قصة الواقع والمأمول

قصة الواقع والمأمول كاملة مكتوبة

السلام عليكم ورحمة الله وبركاته ….في اشياء كثيرة في بلدنا تخالف المعقول ,, ونفاجىء أننا يجب أن نسلم بها لأنها واقع ..مثال على ذالك مدينة في فصل الصيف تصل درجة حراراتها الى 50 درجة مئوية في النهار ونجد ان هذه المدينة يجب أن تغلق كل أنشطتها التجارية والترفيهية بحلول الساعة 11 مساءا أي بحسبة بسيطة اذا ما ابتدىء سكان هذه المدينة الخروج من الساعة 4 عصرا رغم حرارة الجو فليس لديهم الا 7 ساعات تتخللها صلاتين أي تقريبا 6 ساعات لمدينة تحوي قرابة 4 ملايين نسمة….ومثال آخر وجود أتحاد رياضي لأكثر لعبة شعبية في البلاد 99% من أعضاء اتحادها لا يمتون للرياض بصلة الا أنهم من ذوي آل ويجيدون التعاقد مع مدربين عالميين بعقود مالية ضخمة ثم اقالتهم …ومثال آخر بعد نهاية الموسم الصيفي الداخلي الناجح نفاجى بأن سموه رئيس لجنة التنشيط السياحي في….. يستعد لقضاء اجازته خارج البلاد …المهم ماعلينا الله يستر على ولاياه ..بس أكثر شي واقع لايمت للمعقول ولا للمنطق ولا للمأمول بصلة هي جامعة الملك سعود للبنات بفرعيها في عليشة والملز ..فصحيح أن مسماها جامعة أي مكان للعلم والتدريب لكن حقيقة الأمور تختلف 180 درجة اذا تبون تعرفون كيف اقروا القصة التالية……ومن الآن تراها طويلة مرة مو يجي واحد بعد بكرة يتشكا لي يالله نبدأ.

لي أكثر من 6 سنين في حياتي من أول بنت عرفتها قبل النت أيام التليفونات والبياجر مرورا بشارع الحوامل وصولا الى عصر الانترنت ..على كثر ماعرفت من بنات وتكلمت وناقشت ما عمري لقيت بنت تقول كلمة طيبة في هالجامعة اللي تشتمها واللي أعرست بسبة عقدها من هالجامعة واللي غيرت اسمها من سوسن الى نفر تيتي واللي صارت هي وبنتها يدرسون سوا في نفس الجامعة ولا تخرجوا ..الى أن مرة من المرااير قابلت بنت أسمها أمل ..عمرها 27 سنة ..و توها ما تخرجت والأكثر غرابة أنها تمدح في جامعة الملك سعود بقوة وتصفها بأنها أجمل مكان في العالم وأفضل مبنى في التاريخ ..أن حسبتها في البداية تستخف دمها ولا تستهبل ولا ذا نوع من أنواع الأمراض النفسية الجديدة اللي توني ما بعد سمعت عنها ولا قلت شكلها مالة من بيتهم وتروح الجامعة تتسلى وتسقط ولا وشلون عمرها 27 وما بعد تخرجت …حاولت اتلقف وسئلتها ..أنا: يا أمل من جدك تحبين جامعة الملك سعود ولا بس فلسفة على الفاضي لا يغرك اني طالب طب تراني أكره ما أكره في حياتي الجامعة يعني الدعوة شباب ومصارحة.

أمل : والله يا عبدالعزيز أني احب الجامعة أكثر من نظر عيوني ياخي لولا الله ثم هالجامعة مدري وش كنت بأسوي كنت بأموت صدقني ما استهبل عليك .

أنا : يا أمل عرفت قبلك نص مليون بنت ولا واحدة قالت كلمة طيبة عن الجامعة مو مدحت حتى ربع كلمة زينة في الجامعة ما قالت وش معنى أنتي لا تكونين بنت المديرة ولا أمك مي العيسى (والله ما اعرف مي العيسى بس دايم اقرى اسمها في رسالة الجامعة أنها ضفت بنات ورايحين لرحلة الظاهر عند رجلها اوتوبيسات للتأجير ).

أمل : لاوالله يا عزوووزي أنا مثل ما تقول في موقعك مواطنة وأنتم بكرامة في هالبلد بس بأقول لك شي مشكلة البنات في جامعة الملك سعود انهم مافهموها زين وعلشان كذا ما حبوها ولا ارتاحوا لها بس أنا غير فهمتها زين وعشقتها موت.وصارت اغلى من روحي علي.

أنا: أي فهمتيها زين وانتي عمرك 27 سنة ولا بعد تخرجتي متى ناوية تتخرجين انشالله اذا صار عمرك 55 سنة .

أمل: اولا انا عمري 27 سنة ونص ثانيا لو كنت ابي أتخرج كنت تخرجت من زمان بس كل ماوصلت لآخر سنة في كلية نقلت لكلية ثانية يعني بديت في كلية الصيدلة مليت رحت للعلوم الأدارية وبعدين رحت لكلية التربية وبعدين أنا الان في كلية العلوم ..يعني لما أقول لك أني احب الجامعة فأنا واعية للي اقوله زين لاني مريت بكل أقسام وكليات هالجامعة الغراء .

أنا : طيب فهميني وشلون وكيف هذا يعني أنتي الوحيدة اللي تقولين هالكلام …وامك ما هي مي العيسى .

أمل :شف وش رايك تجي معي للجامعة ..وماشالله عليك لك خبرة في تقمص الادوار النسائية وعندك عباية من عقب قصة الفيصلية .

أنا: افا وش قصته لا اسمحيلي ما أقدر حلا كل يوم باطق عباتي واصير بنت ..

أمل : يابن الحلال علشاني كلها يوم بس يوم في عليشة وتعرف ليه احب هالجامعة والصرح العالمي الشامخ.

أنا: يا بنت الحلال والله صعبة ثانيا عباتي مخصرة يعني ما أقدر ادخل بها عندكم ( أمزح ولا ما في ديرتنا عبايات مخصرة ولله الحمد ) غير التنانير اللهم لك الحمد زي موحد يابني يا أسود وانا ما عندي الا بنطلونات جينز وسترتش ( لو ربي خلقني بنت كنت مشيت شارع التخصصي كله وراي .)

أمل: ماعليك باترك لك تنورتين وبلوزة في مكتبة السخافة لأدوات الثقافة وبكرة الوعد عند بوابة ستة أنا باكون واقفة ومعي شنطة حمراء كبيرة وكلمة السر جيت كلك شموخ …اتفقنا .

وبالفعل ثاني يوم لبست التنانير اللي عطتني اياها البنت مع انهم كانوا وساع بس الشكوى لله ..ورحت هناك ومن الزين الطبايع لقيت نقابي ضايع فكرت اتحجب بس اكتشتفت اني لازم اطير الشنب بس الله ستر ولقيت برقع الشغالة والطشة واروح به للجامعة واتقابل مع أمل على طول وتشدني مع يدي وتطمر بي وتقول بسرعة ترانا متأخرين عندنا محاضرة اجتماع وترى اسمك عزيزة على فكرة ..وبالفعل رحنا الى قاعة المحاضرات بسرعة البرق ( اثر البنات اذا بيركضون يحطون العباية والتنورة في فمهم ويركضون واحنا العيال بس ثياب ) المهم ونرتز ربع ساعة والدكتورة ربي يسلمها ما بعد شرفت وأول ما دخلت الدكتورة الا ثلاث بنات محتشمات طلعوا على طول والتفت لأمل .

أنا: عسى ما شر لا يكون الدكتورة قالت لهم بس لا تحضرون الا بوليات أموركم.

أمل : لا ذولي بنات مختلفات مية بالمية مع الدكتورة وكذا مرة صارت مشاحنات بينهم فاتفقوا أنهم يورون الدكتورة أنهم جوا بس ما يحضرون المحاضرة على أنهم يدخلون الأختبار ومن ثم ينجحون.

أنا : ليه وش مختلفات مع الدكتورة فيه ووش يحرق رزهم ويخليهم يختلفون مع الدكتورة .

وتوني ما خلصت كلامي الا تنط بنت جالسة في الصف الأول اسمها وفاء …على دخلة الدكتورة وتبدا ترطن.

وفاء: بصراحة يا دكتورة أحب ان اهنئك على كلامك اللي أمس في التلفزيون صراحة كان معبر جدا وكلامي درر وينقط ذهب بالفعل احنا في القرن العشرين وأصبح الحجاب مسئلة مو مهمة لأن المرأة تحررت من الأفكار الرجعية …بصراحة يا دكتورة من شدة اعجابي بكلامك ماقدرت لا اتحرك من قدام التلفزيون ولا أفتح الكتاب أي والله.

الدكتورة: مشكورة ياعيوني وياليت كل الطالبات مثلك,, ترى التلفزيون مو للاغاني بس والأفلام بالعكس فيه ثقافة كبيرة أكبر من الكتب ذات نفسها .

أنا : (بصوت مهموس ) وش السالفة …الحين هالدكتورة من اللي يطلعون لنا في التلفزيون كل شوي .

أمل: ايه وكل مناحرها في حقوق المرأة والحجاب وأن ما طلعت في تلفزيوننا في الف تلفزيون فاتحين لها الباب ,,مو السعودية والحجاب بس هذي سالفة تفتح الف قناة فضائية..,,,البلاا موب فيها البلاا في استاذة النفاق وفاء اللي ماهمها الا تنافق الدكتورات وتمدح فيهم. ما تدري أنها حافظه متى وفي أي قنوات بيطلعون وياليتها تحط ربع هالقوة في دراستها وكتبها بس وش نقول مثلها اللي يعدون بسرعة في الجامعة لا ويتعينون معيدات بعد جماعة شد لي واقطع لك…

وتلتفت الدكتورة علينا وتكلم أمل.

الدكتورة : انتي يا متخلفة الى الآن ما تخرجتي ..والى الان ما تحبين تجاملين احد.

أمل: الى بكرة أنا كذا وبصراحة افكارك ما تعجبني ولا اقدر انافق زي بعض الناس واجلس امدح واشرخ فيك .

الدكتورة : اقول انثبري بس في محلك وقابليني اذا نجحتي .

وتوني باسئل أمل وش بينهم ( طبعا لظروف شنبي ادخل القاعة ببرقعي ) وتسئلني الدكتورة .

الدكتورة : وانتي ياللي جنبها وش هالتخلف أحنا في القرن العشرين وانتي ببرقعك تراك مع بنات زيهم زيك.

أنا : والله يا دكتورة أنا بقرة ترعى اللي يقولونه أهلي لي اسويه وامي محلفتني ما افصخ البرقع ..وابوي لو درى أني شايلته لو بوسط عماتي يشنقني ..وش عندتس بعد.

الدكتورة: ولمتى أبوك بيتحكم في حياتك بيزوجك من اللي يبي وبيحكم فيك مثل ما يبي متى بتتحررين يا بهيمة من سيطرة الرجال .

أنا: والله يا ابلة قصدي يا دكتورة ودي بس كل ماشفت عقال ابوي أتراجع,, مرة وأنا رايحة لحفلة عيد ميلاد بنت خالتي وعلى بالها أنها بتخليها تنكرية ..قلت باتلثم ويوم شافني أبوي يا دكتورة اللي يزنطني بلثامي ويعلقني فوق المروحة ولولا واسطة أمي وتعهدات أخواني أني ما أكررها ولا كان مضحي بي في عيد الضحية اللي فات.

الدكتورة : للاسف الرجال دايما يتحكمون في سير حياة النساء في هالبلد وين قوة المرأة ومكانتها وعقليتها واستقلاليتها …

وفاء: أي والله وانتي صادقة يا دكتورة معك كل الحق وأزيدك عدد كبير من الطالبات سلبيات مرة وهذا اللي للاسف ملغي شخصيتهم.

أنا : اها عاد آصي بس تكفين انتي تركدي لا تطيح شخصيتك ..ميلي الطرحة شووي يعني أنتي ووجهتس عندتس شخصية يا متملقة …

الدكتورة : اسكتي انتي يا مبرقعة ( مبرقعة غير المبرقعة الشاعرة ) واعقلوا يا بنات توني امدح فيكم بتطلعون أكثر تخلف من الرجال .

وتكمل الدكتورة المحاضرة وتسير بها الى بر الامان الى أن انتهى الوقت المحدد لها …وتوها طالعة الا تقوم أمل وتجرني من يدي وتطير بي طيران ..ويوم سألتها علمتني ان عندها محاضرة في آخر المبنى ولاعندها الا 3 دقايق بس ,ولأن الدكتورة جات متأخرة ومن حرصها الزايد بتعوض الطالبات ودكتورة المادة الثانية ماتسمح لأي طالبة أن تتأخر لو دقيقة …المهم وتنانيرنا في خششنا وداعسيين ( بعذر البنات صاروا يلبسون نايك واديداس للجامعة من عقب الماركات الفخمة ميلانو وفيرساتشي ) وتونا داخلين واحنا نلهث لمحاضرة الأدب العربي الا وتدخل الدكتورة بعدنا على طول الا ومن نشوف هناك في القاعة …بالضبط حبيبة ئلبي وفاء نفاقوا هانم …أو بلأحرى وفاء زحلئلي (يعني بالسوري مشيني) وتنط على دخلة الدكتورة ..والباقيات يقولون يالله صباح خير.

وفاء: بصراحة يا دكتورة أنا اقف بين يديك عاجزة عن وصف مداخلتك امس في برنامج لقاء على الهواء وردك على الشاعر فطيحان بن مغص ..وأثباتك بالأدلة القاطعة ان الشاعرات عموما والشعر النسائي أبلغ وأجزل من الشعر الرجال بصراحة يا دكتورتي الفاضلة كلماتك الرنانة مازلت على مسمعي الى الآن.

أناLبصوت مهموس) قولي آمين جعل دريل يحفر في آذانتس يا كذبتس وياكثر نصبتس ..ولوّ عليتس من بنتس .

الدكتورة 2: مشكورة يا حبيبتي يا وفاء ان دل دل على حرصك واهتمامك بالأدب شكلك بتطلعين أديبة في المستقبل.ياليت ربع الطالبات مثلك.

طالبة ثانية: يعني يا دكتورة لو رادة على خالد الفيصل ولا بدر بن عبدالمحسن ..كان نقول برنامج مهم بس من فطيحان بن مغص.عفوا يعني…

طالبة ثالثة: أو طلال الرشيد ولا خالد المريخي يا حبي لهم…

أنا: وجع وش ذا احنا في قاعة محاضرات ولا مجلة شعرية الا يا أمل وش تدرسون في الأدب العربي.

أمل: اللي تختاره الدكتورة مرة لأبو الطيب المتنبي ..وفجاة لبنت الدار والغريبة ومدري ايش حسب الدكتورة وصديقاتها.

أنا: أجل لاتقولين مذكراتكم مجلات المختلف وفواصل وبروز وطقتهم.

أمل: بالضبط عليك نور ,,بس المشكلة مو هنا ..المشكلة اذا جا الأختبار تشوف شي جديد ماعمرك شفتاه..مثلا هالدكتورة اللي قدامك تموت في شي اسمه أبو الطيب المتنبي ..ولو يلعن أبوها تفرح ..بس في الأختبارات اذا طلبت نقد لقصيدة لأبو الطيب المتنبي …ياويلها يا سواد ليلها اللي تمدحه ولا تقول صح عليه ..ما يرضيها الا الشتايم في هالميت ولعنة سلسبيله.

وفاء: بصراحة يا دكتورة عندي سؤال محرج ممكن اسئل ولا لا .

أنا: ( همسا ) أنتي مرتبطة يعني لك بوي فريند ولا لا ..(تفكير تماسيحي بعيد عنكم هذا هو السؤال المحرج)

الدكتورة : تفضلي يا وفاء انتي من أحسن الطالبات عندي وش ودك تسألين عنه.

وفاء : بما أنك صديقة مقربة للشاعرة الكبيرة (بنت السطوح) وزميلة دراسية للشاعرة المبدعة (أم برقع وسيع) وتقرب لك الشاعرة الرهيبة (ماسكة الخط السريع) ..بصراحة بصراحة يا دكتورة مالك محاولات شعرية وأذا لك ياليت تطلعينا على بعض منها وتثرينا بأبداعك.

أنا: (همسا) يا نصبك وجع بتروحين للنار سيده بدون حساب يلعن ابوك فصيلة دمك نفاق ..ماتخافين الله في نفسك وزميلاتك. ما يسوى النجاح كل أبو هالنصب .

الدكتورة : يوووه لا تحرجيني يا وفاء انا ايام شبابي كانت لي محاولات بس مو ذيك المحاولات يعني ..ولا أقدر انشرها بس احتفظ بها لنفسي .

وفاء : أرجوك يا دكتورة اذا ما يزعجك أجي لك في مكتبك وتطلعيني على بعض منها لآني شغوفة جدا للأطلاع عليها فياليت ما تحرميني منها.

وتوني بأقوم اتفاهم مع هالمنافقة الا وينتهي وقت المحاضرة وتشدني أمل من يدي وتقول يالله باسرع ماعندك الى مبنى 4 …ما يمدينا نلحق قبل ما تبدى المحاضرة.

أنا: وش مبنى 4 الآن يا كثر مبانيكم وقل سنعها .

أمل : هذا مبنى الدوائر التلفزيونية المغلقة …الله يعيننا على الشمس يالله بسرعة.

أنا: احلى اجل ديجيتال وسعة صدر الا ماعندكم قناة الساتيفاكشن …والله امزح مو قصدي.

أمل : يالخبل هذي المحاضرات اللي ناخذها مع الآولاد في نفس الوقت يعني يكون الدكتور عند الآولاد واحنا نشوف بالكاميرا كل المحاضرة وفي الاخير نساله عن طريق الاتصالات فهمت ..ثانيا خلك رومانسي وش الساتيفاكشن البنات هالأيام طايحات في البنك بلس .

ووصلنا هناك الا قاعات مخيسة يذكرونك في سينمات مصر القديمة وظلما وكل واحدة تخبط في الثانية وأنا عاد اللي مبسوط كني في سيارات التصادم بس المس اشياء ناعمة ,,وتبدى المحاضرة وفيها دكتور سوداني الله يستر علينا وعليه الأولاد اللي معه في المحاضرة كل واحد كاشخ ومصحصح وعطورهم واصلة الى عندنا في الدوائر التلفزيونية وأذا الواحد منهم جا يسئل لازم يقوم من محله ويروح جنب الدكتور ويقول اسمه الرباعي وشوي ويعلن رقمه ثم يسئل سؤال بايخ ويرجع لمحله ..أما البنات ياحبي لهم اللي نايمة واللي تاكل واللي تخيط مدري وش تخيط واللي قالبينها قهوة وكركرة الى أن جا وقت الاسئلة ..وتقوم لك ذيك البنت اسمها الظاهر نجوى ..أنا طول الوقت شايفها نايمة صحت قبل نهاية المحاضرة بخمس دقايق ..المهم وتمسك المايك وتتكسر لك ذاك التكسر وتتنهد بين كل حرف وحرف وتمدح في الدكتور وآخرتها يا دكتور من وين نقرا هالمحاضرة من الكتاب ولا من المذكرات …ويقول لها الدكتور من الكتاب ( اللي هو طبعا مؤلفه) وترد عليه بميوعه ولكاعة أكثر بس يا دكتور ما حصلت هالكتاب لفيت الرياض سوق سوق قصدي مكتبة مكتبة ولا حصلت هالكتاب …هنا أذكر أن الكاميرا كانت على وجه الدكتور قصدي على عمامته ..وفجأة اختفى وسط اندفاع الشباب اللي عنده في نفس القاعة وحرب بينهم كل واحد يصارخ أنا عندي الكتاب ما أبيه والثاني يقول عندي كتابين بأعطيك أجددهم واللي يقول الوعد في سيفوي عند أقسام الجبن وبيكون معي الكتاب والبنات عندنا في القاعة كركرة و طايحات على بعضهم موت من الضحك.

المهم انتهت المحاضرات وأنا تعبت وجعت واقول لآمل أني تعبت من المحاضرات قالت لي أمل ابشر الحين عندي بريك ..ونمشي الى المكان الا معظم الفتيات يتواجدن فيه شارع خمسة ( شارع الشانزلزيه حق الجامعة )وتقول لي امل أول ما وصلناه نزل قصدي نزلي راسك ياعزيزة …وتوني باسئلها ليه ………آآآآآآآآآههههه عينييي آ ه يا عيني الحقوني عيني انفضخت (انفضخت يعني مدري بس كن اصبع دخل فيها وفضخها ) وبارفع راسي علشان أشوف وش دخل بعيني الا عصا لاختني( لاختني من لخّ ولخ أي مصط أي طق ) على أذني …آآآههه يا أذني …وبعد هالاصابات القى السبب بنت دلوعة لابسة نظارات شمسية فاتحه مظلتها الشمسية على الآخر (من المظلات الكشخه اللي مساحتها حوالي مترين وعصاها طولها متر وشوي ..

أنا : هييي أنتي فتحي وش ذا اللي شايلته بيدك شايفه هالغيوم الحين والمطر يرخ فوق روسنا يومك تجيبين مظلة شمسية وياليتها صغيرة الا جايبة واحدة تكفي الجامعة كلها …

البنت الدلوعة: يووه ما تشوفين الشمس اللي فوق روسنا وأنا بصراحة توني راجعة من جنيف ولا أتحمل حر هالشمس أنتي شكلك مصيّفة في جدة ولا الدمام مالت عليك ما تأثر فيك الشمس ..

أنا: يا حبيبتي البسي نظار شمسية وامشي في الظل خلاص ترتاحين وتريحين اذا بلاك الله بلاك الله هاتي شمسية صغينونة من اللي يتسفطن مو تجيبين لي مظلة موقف سيارات ..وتخطفين عيون العالم فيها , ثانيا أنا مارحت جدة العام رحت الطايف وش زينها براد ورمان وبرشومي وسعة صدر والله الواحدة سكرت من كثر ما تاكل هالرمان في آخر الليل ندروخ ..يالله أن ترزقنا براد الجنة.

البنت الدلوعة : أولا الطايف ولا جدة ما فرقت كلها كم كيلو يالله شي على قدكم أما مظلتي مالك دخل جيبي زيها اذا تقدرين ولا مرة ثانية امشي وانتي مفتحة عيونك مو مطيرتهم في البنات من اللقافة ..

أنا : صدق أنك ما تستحين مادريت عنتس ياللي مولودة بباريس في سويسرا تعالي اتفاهم معتس ..وتوني بامسكها علشان اطقها الا أمل تسحبني من يدي وتقول ل ي تراها بنت مسنودة وراها ظهر يعني تخوف ديرة …المهم وتقول لي أمل وش رايك تجين المطعم قلت لها لا شكرا أنا بانتظرك في شارع الشانزلزية عجبني والله أنتي روحي وانا بانتظرك …وتوني قاعدة اقصد قاعد الا وتجيني بنت معها شنطة كبيرة اول ما شفتها حسبتها واحدة من الدافورات الا وتجلس جنبي قلت بس ماهيب دافورة الدوافير يتنحشون عن عيون الخلق ..المهم وتقول لي البنت أم شنطة.

أم شنطة: هلا والله بالمزيونة المملوحة وشلونتس انشالله بخير وسلامة وش فيتس ضايق صدرتس أكيد عندتس عرس ولا مناسبة ومستحية تروحين لان كل فساتينك قديمة والمكافئات مابعد صرفوها من كثر هالمكافأة علشان يأخرونها .

أنا: ايه الله يسلمتس وأنتي صادقة عندي مناسبات ومحتارة وش البس والميزانية عدم يا جعلتس ماتعدمين غالي انشالله .

أم شنطة: الله أجل بعثني لك ..معي قطع قماش حرير ياباني وشيفون فرنسي واشياء حلوة توسع صدرك وأسعارها رخيصة مرة مرة تحصلينها عند العيسائي والحريبي بثلاث أضعاف قيمتها عندي أنتي بس وش ودك به وش الألوان اللي في بالك يعني وكم السعر اللي تقدرين عليه.

أنا : ماشاء الله أجل انتي تبيعين بثلث القيمة وين مسوية تخفيض للجامعيات صايرة زي العبيكان يحتكر الكتب ويضاعفها عشر أضعاف قيمتها ثم يسوي خصم خمسة اريل وجرير يدفعتس دم قلبتس ثم يعطيتس سنوديشة من أي مطعم …ثانيا أنا ذوقي صعب ترى يعني مو سهل أي شي يعجبني .

أم شنطة : والله لو ذوقتس ايش بتلقينه عندي أنتي بس تخيري ياحلوة يا قمر والله الخيشة على جسمك بتطلع تهبل ماشالله عيون وجمال وجسم ورشاقة..

أنا : (والله من الكذب كل هالمواصفات وأنا تمساح خشن ..مابقى الا تقولين ونعومة ) بس ما ادري ما اتوقع احصل عندك اللي ابي.

أم شنطة: عندي أجمل أقمشة تنفع للزواجات ..واحسن شي للحفلات وعندي بناطيل لحفلات الدي جي وعندي شيفونات تنفع لأعياد الميلاد والخطوبات بس أنتي علميني وش المناسبات اللي عندتس .

أنا: الله يسلمتس عمي متوفي أمس ومرة خالي مريضة بالمستشفى بنروح نزورها ومرت أخوي مسقطة قبل يومين وبنروح نخلف عليها وولد عمتي صار له حادث في طريق القصيم ومتكسح الان بنزوره بكرة في مركز الأطفال المعوقين ركبته نتقت من الدريشة من قوة الحادث …وخالتي عقبال عندك تطلقت وراحت لبيت جدتي عاد كل مسيان أنا وبقية خالاتي نروح نقعد عندها نوسع صدرها ونلطم معها شوي ونعذرب في رجلها …الله يستر علينا وعليتس روحي لحالتس بس أنا ما أتعامل الا مع محلين بس وهم يعرفون ذوقي ..زارا فرع حلة القصمان وكرستيان ديور مركز المعيقلية ورجاءا ما أبي احرجك الله يرزقك

وتقوم البنت أم شنطة وتعطيني كرتها فيه رقم جوالاتها وايميلها وتوها طاسة عني تجيني بنت ثانية هالمرة بدون شنطة وتجلس جنبي وتحط يدها مرة على خصري ومرة على يديني تبي توخر العباية بس كل شوي ارجعها لاتشوف غابة الشعر اللي في يدي ثم انكشف …وتجلس ذيك البنت وتقول لي ماشاء الله وش ذا الحلا وش ذا الجمال يا ارض احفظي ماعليكي قمر ماشاء الله قمر الا أنتي مرتبطة ولا لا .

أنا : لا الله يسلمك توني صغيرة هع هع هع هع ( قال لك يعني مستحية )

البنت: ماشاء الله تبارك الله أجل ابشري خطيبتس عندي أنا طالبة معكم في الكلية بس أترزق الله من وقت لوقت وأشتغل خطابة ترى نص بنات الجامعة أنا اللي زوجتهم واسئلي اذا مو مصدقة .

أنا: ( آها بعذر أجل نص الشباب ربعي اللي تزوجوا توهقوا أجل اخواتهم وامهاتهم يخطبون من العباية وبسم الله وعلى بركة الله والله أكبر )لا الله يسلمتس أنا صدق مو متزوجة بس ما أقدر أتزوج أحد.

البنت : خنة حيلي كسرتي خاطري أجل أنتي أرملة ولا مطلقة والله انتس ما تستاهلين .

أنا : لا بسم الله علي فال الله ولا فالتس ..القصة طال عمرتس أننا عايلة تقليدية يعني أي بنت تجي في عايلتنا على طول ولد عمها يكتب عليها وتصير عرفيا له لين يعرس عليها ..يعني عندتس مثلا بنت خالتي ولد عمها كاتب عليها ببخاخ أسود ( أملاك أبو هيثم يرجى عدم اللمس أو الاقتراب ) وأختها ولد عمها الثاني كاتب عليها بالحفر ( حرم أبو صعفق ) أما أنا وش حليلاتي ولد عمي كاتب علي علباي ( أعلى الرقبة من الخلف ) بقلم خط ذهبي … حرم أبو مشنص وأم مشنص مستقبلا تبيني اوريتس علباي.

البنت : لا لا مشكورة ما يحتاج الله يوفقتس بس اذا تعرفين واحدة ولا واحد يبي الستر عطيه كرتي هذا تراني مثل ما قلت لك مزوجة نص بنات الجامعة اسمي الحقيقي ابتسام واسم الشهرة ( أم المخدات ) يعني لأني أجمع الشباب والشابات على مخدات بالحلال ….وتو البنت رايحة الا وتجي واحدة دلوعة تشاهق توها الظاهر مخلصة كورس صياح وشافتني جالس بروحي وقالت لي أنتي بروحك ولا تنتظرين أحد ويوم شفتها تكلمني قلت لها أنا بروحي اهيء اهيء اهيء أنا وحيدة …الا وتلقطني من يدي وتمشي بي في الى مبنى 12 فيها بنات جالسات ونجلس جنبهم وهي تكلمني بصوت عالي …

الملكعة: تصدقين يا أنتي أني حبيتك من كل قلبي يوم عرفتك وتركت اللي أعرفهم قبلك لأني بصراحة اكتشتفت أنهم دون وما يسوون ياما نصحتهم لا يمشون ورى الناس والحكي بس هم طلعوا رخيصين وش اسوي ..

أنا: اوكيه مشكورة بس وش السالفه …

الملكعة: ماعليك اضحكي بس وجاريني ..ايوة قلت لك البنت اللي تتعرف علي ماراح تندم طول عمرها ابدا ابدا .. و كعربون لعلاقتنا خذي البسي هالخاتم وهالحلق ترى مافي زيهم في الرياض الا اللي معي ومعك بس يعني احنا لبعضنا …بس لا عمرك تسوين زي بعض الناس وتنظرين للدون ترى والله أخليك ولا يهمني.

أنا: أخليك يا سلام ,,, أخليك ده كلام ..والله لو يصير وش يصير غرى بالصق فيك مثل الغراء ماعليك بس …بس عن حلق الآذان يعني أمي الله يهديها يومي صغيره خايفة علي أني أخرق آذاني تقول أنه يوجع فما اقدر البسها بس الخاتم من عيوني ….

الملكعة : بس كذا يا حياتي تسلمين لي والله ماعليك بكرة أجيب لنا حلق مو بمشبك لا ذاك اللي يعلق بالأذن ,, كم عندي منك ولا أقول لك وش رايك تجين عندي في البيت اليوم ترى بننبسط ,,والله بسطة يحبها قلبك …

أنا : والله موب شينة بس وش رايك أنتي اللي تجين عندي في الملحق أووه ( والله كان ما تطلعين الا ..) .

الملكعة: هوو وش ملحقه ..في بنات يجتمعون بالملحق …وغرفتك وش فيها .

أنا: ما قلت لك أخواني واجد وغثاهم كثير وكل ساعة واحد يتنطط لنا بس في الملحق غير …بنصير أحلى من جدة غير صدقيني .. أنتي بس ما عليك.

البنات اللي كانوا في الجهة الثانية: ياربيه وش ذا الحب والمحبة اللي على غفله خبط لزق ..عشنا وشفنا.

الملكعة: يا قلبي آآه من القهر بدوا يحكون ..يانتي وايااها ترى احنا حاطين عيننا على بعض من زمان ومتفاهمين مرة مرة بس الظروف الدراسية حالت بيننا .

أنا : وهي صادقة والا أحنا نموت في بعضنا من زمان ..عمري وش رايتس فيني وانا بالسترتش موب اخبل.

الملكعة : الا تهبلين ونص تطيرين العقل بس المسكينات الغيرة ذابحتهم .ماعليك منهم.

وانا في حالة شبه خققان كلي الا تجي أمل وتجرني بكل قوتها وتقول وش تسوين مع ذولي البنات أنت عارف وشهم ..قلت بنت أعجبت فيني ماتبيني أبادلها الأعجاب ..وترد علي امل أي اعجاب يالخبل ذولي سحاقيات .تعرف وش معناها يعني لو تكتشف أنك ولد مو بتشكيك ولا تطقك بس بتقرف وتحوم كبدها وتحسسك انك والخنزير سوى ذولي بنات مافي عقولهم للرجل أي معنى سوى فراغ وشيء ممل ..يعني مو راعيات مغازل يالفطين …فهمت ولا أعيد .

ساعتها أنا شصبت في مكاني وقلت لها وشو معقوله …وتطقني التتنيحة …وتسحبني الى مكان يشبه بيت الأشباح وأنا نمشي يطلع لك خفاش ومرة أعشاش عنكبوتات …ورفوف مكسرة وكتب مشققة ..هل عرفتم أين أنا نعم أنا في المكتبة …وفي موظفة المكتبة وكل طالبة تجي لها تبي كتاب تقول اوكيه بنطلبة من المكتبة المركزية في جامعة الملك سعود عند العيال يعني …واللي بعدها تبي صورة من وثيقة تساعدها في بحثها ونفس الجواب اصبري نسوي عليها طلب من المكتبة المركزية في جامعة العيال ..وعلى هالحال فوق عشرين بنت …وتونا نمشي في المكتبة فوق اجساد الثعابين الا تطلع لنا واحدة فقيرة مسكينة تكسر الخاطر شايله فوق 15 كتاب وطلعت من دفعة أمل يوم أمل تسجل في الجامعة يعني 1410 هـ ..واول ماشفاتها أمل خمتها وقامت تبوس فيها وتحضن وانا خنقتني العبرة .واسمها سعادة لاحظوا مو سعاد سعادة يعني اسم عكس واقعها يوم مشت والدمعة في عيني قصت علي امل قصتها …

أمل: سعادة هذي ياعبدالعزيز دليل على الصبر في المحن والشقاء …هذي يا طويلة العمر الاولى على دفعتها قسم لغة عربية يعني المفروض يعينونها معيدة ..بس ماخذوها خذوا بنت دكتورة نجحت بتقدير مقبول ..المهم قالت عسى خير وقدمت على الرئاسة المفروض من باب الأدب بما أنها الأولى يعينونها في الرياض بس وفقا للنظام لازم سنة برا الرياض ودوها لقرية الدحديرة شمال الخرخير بحوالي 50 كيلو ..خلصت السنة وكلما طلبت نقل رفضوا وينقلون اللي بواسطات قبلها المهم جلست في قرية الدحديرة 4 سنين ولا نقل ولا يحزنون ..لين ملت وأدركت ما في أمل المهم من حسن حظها بنت الدكتورة اللي خذوها للأعادة هونت وملت ولا لها خلق تشتغل تزوجت واحد غني وطنشت الجامعة قدمت سعادة على الأعادة ولسوء حظها قبلوها وياليتهم ماقبلوها كل شوي ممترينها كل دكتورة تبي مرجع شكل من مكتبة شكل وكل دكتورة تبي شغل يعجبها بس والمشكلة المسئوليين عن سعادة أربع دكتورات كل واحدة منهم ماسكة جهة ذي شمال والأخرى جنوب وذي شرق وذيك غرب ..أن أرضت واحدة زعلوا الباقين كل ماقدمت على بحث رفضوه لأنه يعجب ميول دكتورة ويزعل الباقيات والمسكينة مكافئة الأعادة حقتها ضايعة على الكتب والمراجع ويدها تكسرت ولا فيه فايدة يعني بالعربي يا بنت الناس ضفي وجهتس ..والمسكينة ماينفع تقدم للرئاسة بعد ما طلعت منهم لأنهم ما يقبلون شهادتها لأنها قديمة وهم عندهم زحمة من الخريجات الحديثات وخنة حيلي صابرة صبر ولا صبر أيوب بكبره ياحسافة مرتبة الشرف الأولى بس..وعلشان كذا صايرة زي الملطشة في القسم على أمل عل وعسى تنفرج ومنها مكافئة الأعادة تغنيها عن طرارة أبوها.

وبعد ما شفت الآنسة كئابة قصدي سعادة شدتني أمل من يدي وقالت عندنا محاضرة رياضيات الآن مع الدكتورة فتحية زئلط …واحدة كريهة غثيثة ما تنبلع ..المهم دخلنا القاعة ..حتى القاعات بالواسطة يعني الدكتورات السعوديات لهم القاعات الكبيرة المكيفة ولو شعبتهم ماكملت عشر طالبات والأجنبيات شعبهم على اربعين وخمسية وقاعة ماتوسع علبتين تونة وعلبة سردين وتكييفها خربان ..وتدخل الدكتورة فتحية ماشاء الله ثلاجة متحركة بروحها يبي لها مدرج كامل ..وتوها ماكملت هبوطها اقصد دخولها الا تقول .

د. فتحية: يالله يا بنات طلعوا اوراء فادية حاعملكوا اختبار مفاجىء اشوف ايه مستواكو …

البنات: لا يا دكتورة ما استعدينا حرام الاسبوع اللي راح اختبار مفاجىء واسئلة صعبة ولا جبنا درجات زينة تعبنا.

د. فتحية:بائولكوا ايه يالله اؤام بلاش لكاعة مابحبهاش …..واعملوا حسابكوا الاختبار مدته 5 دئايئ علشان نلحئ ناخد محادرة اصلكوا بنات هبل واحنا متاخرين كتشير في المكرر .

وبالفعل شرخت خمسة وخمسين سؤال كل سؤال يبي له ساعة ونص حل ..وبعد خمس دقايق بدت تجمع الأجوبة .والطالبات اللي تصيح واللي تلطم.

البنات: يا دكتورة والله حرام طيب لا تحطين عليه درجات خليها كذا علشان تعرفين مستوانا .

د.فتحية: وبعدين مش حنشرح المحادرة وحتئولوا الدكتورة فتحية زئلط مش ئادرة توصل المكرر لينا اخرسوا بئه .. الاختبار سهل مرة مرة على ئولتكوا بس اعملكوا ايه انتوا مش بتزاكروا يا ئاعدين لي ائداتم التليفجن أو بتتصرمحوا في الاسواء في الفيصلية والعئارية واسمها ايه الجديدة مش عارفة ايه …ده كلام يرضي ربنا بس.

وفاء: بصراحة يا دكتورة اسمحي لي الأختبار كان صعب مرة مرة وما أتوقع أن في طالبة حلت كويس.

أنا : ( همسا) غريبة وفاء زحلئلي تقول كذا ولا نشاطها مع السعوديات سبحان مغير الآحوال.

وفاء: ( تكمل كلامها ) بس العيب منا يا دكتورة ,والله انك صادقة احنا أصلا لو كنا نذاكر كان الآختبار بيكون سهل ومنطقي بس العيب مننا بصراحة احنا المقصرات وياليت في كل أسبوع تسوين لنا أختبارين قصيرين علشان يتحسن مستوانا ..والله يخليك تاج فوق روسنا يا دكتورة.

أنا:غربلتس الله يلعن ابوس,, ابليس يدرس على يدينس وش اللش احنا مقصرات 55 سؤال من بيحلها في 5 دقايق وش مصرية تاج فوق روسنا ..مالين من أعمارنا .. الله يزوجتس زوج اصم ما يسمع علشان ما تعرفين تنافقين عنده .

وتقوم طالبة شكلها بنت نعمة ( العنود ) ريحة عطرها مغطية الجامعة كلها .

العنود: معليش يا دكتورة …بس الويك الاند الماضي أنا كنت في باريس وما أمداني أفتح أي كتاب …بليز ممكن ما تحسبين لي درجتي ..وعلى فكرة الأسبوع الجاي بنطلع نجيب أغراض لزواج أختي من روما وتراك معزومة على الزواج يا دكتورة ..

د. فتحية: ميرسي اؤي اؤي يا بت يا عنود بس المشكلة كل الفساتين والدهب بتاعي سيبتوه في مصر ولا واللهي مايهونشي علي افوت جوازت أختك….

العنود: لا يا دكتورة ازعل منك ترى وش ذا الحكي بس الله يهديك ..أنتي تروحين لمشغل الماصلة في العليا وقولي لهم أنك من طرفي وأنا باعلمهم ..ولا تخافين كل التكاليف علي لا تدفعين لهم شي ولو أكرامية ..

د. فتحية: واللهي بتتكلمي جد طاب معليشي ابئ افصل بدله لدلعادي جوزي اصلوه معزوم على فرح هو كمان وكول بدله سابها في مصر ان ما كانش عندك مانع يا فندم..

العنود: ولو يا دكتورة لو تبين تفصلين فستان لأمك بعد من عيوني أنتي تآمرين و ما عليك.

د. فتحية : و بوصي واللهي دانتي بتكسفيني اؤي يعني مجتهدة معايا في المادة ودرجاتك كاملة وبتعملي لي كل كده يعني مش نفاء لا سمح الله ولا عاوزة حاجة ربنا يخليك ويعمر بيتك ..الا بالحئة اؤلي لي ماتعرفيش حد في الجوازات أصل الواد مخيمر ابن خالتي مسكوه في ابا جرشي وبيئولوا عنوه ايه متخلف مع أن والله واد بيفهم وكده ..حتى بالأمارة ئعد 10 سنين في اولى ابتدائي ..ئال ليه يئعد كل سنة يتنئل من صف لصف وهو اللي نعرفه أحسن من اللي مانعرفوش .

العنود: والله مدري يا دكتورة باسئل لك الوالد وانشالله يطلع يعرف أحد في الجوازات.

المهم كملت الدكتورة بنت زئلط محاضرتها و بعدها عند أمل فراغ مدة ساعة ..قالت لي فيها أنها بتروح دورة المياة عندها شغل ( أمل ما تصلي هالأيام ) قلت لها تبين فزعة >>>>جاني كف المهم ماعلينا …قلت اروح في الاسياب شوي أشوف وش يصير في هالجامعة الغراء ..وتوني طالع الا ويلقطوني بنات لابسين دسوس ( قفازات سود) وشراريب سودا صوف ..ومادريت الا واحدة تقول لي ماتخافين الله في نفسك .

أنا:هو هو وش سويت ..شايفتني اشرب ولا اتتن …ولا ماشية على حل شعري حتى برقعي ما شلته.

ام قفازات: شوفي تنورتك مو مفتوحة ..اذا جيتي بتركبين سيارة بتطلع ساقك .

أنا: (همسا وخلي ساقي تطلع راس مالها عظم فوقه شعر ..ثانيا ذي تنورة حقة أمل ) وش مفتوحته كلها على بعضها ما جابت 5 سم ما تشوفين اللي في الأسواق اللي على متر واللي على مترين ..وهي تتحرك تشوفين فخوذها …وركبتها ..وش حليلاتي أنا .

أم قفازات: ولو اذا الله بلا غيرك مو تصيرين زيهم ..ثانيا كان لبستي شراب ساتر مو شفاف تراه ما يستر شي .

انا: ..وش الشراب الساتر بعد تبين البس صوف في هالحر درجة الحرارة واصلة خمسين والبس صوف ….ثانيا يا جماعة الربع البنت بأخلاقها كم بنت متغطية وش حليلاتها قدام الناس ومن تحت لتحت ما تسوى التبن وكم من بنت يقولون الناس عنها صايعة وقليلة أدب بس شايلة ربها في قلبيها وحافظة دينها..

أم قفازات : بدينا بالحكي اللي ماله داعي اللي حافظة دينها تتغطى وتلتزم في شكلها ولبسها …امسكي هذا شريط اسمعيه يمكن ينفعك في دنيتك واخرتك ولا تصدقين الخرابيط ..وقضبني الشريط في يدي وتروح واللي معها تعطيني قفازات لو لبستها بتوصل لكتوفي ..قلت لنفسي الا يا لابسهم ..وأمشي وأشوف واحدة ثقل ومشخصة وفي بنات يجونها ويكلمونها ويمشون ..وهي ترد عليهم انشالله بكرة ..ومرة تقول لواحدة ليلة الخميس ..وجوالها يدق كل دقيقة وتتكلم بسرعة وتسكر قلن لنفسي يا ولد انشب فيها وشف وش قصتها يمكن أميرة يعني أتعرف عليها ..واروح لها ..وابدى اكلمها …

أنا: لو سمحتي لو مافيها أزعاج يعني ماشاء الله أشوف البنات كلهم يجون عندكم وتوعدينهم بشي ويبتسمون ويروحون لا يكون بترشحين نفسك في الأنتخابات ولا شي من هالقبيل.

البنت: لا يا روحي أنا منظمة حفلات اذا عندك حفلة يا حلوة عطيني خبر وأنا اضبطها لك .

أنا: ماشاء الله أجل انتي اللي منظمة حفلات جدة غير ..ولا حفلات أبها …

البنت: ووععع الله يقرفك وش هالخرابيط لا يا عمري أنا أنظم حفلات أعياد ميلاد حفلات ديجي للبنات ومن هالقبيل.

أنا: يعني لا مؤاخذة وش بتسوين يعني أنتي اللب بتجيبين البيبسي والعصيرات والكيك وشلون ..

البنت: ويين أنتي عايشة ماتعرفين شي شكلك مرة بيضا على الأخير.

أنا: أي والله توني محولة من جامعة الأمام يعني حدنا شاي العصر اذا نبي نكشخ مانعرف لهالشغلات .

البنت: آها اوكيه شوفي الحفلة تفرق من بنات لبنات ومن مكان لمكان مثلا بنات يبون رقص وهزهزة ويبون حفلة ديجي أرتبها لهم واذا احتاجوا ملابس كشخة وجلد أدبر لهم ايجار وأنوار وكذا ..بنات ثانين يبون حفلة أونس أكثر بيطلعون في أستراحة هم ذولي لهم تجهيزهم الخاص ..مثلا بعضهم يبون يقلعون وبعضهم يبون يشربون ..

أنا: وش يشربون لا يكون أبوك صاحب مطعم بس ..

البنت: لا شكلك من جد بيضا ..وش أبوي صاحب مطعم ,,,أبوي من طلق أمي ما شفته لي 6 سنين الله يآخذه المهم يشربون فودكا شمبانيا ..ويسكي من هالوناسة لا تخافين محلي ماعندنا كله مستورد.. بنات يبون يخربونها مرة أجيب لهم عيال يرقصون لهم في الأستراحة…

أنا: سوري بس اعرف البنات أحيانا يرقصون للعيال زي في شارع المعارض في البحرين بس بنات يستأجرون عيال يرقصون لهم ؟

البنت: خبرك قديم كل شي تحول يا والله الحين عندي فوق ألف ولد يرقص فيهم من العيال اللي يرقص في أي شي وفي اللي تخصصه بس يرقص للبنات في الحفلات الخاصة وفي عيال يسوون ستربتيز اذا ودك بعد

أنا: طاط طااط حذف أجابتين لو سمحتي وش تجيبين عيال يرقصون لبنات وفي استراحة …تمزحين أنتي …عيال عيال يعني تماسيح ولا عيال موب عيال…

البنت: اخس عليكي الا عيال عيال وبعضهم عيال ناس ..في عيال يحبون الوناسة وسعة الصدر منها يمتعون ويستمتعون عادي ولا تخافين ما أحد منهم يلمس ولا بنت ذولي نقوتي مضمونين والله لو واحد منهم يسوي نص حركة لا العن والديه …ثانيا يا روحي هذي الموضة البنات صاروا يحبون يشوفون رقص عيال لايف بدل ما يشوفونه في التلفزيون اذا فاز المنتخب ولا في الحفلات برا وتستحي كل شوي علشان لا يكشفونها أهلها ..الدنيا تغيرت المهم تبين تسوين حفلة قريب ..

أنا : مو الآن انشالله بس عطيني رقمك وياليت يكون عندك ألبوم للعيال علشان أنقي ( أبي اشوف العيال اللي كل واحد منهم يسوي نفسه مطيح الف بنت منهم ولالا ) المهم وأكمل مشي وأدخل منطقة مدري وين أنا فيها الف بنت كل واحدة ماسكة جوالها وأنواع الخقة ..

الأولى: يا سعود صدقني اليوم ما أقدر أخوي بياخذني قسما بالله حاولت فيه أجي مع السواق يقول فاضي ماعنده محاضرات ..عارفة انه يبي يشوف صديقتي (هلا) بس وش أسوي لهم علشان يتقابلون تطيح الطقة في راسي.

الثانية: وينكم يا فيصل …باليورومارشية ..عارفتك قليل أدب وش موديك تغازل ..خلاص زعلت ماحنا جايين والبنات بنروح مكان ثاني ماني معلمتك وشو ..لامو السيفوي ملينا منه ….علشان تعرف اذا قلت لك لا تروح الا لما نجي بس تسبقني لليورومارشية أوريك.

الثالثة: ياحياتي يا غادة من نقلتي لمعهد الأدارة وحياتي عذاب البنات بعدك ملل وطفش أنتي أكثر واحدة فاهمتني وأكثر واحدة لها وارتاح لها واحس اني بأمان بين يدينها ..>>>>بكت بكت >>>>>الحب عذاب يا شيخ

الرابعة: اسمع يا فهد وأنت راجع للبيت جب معك غدا ما اقدر ارجع بدري عندنا محاضرة تاخرت فيها الدكتورة وبناخذها الساعة 4 ..يعني حتى البيض ما اقدر أسويه لك .>>>>لاتفهمونها غلط متزوجة.

الخامسة : يمه والله اذا ما ارسلتي لي السواق الحين الحين أني لاطلع مع البنات ولا تشوفيني الا عند العشاء حذرتكم ….ماعلي يجيب أخواني ولا لا أنا حذرتكم وبس وجوالي باقفله باي.

السادسة: يا قليل الدب لا عمرك تتصل ..اتصل بعد ساعة علشان أغيظ بك البنات اللي في الأوتوبيس بس لا تدق في الليل تراني احب ولد غيرك بس شكلك دمك خفييف ما تنتفوت ..ولا تنصب علي أجل تقول لي شكلك غلطان وداق على أمك . وصوتي يشبه صوت أمك طيب .اقول عندك نغمات زينة ارسل لي ..وشو ما عندك ياخي ارسل لي من البحرين شكلك سياحي وبقوة ومطفر ..ولا جوالك عائلي

وبعدهم القى بنات يشدون شعر بعض ..أنا توني باطب افزع ..زحمة البنات سعة صدر …الا يتفرقون ..ويصيرون صفين صف يقول هلال وصف يقول نصر…

أنا: عاد أنتم يالهلاليات ماحبيتوا الهلال الا علشان نواف التمياط يعني وش يفهمكم في الكورة..وأنتم يالنصراويات وش تحبون على يزيد ..وش لكم في الكورة…

الهلاليات: أنتي بس انثبري أولا عندك نواف وسامي والتيماوي ….وواحدة مبرطمة تصارخ لاتنسون عمر الغامدي… ثانيا الهلال فن فن يا ماما العام جاب رباعية بس غيرنا وش جابوا اللهم عسل

النصراويات : عندنا الهريفي وعندنا ابراهيم العيسى وماجد والخوجلي يا زين جسمه لا فصخ الفنيلة يدوخ ..وتجي واحدة مسفلحة جونيور لاتنسونه ..ويصارخون عليها برازيلي جونيور برازيلي ..وترد عليهم اوكيه برازيلي بس مو جبناه خلاص يزبن .

أنا: أولا المفروض تشجعون الكروة علشان الكورة قصدي علشان اللعب مو اشكال اللاعبين ثانيا ثانيا ..اذا على الملح والقبلة خالد مسعد و أحمد جميل ئمامير.

حجازية: أي والله اشبوه الاتي .اهو كاتم على نفسهم بس بيقولوا فريق تلفيقة يعني علشان 12 لاعب شارينهم من نوادي ثانية طيب اش فيها ..هم ما بيشتروا ليه ماعندهم فلوس.وقال ايش بيفهوا في الكورة

وتوني في هالمعمعة وتجي أمل بعد ما ……. المهم ونمشي بشويش ( علشان أمل ما تصلي ..وثانيا فراغ ساعتين وش بيعجلنا يعني ) ولا نوصل منطقة مصلى …( سؤال بايخ وش جايبنا للمصى وأمل ما تصلي ..بس مرينا من عنده ) المهم ونشوف مجموعة بنات يكسرن الخاطر …لو مالحيا طلعت بوكي وعطيت كل واحدة منهم على خمسمية ….وطول الوقت بنات يمرون من عندهم اللي تسلم من بعيد لبعيد واللي تعطي واحدة منهم شي وتقول اشتهيته لك واللي تعطي واحدة ساندويشة وعصير وتقول شريت وشبعت خذيها لك ..سئلت أمل وش القصة .

أمل: هذي منطقة المغلوبات على أمرهن ..تعرف في جامعة الهنا ياليتني كنت أنا … ولو هالكلام من أول يعطون الولد معونة اذا بيتزوج بس البنات في الطقاق وجع وش علينا منهم … المهم ذولي بنات يا مطلقات وبعضهم عندهم عيال والبعض متزوجات بس حالتهم الاقتصادية مو ذيك الدرجة …والسبب أنهم حملوا وولدوا وطبعا طالبة وباللعنة مالها أجازات ولا أعذار ومكافئاتهم قطعوها لأنهم عدوا المدة الرسمية ..حتى المطلقات ما يكسرون خواطرهم ..يعدونهم مثل الفلسطينيات والبوسنيات لو معونة خاصة لا أبدا ..والمسكينات معظمهم ما يقدر يكمل دراسة بس يبون يشتغلون أي شي مو يقعدون عويطليات ..بعضهم ياحياتي تشتغل قهوجية في الليل علشان تصرف على عيالها لأن أهلها مو قادرين يصرفون عليها وعلى عيالها عقب الطلاق وبعضهم ما ينامون الليل بعد الطلاق عيالها عند زوجها اللي تزوج غيرها ….وهكذا

أنا: اووه بس ذولي يعني قليلات المطلقات اللي عندكم مو ذاك العدد ..

أمل: ااااغغغغيي يااحلييلها صغيرة وش قليلات بس نصهم تركوا الجامعة وش خذوا شقا ولا في مكافئات ولقوا لأنفسهم شغلات اللي اندست في مشغل واللي تطبخ للناس وبعضهم الله يستر علينا وعليهم ..

أنا: وشلون الله يستر علينا وعليهم؟؟ فهميني هالنقطة.

أمل: يعني شي أهون من شي ..بنات الله يستر علينا وعليهم يجون للجامعة علشان ينحاشون من أهلهم ..وبعدين يطلعون بعد ساعة ..اللي مواعدة خويها واللي بصريح العبارة مواعدة زبون.

أنا: زبون وش زبونة الاخت تتاجر في العقار …من جدك عندنا مثل هالشغلات …شكلك تبالغين.

أمل: أنت اللي شكلك درديخ ..عادي واحدة زوجوها وهي صغيرة وضاعت دراستها ومستقبلها تلخبط وأهلها فوق ذا كله يصكون عليها الطلعة بطلعة الروح …وفي شباب يحبون السياحة الداخلية منها تفيد وتستفيد ..فهمت ولا اعيد .

أنا : بس بس قرفتيني الله ياخذك …طيب ليه ماتسوون لهم زي الجمعية في الجامعة طبق خيري موب أحسن .

أمل: صاحي انت كان تقوم الجامعة كلها اللي يسمعك يقول جمعية عوانس مدغشقر ..ولا أطفال جيبوتي ..ولا معاقين فنزويلا ..كان ثاني يوم يجي خطاب من مدير الجامعة يسكرون فيها جامعة البنات كل ابوها ولا يهمهم وسع صدرك .

المهم ومشينا ومشينا ..وقالت لي امل أنها بتروح لوكيلة كليتها علشان تحذف مادة هي ماخذتها من قبل أيام ما كانت في كلية ثانية…ووصلنا مكتبها ..ياحليل قسم النساء زينا قسم الرجال في سكرتيرة ومديرة مكتب السكرتيرة وسكرتيرة مديرة مكتب السكرتيرة لازم تمر عليهم قبل ما تقابل الوكيلة …وأدخل أنا و أمل للمكتب ..الا وش مكتبها 5000 الآف درع هذي وهي حرمة خمت هالدروع لو انها رجالة قصدي رجال وش بتكون دروعها ..وستين تليفون وكمبيوترين ..والله من الخرط واحد مقفل والثاني فيه سطح المكتب ..المهم وتنزل نظارتها على خشمها وتقول لنا خير وش تبون يا بنات تراكم صايرات عليلات كل شوي جايتني واحدة مشتكية واحدة اختباراتها توافق ايام دورتها مدري ناجل الاختبار لين تطهر والثانية عندها رضاعة وتبي تغيب وواحدة شكل الدكتورة ما يعجبها ولا هي تقدر تهضمها والثانية تبي تجي الجامعة بننطلون لأنها من صغرها ما تعودت تلبس تنوره من يومها صغيرة ..واذا قلت لها لا ..شوي وتتفل في وجهي تقول احنا خلاص في الجامعة صرنا كبار ..وواحدة تقول نوعوا في الالوان كل شهر ..واذا سالتها ليه قالت لي توها جايه من باريس وشارية الوان واشكال وتبي تلبسهم في الجامعة …بالله بنات آخر زمان.

أنا : ( وعلى فكرة يا شيني اذا تلقفت ) يعني يا دكتورة اللي تسونه فينا حلال ولا حرام وش اللي ما تفتحون الباب الا الساعة 11 واللي ماعندها في اليوم الا محاضرة وش تسوي ..والبنات اللي بالي بالك يطلعون من برا برا ..ثانيا يا دكتورة قولوا البسوا تنانير نلبس بس تحددون اللون ..شوي وتحددون الوسع وبكرة بتحطون مقاس محدد للأوراك علشان بعض المقاسات تشكل أغراء ..ثانيا وش حتى بناتكم يسوون اللي يبون ..وكل واحدة تجي للجامعة بشغالتها وش معنى رجاءا فهميني …يعني ما ودكم تعلقون لوحة ممنوع دخول المغاتير .

الوكيلة : أجل وش فيها وبنات اللي احنا خابرين .. وش اسمك يا طالبة وكم رقمك الجامعي بسرعة ..

أنا : هاه وشو وشو لازم ..يا شيخة عديها الله يسلمك تراني حسبة بنتك الله يسلمك. تراني خبلة تجيني خمات أصلا ما يعرف لي الا أبوي اذا جتني مثل هالحالة بكف على جبهتي

الوكيلة: شاطرة مرة ثانية اعقلي وبلا كثرة حكي ..المهم خير وش عندكم وش جايبكم مزعجيني .

أمل : طال عمرك حولت مؤخرا من كلية العلوم الى كلية العلوم الأدارية وفي كذا مادة من متطلبات الجامعة خلصتهم أيام كنت في العلوم ياليت تحذفونها لي من العلوم الأدارية .

الوكيلة : روحي راجعي المرشدة الطلابية وهي تحل مشكلتك؟

أمل: الله يسلمك عندها أجازة وضع ولا في أحد يسد محلها والتسجيل ماحسبوا لي ذيك المواد…

الوكيلة: هذي مشكلتك عاد أصلا من قال لك تنقلين من كلية لكلية ليه ما قعدتي في كليتك وخلاص ..

أمل : ما عجبتني ولا لقيت نفسي فيها أبي كلية ألقى نفسي فيها …وبصراحة كلية العلوم كلها للأولاد معظم المحاضرات في الدوائر التلفزيونية و مختبراتنا يالبنات ..تقولين مطابخ زيود يا أدوات متكسرة يا مافي صيانة أجل أحد المختبرات يسرب غاز…وفوق ذا كله تخرجت وش باصير يا مدرسة يا مدرسة أو مرة مرة مدرسة .

الوكيلة : ما درينا عنك يا مدري وش اسمك الله لا يهينك خلي الوالد يوديك لأمريكا تدرسين علم الفضاء واشتغلي في ناسا …موب أحسن لك.

أنا: غربلتس الله هذا وأنتي وكيلة الطالبات ..ولا أنتي من جماعة تمام طال عمرك ..أولا وش لنا يالبنات 3 كليات نلف وندور ونرجع وهي هي يا أداب وتربية نفس الشي كلهم يطلعون مدرسات ..يا علوم أدارية ..يا طب ويالله يالله حاسب وصيدلة ومتحسفين عليها بعد ….اتركي الكليات ..العيال عندهم ملاعب ومسابح ومسرح ..نبي مثلهم يا شيخة من صلاة الظهر واحنا وجوهنا في هالجدران ..من الزهق نبي مسبح نطافش فيه ..ما تقدرون خلوا لنا وقت خاص فينا من مسبح العيال …اتركي هذا وهذا نبي ساحات نظيفة زي جامعة الدرعية ..اللي كل شوي جايبينها في برنامج سعودي ولا قبل الأخبار ..موبيوت اشباح أجل حديقة طول بعرض مافيها شي أخضر يا شجر ميت ..يا زبايل وين تحضرون أرواح ولا ناوين تربون ثعابين وعقارب ..ترى هالأيام كل يومين بنت مغمى عليها يا تشوف ضب يا ثعبان يا ضاطور ….ودورات المياة وووععععع متى اخر مرة نظفت اللي تدخل تفطس ..بتقولين وش نسوي طيب صفي هذي على جنب المكافئات غربلك الله المفروض تزيدوننا احنا البنات مصاريفنا واجد ..خذي عندك .الواحدة لازم تقردن أخوها ب 300 ريال في الشهر علشان يجيبها ولا بتنلطع في الأوتوبيسات اللي توصل الساعة 6 المغرب ..و200 ريال في الشهر علشان الأكل من مطاعم الجامعة الله يكرم النعمة بالأسم بس أكل ولا حتى الفيران اللي في الجامعة طلعت بسبب هالأكل وكثر خيسته..وين وصلنا ..ايه 300 ريال ملابس وملابس داخلية …عندكم شمس تقهل الواحدة قهل ..ومن زين الطبايع مكان مظلل للجلوس مافيه الواحدة اذا جلست على أي كرسي ولا رصيف شوي تقوم كأنها ..احم احم ..200 ريال جزم وصنادل ..بين القاعة والقاعة سفر ولا في وقت ..البنات قلبوا نوال المتوكل وحسيبة بلمرقة ..أنا ما يكسر خاطري الا الدبيبات على ما تركض اذا جاز لنا نسميه مجاز ركض ..يعني المسكينة تهزهز في روحها على بالها ركض ..الا الجزمة تحت مستشهدة …..ثانيا مو صاجينا بالتلفزيون الزواج عصمة وستر للبنت والعلم نورن خلاص المتزوجات خلوا لهم جدول ما تجي الساعة 12 الا ولهم أوتبيسات خاصة فيهم ..وتوصون السواويق يدعسون ..غربلكم الله نص الطالبات اللي يتزوجون ما يتمون شهرين الا وراجعة لبيت أهلها ..أجل واحدة متزوجة معطينها جدول من الساعة 9- 5 وين ..كملوا خيركم وافرشوا لها ولزوجها غرفة عند البوابة ..و أخير أطالب برسالة خاصة فينا للجامعة والله ما يصير يحرق الأعصاب ..اللي يمسك رسالة الجامعة ولد وعلشان تنشر لك مقالة يالبنت لازم تتليوقين له وتمدحين فيه ساعة .وبعضهم يرد عليك في نقاط وده يناقشها معك قبل النشر ويرز لك رقم جواله خير .. مسكين غرضه شريف ..والبلا اللي تنشر لهم المقالات هم هم نفسهم .طالبة التربية وطالبة الأداب ..وذيك اللي في العلوم الطبية …

الوكيلة : خلصتي يا شاطرة ولا بعد تراك تونسين أذا عندك شي قوليه .

أنا : لا توني بقت مشكلة السكن ..المفروض الله يسلمتس من عقب صلاة المغرب في أوتوبيس رحلات يمشيهم ويوديهم لو مطعم بيتزا ولا همبرجر .مو محبوسات وكل شي ممنوع عنهم .. ليه ماني فاهمة ..طيب تخافون عليهم حطوا لهم انترنت ولا قنوات فضائية ..يا شيخة اذا توليتم فارحموا والله بنات السكن شوي ويستخفن لا اهل ولا سعة صدر وكل هذا سمعتهم ماشاءالله ماليه الدنيا ,,اللي يقول مانعين دخول الموز للسكن الا مقطع ..واللي يقول سعر الخيارة وصل 50 ريال ..ويين احنا كله منكم الواحدة صارت تستحي تقول أنا ساكنة في السكن ..

الوكيلة: هنا عاد وبس يكفي هذي سياسة عليا ما أسمح لك تحكين فيها.

أنا: وهذي حجتكم في الدرعية سياسة عليا هنا سياسة عليا …المهم بتخلصين موضوع صديقتي ولا لا الحكي معتس ضايع .

وطلعنا من مكتبها ولأن أمل كريمة هي ماعندها شي فخيرتني يا نطلع يا نجلس نشوف شوية عجايب في هالجامعة ..أخترت نمر كلية اللغات قسم الأنجليزي ..ودي أشوف كم واحدة هناك ..عزيزة علي ..وتوني أدخل الكلية وأشوف وفاء ( المنافقة ما غيرها ) تلاحق الدكتورة نادية اللي وصلت سمعتها في النذالة للمريخ ..يا حليل ذاك القسم فيه طالبة عمرها 30 لها 10 سنين في الجامعة 6 منهم بس في مواد نادية ….وأدخل وراها للقاعة ..يا أنا يا هي وتوني داخل ألا وش اشوف وفاء بنت الكلب تمسح السبورة ( على فكرة تراها الصبورة بس اسوي فيها حركات ) المهم وتخلص وتبدا الدكتورة نادية بمحاضرتها ..هي محاضرتها المفروض عن اللغة الأنجليزية بس صارت ترطن عن الطالبات وأهمالهم وانهم ما صاروا يهتمون بالدراسة والعلاقات الأجتماعية أكثر من الدراسة ..وأنا عاد قلت بأخربها وباسوي زي وفاء باجرب نفسي في النفاق علّ وعسى

أنا: والله أنك صادقة يا دكتورة البنات صاروا يهمهم التعرف على واسطات وبالتالي يضمنون أماكن ومناصب ولا يبذلون جهد في التعليم وهذا خطأ ..المفروض الواحدة تخلي بالها من دراستها وتركز علشان تحصل أكبر قدر من العلم ويكون علمها هو سلاحها

وفاء: أنا اختلف مع زميلتي المحترمة وأعتقد أنها مخطئة.

أنا: غريبة ما تتفقيين معي يعني أنتي ضد الدكتورة هاااه صح صح

وفاء: لا أنا اختلف معك أنتي بس ولكني متفقة مع الدكتورة مية بالمية ….

أنا: غربلتس الله وشلون احنا كلامنا واحد وشلون تجين يعني اذا ضدي فانتي ضدها والعكس صحيح .

وفاء: أنا اختلف معك أنتي لأن العلاقات الاجتماعية اصبحت مهمة في هالوقت من الحياة ..بس اتفق مع الدكتورة لأنها تحكي من تجربة وواقع عايشته ..يعني ممكن الواحدة عندها علاقات اجتماعية ومضبطة وضعها بس تتخرج تلقى واحدة عندها نفس العلاقات الأجتماعية ساعتها وش الفيصل أكيد العلم وهنا أتفق مع الدكتورة اللتي لا أشك لو لدقيقة انها كانت تقصد هالكلام صح يا دكتورة .

أنا: يلعن ابوتس ماجستير في النفاق وش ماجستيرة الا دكتوراه ….

المهم وتستمر المحاضرة ..وتنتهي على الساعة 2 وعلى بال ما وصلنا الأوتوبيس الا الساعة 2 ونص .. ماشاء الله سواقين الأوتوبيسات ماكنهم يسوقون ببشر الا بهايم ..واحد يصارخ علينا والثاني يتحرك والبنات مابعد ركبوا كلهم والثالث يسوق وهو يرطن بجواله ولا هندي كل شوي ماسك فرامل بكل قوته …على اني ما كلت الا كروسان وعصير برتقال الا أني استفرغت 10 مرات في الأوتوبيسات قبل ما نوصل لعند بيت أمل …..ويوم وصلنا قلت لأمل من جدك تحبين الجامعة على هالحال

أمل: قلت لك البنات اذا حطوا في بالهم أنها للتعليم والدراسة ما راح يستفيدون ولا راح يحبونها ..أنا حاطة في بالي أنها مكان للترفيه ولا أكثر من كذا أنا مابي أتخرج لأنه على خبرك الوظايف اللي على قفا من يشيل غير أني ما أطيق التدريس ..ولا ابي اقعد في البيت حق الزهق وتربية الكروش ..وكل واحد يمر من عندي يقول متى اشوفك في بيت رجلك كأنهم مالين مني….

أنا: بس ما تعتقدين لو أن الجامعة كانت عدلة بتكون أحسن ..مو هالفوضى والخرابيط.

أمل: يا عزيزي الجامعة انعكاس لصور بيوتنا من الداخل ..وانعكاس لمجتمعنا وسياستنا واقتصادنا وكل شي في حياتنا ..صحيح أنهم يحسبون أن جامعة البنات بقر يدرسون لا يهشون ولا ينشون ..بس هذا لأنهم مسكرين عيونهم ولا يبون يشوفون الحقيقة…,,,ثانيا شكلك أعجبتك الوقفة شوي وتعزمني تقول اركبي معي في السيارة ..يالله اشوفك على الماسنجر في الليل.باخذ دش واتغدى يالله تشاو.

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة