قصة محلي ومستورد

قصة محلي × مستورد كاملة مكتوبة

السلام عليكم ورحمة الله وبركاتة ..في البداية ترى القصة طويلة حبتين يعني لا تزعلون من أولها …ثانيا اذا كنت أصغر أخوانك فهنا تكبر المصيبة ..الكل يبيك تتزوج حتى جارتكم تبيك تتزوج .وأنت مو عارف ليه يا مسكين …أخوانك يلمحون لك يقولون لو كل واحد بسيارته يطلع هو وزوجته وعياله لاستراحات الثمامة كانت فلة طيب روحوا أحد ماسكم ..يقولون بس اذا انت ما رحت معنا الوالدة تزعل ..ومالنا خلق ناخذك معنا في سياراتنا و حريمنا معنا ..أزعاج تفتك من البيت ..يقابلك المجتمع كل مكان وكل شي للعوايل ..ما تركوا للشباب الا القهاوي والشيش وكل شوي الهيئة مسوية كبسة يا قناة مشفرة عارضينها ..يا بزارين صغار داخلين ..وفوق هذا كله ربعك ..الشباب اللي ضيعت أجمل سنين عمرك معهم الواحد اذا تزوج قلب من أعز صديق لك من ذاك الشخص الأليف اللي 24 ساعة مرتز يا في ملحقكم يا قدام باب بيتكم لذاك الشخص اللي يشكل بك ولا يرد عليك وأنت تكسر جواله تكسير من المكالمات ..واذا صدتاه في شارع ولا مكان قال لك ياخي الزواج حلو بس كله مشاغل ..يالله أنت بعد وش فيك ما تتزوج ..وأمك تحجر لك كل ليلة و أنت جاي على وجه الفجر هاه يا وليدي متى بنفرح بك أبي اشوف عييلك قبل ما أموت وترد عليها يا يمّه بعد عمر طويل..وتطقها الوالدة صيحة متى و أنا أمك متى …مهما كان الفتى شجاع لابد أن ينخ مع الوقت ويضعف أمام كل تلك الضغوط ..وهذا ما صار لي ففي يوم من الأيام المشهودة كانت راجع للبيت وكنت متأخر و في متعشي في محل بروستد خايس شكلي متعشي دسنتاريا ليلتها .المهم رجعت البيت وبطني يوجعني في ذيك الليلة ورحت لدورة المياة وأنتم بكرامة وصاحبني أمساك شديد ..يعني بروستد يجمع بكتيريتين متناقضتين ..وانا في دورة المياة وأنواع المزاحر والعرق ..وما وعيت الا أمي شوي وتكسر الباب من قوة الطق …والا أمي تهاوشني ..توك تجي ياللي ما تستحي على وجهك يا قليل الحيا الحين لو أنت معرس زي أخوانك مو كنت الآن في جناحك عند حرمتك ..وكل ما قلت لك اعرس وافق ادور لك تجلس تقول ماني مهيأ ماني مستعد .ومن هالحكي ..عزييز وينك رد علي حاتسني ..وفي تلك اللحظة انفك الأمساك عني .وارتحت ومن زود البسطة قلت لأمي موافق موافق بس فكيني ..خلاص …الا وتفتح أمي الباب من الفرحة ( انتبهوا اذا دخلتوا دورة المياة مهما كنتوا مضطرين لا تنسون تقفلون الباب ) والا اصرخ في وجه أمي نعم وش تبييييين ..قالت لي من صدقك أنت موافق قلت لها ايه بس اطلعي وسكري الباب .وترد علي أمي أول احلف انك موافق مو تسايرني ..وارد عليها يا ميمتي وشلون احلف وانا في الحمام وهي تقول ..رد علي ترى بادور لك بنية من بكرة الصبح ..مو تقول لي كنت امزح معتس ..

ومن الصباح وأنا توني قايم ..و نازل للمطبخ علشان افطر على الكورن الفليكس ..والقى أمي تقول لي تعال تعال وأجي لها بكل سباهة وعيوني مليانة غمص ..

أمي: لقيت لك عروسة ولا قبلها ولا بعدها .. تهاني بنت أبو عبدالله اللي كانوا جيراننا في ظهرة البديعة قبل ما ينقلون للسويدي ..حوالي من 7 سنين ..تذكرهم صح .

أنا: اوووه بنت ذاك الشايب المغثة ..يا كرهي له ..اللي صاجنا على برميل الزبالة حطوه في النص بين بيتنا وبيتهم ..واللي اذا وقفنا سيارتنا تحت شجرتهم الميتة صاح لا تسرقون ظلالنا.. واللي يرحم والديتس يمّه شوفي غيرهم اخر المتمة جدي عيالي يصير هالعلة .

أمي: استح على وجهك الا ماشالله عليه صايم مصلي ..وناس أجاويد ويبون الستر لبنياتهم ..ما راح نلقى أحسن منهم وبنتهم ماشالله عليها طريبة ومميليحة ..هو ما تذكرها .

أنا: علشانهم يبون الستر لبنياتهم اتوهق بهم أنا أكثر ما كثر الله الجمعيات الخيرية ..ثانيا وش اللي اذكرها .خبري بها يومها في رابع ابتدائي ..ومن بعدها غطوها ..ثانيا هالشايب العلة خلانا نشوف شي مسنتر على دكة البيت 24 ساعة ..حسبي الله عليه حتى اذا سطحت كورتي على بيتهم عساي أشوف شي ..يشقق كوري ويقهرني زود.

أمي: اها بس الا بتاخذها وأنت رجال ..ثانيا من بنلقى ناس نعرفهم وبيقبلون أن بنيتهم تعيش معنا في البيت ..هالبني هالأيام صايرين يروعون كل واحدة منهم تبي بيت بروحها.

وبالفعل اقنعتني أمي ورحنا لهم في السويدي أنا وأمي وابوي كان مسافر ..وأخوي الكبير جا معي بداله…على فكرة بيتهم عند شارع السويدي العام …

ابو عبدالله: هلا والله بقصرانا القدام ..وينكم وش الدنيا بكم ..وين رحتوا …

أنا: رحنا للشمال طال عمرك ..تركنا ظهرة البديعة .

ابو عبدالله: يعني وين الشمال عتيقة ولا عليشة …ولا الملز اووه والله وصرتوا جخ رحتوا للملز .

أنا : وش ملزه الله يهديك بس هالحين الملز صار شمال ..طال عمرك شفت برج المملكة العمارة المخروقة اللي ماغيرها حنا وراها هناك يعني من سطح بيتنا ..أشوف مواقفهم .

ابو عبدالله: افا وأنا عمك وش وداكم هناك ترى موب زين أجل أهل ذيك العمارة مدري البرج كاشفين بيتكم ..و تلقى أمك وحريم أخوانك ما يقدرون يطلعون للساحة …

أنا: اولا ما أنت عمي اذا صار نصيب وأعرست على بنت وقتها تصير عمي,ثانيا الله يسلمك هالأشياء ما تفوتنا حاطين مظلة شينكو .. وعاكفينها بعد تعرف الفطانة عرق فينا .

ابو عبدالله: طيب وأنا عمك لا سمح الله اللي صار في نيو يورك صار في حدى هالبرجين ..بتقعدون تلقطون قزازهم من حوش بيتكم ..ولا هالخرسانات تمطر فوق روسكم.

أنا: الله يهديك يا عمي فال الله ولا فالك ثانيا ..برج المملكة ما قصروا حاطين مخرج طائرات ..والفيصلية ابن أمه يجيبها ..راسها صغير ..يبيله طيار وقيعي يركد الطيارة عليها …مو واحد يشطفها ..ثانيا ديرتنا محمية من رب العالمين ..ولا تشره على هالمهبل اللي يرمون علب شروخة ي روعون الناس في الشوارع والله ان الناس ما عندك أحد .. يوم حرب الخليج اذا أطلق صدام صاروخ تناتقنا للسطوح ..قال لك يحضرون ألعاب نارية ..ثانيا ترى بيننا وبين برج المملكة قيمة 30 كيلو او أكثر يعني مسافة لا بأس بها

ابو عبدالله : ولو وأنا عمك الحرص واجب لو شاورتوا قبل ما تنقلون ..المهم ما علينا ..بما أنك الآن جاي تخطب .الزم ما علي أنت لازم نعرف عنك كل شي .

أنا: حشا ..ماني معرس أنا مقدم على وظيفة في الاستخبارات المركزية ..على العموم أنا ولا بيهمني اسئل اللي تبي بس مابي الاسئلة الماصلة ..عندك هوت بيرد كروت قنوات ومن هالخرابيط. ولا ليه باعرس يعني.

ابو عبدالله: وشلونك والصلاة في المسجد ترى خبري بك يوم كنت تنحاش وتروح تلعب ورى المسجد لين يطلعون الناس من الصلاة ثم ترجع لبيتكم ..وانا عمك تهاون بكل شي الا الصلاة.

أنا:لا أبشرك طال عمرك الحمدلله ولله الحمد ولا تسليمة تفوتني الحمدلله لك يا رب الا الفجر بصراحة أكون نايم ووراي دوام فلازم أصحى بدري ..وأحيانا أكون الظهر في العمل ..فما اقدر اصليها في مسجدنا ..أما العصر فأكون توني راجع من العمل ومتغدي وحاط راسي بارقد ..بس المغرب ..غالبا أكون ما صحيت من نومة العصر أو طالع لمشوار أودي أهلي ..بس العشا ولله الحمد هي بالذات وقتها صعب يا مباريات ..يا طالع للثمامة مع الشباب ..بس الباقي ولله الحمد مواظب عليها في المسجد .عندك صلاة الجمعة ..وصلاة العيد .الحمدلله لك يا رب.

ابو عبدالله: وانا عمك ترى ذا زواج موب لعبة ترى بأسئل عنك أمام المسجد ولا المآذن أشوف وشلون صلاتك .. موب الدعوى بس حتسي…

أنا: لاجزاك الله خير اذا بتسئل اسئل حارس المسجد لا تسئل الأمام ..أولا لاني يالله يالله الحق على الركعة الأخيرة وأكون في آخر صف ..ثانيا هو يغسل سيارتي يعني لو يقول كذا ولا كذا والله لألعن والديه …أجيب حارس المسجد اللي في الحارة الثانية..

ابو عبدالله: لا وأنا عمك كلش الا الصلاة تراها عمود الأسلام أياني واياك تتهاون فيها …

أنا: طال عمرك انا ليه جاي علشان أكمل نص ديني يعني اذا كملت نص يعينني على النص الثاني ولا وش الفايدة أنا اجمع نص ويبقى لي نص .

ابو عبدالله: المهم احرص على صلاتك بس يا وليدي ..بس قل لي عساك ما تتن وكيف جوازك ..ما ودك تجيبه لنا.

أنا: الله يسلمك بس أشيش في المناسبات اذا لزموا علي الشباب مير ويكثر خيرك لا الحمدلله توني مجدده من ست أشهر لا تخاف ما تقصرون والله اذا جيت باجدده المرة الجاية باعطيك اياه شكل معارفكم واجد في الجوازات يا عمو.

ابو عبدالله: وش نجدده أنت ووجهك ..نبي نشوف وين سفراتك وين كنت تسربت له وتنطنط في هالاجازات والعطل لاتكون من اللي يطمرون قبل للبحرين ..بس

أنا: لا وش بحرينه الله يسلمك ذيك ايام الطفارة الحين بيروت ودبي ..بس ولو الواحد يبقى وفي للبحرين يعني خميس وجمعة ..ابد مسنتر هناك ..ثانيا وش عليك وين أنا اروح ووين اجي أنا سئلتك وش كنتم تسوون في أبها يومكم تطمرون لها كل سنة …

ابو عبدالله: بس أخاف انك يومك هناك ….استغفر الله بس وبعدين تنقل أمراض لبنتي ترى ذيك الأماكن ما حط الله فيها خير.

أنا: وانت صادق يا عمي بس شف ماشالله ولدك دحيم أعرس وجاه عيال ..ولا صار لهم ولا لمرته شي ..وما كان بيني وبينه في مرقص الجمرة الخبيثة في دبي الا طاولتين ..ولا ولدك عاقل وعيال الناس مهبل ..ثانيا تبي فحص قبل الزواج قدام أطقع ما اشوف …بس والله لاستقعد لكم ولبنتك لو فيها شي.

ابو عبدالله: لا وشو فحصه وأنا عمك دامك واثق من نفسك هذا كفاية وعلى قولتهم اللي على راسه بطحا يحسس عليها .الحين وأنا عمك وش رايك نحكي في المهر وبقية التفاصيل .

أنا : هؤؤؤؤ لا ما يحكمشي وين أبي أشوف البنت قبل.

ابو عبدالله: وشو تشوفها الوالدة شافتها وجلست معها وذا يكفي ..وانا عمك كلنا اعرسنا واحنا ما شفنا حريمنا.

أنا: يا بو الشباب لو مافيها شوفه وراه جيت ..كان أمي وأخوي ولا بالتليفون خلصنا كل المسائل ..علشان أكون معك واضح أنا جيت أشوف وبس ولا لو على سحنتك والله ما أقبل .

ابو عبدالله: بس فهمني وأنا عمك وش بتشوف أكثر من ما شافته الوالدة ..موب أمك حكتك لك مواصفات البنية.

أناك الله يسلمك أمي على نياتها لو بنتك تحب راسها ..ان تدوخ أمي وتطلع بنتك ولا سندي كراوفود .

ابو عبدالله: يعني مافي أذنك ما ..خلاص قم يا عبدالله ودخله للمقلط وناد أختك بس اكثر من 30 ثانية لا تسمح ترى بعض الناس ما ينعطون وجه ..ولمزيد من التشويق اذا بقت خمس ثواني سوو عد عكسي علشان يشيكون على بعض قبل ما ينتهي الوقت.

أنا: يا عمو يا حبيبي ترى بيتكم واضح وسهل تراني ادل المقلط بروحي .ثانيا اخاف الأخ عبدالله تعيبان ولا ودي نتعبه زود معنا ..

ابو عبدالله : لاماراح يتعب ولو تعب تعبك راحة قم معه ياعبدالله قبل لا اقوم انا .

وبالفعل قمت مع الأخ عبدالله ودخلنا المقلط وجت البنت وشفتها لمدة نص ساعة اقصد لمدة نص دقيقة ونرجع للمجلس .. حيث ابو عبدالله مرتز يشرب القهوة ويقدع من التمر ويسالني وهو يطلع فصمة تمره من فهمه هاه وش رأيك يا وليدي نعتمد.

أنا: اقول طال عمرك يعني ما لها أخت ولا شي بس يعني الواحد يحب يقارن ..

ابو عبدالله: وش قصدك هاه

أنا : بصراحة يا عمو بنتك موب ذاك الزود يعني لك عليها ….يعني قلت اذا لها أخت علشان أعاين يعني ما تهون علي أكسفك ثانيا قلت اربحك..

ابو عبدالله: أقول يا قليل الحيا ورى ما تنثبر وش هالحكي الفاضي ..اللي تقوله.

أنا: الحين هذا جزاي اني ابي أكسبك يا عمو خلك ذهين وأكسب زبون ترى مو انا بس ترى لي ولد خال في نفس عمري ولا بعد أعرس وولد عم أصغر مني بسنتين فهمت علي ثانيا يا عمو انت صرف بضاعة لا تكدسها عندك..هاه وش قلت يالله يا عبدالله الله يرضى لي عليك قام ناد أخواتك خلهم يكشخون

ابو عبدالله: أقول يا قليل الحيا اطلع برا بيتي لا أتوطى في بطنك موب الشرهة عليك الشرهة على اللي يدخلك بيته يا قليل الحيا .عبدالله تلقا عصا في حجرتي رح اطمر جبها اتفافهم مع هالسمرمدي.

وبالفعل طلعت يعني تقريبا مو طلعت الا عطّيت ( العطة الجري بسرعة تفوق السرعة وغالبا ما تكون نتيجة الخوف من شيء ما )… وجلست أمي تهاوشني وتقول لي يا قليل الحيا ياللي ما تستحي على وجهك وش سويت فشلتنا عند الناس أجل واحد يقول لأبو البنت ورني غيرها صدق انك ما تستحي..

أنا: يمّه يا حبيبتي مو انتي تقولين انهم يبون الستر لبناتهم ..قلت كذا علشان خاطرتس والله يمّه ..بس طلع هو على حقيقته رجل جشع ..ما يفهم ان التاجر الشاطر هو اللي يحاول يكسب زبون .

أخوي: اقول يا عبدالعزيز عم زميلي في العمل ساكن في نفس حارتنا وزميلي يمدح لي في بنت عمه وش رايك اكلم زميلي يحدد لنا موعد تشوفها.

أنا: بس ما يطلع ابوها شايب غثيث وعلة زي ابو عبدالله شايب ابليس لا يرحم ولا يخلي رحمة ربي تنزل ..

أخوي: لا تخاف ابوها يعجبك دارس في امريكا وموظف في الدرجة الرابعة عشر ..يعني دقة جديدة.

أمي : بس أنت اسمع خلك رجال وثقل واذا شفت البنت اطلع و انثبر ولا تقول ولا كلمة زيادة واذا رجعنا للبيت قل لي وش رايك فيها فهمت …

أنا : ابشري يمّه بس عساه يعطيني وقت كافي اشوف مو زي ذاك العلة نص دقيقة

وبالفعل رحنا لبيت أبو فهد والرجل صدق من دقة أهل امريكا لا سئل عن الصلاة ولا غيرها سئل عن عملي وراتبي ثم قام يقص لي سيرته الذاتية وانه يوم راح أمريكا كان يشتغل يوزع بيتزا علشان يعتمد على نفسه ..والله من النصب يرحم أيامه من يتخرج من الثانوية ارسلوه في بعثة مو مثل أيامنا ..وطبعا أنا مسرع الشريط لين يجي الوقت اللي اشوف البنت ..وبالفعل قام معي ابو فهد علشان أشوف بنته وصراحة يوم دخلت علي البنت الا سبحان الخالق صاروخ ارض جو فتّاك وأبوها جزاها الله خير لا معه ساعة ولا يعد وقت مير اتذكر سالفة أحد الشباب يوم قال أن بعض البنات يكون الوجه الله الله بس الجسم يعلم الله ..والبنت مدنقة فما يبين جسمها الآن قدامي فبديهيا وأنا واقف والبنت قدامي وبيني وبينها حوالي متر فاستغليت فرصة أن عمو أبو فهد يناظر في النجفة فقلت للبنية بكل أريحية وميانة وبساطة ممكن تآخذين لفة لو سمحتي ..انا ما تمت كلمتي الا البنية بدت تفتر ..المشكلة مو هنا المشكلة في عمو ابو فهد اللي شقصني من رقبتي ..ووو

أبو فهد: وش تقول ممكن تفرين شوي ..ليه انشالله وش تبي تشوف بالضبط هااااه.

أنا: يا عمو لا تفهمني غلط ثانيا هي راضية وانا راضي وش عليك مننا يا قاضي .ما تشوفها وش حلاتها فرت على طول.

ابو فهد: هي بنت ساذجة وش يعرفها بنيتك الشينة ..يا قليل الحيا هذا مو عند بنات الحمايل هذا عند بنات الشوارع.

انا : يا عمو والله العظيم ما أفكر في اللي في بالك بس الواحد لازم يعاين قبل ما يشيل صح ولا لا مو بعدين أتوهق .ثانيا تفكير أهل النسيم وسان فرانسسيكو والله ما طرا لي في بال وبيني وبينك يا عمو مافي هالوقت بنات سذج يعني تلقاها فاهمة و مطنشة

ابو فهد : أقول اطلع بس يا قليل الحيا هذي آخرتها أدخلك بيتي و أوريك بنتي أحسبك راعي زواج طلعت راعي خرابيط

اطلع بس قبل لا أشوف شغلي معاك .

وانطردت للمرة الثانية على التوالي ..وأخوي قام يهاوشني وأمي تفلت بوجهي عقب فعلتي المشكلة أمي فهمت كلامي غلط يوم قلت للبنت لفي ..صار موقفي صعب … وحالتي تصعب على الكافر.ومطفر وأطمر لمحل يبيع طعمية حول بيتنا ..ويجيني المعلم صبحي ويشوفني أزل الدمعة من الحزن .

صبحي: شو هاظ يا عيب الشوم شو باك ..يا رجال وكل الله.

أنا:ايه يا صبحي هات صبة ( الصبة خبزة كبيرة داخلها حوسة بيض وطعمية وطحينة وبطاطس وطماطم وخيار ما يندرى هل هي حلال ولا حرام بس تباع في السعودية ) بس بدون بيض ..شكلي باصير زبونك طول العمر مافي زواج كل مارحت اخطب اهل البنت يفهموني غلط ويزعلون ويطردوني …مرتين انطردت يا صبحي.

صبحي : لاك شو هالحكي ئول غير هالحكي بدي افهم شو نائصك ..تخزي العين ما نائصك شي .

أنا: اخلص علي بس بالصبة ولا تحط مخلل تراني ما أحبه ..خلها على ربك الزين هالأيام ما ينبغى

صبحي: يا رجال وكل ربك على ئولتكم يالسعوديين ايزهالها …الك عليي اجوزك ..من بنت شو تاخذ العئل ..حرسلك لواحدة في الشام خطابة اسمها أم الخير بس شو ام الخير عن جد ئولها انك من طرف صبحي بعبوصة ..وهيي راح تتوصا فيك وتنئي لك بنت بس شوو بتآخز ضبنات العئل ..

أنا: لا يا صبحي وش يقولون الناس آخرتها تزوج واحدة مهيب من بنات ديرته تبي الناس تقطع جلدي ..بالله كثر الطحينة الله يخليك ولا تكثر طماط.

صبحي: مش بتئول انك روحت كزا بيت وطردوك شو بدون كمان منك مش حيجوزوك ومش عاوزينك تتجوز ما بيصير هيك يا عبدالعزيز رح تزبحك العزوبية على ئولتكم ..عزوبي يحكحك الجدران .الا شو معناتا؟

أنا: معناها عيب ..يعني أنت رأيك كذا ..بالله اجل استعجل علي بروح أكلم أهلي واقنعهم وانت جهز لي عنوان أم بشر قصدي أم الخير علشان اروح لها .وبارجع لك بكرة.

وبالفعل رحت لبيتنا وبديت في اقناع الأهل في البداية الوالدة كانت رافضة ومجهزة لي ثنتين من برا الرياض ما بعد سمعوا بسالفة طردي …وابوي قال مهيب شينة الفكرة بس يرى من حكم خبرته لو هو أستكشف الوضع أول ثم يرد لي خبر ..هذا آخر خبري ذاك اليوم قبل ما تثور الحرب العالمية ..في صالة بيتنا ..وفي مثل هالمواقف الواحد يقول العطة يا بطة بس مدري وين اختفت الصبة ..المهم بعد معارك استمرت ليلة كاملة تلقيت أشعار من المجلس الأعلى للمنزل ..بالموافقة شريطة أن لا يرافقني أحد ورحت لسوريا وضعت يومين هناك على ما دليت بيت أم الخير في حارة النحّاس حول ميدان الأمويين ..والقى أم الخير ..اول ما شفتها ارتعت كنها هيكل عظمي وبيضا تشيلها قدام نور تصير صورة اشعة المهم.

أنا: يا خالتي أم الخير أنا جايك من طرف صبحي بعبوصة ..وأبيك تدبرين لي عروصة.

أم الخير: ييه كيفو لا صبحي شو عامل انشالله منيح انتا صاحبه ..مشتائتلو كتير هالزنمة.

أنا: يسلم عليتس واجد ابن بعبوصة ..بس الله يخليتس ابي العروسة بيضا وشعرها أشقر وعيونها زرق وخدودها حمر ..وطويلة بس مو حيل يعني زي ما أنتي شايفة يعني من طولي وأقصر.

أم الخير : لا شو يابني خود لك واحدة شمحوطة طويلة من شان عيالك في المستئبل يصيروا طوال هما كمان.

انا : الله يسلمك موب لازم يصيرون طوال ..أهم شي أنا أنبسط مو وانا تحت يفوتني شي فوق ..ابي واحدة بطولي أقدر الحق عليها . وقولي لهم تراه غني ما عليه وأمير قولي لهم أني أمير ..واذا رجعنا للرياض علمتها اننا أمير قبايل يعني من زمان بس ..توصي فيني يا أم الخير الله يسلمتس.

أم الخير: يي لاك تكرم أنت من طرف الغالي صبحي بعبوصة مش صحيح هو بيشتغل في السعودية مبرمج كمبيوتر .

أنا : ايه مرة ماشالله عليه مصمم برنامج يتذابحون عليه في السعودية برنامج يحط الكاتشب في الصبة بعد ما يغلفها .

وبالفعل جابت لي أم الخير كتالوج كلها شقر وكل واحدة تقول الزين عندي بس وقعت عيناي على أطخمهم واسمها هويدا وتزوجنا والحمدلله وفي مطار دمشق مسكته وحفظتها التالي.

أنا: شوفي يا حبيبتي يا هويدا الله يرضى لي عليك شوفي اذا وصلنا البيت ..ولا ركبتي معي في السيارة تغطي واللي يرحم والديك لا تفضحيني .ترى عيب عندنا الحرمة تفتش ..وعلى الأسواق اذا ودتس تفتشين علشان تشوفين زين باوديك الصباح للاسواق بس اذا طلعنا بعد العصر تغطي ولا تقولين لي ماشوف شي ما علي منتس عندنا في السعودية يتحسسون .المهم لا تفتشين في بيتنا تراني أعرف أخواني زين, الحيا طابع عليهم واعزي لهم, والله ان يفكون عيونهم على الآخر اذا أنتي في البيت لا تفتشي لأي رجال زين يا عمري ..

هويدا : ماشي كل ما بتئوله يا عيوني ماشي علي ….وبالفعل رجعنا للرياض ووريتي أهلي هالبرصا اللي جبتها .طبعا وخذ تعليقات بس انا وش علي ..بنت أخوي تقول هيييه عمو جاب عروسة زي باربي ..وحريم أخواني يقولون ما بقى الا هالقطوة الشقرا تقاسمنا البيت وأخواني كل ما شافوني ..أتمغط ولا اريح قالوا ايه ذابحه البياض ..بس ابوي ما علق لانه كان خارج الرياض وأمي كانت تحاول تعلم هويدا كيف تصلح الجريش والمرقوق حاولت افهم أمي ان هويدا مو حقت هالحركات وأنها اذا عصرت نفسها مرة مرة طلعت بكبة ..بس ما اقدر أقول لأمي لا ….وفي أحد الصباحات ..ما وعيت الا أمي تدق بالسنترال علي من الصالة وأنا غرقان في النوم ..

أمي: عزيز ووجع ..قم تعال بسرعة شف وش مرتك مسوية …اخزتنا قدام هالعالم .

أنا: لا يكون بس رقت السطح تآخذ حمام شمس ..قولي لي وش سوت هالبرصا يمّه .

أمي: أبوك جا من الديرة وجالس في الصالة قلت لها قومي سلم على عمتس راح تسلم عليه وهي متغطية وهذي هي قدامي ..اقبصها أغمز لها اتنحنح علشان ترفع الغطوة عن وجهها بس مهي متمسكة بالغطوة ..

وانزل باسرع ما عندي للصالة شطفت راسي ابوي ببوسة على الطاير …وأجر هويدا من يدها .

أنا: أنتي يالخبلة في واحدة تتغطى عن عمها أبو زوجها …على قولتكم حماكي ..هذا حماكي .

هويدا: شو أعمل بيك مش انت ئلت لي لمن تكوني في البيت ما تكشفي على رجال وانا عم باعمول بكلامك.

أنا: رجال بس هذا مو رجال هذا ابوي قصدي هذا غير الرجال ..هذا شرعا يجوز لك تكشفين له ما تشوفين حريم اخواني فاتشات عنده ..ولا هو برايتس وراه مقعدنا في البيت عنده علشان كل عصرية يبسط قدام هالحريم يستعرض عضلاته عليهم وأنه سوى وبيسوي و جاية أنتي ووجهك تتغطين عنه..

هويدا: شو ما أنتا بتئول لي هيك المفروض تئول لي الا أبي ما بتتركني هيكي على العمياني. يعني ارجع اكشف لوه مافيها شي.

أنا : ايه هالشايب عادي افتشي له ..بس أخواني لا فهمتي أخواني لا ..ابوي ايه ..مو تنسين بس أخواني لا..

ومشت الأيام ..وشبت علي هويدا ألا تبي تروح للسوق واستأذن من العمل ..وأطمر بها في هالصبحية وننصى مركز المملكة …أنا على خبري ماراح القى في الصبحيات الا المغازلجين والبنات اللي مفاختات من الجامعة قلت اروح أغيضهم بهالبرصا …بس خبري قديييم حيل الا الصبح امتلا عجز بعد وهذي الكوبة ..وأنا ماشي بهويدا بين المحلات و نطلع من محل وندخل محل و هويدا الله يبارك بأصلها مغطية وجهها وأنا مزقرت (مزقرت =مشخص) بها وتونا داخلين دبنهامز الا الفضيحة مدري وش خلا هويدا تزل وتقول ( يي شو هيدا بياخد العئل ما عنّا منوه في الشام ) طبعا هي قالت هالكلمتين والكل عرف انها شامية ..وهنا يا ويلك يا عبدالعزيز يا سواد ليلك ما دريت الاثنتين عجز بدا يسولفون واستلم يا تقطيع .

العجوز 1 : هو هو الله لا يخزينا جايبا هاللبن الخاثر ويدور بها في الأسواق واخزياه رجالنا خربوا.

العجوز2 : ليته مأخذها يدور بها ..الا هذولي البزارين اذا اشتغلوا وجمعوا لهم قرشين طلعوا برا الديرة وقاموا الله لا يخزينا ..يخربطون و اعقلهم يقومون يصلحون غلطتهم اذا توهقوا .

العجوز1 : عهه ( عهه دعوة شينة الله اعلم المراد بها الاصابة بالعاهة أو الموت ) حسبي الله عليهم بنياتنا الصاينات العفيفات اللي كل واحدة تقول الزين عندي ..بايرات عنسوا وذولي طايرين على وجيههم يجيبون لنا من برا .

العجوز 2:أي والله وشوله بس عشان المرض حسبي الله على هالدشوش ..عندتس مثلا هالمطيور طار وجاب هالبرصا والله لو ترفعين غطوتها انها مو ذاك الزين بس ناس مافي راسها عقل واذا نصحتيهم قالوا بيضا وبيضا مالت عليهم ..ياوالله يا أم محمد ان بنيتي بسمة ابيض منها بس وش نقول عاد .

العجوز 1: هوووو بتعلميني ببسمة بنتك زي جهيّر بنتي البياض شاقها شق لا وجرح ما خلق ربي في حلاهم بس يا وخيتي نمونة هالشين تلقين أقاربه رادينه عن علم خايب فيه يوم ردوه أقاربه زوجوه أهله واحدة ماهي من ثوبهم ..ولا هالسحنة كفو بنات حمايل … ايه بس كفوه هاللبنانية .

أنا: اقول يا ست الحسن والجمال ..ترى المدام سورية مو لبنانية وانتي الثانية يا كيلوباترا …وش قالوا لتس ماخذها من مرقص ترى هي في ديرتها مثلها مثلتس بنت عوايل ..ثانيا كل واحدة تشيل وتشدخ في بنتها …هالحين من سمعكم جوليا بطرس وباسكال مشعلاني ..الا كل واحدة ولا الله يستر على بنياتكم ..اجل بنات لهم شنبات وطالع في يديهم شعر واذا قلت ليه قالت لك من الحر ….والا الجينزات ما يدخلونها الا بفازلين …وفوق هذا كله الواحدة مهرها فوق خمسين ألف وتبي القصر الفلاني لعرسها علشان بنات خالاتها وعماتها البراميل يطامرن فيه وتبي طقاقة بخمسة وعشرين ألف اذا كانت خايسة ..لو مشغلين استريو يكفي ..اصلا من شاف رقصهم تحسف حتى يصفق ..وتبي شقة وشغالة وكل أربعا وخميس عند أهلها تجتمع مع أخواتها ..موتوا حرة هذي عندي سبع أيام في الأسابيع حتى أيام اللي وش اسمه نمشيها بوس ..انقهروا يا عجز أبليس ..

العجوز 1: هو هو وش بلاك من قال لك اننا نحتسي فيك من زينك ولا من زين هالقطوة اللي معك لا وملفلفها يعني هي سعودية ايه من التسذب.

أنا: لا والله ما تحكون عني أجل من تحكون عني ساعتين من يوم جيت من عند محل تومي الى دبنهامز وأنتم دودودو فيني وفي هالضعيفة .أنا اللي قاهرني من لعب عليكم وقال لكم هنا شي بيناسبكم ..راس مالكم العيقلية وان تطورتوا روحوا شارع الثميري اشتروا ديرم من البسطات اللي هناك.

العجوز 2: أعوذ بالله منك من درى عنك توكل على الله بس صحيح اللي على راسه بطحا ..نحكي عن ولد جيراننا تزوج بنت روسية .ثانيا دوودودو ولا مو دودودو اقضب يد مرتك لا تضيع ومالك شغل بالناس .

أنا: امشي يا حبيبتي يا هويدا قدامي خلينا نخلي هالسوق لهم ..خوفي أكح يموتن هالعجز وأبلش بديتهم …ريحة الديرم واصلة لآخر السوق …على فكرة يا نينا وريتا في أخر دبنهامز فوق قسم المايوهات منزلين أطقم بكيني ووووه موت أحمر لايقة عليكم لوق ..وجيه ما حلاها ربي مالت عليكم.

ما كانت هذي أول مرة أتعرض لها من هالمضايقات غير أني اذا رحنا نتمشى في العصرية في شارع العليا ..كل الشباب يمشون حولي ويأشرون لي يعني اني مطلعها ..الوضع كان صعب بس كان لازم أتحمل لين مرة كل شي فاض ..وكان هذا في العيد وبالتحديد ثالث أيام العيد ..دقت علي أمي وأنا في غرقة النوم ( قروي الى الان يواصل أيام العيد وينام في العصر )

أمي: عبدالعزيز ووجع تعال ضف هالعلة ..تراها فشلتنا الله لا يربحك لا أنت ولا هي مثل ما فشلتوني

أنا: خير يمه وش صار بعد تغطت عن جدي هالمرة بعد.

أمي :المصيبة أعظم تعال بنفسك وشف انا في المجلس

واطمر للمجلس القى أمي منحرجة ووجها كبر الزيتونة ومدامتي جالسة ورجل على رجل ..وخالي وعيال خالي اللي أعمارهم 26 و 23 .طايحين قزقزة في المدام وخالي بعد ما قصر …والمدام ماخذة راحتها حتى شعرها ما غطته ..لا وتحكي وتسئل خالي عن المدام ..وأجرها من يدها .

أنا: هويدا وش فيك انهبلتي جالسة في المجلس مع خالي وعياله ورجل على رجل ولا تغطيتي ولا شي

هويدا : ليي شو فيها ..مش خالك وهيدولي عيال خالك .يعني ئرايبينك ..

أنا : ئرايبيني انشالله عشرين عقرب يقرصونك واذا قرايبيني بس ما يجوز لك تكشفين عليهم وش انا قايل لك من أول

هويدا: لا لا انت ئلت أخواني بس ما تتكشفي لون البائين عادي مش هيك.. انا زاكرة كلامك منيح.

أنا: كنت أعني يعني أبوي لي جا بس .ما قصدت أي رجال ولا وراه أي رجال وش رايك اذا جو ربعي عندي أدخلك معهم في المجلس عادي ماهم أخواني ..ثانيا ليتك مسوية هالحركة مع أحد ثاني الا خالي ذا يوم بنتهم سحر وصل عمرها 14 قالوا لها تغطي عن عبدالعزيز وأنتي جالسة قبالهم رجل على رجل ماشالله عليتس .

هويدا : والله ما بيصير هيكي عزبتني كتير كل مرة بتعيط عليا وبتعصب من أصغر شي شافوني شو حصل مابيها شي شو صار يعني انهدت الدنيي ..بس أنت حمئي كتير كتير..وكانت تلك القشة اللتي قصمت ظهر البعير من زود عصبيتي طلقتها ..أنا طلقتها من هنا الا عيال خالي تناتقوا يبون يوصلونها للمطار ..بس والله كسرت خاطري هالبرصا ووديتها للمطار وقلبي متشحتف عليها وما كنت أدري بالعذاب اللي ينتظرني .. اثر العزوبية من بعد الزواج دمار للأعصاب وقمت أتحكك في مرقدي و اتأثر من أدنى شي أشوفه بالمرة لو ظل سودانية صار يحرك مشاعري ولأن ماودي أرجع نفس الشريط وأدور سعوديات ومتخوف من الزواج من أجنبيات ..لين كلمت واحد أعرفه اسمه جمال صديق قديم وحاليا يسوي دراسات عليا في امريكا ويتدرب في شركة هناك …وطبعا قصيت له كل شي بالتفصيل الممل من طئطئ الى سلامو عليكم.

جمال : يا عبدالعزيز طيب ورى ما تجي أمريكا عندي ,عندي لك خوش عروسة حلوة و طيبة صحيح أنها مطلقة ..بس ولو ..ولا تنسى أذا تزوجت أمريكية جواز أمريكي لك ولعيالك ..واذا بغيت تكمل دراساتك العليا بتتسهل الأمور عليك كثير ..غير الشقار والحلا والطول.

أنا: وش أمريكيته أنت بعد تبي أهلي يذبحوني سورية ويالله يالله يتكلمون معها الا بقاموس هالمرة تبيني أجيب أمريكية ولا طويلة بعد ..ليه الاحراجات يا جيمووو .

جمال: صدقني يا عبدالعزيز بتنبسط معها الأمريكيات يعرفون وشلون يبسطون الزوج على آخره وكثير منهم يحترمون الحياة الزوجية واذا تبيها تعيش معكم في السعودية ما عندها مانع وعلى الطول هي بتعرف كيف تحل لك هالمشكلة

أنا: وشلون يعني بتلبسني كعب ثانيا وش فيك مصر عليها هااه جيمو لا يكون متورط معها وتبي تدبسني ..عادي جيمو قل الصدق والله ما أزعل مطلقة ولا …

جمال : لا تبي الصدق هي صديقة صديقتي ولأنها بنت محترمة فكرت فيها لك ..صدقيني يا عبدالعزيز صعب تلقا مثلها

أنا: بس يا جمال على فرض بس انا عربي وأنت عارف من عقب ما طاحت عمايرهم ..وهم شايلين علينا تقل أننا اللي طيحناها وابن أمه سعودي يمشي في شوارعهم الا لعنوا سلسبيلهم.

جمال : يا رجال خبرك عتيق من أول هم ما يحبون العرب الا لفلوسهم ..بس الحين غير يا عبدالعزيز بنات الثانوي عندهم شوف عيني ..يلبسون فنايل عليها صورة بن لادن ..وتحتها ( هوت ارابيان مان ) واللي لابسات مايوهات عليها صورة بن لادن ..في المسابح ..وما يمديك تقول عربي أنا ( مو أغنية بن مرقدي ) الا طمر في حضنك عشرين بنت ربيع يا ابو سعود ربيع ..قسما بالله ما أحنا ملحقين يالسعوديين .

أنا: رايك كذا أجل يا جيمو أجل كلمها عني وانتظرني اسبوعين وأنا جاي ..طبعا على ماخلصت اجراءات الفيزا اللي يبون فيها يقابلون جدي السابع علشان يتأكدون أني مو ارهابي ..وطقيت الفيزا وطيران على أمريكا ورحت لجمال اللي عرفني على البنت وطق طق تزوجنا ..عند شيخ ينقال له ( كرستيان سانببيييري ) ورجعنا للسعودية ..ولبستها عبايتين شبكتهم مع بعض لاني مالقيت شي يناسب طولها على فكرة هي مو طويلة حيل بس 195سم وعلمتها وشلون تغطي وجهها عن الرجال وامي استانست معها حيل ..الثنتين صاروا يتفاهمون بمدرباة الراس امي تومي ( تومي= تحرك ) راسها وذيك تومي هي الأخرى وتبتسم ومرت العلاقة زينة بس لمدة اسبوع ..حيث قامت المدام جاكلين زوجتي من الصباح ونزلت في البيت ..ولقت أمي وحريم أخواني يفطرون ..في الصالة ..جاكلين على بالها اجتماعية راحت تبي تشاركهم الفطور وهم على بالهم بيكسبونها قاموا عزموها وقطعوا لها خبز من ذاك الحار وكوب حليب ..جاكلين طاحت في البيض المقلي والفول اول الأمر بس أغراها صحن من بعيد مدت يدها بشويش وخذت منه قطعة صغير شوي الا وتدمن هالصحن وتطيح فيه ويوم قرب يخلص منها سئلتهم بالأشارة طبعا وات از ثيس يعني بلا مارية وش ذا ..قالوا لها بالعربية الفصحى كبدة حاشي ..طبعا البنت دربت راسها وما فهمت وطيرت عيونها فيهم يعني بالانجليزي وات از ذا فاكينج يو ساي …اميمتي الله يهيدها قال لك تبي توضح لها الأمور قالت لها جمل واشرت على شاسلتها ( الشاسلة الجهة من البطن اللي تحت الضلوع في الجوانب ) ثمن شي صغير هي أمي سوت كذا الا وتنقز جاكلين من الروعة وتقوم تصاارخ كيلر يو ار كيلر يو ار فامباايرز ( يعني يا قتالي القتلة يا مصاصين الدمامين يا أنتم ) من صراخها صحيت من النوم نزلت للصالة أشوف وش الوضع لقيتها تصارخ يو ار كيلر يو كيلد جمال جير اواي اوف مي ( يعني فاردز عني ياللي قتلتوا جمال ) .

أنا: هو كيلد جمال وات هابند؟ يمّه وش السالفة. وشوله هالصراخ.

أمي: أبد يا وليدي قعدت تلط من كبدة الحاشي سئلتنا وش ذا قلنا لها تسبدة جمل صغير. بس قامت تصارخ .

جاكلين: نو نو يو ار كيلر,, يو ليف مي ات جمال ماي فريند .( يالزاتلة قتلتي صديقي جمال وخليتيني أكل لحمه)

أنا: دير جاكلين نوت جمال ليفر ..ذيس اس كامل ليفر .يو انرد ستاند روونج

جاكلين: وااات السو يو كيلد كامل جمال ازنت انوف فور يو كيلرز ..دونت كيل مي بليييز ( بعد ما كفاكم جمال يالقتلة قمتوا قتلتوا كامل )

أنا: اؤ اؤ نو نوت كامل أي مين كامل ..ذا بيج كوسن فور ذا شيب دو يو نو مباااااااء ثاتس ات ..( موب كامل قسما بالله هذا جمل ولد عم الخروف الكبير اللي يقول مباااااع )

جاكلين : نو يو شيت مي ايام شور ثاتس ليفر اوف جمال اند كامل أي نو ثات يو ار بييج كيلرز .( العب غيرها يا روح أمك على بالك أني باصدقك انا عارفة انك تبي تخف بي )

أنا: اوكيه اوكيه أي ويل كال جمال فور يو تو تاك تو هيم تو بليف مي اوكيه ( طيب بازهم لتس على جمال علشان تتأكدين بنفستس أنه ما مات .)

وأدق على جمال وأكلمه طبعا يوم فهمته القصة بغا ينكب عفشي ويسوي نفسه مات قصدي قتل وأنهم الان في عزا عليه بس يوم شافني خنقتني العبرة رحمني وكلم جاكلين وأقنعها بس البنية جتها شبة الصدمة وصارت ترتاع من أمي وحريم أخواني واذا شافت أي واحدة منهم معها سكين في المطبخ تقوم تصارخ ..رحنا لدكتور نفسي قال أحسن حل تطلع أنت واياها بروحكم في شقة لين تهدى بعدين ترجع لبيت أهلك وبالفعل طلعنا لشقة ومر أسبوعين أو ثلاثة وأنا مشتغل لها ممرضة ومدلعها ومهنيها لين ما صارت البنية تمام التمام وبدينا نرجع لحياتنا الطبيعية وفي ليلة من الليالي ..(على فكرة طول فترة الزواج واحنا يعني اقصى شي نوصله هو التبويس نظرا أحيانا ظروف البنت ما تسمح ثم صدمتها العصبية ) المهم في ذيك الليلة رحنا لغرفة النوم عاد هذي ليلة الدخلة وعلى قولة أخوانا المصريين الليلة الكبيرة وأنا منسدح على السرير لابسا طقمي ( صروال السنة ) وانتظرها تشرف وتدخل علي وماني معلمكم وش كانت لابسة لأني استحي ثانيا بتقطعه الرقابة بيحطون خط بالاسود فوقه المهم وتقول لي جاكلين .

جاكلين:هي بابي بي ريدي أي ويل تيرن يو اب ( يالله يا شاطر استعد أنا بقلبك )

أنا: اووه دير جاكلين ليتس دو ات توداي ان سؤدي واي تومورور از يو لايك ( اليوم يا حياتي بنطبق خطة الجنادرية باتسر انشالله على هواتس )

جاكلين : نو بابي ناو توداي أي ويل فاير يو اب از أي لايك تو دوات ( مو على كيفك يا روح أمك الليلة بأشب فيك ) وفعلا كلامها صار وراحت شغلت المسجل وفيه شريط كلاسيكي خايس من اشرطتها ..وما دريت الا البنت تتشقلب وتنطنط مرة تتسدح على الأرض ومرة تلفلف حول المعلاق .وشوي وتقرب يمي وتفصخ شي ثم ترجع تتشقلب وأنا حالتي تصعب على الكافر ..ما تعودت هالمناظر ,,والله تعبت تعب ..والبنت ما طرا لها ترحمني .وبعد نص ساعة رقص وردح جتني تقول هاي ماي لوف ار يو ريدي (ريدي =جاهز مو البطاريات ) ناو ؟

أنا: وات ريدي الله يلعنتس لي ربع ساعة وأنا اقول لتس بس يكفي ارحميني ..وأنتي ولا انتي هنا لين خلاص قضيت الله يسلمتس ..تبين نمشي هالليلة تبويس ما عندي مانع .

جاكلين : واي وات هابند فور يو تيل ( هو واخزياه بس وش جاك )

أنا: لوك بيبي ثا كار هاز اتز قاز انسايد ات ..وين ات موفز ان مووفز انتل ون بوينت ذا قاز بح فينشيد ذات وات هابند فور مي يو وير درايف بي مي فيري فاست تيل ماي قاز فينيشيد بح ..يالله تمسي على خير .

طبعا هي عصبت وحسبت أني كرهتها ومليت منها وفي الليلة الثانية قال لك تبي تولعني وسوت اشياء افظع من اللي سوته في الليلة اللي قبلها .لدرجة أنها خلت نفسي توسوس أني أسوي معها شي حرمه الله طبعا ساعتها الزم ما على الواحد دينه …..وبالفعل طلقتها وارسلتها عن طريق الدي اتش ال الى ديرتها بعد اروح أوديها يقول صايدين معك مجلة ميكي عدد 771 اللي فيه بطوط يتعلم الطيران . ..ورجعت كما كنت عزوبيا مجردا ..وتقفلت الدنيا بوجهي ..من زود الغلقة كنت بأروح أجاهد في أفغانستان ..لولا أن أمي حلفت ..وتبون الصدق وزارة الداخلية منعت ..المهم ..واحد مثلي ما تتصورون حالته متحطم من الزواج داخليا وخارجيا .. ومن رداة الحظ مرة وأنتم بكرامة مريت من عند أحد براميل الزبالة الكبار شفت قطو يعزم قطوة على قطيعة لحم وجلسوا يتحككون يعني بحبون بعض ..اني خنقتني العبرة وقمت أصيح .. أبد هذي احدى علامات الساعة أخر عمري قمت أحسد القطاوة …وارجع البيت والقى ايميل من واحد صديقي من زمان اسمه أحمد من منطقة الجنوب …راح يدرس في بريطانيا تعرفت عليه أول ايامي في الانترنت ..أرسل لي يقول أنه رجع للمملكة ( مو الفيصلية ) ..طبعا أنا من فضاوتي قمت حجرت له في الماسنجر .. لين قبلني طبعا ما عندي شغلة الا أسولف معه ..وقعدنا حوالي ساعتين يوم سمع قصتي ..شكله يا حامت كبده ياني كسرت خاطره المهم …اقترح على حل وسط ..طبعا أنا سمعة حل وسط خفت يقول تزوج لك رجال تراها هاليومين موضة شوي وتجي عندنا في الخليج ,,..الا يقول ليه ما تتزوج من برا الرياض ومن داخل المملكة ..قلت له وين فوازير رمضان وضح قصدك ؟؟؟ قال لي وش رأيك تتزوج من عندنا من الجنوب .

أنا: وش من الجنوب ,,ما قبلوني في الرياض تبيهم يقبلونني في الجنوب ومن بيجي معي من أهلي ..وعلى خبرك في الجنوب قبايل وعادات عليها طق عصي ..ثانيا بيني وبينك تضمن بنياتكم.

أحمد : افا عليك بس الحلا كله في الجنوب ..أنت بس أسئل اهلك عن بنات الجنوب يا ما قالوا فيهم الشعرا وش يدريك أنت وعلى الأصول والتقاليد من يوصل عندنا 16 سنة خلاص صار رجال لا عاد يلزم ابوه ولا أحد من أهله معه ..ياخي أنت تعال وشف بنفسك وصدقني ما راح تندم ….

ورحت هناك أسبوعين منها أشوف وش هالسياحة اللي هناك ومنها أدور على بنت الحلال .وبالفعل لفلف بي احمد شوي في ربوع عسير ( ما تلاحظون أني صرت ماصل زي برنامج سعودي والمسلسلات المحلية ربع ساعة موسيقى ومناظر من الديرة ) المهم ..عرفني أحمد على عايلة من الجنوب ..من كبار العوايل هناك ..صحيح أنهم طلبوا مهر مو قليل يعني على الأقل فوق 70 ألف ريال وذهب بحوالي مية ألف ريال ..وعرس ما خلوا أحد لا في اليمن ولا الصين الا جابوه ..بس اللي أعجبني فيهم أن الرجال عندهم رجال وفارض كلمته ..يعني مثلا عمي أبو المدام ( خضرة ) متزوج من أربع غير أنه مطلق أربع قبل ويعجبني اذا صف الأربع وقام ينزر فيهم ذيك النزرة ياخي تحس ان الدنيا بخير وأن الرجل ما زالت كلمة حية لم تنقرض بعد ..ووفقا للخطة المعدة ليلة العرس كانت في فندقهم ذاك الزين مدري وش اسمه ..وطبعا بعد العشا اللي نصه عسل ومظبي وشي الله يكرم النعمة المهم ..على دقة الساعة 2 الفجر وخرت الأكل وطقمت طقم المناسبات ( صروال سنة قطن قلت اسوي سوات عيال النعمة أريح من القماش ) ..ومتلحف باللحاف ..بصراحة الجو هناك برد رغم أنهم في عز الصيف وتطلع لي خضرة من الغرفة الثانية بعد ما بدلت ملابسها وفصخت فستان العرس ..بس من هول ما شفت …

أنا: حبيبتي يا خضرة أنا قلت لك بدلي ملابسك علشان ننوم بمعنى آخر نرقد بالانجليزي سليب ..ما قلت لك بنطلع نتمشى ولا نرقص تحت في الريسبشن ..يعني المفروض تلبسين بطانة اندر وير ..ولا في لبس حلو ابن كلب يمدحونه الشباب اسمه ملابس ليس ( بدون حاجة ) مو تلبسين لي الله يسلمتس الدولاب كله .

خضرة: ايش تقول ايش بطانة ,وايش اندر وير ..انتا تبغى ابوي وأمي يذبحوني .

أنا : وش يذبحونتس ومن قال أنهم ما يدرون ثانيا أبوتس وأمتس وشلون جابوتس ..توافق أفكار يعني . يالله بس روحي بدلي ولا يكثر.

خضرة: .عندنا في الجنوب ليلة الدخلة لازم الرجل ..يثبت أنه كفو لزوجته ..وأنه قادر يشكمها زي ابوي كدا .

أنا: يعني وش نسوي نلعب مطارح ..ولا بلوت ..مالت عليك ما مليت عينك لا أجي اتوطى في بطنك.

خضرة: يعني ما تقول لي اعملي كوذي وسوي كوذي اللي أنت تبيه اعمله بنفسك أثبت أنك راجل .ما تقول بدلي خلقاتك وماني عارفة ايش كمان. انتي اجبرني على هذا بقوتك وحماشتك

أنا: اها فهمت عليك ..يا خضرا يا حبيبتي اشتري نفسك تراني مرة كحيت في وجه صعيدي رقدوه في مستشفى الشميسي شهر ..كيف عاد لو مديت يدي وعليك أنتي يالضعيفة …شوفي أنتي سوي اللي قلت لك وباقول لهم اني تعبت لين قدرتك ..مابي اوذيك يالله يا عمري ..مابي اشوف شي من هالخلاقين عليك قدامك دقيقتين.

خضرة: امشي روح هناك ..صدق منك راجل ترى والله لو نقعد على هالحالة سنة مش ليلة ما راح اعمل شي اذا عاوز شي يالله اثبت انك راجل و تستاهلني .

أنا: يا خضرة اتقي شري ..تراني انسان صعب صعب ..من فصيلة الأسود يعني الله العالم مدري وش يمكن أسوي بك.

خضرة: براحتك أنا بانام كوذي بكل ملابسي ..اذا في نفسك شي اعمله فرجيني مراجلك.

أنا: أنا حذرتك بس راسك يابس ..ترى ان طلع دم مالي ذنب مو تبكبكين علي … وبالفعل مديت يدي عليها وحاولت ان اوريها مراجلي ..وطلع دم بس للاسف مني (>>>>لا تفهمون غلط دم من وجهي مو شي ثاني ) طلعت البنت بصحتها بعذرها أكل طبيعي عسل ( مو زي عسل نادي النصر ) وسمنة برية ..ولحوم ( تعلموا يا بنات الرياض أجل همبرقر تتقاسمها 3 بنات ) ..وكل ما جيت أحاول ألمس شي من ملابس خضرة تكوفن بي الأرض مسحت بي البلاط وتشققت جبهتي ..والتوت يدي ..أما ركبتي فأنا سمعت تك ..بس بالضبط مدري وش صار ..ولا عدت اقدر أوقف عليها ونقلوني من الفندق الى المستشفى بسيارة أسعاف ..ولقلة الأمكانيات الطبية نقلت بطائرة اخلاء طبي الى مستشفى الشميسي بالرياض …ولأن مستشفى الشميسي ما عندهم مهبط طائرات اسقطوني بالبراشوت ..ولحسن الحظ الكابتن كان وقيعي ..هو سقطني بالبراشوت ..وأطيح في فتحة مجاري كانوا يسوون لها صيانة من زود الحظ بعد… ويالله يالله طلعوني فرقة من الدفاع المدني ..ورقدوني في مستشفى الشميسي ..قسم العظام والفحص المبدئي يؤكد وجود كسور في القفص الصدري والعصعص واصبعي الصغير في رجلي اليسرى .جاه التوا وكسر في الغضروف …هذي نهايتي ..المأساوية ما بين اللحم المحلي والمستورد قصدي الزواج المحلي والمستورد . ويمكن أكون ما وفقت في الأختيار بس أتوقع شخصيا أن اللحم المحلي احسن لنا وما يجيب الحساسية .

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة