عفوا هذه الصفحة مخصصة للشباب فيرجى من الفتيات اغلاقها فورا وعدم الاطلاع اليها وتمريرها الى اقرب شاب على الاي سيكيو وتقبلوا فائق الاحترام
اولا دروس الترقيم
الخطط القديمة:رمي رقم الجوّال ولا رمي رقم البيت الخااااص الخطط الجديدة:توري البنت ان عندك جوال ورتعطيها رقم بيجر لانها بتدق عليك بربع وتدق عليها بالوووف غير ان البيجر مايطلع رقمه عندها في الفاتورةشقتوا كيف ومن بغى شي يتحمّل
ثانيا :المغازل
فرضا ان البنت عطتك وجه وكلمتك وش تسوي ووش تقول راح اوريكم بعض الاسئلة والاجوبة
الاجابة الحديثة:والله ياعيووني كل المطربين صاروا مثل بعض ولافي احد متميز ولكن اذا بغيت اسمع اسمع لسيلين ديون ويتني هيوستن وبارفااروتي-مطرب شعبي عندهم حق حفلات وعروس واوبرا –
س: تحب الشعر
الاجابة القديمة :ايييييه اكييييد
الاجابة الحديثة :بعد خالد الفيصل ونزار قباني وايليا ابو ماضي ماعاد في شي اسمه شعر ,حلوووة ايليا ابو ماضي ترى ماعرف هو حرمة ولارجال
س:وين تدرس؟
الاجابة القديمة:كلية العلوم الادارية,كلية الحاسب
الاجابة الحديثة:والله جايتني بعثة ادرس في ناسا بس متاجله علشان المشاكل بين كوبا وامريكا لان النجم اللي ابي ادرسه بالضبط بالضبط فوق سما كوبا وانتظر يحلون المشكلة وارووح بريطانيا اقصد امريكا
بتقوووول لك وااااو كنت اتمنى ادرس النجوووم ,طبعا اسمع من هنا وطلع من هنا كل شي ودهم يدرسوونه تفلسف عليها بدوورك وقل لها بامكانك تدرسين تو الفرصة ما فاتتك خلك مخ
وش تحب تسوي في وقت الفراغ
الاجابة القديمة:اطلع الثمامة مع الربع ,العب كوره كمبيوتر وانترنت
الاجابة الجديدة :اطلع واخيم في الصحرا واصيد احلى شي الصيد ماشي سوقه كل صار يصيد لاوللصيد ميزة البنات مايعرفون عنه اي شي يعني خذ راحتك ونصب على كيفك بس لاتبالغ وتقول صدت اخر مرة اسد قل شي موجود في المملكة زي البطريق والدب القطبي والكانغرو شي زي كذا
س:وين تسافر ؟؟
الاجابة القديمة :الصيف اوروبا ولا امريكا الاعياااد القاهرة ولا بيروووت ,,,غلط غلط بتقول لك وش رايك نتقابل هنااك بتصك عليك
الاجابة الحديثة الصيف روسيا عند ولد خالتي في السفارة هناك ونستاجر كووخ في غابات الصنووبر وفي اجازات الاعياااد قل ارووح للصين ولا هولندا ولاجزر لانجرهانز اي شي مش عمرك حبيبي,,,عارفك حدك ابها في الصيف ترقص في الحفلات وفي الاعيااد البحرين ولا دبي وترجع لنا نص صااحي
الاجابة الحديثة:اسمحي لي والله هذي اسرار وكل مانبشته اتالم وتنهد تنهيييييدة قوية زي ام كلثوم في انتي عمري ولاتسالها هالسؤال لانك بتسمع اجابة تلفيق فاختصر على نفسك الوقت
س:هل تقبل تتزوج بنت لها علاااقة ؟؟؟
هالسؤال هو اللي يقصم الظهر من جد ياما شباب زي العسلراحوا وطي بسبته ولكن عند عزوووووبي الحل
الاجاابة:اولا خلك هادي شم حبتين هوا وقل اللي باقوله لك الان ولاتزيد ولاتنقص حياو كل انسان هي ملك له احنا مانقدر نحاسب الناس على ماضيهم لان كل منا له ماضي الاان يابطل شمة هوا ثانية وكمّللك اللي اطلبه من شريكة حياتي ان تكون مخلصة لي وتحبني لاني بكل ما اقدر باكون مخلص لها ومحافظ عليها ولو ماقدرت تحبني اتمنى ان تعلمني ملاحظة :يمكنكم كتابة هالكلمتين في ورقة للي ما يحفظون زين هالجملة تساوي وزنها ذهب مجربه
راح تقول لك البنت بكل ذهووول ياليت كل الناس بتفكيرك ولو ماقالتها لك اسكت واصبر ولاتتكلم الى ان تقولها وان جابت لك طاري مجتمع وعادات وتقاليد هنا تكح تعطس تشرق اشي سوه يفكك من الموضوع
بقيييييييييت درووووس المغاااااازل يتبع
الموضة والكشخة
في السابق كانت الموضه اولا سكسوووكة وقصة شعر نمرة اربعة هذا كله قديم الاان ترووح للحلاق اول ماتخلص هالصفحة وتقوول له ينظف الوجة من كله شنب لحية سكسووكة عوارض قوارض ابد مايبقي الا الحواجب هذي الموضه في الشانزلزيه شووف عيني تعرف الولد هناك من حواجبه كل واحد بحااجب اسوود محترم وتخلي الحوااجب سميكة كانك ايرااني هذي الموضه في الشعور وبالنسبة للراس الموضه الان تخفيف بسيييييط وتصبغة برتقالي كانك هولندي حلاااته وفيه ميزه يعني في الصيف تدهر الشمس فوق راسك يقوك شعرك يرد عليهايعني واحدة بواحدة
الثياب :الموضة القديمة ثوب ابيض والياقة صبة والازرار مكشووفة لالالالالالالالالالا قديييييييييم الان الموضة ثوب لونه لؤلؤي ومطرز بنجمات زرق والياقة مرسوم عليها قارب والاكمام فيها صور غيووم والياقة مكونة من طبقتين تحت صبة وفوق قلااب بس القلااب ربع زي رقاصين الفلااامنجو اكشخ اما الاكمااام تخلي فيها فتحة زي ملابس الرقاصات المغربيات علشان تتيح حركة لليد والازارير علشان يصير ثووب متعووب عليه زر مكشووف وزر مغطا اما المخبا فخله مخفي ولا اقول لك بلا مخبا دام كل واحد راز جواله بيده تقول ماقد شاف حسنه شوي اللي يخليه في وجوه العالم يعني معي جوال
الجزم الااااان الموووضة بووووووووت جديد ماركة دووووج رهيييييب هو الموضة الماشية في العالم ارتفااع القااعة متر الا ربع وسمك جلده مترين يعني تحس نفسك فوق وفق فوق هام السحاب والاحلى رجلك واصابيعك تنعزل عن العالم علشان اول ما تفصخه تطلع لك ذيك الرواايح وله فايدة ترى مع هالنوع لامخدرات ولاحشيش ولادخان ابد كل ما صدّع راسك كل ما صدع راسك ابد افصخ جزمتك وماعليك الا تخلي خشمك عفوا انفك في مقابل اصبع رجلك الكبير واللي جنبه وتضبط المزاااج ببلاااش ونرجع للجزمة من مميزاتها بعد الدفاع عن النفس افرض هجم عليك واحد ابد ضربه واحد وعد الرجال في خبر كان بس يبي لك تدريب كيف ترفع رجلك لان وزنها بدووون شرااريب 5 كجم للفردة الواحدة
المطبخ
نظرا لارتباط ابو احمد الطباخ اللي تعاقدنا معه هنااا في هذا الموقع فالوصفة على النحو التالي ……………………………………………………الافطار: اذا توك مستلم المكافاة او المعاش فعندك كودو ولد نعمة افطر في 2 ان ون ولااذا ولد فقر فاشتر لك كيسة خبز صامولي وعلبة جبن كيري ويازينه من فطووور ومغذي
الغدا تقاط انت واثنين من ربعك الخبلاان وياحلو البخاري ومن فات قديمة ندم ولايهمك من كنتاكي وتكا وبيانو ولا مطابخ المثلوثة خلك قوي الشيمة العشا من تجربة شخصية يازين النوم خفيف او انك تروح تسلم على الاهل وتتعشى معهم محاكيكم اذا ضاقت به الدنيا اشتغل سواق لاهله وراح يجيب لهم عشا من احسن مطعم على حسابهم طبعا ويتعشى معهم وهو كل شي بحقه
قريبااااا السيارات والتديييييييت واشياااء اخرى مع عزوووووووبي
ردوووووود سرييييييعة
الاخوان محمد وحمد اشكركم على مساهماتكم معي وبالنسبة لاستفساركم عن كيفية اعداد البيض المقلي فانشاء الله اذا رجع العم ابو احمد فراح نشرحها لكم بالتفصيل
الصديق مساعد:هلاااا بك وشكرا على دعمك وبالنسبة للوصفات تراها مجربة وماتخرش المية وعليها تصديق من جامعة هارفارد ماعلييييييييييييك
الى سلطان :يمين بالله مافي الموقع صور من اللي خبرك واذا مزنووق مرررة اطلع وامش سيدة وثاني لفة على اليمين هناااك تلقى موقع كله صور طب وتنق
الاخوات :ندى ,مي ,في :الزراعة والريّ,اشجان ياحلووووكمويا حلو ايميلكم عمري ما كلمتني بنت اليوم خمس بنات ياملوني وبالنسبة لسؤاالكم عن رقم جواالي فانا ماعندي جوااال مو طفااارة لاوالله >>>واحد بكاش<<< انما هو موقف من سعره على العموم تبوون البيجر عاادي ترى اللي كان مشترك معي فييه طلع لرووحه جوّال يعني البيجر صاار لي برووحي
العزيز نضال:هلااا بك صديق وصرااحة زعلت كثييير يوم قلت لي انك مافهمت نص الحكي وودك ان عزوووبي تصير بالانجليش فانا اقوول لك افش ياحبيبي افش وبصرااحة عجزت اهضمها سعودي واسمه نضال قووية شووي صح
الى سطام وبندر وحموووود والله ودي اخااويكم الى لبنا السنة الجاية علشان نشجع المنتخب وفكرتكم حلووة اننا نروح هالصيف نحجز شقة احتياط للزحمة وقبل ما يزاحموننا اليابانيين هناااك لك معليش يااحموود انك مشبك باسكال مشعلاااني لانك عاشر واحد اسمع منه هالحكي لكن من الان اقوول لكم اذا رحنا بس نرووح علشان المنتخب يعني من الملعب للفندق ومن الفندق للملعب واخبر لكم فندق ابن ستييييييييين كلب فييييه ,,,,,عفوا بارسله لكم في الايميل
الاخت بشاااير من الكويت :فرحتيني يوم قلتي ان الموقع اعجبش وما صدقت عيووني يوم كتبتي لي وااايد واايد تذكرت الين خلف اما عن ليه ما انشر صوورتي في الموقع فالموقع مو مو مو مو موقعي هذا موووقع بلاااك هوورس وهو ماجرني هالصفحة بالشي الفلاااني اما عن اشبااهي فالطول راغب علااامة والوجه عاصي الحلااااني والمنكبين منكبين وائل كفوووري والشعر شعر طوني حدتشيتي والصووت صووت جورج وسووف اذا اجتمعت عند الصوورة فهذا اناااااااا وربي يشهد
الاخوان عبدالرحمن وعبدالمحسن من كلية التربية جامعة الملك سعوود هلااا بكم اصدقاء اما قولة اذا عندي سلف فرااعي المغسلة معسكر عند باب شقتي له شهر اخر شي قام يستوفي ديييونة بذلي مرة خلااني ارتب له ملااابسه ومرة خذ شمااغي يوم جمعه يقوول انه معززوم عند ربعه واخر المتمة ماد له سلك من الرسيفر وياسفا جهاز الديجيتال وهو موجه لقناة سوني الهندية كل ذا وتبوون سلف وراعي البقاالة الله يفضحه بين الخلق يبيعني كيسة الخبز مشاركة مع حارس المسجد واللي قاهرني اخذ 3 صاموليات ويحسبه علي بنص ريال
عزوبي الجزء الثاني
موضوعنا اليوم متخصص بالغزو الاليكتروني أي كيف تغازل عن طريق الانترنت وسنحاول التطرق لمواضيع اخرى…….
البداية
كيف تصطاد فريستك ؟؟؟؟؟
في السابق:طريقة (وجه مغسول بمرق) يعني اذا شفت بنت في أي برنامج النتميتنج او المايكروسوفت شات او الفري تيل بعد…او تسوي سيرش في الايسيكيو ثم تعرف بنفسكوتحاول انك تتعرف عليها ويحصل بينكم تعارف…..لالالالا انتهى هذا الزمن.
الطريقة الحديثة: (خش في عينها ) ايه خش في عينها اقول لك يعني شفت اسم الفريسة اقصد البنت في النتميتنج ولا الايسيكيو على طول ارسل لها هلا وحشتيني ياحبيبتي ياحياتي يا عمري وينك من زمان ,لقافتهم بتحكهم ماراح يقولون لا مو احنا راح يقولون شي من اثنين يايجارونك او يسئلونك وش القصة ومن تقصد طبعا يبون يعرفون من انت تبي وش القصة……عندها يا عزيزي الشاب تعتبر قصيت التاشيرة عندها يالحبيب لا تصدق عمرك وتقوم تقص لك قصة حزينة تسوي فيها نفسك روميو بالعكس حاول تعتذر وتنسحب بهدوء ايه قل ابد قصة قديمة شي انتهى او شي خاص جدا هنا نكون خلصن الجزء الاول.
كيف تبدأ رحلة التعرف
بعد الجزء الاول ستحاول البنت ان تلمح لك انها تريد التعرف عليك مو لله طبعا بس علشان تشبع غريزة لقافتها بتقول لك ممكن نتعرف هنا انتبه انتبه انتبه لاتقول اسم شهرة او اسم من تاليفك بالعكس خمها وقل اسمك الاول الحقيقي ليييه؟؟؟ علشان تستبعده نهائيا من بالها انه يكون هو اسمك الحقيقي شفت كيف ناخذهم على قد عقولهم بتسئلك عن عمرك ؟؟؟هنا انقل اللعب لملعبها قل لها من معاي بتقول لك (فلاّنه) على طول حار بحار كم عمرك بتقول لك عمري……سنة هنا اقهرها على طول قل لها اووووووووه اييه كثر من الاووووووووووووووه توك صغيرة وتنهد لاص هذا الانترنت مو التليفون لاتنهّد اجل بتسئلك بقهر ليه انت كم عمرك لاتجاوبها قل لها كم تتوقعين بتقول لك ….اكبر من عمرها بسنتين او ثلاث سنين قل لها لا ايه لا والا اقولك خلها لالالالالالالا اقوى خل عمرك اكبر منها بسنة بتقول لك مو كبير مرة قل لها الكبر مو بالسنين بل بالتجربه والمعاناة.
خطوات التعرف
الخطوة الاولى: بما انك انت اللي اتصلت عليها وبالاصح لانهن ملقوفات فهن اللي راح يسالون.
س: انت شكلك قديم في الانترنت…. وخبير ؟صح؟
الجواب القديم :ايه انا لي فترة على الانترنت حتى من قبل كنت اتصل على الامارات والبحرين ..اسمح لي اقول لك غلط كبييييييييييير لانك وقتها كانك معطيها مسدس وتقول اقتليني راح تعصرك اسئلة انت في غنا عنها.
الجواب الحديث:والله اذا تبين الصراحة قديم ومو قديم …بتقول لك (كيف) قل لها لي على الانترنت كذا سنة بس كنت استخدمه بس علشان الايميل لاغراض خاصة ووقف لاتقول علمية ولا اصدقاي ولا اقاربي اسكت على اغراض خاصة …بلقافتها بتقول لك(مثل ايش ممكن اعرف؟)قل لها اشياء كثيرة ما اقدر اعدها لك الا اذ انتي تبين وعندك وقت(هنا بتصير احرجتها احراج ماصار ولا استوى) اما هالبرنامج -ايا كان البرنامج- فانا تقريبا مالي عليه اكثر من كذا شهر.
ملحوظة : هذا الكلام لاينطبق على ICQ قل لها هو عندي من زمان بس نادر ما استخدمه حتى اني احيانا انسى رقمي القديم واحجز رقم جديد.
س:اها طيب من تعرف هنا من اصدقائك هنا لاني بصراحة اول مرة اشوفك؟
الجواب القديم :اما اصدقائي فلان وفلانه وفلان وفلان..الخ او ما عندي من يطلق علييييه كلمة صديق كل هذا غلط مع احترامي.
الجواب الحديث:والله بما اني ماجي هنا كثير فمالي اصدقا بس اللي اذكرهم هم فلانه وفلاّنة وفلاّنة وفلانّة ايه كلهم فلانات علشان نبيها تسئلك السؤال التالي
س:ماشاء الله كلهم بنات اجل لك معجبات واجد ؟؟؟
الجواب :لالالا المسألة مو كذا كل مافي الامر انهم يتصلون علي كل ما كنت هنا ……بتسئلك اجل يحبونك ..لاتتهور وتقول ايه ولا لا على طول الخمها بسؤال …..(تؤمنين بالحب عن طريق الانترنت؟؟؟)بتقعد ترطن عليك وتقول حكي ثلاثة ارباعه فلسفة وقتها خذ قيلولة وريح ولاتهتم اذا شفتها وقفت عن الكتابة اقر آخر جملة وناقشها فيها.
س:يعني افهم من كلامك انك سبق لك وحبيت على الانترنت ؟؟صح ولا انا غلطانه؟
قل صح لان البنات يكرهون ان يكونون غلطانات
الجواب القديم:بصراحة ايه (جاتك اؤه )بهالجواب تكون فتحت على نفسك باب من الجحيم لانها تبي تعرف منك التفاصيل واذا ماحكيت لها بتزعل منك ويمكن تتركك وتطلع
الجواب الحديث:مو حب حب يعني انما بداية علاقة وانتهت بسرعة ….بتقول لك (كيف؟؟؟)قل لها ابد علاقة عابرة بين اثنين لكن ماكتب لها ان تستمر وبعدييييين تنهّد اوووه نسيت اننا في الانترنت اسكت شوي ولا حط علامات زي كذا(!!!!او ????او …….) وقل بعد شوي ارجوك لاتذكريني انا ابي انسى
س:طيب خلاص نغير الموضوع انت من وين ؟
الجواب القديم :انا من………. يازينك وانت مطفوق وش معجلك
الجواب الحديث:انت خلك ذهين وفطين شف كلامها أي لهجة من الرياض ولاجدة ولاالشرقيه ولاالجنوب واختر العكس لان البنات في الانترنت مايرتاحون للي من نفس مدينتهم يعني اختر مدينه غير مدينته.
س: انت طالب ولاموظف؟؟؟اذا موظف وين تشتغل؟
الجواب القديم:البعض مسوي نفسه فهلوي وذكي يقوم يعكس او يخرط ما ودي اعلق بس اقول هذا غلط
الجواب الحديث:علشان ماتعتبر مطفوق او تخر بكل شي لها قل لها الاتي(اووووووه الوقت آخذنا كم مر علينا نصف ساعة ولا اكثر….عن اذنك الان لازم امشي )ليه لان البنت اذا بقت شوية معلومات عنك فهي بتصير ملهوفة ان تقابلك مرة ثانية بس اذا خريت لها بكل شي بتدخل ضمن معادلة عجبتها ولالا.
استكمال اجراءات التعارف
في السابق: بصراحة ولاتزعلون باشباب احنا اللي رفعنا من قيمة البنات الواحد اول ما يكمل مع البنت خمس دقايق الا معطيها الايميل حقه وسائلها اذا عندها ايسيكيو ويعطيها رقمه وهي عاد توافق ولالا يعني بدون زعل ياشباب هم ولاشي واحنا اللي عملنا منهم شي….
الطريقة الحديثة: المواعد ايه المواعد لامو برا لالالالا اقصد في اللانترنت قل لها كذا وبكل هدوء بصراحة انا ارتحت لك وارتحت للكلام معك انتي بتجين بكرة ولالا اذا قالت لك ما اقدر لاتندلق وتقول لها خسارة والله ولا تحلف عليها لالالا…قل لها اووكيه بس افهمها ياذكي وقل لها هذا الايميل حقي يعني اذا احد بغى من الثاني شي هي بترد عليك انت عندك كيو (حلووووو وصلنااااااا) قل ايه بس مو فاكر رقمه لحظة شوي وتاخر عليها شوي اذا قالت لك خلاص ماله داعي على طول اكتبه لها.
تحذير:اذا طلبت منك ان تعطيها HOTMAIL MASSENGERحقك وانها ماعندها كيو ولا أي شي ثاني ساعتها لاتتهور ياشاطر وتعطيها هذا برنامج يكشف لها كل دخلاتك على الانترنت فعلى كذا انتبه.
اللقاءات التالية واسئلتها
س:اووه ماشاء الله اشوف كثرت دخلاتك على الانترنت ؟
الجواب القديم:بصراحة ولاتضحكين علي صرت اشتاق لك كثير …..نونونونونو ماينفع هالحكي
الجواب الحديث:والله يعني من الفضاوة اذا كنت موظف تقول هالايام اجازة اذا انت طالب قل توني مخلص اختبارات …بعدين اطلق الرصاصة عليها(يعني مليتي مني ولا وجودي يضايقك؟؟)بتقول لك ابدا لاوالله مو القصد لاتفهمني غلط هنا تغلى بس تغلى بشويش مو تسوق فيها …تغلى بشويش مو تطلع وتتركها واذا جت لك ترفضها اقصد بالتغلي هنا انك تسكت كثير وترد عليها بالفاظ مختصرة مثل (شكرا ,المعنى واضح ,خلاص). وبعدين ارجع لمثل اول.
س:انت وش يعجبك اكثر شي في الانترنت؟؟
على فكرة هذا سؤال جرجرة اذا قلت اسم برنامج شات فانت كذاب واذا قلت برنامج ثاني بتسئلك ليه؟
الجواب الحديث:والله انا جربت جميع البرامج بس ارتحت اكثر لهالبرنامج واكثر شي استخدمه هو الايميل .
س:مو انت قلت لي آخر مرة انك بديت ترتاح لي,,,, ليه علىاي اساس؟؟؟
الجواب القديم:لانك صادقه وصريحة ومانتي مثل الباقيات…..ستوب ستوب يابو الشباب هو في بنت صادقه المهم ماعلينا.
الجواب الحديث:لا لا انتي ما فهمتيني زين لما قلت ارتحت لك كنت اقصد انك تعرفين تناقشيني وتاخذين وتعطين معي الحقيقة ان البنات يحبون يسمعون بس مو مثلك ماشاء الله عليك تناقشيني في هالمسالة (ايه امدح واشرخ فيها).
س: وش الللي تحبه في البنت؟؟؟
الجواب القديم:اخلاقها ,روحها ,جمالها,دينها
الجواب الحديث:احب البنت اللي تحب نفسها….(نعم نعم نعم كل بنت تحب نفسها)هذا اللي بتقوله لك…رد عليها يعني تحبني لانها بتعرف اني باحافظ عليها –على فكرة هذا كلام لاقيه في مجله قايل واحد من المنشين ولاني مافهمته عجبني)
س:لو اخلصت لك بنت هل راح تخلص لها؟؟؟
الجواب القديم: ايه اكيد طبعا مافي شك (+طقة صدر)
الجواب الحديث:في الواقع هذا الشي يعتمد على البنت نفسها ومفهوم الاخلاص عندها انا ابي بنت تحبني لشخصي مو مجرد تطيعني كل ما قلت شي اضافة الى اني باكون واثق في البنت 100% (الرجاء من اللي يفهم شي من كلامي يرسل لي معناه بالايميل لانه تابع للقاء للمنشي بس في مجله ثانيه)
س:بصراحة يعني تدخل باسم ثاني هنا (قصدها البرنامج)
الجواب القديم:لا انا ابدا انا اسمي هذا ماتغير من اول يوم دخلت الانترنت ما اقدر اغيره ضميري مايسمح لي (يابو ضمير انت ما علينا)
الجواب الحديث: تبين الصراحة ايه بس مو علشان شي انما ان عجّاز (كيف)بتسئلك …قل لها بصراحة يعني لي اسم في الجهاز الشخصي واسم ثاني في اللاب توب واسم في جهاز المكتب _يعني خل نفسك سكبه _ ولد نعمه على فكرة واحد من الشباب حب يتفلسف طولها قال ولي في المقهى اسم رابع تدرون وش صار له …..ايه ايه ايه
تركته وقالت له رووح ياراعي المقاهي.
س:اتمنى منك تجاوبني بصراحة هل سبق لبنت انها شغلت المايك معك او انها شغلت لك الكاميرا او اذا مافيها احراج اعطتك رقم تليفونها؟؟؟
الجواب القديم:ايه كذا مرة بس في الحقيقة هالاشياء ماتهمني انا استسخف البنت اللي تسوي كذا(وييييي طع= ارنب)
الجواب الحديث:من جدك وين احنا ترى احنا بالسعودية ,للاسف الى الان معظم البنات مايفرقون بين التقنية والانحراف يعني مايفهمون ان احنا في سنة 2000 اما بالنسبة للتليفونات فانا مو مقتنع بالترقيم اساسا اما معرفه ن قريب او لا(بتقول لك يعني ولابنت مرة ….ولاحتى عربيه)هنا انقز نقزة محترمة وغير الكلام قل ولاسيارة ولاطيارة هههههه ايه اضحك لان هالسؤال سؤال جرجرة على انه قديم من عصر الفراعنه الى انه الى الان لجنة عزوبيين العالم المتحدين مالقو له اجابة شافيه ووافيه.
NETMEETING:تكوين ميتنج مكون منك ومنها ولا على الاقل مايكون هناك بنت ثانيه.
MICROSOFTCHAT:ارسال مقطوعه موسيقية
MIRC:تكوين قناة باسمها (اسم البنت)
الطرق الحديثة( طرق عزوووبي)
ICQ:ارسل لها فويس مسيج فيه كلام تنكيت على واحد من الشباب (يعني كانك مرسله لصديقك وتتريق فيه على زميل لكم)…بعديين اقول لكم ليييه ولا يالله علشان تقول له اسف هو جاك بالغلط بتسئلك وش القصة …فرصتك الان طق حنك معها واخرط عليها وتعلقه بك اكثر وسواليفك.او ارسل لها اغاني لطربين هي ماتحبهم نوع من انك تقهرها وتفرض رايك عليها .مع ان هالحركة ثقيلة دم الا ان البنات يحبوونها.
NETMEETING:لاتتصل عليها واذا كنت انت الهوست اقبل كل البنات (بتقول هي بتزعل ) برفت لها قل لها وش يزعلك يارووحي زي مانتي شايفه بس لامايك ولاكاميرا (علشان تقهرها وتخليها تسوي خطوة ايجابيه معك) ..واذا شفتها ماتحس ولع الكاميرا لغيرها (باللبناني حرئصها) قل لها والله البنية بس تبي تجرب الصوت والصورة مو شي ثاني والله حتى الكيرا على السطح.
MICROSOFTCHAT:كل ماشفتها عطت وجه لغيرك اسئل السؤال التالي(شباب من عنده برووكسيات جديدة)بتوسبر لك عيب وش هالكلام وش تبي بالبروكسيات قل لها كذا بموقه (والله وانتبهتي لي تو الناس بدري)علشان تكبر في عينها انك غيار.
MIRC:سم القناة باسمك علشان اذا صارت تجي لها دايم يفهمون ان الباقين ان في بينكم شي فاللي عندهم عزة نفس يتركوونكم لحالكم
نهاية اللعبة
يعني اما شبكت البنت 100% او انك فقدت الامل فيها نهائيا ….نبدا بالاخير
كيف تطفشها:يعني واحدة لك معها كذا شهر لاسمعت صوتها ولاشفتها ولاتواعدتوا والادهى والامر حسيت ان ماعندها أي نية بهالشي.
الطرق القديمة:التهرب اذا شفتها اما انك تسكر النت او تكون انفزبل او كل ماجت لك تقول لها انك مشغول وتستاذن بسرررعة او انك تستخف دمك مع البنات ….لا لا لا لا بيني وبينكم في بنات يستعبطوون بقووة بعد يعني هالخطة ماراح تفيد معهم.
الطرق الحديثة:استقبلها رحب فيها هلل لها بقووووة بعد قل لها وحشتيني ولهان عليك وشغل لها الصوت اهم شي الصوت …وبعدين شغل الطابعه وخل المايك جنب الطابعه يعني سمعها انك تطبع اوراق وانك مشغول لشوشتك ساعتها هي بتتركك مو حاسّة انك مشغول انما الطابعه بتزعجها.
اما للبرامج اللي مافيها صوت ارسل رسايل سريعه ورى بعض باسم ولد وقل فيها يعني لازم امرك يا فلان الان الان بصراحة مشغول شوي,وبعدين خلاص دامك بتطلع بامرك بس اصبر عليها دقيقتين وبعدين يووه حتى دقيقتيين ماتقدر تصبر طيب طيب طيب ساعتها ان ماصرفت البنت نفسها افصل الخط وثاني يوم العن في شبكة الاتصالات.
تشبكها 100%
الطرق القديمة:تعطيها رقم تليفونك وكل يوم ترسل لها اغنية وكلام حب لا لا لا
الطرق الحديثة:تروح للحلاق بعد صلاة العصر تضبط عمرك وتشغل لها الكاميرا ولا تجيب مسجل وتسمعها اغنية واذا مرة مرة يعني بايعها بقوووة تقول لها ان اسمك اللي قلته لها في الاول كذبي مو صدقي وانك ماصرت تدخل الا علشانها وتتفق مع واحد من ربعك ان يدق عليك وترفضه قدامها طبعا تتفقون مع بعض وان ذاك الولد يكلم البنت ويشتكيك لها …وش رايكم مو حركاااااااااات .
الموضه
للاسف تعامل كثير من الشباب مع مانشر في العدد الاول على انه مزح على العموم براحتكم لاتصدقون ,بس الموضه الان هي (شماغ الهاف) ايه هاف نصها شماغ احمر والنص الثاني غترة بيضا . وبالنسبة للقرويين اللي مازالو يتمسكون بشنباتهم نو بروبليم على فكرة عند البرازيلين الشعر زي الشنب عندنا ويوم طيره رونالدو طيروه وراه.الثيااب بما انه كثر الشباب الرقاص هالايام في الاجازة الصيفييه فالمووضه يكوون الثووب مفتوح من الجانبيين من تحت (زي الرقاصات) اما الجديد وقنبلة الموسم فقد تم استبدال الازارير المربعه اللي في الثوب بسحاب فضي الله بيصيير شي يهبل وياخذ العقل.اما النظارات فبعد FRAMELESSالموضه هي LENSELESSيعني اني مثقف وفاهم الدنيا.اذا مالقيتوا هالمنتجات بامكانكم الاتصال على الرقم التالي 0012345678910 .
الطريقة:تخبط البيضطة بطرف الصحن(يعني تفش البيضة)وقبل ماينزل محتوى البيضة في الصحن الا انت مستقبله بالملعقه وتحرك وتحرك وتحرك وتضيف تباعا الطماط والبصل وتحرك وتحرك وتحرك وتضيف الملح وتحرك وتحرك الى ان ماتنكسر يدك من التحريك او ينتشر محتوى الصحن في المطبخ .على فكرة احد الاصدقاء الاعزاء يشره علي اني ماقلت شبوا النار وارد عليه لاني ساعتها لازم اقول طفوها في الاخير فوش الفاايدة اذا صرت بولعها ثم اطفيها.
واخ ثاني يسئل وش الافضل ناكل الشكشووكة مع خبز عايدي ولا تميس بصراحة مع الصامولي تطلع اشهى
تهنــــــــئــــــــــــــة
يتقدم عزووبي باحر التهاني والتبريكات الى عجوزتا عفوا صغيرتا الغناء العربي نجوى كرم واحلام والحمدلله ان الله بيستر علييكم الا الشي اللي ما اقدر استوعبه ولد احلام وسعيد الهاجري كيف بيكون شكله اللله يستر منه بس.
اعـــــــــــلان
اعلن واقر انا عزووبي ولد ابو عزووبي حفيد المدعو جد عزووبي اني موقع عقد احتكار مع موقع BLACKHORSEلمدة خمس سنين قادمة فعلى من يود مشاهدتي فقط من خلال هذا الموقع اما بالنسبة لقناتي اليمن والسودان(موقع مستر تي,ونكته اونلاين )اقول اعقلوا لاتحدوني اقلب عليكم تراني اسويها…..ثانيا اذا بتسرقون اسرقوا صح مو اللي حاط الالوان اخضر واصفر (ليه انا اشارة)والثاني احمر مادري بنفسجي(حومتوا كبدي الله يحوك كبودكم)
عزوووبي يقوووووول
لجميع البنات اللي طايرين بالفيصلييه وفرحانين بها ويتمشون فيها واذا قربنا من عندهم انحاشوا ودخلوا داخل اقول لهم قريبا انشالله سيفتح الله لنا فتحا مبين وندخل الفيصلية مثل مادخل القدس صلاح الدين وورونا ش بتسوون وقتها ياحلويين.
ردووووووود سرررررررررريعة
الى ماجد وسلطان من الشرقيه:اما ان نقاطع البنات نهائيا فهذي فكرة ايجابيه واؤيدها وخلوا كل الشباب يسوون زيكم بس انا اسمحوا لي ما اقدر اسوي زيكم عندي قل سكر والدكتور قال لي كثر من الحلا.
الى هند من القصيم:مادامك مصرة اني ارسل ل ك ص ورتي فانا بوصف لك شكلي احسن بوهتي بوهة براد بيت وسحنتي سحنة توم كروز وشعري شعر ليوناردو ديكابريو وطولي طول كيفن كوستنر اما شنبي شنب عاصي الحلاّني. وبياضي بياض سعد خضر . ثانيا ماقلت لك لاتفتحين الصفحة ليه تفتحينها ولا المسالة عناد وبس
الى فراس وعاصم وهاشم من جدة:والله اسمحوا لي بس من قريت اساميكم وانا طايح على نفسي من الضحك المهم ماعلينا اما قضية ليه بنات جدة يحبون اولاد الرياض اكثر فالمسالة مو عن نقص ولاكمال في اولاد الرياض المسالة ان اولاد الرياض يبعدون عن بنات جدة الف كيلومتر وخذوا عندكم مثلا بنت جيراننا لها ست شهور من علمتها كيف تستخدم الانترنت واخرتها تروح تحب لي واحد من البرازيل.
الى سعود وفيصل من الرياض :بصراحة ان كلامك صدق ترى البنات مايعرفون شي في السيارات فماراح تفرق معهم اللي تفرق معهم السيارات هم القطاوة فمن يوم بعن الكابريس حقنا وشرنا لاندكروزر وانا ا اشوف قطوتنا كل صبح خشتها على الارض من الطيحه.
مشاكل عزاب
س:هلاا اخوي عزووبي انا بدر من الرياض مشكلني كبيره امي واهلي شابين علي لهم 3 سنين يبووني اتزوج وبيني وبينك كل الاعذار قضت وبصراحة امي بدت تشك فيني ………فابي حل لاني مابي اتزوج؟؟؟
ج:حبيبي بدر انت مكبره وهي صغيره وافق على الزواج بس اشرط في البنت ان تكون على النحو التالي,ان تكون جامعيه ولاكملت تعليمها, شقرا وسمرا في نفس الوقت,عين خضرا وعين زرقا ,تتكلم اربع لغات بس ماتعرف تقرا ولاتكتب ,بنت ناس اغنياء لكنها متواضعهوالشرط الاهم ماتحب التسوق ولا الرغي والقيل والقال وراجعني اذا ماقالوا لك اهلك خلك عووبي احسسسسن.
س: انا حمود من القصيم عندي مشكلة البنت اللي احبها راحت تدرس في الرياض وسكنت مع اخوها هناك واخاف عليها انها يجي يوم وتنساني وقلبي ماكلني عليها فكرت ارووح اسافر للرياض انت وش رايك؟؟؟
ج:اما حمود ومن القصيم فكثر منها …ثانيا وشوله قلبك ياكلك عليها بنات القصيم ملح وقبله تروح واحدة تخلق ثانية عادي حب غيرها ترى ميسمونها خيانة لا لا لا هذي يسمونها تمارين حب لياقيه يعني تعرف وانا اخوك اذا جلست فترة طويله وانت ماغازلت ولاقلت كلمة حب يقل مستواك وعطئك فبتتركك لاحقا فلذا خذها مني ماعليك غازل الله معك.
س:عبدالرحمن من الدمام بصراحة ياخوي ياعزوووووبي ودي اطلع لي جوال بس انت خوفتني من عواقبه ولاني ودي اطلع الجوال للمغازل بس وخايف تجي الفواتير بالالوووف والمشكلة عندنا في الشرقيه البنات مايعطون وجه لذوي البياجر ياجوال يايفتح الله …وش اسوي تكفى؟؟؟
ياااااذا الولد اللي بيذبحني قلت لك بالايميل حلفت لك انهن يتمنعن وهن راغبات والله لو ماعندك بيجر ولافي بيتكم تليفون لو بالرسايل يعني عنتر وامرو القيس كان معهم جوالات انت ووجهك ولا روميو مطلع اريكسون ولانوكيا اهم شي تكون عندك ثقة ورجولة وانت ترقم لاتقول لها ياقمر يامادري ايش ابد اسمع كلامي طق اللطمة والحقها وقل لها (يابنت اخذي الرقم اخذ الله روح الشيطان) بس انتبه يمكن في ناس غير البنت ياخذونه وياخذونك معه.
س: انا تركي من الرياض حلمت اني طالع من الجامعه ووقفت عند بقاله باشتري عصير ومروا اربع بنات علي وقاموا يصارخون تركي هذا تركي شوفوا تركي يالله مو مصدقيين انك تركي وجلست اهدي فيهم واحلف لهم اني تركي والي تحضني واللي تبوس فيني اخرتها عزمووني وحلفوا علي اني اركب معهم في السيارة(الصالون)؟؟
والله ياتركي من يوم بديت تقص لي الحلم وانا منجم معك واخر روقان ومتخيل كل شي الى ان وصلنا للصالون والله كانه اللي في بالي فانا لاعرفك ولاتعرفني وكانه صالون من صوالين طريق الامير عبدالله في احتفالات العيد فانا من اليوم ورايح تركي.
س:هلا اخووي عزوبي ودي اشكيلك همي انا اعرف بنت في النت من 3 شهور وحاطها على الايسكيو عندي وكل المسنجرات بس الى الاان راسها يابس مرة يعني مو راضيه واذا تركتها جتني تلحقني وترجاني وتذكرني باللي مضى ويومين وترجع زي من اول وش رايك اسوي معها عبدالهادي من حايل؟؟؟
هذي مو بنت هذي من فصيلة العقد اما الحل معها فهو بسيط مرة ارسل لها 10 رسايل على ICQفيها رقمك بتقول بتزعل معي قل لها لس اجرب هو يشتغل ولالا اذا صدقت فهذا يعني راسها قرب يلين اما اذا تركتك وزعلت منك فالفكة منها غنيمة .
س:حبيبي عزوووبي انا فيصل بن ولاماله داعي كل صيف ارووح اوروبا وفي الاعياد اروح للبنان اللي قاهرني وودي اعرفه على ايش البنات السعوديات شايفين انفسهم والله اللي برا يطيرون العقل وابد 5 دقاايق الا طايحة فيك صدق الواحد وده يروح يكمل الجامعه في بيروت يدرس ويريح ولاتليفونات ولاشي خويتك تروح لها في البيت ويفتح لك ابوها وتطلعون سوا مو هنا تعقيد واهالي البنات وفوق ذا كله الهيئة الكريمة.
ج:حبيبي فيصل الفرق واضح بينهم وبين غيرهم يعني هم زي زيوت بترومين للسيارت (لانها من ببلادنا فهي اقوى على تحمل بيئتنا) يعني هم لازي بنات لبنان ولاانا وانت زي راغب علامة وعاصي الحلاني هذا شي ,ثانياغيرهم يشيلون الكلاب ويبوسونهم وانا اللي نلاحقهم ونشري لهم يعني بنات برا يفضلون الكلاب علينا .بس هذا مو معناه ان بنياتنا كاملات الا فيهن بلاوي النزرة والتغلي على الفاضي وكله كوم واذا كشوا في وجهك قدام الناس في السوق يعني يحطموونك من جد .اخر شي يافيصل ياحبيبي مرة ثانيه كمل اسمك يعني باموووت من الخوف اذا قلت لي اسمك.
دعوة عزوووبي (قبل ماترمي الرقم)
اللهم اجعل فيها من حلا وجمال بنات القصيم وطيبة قلب وحنية بنات جدة وخفة دم بنات الشرقيه وبراءة بنات الجنوب وموقه وتغلي بنات الرياض .اللهم ارزقها باخ في الثانوية داج في بطولات الحواري الكروية وام عندها جلسة حريم الحارة ماتنتفوت وابو من انتداب لانتداب وسوق فلبيني ابن كلب لايشوف و لا يسمع و لا يرى وبيتهم في حي المحمدية كل الطرق اللي حوله سريعه وفاضيه وعندهم علىالاقل 3 خطوط ومالها اخوات اكبر منها في نفس البيت تتلقف عليكم وتاخذ جوالها وتقوول لك انت من صدقك تحب اختي ولاتتسلى معها ويارب يارب تكون طالبة في جامعة الملك سعود أي كلية الا الطب يارب ومن اللي يفطرون في مقهى ستوب او ماشابهه واخر شي تفكر فيه هو الدراسة ياربي تكون تشجع الشباب (يعني مو متعصبه وعندها روح رياضيه) يارب مايكون لها صديقات واجد واحدة منهم تعرفني ولا قد شافتني من قبل .يالله انك سميع مجيب الدعوات……
عزوبي الجزء الثالث
اعزائي الشباب وصلتني رسائل كثيره تسئل عن كيفية المغازل والترقيم في الاماكن العامه يعني الاسواق ,ومن اجل هذا فهذه الصفحة مخصصة للترقيم في الاسواق …والتدييت والاجابه على اسئلة الاصدقاء.
الـتـرقـيـم
اولا :عزيزي التمساح المحترم ..لا تصدق مقولة البنات يحبون الولد الثقيل اللي يعبرهم ..البنات أي شي يقبلون به ..صدقوني اذا لحقتها انبسطت الخبله اذا جحدتها انبسطت وقالت عنك ثقيل ,,صدق ناقصات عقل …الشي الثاني اللي يشتكي منه الشباب ان البنات ماياخذون الارقام باعتبار انهم عيال خونة يعني اللي بيرقمها بيرقم غيرها….طيب يعني وش يبون طالت اعمارهن ..ورقة من الهيئة ان هذي اول مرة ارقم في هذا السوق .
س: كيف ياعزيزي الشاب كيف تقبل على البنت ..من اول مره وتتجه صوبها ؟؟
ج: في السابق كان الشاب يشخص ويرسم ..ويطق هالبسمة ويطلع الجوال ويمسكه بيده ويقترب من البنت ويلحقها لين هي تهدي السرعه وتصرف امها ولا اللي معها .
الطريقة الجديده:ميل شماغك وعقالك وتلطم ..ايه تلطم لان البنات يحبون الانسان الغامض ..ولاتطلع جوالك على يدك ..طلع سلسلة حديد يعني انك شديد وغيور .(البنات يحبون الرجل الغيور) ..ويستحسن انك تكون لابس زبيريه ..(معناها انك رجل عملي مو فاضي تضيع وقتك.) هذا كله مو مهم ,,المهم مرة هو الرقم ..بعض الشباب الله يصلحهم كرته مو كرت الا عينة عطر الوان وريحة وخط يهبل …مادري ليه والله ,,و الله انهن يتمنعن وهن راغبات …لاتجيبون كرت فخم ولا تكلفون انفسكم للي يدخنون ..قطعه من باكيت السجاير وللي مايدخنون ..أي ورقة انشالله من عند بيّاع الذره ولمزيد من التشويق ياليت ترشون الورقة بفليت ( بعدين اعلمكم ليه الفليت ) ..المهم رح يمها على طول انشالله لو هي وسط اهلها وقل لها هالورقة طاحت منك وعطها بيدها وامش …طبعا الواحد بيقول لي انه يمكن ينطق ولا يتفشل انا اقول لكم طبعا لا لانها بتخاف من الفضيحه يعني يمكن تكون هالورقه فعلا طاحت منها اساسا ولا يعتقدون اللي معها انها هي اللي لمحت له علشان يرقمها ..علشان كذا هي من نفسها بتاخذ الورقة وتقول لك شكرا ..خلك ثقل ولا ترد عليها عفوا ..امش واجحدها …اما عن فائدة الفليت ..فمهما كانت البنت ثقل ولاهي راعية مغازل مجرد ماراح تشم الفليت بتعطس وتكح وتحقد على الولد ..ولازم تدق عليه وتقول له الله يقرفك وش راش على الكرت … ساعتها خير وسيلة للدفاع هي الهجوم ..قل لها واحد غاصبك تاخذينه ( حطموا البنت لان البنت اذا كسرت عينها من اول دقيقة ملكتها ولا هي بتركب فوق راسك هذي سنة الحياة)
س:كيف تضمن ياعزيزي الشاب … ان البنت اذا خذت رقمك انها بتدق عليك مو ترمي رقمك لانها خذت الرقم علشان تفتك منك وتتخلص من ملاحقتك لها..؟؟
ج: في السابق الشاب يسوي نفسه مخلص وعلى نياته ويوريها انه بيطلع من السوق كله ..ولا يروح يتشري شي من محل ..يعني ماجيت السوق اغازل بس جيت اتسوق…
الطريقة الجديده:.تميز هالبنت زين اما باخوها ولا باختها ولا ببودي امها ..وبعد ربع ساعه ترجع لها وتمد لها ورقة ثانيه ..يعني مادقيتي الى الان .لاتقولين لي ان جوالك فاضيه بطاريته …..اذا شفتها انها ماعبرتك …ارجع لها بعد شوي وانت معك واحد من السيكورتي انت ماسكه بيدك …ساعتها هي بتختبص لانها بتقول في نفسها وش يبي ذا المستلج ..وبتدق عليك تبي تعرف ليه انت ماسك السيكورتي وناصيها..لاتقول لها الا هالكلمتين ( مو شغلك ..على فكره ترى رقمك طالع عندي..اذا حبت بتقهرك بتقول لك موب جوالي ..اديها على وشها ..قل لها موب لازم يكون جوالك اهم شي انه جوال بنت …..) ساعتها بتضمن انها صارت في موقف بايخ ..ووقتها لازم هي ترضخ للامر الواقع.
س:يتسائل كثير من الشباب اذا حس بان البنت ممكن تفضحه وتبيعها وتخربها وتنادي الهيئة ولا السيكورتي وش المفروض انه يسوي وقتها؟
ج:في السابق الشاب يعتذر وينحاش ويترك السوق كله لها …ويمكن من الروعه مايتعشى ذيك الليله.
الطريقة الحديثة: خلك اوقح منها اذا بتنادي هي الهيئة انت بعد صارخ قل ويين الهيئة وين الهيئة ..علشان اذا جت الهيئة قل لهم اشهدوا ياشيوخ طال عمركم ترى البنت هي اللي نادتني تبيني ادلها على محل ولا انا ماكنت ملاحقها ولا معبرها ..واذا ورتهم رقمك ..هنا بعها بتبن قل لهم ياشيخ معقوله انا اسوي كذا لو اني مسويها كان انحشت وعطيت قبل ماتجون .. الله يعلم ياشيخ انها نصابه ..(على فكره وقت ماتنادي الهيئة طلع الشريحه من جوالك ولا تقفله )
س:كثير من الشباب تحصل عنده مشكله في معرفة اذا البنت فعلا راعية مغازل ولالا واذا هي معجبه به ولالا ؟وايش يسوي اذا البنت جرته لمنطقه فاضيه في السوق؟؟
ج:الطريقة القديمة:الولد يلحق البنت نص ساعه لين هي تبدى تعطيه اشارات …؟؟ويلحقها في الاماكن اللي تمشيها علشان هو يحسبها بتقول له كلمتين .
الطريقه الحديثة: ياعزيزي البنات شبكة معلومات متصله يعني حتى البنت اللي ماتغازل بتروح تقول لصديقاتها واخزياه ولد لاحقني وقام يرقمني وعطاني رقمه كذا وكذا …..يعني لو هي اساسا مو راعية مغازل بتوصل رقمك لبنات يغازلن …ثانيا نصيحه اخوية وشخصيه لاعمرك تلحق بنت توديك لمنطقة معزوله في السوق ولا فاضيه ..لا تتوقع شي حلو من البنت جربوها قبلك ناس كبار وخطيرين بس كانت العواقب سيئة اللي جاه الكعب على خشمه واللي جته تفله على وجهه ومسحها بس بقى جزء بسيط من السعبوله متعلق فوق الحواجب فتفشل قدام خلق الله في السوق .فرجاءا لا تلحق البنت الى منطقه معزوله في السوق ( على فكره قصة الولد اللي نشرت في الجرايد انه طاح من السلم الكهربائي في الفيصليه احد ضحايا هالحركه لحق البنت لين دخلت به لمخرج وطلعت البنت متعلمه كاراتيه ومعها حزام اسود من مانغو وطاحت ترفس في الولد ).المهم لاتسوون كذا ليين ننصحكم بانكم تسوونها.
التـديـيـــت
س: اين انسب مكان لتدييت صديقتك او حبيبتك (التماسيح مالهم احباب بس عندهم عصافير دايما يسيرون عليهم) فقط وجب التنويه لذالك؟؟
ج: في السابق: كان الواحد يديت الجو بتاعه في السوق في وسط الزحام والناس ويكون اللهم لا تبلانا مهوّل بعمره يالابس جزمة ورديه ..يا لابس ثوب شتوي في عز الصيف يا لابس ثوب ابيض ويتنافض في البردي في الشتا ..وهي اذا سالتها تقول لك انا باصير مع كذا بنت بس انا باعرفك وبالمح لك….منتهى الذل بس من الان وصاعدا لا.
الطريقة الحديثة: واعدها عزيزي العزوبي في مكان من الاماكن التاليه وكل مكان بنبين لك وش مميزاته.
1) معرض سيارات >>>هذا المكان اساسا مخصص للرجال بس لانهم ملاقيف ولايخلون شي في الدنيا الا يدسون خشومهم فيه ..ثانيا شي طلعت البنيه مقلب و منتفخه ووارمة (يعني دبه فوق الحد ) ساعتها اصرخ ياخي الجيب طلع 4×4 واذا طلعت نحيفة مرة قل يوووه دايما حظي كوبيه …اما اذا طلعت مقلب من جد عبيده وبراطم وشيفة فساعتها اصرخ باعلى حسك ….افااا ماشيه 100 الف كيلو .
2) سوبر ماركت قسم المنظفات وادوات الغسيل >>> فاضي والبنات ما يعرفون وش فيه يعني لا سمح الله لو طبت الهيئة مو انت بروحك تروح في الرجلين على انك تغازل بالعكس كلكم بتطلعون مديتين لان البنات وبالذات بنات هالايام مايعرفون فيها أي شي فلو تطب الهيئة وقتها هم بينلخمون.مثلنا يعني
3) شارع الحوامل >>>البنت اذا شافت الحريم الثانيات يمشون بسرعه بتظطر تمشي زيهم بسرعه علشان لا يقولون عنها انها ثقيلة في المشي وطبعا الفايده هنا انها ما راح تدقق فيك زين ومن الواضح ان هذا الحل يناسب جدا الشيون اللي ما وفقوا في كذا ديت. سابقا.
4) مطعم رز بخاري >>>لا تسئلوني ليه بس من جد من جد ماشي ونافع معي ..يمكن لاني اكون وقتها معبي ب2 نفر رز بخاري وكابس عليها بعلبتين بيبسي او لبن ساعتها يمكن هذا يعمل مفعول تسطيل زي الحشيش يوحي بالرضا عن النفس غير منتهي.
س: اذا البنت طنشتك ولا جت وش الدبره والسواة؟
ج: في السابق:الولد ينثبر وينتظر ساعه وساعتين واخرتها يرجع والعبره خانقته واذا كلمته قال لها وهو يضحك ابدا ياحبيبتي ما زعلت ولا شي انا مقدر ظروفك…والبعض اذا حب يتفلسف قال لك انه شاف بنت ثانيه وقامت تلاحقه اخرتها رقمها غصبا عنه
الطريقة الحديثة:اذا البنت طنشتك ولا تاخرت لو خمس دقايق غادر المكان او بمعنى اخر خلك هناك بس عن بعد يعني في طرف ثاني واجلس هناك ربع ساعه دق عليها فورا وقل لها جاك ظرف طارىء وماتقدر تروح للموعد >>>بتقولون وش ذا الحكي .. لانك اكيد .بتلقاها منلطعه هناك >>وشلون تعرفها بتلقى بنتين يدورون ويروحون حول نفس مكان الموعد من بعيد لبعيد..لان البنات ناقصات عقل عندهم طبع غريب يبون كل شي ولايبون للاولاد شي يبون يشوفونك بس ماتشوفهم فمني انا اضمن لكم بتشوفون البنتين صابتهم خيبة امل يا يطلعون من السوق يايروحون يتسوقون ويتصرمحون >>>>مقيوله من قبل النمله تمشي على ريح الدسم…لذا تذكر عزيزي التمساح انك مهما رحت وجيت كتلة دسم تمشي ..وان اعين النمل عليك.
س: اذا انت عزيزي التمساح كنت من جد تمساح شيييفه يعني من جد شين مرة ولا وقت الديت لاسمح الله مفلوق ولا مصاب مقطوع لك خشم مشرحة لك جبهه….تروح الديت ولا لا ؟
ج:في السابق ترسل احد غيرك للديت نيابه عنك ولا تطلب التاجيل.
الطريقه الحديثه:عزيزي التمساح قوّ قلبك ترى من نعمة الله على هالبلد ان البنات يتغطون ياما تحت النقابات بلاوي اشكال تروع وكله كوم وبنت بشنب كوم ثاني ..ياشيخه الله يقرفك ماسمعتي عن مزيل شعر يعني المهم اقول لكم هالحكي من وحي الرحلات الدوليه ياما شفت بلاوي جنبي في الطياره كانت متغطية بعباة بعدين يطلع العفريت من العلبه ..بس هذا لا يعني مافي بنات حلوات لذا ااذ طلعت عن جد هي حلوة وانت شين خذها بالحكي اللي يفتح النفس …اهم شي اني احبك واموت فيك ولا اقدر على فرقاك ساعتها هي بتحترم نفسها وتقول صح عليك اصلا الشكل مو اهم شي اللي جوا اهم وانت تحبني صح..(للاخوان في جده تنطق تحوبني ) .
تكملة على التليفون
س: بتسئلك البنت …وش اكثر شي يعجبك فيني ؟
في السابق : كلك على بعضك حلوة (حشا كاظم الساهر ) شعرك وصوتك وضحكك وثقافتك واسلوبك…بس هذا كله خرطي الف غيرك قد قاله لها وبيقوله لها .
الطريقة الحديثة: دور اشين شي فيها وهي عارفته وياحبذا شي قد قالت لك انها تكرهه في نفسها ..يعني مثل العصبيه …ولا نفرتها اللي في خشمها ..وقل هذا اكثر شي يعجبني بتقول لك كيف وهذا يضايقني ..قل لها ياحياتي مو لان لقيت فيك شي واحد يعني مو حلو مرة زيك بس حلو شوي ..فقمت حبيته يعني حبيت اللي اقدر اقول انه على قدي >>>لاتقولون لي ترجم ترى اللي صار ياجماعة الربع اني تفلسفت بهالجمله في الايسيكيو على بنت وداخت علي ..قمت رجعت للهيستوري لقيت هالكلام فنقلته فيمكن اني نقلته من اليسار لليمين او من تحت لفوق المهم انه مضمون.
س: بتسئلك البنت…ودك تشوفني صح ؟
ج: في السابق: ايه ايه اموت واشوفك امنية حياتي وغاية مرادي ياليت اشوفك وبعدين اموت …لا صدقوني كذا ما ينفع. ولمزيد من العلومات عن ليه قلنا لا ,,,راسلوني في الايميل واعلمكم.ولا خلني اخربها ..بتقول لك البنت ترضاها لاختك انها تواعد ولد يالله رد علي قل ترضاها انا موافقه ومستعده ..انا ماني رخيصة من بغا يشوفني طلعت له.
الطريقة الحديثة: لا والله ماني مستعجل على شوفتك >>بتشهق في وجهك وشوو ماتبي تشوفني ليه قالوا لك عني شيفه ( يعني هنا انت اللي تخليها تلزم عليك تشوفها) لا مو قصدي كذا بس بالله عليك يعني وش باشوف بس عيون من حدر نقاب ولا براقع ..بالله عليك وش باشوف خليها بعدين في الصيف نسافر كلنا برا ونتقابل >>>بترد عليك ياسلام يعني اذا شفت عيوني ماراح يبين انا حلوة ولالا ثانيا انا اتحجب مو اتغطى ولا اتنقب ولا تبي تشوف شي غير وجهي ( جاك يامهنا ماتمنى وانت متربع ومتسلطن )
س:بتسئلك البنت ….الا وش اكثر شي تكرهه في البنات السعوديات وبالذات اللي قبلي انا عارفه انك كنت تعرف بنات قبلي لاتنكر؟
ج: في السابق: الولد كانه قربه وانفتحت ..يبدى يقول اكره الغيره واكره غبائهن واكره ..واكره واكره
الطريقة الحديثة: ياعزيزي التمساح ترى كل البنات مثل مثل عيوب غيرها فيها ..فخلك عاقل وابتسم ابتسامه خفيفة قل لها انا انسان ماعمري كرهت ولا شلت في قلبي على احد ..هذا شي غير اني اذا حبيت انسان من قلبي اصير احرص منه على عيوبه واني اخفيها اكثر منه ..وحتى لو اشوفها بعيني اغمض عنها >>>كلام مجرب سمعوه وماعليكم.النتايج مضمونه البنت بتبلع لسانها.
س: بتسئلك البنت ….لو افترقنا بعد وقت يعني لو صارت ظروف ترضى تكون صديقي ولا خلاص ننهي علاقتنا ببعض؟؟
ج: في السابق : لا تبقى اصدقاء اهم شي اني ابقى قريب منك حتى لو اكون خادمك مو صديقك بس ..انتي ماتدرين انتي وش تعنين لي>>كلام افلام ماله فايده
الطريقة الحديثه: لا طبعا اصلا باقتل اللي يفكر يحبك …ما اقدر استحمل اشوف بعيني احد غيري تنادينه حبيبي >>> خلك حمش غيور حتى لو كنت حمار … المهم هالكلمتين وللايضاح لهم نتيجتين عكسيتين اما البنت تتعلق فيك وتقول لك وااااو انت جمل شي شفته في عمري …ولاتقول لك لا يابن الناس من اولها بلاها هذا اللي ناقص بكره لو انخطبت تكفخ خطيبي لا شكرا يا افندم ما تعطلناش.
س: بتسئلك البنت ..وش برجك حبيبي…..(ملاحظين انها طيحت الميانه وسمتك حبيبي لو انك قلت لها حبيبتي قالت يوه الشباب السعودي كل بنت يكلمونها يقولون لها حبيبتي )؟
ج:في السابق : التماسيح نوعين نوع يندلق من خشته ويقول لها برجه ..والنص الثاني يستخف دمه برج برج التلفزيون ولا برج المياة ولا برج الجوال ….
الطريقه الحديثة: قل برجي ….مثلا برج الدلو ..هي بتطلع لك من هالحكي الرخيص وان برجك انت يالدلو مايتلائم مع برجها و..و..و..و..و.. بعدين عطها على خشتها قل لها يؤ نسيت معليش برجي برج الحوت مثلا..الدلو برج اخوي بس دايما اتذكره اكثر من برجي لاني اعايره بالدلو ..ولاني مو مهتم بالابراج …وقتها اما البنت تتحطم وتسكت عن نواياها الشريره ولا بتقرق على برجك الثاني مثل الاول وانه مايتوافق مع برجها ..وقتها قل لها وجع وانتي برجك ما يتلائم مع برج ليه انشالله برجك( في أي بي )…يعني فهمها انك تفهم في الابراج وكاشفها من اول.
س: بتسئلك البنت …..وش شعورك اذا قلت لك اني احب واحد غيرك …من جد احبه موت بس الان في ظروف بيننا بس انشالله بنرجع لبعض.؟؟
ج: في السابق: الله يهنييكم ..وعلى العموم انا وانتي اصدقاء ..صح ولالا >>لا ونقولها واحنا متوترين تقبلنا ولا ترفضنا مالت علينا من تماسيح…الله يرحم تماسيح من اول.
الطريقة الحديثة:طيب الحين ليه داقه علي …على فكره انتي شكلك من اللعابات >>>علشان تعرف اذا هي صادقه ولالا…اذا كذابه بتخر لك انها كانت تبي تشوف ردة فعلك…واذا صادقه بتقول لك يعني ماتبينا نكون اصدقاء ..ولا انت ماتؤمن بالصداقه بين الولد والبنت …الحين تشم هوا وتوخر التعصيبه عن خشمك وتقول لها ..مو كذا قصدي بس صدق ما احب اكون في موقف مابي احد يوقفه معي يعني مابي ولد يكلم البنت اللي احبها ابدا ابدا …بتقول لي يعني تبيني اسكر …ساعتها انت تدارك الموقف وقل لها لا طبعا نقدر نصير اصدقاء بس ماتجيبين لي طاريه …يعني انت يالولد نفسيتك تتعب بسرعه .
الموضه
عندي في فقرة الموضه شيين باقولهم لكم واذا عجبتكم الحمدلله واذا لا براحتكم….
· اولا ثوب ابيض سعودي ولا حتى قطني مو مشكله بس الازارير تكون سودا مثلثه او سودا مستطيله …والياقه تكون مثلثة الشكل وتوصل لانها تغطي الاذنين (موضة هالسنة الشكل المثلث ) اما الكموم فايضا يكون فيها فتحتين واحده للكبك والثانيه للزرار الاسود يعني احسن تكون سكبه اكثر ….
· ثانيا …لهواة الملابس الغربيه ..مع هالحرورة مالكم الا الشورتات ..وبالنسبه لشعر الساقين فيفضل اما حلق شعر الجزء الامامي للساق او حلق الجانبين يعني بيعطي الساق شكل حلو ..>>>سيقان على قصة كابوريا وبالنسبة للتي شيرت فيفضل زي تي شيرتات كرة السله يعني اللي تطلع الاباط واخر الاخبار تفيد بان تربية شعر الاباط اصبح موضه,, الله انت ماشي واباطك وهي مشعره طالعه ..فكره حلوة …الشي الثاني مع موضة تطير الشنبات الموضة في باريس هي براطم مشعره ..يعني يزرعون شعر في البراطم …اما الجزمة فكانت الموضه الجزمة ذات الكعب العالي اما الان يكون الطرف الامامي للجزمة هو اللي عالي حوالي 30 سم ..والجزء الخلفي بدون كعب ..علشان يصيرون ينادونك ولد مطيح … .
اسئلتكم
· س:هلا عزووبي انا عبدالله من الرياض 25 سنة مشكلتي بسيطة ..انا اذا بغيت ارقم اخذ معي ولد خالتي توه عمره 16 سنة في الثانوي صحيح انه دب وجسم ..بس المشكله اذا شفنا بنات فالينها وسعة صدر وجت واحده منهم وسالته وش اسمك جاوبها ..رامي ويدلعوني رامووي ..ساعتها البنات يكرونها ضحكة ويمشون ويجحدوننا صرت احسهم يحسون ان اسمي وائل …والله تعذبت وتحطمت وش تنصحني به؟؟ اخذ هالدب معي ولالا؟؟
· ج: هلا بك ياخوي عبدالله بالنسبه لموضوع ولد خالتك فانا انصحك انك تحفظه انه اذا سالوه البنات يكتم الضحكه ولايقول شي وان مرة مرة انزنق يقول فارس يعني صح كلهم اسامي مدري من وين جتنا بس شي اهون من شي …وبالنسبه للبنات اذا جحدوكم انت بعد دبر عمرك الحقهم قل لهم انه يمزح ناده خالد ,,تركي أي شي وقل له يوقف مزح.
· س: انا اسمي منصور من القطيف ادرس في الرياض ومبسوط واحوالي ماشيه بس المشكله امي وابوي يبون يزوجوني غصب عني وانا ماودي ابي اتمتع بعزوبيتي ..اخر شي نصبت عليهم نصبه قلت اني خطبت بنت من الرياض والحين هم راسهم والف سيف الا يجوون يشوفونها انت وش رايك وش اقدر اسوي.؟؟
· ج: شف انت غلطان يومك انزنقت توك ترسل لي ادبر لك عذر بعد ما حجرت لنفسك بنفسك ..بس الحين مالك الا تدق عليهم ..وتقول لهم الحمى القلاعيه منتشره في الرياض ..فلاتجون الرياض لين اعطيكم خبر تجون لانها موبوئه بالحيل بالحيل ..وبعد شهرين دق عليهم وقل تعالوا للرياض واذا سالوك عن البنت ..اذرف لك دميعتين وقل الله يرحمها شالتها الحمى القلاعيه >>بتقول لي بيرجعون لاسطوانة الزواج …انت اصبر شهر بعد وبينتشر في الدوله مرض جديد ..الله يسلم لنا طقم الوزراء المبجلين مع كل مرض ينتشر يطعمون ضده هم وعيالهم وماتشوفهم الا برا الديره >>>اجراءات وقائيه…وارجع لنفس اسطوانة البنت من جديد
· س: انا الجوهره من قطر بغيت اسالك ليه انت متحامل على البنات ونصيحتي تغير اسمك من عزوبي الى فاشل ويا البنات وش رايك…؟
· ج: مثال على اللقافه اللي حكيت عنها في اول الصفحة اكثر من كذا ماني قايل شي.
· س: اسمي ماجد من جده ..احنا شباب جده عندنا مشكله عويصة بنات جده بيسموننا خايبين في الغزل وبيفضلوا علينا ولاد الرياض وماغير تشوفهم في الصيف يعطون اولاد الرياض وجه واحنا ركبه وبنات الرياض يعبروننا بس في الاجازات يطلعوا كانهم رايحين لخروجه على البحر ..تلقى العايله كلها في السواق حتى البزورة كمان ايش العمل في هالورطة.
· ج: مجودي مادمت عايش تذكرها مني حكمة (يتمنعن وهن راغبات ) ثانيا هم يسوون كذا علشان ولد الرياض بينهم وبينه الف كيلو متى ما طنشته على التليفون خلاص يعني وش بيسوي لها ..حتى احنا في الرياض نفس المشكله بنات الرياض يمدحون في اخلاق عيال جده وجمال عيال الشرقيه ..واذا صرت يالولد ابيض قالت احب الشاب الاسمر ..واذا صرت قصير قالت ابي واحد طويل …بس في النهايه عاملين فيها ماني عارف ايه ولو تركتها قالت يووه ماعنده ثقة في نفسه ..من جد هم انفسهم مايعرفون وش يبون ..بس اهم شي انت يالتمساح المقدام لا تفقد ثقتك في نفسك .
· س: هلا اخوي عزوبي انا طارق من الكويت…عندي سؤال قاهرني ليه البنات يعايروننا ويسموننا رجال باسكال ومجانين نوال الزغبي ..يعني هم العاقلات اللي اذا شافوا طوني في LBCالواحده منهم تنهبل ..شي ثاني ..ياخي ماتلاحظ ان الشيف دايما هم اللي مهولات باعمارهن ملابس مغريه والوان و انواع الفصخ ليه..الحلوات مايسوون مثلهم؟؟
· ج: و الله يا عزيزي بالنسبة لسؤالك الاول …فما عليك اوكيه اذا احنا شباب باسكال يعني وش يبوننا نصير رجال احلام وهند ورباب …ولا رجال عاصي ..علشان يقولون بكره اللهم لك الحمد العيال استخفوا وقعدوا …. ثانيا يعني رجال باسكال ..وش شايفينّا باسكال تاركه شغلها وتقابل فيننا ..بس هم من القهر ليه نقول باسكال حلوة ..ثانيا الله يهدييكم يافرع العزوبيه في الكويت يعني حبوا باسكال ونوال ونجوى بس عبروا اللي قدامكم يمترون في سوق شرق تمتير حفت رجولهم وانتم ورى العمله الصعبه ترى العمله المحليه لها عليكم حق …اما عن سؤالكم الثاني ..فمن التراث الانساني القديم ان العبندي اكثر جراءه ..اما الاسباب فهي غير معروفه يعني علمها عند الله بس انا شخصيا اتوقع انهم يبون يظهرون اكثر قدر معين يعني يشتتون التركيز على جزء معين يعني ماينقال عنها شيفة مرة ينقال بس شيفة شوي.والله اعلم.
واخيرا اعزائي العزوبيين التماسيح الافذاذ تذكروا دائما وابدا انكم دهن يمشي على ريحكم النمل (أي البنات ) وانكم بنزين لكل سياره مو بنزين هالايام لا بنزين من اول اللي ريحته تدوخ ..وتذكروا انكم ثلاثة رباع المجتمع ان ما كنتم اكثر… لايهمكم حكي البنات عنكم لانه لو كان صدز كما يدعون اذن ليه يكلموننا وتقبلوا تحياتي وا اشواقي ولنا لقاء قريب باذن الله …….عزووووبييي
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
