنت بايع عمرك بكيفك لأن أبوي ولدك بس أبوي أبوي مو ولدي ..يعني أنا بأنجلد فاهم علي …
جدي : والله أذا ما وافقت لا أفتن عليك طلعة من البيت ما تطلع فاهم ولا لا هاه تبي أسبانيا ولا تقضب أرضك
أنا : الله يلعن أسبانيا اللي بتذلني فيها مو مشكلة خلاص أصير ولي أمرك
ونزلنا البنت في العزيزية ورحنا لبيتنا وجدي ماسك عسيب النخل اللي في الحوش كله وعلى بيوافقون ما يوافقون وانشاءالله بيوافقون وأنا رجعت من صلاة العشاء ( أبشركم صرت أصلي في المسجد ) وأبو الشباب ( جدي ) أول من طلع من المسجد ولما دخلت لقيته يبكي ويصيح والدموع أربع أربع
أنا : يا جدي وش فيك وراك تصيح وش صار أبوي ولا أحد أعمامي صار له شي
جدي : لا ما يخسون ألا أبوك وعمك يهموني ..نهلة يا عبدالعزيز نهلة .. أهلها ما وافقوا قالوا والله أن وطوط هالشايب بيتنا أن نقص رجله قص ..بيفرقوننا عن بعض
أنا : بس هذا اللي مضيق صدرك يابن الحلال بدال البنت عشرة . هم أكثر من الهم على القلب وسع صدرك
جدي : لا القلب ما يحب ولا يبغى غير نهلة ولا تملى عيني ألا نهلة أبي نهلة آه يا قلبي
أنا : يا جدي الله يهديك يعني اللي خلقها ما خلق غيرها ..خذ مثلا محاكيك ما ترزع بنت السماعة في وجهه ألا لقا ثاني يوم غيرها ..كلهم بنات وش فرقت هذي عن هذي ..غسل وجهك و بكرة من العصر نسنتر في المملكة ونشتغل ترقيم ..هناك في بنات وعجز على الريحة ما عليك بس
جدي : لا ما أبي لا آكل ولا أشرب يا أموت يا أهلها يوافقون علي .. مالي دخل مابي مابي
أنا : يا جدي تراك مصعت قلبي .. والله العظيم ما يسوى عليك يا جدي في هالعمر يصير بك كذا
و استمرينا على هالحال كذا يوم جدي لا يأكل ولا يشرب ( مدري كانه يآكل من وراي ) .. ارتعت عليه أذكر أن عندي بنت عمتى (شهد) تدرس علم نفس دقيت عليها علشان نتناقش في موضوع جدي أقترحت علي أقتراحين الأول أني أجيب جدي لعيادة نفسية ( ايه كثر منها اقنعه والله أن يذبحني ) والثاني أوديه لمكان كل اللي فيه شياب حوله يعني مثل مركز الأمير سلمان الأجتماعي يمكن يلتهي شوي ..أنا جلست أفكر بالأقتراح الثاني من حيث أنه منطقي شوي بس ما هان علي جدي آخرة عمره أنطله هناك من الصباح وأخذه الليل ولو يعني هذا ..جدي . فطرت على بالي فكرة .. أني أشغل وقته بنفسي .. رجعت للبيت وقلت له
أنا : يا جدي وش رأيك نطلع مع بعض نروح نتمشى شوي ..أوديك أماكن حلوة في الرياض ولا نروح شارع الحوامل نمشي .هاه وش رأيك
جدي : لا خلني مالي خلق أطلع قلبي متقطع من الحب والفرقاء … رح أنت بروحك ..
أنا : لا بتطلع وأنت ما تشوف الجادة تبيني أطلع وأخليك بروحك ..تعالي بوديك مكان حلو كله نخل تعال بس
جدي : يا عبدالعزيز الله يهديك بس رح بروحك وكانك بتطلع علشاني ماله داعي أدخل النت مو أنت تحب النت رح هناك أبشرك ما عادني باغي النت ولا مطريه أبد يالله ما أحد بيضيق عليك ويشاركك في غرفتك
أنا : افا بس فداك النت وبنات النت كلهم ( وفاء والبنات الخايسات بس ) أنت جدو حبيب ئلبي تبيني أتركك لا لا ترى أن ما جيت معي والله لا أزعل منك ولا أكلمك ابد
أنا : لا ما عليك بس أنا بأنبسط أكثر أذا جيت معي يالله تعال …. وطلعنا وجلسنا نتمشى ونفر الرياض فر وديته عتيقه و شارع الثميري وقصر الحكم … و العاذرية ( موب عاقل يعني فتحوها للمواطنين أيه طل ) توقعت أني بأكسب أجر بس, بس طلعت عندي جدي سواليف تموت من الضحك عن أيام من أول وكيف أول حب في حياته بنت أبو محمد ..يوم يحبها كان عمره 18 وهي عمرها 8 سنين ما شاءلله عليه ومع أنه أعرس على جدتي بعد ما حبها بسنة بس ظل متابع أخبارها حتى يوم تزوجت وجابت عيال وعدد لي اسامي عيالها وأنه صلى على رجلها يوم توفى وراح يسال عنها على أنه بيعزي … والله ذا الشايب من صغره راعي حركات .. ووديته لمطعم متخصص في الأكلات التراثية ..صدق حامت كبده بس معه حق هالهنود مسوين لي فيها أنهم يسوون جريش وقرصان ..وقص لي قصة عمي مساعد اللي دايم يتفلسف علينا وينصح دائما بالحذر والتوقي والتفكير وأنه ما وصل للمرتبة العالية اللي وصل لها الا لأنه أنسان حريص ..أنه يوم كان عمره 10 سنين طاح في القليب .. ( البئر) وكيف جلسوا ساعتين على ما طلعوه وجلسوا أسبوع ما يشربون من القليب من عقب عمي و خياسه ..ما رجعنا ذاك اليوم ألا الساعة 11 في الليل من التعب نما على طول ثاني يوم من بعد ما صلينا العصر لقيت نفسي أترجى جدي يوافق نطلع ومرينا على حارة بيت جدي القديم وجلست معه وهو شياب من الحارة صح نص الحكي ما فهمته بس اللي فهمته يونس ويوسع الصدر … استمرينا على هالحال أني أطلع مع جدي لمدة أسبوع وبعدها ناداني جدي
جدي: والله يا ولدي ماله داعي تتعب نفسك وتتفرغ علشاني وتترك ربعك والانترنت اللي تحبه
أنا : تصدق يا جدي لو داري أنك كذا وسيع صدر من أول كان نشبت لك بلا نت بلا هم ..وربعي لو يدرون عنك بعد كان حرصوا عليك أكثر مني ..ما تشوفنا من الزهق ما نطلع مع بعض بس نتقابل على النت نتهاوش ونتمازح وبس
جدي : متأكد من كلامك ولا بس تجاملني ..
أنا : يا شيخ روقنا وشوله أجاملك عفوا قصدي يا جدي بس والله أتكلم جد
جدي : يعني ما تزعل لو قلت لك أني لعبت عليك
أنا : لعبت علي كيف وشلون
جدي : من العام يوم أجيكم في الصيف وأنا ضايق صدري عليك وزامل منك ..نوم الى الظهر وتسهر على هالانترنت . سألت بنت عمتك شهد يعني بما أنها تدرس علم المهابيل
أنا : قصدك علم نفس أيوة كمل وبعدين وش صار
جدي : أبد سوينا هالخطة علشان نغيرك بيني وبينك أني ما توقعتك تتغير بس قلت وش ورانا .. يا ولدي الدنيا مو بس نت وطلعات مع ربعك ..ومو معنى أنك كبرت أنك ما تهتم بأهلك ..تصدق مع أني ما عمري جلست عند عمتك بس ما عمري فقدت بنت عمتك كل أسبوع تجي تزورني لو عندها ألف شغلة وتكلمني وتسولف معي مع أنها أصغر منك
أنا : طيب الطخمة نهلة من تصير ( الطخمه = الحلوة )
جدي : بنت عمتك شهد وهذا بعد شي ثاني هذا كبرك ما تعرف أقاربك متى آخر مرة زرت عمتك ولا بيتها
أنا : قبل سنتين أو ثلاث بس دام بنتها قصدي بنت عمتي طخمه لا لازم الواحد يصل رحمه
جدي : يا ولدي زين الواحد يكون له أصدقاء وربع وهوايات وشي يشغل وقته ..بس الأهم أنه ما يتخلى ولا يبعد عن أهله لأن في الأول والآخر ما للواحد ألا أهله فهمت علي
أنا : مع أني حاقد عليك لأنك لعبت علي بس تبي الصدق معك حق أقول يا أبو الشباب ما ودك تسافر دبي أسبوعين
وعلى حسابي الشخصي
جدي : وش تقصد
أنا : ضبطتك مع نهلة ضبطني مع بنت بنتك يالله مو تبيني أزور أقاربي يالله على بيت عمتي …….
مع أني ما شفت أي واحد من أجدادي بس كان ودي يكون لي أجداد عايشين ..وجودهم يضفي نكهة و لذة للبيت ياليت كل من عند جد أو جده أنه يستغل الفرصة علشان ما يندم على ضياعها بعدين وسلامتكم
أتمنى أن تكون القصة أعجبتكم وحازت على رضاكم
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
