بسم الله الرحمن الرحيم…هذا أولا ثانيا السلام عليكم ورحمة الله وبركاته ….القهر وشهو القهر ..غير اللي صار لي ..طيب وش اللي صار لي ..هذي السالفة اللي بتقرونها بعد شوي ..على فكرة القصة نظيفة مرة للي ما يستحملون المشاهد العنيفة ….
اليوم الخميس الساعة 4 العصر ..أهلي طالعين للديرة في هالويك اند وما في البيت الا أنا وطبعا زي العادة تليفون البيت يرن ولا ما يرن ولا على بالي غاية التطنيش فاضي أرد وأدخل في تحقيقات وين أمك وين فلان وين علانة متى طلعوا متى بيرجعون وعلى هالحال الى أن سمعة نغمة جوالي ( ناح الحماح فوق سطوحي لسلامة العبدالله ) طبعا الواحد لازم ينقز هالحزة يمكن رزق باعثه رب السما بنت غلطانة ننشب في حلقها ..واحدة حولا قاريه رقم اللي رقمها بالغلط ..وكانه واحد يستهبل ولا يدور بنات يا ويله يا سواد ليله يا يجيه شي ما شافه .وافتح عيوني في الرقم وألقى رقم طويل عريض من سبعطعش خانة مدري جوالي خذرف ولا انا من النوم والغمص ما صرت اشوف ومالي خلق ..بس مدري وش طرى في بالي أنها يمكن بنت مرقمها في الانترنت تدق علي من بطاقة اتصال مدفوعة ( والله التفكير ) واقوم ارد ويطلع لي واحد لبناني ..( والله ما عمري غازلت ولد قسما بالله )
اللبناني : السيد عبدالعزيز كيفك معك جورج قرداحي من برنامج من سيربح المليون كيفك ؟
أنا: من جورج قرداحي لا يا شيخ …معك كاظم الساهر …وش تخربط أنت والله عشنا وشفنا ابو شكيب ويستخف دمه يالله بس صرف نفسك .. … طاع ( سكرت السماعة في وجهه ) طووط طووط طووط
ويرن التليفون مرة ثانية وأطالع جوالي الا نفس الرقم مرة ثانية وهالمرة أعصب من جد وأرفع السماعة
أنا : أقول ياللبناني أنت فاضي جايب لك بطاقة وجالس تزعج الناس منها, ترى أن ماعقلت بوريك شي عمرك ما شفته
اللبناني : يا أخ عبدالعزيز الله يخليك والله أنا جورج قرداحي من برنامج من سيربح المليون يا جماعة يا جمهور زعئوا سئفوا من شان يسدئني يا أخ عبدالعزيز يخلي لي اياك انشالله انت اتطلع في شاشة جوالك شوف مش شايف مفتاح فرنسا قسما بالله أنا مش أبو شكيب …
أنا : يا شيخ وش قالوا لك عبدالعزيز بن جاك ميتران وش يعرفني بمفتاح فرنسا حدي مفتاح جدة ومفتاح الشرقية وبعدين معك روقنا يا شيخ .. ثانيا على فرض أنت صدق من فرنسا و أنك جورج قرداحي وش تبي مني عمري ما اتصلت عليكم ما بقى الا هي رحم الله امرىء عرف قدر نفسه يعني ما ربحت طقم كيسان من بنده تبيني أفكر هالمرة اربح المليون ثانيا من وين عرفت وجبت رقم جوالي …
اللبناني : يا حبيبي روء وطول بالك علي شوي ..معنا مشترك وبالاصح مشتركة طلبت الاستعانةبيك علشان تساعدها في المسابقة هي وصلت لنص مليون ريال وبائيلها سؤال المليون يالله ورينا شهامة الفارس العربي..
أنا : متسابقة هاه ايه متسابقة …من هي أعرفها … بيني وبينك يا جورج كلام شباب هي جرح ولا لك عليها ..
اللبناني : شو يا عبدالعزيز على العموم المتسابئة ريتا مرعي راح تئول لك السؤال يالله عندك نص دئيئة..
أنا: جورج خلني اول شي اتعرف عليها اجس نبضها ..يا شيخ اذا ما ضبطتني خلني اضبط روحي ..بنت واسمها ريتا مرعي لبنانية بس ولو تبقى في الاول والاخير بنت …بس
اللبناني : يالله يا ريتا عندك نص دئيئة ..
ريتا: الو عبدالعزيز ما هي العاصمة اللي يوجد فيها مجلس اللوردات البريطاني وفيها السفارة السعودية في لندن ؟ هل هي باريس ولا لندن ولا مانشتر يونايتد ولا خميس مشيط هاه وش الحل؟؟
أنا : ( مو صوت لبنانية ) هي جورج يالحبيب وش حركات عيال الشفا لا توفر البنت جب اللبنانية …
اللبناني : مافي وئت يا عبدالعزيز بائي خمس تواني …
أنا : اللبنانية يا جورج اللبنانية جبها الله يلعنك يا جورج وين اللبنانية اللبنااااااااااااا…………..طووط طوووط وانقطع الاتصال مدري انتهت ال 30 ثانية …
مرت هالمكالمة كالكابوس مدري صدق ولا خيال ما عاد أدري عن شي وبعد ست ساعات صحيت مافيني من الشيطان طاري وافطرت وناظرت جوالي الا فيه صدق مكالمة خارجية بس الشرهة على اللي يعرف هي من وين أنا ماعرف مفتاح البحرين من مفتاح فرنسا …وقصيت لربعي السالفة طبعا ما استلمت الا معاير واللي يقول اجل ريتا بتعرفك أنت ووجهك ولا جورج بيدق عليك يا شيخ العب غيرها ..بس طبعا حتى أنا بديت أصدق انه مقلب وبديت اطنش بس كل شي تبدل ثاني يوم الجمعة في الليل… المسيجات بدت تهل علي مثل المطر ..وكلها تقول سعودية ببراقعها تفوز بالمليون ..طبعا أنا عقب كابوس أمس تعقدت من شي اسمه من سيربح المليون …وصاكني الجوع وأهلي الى الان ماجوا من الديرة ..ومطفر مامعي ولا قرش فقمت دقيت على واحد من الشباب اسمه هاني لا تصدقون ترى اسمه حمد بس نرفع من معنوياته قدام البنات بهاني سواءا في الشات ولا في الاسواق المهم وحمد جايب بروستد لي وله الا ويرن الجرس ..أنا قلت ذولي أهلي جايبين تمر وخرابيط من ديرتنا ويبوني اشيل بس باطنش كأني ما سمعت وشوي ويرن الجرس اكثر وبقوة وصوت الباب ينطق ..قلت بس شكلهم راكبين روسهم الا أجي اشيل وخليت حمد قصدي هاني في الملحق ورحت وفتحت الباب ….وش أشوف مجموعة ناس في مقدمتهم شايب مدري وش اصلهم وريحتهم فايحة واضح أنهم ما تسبحوا ..وتوني فاتح الباب الا ويطمر واحد ويصارخ هو هو هو … هذا هو عبدالعزيز راعي الجوال…
الشايب : أسكت يا حمدان خل نشوف وش قصته …. أنت عبدالعزيز ولا لا ..
أنا : لحظة لحظة وش هو هو هو ..ايه أنا عبدالعزيز عندكم شي..ممنوع بعد يصير اسمي عبدالعزيز
الشايب : أجل أنت اللي نباه …لزما تصلح غلطتك يا قليل الحيا ..
أنا : أي غلطة أنت واياه من وين جيتوا تتبلون علي آخر بنت عرفتها رقمتها في ياهو شات و كلها يومين اكتشتفت انها تبي واحد يصرف عليها وفوق ذا كله على كلامها سمرا زي سمار عبدالله سليمان …
الشايب : يا قليل الحيا فضحتنا قدام العالم ..أمس ما اتصلوا عليك حقين أم بي سي ..من سيربح المليون ..
أنا : الا بلا بس ما أحد راضي يصدقني ..اسكت بس طلع جورج قليل أدب أكلني مقلب محترم يقول ايش لبنانية وآخرتها تكلمني بدوية مدري سودانية صوتها مغمغم ( يعني مو باينه معالمه ) …وأنا أصارخ عليه وين اللبنانية يا جورج شكلها انهزمت أحسن اجل يلعبون علي ..أجل ..قال ايش ريتا مرعي واللي تكلمني ..زليخة بنت مقمط …
حمدان : افا ياذا العلم أجل مرعي ..الشيخ مرعي بذاته صار قطعة لبناني ياللي ما تستحي على وجهك وريتا بنت الشيخ لبناني قصدي مرعي صارت لبنانية ولا صوتها اللي يذبح صار مغمغم والله لاذبحك …
الشايب :اصبر يا حمدان مانبيه يموت ..تبيه يموت واحنا روسنا في الأرض من الفضيحة الورع شكله عاقل وبيعرف مصلحته .وبيسمع الكلام …
أنا : ورع في عينك وش شايفني أتكسر قدامك ( واحد دايم تفكيره شمال ) ثانيا أنت وش علاقتك بريتا وش يخربط هالمصرقع ويقول يا هم لالي ريتا بنت الشيخ مرعي لاتكون بنتك يا شيخ روقنا وروح بعيد وجهك وجه ريتا كثر منها حدك اذا مرة بتقطع نفسك تسمي بنتك بسمة ولا تركية هذا حدك …قال ايش هالوجه يسمي بنته ريتا ..لاتقول بعد أمها لبنانية حبيتها أيام شبابك وطفولتك ترى وجهك مرة لايق عليه الحب…
وما القى على رشاش محطوط جنب راسي وشوي الا يطلقون علي …أنا قلبي ساعتها ماعاد لقيته مدري وين راح ..ومرة ثانية يتدخل الشايب ..
الشايب : يا مطلق تعوذ من أبليس لا تستعجل هو اذا ما رضى بكلامنا بنعلقه انشالله في سوق الغنم بعد ما نفصل كل عضو عنه من محله ..وأنت يالحضري أنا زي ما أنت شايف لي عشر ورعان ( مطلق,ورشاش .وبجاد وزهاب وخنجر وسيف وذيب وراكان وعقب وعقاب ) عاد على كبر قلت للمرضة اذا جتني بنت باسميها باسمك ..عاد ما كنت اظن صدق بتجيني بنت بس ربك كتب و جت والممرضة طلعت قطوة فلبينية اسمها ريتا وعاد مع انها بنت الا انها غلبتني وغلبت أخوانها اللي قدامك دخلت الجامعة وتخرجت وصارت معيدة ..يعني بنت متعلمة وجتهدة ..
أنا : مبروك طيب أنا وش دخلني الزبدة أخلص …
الشايب : شف يا ورع البنت طلبت تتصل بك في برنامج من سيربح المليون ودست روسنا في التراب وأنت جيت كملتها وعلمتها الجواب الصحيح وفازت هي بالمليون ..والحين سيرتنا على كل لسان وكلا يقول أنها تعرفك ..
أنا : يلعن ابو حظها فازت بالمليون . طيب يا مرعي ..أنت قلتها بنفسك هي اللي اتصلت علي أنا وش دخل أبو جدتي .. يعني بنتك المنحرفة ..مو أنا
وما وعيت الا مرعي يطلع بازوكا من جيبه ويقول منحرفة في عينك ..أحنا سئلناها عنك وحلفت أنها تبي رقم صديقتها بس هم في الام بي سي غلطوا ودقوا عليك ….
أنا : حلو جبتها كثر الله خيرك اجل رح الا م بي سي و دور جورج بن قرداحي وتوص فيه العن والديه وبرشم ( برشم = من البراشيم في الاختبارات يعني مل وجهه شطرطونات من الجروح والتصفيق ) …
الشايب : يا ورع اسمع الهرج الصدز أنت بتعرس عليها وتصلح غلطتك أنت اللي كلمتها ..مو جورج ..والناس يقولون أنك تعرفها بس ما يقولون جورج بيعرفها ..
أنا : يا ثور قصدي يا عم مرعي الحين واحدة جالسة قدام جورج تخيل قدام جورج لها نص ساعة ولا أحد يشك فيها بس بالغلط يدقون على واحد صار هالواحد مصدر الشك ..سوري أنا ما أرضى على نفسي أتعرف على بنت مستعملة تجي هالمرة أتزوج بنت من بعد جورج ..لو ما أعرف وش يسوي مع المتسابقات ضحك ودلع وتغميز وتغشيش واذا جاه واحد بالذات من الخليج وأنواع الطفش واسئلة ما تنحل أجل مرة يسئل متسابق النملة اللي مرت قبل 700 سنة من قدام سور الصين العظيم كم كان وزنها ….
الشايب : هي جلست قدامه في النور كمتسابقة بس البلا أنت من وين طلع لنا رقمك بالغلط …
أنا : بس ما غيرهم يا أيها الفارس الهمام رح المرسلات تلقى ناس زكرت طاحوا في البلد طغيان اسمهم شركة الاتصالات أدخل عليهم برشاشاتك والبازوكا حقتك وثور فيهم ترى هم السبب ما أوصيك أول من تسمي به أهل البشوت مع أني عارف ماراح تلقى أحد منهم كلهم ماشالله منتدبين في بيوتهم ورواتب مدبلة …يالله حبيبي ابي اسمع ان المرسلات غرقانة كلها في الدم …
حمدان : يا عم مرعي طلبتك خلني أطخه وأخلص عارنا تكفى يا عم ..
الشايب : يا حمدان اصبر ..وأنت اسمع يا ورع ترى الحتسي الظاهر ما يجي معك وقالوا من قبل الرجال ما يجي الا بثنتين الكلمة الصادقة ولا طخة الرشاش هاه وش قلت بتعرس على ريتا وتخلص عارنا ونقول للعالم أنكم كنتوا مخطوبين قبل ما تروح هي باريس وكذا نداري الفضيحة ..
أنا : يا مرعي يا ابو مطلق وخنجر وذيب وعقب وعقاب والبقية الباقية ..أنا زي ما أنت شايف عاطل باطل ولا ني راعي زواج يعني أتزوج بنتك علشان أبلش بها .ثانيا بالعقل كيف أتزوج واحدة ما أعرف عنها شي ولا عمري قد شفتها حتى صوتها كان مغمغم من زحمة الاستديو …يعني لازم أتعرف عليها واشوفها شوفه شرعية و أنت طبعا ماراح ترضى اني أتعرف عليها واشوفها شوفة شرعية ..يعني سوري كان بودي أخدمكم بس مو بالامكان أكثر مما كان جيم أوفر يالله اشوفكم على خير المرة الجاية ….
الشايب : وانا ابو مطلق ابوه أجل تعرفها وتشوفها ..لا والله ناقصين فضايح قال لك ..اسمع يا ورع أنت الظاهر مشتهي طخة الرشاش في راسك حمدان عليك به ..
أنا : لا لا نتفاهم أنا بزر والله ما عندي ما عند جدتي ولا قد أني أتزوج وتكاليف الزواج الى الان أخذ مصروفي من ابوي .
الشايب : اسمع ما نبا منك الا أنك تعرس على البنت مو هي ربحت مليون منا لك مية الف ريال والشقة حقتكم عليها والعرس بعد عليها ..وذهبها عليها بعد …بس انت وافق ..
أنا : هاه المسئلة فيها أنّ ,,لا يكون جورج لاعب فيها بس شف احنا على البر وجورج رجال طيب انا أكلمه يصلح غلطته ..
مطلق : اعقب واخس يالحضري أختي أشرف من الشرف يبه خلني تكفا أجيب المدفع من السيارة واطلقه عليه
الشايب : يا مطلق ما صدقنا نسكت حمدان تقوم تشب انت يا ولدي الله بلانا بهالحضري رقابنا في يده …
أنا : اسمعوا عطوني مهلة افكر يومين ثلاث ايام واشاور أهلي لازم بعد …مو كذا خبط لزق .
الشايب : اسمع لك ثلاث دقايق بس تزهم أهلك وتعلمهم مو أكثر من تسذا . ولا والله بالمدفع أنسف بيتكم نسف .
وهالساعة يقبل زين الحلايا هاني لانه تباطاني من الملحق وأول ما شاف الرشاش هون بيرجع بس نادوه الحلوين ..وهو بكل دلاخته المعهودة سئلني من ذولي ..
أنا : ما عرفتهم مع أنهم بالشكل لازم تعرفهم اقدم لك الشيخ مرعي بن حمدان بن محماس والد ريتا ..اللي ما طلعت لبنانية ولا شعرها أصفر ولا عيونها زرق ..بس ربحت مليون بسببي ..
هاني : والله المليون موب شينة بس صراحة تطلع هالاشكال خوال عيالي أحسها قوية شوية ..
الشايب: وشو ووجع حمدان عليك به ثور راسه هاللي ما يستحي ..
هاني : الله يهديك يا عم مرعي بس خلني اخلص كلامي ..قصدي أقول قوية شوي الا كثير اقول لا من يطول هالشرف الرفيع الله يهديك بس لو تترك هالعجلة عنك …
أنا : أجل شيل حلال عليك الله يهنيك بها ويهنيها بك … يالله يا مرعي أنت وقطيعك,, هاني بيحفظ ماء وجوهكم
الشايب : غصبا عنك بتاخذها ولا هو بكيفك ..تصدق يا أخ هاني اننا عرضنا عليه مية الف غير تكاليف العرس وشقتهم وكل شي علينا ولا هو راضي كلمه يا يا يوافق يا نطخه ..
هاني : لحظة عن اذنكم بس شوي يا شباب ابيه بكلمة راس …وندخل داخل البيت شوي ..ويبدى يقول لي.. صاحي أنت ترفض احد تجيه هالفرصة يلعن ابو شكلك وحظك الناس ودها تتزوج ولا عندها قروش وأنت زواجه بلوشي وفوق ذا كله بيعطونك فلوس وش تبي بعد خاف الله ..وافق يا بن الحلال أحسن ما يقتلونك الحين ولا يستقعدون لك …
أنا : وش أتزوج اصبر واصبر واخرتها أفطر على بصلة ما تشوف اشكالهم يعني كيف أختهم ريتا وشلون بتصير والله أن بكرة تعايرني الناس بها كل هذا غير عيالي وشلون بيطلع شكلهم لا صراحة ألزم ما عليى الواحد عياله ..
هاني: شف وش عليك من الناس يعني اذا لقيت بنت حليوة مو حلوة بس حليوة كم بتكلفك مهر وشقة وتكاليف عرس وشهر عسل وغثا واذا تشتغل راتبها لها واذا ما تشتغل تقص ظهرك بمصاريفها وفواتير جوالها بس هذي غير الزواج وكل شي عليهم وأنت بس تدخل بمجهودك من يحصل له كذا …. ..واذا على الناس اذا بتطلع معهم لبسها نقاب والله ساعتها ما يدرون هي اللي معك باسكال مشعلاني ولا امنا الغولة ..
أنا : طيب وفي البيت يا فالح وفي الليل يا فالح وشلون أدخل بمجهودي من وين تجيني نفس اصلا اسوي مجهود .
هاني : يا سخفك يا شيخ نص السعوديين يسكرون النور وش ناقصك سكر النور وتخيل اللي معك اللي تبي على كيف كيفك .. ومنها توفرون في الكهرب..
أنا : بس أخاف أتذكر أنها هي ساعتها أبدى أقطّع والله بلشة …
هاني : ياخي أنت ليه دلخ مو هم بيعطونك مية الف ريال استثمرها عند ابو سند خوينا صاحب مكتب العقار بعد كم سنة انشالله يصير عندك مبلغ وقتها تبي تتزوج واحدة قمر ولا لبنانية ولا فرنسية أن بغيت ما أحد بيقول لك لا صدقني يا عبدالعزيز أعرف الوضع صعب بس هالأيام ما أحد محصل زواج شباب يدهرون يتزوجون موظفات ومدرسات هي في بيتها وهو في بيت أهله وهي تصرف عليه ومن وقت لوقت يجيها ..الدنيا صارت صعبة ما أحد صار يفكر في حب ومستوى اجتماعي الناس صارت تفكر بعقل ..هالفرصة أن طارت من يدك ترى بتندم كثير…
ورجعنا يم الشيخ مرعي وعياله وحمدان ولد أخته… وقلت لهم موافق بس يعني أذا مافيها سئاله ابي اشوف ريتا يعني الواحد من الجميل أنه يعرف المصيبة اللي ابتلا فيها ..بس ردهم علي كان وبصوت واحد …مالك لوا مافي أمل مش خشمك وبقوة بعد ..وصارت الملكة وتحدد موعد العرس طبعا أهلي وافقوا على مضض علشان أنا ما انذبح أما أنا خذيت المية الف وطمرت بها لمكتب أبو سند العقاري ( صديق سابق أيام الثانوي اشتغل في العقار ) وطلبت منه انه يستثمرها لي في مشروع مربح … ووعدني أني في غضون كم شهر باصير مليونير ..( مالت علي وجهي وجه واحد عنده عشرة الاف ريال علشان اصير مليونير ) المهم جا العرس وكل شي سار على ما يرام الا يوم قلطوا الضيوف على العشا فوجئت وأنا جالس أتفرج طبعا معرس ما يآكل بس كذا راز وجهه مع اللي ياكلون المهم ما علينا فوجئت بأبوي وأخواني واهلي كلهم ما ياكلون شي والتفت على ابوي واسئله وش فيه وراهم ما ياكلون …
ابوي : يا ولدي وش نآكل بس لحم بعارين في هالليول ناقصين مغص ووجع بطن في تالي الليل طبعا أنا اسمع بس ولكن عقلي موجود في مكان ثاني مع ليلة الدخلة خوف وترقب وشوية فرحة ..المهم جا موعد الزفة يعني أطس واترك الرجال وأروح يم الحريم وأخذ زوجتي وأطلع ..هذي اللحظة من أجمل لحظات أي شاب في الحياة تخيل أنت بروحك في مكان كله حريم ..على عيني وراسي نصهم عجز ونصهم بزارين وشيف عد واغلط بس اسمك وسط حريم وبروحك ..قلت لعمو مرعي يالله يا عمو أجل الحين الزفة ..
عمو مرعي : وش زفته بلا يوجع مصارينك بعد وش تدخل على محارمنا أنت ووجهك هذا اللي ناقص بعد ثور مثلك
طول بعرض يكشف محارمنا ..
أنا : بس يا عمو الحين انا صرت منكم وفيكم يعني محارمي هي محارمكم ومحارمكم هي محارمي محارمنا سوى..
عمو مرعي : وشو وش تخربط أنت وش محارمي ومحارمكم ..
أنا : يعني من أول علبة كلينكسكم مو علبة كلينكسي بس الحين , عقب الزواج صارت علبة كلينكسكم هي نفسها علبة كلينكسي ..في ألأخير مناديلنا صارت واحدة …
عمو مرعي : هييييهههه الله يقطع أبليسك العرس ماخذ عقلك انا يوم كنت مثلك الدنيا ماهي واسعتني من الفرحة تعرف الزواج شي عجيب ..بس وانا عمك انطم مافي دخلة عند الحريم فلا تقعد تقرق فوق راسي يالله افتح موترك علشان نركب فيما أحد هالورعان الصغار يعطيهم خبر تطلع عروسك ..
أنا : وش قلت طال عمرك ترى سمعي هالأيام مستخف نركب ..خير وش تبي عساك انشالله بتروح معنا ..
عمو مرعي : أجل وشو تبيها تركب معكم بروحكم ..وش قالوا لك مالها أهل ولا صايعة .. هاه انطق…
أنا : وش تخربط أنت هذا زوجتي كتاب وكتبناه وعرس وسويناه والفندق أنت واياها رافضين نروح ليلة الدخلة في فندق تقولون ليه المصاريف خلاص بنروح الشقة ..رجال وزوجته أنت وش يحشرك معنا …
عمو مرعي : اسمع يا ورع كثرة هرج مابي ترى الرشاش في سيارة مطلق لا تحدني الان أجيبه وأثور فيك اذا قلت لك شي اسمع كلامي الله يعميك بس …
وبالفعل ركب زين الحلايا معي قدام في السيارة وجلسنا ننتظر لين جات العروس المنتظرة وركبت معنا ورحنا للشقة .طبعا أنا وضعي وشكلي مو واحد معرس الا واحد في جنازة مبوز وقافلة معي وذا العم المروح اللي جنبي خلاني من قوية ريحته اتلطم ( التلطم = لف الشماغ على الخشم من قرف الريحة ) ووصلنا الشقة أن هالعم يستحي على وجهه ويقول تصبحون على خير الا نزل معنا ودخلنا الشقة ومن حكي هالشياب ماشالله وش هالزين الله يجعلها شقة مباركة لا شقة ترد الروح تشرح الخاطر …
أنا : بس الزين ما يكمل أحيانا تدخلها فيران وش فيران الا جرذي كبير .جرذي ماله أي داعي ..أقول يا جرذي قصدي يا عمو مرعي ترى أم مطلق اخاف تباطاك ماودك تروح لها ..
عمو مرعي : الله يقطع أبليسك ذكرتني وأنا أقول وش أنا ناسي يالله وأنا عمك تعال وصلني هناك ..
أنا : سم الله يحييك وش قلت أنت ناسي أني أنا معرس و هذي ليلة دخلتي ..
عمو مرعي : هههييييه ( الله يقلعه هو وضحكته ) يابن الحلال وش انت مستعجل عليه ..يالله بس وأنا عمك اسرع ترى مابقى على الفجر شي ويطلع ( هالحكي الساعة 11 الليل )
خذته ووديته ونزلته عن اشارة الدائري لان مافيني خلق اديور علشانه بس هو اساسا ما عنده مشكلة ..المهم رجعت للشقة وانا اردد حكمة صينية قديمة ( ارضى بالنصيب ترتاح بالحبيب ) وكلام جدتي الله يرحمها مع أني ماعمري شفتها لا كتب الله عليك تعيش مع قرد فحبه على أنه شمبانزي علشان ما تتعقد وتقول نصيبي طلع مع قرد .. صدقوني ما أدري وش اخربط حالتي صعبة رايح اصك على نفسي الباب مع واحدة ما اعرف شكلها ولا أي شي عنها وأخوانها اشكالهم تحوم الكبد يعني ما تبشر بالخير ..المهم وصلت الشقة ودعيت الدعوة اللي كنت أقولها قبل الاختبارات ( اللهم لا سهل الا ما جعلته سهلا وان شئت جعلت الحزن سهلا ) دخلت البيت وقمت أنادي ريتا يالله حبووبتي ريتا وينك أنا رجعت والقى واحدة قال لك حياوية الى الان بفستان العرس حقها متغمغمة وجنبها صحن العشا اللي جابه اخوي وولد خالي فاضي قضي عليه تماما ما بقى الا كم حبة بطاطس ..طبعا لما شفت من بدياتها أنها طفسة وتحب الأكل قلت في نفسي يا ولد عادي مش الليلة على خير قمت عطيتها نظريتين من نظرات رشدي اباظة ..وقلت اسفرت وانورت الشقة بوجودك يا حياتي ..
ريتا : بوجودك ما عليك قاصر …( من زين الصوت سلحفاة شارقة بحصاة مانت عارف هي وش تحكي )
أنا : ( في نفسي …اللي هذا أوله ينعاف تاليه) طيب يا حياتي وش رايك ..وش رايك نتفصخ ( كلمة تستحي منها بدها ثانيا شف ردة فعل البنت ) ..
أنا : طيب يا عيوني يالله بأطلع أغير في الصالة وأنتي غيري هنا يالله بكرة نتعود على بعض بس اذا خلصتي حبيبتي عطيني خبر …. وطلعت للصالة وفصخت كل ملابسي ايه ليه مستغربين عادي المهم وانتظر برا على بال هي ما تعطيني الاشارة ..وجلست ربع ساعة ذبحني البعوض في هالحر قرصني تقرص .تنفخ جسمي كله وهي ما عطتني هالاشارة ..طقيت الباب ..ريتا حبيبتي هاه خلصتي ولا لا …بس ما أحد يرد علي خفت من كثر الأكل يكون صار لها شي ( ياليت والله ) ماتت تسممت وافتح الباب والقى عمتي مو عمتي أخت أبوي أقصد ريتا جالسة على السرير ولابسة خشاشة ( الخشاشة = فستان خفيف يلبسونه حريم من أول تحت الفستان الأصلي قال لك علشان لوازم الاغراء يكون بدون أكمام وغالبا يكون لونه أسود وجالسة على طرف السرير أما عليها وجه يا أخوانها بجاد وزهاب احلى منها شيفه ونص وجهها حب شباب ..وعليها جسم مدري وشلون قايل أول ما شفتها ارتعت وقلت في نفسي ( اللهم لا اسئلك رد القضاء ولكن اسئلك اللطف فيه ) ..طبعا يوم شفتها مدري حسيت الحكمة الصينية وكلام جدتي هك على الفاضي مافيه شي من الصحة ..وحسيت أن فيني عجز جنسي ولا كل حبوب الفياجرا في الدنيا تقدر عليه ..ساعتها صرفت الموضوع ..وجيت لها وأنا بعصاقيلي كأني دعاية محلول الجفاف وجلست بعيد عنها على أحد الكراسي وقلت لها يا ريتا وين ودك نروح شهر العسل ..أمريكا (كودهم عقب 11 سبتمبر يجلدونها لين شافوها ويبردون حرة قلبي ) ولا جنيف ( كود يذوب الثلج من ريحتك وشيافتك ) ولا ماليزيا …
ريتا : لا وشوله نسافر نطير قروشنا ونضيعها على غير سنع فهمني وشوله .ولا بس تقليد ..
أنا : يعني وين تبيننا نقضي شهر العسل ..( الله يلعن عسل وراتس ) ثانيا الله منعم علينا الحمدلله عندك مليون ..
ريتا : وش مليونه أعوذ بالله من عيونك على شوفة عينك مية الف بلعتها أنت ومية الف تكاليف الشقة والفرش ..ومية الف للعرس ..ومية الف لذهبي ..والباقي دخلت أحد صناديق الاستثمار ….
أنا : طيب وشهر العسل ..أنا بعد كتب الكتاب بغيت أطلب من عمو مرعي أنه يخليني أكلمك ونتفاهم حول هالمسألة بس خفت أنههم يقتلوني …هالعرس مدري وشلون صار كله على بعضه ..الا تعالي هنا علميني كيف جبتي رقمي في من سيربح المليون ..
ريتا: مدري تبي الصدق انا معطيتهم رقم واحدة من صديقاتي بس مدري وشلون طلع رقمك …هاه كأنك ندمان انك تزوجتني قل الصدق اعترف …
أنا : لا والله بالعكس ..طيب نرجع لشهر العسل وش رايك بدبي ولا البحرين ,يالله جدة ومنها ناخذ عمرة ( و أغطسس في موية زمزم عسا بعض هالشيافة تروح ) ..
ريتا : لا لا لا مابي ولا أقول لك أنا نفسي اروح الشرقية ..يالله نروح الشرقية .ما رحت لها من يوم كان عمري 10 سنين ..
أنا : خافي الله فيني احنا في شهر أغسطس جعلتس تطسين في نار جهنم ..والشرقية وش ناوية عليه ناوية نفطس في هالحر والرطوبة الحين نطلع من فرن الرياض الى الى قدر الشرقية المضغوط … الشكوى لله .خلاص نروح الشرقية ( على الأقل الواحد يملي عيونه ويكحلهم ببنات الشرقية هم وسمارهم وعباياتهم المخصرة ) ..خلاص بكرة انشالله نمشي عقب العصر ونسكن في فندق الميريديان … ونآخذ لنا جناح ..
ريتا : هو هو هو وجع أنا أسكن في فندق هذا اللي ناقص …
أنا: أقول يالليدي ديانا وين تبين تسكنين أجل …
ريتا: شقة في الثقبة ..أذكر يوم نروح أبوي ودانا هناك ..
أنا : انتي صاحية شقة في الثقبة ليه التعذيب واللي يرحم والديك ..وش نسوي هناك …اذا الميريدان مو عاجبك عندهم شقق مفروشة على كورنيش الخبر صح أغلى شوي من الثقبة بس على الأقل الواحد اذا صحا من النوم يصبح على البحر مو عذاب في السرير وعذاب عند الدريشة…
ريتا : أنت تحب المصاريف شكلك على الفاضي ..وش تفرق عن الثقبة عن كورنيش الخبر مو كلهم شرقية ..ليه ندفع أكثر واحنا قادرين ندفع اقل فهمني ..التعب على البنزين ..
أنا : لا كذا والله ما يصير هذا تعذيب ..يابنت الناس أنابادفع الفرق الا باتحمل تكاليف الرحلة .كلها بس نسكن على كورنيش الخبر كل شي الا الثقبة والله حرام ضربتين في الراس توجع ..
ريتا : الله أكبر الحين تكاليف الزواج علي ..ودافعة لك مهر والحين جاي تقول علي تكاليف الرحلة ..توها مواريك بدت تطلع عند الفساد …وين شهامتك ليه ما قلت لا مابي مية الف مهر أنا ابيها هي ..
أنا : يا الهي أنا وش سويت …أنا اصلا ما أعرفك ولا كنت أفكر في الزواج ..بس طب علي ابوك وقبيلته بسبب برنامج من سيربح المليون الله لا يعافيه ولا يجازيه الا بالخير…..
ريتا : لا والله ترى ما أحد طقك على يدك اذا تبي تطلق طلق بس رجع لي فلوس لاتنسى أنك موقع ورقة أنك مستلم مية الف ولا نسيت ..
أنا : ما نسيت ..الله ينكد عليك وعلى ابوك وعلى اهلك كلهم وعلى جورج قرداحي الف مرة …تبين مية الفك أجل اصبري ساعتين واجيبهم لك وافتك منك وأروح أرقد عند أهلي اصرف …..
وأطمر في تالي الليل ,اروح لصديقي ابو سند ..واصحيه من عز نومه …ويفتح لي الباب وهو ببيجامته ..
ابو سند : حيالله العريس ..وش جايبك هالحزة لا تكون بس ….. لا يهمك ترى عادي تصير اول الأيام الماكينة تخبط أنا عندي كم حبة فياجرا ..لا تحسب أني احتاجهم .. بس أحيانا الواحد وده كذا يمدد اللعب لاشواط أضافية ..
أنا : م ابي منك لا فياجرا ولا ابي خرابيط ..الله يلعن من اخترعها ..اسمع متى تقدر ترجع لي فلوسي ..نويت أطلق
أبو سند : وجع عسا ما شر تطلق الليلة ..ليلة الدخلة أكيد هذي عين صابتك أنا اقول تعوذ من أبليس..
أنا : أي عين يا شيخ والله أن شغالتنا أحلى منها ..وابرك ..وش شغالتنا أنت يابوسند بخشتك جنبها تصير مملوح .. وفوق ذا كله معاير أنا صارفة عليك وأنا دافعة لك مهر ..ومن هالحكي ..
ابو سند : الله يعينك تحمل بس خذها من واحد متزوج قبلك بست سنين مالك الا الصبر..
أنا : أي صبر واللي يرحم والديك ..هذي ابليس ما يقدر يصبر عليها ..يتوب ويستغفر الله و لا يقابل وجهها علشان يوسوس فيها ..هاه متى تقدر ترجع لي فلوسي….
أبو سند : والله يا عبدالعزيز مدري وش اقول لك أنت قلت لي استثمرها لي وانا لقيت لك مشروع بيربحك ملايين بصراحة..وش ملايين الا بتصير انت والوليد بن طلال راس براس …
أنا : مابي ملايين ولا ابي أنافس الوليد أنا افتك من هالشيفة رجع لي فلوسي الله يخليك ..
ابو سند : بصراحة يا عبدالعزيز مدري وش اقول لك أنا شريت بفلوسك وفلوس كم مستثمر ..قطعة ارض انشالله بعد كم سنة بتوصلها الكهربا والموية …الحين المتر بعشرة ريال بس بيصير بالف ريال وقتها ..
أنا : وين هالمخطط انشالله .. ومتى انشاءالله بتجيه الموية والكهرباء …ولا تقدر تدبر أحد يشتري حصتي ..
ابو سند: بصراحة هالقطعة 137 كيلو شمال الرياض يعني بين الرياض والقصيم ..وعلى كلام مصدر موثوق بتوصلها الكهرباء والموية بعد حوالي 30 سنة والهاتف يقولون انشالله بعد 25 سنة ..يعني لاتخاف ..وبالنسبة لحصتك بصراحة يا ابو سعود …أنا مالقيت أحد يشتري حصتي علشان يشتري حصتك …الله لا يجازي من دلني على هالارض بخير …
أنا : طيب والحل ..وش السواة معها ابي مية الف ريال علشان افتك من هالعلة .وأهلي مستحيل يعطوني شي علشانها وش اسوي …
أبو سند : يابن الحلال اصبر وتوكل على الله عسا أن تكرهوا شيئا ويكون خيرا لكم ….ارجع وأنا أخوك ادع الله نلقى واحد يستأجر الأرض بس ويسوي عليها استراحات ..على فكرة نسيت أقول لك أنها تبعد عن اقرب طريق مزفلت 30 كيلو …يعني اذا تخبر ناس من هواة البر دلهم عليها….
وساعة ما فقدت الأمل وأدركت بحقيقة الأسر رجعت ..للشقة …ودخلت على المقرودة ( الله أعلم من طلع المقرود فينا ) ودخلت عليها وقلت لها ..خلاص يا حياتي الثقبة الثقبة اصلا الواحد في شهر العسل يبي الهدوء والراحة والاستجمام ..بس يالله ننام بسرعة علشان بكرة ورانا سفر لازم ارتاح وانبسط علشان أعرف أركز في الطريق…..وثاني يوم العصر طلعنا للشرقية وطول الطريق صمت بيينا بس مشغل شريط محمد عبدالوهاب من غير ليه ..ووصلنا للشرقية ورحنا للثقبة ولقينا شقة غرفتين وحمام بمية ريال في اليوم ..وأخذناها الحمدلله تنكدت على الآخر .. المزيونة ما تبي تروح الراشد ..ليه تقول الراشد شبهه وتخاف الناس يفهموننا غلط ويحسبونها خويتي ..( في أحد مقرود يتعرف على هالاشكال ) طيب نروح للكورنيش ..تقول لا رطوبة وهي ما تحب الرطوبة ..طيب نروح فؤاد سنتر ..تقول عوايل و تخاف الحريم اللي هناك يجلسون يطالعون فيني …صاير جدولنا نقوم الصبح أروح أجيب فطور طعمية وفول .ومدري ايش ونجلس في الشقة الى المغرب نطالع تلفزيون بعدين نتمشى في السيارة ما ننزل ويالله يالله يوم بغت تتمشى وافقت نروح كورنيش الدمام ..و اللي يضيق الصدر ويجيب الاكتئاب العشا ..الناس يتعشون في الميريديان ولا السنبوك ولا بابا هباس اللي على الكورنيش و لا تشيليز أقلها بيتزاهت ..بس ست الحسن والجمال تصر على تعذيبي تبون تعرفون وشلون أعطيكم مثل,ثاني يوم وصلنا وفي الليل حوالي الساعة 7 ونص لقيتها تقول لي
أنا : يا حبيبتي ( الله لا يقوله أني احبك ) وش تتعشين تو الساعة 7 ونص ..وش معجلنا على النوم ( من أول انتظر الزواج علشان أنوم ثم أنوم بس عقب ما شفتها كرهت النوم كله ) .. تو الناس مصلين العشاء .خل نمشي ونتمشى الا وش رايك نروح الراشد نتمشى شوي ونشتري لنا آيسكريم من هناك ..وتشترين لك هدايا لك ولأهلك بعد واشتري لأمي بس هدية ..
ريتا : وشو أنت يلعن أبو ابليسك ما تغار علي ما تخاف الشباب اللي هناك يغازلونني ..ما عندك غارية وش أنت مخلوق منه ..لو غيرك كان خفت علي من الهوى الطاير ..
أنا : ( والله أني أخاف على الغربان منتس ) لا يا حبيبتي وش يعاكسونك هم شباب الشرقية ما عندهم نظر يعني ولا بنات الشرقية عافهم الزين ..قصدي هم شباب الشرقية مالين من عمرهم ..علشان يقربون لك وأنا معك ..
ريتا : المهم أنا قلت لك ابغى نروح نتعشى علشان نروح الشقة اصرف لنا من اللفلفة والخساير ,ابوي موصيني ما اجيب هدايا لاحد وأنت بعد لا تجيب لآمك هدية ..
أنا : شوفي العشا وقلت موافق عليه ..والراشد مو لازم بس هدية لأمي لازم هذي أمي وحقها عليها كبير والله
ريتا : اقول مافي هدية لأمك الحين الراتب علي والعرس علي وكل شي علي وأنت بس ما ظهرت مراجلك الا يوم هدية أمك ..المهم يالله ودنا اقرب محل شاورما …
أنا : نعم وش تخربطين أنتي اثنين يفترض أنهم عرسان وتوهم عرايس وثالث ليلة لهم يتعشون شاورما في شرع من هذا ..يابنت اذا بتخربينها خربيها صح ..قولي مطبق بروستد ..ولا اقول لك تميس وفول وش رأيك أمس غربلك الله متعشين رز بخاري ..عرسان يتعشون رز بخاري ودجاجة شواية ..والله أني مستحي مافي المحل الا أنا وهنود وافغان وتقولين هالمحل هو اللي تذكرينه من يوم جيتي مع ابوك ..واليوم شاورما …ما يصير والله .
ريتا : يا أخي أحب الشاورما افهمني ..قدر مشاعري ثانيا توفير والله البروستد زين بس مشكلته بعشرة ..
أنا : ياربيه اسكتي بس الله يلعنك يا جورج …..طيب يا حرمنا المصون مافي مطعم تذكرينه من ريحة مرعي يوم جيتي معه قبل 13 سنة يوم عمرك 10 سنين ..
ريتا : لا ودنا أي مطعم كلهم 3 ريال في جدة تصدق عندهم مطاعم يبيعون الشاورما باربعة ريال حرامية أهل جدة .
أنا : طيب اسكتي بس خلي أهل جدة في حالهم الله يخليك ..ورحنا لمطعم وجانا اللبناني وطلبت منه اربعة شاورما واثنين عصير كوكتيل ..
ريتا : وقف وقف ليه عصير كوكتيل البيبسي وش فيه هاه قل لي
الجيرسون : ولو يا مدام الكوكتيل أطيب كتير من البيبسي …أنتي الهيئا ما سمعتي عن الكوكتيل بتاعنا شي بياخود العئل .. ( ويهمس في أذني : يئطع حريشك شو هالمدام اللي عليك أنت متزوج شو )
أنا : أي والله يا حياتي أني مشتهي كوكتيل ..ياهو الكوكتيل حقهم لزيز بشكل …
ريتا : لاحول يا حبك للمصاريف ..طيب بكم الكوكتيل …يا معلم ..( قمة الرجولة شوي وهي تسوق عني )
الجيرسون : الكوكتيل الكبير بخمسة ريال ..الصغير ب3 ريال بس ..الهيئا بدكون حجم كبير مش هيك .
ريتا : لا يا شيخ اقول هات اثنين صغير بس ..واستعجل علينا الشاورما وحط فيهم شطة ..كثر شطة ومايونيز ..
أنا : بس انا يا حياتي ما أحب لا الشطة ولا المايونيز ..ليه تقولين له يحط في كل الشاورما شطة كان قلتي ثنتين بس
ريتا : يا غبي الشطة والمايونيز أن كثر منهم ماراح تزيد على قيمة الشاورما يعني عادي ناخذ اكثر شي باقل سعر ممكن ..لا تصير غشيم يلعبون عليك ..هالاشوام ..
أنا : توهم بيلعبون علي هم أصلا وهقوني في مصيبة لا باركت فيك يا جورج أكرهك ليوم الدين
الجيرسون : ليكون الشاورما وعصير الكوكتيل اتفضلوا ..الحساب بيطلع هيك 18 ريال بس
أنا : خذ هالعشرين ريال وخل الباقي لك .. وشكرني الجيرسون …..وراح
ريتا : هيييه يالمبذر وش خل الباقي لك يا حاتم الطائي رجع الريالين قبل ما تحرك سيارتك …
أنا : يا بنت الحلال هي مرة في العمر أول مرة أطلب من مطعم ومعي بنت اذا افترضت انك بنت يعني خليني انفخ نفسي شوي …ثانيا الله اكبر كلها ريالين ..
ريتا : مالي شغل يا تجيب الريالين يا والله أسوي لك فضيحة مو كفاية أنك ماخذ مني مية الف ريال مهر لك جعلك الماحي …والحين توزع القروش على اللي ما يسوون
أنا : ياربيه ذي المية ألف بتطلع من خشمي خلاص انا ارجعها لك ميتين ريال بس لا تحرجيني خلاص قلت للرجل خذها لك الحين وش اقول له جب بهم لي بطاطس ولا كاتشب ..
ريتا : والله العظيم أن ما وقفت وناديته وخليته يجيب الريالين قسما بالله لا الم عليك الثقبة كلها وافضحك بين الدنيا أنك ماخذ مني مهر مية ألف ريال ..هاه وش تقول …
أنا : طيب طيب …….وأنزل الدريشة وأدق بوري ويجيني الجيرسون وهو فرحان ..
الجيرسون : ائمروا بدكون شي تاني عنّا سلطات ومئبلات كتير حلوة والله وعنّنا ايسكريم بيجنن يا مدام ..
أنا : خلك من المدام ..احم احم لو سمحت الريالين الله يخليك ..واخلص علينا
الجيرسون : شو شو بدكون ..
أنا : مو باقي لنا من شوي ريالين وقلت لك خلها لك ياخي كنت أمزح معك أبي اشوف ردة فعلك ..
الجيرسون: من جدك بتحكي يا أبو الشباب ..ولا عم بتصوروا الكاميرا الخفية ..شو ئصتكون ..
أنا : لا والله من جد جب الريالين صدقني مو بيدي لو بيدي ..كان اعطيك الف ولا أكون في هالموقف
الجيرسون: امسوك ريالينك الله الغني عنهم ..أنا كنت بائول يالله هالامير الطيب شو وئعوا مع أم صوت بشع بس الهيئا كلكون لايئين على بعض يالله خود ريالينكم وفارئونا ..
وخذيت الريالين على مضض ورحنا للشقة من الساعة 9 وجلسنا نطالع الأخبار ..و ما صدقت على الله نرجع للرياض ويوم رجعنا للرياض لقيت بنت خالتي مرسلة لي اييميل تعزيني فيه على الزواج من هالقشرا ..وتعطيني نصايح من ضمنها ..اذا بلاك الله بشيفة فتخيل أنها أحلى قمر ..وحطها في راسك أنها سيندي كروفرد ….طبعا سيفت الايميل يمكن احتاجه في المستقبل …وطلعت من النت وذيك الليلة قررت أسهر مع الربع ..وتناديني شيخة الزين ..
ريتا : وين انشالله وين بتطلع في هالليول هاه قل لي اللي يشوفك ما يقول عنك متزوج …
أنا : باسهر مع ربعي مشتاق لهم بصراحة ثانيا وش اجلس هنا أسوي الأخبار ولله الحمد شفتها وحفظتها وش بعد .
ريتا : يلعن ابو شكلك ارقد نم من يوم أخذتك وأنت ما عمرك رقدت لا يكون بس ما تعرف ترقد ..هاه ..
أنا : أرقد آها الا أعرف بس مالي نفس هالأيام الواحد يتذكر الآخرة وش بيسوي عقب الموت ..الدنيا مواعظ.
ريتا : أقول ترى ما دفعت لك مية الف علشان تعاملني كذا تراني امرأة معرضة للفتنة … واغراءات الدنيا واجد..
أنا : يا ذي المية الف تراك ذبحتيني بها ..ما شرطتي علي في العقد عدد نومات معينة ..ثانيا وش مستعجل عليه خليني اجمع قواي واتعود عليك بعديها ابشري بسعدك أن بغيتي صباحا ومساءا وفي الظهيرة بس الآن أحس اني ماني مركز معك…
ريتا : أقول يا والله اذا ما عقلت وجيت ترقد هالليلة زي الناس أني لا افضحك بين هالعالم ..مابقى الا انتظرك تتعود علي وش يصبرني أنا قدر مشاعري واحتياجاتي ..ورغباتي ..وغرائزي أنا امرأة كلي غرايز …
أنا : طيب أوعدك اذا رجعت من عند ربعي أني ارقد بس على الأقل استمتع بشي في هالليلة مو كلها عذاب..
ريتا : ما علي هالحين يعني هالحين ماني فاضية لك متى خاطرك يروق وترضى ويجي في بالك …مافي طلعة ومفاتيحك معي يعني مافي طلعة …يالله اسبقني لغرفة النوم فيما أغير ملابسي واستعد لليلة …
ودخلت غرفة النوم مكتئب ونفسيتي زفت وأحاول استجمع قواي يعني أفكر بطرق مثالية تخليني أتصرف زين ..بديت أقول في نفسي ماهي شينة مرة يعني نص ونص ..ثانيا بنسكر النور ولا عادنا شايفين شي ..وصوتها شين لا موب شين بس بصراحة ما يأهل علشان كذا باحط قطن في اذني ….ويدها حرشا لا ياربي مو ذيك النعومة كل ما جت بتمسك يدي باوخرها عنها ..وبما أنها أول مرة بس بنسوي وضعية واحدة مالي دخل فيها انشالله تنفتن أنا وش علي ..وأنا أهوجس الا الباب ينفتح وتقبل ست الحسن ..وهي لابسة قميص تدعي أنه حق نوم ..كمومه الى أطراف الأصابع والوانه تحوم الكبد أخضر على اصفر على زيتي وفي الأخير بنفسجي ..وفوق ذا كله لابسة شراريب رياضة اديداس ..ولا عطر ولا يحزنون ولافة شعرها كانه تبي تتسبح …..المشكلة القميص الى نص الساق والشراب طويل وحالة قرف وقتها حسيت بعجز يخترق كل أنحاء جسمي ..وتجي يمي ..
ريتا : هاه حبيبي بالله قد شفت واحدة بجمالي مو مصدق عيونك صح
أنا : بقوة ماني مصدق عيوني ..أحس اني بيغما علي ..الا بتجيني سكتة قلبية من زود الفرحة والانسجام ..
ريتا : أجل يالله ورني رجولتك ..اغتصبني عذبني سو أي شي أنا الفريسة وأنت الذئب البشري ..افترسني يالله .
أنا : يا شيخة مدري ليه وأنتي بجنبي أحس أن الصيام سنة حلوة والواحد ذنوبه تطلع عليه اذا كبر مدري أحس ودي صراحة اقوم اركض في السطح الى أن يطلع الفجر أو أدوخ واطيح مدري ليه ماهو حبا في الرياضة ..ولا شي بس مدري …ياليتك تفهمين وضعي ..
ريتا : يعني ما راح تفترسني ..طيب اذا أنت زوجي وما راح تفترسني من يفترسني لازم يعني تخليني انحرف وابحث عن ملذاتي في الحياة هاه ..
أنا : أنتي بحل يا بنت الناس الله يحللك ويبيحك أبد متنازل عن حقوقي وانشالله بيغفر لك ذنوبك بس دحينا مافي شي الجماعة اللي تحت يقولون شطبوا مرونا باتسر .. ويرن جوالي و اقوم برد عليه .وريتا تصارخ من هي هاه من خطافة الرجالة اكيد مسوية لك عمل يكرهك فيني ..وأرد عليها هذا صديقي سمير واحد من المدينة كان معنا في الكلية .. ويالله يالله صدقتني وطلعت للصالة علشان أكلم سمير لأن الله جابه في وقته مدري ليه ابي اصيح على واحد واشتكي له حالتي
سمير : يخرب بيتك يا عزو ايش الحركات دي وتقول لي أنت ما راح تتجوز قبل 10 سنين هاه الباين انك غرت مني
أنا : أي زواج يابن الحلال الله بلاني بصتيمة … ما قصوا لك الشباب وشلون تورطت في هالزواجة ..اسكت بس يا سمير ودي اصيح ..الا أنت وش اخبارك تزوجت بنت عمك سميرة ورجعت للمدينة
سمير : اسكت يا شيخ أنا في الرياض دحينا لقيت شغل هنا والمدام قبلوها بجامعة الملك سعود …علشان تكمل دراستها ..بس يا شيخ الجواز بسطة ..ولا اليغمش بالزيت حاجة تاخد العقل …اقول لك سر البنت سميرة لو ماهي بنت عمي كان قلت أنها رقاصة ستربتيز ..البنت مضيعة نص مصروفها في محلات اللانجري وكل يوم حاجة مشخلعة والله لما ابص فيها ..تجيني طاقة غريبة ..
أنا : الله يهنيك يا شيخ ( وتطق في مخيخي الايمن فكرة رهيبة ) اقول لك يا سمير طلبتك طلب قل تم ..
سمير : امرك يا قمر ..أنت بس اشر بيدك
أنا : شف ابي زوجتك سميرة تاخذ هالصتيمة زوجتي وتوديها لكل محلات اللانجري اللي في الأسواق وتشتري لها كل شي مشخلع عل وعسى يزينها شوي ..الله يخليك خلها تتوصى في الاشياء الخفيفة الشفافة يعني أي شي ما يستر ..كل الألوان ..
سمير : خلاص يا حبيبي ولا يهمك اعتبركل شي في الاوكيه … بكرة انشالله أمرك و ناخد سميرة وجوزتك ونحطهم في السوق ونرجع لشقتك نسولف ..
أنا : يا سمير واللي يرحم والدينك احك حجازي على كيفك بس جوزتك وشي شايفني سنجاب ولا محل مكسرات اسمها مرتك زوجتك ..بعلتك أي حاجة ..
سمير : طيب يالشروقي وأنت تدقق في كل كلمة اقولها ..يالله بكرة كمل تريقتك بس حبيت ابارك لك بكرة أخذ منك الوصف أوكيه ..يا حبيبي يالله تشاو … ..واستغل الفرصة وأنوم في الصالة المهم جا ثاني يوم ومرني سمير وزوجته سميرة ورحنا حطينا سميرة والصتيمة ريتا ..في العليا ورجعنا اخذناهم في الليل ..وفي آخر الليل مستعد تدخل علي واحدة مشخلعة ..يمكن يكون لها تأثير قوي وتشغل مراكز الاستثارة اللي قبل ما أعرفها كانت من يوم احط الريموت على قاة ال بي سي الا هو متأجج …المهم قلت لريتا يالله ورانا نوم الليلة ..بس البسي من اللي شرته لك سميرة …تشخلعي ..
ريتا : يوه يا عبدالعزيز استحي أنت لو تدري وش هي شارية لي كان تستحي تلبسه و تستحي تشوفني فيه ..
أنا : يا بنت الحلال مابين الرجال وزوجته حيا ابد ابد وأدخل غرفة النوم ..مدري ليه جاني أحساس ان هالليلة غير ..وداخل غرفة النوم بكل قوة وأنا لابس طقمي المفضل صروال سنة …..وتفتح المزيونة الباب وياليتها ما فتحته ..نفس طقم أمس بس الألوان أحمر وبرتقالي و بيج وبني …والشراريب هالمرة ( نايك ) ..ساعتها صرخت بأعلى حسي لا يا حسافة التشجيع وكل الآمال انهدت بقوة وطمرت للصالة بكل قوتي ودقيت على سمير وكلمته .وأنا معصب
سمير: أهلين عبدالعزيز كيفك أنشاءالله كل حاجة مشيت تمام التمام ..
أنا : اقول عظ على شحمة وناد لي زوجتك بسرعة لا أجي اتوطا في بطنك …
سميرة : ايوة خير يا عبدالعزيز اش بك شايل طاجن ستك وشوي وتاكل سمير ايش فيه ..
أنا : الحين يا سميرة مو معطيك بيدي الفين ريال وقلت لك لا تخلين شي مشخلع في الأسواق الا وتجيبينه لريتا وراك تسذا هذا جزاي متعشم فيك خير واقول ما يجيبها الا سميرة والله طلعتي يا سميرة خربوطة..
سميرة: ازاي كذا حرام عليك يا شيخ ما تقول كذا والله يا عبدالعزيز كل اللي شريتوه لها عباره عن خيوط في خيوط اسمك حاجة عرضها 3 ملم لا وشفافة كمان ..والوان اشي بنفسجي واشي وردي واشي أسود ..بس فهمني ايش صار ذوقي ما عجبك انتا كنت تبغا ايش بالضبط علشان أقدر افهم ..
أنا : أي خيوط وأسمك شي 3 ملم يا سميرة أنا ما أشوف الا شيفة ولابسة ستارة وألوان مدري وشلون تقولين احنا في الكونجو ..
سميرة: يا عبدالعزيز أنت روح اسئلها شوف هي ليه ما لبست الملابس اللي احنا اشتريناها ..واتأكد بنفسك
وبالفعل رحت لها ودخلت عليها واسألها بكل قوة وصرامة …ريتا ووجع وين الملابس اللي شريتيها أنتي وسميرة اليوم العصر …ليه ما لبستيها زي ما قلت لك ..
ريتا : هو هو والله العظيم لابستها أجل وشوله شاريتها …
أنا : لابستهم وين ما اشوف الا هالستارة اللي قدامي …صايرة كأنك الوان أندية القصيم ..
ريتا : الله يفشلك تحت تحت لابستهم تحت …شفت أني أسمع الكلام ..عسا بس يفيد معك بس …
أنا : وطواعين ومن قال لك البسيهم تحت هم اصلا مصلحين علشان ينلبسون فوق فوق مرة ولا يكون فوقهم أي شي
ريتا : لا الله لا يقوله اصلا لو تشوفهم كان تنقد علي …وش البسهم بروحهم ..
أنا : أنا ابي اشوفهم كل رجال في الدنيا يبي يشوف زوجته كذا زوجته تصير املح غير أن هالملابس تاثيرها قوي على مراكز التحكم والقيادة وتزيد الرغبة في النوم ..
ريتا : لا عبدالعزيز كل شي الا تسذا أبوي لو يشوفني لابسة كذا كان يقتلني غير كذا تبيني استبرد وشوله بس لا يا عبدالعزيز مو كذا ..
أنا : غربال يطيرتس أنتي وأبوتس وش بيدريه من بيقول له اصلا هو قاط معنا يعني هو ووجهه بيتحكم فينا دنيا و آخره ..ثانيا يا قلبي يا زوجتي العزيزة اللي صمموا هالملابس حطوا في بالهم راحة الزوجين وكذا يالله عاد افهميني..
ريتا : لا يعني لا والله استحي وش اللي البسهم بروحهم سميرة ذي مرة صديقتك قليلة حيا تشتري لي اشياء ما تسوى والمشكلة غالية وكل ما قلت لها لا تقول جوزك عاوز كذا هو موصيني ..
أنا : اقول يا خسارة المشوار والمصاريف أجل ملابس الشخلعة تنلبس تحت ستارة ..انشالله وتبيني أرقد ابشرك مركز القيادة يعلن للجمهور الكريم أنه لن يستقبل الزوار الكرام ولن يقوم باي جولات تفقدية لمدة سنة من الآن ..يالله عن أذنك بروح انوم في الصالة لأني لو نمت هنا باتعذب على الألفين اللي طاروا في الهوى شاشي وأنتا ماتدراشي ياقدع
ورحت الصالة ونمت متغطي بالشرشف وفي داخلي بركان يغلي من القهر والحزن وضيقة الصدر و كل خاطري أنوم نومة زي اهل الكهف ..مير من كثر الهواجيس ما جاني النوم الا بعد الفجر وتوني في غلقة النوم الا وتلفون الشقة يرن وأرفع السماعة ( ما يتأدب من عقب تليفون النحس ) ..
أنا : الو مين متصل في هالوقت …
المتصل : عفوا أخوي شكلي غلطان آسف على الازعاج ..آسف …..ويسكر التليفون وبعد دقيقة يرجع التليفون يرن
أنا : الو مين معاي تراكم أزعجتوني الواحد ما يصدق على الله يجيه نوم …
المتصل : أخوي آسف على الأزعاج بس ما أدري أحصل السيدة ريتا مرعي …هنا
أنا : وطواعين وش يدريك عنها وعن اسمها ايه موجودة هنا الله ياخذ روحها بس أنت من ووش تبي فيها ..
المتصل : معاك البنك السعودي الأمريكي ..الأخت ريتا مرعي مشتركة معنا في احدى صناديق الاستثمار وبصراحة ربحت معنا سيارة بي ام دبليو 745 آخر موديل لأننا كل ست اشهر نسوي سحب على أحد المستثمرين وطلع حظ السيدة ريتا مرعي في السحب هالمرة ..ممكن نتكلم معها ..
أنا : وشو ريتا ربحت بي ام دبليو 745 أخر موديل ( حلم حياتي وأمنية عمري اركب بي ام وشلون عاد اذا سقتها ) طيب لحظة شوي يا عمي ..قصدي يا أخ مدري بس اصبر شوي
وأدخل غرفة النوم وسبحان مبدل الأحوال وأبدل تكشيرتي بضحكة شوي وتشق وجهي …وتحاملت على نفسي وقربت من خدها وبستها على خدها لأول مرة ..وصحت وقالت لي هو عبدالعزيز وش صار .
أنا : قومي يا حياتي في تليفون لك ينتظرك …ياليت بس يا قلبي تقومين تردين على التليفون
ريتا : تليفون لي من أمي ولا ابوي ولا أحد حريم أخواني ..بس مو عادتهم يتصلون في الصبح ..
أنا : لا يا حبيبتي هذا رجال وبمعنى أخر موظف بنك طال عمرك يبي يكلمك بشأن استثماراتك
وتقوم ريتا ترد على التليفون وبعد كم دقيقة تقول لي أن الموظف يبي يتكلم معي
أنا : نعم أخوي آمر وش بغيت …
المتصل : لو سمحت يا أخوي أنا قايل لك عطني ريتا مرعي مو مزنة بنت مشخص .
أنا : الله يسلمك ويطول في عمرك ..أنت من شوي كنت تتكلم شخصيا من مدامتي ريتا بنت مرعي …
المتصل : يا أخوي قالوا لك اللي قدامك غبي ما يعرف صوت اللبنانيات عن صوت السعوديات …يا اخوي اذا الرقم غلط علمني مو تلعب علي
أنا ك يا حبيبي أنت مو فاهم الموضوع أنت لو رجعت لمستنداتك بتلقى الاسم الكامل .للمذكورة ترى بيني وبينك حتى محاكيك كل بها كم مقلب اسمها ريتا مرعي بن نجر بن طغفش ..بالله وين العرق اللبناني يظهر له أي اثر .
المتصل : ههههههههههههههههههههه أجل بن نجر ولاعبين عليك يالضعيف على العموم بصراحة ما اقدر ارجع اكلم المدام بنت نجر ههههههههه ياليت تمرون فرعنا الرئيسي أي يوم علشان تستلمون أوراق و مفاتيح السيارة الا قبل ما أسكر يا أخوي أخت المدام على كذا اسمها باسكال ههههااااااي ……… طوط طوط طوط
ريتا : الحين وش يبون بي البنك ما فهمت وش السالفة لا يكون خسرت فلوسي اللي عندهم بس …
أنا : لا وش خسرتي العن ابو حظتس ليت شكلك ربع حظتس المهم ربحتي سيارة بي ام دبليو موديل السنة قيمتها تقريبا ربع مليون ريال بالقليل
ريتا : وش ابي بالسيارة عاد باخلي ابوي يبيعها لي .واستفيد من قيمتها
أنا : لا هو وش تبيعينها واللي يرحم والديك معجبتك سيارتي هالمهكعة …ثانيا أذا ريتا بنت الشيخ مرعي ما ركبت بي ام دبليو من يركبها هاه
ريتا : لا ما ادري لازم أشاور أبوي وأخذ رايه يمكن واحد من أخواني يبغاها ولا شي
أنا : لا يا حبيبتي أنتي و أنا أولى بها ولا تخافين خليها باسمك اضمن لك ..والله من جد من يومي في اللفة وأنا أحلم كل ليلة بسيارة بي ام دبليو …ودي اسوقها لو مرة في حياتي ..تكفين قولي تم وخلينا العصر نروح للبنك ونستلم جائزتك .
ريتا : طيب اللي تشوفه أنت رجلي ( رجلي = زوجي مو ساقها ) هاه تبي تفطر هالحين ولا لا
أنا : أنا يا حياتي اصلح لك الفطور بفسي كم عندي من ريتا ..
ريتا : لا هو ما وصلت عاد أن الرجال يصلحون الفطور لزوجاتهم أنا بأصلح الفطور بنفسي تبي اصلح لك شي …
أنا : أي والله ياليت كورن فليكس وكوب عصير برتقال واممممم سلطة فواكه
ريتا : آها بس مالك الا مراصيع وقهوة واقط … ( المراصيع = عبارة عن تاوة يقومون حريم من أول ويرمون عليها عجينه لين تستوي والأقط بقرها يجوعونها وينشفون ريقها ثم يحلبونها يطلع حليبها قطع متجمدة ومالحة ) .. الله يكرم النعمة ما أواطن هالاشياء بس لعيون البي ام تغصبت كل شي ..وجا العصر ولبسنا علشان نطلع نروح للبنك الا وجرس البيت يدق وافتح الباب والقى زين الحلايا مرعي الكبير جاي راز خشته .
أنا : هلا والله بعمي كيفك طال عمرك انشاءالله بخير وعمتي خضرة وشلونها والعيال كيفهم انشالله بخير والله يا عمي البيت منور بس لازم أنا وريتا نطلع وش رأيك تنتظرنا لين نرجع ما راح نطول انشاءالله نص ساعة وراجعين ..
مرعي : وين بتروحون خذوني معاكم ترى من يوم أعرستوا وأنا ما رحت ولا جيت معكم ..
أنا : أبد الله يسلمك طال عمرك ( لا انشاءالله ) في واحد من زملائي جاله ولد فحبيت أنا وريتا نروح نبارك له ولزوجته في المستشفى وبنشتري لهم علبة حلاو ونزورهم عشر دقايق ونرجع …
مرعي: أجل زميلك جاله ولد وبتروحون تهدونهم حلاو وبترجعون زين أقول آها بس بتكذب علي يا قليل الحيا رايح تلعب على البنية وتلهط السيارة ما كفتك المية الف ريال …والله أنك طلعت ذيب ياهالورع الحضري..
أنا : هاه هو أنت دريت يا عمي والله لا العب عليها ولا شي بس أنا حبيت اسوق السيارة وقلت لها بتكون السيارة باسمها بس والله العظيم اسئلها حتى دفتر العايلة جايبه …
مرعي : شف أنت رجلها وأنتم تصلحون مع بعض بس دامها موافقة أنا لي شرط ..ما تركب السيارة الجديدة بروحك يعني يا هي تكون معك يا تنطم وتآخذ سيارتك القرنبع وتروح فيها لمشاويرك الخاصة سيارة بنتي بس لمشاوير بنتي يعني حالك حال السواق هاه وش قلت .ولا خذتها أنا يا سقتها يا بعتها ..
أنا : موافق موافق بس احقق حلم من أحلام حياتي واسوق بي ام دبليو آه يالبي ام كنت أحلم أن عندي سيارة بي ام وزوجتي اسمها يارا ..بس يالله جتني بي ام وزوجتي اسمها ريتا ..هي بالأسامي ما فرقت واجد بس في قلبي ماهنا وجه للشبه ..هاه يا ضيراط ( الضيراط = حيوان جعص يعايروننا به الشياب الشباب اللي مثلي بس وشو ووين ووش شكله ما احد يدري ) بتجي معنا ولا بتروح لبيتكم ولا بتنطق هنا ..
مرعي: هيييييه يا حليلك بس الا أنا أولكم الله لا يعوق بشر ريتا عجلي وأنا ابوتس .,انت الحقني تعالي افتح لي السيارة …
ورحنا للبي ام قصدي للبنك علشان نستلم البي ام وفشلنا الشين مرعي قام يفتح بيبانها ويقول ماشالله ويطقق على الكبوت الشين مو فاهم ان هذي بي ام بس من يلومه ثقافته وانيتات وسوزوكي ينقل فيها بعارينه …ويعصب علينا ويشتم في السيارة يوم مالقى شي ينزل به الدريشه يدويا ( صدق قمة التخلف )والله ما حز في نفسي أكثر من أن كل اللي في البنك يلعنون الحظ اللي عطا الصتايم وجه …حتى مدير البنك حسيت أنه لولا الحيا وأن مندوب أحد الجرايد جاي ولا رمي المفاتيح والاستمارة في وجهنا ولا ناولها الشين مرعي يدا بيد لا ومن زين الطبايع يضحك ضحكتة المعهودة هيييييييه …ومرت اليام وانا اسرق الوقت سراقة علشان أجلس جنب حبيبتي طبعا أعني البي ام وافتك من هالقراد اللي عندي فوق في الشقة وكم كان في نفسي اني ارقي البي أم في الشقة واخلي ريتا في الشارع ..أجل أحد يغسل سيارته قصدي سيارة زوجته اربع مرات في الصباح وفي القوايل في الظهر و في المغرب وفي الساعة 12 ليلا منها افرغ واعبر ببعض حبي للبي ام ومنها افتك من مقابل وجه ريتا …صحيح أني ما أقدر اطلع بي البي ام بروحي يعني لازم ريتا تكون معي بس شي أهون من لا شي يعني من يحصل له يركب بي ام ..وصح تجيني تريقة خصوصا اذا سووا تفتيش في طريق الأمير عبدالله يطلع لك شرطي أول ما يقرا الاستمارة ..يسئلك سؤال سخيف ..معازيبك أجل مسافرين ..لديرتهم وأنت تطلع خوياتك بالسيارة هاه…تجاوبه وأنت ابتسامتك شاقه وجهك والود ودك تصفقه ..ساعتها وش تسوي ..تقول له زوجتي يقعد هو واخوياه يكرونها ضحكة ..تقول ايه خويتي يبدا الغمز واللمز يعني يا تظبطنا يا بنعلم عليك الهيئة تقول متزوج لبنانية وكاتب السيارة باسمها بيبدون يشكون فيني وفي قدراتي …..وكله كوم اذا هي جت تبي تتفلسف قال لك كرامتها كزوجة ما تسمح لها وتنطط في وجه الشرطة أنا ريتا أنا زوجته والسيارة باسمي ..عندكم مانع …طبعا الشرطة من يسمعون صوتها يكملون ضحك ..قمة الأحراج ..ويبدون الغمز واللمز أنها كبر أمي ومتزوجها علشان فلوسها ..وبعضهم يستملح اذا جا بيرجع لي الاستمارة يقول تفضلي يا اخت ريتا …طبعا القصد انهم يفشلونني …وتتوارى الأيام والوضع يزداد سوءا الى أن صار في يوما ما لم يكن في الحسبان وفاض الفنجان عن حده …
مرة دق جوالي ,القى واحد من الربع فارس ( اسمه الحقيقي مصلح بس ندلعه في الشلة فارس نفس الشي نرفع مع معنوياته زي هاني ) وارحب به و اسئله عن أحواله خصوصا زواجه الاسبوع الجاي ….
فارس : يا بن الحلال خلها على الله الواحد مندوش في هالزواج ,توني راجع من سوق البشوت علشان يخبتون البشت اللي متسلفة من خالي .. ( الخبت بالضبط مدري وشو بس زي يا يقصرون يا يطولون البشت ) والحالة حالة.
أنا : يابن الحلال كلنا لها ..هالزواج زي الجحة مرعة قرعة ومرة حمرا …البلاا ما فيها على السكين
فارس: عاد يا بو سعود طلبتك طلب قل تم واللي يرحم والديك ..ترى مالي الا الله ثم أنت
أنا : اذا اقدر عليه من عيوني الثنتين بس أنت اشر من بعيد..
فارس : ابي اتسلف البي ام منك بس ليلة العرس تعرف ليلة العمر ودي اركب فيها بنت عمي ..واتكشخ بها قدامها وثاني يوم ترجع لك من الصبح يرجعها لك أخوي ….هاه وش قلت ..
أنا : بصراحة يا فارس مدري وش اقول لك ..طيب وش رأيك اغسل لك الكراون فيكتوريا وألمعها وخلها عندك أن بغيت شهر مو ليلة العرس بس ..
فارس : أي كراون فيكتوريا واللي يرحم والديك لو أبي سيارة خذيت صالون اهلي لا من جد ..ودي اركب البي ام اعرف انها عزيزة عليك وغالية بس تكفى أكشخ سيارة في عايلتنا لومينا …
أنا : ( ياربي اقول له ان السيارة لزوجتي ومانعتني اطلع بها بروحي علشان اسلفها للناس ماراح يصدقني ويعتبرني اصرفه ) طيب يا فارس خلاص بس اسمع باجيبها لك يوم العرس قبل صلاة المغرب وما عليك بانظفها لك والمعها وكل شي وباحطها لك في قصر الأفراح …واعطي المفاتيح لأخوك ..كم عندي من فارس في حياتي …
فارس : الله يسلمك يا شيخ فكيت لي أزمة مدري وشلون اشكرك بصراحة معروفك ما راح أنساه …
وتوهقت أنا وشلون اهرب السيارة يوم العرس لفارس يبي لها تخطيط ..وجلست احوسبها في راسي لين جا يوم العرس ….وتجيني ريتا بعد صلاة العصر تسئلني اذا بنروح لعرس مصلح ( فارس ) ولا لا …
أنا : لا طبعا ..وش نروح نسوي اشوف خيبتي الناس ينقون زوجاتهم ويختارونهم وأنا حظي راقد ..ابلش في ..ولا خليني ساكت اصرف ..
ريتا : ياربييه وأنت كل شوي بتعيد هالسالفة ..ثانيا وش بيضرك أنت تبارك لصديقك وأنا اشوف العروس وابارك لها ونطلع
أنا : ما تفهمين أصلا بيني وبينك لو بروح ما رحت بك ..ليه ناوية أدخلك عند الرجال وادخل انا عند الحريم …مو أنتي اللي دافعة مهري ..المية الف …البركة في زين الحلايا أبوك..
ريتا : أنت ليه كذا دايما تعاملني …ياخي كذب شوي حاول تجامل …تصرف مرة كأي رجل عنده كرامة خلاص الزواج تم وانتهى
انا : اقول روقيني خليني أشوف التلفزيون …وعلى فكرة بروح لبيت فارس بعد في تجمع الرجال علشان ابارك له وأرجع ..بروح بروحي فاهمة .
المهم تغافلتها وهي تتوضأ لصلاة المغرب .. وكنت مغسل البي أم العصر ..ومسوي نسخة مفاتيح للسيارة …وركبت السيارة وطيران لقصر العروس وعطيت أخو فارس نسخة المفتاح ..ورجعت للشقة ..ومسوي فيني النوم و مشغل التلفزيون على مسلسل بدوي اردني ….وشوي ويطق جرس البيت وأقوم افتح …والقى بواب العمار هريدي..
هريدي : سلامو عليكو ازيك يا عباعزيز بيه عامل اييييه …جيت ائولك أنا رجعت من الصلا مالئيتش سيارة المودام عند الباب اوعك تكون انسرئت ..
أنا : قصر صوتك الله يفضحك أنت وش دخلك بسيارة المودام انطم وانثبر عند بوابتك ومالك دخل بأي شي ثاني مفهوم.
هريدي: معليش بقه العم مرعي ..محرصني لما ما اشوفش السيارة ..أجي ابلغ المودام علشان لو كانت موجودة ..تئطم رئبيتك ..وان ماكنتش موجودة يبئا هي خرجت بيها ..
أنا : قلت لك قصر صوتك ولا لك شغل آه المودام خرجت بيها أنا وديتها للسوء وهي مش راضية ارجع بالسيارة لوحدي ئمت خدت ليموزين ..
وفجأة يطلع صوت ريتا وهي تسألني …من عند الباب .
هريدي : داهدي .. المودام هنا والعربية مش هنا يبئا لازم ائول ليها عشان تئطم رئبيتك … يا مودام يا مودام …
أنا : اسكت واللي يرحم والديك لا تفضحنا ..أعطيك اللي تبي بس اسكت …
هريدي : يابيه أنا صعييد يعني ما بافهمشي بتئول لي ليه اعطيك اللي أنت عاوزة …
ريتا : نعم يا هريدي وش عندك وش جايبك هالحزة في شي تبي شي قل اخلص…
هريدي : حبيت ائولك يا مودام عربيتك مش هنا والبيه جوزك بيئطم ( بيئطم يعني يمنع من الكلام ) فيّا مش عاوزني ائولك ..اديني ائولت لك يالله فوتكوا بعافية وماتنسيش تئوطمي رئبيتوه …
ريتا : مشكور يا هريدي ..وأنت وين سيارتي هاه قل لي وين وديت سيارتي لا تكون بعتها ولا صدمت بها ولا سويت فيها مصيبة هاه وين سيارتي ..
أنا : مالقيت الا تصدقين هالصعيدي القفل ماعليك منه ثانيا أنا وش يدريني طول الوقت عندك في الشقة ..ما تحركت من مكاني ..وش يعرفني ..
ريتا : لا والله خلاص نتصل بالشرطة وأبوي وهم يعرفون يتصرفون ….. ويجيبونها من تحت الأرض .
أنا : لا خلاص حرام عليك ..أنا باعترف لك بس ياليت تفهميني …وتقدرين وضعي ..فارس دق علي قبل كم يوم وترجاني يتسلفها مني علشان عرسه ..واستحيت اقول له أنها سيارتك وما أقدر اروح بها بروحي من دونك فسويت كذا الله يخليك أحب رجلك أسوي لك اللي تبين بس لا تفضحيني ولا تتصلين بالشرطة ..
ريتا : قم البس ملابسك يالله بنروح لعرس صديقك …اخلص انا اعلمك وشلون تستحي مني وتستحي من أني زوجتك طيب طيب بسرعة ولا أتصل على الشرطة ..
أنا : ودك تحضرين العرس مو مشكلة تبين انتظرك عند البوابة الى الصبح زي السواويق مافي مشكلة بس أهم شي رضاك زين يا عمري..
وركبنا السيارة ..ولما جيت بانزلها عند مدخل النساء رفضت وطلبت مني أوديها عند مدخل الرجال ونزلت جنب سيارتها البي ام . وتنزل وتدخل صالة الرجال وتنصى فارس صديقي وتنزر فيه ..
ريتا : هييي أنت فارس مدري مصلح ..المعرس ..هات مفاتيح سيارتي يالله اخلص علي …
فارس : من أنتي ووش سيارتك من متى المعرفة وش تبينه الأخت متخلفة عقلية
ريتا : أنا ريتا زوجة عبدالعزيز صديقك وصاحبة البي ام واللي دافعة له مهر علشان يتزوجني ..تبيني اكمل ولا أسكت وأنا اللي دافعة فلوس شقتنا وفارشتها وأبوي اللي يصرف على البيت وصديقك رجل على رجل ما يسوي شي وفوق ذا كله يسرق سيارتي ويعطيك اياها علشان تعرس بها يالله هات المفاتيح …وعلم صديقك أن اللي يستحي من زوجته ويحس أنها تفشل عيب ياخذ أغراضها ويعطيها للناس
أنا : ليه كذا ليه مصرة تفشليني ليه تسوين فيني كذا ..الله يلعنك ويلعن أبوك مرعي ويلعن فوقكم جورج قرداحي على توهيقته لي ..بس تدرين خلاص بانهي كل ماساتي …باطلقك وفلوسك بارجعها لك لو اشتغل كناس ..ولا اقول لك امشي معي نروح لابوك ماعاد لي تفاهم معك …
ونروح بيت أبوها مرعي ..انا وهي
أنا : اسمع يا شين يقولون للصبر حدود وأنا أصلي خلاص فاض فيا ..بنتك ما ابيها وشقتكم خلوها لكم حتى البي أم الله الغني عنها والمية الف ابشر بها بس لين اشتغل واسددها لك على حسب الراتب في شي ثاني .
مرعي : شف تطلق قبل المية الف معصي ..اذا معزم بتشتغل عندي بالمية الف لين تسدد اللي عليك ..ولا يجيك شغل تسدد منه ..
أنا : اشتغل عندك يالله شغل أحسن من مافي شي ..وش بتشغلني ..ابي شغلة مناسبة ..
مرعي : راعي لبعاريني اللي على طريق المدينة ..430 كيلو عن الرياض ما معك الا هندي اسمه كومار ..باعطيك الف تعيش منها والف تسدد لي منها يعني يبي لك مية شهر على تسذا .
أنا : لا خلاص خذ الألفين لك أنا أدبر عمري وأهلي ما يقصرون علي بالأكل ..يعني على كذا بتصير خمسين شهر .بس تدري مقابل البعارين ازين من مقابل بنتك ومقابلك أنت وصناقك ( الصناق الريحة اللي تجيب الموت من خياستها)…
وبالفعل أنتقلت الى طريق الرياض المدينة علشان اربي بعارين ..الشين …اكتشفت في البر الواحد يقدر يعيش مع نفسه ويسترخي ..ولقيت كومار اللي يشتغل عند مرعي بعد ..لعبت عليه وفهمته أنهم جايبيني مدير اراقب عليه ..وصار الضعيف يخدمني ..ورجعت لعيشة جداننا اشرب لبن وأكل تمر واقط و أحيانا أخواني وربعي يمرون يجيبون لي المقسوم ..دجاج الوطنية ولا خبز صامولي مع جبن يعني اشياء تصبر الواحد ..ولقيت هناك بعير مراهق توه صغنطوط سميته ( بعروري ) ..صرت دايما العب معاه ونتسابق ( الحمدلله على نعمة العقل بس ) لكن بعد حين اكتشفت أن البعارين مثل البشر اذا بلغوا انهبلوا ..بعروري بلغ من هنا وتغير علي من هنا صار يطنشني واذا شافني أركض علشان أتسابق معه صار يمشي بثقل واذا جا عند مجموعة نياق صار يمشي بشويش ويزوي رقبته ( يزوي = يلوي ويميل ) واذا شاف ناقة صغيرة بروحة قام يحجر لها ويتلصق فيها ..وفي مرة من المرارير ..كانت في نقعة موية يشربون منها البعارين ..والقى ناقة كبيرة بروحها ..وبعروري مقبل عليها ..وهو يزوي رقبته وهي بعد تزوي رقبتها ..وترمش بعيونها ..وبعروري كل شوي يقترب منها وفجأة يجي بعير كبير طاير شكله رجل ذيك الناقة ناصي بعروري يبي يلعن والديه طبعا أنا ما هانت علي العشرة وأقوم اصارخ بعروري بعروري انتبه ..واطمر علشان أنقذه وبالفعل قدرت أدزه بس المصيبة جت في راسي البعير الكبير نط علي و كسرني تكسر ولولا الله ثم كومار وداني لاقرب مستشفى كان مت ..المهم رجعت بعد اسبوع لبعاريني وانا على كرسي متحرك وكلي مجبس تقول فلة عظم ..وزي العادة مراسل جريدة الرياض يزورني علشان يكتبون تحقيق عن أول راعي بعارين على كرسي متحرك ..وتوهم طالعين الا اشوف ريتا جايتني مع أحد أخوانها وتنزل وتجي عندي …
ريتا : هلا عبدالعزيز أعرف أنك موطايقني ولا طايق تشوف وجهي بس حبيت اتطمن عليك عقب اللي صار واقول لك شي ..وبعده بامشي…من اليوم ورايح مانت ملزوم تشتغل عند أبوي علشان ترجع ليه المية الف ريال ..تفضل هذي مية الف ريال من فلوسي ابوي ما يدري عنها ..رح عطها لأبوي على أنها من أهلك …
أنا : من وين لك الفلوس وليه تعطيني اياها ..تبين الطلاق مني مستعجلة ..
ريتا : لا والله خل اللي بالنفس في النفس ..بس تعبت اشوفك تمثل دور المغصوب على الزواج مني ..اما من وين الفلوس ..فأنا سحبت فلوسي اللي في صندوق الاستثمار ..خلاص
أنا : طيب ليه تسوين كذا وليه ما شاورتي اهلك هالمرة بعد ..
ريتا : بس قبل ما امشي باجاوبك على سؤالك من وين جبت رقمك …يوم كنت في برنامج من سيربح المليون ..أنا البسمة اليتيمة ..يا شهيد الحزن ( شهيد الحزن = النيك نيم حقي في أحد مواقع الشات) ..يمكن ما تذكرني من كثر البنات بس بالفعل كنت اعتبرك ساحر ..كنا في الشات مع الناس وازعجتني بالبرايفت وكلام حلو يخلي البنت تطيح ومرة شعر ومرة نثر ومره كذا .ويوم بعد يوم تقول لي حبيتني ..يمكن ما صدقتك بس الصدق كلامك كان يسحر ..كان يدوخ يمكن أنت متعود تقوله ..لغيري وغيري متعودين يسمعونه ..بس أنا زي ما أنت شايف وش هي بيئتي شف وجه العنز واحلب لبن أبوي وأخواني اذا بيدلعون زوجاتهم نادوهم يا هيش ..صرت افكر فيك ليل نهار تركت النت علشان أنساك ولا قدرت ..كل مرة ودي أدق عليك بس قلبي ما يطاوعني لين جت الفرصة في برنامج من سيربح المليون ..السؤال الاخير سهل مرة ..وحله بسيط ..بس قلت استغل الفرصة واسمع صوتك ..أشوف خفة دمك ورومانسيتك بس ماش ما شفت شي وصار اللي صار والله لو أدري أن هذا كله بيصير ما كان سويته ..صدقني مدري كنت أحبك ولا بس معجبة ..والحين يابن الناس هذي مية الف خذها …ويا دار ما دخلك شر..عطها لابوي وينتهي كل شي ..
أنا : طيب و أنتي ما لك قرار ..ليه ما قلتي لا …
ريتا :أنت شايف أهلي اذا انت الرجال ما سويت شي تبيني أنا اسوي شي ..مع اني خريجة حاسب آلي ومعيدة في كلية الحاسب بس زي ما قلت لك شف وجه العنز واحلب لبن … على العموم آسفة اذا أنا ضايقتك يالله مع السلامة واستر على ما واجهت بس صدق انصدمت فيك ..حكمت علي بالاعدام من أول يوم ..ما أمهلت نفسك فرصة تعرفني أكثر ولا شفت فيك اللي حبيته فيك من قبل وكله كوم ولما سمعتك تكلم صديقك طلال تقول له ماني مدور لي شغل دام أهلها يصرفون علي كود يطفشون مني ويطلقوني منها ..ولا سمعتك مرة تقول لي لو بالكذب من كلامك الحلو اللي كنت تقوله دايم لي في النت ..أحيانا أحسه شخص ثاني غيرك …
أنا : اصبري ..اليوم شكلك غير محلوة ..تصدقين ماأدري ليه كنت اشوفك بعيوني كأني أشوف ابوك ..بس والله صايرة جرح ..بس تدرين عيبك أنك قروية شوي وما تعرفين تحطين مكياج أجل ليلة الدخلة مكثرة روج :انك ماكلة بزر من كثر الروج ..وكله كوم وشقة الثقبة كوم ….طيب أنتي الان مصرة على الطلاق يومك تعطيني المية ألف ريال …
ريتا : مو أنت اللي تبي الطلاق …ما اقدر اجبرك على شي … تعلمت من الماضي ..
أنا: لا خلاص أذا انتي تبين تستمرين معي بأكون مبسوط مرة بس بشرط تسوين فورمات لعيشتك مع أهلك ..وبوديك عند كوافيرة لبنانية تعلمك وشلون تسوين لنفسك الماكياج ..ونروح الشرقية ونسكن فندق الميريديان وأوعدك بادور على شغل علشان اصرف على عايلتنا ..
ريتا : اسمع بما اني سحبت فلوسي من الاستثمار فانا عندي فكرة ..اشتغل بفلوسي والله يرزقنا واذا جاك شغل نرجعها للبنك أنت أولى من البنك …
وتوتة توتة لا ما خلصت الحدوتة عشنا بسبات ونبات ..بس أنا الان أكتب لكم من اللاب توب حقي وأنا وأنتم بكرامة في الحمام منحاش من المدام علشانها حامل والاخت تبي تسمي ولدنا فلزة كبدنا مرعي على أسم أبوها ولا محماس على اسم جدها الرابع عشر ..وأنا ابي اسميه صفوق ..مدري ليه طلع فيني عرق البداوة .المهم المسألة مسألة مبدأ ..وأنا ماراح أتنازل عن موقفي ………. انتهت القصة
ريتا : عبدالعزيز جلست في الحمام ولا ما جلست مسمية ولدنا مرعي مرعي الله لا يعوق بشر ..وأنت انطق في الحمام لين تخيس ..فهمت وعلى فكرة مالك غدا …( لا والله حياة زوجية سعيدة )
المهم ..الى هنا و تنتهي ..القصة …أنتم بنفسكم فكروا وش استفدتوا من هالقصة ووش ما استفدتوا ..وعلى قولة ريتا ..في بنات واجد بسيطات بيئاتهم مرة بسيطة الكلمة الحلوة اللي تنقال في النت بدون اعتبار تهز فيهم أشياء كثيرة ..يمكن اللي قالها ما يعنيها ..وفي أولاد ظروفهم صعبة ما يقدرون يتزوجون مستعدين يتعلقون بأي فرصة للزواج لو ماكنت الفرصة اللي يحلمون فيها….وفي عوايل كثيرة يتدخلون في حياة أولادهم وبناتهم بعد الزواج ..يبون يعيشون حياتهم وحياة غيرهم …وسلامتكم
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
