قصة عشق النجوم

قصة عشق النجوم كاملة مكتوبة

من يوم انولدت وجيت على هالدنيا الحلوة وأنا كنت أمثل بداية جيل جديد ..أمي طبقت علي نظرية البامبرز ( وفرحان بعمري اني كنت البس بامبرز ) وقامت تأكلني سيريلاك ..اصلي ( يعني أنا وخشتي كان في سيريلاك تقليد ..الصدق كانوا يجيبون خبز يابس ويطحنونه ويخلطونه مع حليب ) المهم توالت النشأة ذات الطابع الخاص المرفة ..كبرت وطرت بالعجة مع توم وجيري وأدمان أفلام الكارتون ..كبرت شوي وصار عمري سبع سنين وطحت في مايكل جاكسون في وقت كان أبناء جيلي يردحون على بشير شنان وعيسى الاحسائي ..ومن زود حبي لمايكل جاكسون أذكر أني شريت جاكيت زي جاكيته اللي فيه ثلاثمية جيب واربعمية سحاب ..وما كنت أفصخه ابد حتى في عز الحر ….وعلى سن 12 في وقت كل عيال المتوسطة يرسمون على طاولاتهم صور وانيتات وكريسيديا كان كل حلمي كاديلاك اس تي اس ( ايه هين كثر منها كنت أحلم بكابريس اعرف بتقولون تافه بس كنت ابي شي من مصنع جنرال موتورز ) ووصلت للثانوي وبديت في سلسلة الأفلام الأمريكية وخصوصا الثنائي المرح رامبو وستيفين سيجال اللي من يبدا الفيلم الى أن ينتهي وهم تصفيق في العالم ومع هذا كله ما تنهز لهم شعرة ..وعلى نهاية الثانوي أيام حرب الخليج اشتريت لي طقم رياضة كأنه البدل العسكرية الأمريكية وكاب وما غير دوران في الأسواق وما أحكي الا أنجليزي من زين اللغة حتى مرة من المراير في سوق الشعلة كانوا الهيئة محجرين لجندي أمريكي لابس تبولة ( تبولة مو اللي تنوكل تبوله هنا بمعنى حلق أذن ) في أذنه وجاي على بالي فزعة ..صاير مسجل اتعتع مرة كلمتين أنجليزي من شلة يس ونو ومرة أقول للهيئة حرية شخصية يا شباب هذا جزاهم جايين يحمونكم من صدام …و آخرتها الهيئة تجلدني ..والجندي الأمريكي بعد هو ما يقصر ويجلدني ..ما يدري أنا وش ابي …كبرت وكبرت العقدة معي ..كل همي أني أبتعث واكمل دراستي العليا في أمريكا ..يعني مو كله حبا ورغبة في العلم بقدر ما فيها رغبة بالسفر للسفر ..وبالفعل بالواسطات و فلان وعلاّن يالله يالله طسسوني برا ومن زيد الحظ ودوني نيو يورك ..طبعا هم ما عليهم يعطونك ألف دولار ما يدرون أن اللي يكنس شوارع في نيو يورك ياخذ فوق ألفين وأن ألف يالله تكفيك حق موية وأكل فما بالك بأيجار ونقل وخرابيط بس الواحد بتوفيق الله ثم دعم أهله قدرت أدبر لي سكن حليو المهم وصلت هناك 15 أغسطس وهذا وقت الصيف بس أنا بكرت هناك علشان أعرف اضبط أموري سكني كان في منطقة لك عليها يعني تروع بعد الساعة عشر المشكلة مو هنا المشكلة في جارتي واحدة عمرها 27 سنة .. عارفكم بتقولون هذا أنتم يالسعوديين من تروحون برا تذبون وجيهكم على البنات ..لا والله بس هذي الجارة عندها كلب وأنا ما أخاف من شي كثر الكلاب وهالجارة لها سبعطعش بوي فريند وكل ما قلط واحد عندها من البوي فريند نزلت كلبها عند مدخل العمارة علشان ما يخرب عليهم الجو وأنا اللي أبلش ما عاد أقدر اقرب من العمارة ..وأذكر ليلة جمعة طالع على بالي ليلة الأربعا ومدري وش أكلت برى و وجعني بطني وحالتي حالة ويالله يالله رجعت للعمارة الا الجارة طيبة الذكر حاطة كلبها عند مدخل العمارة زي العادة لا ومن زين الطبايع خويها بعد حاط كلبته مع كلب جارتنا وابن أمك تقرب من المدخل وبطني شاب علي وحالتي صعبة ومن الساعة 11 ونص الى الساعة واحدة وأنا ماسك روحي و اتحقرص آخرتها دقيت جرسهم كود أحد يكلمني ويردون علي وهم يصارخون وأنا حالتي حالة وآخرتها سكروا في وجهي وطبعا في مثل هالزنقات ومثل ما علمونا عيال الجيران في الدخل المحدود مالك الا براميل الزبالة تستر عليك تكرفست في أحد براميل الزبالة وريحت نفسي بس شوي الا القطاوة كلها هاجة مدري من ايش صراحة هذا عن البيت .. أما عن الأكل فيمدحون شي اسمه الريجيم ..وعلى قولة صباح على البساطة على البساطة ياعيني على البساطة ….وبدت الدراسة وبدى التمصلح من أجل المواصلات يا أروح مع هذا ولا هذا ولا ذاك واحيانا في أحد الباصات وأحيانا أخرى ارفع بنطلوناتي واطلع سيقاني ويرزقني الله بكم جاي يودوني للمكان اللي ابغاه ومن ثم بدى الجد والاجتهاد ..الواحد متوكل على الله والحمدلله كل شي كان تمام نشكر الله و كان معي في نفس القسم اللي جيت أدرس فيه فوق 30 واحد وواحدة أمريكان وأوربيين وباكستانين وهنود .وكم خليجي ..طبعا الواحد أول السنة يترزز ويحاول يجلس جنب البنات في شعبته ليس لشيء الا لهدف نبيل بس الله ما عطاني حظ .. لا من شلة البني و لا من الخليجين المطخطخين ما تعرفت الا على واحد اسباني اسمه خوليو يدرس على حسابه وساكن عند ولد عمه طباخ بأحد المطابخ في نيو يورك بس ان جينا للحق خوليو سنافي ولا كأنه واحد من عيال ظهرة البديعة …بدى شهر سبتمبر وبدت الدراسة الواحد يدربي رأسه كل شي صعب وغثا وما عندك فلوس تعيش زين علشان تصير عندك فرصة أنك تدلع عمرك بس الحمدلله على كل حال تعرفت على شلة سعوديين من خلال مسجد الجمعة ..الحق ينقال أنهم سنافيين بالذات المتزوجين واحد معنا اسمه أبو وليد كل جمعة تصلح زوجته لنا كبسة وجريش وقرصان ولا كأنك في الرياض مو ناقص الا يجيبون لبن المراعي …وكذا واحد ثاني يجيبون حلويات ومأكولات ثانية ..المهم صرت أنا أكل يوم الجمعة أكل أسبوع كامل علشان أسد النقص الغذائي اللي عندي ونجلس سوى سواليف وسعة صدر ..لدرجة أن الواحد وده كل أيام الأسبوع تصير أيام جمعة …

وفي يوم الأحد 9 سبتمبر وبينما كنت في الجامعة جاي يوم الأجازة علشان أشيك ايميلي من مكتبة الجامعة جالس مع خوليو نسولف و افضفض له عن مكنون نفسي وهو يستمع لي بكل أنصات ..(ملاحظة كل الحكي بتتم ترجمته فوريا اختصار للوقت )

أنا : يا خوليو الواحد تعب أي والله ما عندي الا ست قنوات بايخات أي بي سي وسي بي اس وشلتهم وباقي القنوات مشفرة ودك تشوف قنوات الأفلام بس كل شي بفلوس وأنا بصراحة ما عندي ..

خوليو : علينا يالنمس أجل تبي تشوف قنوات الأفلام الحق الصاروخ ..قل الصدق تبي تشوف أفلام ولا أفلام اللي بالي بالك ..قل الصدق .. آدم وآيف ( قنوات آدم وحواء )

أنا : لا يا خوليو وين احنا .. بس اذا تبي الصدق يا خوليو حالتي صعبة اذا حطيت على آدم وآيف الثانية وسمعت هالصراخ نفسيتي تتعب ..وأحس ركبي قامت تخلخل ولا هي قادرة تشيلني ..تعبت والله يا خوليو

خوليو : افا عليك يا رجال والله ما أكون خوليو ولد ابن أم خوليو شف يالحبيب باجيب لك ديسك كمبيوتر تحطه في الكمبيوتر وتوصل توصيلة الكايبل بالكمبيوتر وما عليك يفك لك شفرات قنوات آدم وايف كلها هاه وش قلت ..

وبالفعل جا يوم الاثنين 10 سبتمبر وقضبني خوليو الديسك وحضرت أول المحاضرات وجاني طفش وفركت من الجامعة علشان أشغل الديسك ووصلت الشقة الساعة 2 الظهر وجلست اشبك الكيبل بالكمبيوتر و 8 ساعات من الفرفرة بهالديسك و خرابيط الكمبيوتر لين أصابني اليأس وقررت أطلع الديسك ومدري وش ضغطت عليه الا والصورة تطلع عندي أوضح من القزازة على الكمبيوتر وما دريت الا عيوني مبزرة بهالشاشة ..يلعن أبو أبليسهم يا عليهم بنات يهبلون في هالقنوات ..وكل بنت عندها اكسسوارات ومؤهلات غير طبيعية ..وأنواع العرق والمناديل و الأنوار مسكرة وأنواع الانسجام …وكل ما خلص فيلم وقلت بروح اتروش ثم ارقد الا يسنترون فيلم ثاني وعلى ذا الحال ..قضت علبة المناديل وقضت العلبة الثانية وأنواع التسدح و الحالة صارت دمار لين نمت زي ما أنا بدون ملابس وقدام الكمبيوتر تقريبا الساعة 4 الفجر …الى أن صار اللي ما كان على الحسبان

يوم الثلاثاء 11 سبتمبر الساعة 4 عصرا ما وعيت الا على صوت ناس يكسرون باب شقتي ويقتحمونها ..وأنواع الفضايح عاد من سمعني شقتي وشقتي كلها غرفة نوم وحمام ومطبخ وصالة ..موب هنا المشكلة ..المشكلة اللي اقتحموا علي شقتي ماهم حرامية ولا هم عرابجة المشكلة انهم عسكريين من الا ف بي أي ولما صحيت من غلقة النوم حسبتهم فيلم جديد في قناة آدم و آيف .وعلى طول مسكت علبة المناديل ( منتهى التبلد ) …وما دريت الا رشاش محطوط عند راسي طبعا واحد منتهي مثل حالتي أول ما شفت الرشاش قمت أبوس فيه مدري وش كنت أحسبه وما دريت الا كاس موية مكبوب فوق وجهي وبديت اصحى ومن وعيت لنفسي ما علي شي زلط ملط وقدامي عشرين رجال الا انحست طمرت لحجرتي ابي البس والا يطب فوق عشرة يحسبوني أبي انحاش وانا اللي اصارخ ايام جونا تو وير ما كلوذيس ( فكوني بالبس شي يسترني ) ويالله يالله سمحوا لي أدخل البس بشرط يجي واحد منهم معي وطلعت والا يلقطوني ويركبوني جمس أسود مظلل ..الله يحلل صالون الهيئة عنده ..وأنا طول الوقت اسئلهم يا شباب وش السالفة وش القصة وهم ما يردون علي الا ( فك يو , جت فك , شرب فكر ) مع اني قسما بالله ما عمري شربت وبعد نص ساعة وصلنا مركز يشبه مركز اف بي أي في نيو يورك ويدخلوني ويرموني في السجن حق المركز وأشوف بعيوني الا كل شباب المسجد موجودين ..ابو وليد ..وبقية الشباب حتى فهد ولد الطخاطيخ ..( أبوه رجل أعمال ) طبعا أنا في الأول ما كنت فاهم وش السالفة بس بعدين فهمت ..

أنا : هلا والله بالشباب وش أخباركم ..متجمعين على الخير انشاءالله …..والله عيب فشلتونا وتشرهون على الناس اذا قاموا يذمون فينا واحنا نتمشى في ديارهم ..والله عيب … وأنت يا بو وليد رجال بطول وعرض ومتزوج وتطلع منك هالحركات ..وش خليت للشباب العزابية اللي مثلنا .. لا يكون بس تشوفها أنت وأم وليد ..بس ما هقيت خصوصا فيلم الساعة 11 لعن أبو البطل مع ثلاث بنات وسادحهم في غرفة النوم …اوف وفهد باشا بعد ياخي أنت ماشاءالله عليك ما عليك قاصر شقة في افخم منطقة في نيو يورك وسيارة بورش على الأقل اشترك رسمي ..ولا سعودي عايش على الله ثم على الكروت ..بيني وبينك لو عندي نص فلوسك ما اعتمد على المشاهدة أجيب بث مباشر في شقتي

أبو وليد : عبدالعزيز وش فيك أنت سكران وش جالس تخربط ….

أنا : الله يا بو وليد يحق لك لك سنة وشوي هنيا ومتعود أما أنا الله يخلف علي آخر خبري بهالشغلات يوم كنت في ثالث متوسط لا والصورة مو واضحة تسجيل هنود بعيد عنك …بس كله كوم وفيلم اللي عشر بنات في جزيرة وكل شوي يلقون رجال قديم كان أبداع ياخي مدري من وين يجيبونهم …

أبو وليد : عبدالعزيز أنت تعرف ليه هم جايبنك هنا وليه جايبينا بعد ولا لا قل لي الصدق ..

أنا : يا شيخ اذا بليتم فاستتروا وفرحان بنفسك تدري ليه احنا هنا ؟؟ من بلاويكم وفضايحكم يالسعوديين فشلتونا قدام أهلنا في البحرين ودبي حتى مصر وبيروت صارت تشتكي ..و وصلتوا لأمريكا ..

فهد : يابو وليد شكله شارب شي ,,عبدالعزيز أنت شفت التلفزيون ولا لا

أنا : يا ثقة طبعا شفته لين ما انهريت وانكسر ظهري ولا لو ما شفت تلفزيون وش جابني هنا بس اللي قاهرني أنتم شكلكم ولا همكم مدري متعودين ولا ايش ..انا أحس ركبي ما يقدرون يشيلوني وأنتم ما شاءالله كل واحد بنشاطه

ابو وليد : متأكد أنك شايف التليفزيون ولا لا عبدالعزيز شكلك مانت صاحي ..

أنا : والله العظيم شايفة حتى تبيني اقص لك وش صار بالضبط ما عندي مانع بس أنت اختار أي فيلم وأنا أقص لك كل مشهد فيه بالضبط ..

فهد : وش أفلامه وش تخربط أنت شفت عمارتين حقت مركز التجارة العالمية اللي صدمت فيهم طيارتين وهدموهم والبنتاجون اللي اعتدوا عليه هذا اللي نقصده شكلك من الدباشة حسبتهم أفلام ..

أنا : وشو تفجيره وعمارتين طاحوا والبنتاجون ..يعني أنتم قصدكم عمليات أرهابية هنا في أمريكا ..

أبو وليد : أجل يالخبل وش تحسبنا نعني أنت ووجهك ووش الثلاث بنات اللي لو شافتهم أم وليد …بيضيق صدرها

أنا : هاه لا الله يسلمك اللي كانوا يصيحون على الضحايا ..تعرف حريم ناقص عقلهم ..بس الحين تفجير في أمريكا احنا وش دخلنا ما خلوا سعودي الا حشروه هنا وش السالفة …يعني احنا جايبينا شهود ولا ايش ..

أبو وليد : لا طال عمرك احنا أول المشتبه بهم فكل سعودي يدرس في أمريكا وخصوصا اللي يدرسون طيران ولا لهم علاقة بأحد يدرس طيران جابوه مع أذنيه …

أنا : طيب التفجير متى صار بالضبط …وكيف صار يعني ترى الواحد ما هو فاهم وش اللي حوله ثانيا متى بيحققون معنا وثالثا وين سفارتنا ورى ما تدخلت جعلهم الصلاح

أبو وليد : سفارتنا طال عمرك عندها اللي ألزم منك هم أول شي يتأكدون ذوليك ما جاهم شي بعدين اذا فضوا ساعتها يسألون عن أشكالنا … شف عاد كم واحد في هالديرة يهمهم ويلزمهم …

وجلسنا في السجن هناك كم يوم لا أحد درى عننا ولا جاب لنا خبر الا الحق ينقال بعض أصدقائنا الأجانب في الجامعة كانوا يسألون عننا ويجيبون لنا أكل وبالذات خوليو ما قصر معي كل يوم يجيب لي اللي يقدر عليه من مطعم قريبه صح أنه مرات يخربها ويجيب معه بنت خالة أمه تقول أنها تبي تتصور مع أرهابي ( اللي هو أنا طبعا ) المهم أزين مافي السجن مع شباب سعوديين أنهم مصرقعين كل يوم بلوت و سواليف وتحليل للأمور بنظرة أكثر واقعية طبعا ما ينشره علينا شلة ناس فاضيين …وفي ليلة جالسين الشباب بلوت وبنت سبيت ودار هالنقاش …

أنا: يا شباب من تعتقدون سوى هالعملية وفجر المبنيين .أنا من وجهة نظر أنه آل جور يقولون أنه عصب يوم انهزم في الانتخابات وراح للقاضي وقال له فكنا من عيال بوش الكبير ماسك فلوريدا وغصب يفوز أخوانه ..مير القاضي منخول مع جورج الظاهر أنهم واعدينه بشي …

أبو وليد : ما عليك أنا اقول هذي اسرائيل تبي توهق العرب مع أمريكا .وتلزقها فينا ..يوم شافت أن أمريكا بتجي مع العرب ضدهم …خافوا على مصالحهم اللي عندنا

سيف الدين : والله اعتقد أنها من علامات النصر فهاهي دولة الكفر بدت تسقط وتهوي انشالله من انتصار لانتصار

أنا : اسكت لا يكون يتجسسون علينا الله يغربلك يا شيخ …ياخوي تبي شي أنت وش تخربط الله يخلي لنا أمريكا ..أنت كفو تعيش بدون أمريكا سيارات وصنعوا لك ..همبرقر من عقب المراصيع ..كمبيوترات …حتى الحفايظ صنعوا لك من عقب الخرق ..استغفر ربك بس وادع بسلامتهم ..

مروان ( واحد من جدة بس رايق ) : والله يا شباب على ما اعتقد هذا واحد مسطل مشغل جواله وجالس يرسل مسيجات وقام كمبيوتر الطيارة خبط ..ولا اقول لكم صعيدي عطس غير اتجاه الطيارة ..ولا أقول لكم الطيارين كانوا يلعبوا مع المضيفات ..

فهد: يا شباب والله أن ما خاب ظني أنه ياباني قعس جالس يلعب بكمبيوتره ويحوم في هالطيارات على كيفه ..ترى هاليابانيين ملاعين خير ما خلوا شي الا اخترعوه ..

أنا: يا شباب ترى خسنا هنا ولا أحد عبرنا سفارتنا ما سئلت عنا ولا ذولي حققوا معنا ولا هم طلعونا وش القصة …

أبو وليد : الا دريتوا يا شباب وش سووا بالوليد بن طلال المسكين جاي يتبرع لهم بخمسطعش مليون دولار وعيوا عليه قالوا ما نبي منك شي أنت شكلك أرهابي يومك تقول أن الفلسطينين مساكين …

أنا : الله يهديه أبو خالد لو هالخمسطعش مليون دولار متبرع بها للطلاب السعوديين في أمريكا مو اصرف والله أن رواتبنا يمضي من الشهر 29 يوم ما تجينا و ربعنا في السفارة لا حس و لا خبر ..ولا لو هو يبني لنا بها مجمعات نسكن فيها مو أحسن من ذلة حريم يحطون كلابتهم في مداخل العمارة …..

مروان : يا شباب اش قصتهم سفارتنا بيرسلوا لنا أحد يسئل عنا ولا العوض على الله

ابو وليد : لا تخاف انشالله أنهم بيرسلون واحد قريب …

وبالفعل ثاني يوم الصباح جا واحد من السفارة جزاهم الله خير ما قصروا بس ما درينا أن أبو الشباب جا يطلع فهد لأن فهد يصير ولد فلان بس الظاهر ما عندهم خبر ان مع فهد فوق 50 سعودي ….المهم في أخر ذاك اليوم جابوا واحد سعودي ضعيف شكله مطقوق طق ولا أكل له يومين طبعا أحنا رحمناه و قدمنا له أكل وجينا نبي نخفف عنه بحكم صاير لنا فوق 6 أيام يعني جا عندنا تبلد حس …الولد طلع اسمه معاذ..

ابو وليد: يا معاذ هونها و تهون تعال بس كل لك لقمة لا تموت من الجوع …

معاذ : الله يسلمكم يا رب صدق الواحد ما يعرفه ويوقف معه الا عيال ديرته ..تصدقون يا شباب من يوم الثلاثاء وهم طايحين فيني طق وتحقيق ولا حتى خلوني أنام ..

أنا :يا بن الحلال عادي كلنا مسنترين هنا من ذاك اليوم المشئوم ..ما هنا جديد البلا تقل أنهم يشمشمون ورى أي سعودي ..عندك أنا مثلا جاي ادرس طب ..والأخ أبو وليد يدرس ادارة أعمال ..ومروان باشا يدرس حاسب ..أجل لو كنا ندرس طيران وش كان سووا فينا ..خذ هالساندويتش مصلحته مرة خال صديقي خوليو …الا أنت وش تدرس..

معاذ : والله أدرس طيران مدني في فلوريدا ..ويوم التفجير كنت مسافر أتمشى في نيو يورك لأن يومها كان عندي أجازة الى الأسبوع الثاني …

أنا : افا تدرس طيران وجاي عندنا ..الله لا يهينك الساندويتش اذا ما عليك أمر تراه محشي لحم خنزير ..وياليت تقضب ذيك القرنة هناك ..تراهم مزكنين ( مزكنين = جمع مزكن ومعناه منبهينننا ) علينا ما نحكي مع بعضنا عاد يشوفونك تحكي معنا وأنت تدرس طيران والي يرحم والدينك لا أعرفك ولا تعرفني …وطول ما أنت معنا باغمض عيني علشان ما أشوفك..والله التوهيقة…

المهم بعد ما كملنا عشر ايام بدوا يحققون معنا وكل واحد ينادونه يحققون معه ما يرجع لنا ما ندري هو طلع ولا سجنوه ولا شنقوه ..بس بيني وبينكم خوفي أنهم يودونهم للحاير مهما كان سجون أمريكا اصرف من الحاير …لين جا دوري واستدعوني للتحقيق … و في غرفة التحقيق كنا أربعة أشخاص ..المحقق ..والمترجم ..وواحد جدار واقف علشان يشوف شغله من طراقات وتكفخ ..و أنا ….واللي صار في ذيك الغرفة باقوله لكم مترجم على طول اختصارا للوقت …

المترجم : المحقق بيسألك شو اسمك الكامل …وكم عمرك وشو تشتغل ( ايش تشتغل سؤال موحد في كل انحاء العالم ) ؟؟

أنا : اسمي عبدالعزيز ………والعمر 23 سنة ..اما ايش اشتغل فأنا المفروض طبيب بس جيت هنا علشان الدراسات العليا قال لك باتخصص أنا ووجهي لو ماخذ تخصصي في الطايف ولا بلجرشي موب أزين لي أنا ووجهي ..

المترجم : المحقق بيسالك وين كنت وقت الحادث الأرهابي ومن الشهود اللي يشهدون أنك كنت هناك ..وايش كنت بتعمل … احكي الصراحة …احنا عارفين انك هيداك اليوم كنت غايب عن الجامعة ..اوعا تكذب

أنا: والله كنت في الشقة ..بروحي ..معكم حق كنت غايب الحقيقة كنت مصيخين شوي فقلت يا ولد غب هاليوم بس وفك عمرك ..

المترجم : شو مصيخين اهما لما وئفوك ..ماكان بك شي وبيئولوا في محضر التوقيف انك كنت عاري .ومابك شي ..

أنا : الله يسلمك مو كنت عاري ترى احنا عرب زي بعض لا تفضح بنا عند الأجانب كنت متفصخ علشان ابي أدهن نفسي بفيكس ثم اتلحف بس الله يهديكم سبقتوني ..

المترجم : المحئئ مصر أنك كنت مابك شي وبيعصب كتير كتير بيئول احسن لك تعترف ليه كنت غايب وايش كنت بتساوي تراهم يمكن ينئلوك لوزارة الدفاع تحئئ معاك لو ما بتحكي ..

أنا : لا عاد وشوله الكلافة خلاص الصدق عاد ما كنت مصخن ولا شي بس يعني كنت غايب لأني مالي نفس أروح للجامعة وكنت اتفرج على فيلم..

المترجم : المحئئ بيئول لك فيلم شو ما كان عندك فيديو ولا جهاز دي في دي بلاير ولا عندك حتى كيبل فيه أي فيلم ….بيني وبينك المحئئ مو مسدئك وشاكك فيك كتير

أنا : والله معاه حق يشك …هو كلامه صحيح بس كنت أتفرج على الفيلم من الشباك عن طريق جاري في العمارة اللي قبالنا ماشالله عليه يا عنده تلفزيون 70 بوصة شي

المترجم : المحئئ بيئول لك تبا لك …أنت بتلعب عليهم ولا ايه فاكرهم ايه …المحئئ نفسه يئوم يضربك …

أنا : يا أخوي و راك مستحي صاير كأنك اللي يترجمون أفلام في السعودية ..وش تبا لك ..الرجال عيني عينك يقول لي ( فك يو ) شف قل له يحترم نفسه بلا كلام قلة أدب ترى احنا في السعودية ولله الحمد متعودين في التحقيق على الاحترام عمرهم ما قالوا لأحد ( فك يو ) ان جاهم واحد مخربها مرة كلها يا ملعون الوالدين وخمسطعش كف لين يعترف بكل شي سواءا مسويه ولا ما يدري وش القصة احنا متعودين على الطق بس كلام وصخ استغفر الله

وتوني ما تميت كلمتي الا الشرطي اللي كان واقف يصكني بطراق طيح طقم ضروسي كله في الأرض ..

أنا : وين وصلنا الله يسلمك أخبره كان يقول لي فك يو …بلغ المحقق الله لا يهينه يس فك مي بس وش بعد نسيت السؤال ياليت يقوله مرة ثانية …

المترجم : شو كنت بتعمل في شئتك وليه كنت مزلط ….

أنا : أعوذ بالله منك يا أبليس شف طال عمرك الأنسان مهما كان معرض للخطأ والواحد له ظروفه القاهرة ..شوفة عينك سعوديين ياليت تزكن على المحقق هالشي يعني لك علينا اذا شفنا واحدة لابسة عباية مخصرة قمنا نركض وراها وشلون عاد يوم جينا هنا بنات كاشفات من فوق وتحت وعزابيه ولا معنا قروش … خبرك بعد لو معنا قروش كان دبرنا عمرنا ..بس الحالة مافيش والشيطان شاطر ..وابليس الله لا يبارك فيه ما يفتؤ يوسوس في أذني فقام أحد أصدقاء السوء وعلمني طريقة أكسر بها تشفير الكيبل عن طريق الكمبيوتر وعينك ما تشوف الا النور أول مشهد اشوفه بنتين سبحان الله الواحدة منهم عندها اكسسوارات مهولة ..

المترجم : وبعدين شو صار المحئئ بدوا يعرف شو صار لما كسرت الشفرة و بديت تتفرج على الفيلم .

أنا : سم الله يحييك ..وشو اللي وش بعد …وش تبيني أقول أنت و أياه ..

المترجم : المحئئ بيسالك لما شفت القنوات اياها شو عملت …

أنا : وش وش سويت ..سويت زي خلق الله عادي …وش فيه طال عمره مصر على أنه يعرف هالشي بالذات ..

المترجم : المحئئ بدوا يعرف كل شي عملتوا بالتفصيل ..ويئول لك اوعا تنسى شي ..

أنا : يابو الشباب رح لحي السويدي يعلمونك وش سويت ..ويعطونك كتالوج بعد.. يا مترجم يا أبو الشباب فهم المحقق طال عمره أن هذا عيب وشق جيب ما وصلت لهالحد

المترجم : المحئئ بيئول لك يا مغفل ئول شو عملت بالضبط .واوعك تخفي شي لو اكتشفوا انك كذاب يا ويلك..

أنا : والله ما يندرى من المغفل شف يا طويل العمر ..أبيك تفهمه كل شي بالتفصيل الممل ..أولا طلعت القناة وفيها البنتين وبعدين ..تجيب علبة كريم وبعدين علبة مناديل وبعدين …. تسترخي مرة وتنسجم و تتخيل أنك وسط المشهد وتسيب نفسك خالص وتآخذ راحتك ولا تستعجل …

المترجم : ياهي أنت شو بتئول يخرب بيتك شو عام بتحكي شو عام بتئول

أنا : وشو ياخي فهم محققك اللي يبي يعرف كل شي بالتفصيل ترانا شباب زقرت ( زقرت = جمع زقرتي يعني كشخه ) وبعدين الله يسلمك ..

المترجم : المحئئ كان بدوا يعرف ازا أنت عملت شي تاني يعني حدك صبية ولا صبي ولا أي شي وانتا بتشوف الفيلم .. هيك ئصدوا وأنت على طول تفكيرك بعيد …

أنا : الله ياخذ عمرك أنت وأياه لو معي صبية وشوله نناظر أفلام ..محدثك موسوعة بس ماحد معطيه فرصة يعبر عن مواهبه ..أما صبي فقل يهبا هو راعي هالأشكال شكله يوم حرب الخليج مجمركينه شباب النسيم ويحسب كل السعوديين زي النسيم ..

والا الشرطي الثاني اللي فوق راسي اللي صبخني بطراق يصبخني بطراق ثاني يكسر خشمي وما تبقى من ضروسي ..وشوي الا عيوني بيطيحون من قوة الكف …بس أموت وأعرف وش عرفه بكلامي خصوصا وأنا أحكي عربي

المترجم :المحئئ زعلان منك كتير والهيئة أنوه راح يحولك الى لجنة تحقيق عسكرية يعرفوا يتصرفوا معك…

أنا : ( وأنا أجمع ضروسي ) لا واللي يرحم والديك تعذر لي منه منه السموحة كل شي الا هو طال عمره فهمه أني بزر وغلطت ببس سؤاله تقدر تقول شوي استثارني وخلاني أعصب وأفقد أعصابي ..بس جزاه الله خير هالشرطي السنافي تقل عنده حاسة سادسة أول ما شاف أعصابي بدت تطلع قدر يرجعها لي بسرعة .. نرجع للسؤال ..فهمه طال عمره أننا متعودين نشوف هالأفلام بروحنا يعني واحنا ما عندنا أحد ..أما مسألة أنا وصديقي نشوف هالأفلام مع بعض مش ممكن ابدا ..

المترجم : المحئئ بيئول لك أنت ما بتعرف أنك هيك بتتعدى على القانون الفيدرالي وتسرق نقل الكيبل بطريقة غير شرعية ..وهيدي جريمة يعاقب عليها القانون ..

أنا : فهم طال عمره احنا شعب مكبوت ديننا ودين هالاحتكار ما عاد صرنا نشوف شي غير الأخبار ياليتهم يشفرونها ونفتك ..كاس عالم ما نشوفه ..بطولات دوري ما نشوفها الحمدلله ..ما ينشره علينا ..بس ياليت تفهمه أنني غصب عني ما عندي فلوس كفاية .وكل ما حطيت على هالقناة أسمع مصارخ ولا أشوف صورة ..وأقسم بالله أنها أول مرة و لا عادني متعودها جعلي أموت أن تعودتها أني بدلي أناظر السي بي اس والأ بي سي والسي ان ان وهم يرجدون فينا ويصرمون ويلعنون أبو خيرنا عادي بس أهم شي ما أخالف القانون الفيدرالي …

المترجم : سؤال أخير …المحئئ بيئول لك شو موئفك من ابن لادن ؟

أنا : والله شف طال عمرك وعمره كنت أحب ابن لادن موت ولا أسمع فيه ..بس مرة طلعنا جدة بالطيارة علشان نأخذ عمره ..ومدري وش صار تلخبطوا هالشياب اللي معنا من وين نحرم ..نحرم من جدة زي أهل جدة ولا من السيل الكبر ( ميقات أهل نجد ) ..ونطلع للطائف و علشان أقرب للوقت ينصون بنا طريق الهدى وهاللفات فوق الجبل من الروعة وحومة الكبد أدوخ وكل ما جيت ارجع وأنتم بكرامة الا ويصكني أحد هالشياب على راسي يرجع … ,انتم بكرامة في بطني وهذي حالتي لين وصلنا الميقات على طول ..ومن ذاك اليوم ما عدت أطيق ابن لادن ..ولا أواطنه بعيشة الله

المترجم : يا أهبل المحئئ بيئصد اسامة بن لادن أنتا بتحكي عن شو …

أنا : اها راعي أفغانستان …لا ولا أطيق اسمع اسمه …شف طال عمرك أنا مواطن شريف نناظر أفلام بالي بالك مو مشكلة ..نروح البحرين نرقص في المراقص مو مشكلة ..ندق على خطوط الصداقة في كندا .طيش شباب ..ما تروح للعمل وتزوغ عادي… تخرط على البنيات أنك أمير عادي يجيب الله مطر بس أحب واحد ربعنا ما يحبونه لا والله ..أنا مفرمت قلبي ومنزل فيه ويندوز حق الحكومة اللي يحبونه أحبه واللي يكرهونه أكره ..هذي ما فيها لعب ولا مزح …

المترجم : شوف المحئئ ئرر يطلئوا سراحك بس هيدا أطلاق سراح مشروط يعني ما تغادر نيو يورك ولا تتزحزح و بتكون تحت المراقبة ومتى ما كانوا عاوزينك لازم تروح عندن اذا عاوزينك في أفادات أو تحئيئ تاني ..اوكيه ..

أنا: اوكيه اوكيهيين تشكر لي منه طال عمره ..وقل له يستر على ما واجه ترانا شباب سعودي طايش رحنا ولا جينا ما علينا شرهة ما يعرف لنا الا الهيئة ..يالله عن أذنكم تشاااو

وطلعت من هناك ورجعت لشقتي ويا ليتني ما رجعت كل العمارة كارهتني وحاقدة علي وجارتي بنت الكلب جايبة فوق كلبها كلبين كل واحد منهم كأنه أسد ورابطتهم عند باب شقتي وقالبين مدخل شقتي وأنتم بكرامة مزبلة للكلاب ويالله يالله ناديت البواب علشان يفتح لي الباب وقدرت أدخل …دخلت وأنا جوعان وحالتي حالة وذابحني التعب وأفتح الثلاجة الا القاها فاظية قلت ما بدهاش أنصى المطعم اللي عند الزاوية وبالفعل رحت و توني طالب زي العادة ساندويتش التونة اللي أحبه الا ترد علي البياعة الخنيفرة ..

البياعة : سوري وي دونت سيل فور يو تراي انوذر ريسترنت ( ما نبيع لهالاشكال جرب مطعم ثاني تطفح عنده )

أنا : واي از ذات أي يوسد تو كوم هير اند باي فروم يو ايام يور كوستمر ( وش الطاري يا بعد قلبي أنا من مبطي وأنا أجي عندكم وأكل من طبخم …زبونكم ما عرفتيني )

البياعة : بيكوز يو ار مسلم سو يو ار تيروريست ايفري بودي هير دونت لايك يو ..( هو أنت مسلم ما نبيعك لو أنك يهودي كان شلناك فوق رأسنا كل الناس ما يطيقونك تجلس معهم )

أنا : اوكي جيف ات تو مي تاك اوت أي ويل ايت ات هوم ( طيب يا بنت الكلب هاتي الساندويتش سافري بأكله في شقتي )

البياعة : نو واي ايفن ذات وي ويل نت سيل اني ثينج فور يو جو تو ابن لادن هي ماي ليت يو ايت هيمان ميت ( معصي اذا جوعان رح لابن لادن خويكم كوده يأكلكم لحم أوادم يالله فارقنا ولا تكثر )

وبالفعل طلعت من المطعم وودي لو أني ماسك حصاة وراجم بها مطعمهم الخايس بس الشكوى على الله مريت السوبرماركت وشريتي لي نواشف جبن وعسل بس حسافة مالقيت طحينية وخبز ورجعت لشقتي وكل أهل الحارة تقل شايفيين فار جربان يشوفوني ويكشرون في وجهي وأنا ضايق صدري مير الشكوى لله المهم رجعت لشقتي وتعشيت ونمت وثاني يوم صحيت و نصيت الكلية ودخلت محاضرة الدكتورة باتريشيا وطبعا أنا متعود من أيام جامعة الملك سعود الله لا يذكرها بالخير أني دائما أجلس ورى يعني يا أرقد يا أسولف يا أكون مهرب أكل و أجلس ابلع المهم دخلت للقاعة وكل الخليجين اللي معي ما حضروا و جلست آخر القاعة ما دريت الا نص الموجودين بادين يتنحنحون كأنهم عرس رجال في الرياض أبطى عليهم العشاء وتلتفت علي الدكتورة باتريشيا ..

باتريشيا : ابدوالزيز از يو فيل ال ستيودنت دونت لايك تو بي هير وذ ذيم ( يا عزيز ما تحس أن اخوياك الطلبة ما يبونك تكون هنا معهم ) .

أنا : واي وات أي ديد , ديد أي سميل باد ( هو وش فيني عسى ماني مروح بس ولا مصنز )

باتريشيا : يو نو … يو ار ارابو اند مسلم سو ذي ثينك يو ار تيروريست اند ذي افريد فروم يو ( شقاق يشق كبد أبليس أنت عربي ومسلم يعني ارهابي طعنتين تمزع كبدك روعت البنيات )

أنا : هيي دكتور …وات أي ديد رونج وي ار نوت تيروريست ديد يو سي مي دوينج اني ثينج رونج ( يا أبلة خافي ربتس فيني عمرتس شفتي علي شي أحد نقد علي في شي )

باتريشيا : ليسن يو شود بي بولايت اند ديموكراسي اند دو وات يور كوليجز وانت اوكيه ( اها بس عطيناك وجه يالله عاد بتفارق غصب عنك ربعك يبون كذا خلك راعي فزعة و انفهق ) …

ولأول مرة ما يصير ودي أفرك من القاعة بس الشكوى لله سويت نفسي انسان متحضر وديموقراطي وكلت تبن وطلعت ..شي يضيق الصدر لا في البيت مرتاح ولا قادر آكل ولا الجامعة .ضاقت علي الدنيا ..وكله كوم وسفارتنا كوم كل ما اتصلنا عليهم يا مشغلين لك مسجل يفتر على روحه أو رد علينا واحد يطمنك بالحكي ..تقول له ودي ارجع للسعودية بس السلطات الأمريكية رافضة لين يكتمل التحقيق يقول خلاص اجل اقضب أرضك ما شاء لله هذا رفع المعنويات ..و شلة المسجد تفرقت أبو وليد خلصوا تحقيق معه ورجع بعياله للسعودية وفهد نقلوه أهله للجامعة الأمريكية في بيروت ..و مروان ما أعرف وين أراضيه وحتى المسلمين اللي معنا في المسجد كل واحد يصلي ويفرك من المسجد من الروعة اللي احنا فيها ..وكل ما كلمت أهلي اكذب عليهم و أطمنهم و أقول لهم أني بخير وصحة وعافية ومبسوط آخر بسطة ولا تغير علي شي ..ما بي أمي يضيق صدرها علي …الحق ينقال الأمريكان ما كانوا يرجموني بحصا ولا كانوا يتفلون بوجهي ..بس كل اللي حولك يضيق دنيتي علي ..عيون الناس والكره المبطن والجرائد والتلفزيون تشيل وتحط فينا وكله كوم اذا جيك بزر مدربح ( مدربح = كلبوزة = سمين ) وقام يهوش عليك وأنت لو تعطيه همبرجر درعم رأسه فيها وقام يأكل …المهم مرة من المراير طقني الجوع و أنا في شقتي وطلعت في آخر الليل ناصي السوبرماركت اشتري لي خبز وجبن ومن هالاشياء .. وأنا أساسا قبل ما يصير التفجير في أمريكا ما عمري طلعت من شقتي بعد الساعة 9 فما بالكم بي طالع الساعة 11 ونص ..قلبي في رجولي وعظامي تنافض كأنها بيجر على الهزاز ( واحد قديم بيجر ) وأنا امشي شوي شوي لاصق في الجدار وألقى قدامي واحدا لابس ثوب وله لحية واقترب منه أكثر الا هو شايب باين من وجهه أنه سعودي المهم تركت بيني وبينه مسافة تقريبا عشرة أمتار وأمشي عادي الا وشوي مدري مر من عندي قطو مدري وش اللي مر ما وعيت بنفسي الا اصرخ بأعلى حسي يممماااه ..ساعتها الشايب التفت علي ..

الشايب : يا وليدي وش فيك عسا ما شر اذا تروعت مرة ثانية أذكر الله مو تقول يمماه الله يخلي لك أمك بس ربك أولى

أنا : انشالله بس أنت من أنت ووش جايبك هنا ووراك ماخذ راحتك مرة ثوب وغترة وماشي بهالليول ما تخاف يطلع لك أحد ترى ذولي ذبح الآدمي عندهم أهون بكثير أهون من ذبح الفار ..

الشايب : يا وليدي اذا توكلت على ربك لا يهمك من أحد ثانيا الحمدلله ماني طالع لشي فيه معصية الله ..أنا ولدي عسكري وعنده مناوبة و ما في حليب كفاية لبنته فرحت أجيب لها و أتقضى للبيت مرة واحدة ..

أنا : يا عمي معقولة ما تخاف ابد ذولي من دون شي يخوفون وش بالك عقب حادث الطيارتين ما يواطنون أحد عربي ولا مسلم بالقليل يشتمونه ولا ينبذونه ..وش بلاك أنا مجرب هالشي..

الشايب : يا ولدي تعوذ من أبليس أولا ما يندرى من فجر البنايتين هو أمريكي ولا مسلم ولا بن لادن ولا واحد بوذي ..ثانيا على فرض اللي فجر واحد من عيال حمايل الرياض هل هو كان لابس ثيابه وقايل لهم تراني مسلم بافجر .. الحمدلله ماني مسوي شي استحي منه علشان أغير ملابسي والبدل وأنا عمك لو جايزة لي كان لبستها من مبطي ايام روحات لبنان

أنا : اووه اثرك من أهل الدشرة من أول أيام لبنان وصباح وسعة الصدر في بيروت وليالي بيروت لو تعودين …

الشايب : يا ولدي كنت في السفارة السعودية وش في عقلك يا وليدي صاير يروح بعيد …أحسن نيتك في الناس ..

أنا : والله يا عمي مدري وش أقول لك الوضع هنا صعب ..الناس ما تتعامل معك و اهانات على الطالعة والنازلة تصدق حتى جامعتي ما يبوني أحضر يقولون ربعي ما يحبون أكون معهم …

الشايب : يا ولدي ما اقدر أطول معك تارك مرت ولدي وبنتها بروحهم بس بأقول لك شي و اذا أنت فطين بتفهمه بسرعة.. من يحفظ الله , الله يحفظه .. و قال الله ( لن ترضى عنك اليهود ولا النصارى حتى تتبع ملتهم ) يا ولدي هم يبونك تبعد عن دينك علشان تصير ضعيف ويستقوون عليك اذا عرفت هالشي وتمسكت بدينك بتصير أقوى منهم ..احسبها في رأسك يا ولدي ..و يالله الحين بأمشي ..وما أقول الا الله يحفظك ويرجعك لأهلك سالم …

وراح الشايب وقعدت أحسب في كلامه و أوزنه أجيبه مرة منا ومرة منا واكتشفت أن كلامه صدق وبالفعل ثاني يوم رحت للكلية معي مصحفي وسجادة …وحاطهم في شنطتي .. وأدخل محاضرة الدكتورة باتريشيا قبل ما تبدى بنص ساعة .. واجلس في أول صف ورجل على رجل

باتريشيا : ابدول ازيز وات أي تولد يو لاست تايم دونت كوم يور كوليجز دونت وانت يو بليز جو ( صدق أنك وجه مغسول بمرق وش أنا قايلة لك ما نبيك طس يالله )

أنا : هي يو ديفيل اولد ليدي ..ماي كونتري سينت مي هير نوت تو سي يور فيس بت فور ليرننج سو أي ويل ستاي هير ..اند هو دوانت وانت مي ذير از بيج دوور اوكيه , سو ستارت رايت ناو بيفور الفسحة ما تجي ( يالله عاد تراك مصختيها يا عجوز أبليس ..ديرتي الله يعز الحكومة ويعز الملك فهد ويطول في عمره => برنامج سعودي مرسلتني علشان أتعلم فاللي مو عاجبة وجودي هنا الباب يفوت جمل علم يوصلكم ويتعداكم هع )

باتريشيا : اوكيه سو وي ويل تالك توداي اباوات ( طيب خلاص ولا يهمك بنحتسي اليوم عن )

أنا : ليسن يو ايفري فايف منت أي ويل اسك يو اند يو ويل ريبيت ذا لاست ليكتشرز وين أي واز ابسينت .( ولعلمتس كل شوي بأنط في حلقتس واسئلتس سؤال و بتعيدين لي المحاضرات اللي فاتتني )

ولقيت كل شي مشى تمام الطلاب والدكتورة انثبروا ..يعني كلام الشايب صح ..المهم في البريكات رحت مكان صاد في استراحة الطلاب وفرشت سجادتي وصليت ولا أحد تعرض لي و صلى معي طالب باكستاني وكملت باقي محاضراتي وبعد ما خلصت الجامعة نصيت شقتي و لقيت العلة جارتي رابطة كلبها وكلب مع كلبها عند باب شقتي يعني البوي فريند قالط عندها فوق ..قلت لها طيب هين دواتس عندي وأطلع من العمارة وأمر بقالة واشتري علبة تونة و أنصى زبالة كبيرة في الحي و ألقى قطو أجرب اسود جوعان ما صدق على الله شاف علبة التونة الا نط عليها وأنا توني ما فتحتها له ..آخر شي خميت القطو ونصيت به للعمارة ..وأطلقته على الكلبين المربوطين .هو صدق قطو بس أخلاقه أخلاق تمساح ..جوعان أو تيس اجرب ..المهم القطو استلعن على الكلبين عضعض فيهم مستغل فرصة أنهم مربوطين ولا قادرين يتحركون لين صارت الكلاب تنابح من الروعة وتطلع جارتي وهي لابسة شي شفاف وقصير ومعها ولد لابس قميص بس ومن شافوا كلابتهم وحالتهم عدم والبركة في القطو قامت تهوش عليهم ..

الجارة : هي وات ديد يو دو فور مات دوجز واي يو بروت ذيس وايل كات ..( طعنتين ليه جايب هالقطو المفتري اللي قطع كلابتي تقطيع ما تخاف الله أنت )

أنا : شرب يور دوجز ان يور ابارتمنت نوت افرونت اوف ماي ابارتمنت سيكند ثينج ذيس ماي نايس كات اتز فيري نايس ( عضي على شحمة كلبتس تحطينه في شقتس مو قدام شقتي ثانيا هالقطو البريء يسوي هالاشياء يا شيخة الظلم شين ترى …شوفي برائته )

الجارة : ليسن يو هاف تو باي فور مي ذا تريتمنت اوف ذا دوجز اوكيه ( أقول ترى علاج الكلاب عليك دبر عمرك يا تدفع بنفسك يا تجيب أمر )

أنا : شت اب اف يو باي فور ذا ريبير اوف ماي ابارتمنت اند سايكوثيربي اوف ماي نايس كات ذين أي ويل باي فور يو ( ولا كلمة بس اذا دفعتي أول قيمة تصليحات شقتي وقيمة العلاج النفسي لقطوتي وقتها أدفع علاج كلابتس )

ودخلت جارة أبليس شقتها بعد ما أخذت كلابتها وهي منطمة …ولقيت فعلا اذا وثقت في نفسك ما أحد يقدر يسوي لك شي حتى الخنيفرة حقت المطعم اللي عيت تبيع لي ذيك مرة ..يوم قالت لي لا مرة ثانية ما صدقت خبر قلت لها نادي مديرتس علشان أتهمتس بالعنصرية ..يالله أخلصي ..ما دريت الا بأن الخنيفرة قامت تركض وجابت طلبي و عطتني فوقها آيس كريم تقول هدية من المحل ..وصرت أمشي في الشوارع رافع رأسي ولا أخاف من شي الا الله … ومرة رحت للسينما بأحضر فيلم وأدخل واشتري فشار وأدخل الصالة وتجلس جنبي عجوز بينها وبين القبر خطوة المهم ..العجوز حست من ملامحي أن عربي ..بدت تتأفف من بداية الفيلم وكل شوي متمتمة لين أوجعت رأسي وكل شوي ما أدري وش تبي ساعتها التفت عليها ..

أنا : اووص ليت اس واتش ذا موفي كيب سايلنت ( اوص خلينا نعرف نشوف الفيلم يالله انطمي عاد )

العجوز : وات دو يو مين أي ميك نويز ..واي يو دونت جو باك تو يور كونتري ذين نو جنتل ليدي انوي يو ( عما وشقاق يشق بطنك هذا اللي ناقص جاي ديرتنا وتقول عننا نزعجين عود لديرتك ما أحد ضربك على يدك )

أنا : ليسن أيام بولايت ويذ يو بيكوز يو هاف تو ستيبس فروم ذا هيل انشالله سو دونت ميك مي نيرفس ( أقول الحشيمة مو لتس الحشيمة لأبليس اللي بينك وبينه خطوتين انشاء لله …انثبري بس )

العجوز : هي يو ار ذا سيم نو ديفرنت بيتوين يو اند ابن لادن تيرووريست ( قطيعة كلكم مثل بعض طالعين على ابن لادن أرهابيين )

أنا : اها ابن لادن اوكيه اف يو دونت نو هي واز ما نيجبور ( لطلابنا نيجبور تكتب هكذا وتنطق نيبور ===> العلم نور ) اند وي وير بلاينج فوتبول توجيذر ان سيم هارة ..هيز ماذر سول تو سول ماي موذر فريند …دو يو مايند ( لعلمتس يا العجوز الرقطاء أنا وابن لادن جيران ..وكنا نلعب كورة سوى في الحارة ..وأمه صديقة أمي الروح بالروح يالله أذا عندتس مانع علميني لا بارك الله فيتس )

وما كملت هالجملة الا نص اللي في السينما طلعوا من الخوف وأولهم العجوز الرقطاء..والنص الثاني ابعدوا عني وصرتي بروحي في 4 صفوف ما فيها الا أنا وخذيت راحتي على الآخر و فصخت جزمتي اللي تاكة على رجولي وقامت ريحة شراريبي تلعلع ..بيني وبينكم أعرف أن اللي أسويه فيه أشياء غلط كثيرة بس قال وش حادك يالمسمار قال المطرقة …المهم ما علينا بعد يومين جاني طلب من الاف بي أي لاستكمال التحقيق وعلشان يشوفون اذا عندي معلومات يمكن تفيدهم …

المترجم : المحئئ بيسئلك ما عمرك فكرت تجاهد في افغانستان ..وئت الاحتلال السوفيتي …

أنا : لا والله بصراحة الواحدة عنده حيرة وين يروح ووين يتفرج وايش يسمع أفغانستان ولا البوسنة ولا فلسطين ولا كشمير ..يا أخي الواحد يحس جدوله مزدحم …

المترجم : المحئئ بيسالك …كأنك ما بتحب أمريكا وما أنتا راضي عن سياستها ؟؟

أنا : استغفر الله يا شيخ فال الله ولا فالك ..ودي تيجي …كلنا مع أمريكا قلبا وقالبا يوم تضرب العراق كاني ندعي الله يسدد ضربهم ..ويوم تدعم أسرائيل كنا ندعي الله كل يوم يموت فلسطينين ..ويوم تتفرج على البوسنة كنا ندعي الله يفكك مشكلة الصرب ويفرج عليهم ..وش جانا من أمريكا الا كل خير …الله يخليها تاج فوق رأسنا .

المترجم : المحئئ عنده أحساس انك بتتريئ عليه شو كلامه صح و لا ايش ؟

أنا : يا أخي ابيك تسأله سؤال واحد ..يعني بصراحة وبقلب مفتوح هل هو قد شاف شعب أطيب مننا ولا أحمر مننا بمعنى أدق ..ننطق ونضحك ونسكت ..ننسرق ونضحك ونسكت ..عيني عينك تجون مع أعدائنا ونضحك ونسكت … يا أخي بندخل موسوعة جينس …والحين يوم طاحت عمارتين قامت الدنيا ولا قعدت و شبيتوا فينا ليه بن لادن سعودي وليه صار مسلم وليه أنتم مسلمين زيه ..وأنتم مع الأرهاب …يلعن أبو أبليسكم وش شايفينا نرقد فوق صواريخ ..حتى الشروخة ممنوعة عندنا و طايحين فينا طنازة بدوا و قراوى طيب ناظروا أنفسكم نصكم أصلكم بريطاني لا وسكارى بعد ..وكل شوي واحد طالع يعذرب فينا ويقول أننا ما نساعدهم ضد الأرهاب . وش الأرهاب ..أنك تطيح عمارتين بالخش والدس ولا الأرهاب أنك كل يوم تقتل لك عشرات كل يوم مالهم ذنب في الحياة ….

المترجم : المحئئ بيسالك شو بتئصد ؟؟؟

أنا : قله له طال عمره قبل ميتين سنة في ناس عبروا المحيط ولقوا ارض وفيها هنود حمر قاموا قتلوهم واحتلوا أرضهم وبعد ما أبادوا الهنود الحمر كلهم ..قاموا يسوون لهم متاحف وأفلام تحكي عن شجاعتهم …يعني بين قوسين متى نشوف متاحف للشعب الفلسطيني والعراقي والكشميري والمسلمين كلهم لا فرق الله شملهم عرفت الآن من الأرهابي اللي تربى على الدم وعرفت من هم الضحايا …. في السعودية ملايين يحبون أمريكا يحلمون بأمريكا بس اكتشفوا أن عشق النجوم سراب ومهما حبيت النجوم بتبقى النجوم فوق وهم تحت والنجوم تنظر لهم باحتقار ..وازدراء يا شيخ بتسجنوني حياكم الله بتطلعوني تسوون خير اصرف ارجع لديرتي و أهلي …الحضارة اللي كنت أحلم بها لقيتها مزيفة شعب وصل القمر وما زال يفرق بين ابيض واسود ..وبين غني وفقير ..ناس بنوا ناطحات سحاب وفي هوم ليس ماليين الشوارع كلها …حضارة وصلت البنت لرئاسة الوزارات ورقصتها على عواميد أندية الليل عارية ..تناقض غريب …بس اللي اغرب من هذا كله اسألوا أنفسكم ليه العالم كله فرح بالتفجيرات اللي صارت ضدكم ساعتها بتعرفون أن في ناس واجد مخدوعين بهالنجوم اللماعة ..مع تفاوت درجات الغباء وطبعا احنا نأتي في المقدمة … وبعدنا على طول السي أي ايه اللي كان مسيطر على الوضع تماما ربي يحرسه من العين يا سيدي الفاضل أنت وأياه ممكن تعرفون من فجر هالبنايتين وتورونه الويل ..وتقتلونه حتى بس الأكيد ..أنكم من الصعب عليكم تلمعون صورتكم الباهتة المزيفة اللي أنكشفت على حقيقتها أن الأرهاب في آخر تعريف له هو أنك توقف في وجه سياسة أمريكا ولا يدهسك قطار القضاء على الأرهاب ….أذا صار الأرهاب أني أتمسك بديني وأدافع عن أرضي وأفتخر بأصلي اللي تمتد أصوله فوق ألف وربعمية سنة ..فبلغوا العالم كله أني أول ارهابي ..وكلي فهر بهالشي … وسلامتكم …

انتهى التحقيق وأفرجوا عني بكفالة قدرها نص دولار عن قولة ما طلعناه بكفالة ..وصلحت شنطتي ورجعت لديرتي ..و على قولة المثل حشر مع الناس عيد ..اسمي أرهابي وسط الارهابيين أو دلخ وسط الدلوخ ….

وهنا ينتهي فصل من فصول المسرحية الضاحكة القضاء على الأرهاب اللي احنا أنفسنا ماحنا عارفين ألى الآن من الأرهابي ومن المجرم ومن الضحية …….

هالقصة بتقولون جات متأخرة حوالي سنة تقريبا ….لأسباب كثيرة ..منها أني أعطي نفسي فرصة أشوف يمكن شي حلو يصير يشجع بس ما هناش طبعا ..ثانيا التحول في افكار الكثير خصوصا بعد أحداث انتفاضة فلسطين ..يساعد كثير ثالثا علشان ظروف خاصة

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة