في البداية احب التنوية الى ان هذه القصة الخيالية ليست دعوة الى الانحلال او اي شيء من هذا القبيل انما هي وجهة نظر ونصائح ترسلها فتاة في ريعان شبابها وبعض من ارائها……وشكرا
كيف تتصرفين مع الللي ما يتسموش طبعا الشباب
فلنفترض ياعزيزتي انك رحتي للسووق وطبعا زي العادة في وجهك هالشباب زي الذباب فكيف تتصرفين معهم
اولا:خلينا نقول ان الولد اللي قدامك اعجبك وجاز لك وارتاح له قلبك بس انتي مع امك وش تسووين…هنا بر الوالدييين يشتغل خلي امك تمشي قدامك واذا قالت لك لا قولي ابدا لايمكن واذا استمرت امك بقربك طيحة واحدة من الاكياس اللي معك واذا كنتي من اللواتي يلبسن صندل كانك تصلحييييين صندلك. وعطي الوليييد نظرة من بتوووعك
ثانيا:هالمرة الولد اللي قدامك شين ومعفن ومخيس وماله طعم وماصل وش تسوين وهالمرة مامعك احد خذي هالخطة تعطين الولد نظرة ناعمة وتمشين بتكسر وتروحين الى مكان مافية زحمة في السوق وهو طبعا بيلحقك واذا حسيتي المكان امان عندك حل من اثنين اما بالجزمة او بالشنطة اذا لها حبل طويل على جبهة الولد وارجعي الى قواعدك سالمة واذا في امه خير خليه يقول قدام الناس البنت ضربتني.
ثالثا:واحد شين معفن وبقوووة وماخذ مقلب في روحه هذا المنظر يكثر في ايام الزحمات زي قبل الاعياد هنا لاترووحين السوق الا معك قلم حبر سائل وريشته مكسورة واذا قربوا يمك افتحي القلم وحركييييه حركة عشوائيةيعني بالعربي ملي ملابسهم حبر واختاري لون اصفر له معنى بعديين تفهميينه
اولا:لاتروووحين للامكن المزدحمة هنا الشباب يذكروونني بالضباع يحسبوون انننا معطيات اللي يلاحقوننا وجه فيقومون يلااحقووننا بعد,روحي لاماكن مو مزحومة ولا فاضية وحاولي تتفادين الاشارات
ثانيا:هنا يبدا الشغل تحتااجين ياعزيزتي طابق بيض في سيارتك لييه تقولين ليه؟؟ اقوول لك تنزلين النافذة وتمدين يدك الحوة الناعمة بقبضة مبسوطة فيها بيضة الغبي بيقرب سيارته منك وهو فرحان هنا ما اوصيييك باليضة على نافذة سيارته الاماامية هنا بيضيييع الولد والخطوة التالية بيضة ورا بيضة واذا السيارة يابانية تكفي بيضتين امريكية ولا المانية 3 بيضات اما اذا صالون 3 بيضات ونص
ثالثا:اذا انتي مرررررة الولد قاهرك ولا راعي كريسيدا ولا كورولا ويتفلسف تحتاااجين هنا الى حركة بسيطة مررررررة وهي انك تاخذين ستة مناديل شفتي كييف بس سته وترمينه وتفلينه على النافذة الامامية يعني القزاز الامامي وبطريقة رومانسية حالمة ..هنا عااد علمووني اذا الولد قدر يوخره
وسلميلي عليييه……
على التليفوووون
زي العادة هالذباب اقصد الشباب بجوالااتهم في الاسواق كل واحد رازه ماتقولين جوال تقولين اخوه الصغير ويعطووننا الارقام واحنا ياقلبي ياكتاكت يامانتا شايف وساكت طبعا الكل يعرف ان الجوال يظهر رقم المتصل هنا يبدا اللعب مع الكبار اشتري بطاقة اتصال مدفوع ب25 ريال بوجة نظري مايستاهلون اكثر من كذا وهذي ارخص بطاقة للاسف المهم اتصلي عليه ولاتقوليين زي العااادة فلان موجود ولا انتي فلاان طبعا الاسم اللي معك اسم نصب قووووولي التالي وبشكل سريييع يمّه ارسلي لي السواق على بيت زميلتي فلانة طبعا الغبي بيقول لك الرقم غلط هنا ردي عليييه كييف هذا رقم من اذا قال لك نفس الاسم اللي مع الرقم فهو شيطان ومحترف اما اذا قال اسم ثاني فهو غبي يعني وش اقوول بعد المهم قولي اسفة وهنا اسفة بنعوومة شكلك تنتظر احد بيرد عليك لاطبعا قولي معقولة ولد محترم مثلك ما احد يكلمه هنااا اشد رجل يخر من قلب وعلى شان ماتضيع فلووسك قولي له باتصل عليك بعد شوي بس اكلم امي بيقوول لك ياهلا بك دايم هنا طبقي الخطة الهجومية قولي له بعد ربع ساعة بادق عليك من الجوال ومن اول رنه باسكر ودق انت.
طيب اذا الولد طلع خبيث وعطاك رقم بيجر هنا يبدا التكتيك على اصوله دقي عليه بيجر من جوّال أي جوّال بيدق علييييك بسررعة مو ولد سعودي اكييد بيسوي كذا ردي علي بفشخرة نعم بيقووول احد داق بيجر هنا لاتنتظرين ردي عليه خير عسى ماشر بيقوول لك الرقم ظاهر عندي في البيجر قولي له بفشخرة اقوى من اللي قبل الىالان في بياجر ياقدمك هنا بيحاول يطول الحكي عاادي مو على ظهره الفاتورة وبعد 3 دقايق وربع اسئليه انت وش اسمك بيقول لك اسم تلفيق اذا حسيتي انه خفيف دم مشيها اما اذا لاوالله قولي له طيب ليه كاتبه هنا بشكل ثاني وسكري السماعة في وجهة.
اما اذا الولد عطاك رقم بيت فاكيييييد عنده كاشف رقم وش تسوويييين بتقوليين نرجع للبطاقة اقووول لك لا لا لا….كلمية من بيتكم الساعة 11 ونص الليل بيرد عليك هلا ولامرحبا ولا مراحب ولااي شي ثاني بهدوووء وادب ممكن اكلم فلانة بيقوول لك لا قولي اسفة بس لاتسكرين اذا سكر هو فاكيييد انه شايف له شووفه او يعرف بنات ثانيين اما اذا ما سكّر فاعرفي انه هو الهدف اسئلييييه برواقتك المعتادة ليه ماسكرت انت شاغل الخط ..بيضحك لك ويقول سكّري انتي انتي المتصلة او بيقول لك LADEYS FIRST اضحكي ضحكة ناعمة وقولي له كلك ذوووق يعني اسكر انا اذا هو مؤدب ومحترف بيقول لك ماودي اذا هو دلخ بيقول لك ايه هنا عاد سكري من قلب نرجع للمؤدب نرجع للمؤدب بعد سكري واتصلي بعد ربع ساعة وقولي له طلعت غلطانة في الرقم من شوي بس حبيت اعلمك اني ماني من اياهم بيقول لك لاوش دعوى اضحكي وقولي الا كذا معظم الشباب بيقول لك ماني منهم هنا عطيه السؤال يعني بذمتك بذمتك هاااه مارحت تشووف الكاااشف بيقووول لك بضحكة فرنسية بايخة لاوالله هنا اعرفي انه كذاب وارنووب وراعي حركات ولاعاد تعطينه وجه اما اذا اعترف فسامحيه علشان يعرفون اننا اقوى منهم في هالالفية الثالثة.
التحطيم
في هالعدد سوف نركز على كيف نحطم الشباب من اول مكالمة ونسويييهم بالارض المرات الجاية سوف نناقش العلاقات الغرامية والتعرف.
س:هل تحب الشعر ؟؟
ج: بيقول لك طبعا اكييد احب نزار قباني وخالد الفيصل وبدر بن عبدالمحسن وانتي؟؟
ردي علييه بكل بروود انا ماحب الشعر ولاتزيدين عليها جمله المفروض بيتحطم فرضا كان قوي اسئليه
س:تحب الروايات والقصص؟؟
(هالمرة بيسوي فيها ذكي) لا
ردي عليييه ياخسارة انا امووت في الروايات
س:من مطربك المفضل؟
ج: بيقول لك يامحمد عبده ياراشد الماجد اما اذا قاري صفحة العزوبي فبيقول لك مطربين هالايام ماعندهم سالفة يشبهون بعض ,هنا تردين عليه بكل استهتااار تعرف فرانك سيناترا لالالامو الهمبرغر حق هارديز هذا مطرب ماات بيقول لك ماعرفه اصلا قولي له حراااااااام عليك وتقول انك تسمع اغاني صدق ماعندك سالفة.
س:وين تسافر بالصيف ؟؟
ج: بيقول لك الصيف اوروبا ولا امريكا وفي نص السنة القاهرة ولا بيروت لاتحتارين ابد قولي له وبلدك ياخي عندنا مصايف تجنن ولا تصييع برا بيقول لك وانتي قولي له انا بنت لازم ارووح مع اهلي ثانيا عندنا فلة في جنييف على فكرة اهل جنييف عايشين برا جنيف مو صارت جنيف كلها سعوديين, وكملي ولاانا بصرااحة امووت في طبيعة عسير والطايف ودي ارووح لها ولا ارووح اوروبا
س:كم عمرك؟
عمري —- هنا رد سريع تبي تعرف عمري بيقوول لك براحتك قولي له لاعادي وخلك اكبر منه بسنتين ساعة بتجي الولد ام الركب ويبلم تبلييييمة ماصاارت قولي له ليه ساكت
بيرد مافيني شي (هالموقف ولاولد اجتازه الا وااحد بصرااحة )
س:وش سيارتك؟؟
ج: بيقول لك سيارة فخمة اكييييد قولي بلهفة وااااو بيفرح هنا عطيه الصدمة الكبرى انت من اياهم شباب التخصصي والثلاثين بيقول لك لاوالله وما ادري ايش قولي بصراحة هم ناقصيم وسياراتهم مكملت نقصهم
س:وين تدرس؟؟
اذا قال لك طب ولاحاسب الي ردي عليه مع اني من كلاامك احسك اداب اما اذا كان من الاداب فالضرب في الميت هنا حلال قولي له بضحكة ناعمة ..تصدق مبيّن عليك كذا …هههههههه.
س:وش المواصفات اللي تحبها في البنت؟؟
اذا عطاك مواصفات فزي أي شاب سعودي خليجي بيذكر لك الجسم والشكل والشعر وبينسى العقل قولي له انت من شباب باسكال (لقبهم الجديد) للاسف تخلف واسحبي تنهيدة قوووية تدل على التحسر والقهر .
س: تقبل تتزوج بنت كنت تعرفها من قبل؟؟
ج:هالسؤال صعب مررررة بعض الشباب يحبوون يتفلسفون فيه اللي يقول ايه واللي يقول لاواللي يقول اهلي هنا الرد الحاسم اللي يحسسهم بقدرهم في الالفية الجديدة (وهل تظن انها هي بتقبل بك ؟؟؟؟؟طبعا لا ما اظن كذا
اعرفي عدوّك
الكروووت درس خطيير وحساس
الكرت المحترم المعطر اللي ينباع في جرير والشقري اعرفي ان راعيه شاريه منه درزن وبيطيرهم في ليلة واحدة.
الكرت العادي –يعني كاتب عليه اسم ورقم –عادة اصحاب هذي الكرووت عندهم بزة بانفسهم عامليهم بالمثل تاظري الكرت باحتقار وطلعي ضحة تريقة عليه.
قصاصة الورق هذي اصوولها تذبينها في الارض وتسفلييين باللي كتبها قدام خلق الله.
المّوضة
الكل يسئل بنات الالفية الثالثة وش جديدهم بعد اللثام والنقاب الوسيع والبراقع اللي تطلع نص الخشم سوري الانف
جديدنااااا مدمّر لثام طولي ايه طولي نصف الوجة الايمن تطلعينه والايسر تغطينه بغطوة من طبقتين الفكرة تدلين على جمالك من جهة ثانية غثووك شباب وتبين تعلمينهم انهم ماجازوا لك تقومين تغطييين النصف الثاني
شفتي كييف خطط
مكياج الالفية الثالثة لابد ان يكون متميز عن غيره
الروج لون هالسنة ازرق ببقع سود بيطلع مسكت بشكل يعني الشفايف زرق وترسمين فيها دوواوير سودا صغيرة …. قنبلة هالسنة
الوجة الموضة السائدة الان هي (الانيميا ) تخلين لون وجهك اصفر باهت كن فيك انيميا تقولييين ووووعععع خلي عنك هالحكي احنا داخلاات على صيف صييييييييف غير صيووف العالم كله يلعب بالالوان الاصليه يخلي البيضا سمرة والشقرا حمرا علشان كذا (الانيميا) غير حفاظها على لونها الا انها تضفي شي من الحزن والرومانسية المعذبة
الشعر ..لون هذي السنة هو اللون الوردي المشبع بخطوووط خضر من اول ماتقرينه بتقوولين سخييف ولالون غريب, الفكرة انك توحين الى شيئين هنا اولهما الوردي يوحي الى الوروود والزهور بينما الاخضر يوحي الى الطبيعة
تحدير للعبيدات :يطلع بني غامق مشبع بخطوووط حمر ..نعم وش يعني ؟؟؟
هو ما يعني شي بس علشان التفرقة بين البنات البيضاء والعبيدات بس كذا..
العبايات :الموضه الاخيرة تكون ضيقة علشان تبين الجسم هذا من زمان الان الموضه عباية اسمها عباية الدورادو اسمها الاسباني يذكركن بماربيا لكن تذكروا القبعة الاسبانية يعني تخليين النص الفوقااني ضيق مرة النص اللي تحت مو وسيييع لا يكون اخره مقطع زي فساتين الرقاصات على شكل شرايط منها احسن للتهوية والتكييف ومنها احسن للفرفشة والكشخة والحركات ولاتنسوون اسمها عباية (ألدورادو).
الاحذية:الموضه الدراجة هي الصتدل ابو خيووط ملوونة بس صندل الفيصليه ليه الفيصلية مو ماركة بس ارتفااع يعني علشان تلبسينه تحتااجين سلم كي تركبينه قصدي تلبسينه بس في ملااحظة يحتاج الى تمارين للقدمين بحكم صعوبة المشي به ورفعه عن الارض.
الخواتم:الموضه هالسنة هي خير الامور الوسط يعني تلبسين في الاصبعين الاوسطين اللي في اليدين الثنتين كل اصبع منهم امليه بثلاث خواتم اشيك وتكون خواتم نيكل لاذهب ولافضة ولا غيره نيكل لمّاع وتحطين حلق اذن نفس الشكل اما باقي الاصابع ماعليك منها بالمرة ومثل ماقلنا لو مافي السوق نيكل ارسلوا لنا ايميل وحنا نشتري لكم.
النظارات:في العام السابق كانت النظارات الملونة والفريم ليس هي الموضة هالسنة الموضة هي النظارات ام لونين ايه عدسة بلون والثانية بلون ثاني وهذي فيها نيزة للي تحب فريق معين زي الشباب مثلا تخلي واحدة سودا والثانية بيضا وفيها ميزة ثانية تساعدك على التغيير يعني البيضا هي اللي في اليمين والسودا في اليسار واذا مليتي بدلي بينهم ولا اسل منها صح ولالا؟؟
الطريقة:اولا تذبحين الخبزة من النص بالعرض اما اذا كنتي من اللي ما يتحملون مناظر الرعب فننصحك بخبز التوسط وبعدين تحطين السكين في عبة الجبن السايل وتلفين بها في العلبة يمين ويسار ومنها للخبزة الى ان تمتلي بالجبن وبعدين تحطين قطع الخيار فوقها وتطبقين الخبزة على بعضها .
ملااحظة هامة:صدر الدجاجة مانعرف وش السواة فيها لقيناها مكتووبة في كتاب ابلة حظيررررة…طبعة 2000.
مشاركااااتكم حبياااتي
س: احنا اربع بنات وولد واحد ومع ذالك مافي عدل بالمررة الولد طال عمره معه كاديلاك وجوّال وتليفون خصوصي وحنا لنا كورولا بوكس وسواق هندي شايب ورقم بيجر واحد على اربع اجهزة ومع كل هذا مقاسمنا في هالشايب كل ما اشتهى قال كومار ودني وجبني وحنا اللي نحتاج السيارة وماعليه مننا اخر مرة كان عندنا بنات خلانا نشتري العشا من المغرب علشان هو يبي السواق يوديه الثمامة …شفتي القهر وش نسوي به؟؟؟ عبير من الرياض
والله الحل سهل ومريح لافيه قتل ولايحزنوون اسرقوا جوّاله وكلموا به على روسيا والكونجو وطلعوا الفاتورة ماتقل عن 20000 ريال ساعتها تشوفونه يتمنى الكورولا ولو ينحشر معكم ورى.
س:في البداية ودي اشكرك على هالصفحة وودي اسئل سؤال بسيط هذي اول سنة لي في الجامعه ياشيخة الجامعه جو غريب بنات فوووق ماتوقعت وحفلات ديجي وطلعات للاستراحات نص الاسبوع وبنات زي حالااتي الله يرحم حالنا نجتمع شهر على ماندير جمعه في بيت واحدة مننا يوم اربعا ولا خميس وغير بنات يحتكوت بالدكتورات واشياء كثيرة ودي تعلقيين عليها؟؟روان من الرياض
ماشالله علييك ياروان اول سنة ومشغتلة ملاحظات انا اول مادخلت الجامعه جلست انادي كل واحدة اشوفها يادكتورة حتى هنديات التنظيف واول محاضرة حضرتها جلست اطير عيوني اول خمس دقايق وفي نص المحااضرة الاواصيح الدكتورة وقفت المحاضرة وقالت وش فيك يابنتي ؟؟ قلت لها يادكتورة ماني في شعبتكم دخلت القاعة الخطأ ….الدكتورة خلت واحدة من الطالبات تاخذني بيدي وتوديني لقاعة شعبتي .
س:انا سارة عشت 10 سنسن في ارميكا وبصراحة بصراحة اللي يحصل في الاسواق هنا تووو متش حتى الامريكيين ماييسوون كذا وش الحل معهم ؟
لاتقولييين ابلغ الهيئة لانهم يصارخون علي تستري تستري قطع انا وش سوويت؟؟
حبووبتي سارة ابشرك ابشرك شركة بيف باف طلعت عبوة صغيرة سبراي اذا قرب يمّك واحد منهم ابد ياوخيتي الا تعرفين معنى وخيّتي تراها مو شتيمة المهم تبخييين فلييت في عيوونه
س:حبيبتي بنووتة الالفية ودي الشباب يعرفون انهم ما يهمونا ولايشغلون بالنا ولاتفكيرنا عكسهم اللي احنا شاغلين كل وقتهم وتفكيرهم لاديجيتال ولاانترنت ولاجوّال ولا سفر اللي يدورون فيه علينا؟؟نوال ومها من جدة
أي والله قلتوا الحقيقة حتى في العسكرية ماعلى لسانهم الا طارينها نجمة وشرايط ورتبية قايلة لك انهم قااضيم متولعييين فينا بس كش عليهم.
س:انا ولد واسمي سعود ودي اعلمك ان صفحتك بايخة والبنات هم اللي يدورون اولاد ولا علمينا ليه الاسواق النسائية فاشلة دايما؟؟
والله ياعيووني يالشييين فشل الاسواق النسائية جاي من الحريم كل واحدة معها ولدها اللي في سادس ابتدائي واللي في الثانوي ومرة واحدة جارة وراها اثنين جامعيين ويوم قالوا لها مايدخلون ياخالة رديت عليهم خلخلت عظامكم من كبرهم تمنعونهم واشرت الى طفل عمره 6 سنين وقالت تدخلون هالثووور,ثانيا لاتكتب لي رقمك انا مو من اياهم يالشيييييين .
س:هلاا حبووبتي بصراحة سمعت اشاعة تقول انك الاكس جيرل فريند حقت عزوووبي هل هالكلاام صدق وبصراحة اذا انتم تفارقتوا خلااص ودي اشبك عزووبي شكله دمه خفيف هذا اذا سمحتي؟؟عفاف من الرياض (الورود)
اولا ايييه كنت الاكس جيرل فريند تبع اللي ماينتسمى ثانيا دمه ثقيل وماااصل وشين ويكفي من عيووبة يشم شراريبه القديم ثالثا هو شاري لي بيجرل ومسوي لي تحويلة على رقمه يعني أي رقم يجيية يجيني رابعا وهو المهم ادري انك داقة علييية قسم بالله قسم بالله لاتوطا في بطنك واعضك من خشمك مابقا الا هي حتى فضالتي بيقاسموني عليها.
س:اولاا انا بنت غاضبة فاعذريني على اللي باقوله انا اكبر اخواني وتحتي بنتين وبعدهم ولد مفعوص فليه ابوي ينتسمى باسمه (ابو حمد)عسى ماشر لاطابور ولا احم ولادستور ابوي ينتسمى باسم ابو عشر سنيني ويترك ام 17 سنة هل هذا عدل؟؟
من ناحية عدل لا بس بس تدرين وش ازين حل وانتقام سوي زي بنت جيراننا حطة اهلها قدام الامر الواقع شرت لوحة مكتوب عليها بيت ابو ايمان وعلقتها على الباااب. على الباااب.
ياحبيبتي هم الخسرانين والله ولا احنا ماننتفوت خلي البزارين ينفعونهم وذكرتيني على فكرة بولد خالتي متزوج واحدة عمرها 16 في ثالث متوسط مير متفشل كل عزيمة يجوون العيال الصغار قدام الناس ويقولون له وخر مرتك عننا ماتخلينا نلعب كورة تلعب غميمة مع البنات….يستاااهل ماناظر بنت خالته.ثانيا لاتقولين لي عزيزة شايفتني ام خمسة وستين سنة.
س:هلاااا بنوووتة كيييفك انا فجر طالبة في ثالث ثانوي ودي اسئلك بصراحة مافي حل للبنات اللي ماعندهم سواقين يعني الرجعه في الاتوبيس نخيس والله الىالعصر وحنا ندور في هالشوارع وش الحل؟؟؟
والله ياوخيتي انكم صدق تكسرون الخاطر والله بدل مانتبرع لافريقيا واسيا اصولها يتبرعون لكم ويبيعون الاتوبيسات ويصير في كل مدرسة 30 ولا25 سيارة تيرسل ولا صني توصل 3ولا4 طالبات ,بصراحة مرة رحنا انا والوالدة لعزا وانا طالعين بعد صلاة العصر شافت امي اتوبيس بنات والله انها صاحت على هالمنظر اكثر ما صاحت في العزا.
س:بصراحة انتي هاايلة هايلة وحبووبة لذا قررنا نعزمك في الصيف معنا على ماربيا لنا هناك شالية خاص فينا ولاتخافين اخواننا الاولااد مايروخون معنا هم يروحون يصيعون في امريكا يعني كل اللي بيروح انا البنات وامنا وجدتنا هااه وش رايك …مها والعنوود؟؟
والله ياحبيباتي دعووة كريمة بس انا برا افشل من جد تحت الركبة ما البس يعني كل لبسي برا شورتات واذا فيها ماربيا وبحر اطق هالفنيلة الاقية وماغير مراكض انا وعصاقيلي مهبلة باهلي.
س:انا طالبتين في جامعة الملك عبدالعزيز بجدة ودي اعرف ليه الاولاد مطلعين علينا اشاعات وانا بنات صايعات علشاننا بس نرووح نفطر ولانروح لكافي شوب بين المحاضرات ريهام وايمان؟؟
اذا جتك مذمتي من جاهل…وكملوا انتم ثانيا بيني وبينكم قولوا نبي نطلع وين بين المحاضرات بين جامعتكم اللي في اخر الدنيا وشارع التحلية والحمرا ساعتين يعني المشوار ياخذ يوم دراسي كامل وتقولون بين المحاضرات.
س:هلاا بنووتة اولا احب اشكرك على هالصفحة ثانيا انا مقهورة من الذباب على قولتك اللي بالنت كل شوي واحد ناط لي شبكي المايك معي بصراحة ما اصدق انك بنت بالله وش اسوي فييييييييهم وكيف ارد عليييهم؟ ..منى –الخبر
والله يامنى ردك المايك مايشغل ولا امي ماخذته ما صار ينفع بعد لكن الحل تدرين وشو اذا قالك واحد انا مو مصدق انك بنت ردي عليييه وانا متاكدة انك مو ولد …وعلى طاري الصووت قد مرة شبكت المايك مع ولد قلت له هلاا مادري لييه طلع بسرررعة ظنتك خطه قطع.
س:هلاااا بنوووتة انا تهاني من الكوييت عندي سؤال محرج معلييش اذا رحتي لبنان وشفتي الشباب الشقران الحمران وتذكرتي عيال الخلييج بالله وبكل امانة وش تقوليين في سرك…وشكرا؟؟
اولا الامر مايحتاج لاسر ولايحزنون انا اقول بصووت جهووري اللهم لااعتراض ياربي بدل مايشب فيي عييلنا العنقز ورا ما يصير الجدري ولا الطااعوون واذا شفت عاصي الحلااني علىالمسرح وتذكرت عبيد ولد جيرانا قلت في نفسي هالمرة ياربي جعلها ابتلاء دنيا وترزقني ملاااك وسييم في الجنه.
س:عندي سؤالين ورجاءا بلا تصريف اولهم ليه الدكتورات في الجامعه بعطون البنات الهاي وجه اكمنهم بنات فلان وعلان اما احنا لنا الله تقضي السنة مايعرفون اسامينا نروح لهم في الساعات المكتبية يصرفوونا للمعيدات الثاني هل انتي مع قيادة المراة للسيارة وشكرا ..فهدة –حي عليشة –الرياض
والله الصراحة وبدون زعل البنات الهاي يوسعون الصدر كل اسبوع حفلة في الشيراتون وعرس في الانتر وعيد ميلااد في ماريوت هدية بعد كل صيف يعني الكتورات يبوون يشوفون شي ماقد شافووه اما انتم مع احترامي لو تتقطعون وتعصرون انفسكم ياعرس اخوك ياختك وفي قصر الدار السعودية ولا قصر المرسلات يعني هناك فرق
اما بالنسبة للثاني والله الرد اللي في خاطري يقفل موقع بلااك هورس المسكين مو كفاية مستضيفني كثر الله خيره على العمووم جوابي بيكون ديبلوماسي يعني ايه لا او لا ايه.
س:حبيبتي بنووّوو كييفك انا ولله الحمد مدلعه فاتورة جوّالي على ابوي وملابسي على امي واشرطة الفيديو والاغاني على اخواني ومع هذا كله مصرووفي يقضى قبل نص الشهر فياترى ليييه؟؟…سمااهر من الرياض
والله برايي انه نوع من التدبير ثانيا ياحبيبتي ياسماهر بنات الالفية الجديدة ماعندهم مصطلح مصروف الواحدة من يصيير عمرها 15 سنة على ابوها يطلع لها بطاقة ائتمان وان ليمتيييد بععععععد واله بنات ونتعامل بالكاش.
س:هلا بك وبالجميع انا من عرعر بس ودي اسئل هل صدق عندكم في الرياض وجدة والشرقية مغازل والا لا واذا عندكم ليه الورعان عندنا ينزلون الطاقات ويقولون اركبي يابنت وحنا نصد عنهم هل هذا هو المغازل ويشبه اللي عندكم؟؟ شادية
ايه هو هو اخوه الخالق الناطق بس الفرق الوحيد في الرياض يقولون عطنا وجه يالجرح وفي جده ايش بكي ياقمر وفي الشرقيه وش حقه هالتغلي يامعوّده ….ثانيا شاديةومن عرعر اجل ام كلثوم من ابوعريش.
س: هلاا بنوووتة ودي اسئلك سؤالين واحد عني واحد عن اختي سؤالي ابوي وعدنا يجيب لنا سواق فمالمواصفات اللازمة للي بالي بالك ولازم تتوفر في السواق ,سؤال اختي هل فعلا المووضه هالايام هم الدببة بحكم خفة دمهم ولالا؟؟ غادة ونجوى من الرياض
اولا بالنسبة للسواق الفلبيني زي العداد كلما عطيتيه اكثر غمض عينه اكثر ومشى اكثر ,الاندونيسي يمشي عدل بس اذا جا رمضان والحج انخرش والتزم الهندي هو بطبيعته غبي بس زيادة هالغباء تودي في ستين الف داهية يعني الله يعينك عليه اما الباكستاني وخصوصا اذا كان شايب يصير كانه من الهيئة مع اللي يغازلون وواحد من اهلك يناقشك حتى في الاماكن اللي بترووحين لها.
اما بالنسبة للدببة فهم من يوم خلقهم ربي حلوين بس من يوم التليفون السيناو والى الان كل مادقيتي عليهم الا وتليقنه في المطعم يا يتعشى يا يتغدى .وحب واحد دب يؤدي بشكل كبيركماتشير الدراسات الى انك تصبحيين دبه بحكم كثرة السواليف عن الاكل.
عزيزتي الفتاة الولد في زي المصيبه ماتعرفين من وين يطلع لك بس هو يطلع وجاب الله لنا هالانترنت انتشروا وتوغلوا فيه مثل حمى الوادي المتصدع فعلى قد ماتقدرين ياحبيبتي انتبهي وخذي حذرك منهم….وراح احاول اعطييك بعض الطرق لصدهم ولا ننسى في ناس حلوين ايضا راح اعلمك كيفية طريقة جذبهم.
· ICQ
· يجيييك الولد خبط لزق مرسل لك رسالة ماتطلع من واحدة من الثلات الجايات
· (اهلييين مساء الخير كيفك ممكن نتعرف انا فلان من الرياض رقم جوالي.55——- ياليت تسمعينا صوتك ونتسلى مع بعض) من اول تردين على هالاشكال وتقوليين له(لو سمحت انا مو من اياهم مفهوم ارجوك لاعاد ترسلي مرة ثانية اوكيه ولاسويت لك اجنور….) وللاسف تفرحين على بالك سويتي انجاز بس بعد 5 دقايق يجيك بدال هالواحد الف لاتهم يصيرون تاكدوا انك بنت.
· الطريقة الجديدة:::: ياهلاا والله ومسهلا بشيخ الشباب لايكون انت فلان(النيك نيم حقه)اللي البنات يحكون عنه لي …بيرد عليك السبهه ايه بيسوي لك طلب اضافه على اللستة عنده ..ارفضي واذا سالك قولي اتدلع علييك ولا مايحق لي….بعدين اطلبي منه يوافق على انك تضيفينه عندك وابدي استغليه على النحو التالي ممكن ترسل لي اغنية ناظم الغزالي واغنية الطقاقة توحة في عرس ولد ابوه وممكن ترسل لي موقع رومانسي وممكن ترسل لي صفحة CNN يقولون فيها خبر مهم وبعد هذا كله عطيه رقم ماتعرفينه بس متاكده انه رقم جوال رجالي واذا حسيتي ان الولد دلخ مرة عطيه رقم دولي اصرف….وكل ما قال لك ان الرقم يرد عليه رجال ردي عليه اقول بلاا استهبال شكلك خواف ولاماعندك صفر تدق ي الله انت وهالاشكال ماتجوز لي انا الغلطانه اصلاا اللي وثقت فييييك ….باي
· النوع الثاني وهو النوع اللي باز بعمره يرسل لك رسالة وهو لايعرفك ولاتعرفينه (هذا الموقع موقعي الشخصي…تبين ارسل لك صورتي …تبييين اغاني ياحلوة…)ومن اول تردين علييه اما توافقين وتقولين شكرا وخلاص وبعدين يرجع يغثك زي اول وترجعين تسفهينه…
· الطريقة الجديدة:ونفترض انه ارسل لك موقعه الشخصيه(وووووعععع وش ذا المووقع المقرف يا شيخ اقرفتني روح تعلم الذوق وبعدين رح تعلم تصمم …هو هو هو وتسرق مواضيع غيرك ياحرامي هالشعر شايفته في موقع الفلاني وهذي لا نكت الموقع الفلاني ياحرامي ياغشاش يانصاب …وبعد وش هالعداد تفشششل مازارك الا الف واربعمية بس …والله والله مالي الا اسبوع هذاا اللي بيقوله لك …ردي عليه ايه اكيد بتقول كذا الف وربعمية في اسبوعين يابابا الياهو يزوره في اليوم مالايقل عن خمسمية واحد بيقول لك لا اكثر بالملاايين….لاعارفه انك تزوره دايم علشان تسرق منه ايه حطميه حطميه وقولي له في الاخير رصاصة الرحمة…تبي نصيحتي اصلا غصب عنك بانصحك, انصحك تلتفت لدروسك واترك عنك تصميم المواقع دامك مو قدها ولا ورح تعلم من المواقع السنعه(بنات دوت كوم,بناتين دوت كوم,انتي.نسيجها ) ولا عاد ترسل لي موقعك التافه مفهوم….
· النوع الثالث وهو ادلخهم بيرسل لك (الو …انتي بنت صدق بنت ؟؟ طيب اذا بنت ممكن نتعرف ..يعني اذا بنت وموافقة اننا نتعرف انا حمد من الافلاج وهذاا بيجري) ..من اول تردين عليه وانتي معصبه وتقولين له (وين احنا تليفون علشان تقول الو يالله رح هناك ياسقيم…)
· الطريقة الجديدة اللي تخليه مايقرب لك ولا ينشر رقمك لاصدقائه الشباب(حمد تراني صديقة اختك والله لاعلم امك تعلم ابوك يطقك ويمنعك عن الانترنت ….حمدوووه رح ذاكر يالشين ).
· برامج الشات الكتابيه MICROSOFTCHAT,MIRC,YAHOO CHAT
· الاعتراف بالحق فضيله الشباب هناك نوعين ذرب وماصل بس كلهم في النهاية نفس الهدف واللي هو احنا …النوع الذرب بيقول لك(بصراحة انتي عاجبتني باخلاقك وكلامك وخفة دمك تدرين انك السبب اللي يخليني هنا في هالمكان ياليت نطلع مع بعض ولا عطيني رقمك…لاتفهميني غلط قصدي رقم الكيو حقك ياحياتي…) وهذا تتعامليين معه كالتالي …( اولا وش قصدك تراهم ربعي لاتسبهم مفهوم قل مفهوم اول شي قل مفهوم …ثانيا النكت اللي اقولها تجيني برايفت من احد الشباب كثر الله خيره ولا انا نكديه بايخه ثقيله دم ثالثا…ماعندي كيو ما اتعامل مع يهود كفوك تعامل معهم ياشيخ لو عندك ذوق قل لي كم رقم موبايلك مو الكيو….وكررريها ضحكه ههههه) بيرد عليك (آسف والله ماكان قصدي طيب كم رقم موبايلك؟؟؟)ردي عليه (شين وقوي عين يشتم ربعي ويبيني اعطيه رقم موبايلي ايه طيب يجيب الله مطر اول اعتذر لهم وقل لهم ياجماعة تراني شتمتكم بالبرايفت مع فلانة اللي هي انا وبعدين ابشر تراني ما ارضى على ربعي) الدلخ بيعتذر لهم والباقين مايدرون وش القصة وبيرجع لك (هاه كم رقمك الحين ياحياتي) ردي عليه بكلمتين (ماعندي وانت صدقت اصلا لو عندي جوال كان شفتني جالسة مع هالماصلين وانت اولهم ….اممموووا بااي.
· النوع الثاني الماصل يعني تلقينه زي العاده خاش فيك عرض قدام العالم …(فلانه صدق انتي بنت والله اشك انك بنت ههههه احرجتك يابو الشباب صح ههههه ..ويرسل لك برايفت ترى اعتذر لك اذا كنتي بنت بس بصراحة انا مقهور من العيال اللي يسوون انفسهم بنات) من اول تردين عليه انا بنت غصبا عنك وعن اللي يتشدد لك وووو…الطريقة الجديدة اسهل بكتير (عطني رقمك واعلمك من الولد هههه يالشين) بيعطيك ….روحي لغرفة ثانية وقولي لاول هذا رقمي دق علي الساعه 3 الفجر وترى صوتي وانا نايمة صوت ولد ونسايه بس ماعليك حرحر فينيي ترى باسرعه اذوب مع الكلام الحلو..وارجعي لخويك وقولي له قدام العالم ياناس ياهووه معنا بزر معطيني رقم غيره ادق على رقمه ويرد علي مصري ههههههه الاخ مصري ولا ايش
· برامج الشات الصوتيه والكاميراتNETMEETING,FIRETALK
· في البداية وزي العاده شغل البرايفت والوزوزة ورسايل من تحت ممكن بيقولون لك ..ممكن اسمع صوت القمر تراني محروم…..من اول تقولين له عفوا انا بنت محترمة وما استخدم المايك ….لالالا الخطة الجديدة …قوولي له ابشر من عيوني الثنتين واشبكي المايك ايه اشبكيه عادي وش فيها وخلي جنبك راديو وتووسطي بين أي محطتيين واضبطي الراديو على شششششششششششش وحطي المايك جنب الراديو وقووولي لفارس زمانه ها تسمع كويس ولا ارفع صوتي اذا قال لك ياحياتي في شي المايك حقك خربان اسهل شي تسويه كل امراة الطمي قدام الباقين….هاكر هاكر هاكر خرب المايك تبعي اليوم العصر مجربته يميين بالله خربه لاحد يشبك معه اطردووه…
· اما اذا تميلح الولد بزود وشغل لك الكاميرا وهو كاد هالشعيرات فهذا تتعاملين معه بشوية روية واستخدمي طريقة التحطيم البطيء………الله وطلع لك شنب يابن الايه على بالك صرت رجال شنبك شكله مو شنب شكله لزقة شلها شلها عادي تراني فري …..يؤ يؤ يؤ وش هذاا واخزياه واخزياه ثيابك وصخة يابن الناس وش فيك مبهذل والله عيب لو انها بنت من امريكا وش تقول عننا احنا السعوديين….اقووول لك ياولد..ممكن تفصخ…بتجيه النفاضة وبيرد عليك افصخ ايش ….اضحكي وقولي له التكشيرة يعني ايش انت ووجهك,, شكلك على جريف بالله قد فصخت ولا هي عادة لك تفصخ لالالالاتراني بنت ناس وماحب هالحركات ولا اقووول لك وش منقصني عن الامريكيات افصخ يالله…بيرتعد الولد في محله …هالمرة اضحكي معه بقووة وقولي هالمرة قولي له طاح قلبك صح ….اصلا يعني من جدك يعني من زينك والله كلك على بعضك شين يعني على العموم على كيفك لاني مو جالسة اشوفك انا فاتحة برنامج اتصفح ,,اتصفح مو اتفصخ زيك الله يهدييك يالله باي….
· في المنتديات…..(ياكثرهم)
· شباب المنتديات قصة طويله عريضة …خذي عندك كل ماتكتبين موضوع لو تكحين كحه تطلع لك الردود التاليه اذا مووضوعك في الهبال…الله يرجك ياشيخه على خفة الدم والله انك رايقة مررررررة…وزي العادة يالضعيفة لازم تردين على القراء شكرا مشكور يا اخ وشوي تقولين انه نايم في المنتدى ما يطلع …ويقول لك :لاوالله ما اقول لك الا الحقيقة انتي كثر انسانة عرفتها خفيفة دم في الوجود هذا ايميلي ورقم الايسكيو حقي ….وعلى الطريقة لاقديمة تاخذين الايسيكيو حقه وتشوفينه ملغم ببلااوي شعر وارقام وخرابيط وكل شوي مرسل لك ايميل وذابل كبدك من جد ..
· الطريقة الحديثة…..ردي عليه الا من جد يا اخ اعجبك موضوعي ….بيرد عليك افا علييك الا مصارين بطني تقطعت من الضحك على خفة دمك ورجتك …قولي له بس هذا مو موضوعي لقيته في منتدى ثاني مدري موقع ولانه سخيف زي اللي كتبه ولد فحبيت ابين للي معانا سخافة الاولاد وان أي شي يبسطهم الحمدلله على نعمة العقل.
· اما اذا كان موضوعك جاد ولا قصة حزينةوخصوصا عن البنات….تلقينه يرد عليك انه يوافقك في كل ماقلتيه وان الناس ماوراها الا المشاكل وانك صادقة واسلوبك حلو وطبعا بيصير لك نفس الشي مع الموضوع الضاحك
· الطريقة الجديدة….ياشيخ طييييير رووقنا صدقت ان هذا الكلام من جد اصلا احنا البنات ناقصات عقل ودين ماننعطى وجه قال ايش انا صادقة وربك لو يشوف ابوي ولا خطيبي اللي انا كاتبته ان يقطعون ظهري بالعقال ياشيخ دخل اسمع من هنا وطلع من هنا انا اصلا اكتب هالكلام في مثل هالمنتديات لسخافته ومعليش سخافة اللي فيها اللي يصدقون بسرعه….اتمنى انك ماتكون تضايقت من كلامي
· في E-MAILS:
· عزيزتي الفتاة صدفة وانتي تشيكين ايميلك تلقين كارد لواحد اما انك ماتعرفينه خير شر او تعرفينه من زمان يعني معرفة طياري وتلقين كارد حب وغرام وتفتحينه تلقين مشاعر جياشة واشواق متدفقة كذا خبط لزق وبعضهم يتميلح يذكرك بنفسه ….في السابق تردين على زي كذا اما بكارد من نفس الموقع او ايميل تشكرينه فيها على الكارد بس هذا القديم…
· الطريقة الجديدة:سوي له ريبلاي واكتبي تحت في اخر الايميل …الى الحين تذكر والله رحمتك يابو الشباب طوينا صفحة الماضي وتبنا ….مع تحيات بندر(معذبهم)ههههه معليش يالشيخ تعيش وتاكل غيرها….ويستاهلون…..
· ملاحظة:كثير من البنات ارسلوا لي يشتكون ان معظم الاولاد طفشوهم لانهم طالعين بطلعة انهم يبون يتعرفون على بنات وبعدين يخطبونهم ويتزوجونهم رغم ان البنات يتهربون وماودهم
· التصرف مع هالاشكال:اخيرا اخير نطقتها ياعمري صدق انك يافلان الرجل النادر بيقول لك كيف …يعني على كثر ماسمعت صوتي لخالد ولاعبرني …على كثر ما ارسلت ايميلات لعبدالله وعمك اطرش ..على كثر مارحت لمقاهي وشغلت الكاميرا لفيصل ولا هو هنا يقول لي شفت من احلى منك بس انت ياعمري غير طبعا غير على اني سافهتك ولاعبرتك ولاعطيتك وجه وكنت عندي بالكرامة مثل جزمتي ولاتهون الحين وكنت ما اطيق اقراا اسمك الا انك قررت انك تحبني وتتعلق فيني وترتبط فيني الى الابد ….هاه يارووح الروح متى اقول لابوي انك جاي………..وهذا وجهي ان رجع لك اساسا او فتح موضوع الزواج.
في الاسواق
على ان عنوانننا اليوم مخصص للانترنت بس استفسارات كثيره جتني عن الاسواق وحسيت اني لازم ارد عليها …
· 1) اذا شفتي ولد واعجبك في السوق وش تسوين له ؟؟وكيف تصيدينه وتعلقينه؟؟؟
· الجواب بسيط خطة البيبسي ايه خطة البيبسي وهي على النحو التالي: كل مارحتي السوق خذي معك مشروب غازي ويفضل بيبسي ولايكون علب يكون في كؤوس ورقيه…ولاتشربين منه بس امشي في السوق ومتى ماشفتي الولد اللي هو واعجبك وملى عينك وفؤادك انصيه ايه انصيه وروحي له واقتربي منه واقتربي واذا صار بينك وبينه شبر فما اوصيك سوي نفسك تعثرتي وبالبيبسي على ثوبه ايوة املي ثوبة بالبيبسي بتقولون في اتفسكم الحين وش هالفجاجة انا اعلمكم …
· اولا:اجلسي اعتذري منه وسبلي عيونك في عيونه وتمقلي فيه لين تملين وماعليك من احد حتى الهيئة ماراح تقدر تسوي لك شي
· ثانيا:تضمنين ان هالوليد بيطلع من السوق على طول ماله وجي يمشي في السوق بثوب مليان بيبسي ومنها بتعرفين حالته يعني متزوج بيطلع مع زوجته مع امه بيكلمها ويسبقها للسيارة..مديت بيجلس في السوق كانه من عيال منفوحة شايل ثوبة لين الركب جاي يغازل بيطلع على طول على سيارته
· ثالثا:الحقيه في المواقف وعلى رواق هالمرة كلمية واعتذري له وعطيه ايميلك ولاتقصرين من الضحكات لانهم بصراحة جنس دفش أي شي يبسطهم لو تتفلين في وجيههم.
· 2)اذا شفتي ولد شين شين شين غثيث وين مارحتي في أي سوق تلقين من نمونته عشره بثر ماينعطى وجه؟؟؟كيف ترحمين نفسك من شوفته وترحمين اخواتك الفتيات؟؟؟
· خطة الدبوس الفرنسي:خذي معك دبوس فرنسي من الطوال اللي كانه مسمار بناء ووزيه معك ومتى شفتي هذا الشيفة طلعي الدبوس امشي في الاتجاه المعاكس للشين وخلك مرة قريبة منه واذا صرتي كتف بكتف موازية له انغزية الدبوس بكل قوتك ثم ارمي الدبوس في الارض هو من النغزة بيلتفت صوبك واجلسي في السوق هاوشيه ….ياقليل الادب وصلت المواصيل بكم تنغزون بنات الناس ياللي ماتستحتي ترضى احد يلمس اختك ولا يسوي لها شي وبدبوس وفي مناطق لا ..ما اقدر اقول(هنا يبغالك شوية دميعات وبكوتين)والله حرام احنا وين ترانا في بلد اسلامي واجثي على ركبتك في السوق وقتها رجال الشرطة والهيئة جزاهم الله خير بياخذون الشيفة معهم في رحلة مالاتقل عن شهر او اكثر غير الجلد لانها ماصارت بس مغازل الا تحرش جسدي والادله موجوده وهي الدبوس ………
في واحد كاتب أسمه معذب الجرادية ..يقول أنتم يالسعوديات ما يعجبكم الا الأجانب يعني على بالكم ..وأنتم شيف ..فأنا أحب أقول له مالك لوا كلامك صح ..بس تبي تدري ليه ..
اليكم ما ترويه بنوته الألفية الخبرة في الفروق العشرة بين الشباب السعودي والشباب الأوروبي …من المهد الى اللحد …
· أولا :الطفل السعودي من صغره يعني في عمر أربع سنين يلعب بالتراب ويتراجم بالحصى …بينما الطفل الأوروبي يلعب بالثلج ويسوي رجل الثلج واذا بيلعب مع ربعه يرشهم بالموية …
· ثانيا :الطفل السعودي اذا بدا يروح للمدرسة يصحى وهو يصيح ويصارخ وما يرضى الا يعطونه بسكوت كل شوي ..بينما الطفل الأوروبي يا حياتي أول يوم يروح للمدرسة وهو يضحك ويغني ومبتسم ..ويرجع يعلم أهله وش سوى في المدرسة
· ثالثا: الطفل السعودي في سن عشر سنين جاحد أم البنت ومشكل بجدتها ..يا يلعب كورة يا يلعب بالشروخة ..واذا جت البنت يا حياتي تبي تشاركه صارخ في وجهها ( وخري هذي لعبة أولاد مو لعبة بنات روحي العبي بعرايسك ) بينما الطفل الأوروبي في سن عشر سنين يحسب حساب البنت معه قبل أي شي… ولا عمره يقول لها روحي العبي بعرايسك
· رابعا : في سن 16- 20 الشاب الاوروبي اذا اعجبته بنت يروح يعطيها وردة ولا قطعة شوكولاته أو اسطوانة موسيقية يعني كرمز للأعجاب..بينما الشاب السعودي اذا فرضنا أنه أعجبته بنت مع أنه ما يشوف الا عباية ما يندرى وش تحتها ..يعطيها ورقة مشقوقة ..ما يندرى وش عقبه ..مكتوب عليها رقم >>>قمة الرومانسية
· خامسا : الشاب الأوروبي اذا حب بنت يقوم يعلم أهله وناسه أن فلانة حبيبته ويصير ما يروح ولا يجي الا معاها ..بينما الشاب السعودي اذا حب واحدة يكتم الامر ليه مو علشان التقاليد لا علشان يقدر يغازل غيرها ..واذا علم أحد يعلم ربعه الجحلط يعني انني مطيح بنات .
· سادسا : الشاب الأوروبي اذا ذبحته الرومانسية خذ حبيبته في قارب على النهر وقام يجدف ويطالع فيها .. بينما الشاب السعودي اذا ازعجوه ربعه بأنه نصاب ولا يعرف بنات يصير همه يركب حبيبته في سيارة ويمر بها من شارع مظلم ويوقف عند بقاله كل أخوياه مسنترين هناك يعني شوفوني مركب بنت …وعلى فكرة بعضهم يركبون شغالاتهم ويلبسونوهم عبايات الشكوى لله المظاهر خداعة.
· سابعا: الشاب الأوروبي يجيب لحبيبته هدايا يا ورد يا ساعة يا عطر أو لعبة …ويفرح اذا شاف حبيبته تستخدمهم ..بينما الشاب السعودي ما يعطي البنت الا قطعة الورقة اللي قلنا عنها من أول ( الرقم ) وبعدين يصير ياخذ منها وهي على نياتها تحط له كل يومين هدية في محل باسمه وهو يجي ياخذها .
· ثامنا: الشاب الأوروبي لا سمح الله لو تزاعل هو خويته ولا تفارقوا تلقاه يحلطم ويبتسي ويقول أنا السبب انا اللي ماعرفت أصونها بينما الشاب السعودي ..اذا خويته انخطبت ولا طنشته وهو أصلا ماعنده نية يتزوجها يبدا يهدد ترى بأنشر رقمك ترى بأفضحك ..غير الازعاجات كل يوم وكل ليلة ..على جوال الضعيفة.
· تاسعا : الشاب الأوروبي دايما يسئل حبيبته ..حبيبتي وش رأيك أسوي كذا ولا أشتغل كذا ولا أدرس كذا بينما المحروس الشاب السعودي ما يسئل البنت الا سؤالين ..تحبيني ولا لا …والسؤال الأبيخ ..صديقي يبي يتعرف على بنت ما عندك واحدة من خوياتك أعرفها على خويي …تراه رهيب.
· عاشرا..وآخرا وليس أخيرا: الشاب الأوروبي ينهي علاقته بالفتاة اللي يحبها بالزواج ويكونون أسرة سعيدة … بينما الشاب السعودي ..لا يمكن و مستحيل وسابع المعجزات يحب بنت كان يعرفها الا يشطب على اسم عايلتها من البشرية …ما بقى الا هي يتزوج بنت كانت تعرف عيال …
هذي قد تعتبر اهم الفروق بين الشاب السعودي والأوروبي ولا لو بنحصي كان نعد ونغلط ..وفوق هذا كله لهم وجه يحكون فيه ويقولون ليه ما تحبوننا ..من شقارهم ولا عيونهم الزرق ولا وسامتهم الله لا يبلانا في غالي … عزيزاتي الفتيات الغاليات على قلبي جميعكن …عدت اليكم باشتياق كبير شوق ماله حدود ..شوق عدد الأرقام اللي يرمونها ..الشباب وأنتم بكرامة ..وكثر ..الأمواس اللي يطيرون بها شنباتهم ..وكثر ما نصبوا العيال وقالوا للبنات الضعيفات المغلوبات على أمورهن أنهم أول بنت في حياتهم وأن حياتهم من قبل معرفتهن مجرد ضياع…..اشتقت لكم كثر القمل في روس الشباب السعودي ..اجل شين وماصل وحاط جل على شعره . موضوعنا اليوم يختص بكيفية سحب الولد اللي يحتك ويتعرف الى بيتكم يعني تدبسينه فيك …هالصفحة مخصصة للي تبي تتزوج وطالعة روحها على الزواج وتبي انشالله أي دلخ قدامها على النت.
في الماسنجر
العادة كما هو معروف الأولاد يرسلون للبنات يا أغاني يا صور يا ملفات وناسة ..وأنتي يا عزيزتي البنت اذا أرسل لك أي ولد أي شي ابتسمي له وقولي مشكور وصدق انك ذوق وذرب وما في منك…وثاني يوم ..افتحي الماسنجر وصكيه بلوك علشان لا يعرف أنك داخلة قبله ..واذا شفتيه صاير اون لاين ارفعي عنه البلوك وقولي اشوى اني لقيتك كذا مرة أدخل ولا ألقاك واطلع ..بيسئلك وهو كشرته مفتوحة على الآخر اشتقتي لي يا بعد عمري …ساعتها قولي لا مصيبة صارت أخوي فتح الجهاز وشاف الملف اللي أنت ارسلته لي وعلم أمي وشكله بيعلم أبوي يرضيك كذا فضحتني بين أهلي ليه كذا أنا وش سويت لك حرام عليك …بيرد عليك الولد وهو في حالة دهشة بس أنا ارسلت لك ملف نظيف مافيه شي ردي عليه ولو بس ما تعودوا أهلي اني استقبل ملفات من شباب أغراب ..الولد وقتها بيفتح فمه كأنه سبهه ويقول لك بس أنا مرسلة لكذا بنت يعني بأتزوجهم كلهم غير أن فيهم متزوجات…ساعتها حجري له لا يالخاين لا يالغشاش ..أجل كذا بنت وينك يومك تقول لي أحبك ومجنون عليك وترسل لي كل شوي ملف والله لو كنت أدري أنك كذا ما كنت أستقبلت منك أي ملف …الولد في هاللحظات بيحاول يتلاحق نفسه بيفهمك أنه قصده أن الملفات يرسلها لأصدقائه بس وأنك انتي يالبنت عنده وبيفهمك أنه حاليا مو قد الزواج ولا هو فعلا معجب بك وبأخلاقك ( يعني بيربطك فيه ثم يعطيك ركبة بس على مين ) هنا تكونين مجهزة واحدة من صديقاتك على الماسنجر بس تكون مسميه نفسها باسم ولد وتضيفينها معكم على أنها أخوك الكبير واستلميه هواش وتراني أعرفك يابن اللذين ومراقبكم من زمان ..وبما أن الولد بيكون معطيك رقمه زي أي شاب سعودي ..فخلي البنت اللي تمثل دور أخوك تكتب له الرقم وتقول له والله لو ما تصلح غلطتك لأبلغ الأمارة عنك ..والرقم عندي والملفات في جهاز أختي …هالخطة تقريبا نسبة نجاحها 70% ..وعيوبها اذا طلع الولد شين شين بس مزين نفسه في الصورة وقتها قولي له ترى كنا نمزح يابو الشباب يعني كاميرا خفية ووسع صدرك.
في مواقع الشات( مثل الياهو )
عزيزتي البنت في مثل هالمواقع يا كثر اللي يرز وجهه لك ..وكل شوي واحد داخل عليك برايفت ..طبعا ذولي اللي يقول عنهم المثل (حتى البف باف عجز عنهم قام اشتكى للفليت ) طبعا كل بنت ملت وانزعجت منهم بس وش تسوي لهم يا ربي ..أول مرة ينط لك ويقول لك نبي نتعرف ..أنتي سايريه ثاني مرة بيقول اشتقت لك قولي وأنا بعد بس ما بعد تعرفت عليك زين وش رايك ترسل لي صورتك ..ساعتها اذا كان حلو وأعجبك كملي معه ثالث يوم بيقول لك أنه زهقان وما دخل النت الا علشانك هنا العبي عليه وقولي حتى أنا بعد رابع يوم بيطرح عليك فكرة التليفون أبتسمي له وقولي جوالي مقطوع خامس يوم بيجيك ونفسه في خشمه ليه ما تكلمينه بالتليفون ساعتها قولي له وش رايك نتقابل ساعتها الولد بيطير عقله بيقول لك أي سوق ..قولي له لا وش أي سوق أنا مشتاقه لك موت ودي أجلس وأتكلم معك ..أسمع احنا البنات عندنا حفلة في بيت خالتي وأنا بانتظرك في الملحق باجلس أتكلم معك البيت بيكون فاضي مافيه الا احنا البنات واحتياطا لو شاف رجال يقول له أنا أخوي صديقة فلانة ( فلانة اللي هي أنتي ) ..وساعتها وصفي له بيتكم وكلمي أهلك علشان ينتظرونه وفهميهم أنه بيتقدم لك ..وأنه أخو صديقتك ….هذا اذا كان الولد حليو ومملوح بس لو كان شيفة طبعا من ثاني يوم تعرف عليك فيه قولي له باقول لك سر وعطيه الصيغة التالية ( يا بو الشباب ترانا كلنا تماسيح بس أنا أدور رزق وطلعت لي أنت في وجه ..ياليت تروقنا وتسلك المسالك )
في المايكروسوفت شات والنت ميتنج
في هالبرنامجين أكثر ما كثر الله الزحمات عند البنات ..مافي غرفة تسويها بنت ولا بنت تحط اسمها الا الف واحد جاي يتصل عليها …ولو تكح البنية ضحكوا (الله من النفاق ) واذا البنت زعلت على واحد صار هالواحد من أهل النار اللي يقول له اطلع البنت ما تبيك واللي يقول احترم نفسك واللي يقول يا شيخ تراني هاكر ان ما طلعت بالأدب اعرف اخرب جهازك المشكلة ان هاللي كان يتطاق مع البنت يا أخوها يا واحد تعرفه وتعزه المهم نرجع لموضوعنا كيفية استدراج شاب للزواج به من تلك البرامج ..فالطريقة سهلة ..أول ما يدخل الولد عليك .. سوي نفسك فتاة خجولة وأول مرة تكلمين ولد في النت ..وكل ما يقول لك شي قولي له يووه والله صدق .وكل دقيقتين قولي له أول مرة أكلم ولد في النت لا تواخذني ان صار مني شي ..هو ساعتها بيبتسم ويكشر عن انيابه ..شوي ويتميلح ويتمصيل عليك أن له كم سنة على الأنترنت من يوم كان يصيف في أمريكا ثم كان يتصل على البحرين طبعا أنتي اسمعي وارمي في البحر ..ثم شوي بيقول لك ترى أذا احتجتي مساعدة أنا موجود …ابتسمي له ( ارسمي وجوه يعني J ) وقولي مشكور بس كيف احصلك ..اذا طلع ولد ولا مؤاخذة سمرمدي قبل ما تتمين جملتك الا يصكك برقم الجوال والرقم الخاص ورقم صديقه علشان اذا مالقيتي رقمه تدقين على صديقه وتسألين عنه ..اما أذا طلع ولد أجاويد وقليل ما هم وقام يتليوق عليك يا ايميل يا ماسنجر يا آيسيكيو ..طقيها في وجه مافي رقم تليفون أقدر أكلمك عليك علشان اذا احتجت لك ..ساعتها اذا صار عندك رقمه مو تدقين عليه …بس احفظيه عندك …بعدها اذا جا اليوم الثاني بيلصق لك مثل العادة وبيطيح ابو الشباب ويقول لك وينك ليه ما دقيتي أمس ..هنا وهنا فقط الطمي عليه قد ما يقدرك الله ..قولي الرقم طاح بيد أخوي وأنه سئلني وأني خفت وقلت واحد أحبه ..ساعتها عنتر البارحة بيصير دجاجة اليوم ويقول لك وش حبيبك من وين حبيتك أنا يالله أعرفك بالنت ..رقمي معطيه عشرة الآف بنت يعني كل ذولي احبهم .. قولي له وانتي تبكين ..يعني وش تبيني اسوي وش اقول اخوي قام يهاوشني ولا قدرت أستحمل قمت قلت كذا … للأسف كنت معجبة بك ومحترمتك ..بس دبّر عمرك ..ترى أخوي في ألأمارة ورجل أختي في الهيئة ..وزوج خالتي في الاستخبارات المركزية والله أن حطوك في راسهم ان يجيبونك من سابع أرض ..وأخوي لمح لي اذا جيت تتقدم لي بيسامحك على فعلتك معي ..تبي أحدد لك موعد معهم ولا شلون ..ساعتها في ثلاث حلول الأول الولد يرضخ للأمر الواقع ويحدد موعد ويتقدم لك ..يالثاني تجيه سكته قلبية من الروعة ويموت ثالثا ..يهج وينسى شي اسمه نت ساعتها يا وخيتي تكونين ريحتي نفسك وريحتي وخياتك البنيات الرقيقات معاك ..وكشيتي لك ذبانة
في المنتديات
رغم أني ما أحب استشهد بمقولات رجال أو شباب يعني أي شي ذكر بس هالمرة لازم استشهد بمقولة واحد قال ( حال المنتديات غريب ..البنت لو تكح وتنزل كحتها في المنتدى جاها ألف رد يثنون على كحتها وسلاسة الطرح والرقي في التفكير )… المهم أحد الحلول المنطقية للتخلص من غثا المعجبين في المنتديات أنك تبينين لهم انك بنت سيريس ( يعني جد ما عندك لف ولا دوران ) …وبما أن موضوعنا هالمرة كيف تجرين واحدا من آذانيه علشان يتقدم لك … اكتبي موضوع مفادة ان الشاب السعودي لازم ويتحتم عليه أن يحترم الفتاة اللتي تستخدم الأنترنت ..ساعتها بيجيك ألف رد اللي يثني عليك واللي يؤيد كلامك واللي يحلف أنه ماقرا في روعة موضوعك ..المهم أنتي وقتها نشني على واحد فيهم ..ثم اذا نشنتي اطلبيه منه أنكم تتحاورون لايف يعني في أي برنامج شات طبعا بحجة أنك تعتقدين أنه في ردك يجاملك فقط هو طبعا يبي يفهمك أنه ما كان يجاملك ..المهم أنتي وقتها خذيه بانتقادات للشباب .وهو الضعيف بيحاول يقنعك ساعتها صكيه بسؤال قوي على الجبهة ( يعني هل تقبل ترتبط ببنت مثلي تعرفت عليها من خلال الأنترنت ؟؟؟هاه قل لي تقبلها على نفسك ولا لا ؟؟؟) 99% بيرز الولد جبهته ويقول لك ايه أقبل ولي الشرف بعد ..قولي له أجل وش تنتظر ولا بس حكي والسلام ..اذا بغا يسوي فيها ذيب ولا يتميلح عليك ويقول لك بس توني ما عرفتك قولي له مو أنت راد على موضوعي وكاتب أن افكاري ممتازة يعني عرفت 50% بالمية من شخصيتي ولا أنت ما يهمك من البنت الا الشكل وعقلها ما تفكر فيها اذا كنت كذا قل لي لا تستحي ..بيتدارك الولد نفسه ويقول لك لا والله مو كذا بالعكس يهمني كثير عقل البنت ..ردي عليه بسرعة طيب احنا فيها انت عارف عقليتي ومعجب بها واذا على شكلي فانا حلوة واذا تبي تتأكد تعال أنت واهلك وشفني ..وهنا بيحاول الولد أن يصرف نفسه ويغير الموضوع بس أنتي حجري له قولي له يعني مستحي أنك تبي ترتبط ببنت تعرفها على النت ..بيقول لك وش أستحي منه أنا رجال وقد كلمتي ..افحميه قولي له تقدر تنزل موضوع في المنتدى الآن وتعلن لهم أنك تحبني وبتتقدم لخطبتي وتشهد أهل المنتدى عليك بيقول لك وشوله الفضايح والتشهير ردي عليه يعني كلامي صح تخاف وتستحي مشكور يجي منك أكثر وسوي نفسك زعلانة لين يراضيك ويسوي اللي قلتي له عنه يا يضف وجهه ويترك المنتدى >>>يفضل تخزين الشات وحفظه في حالة رفضه أو قال لك انه يدخل النت يتسلى تنشرين هالحكي في المنتدى يعني علشان يعرفون الآخرين حقيقته ويعرف بقية الأولاد انك مو البنت اللي ينلعب عليها نيأ أأ.
هذا بعض الأفكار واللي عندها استفسار أو شي ودها تعرف عنها لاتستحي تسئلني ترى احنا البنيات لبعضنا في مواجهة تلك الآفات .. وهذي بعض من أسئلة الفتيات المناضلات المعانيات.
س: هل بنووتة أنا ميساء من أم الجماجم عندي سؤالين ..بصراحة المشكلة ماني قادرة أطبق شي من صفحتك ..يعني أن ولد يحترم نفسه ويجي يغازل ولا يتحرش مافيه تقل مافي بني عندهم ..والولد أذا صار عمره أربعطعش وبلغ تولع في الوانيتات ..يا مطيحه يا مظلله يا حاط له جنوط طيب حسوا فينا يالبنات .رقموا قولوا أي شي ..وش تقترحين علي أسوي …
ج: والله يا وخيتي يلعن أم الذل أجل البنت يجي عمرها 23 سنة وهي تطر في اهلها واخوها والولد من يجي عمره 16 سنة يطقون له سيارة واللي يقهر أكثر انهم العيال يستخدمونها في مغازلنا يعني ..المجتمع يدفع الاولاد نحو اضطهاد الفتيات والتحرش بهم .شي يقهر بس اللي يقهر أكثر وما ينبلع هو أن اسمك ميساء وأنتي من أم الجماجم يعني كنها قوية شوي.
س:هل أختي بنوتة …أنا اسمي زبيدة من المدينة ..ودايما في النت أختار اسامي زي العنود ومها ويارا وسارة بس كل ما ارتبطت بعلاقة بشاب ..مدري انجرف ورى عواطفي واعترف له باسمي ..ساعتها ينخبصون ويحسبون أني كويحة ببراطم والله أني مو كذا بالعكس بيضا وحلوة بس مدري وشلون أتخلص من عقدة اسمي .وش تقترحين علي اسوي؟؟
ج: شوفي يا عزيزتي زبيدة سوي زي زبيدة الطقاقة وما عليك هذي أحلام والصحافة ترجد فيها وتشتم وهي ماعليها واجرها وصل في الليلة فوق 100 الف اللهم لا حسد ..اما العيال فوالله لو اسمك العنود يبون يشوفونك واذا شافوك في سوق بيقولون لك من بعيد ولا يميزون أنتي بيضا ولا لا .ولو شافك من قريب يبي يقول لك يبي يجلس معاك ويشوف ملامح وجهك ..يمكن بيضا شيفة .ولو شاف وجهك في مطعم قسم عوايل بيقول لك وده يشوف …. لانه يخاف عندك حبة خال في جسمك …ومن سمع قال مو مطخان ومشنص وخنجر الا وائل كفوري وراغب علامة وعاصي الحلاني بيتنقون في البنات هم ووجيههم.
ج:يا زين اسمك ويا شين سؤالك ..وش اللي بنات منهبلين عليه ..حبيبتي علشان تعرفين حقيقتهم ( الأولاد ) اقعدي عند حلاق تركي وشوفي الاشباح اللي تدخل .والأقمار اللي طالعين ..ولا شباب سعودي ..من وين بيجون حلوين الله يخلف بس..الشي الثاني اللي قاهرني ..يعني انتي مرة معتزة فيه تكلمينه عند صديقاتك .. تفتحين على نفسك باب شر بكرة بيقول لك ..ربعي يبون يتعرفون عليهم ..يعني هم يشوفون البنت اللي تكلمهم لا مؤاخذة …….. فيقول لك ليه عاد يدورون على شلة بنات جدد.
س: هلا بنوتة أنا اسمي ياسمين من الطائف المشكلة أني ابحث في حياتي عن الرجل الرومانسي يعني على كثر ما تقدموا لي خطاب بس ولو ما ارتحت ولا لواحد منهم ..يعني أشكالهم وحكيهم مو رومانسية بالمرة ..ساعديني ابي القى رجل رومانسي ..وماني عارفه كيف الطريقة ؟؟
ج: هلا ياسمينه بس حل مشكلتك صعب مرة وبالأصح طلبك خيالي بالمرة ..وش رجل رومانسي وين ينباعون فيه ذولي ..الرجل في هالزمان اللي ينقال عنه رومانسي لي جاه ولد قال الحمدلله انه ولد والحمدلله على سلامته وكان اللي جابت الولد خنزيرة مو زوجته …واذا تزوج طلع ثاني يوم لاهله ابشركم ..امس …….كانه داخل على بنت ليل …نصيحتي فكري برجال عنده قروش ولا واحد داج مع ربعه اصرف لك علشان ما تنصدمين بالواقع المر….اذا تزوجتي اشتري لك سدادة أذن وطول ما زوجك عندك خليها في اذنك ..علشان طول ما زوجك يحكي تتخيلين أنه يقول لك كلام رومانسي وحلو .وأول ما يطلع شليها وعيشي في تخيل كلامه اللي هو ما قاله لك…ما يستحب للي أزواجهم عصبيين يخشى استخدام الأيدي .
س: هلا بنوتة أحنا اربع بنات حلوات ومرحات ودايما نطلع ونجي مع بعض وقلوبنا على بعض .المشكلة اذا رحنا الأسواق ..يلاحقوننا شباب واذا شافونا ماحنا معبرينهم يبدون يقولون كلام ماله …أنتي طبعا عارفة وش اقصد داعي علشانهم منغاظين مننا بس المشكلة مو في العيال وأنتي بكرامة البلا البنات في الجامعة بدووا يقولون عننا هالأشاعة ..حتى الحريم الكبار اذا شافونا في عرس ولا عزيمة دايما مع بعض قاموا يهمسون ويدسون فينا ..والله العظيم احنا بنات صديقات بس مو أي شي ثاني وخايفات لا هالحكي يأثر بعدين على صداقتنا ..أنتي وش رأيك…
ج:ياحبيباتي ..أولا ..شبابنا صاير زي تلفزيوننا حكي ساعة ولا كلمة مفيدة يوم يرجدون في ديرة وثاني يوم ينوهون بمواقفها السياسية ..اللهم لك الحمد ..ثانيا البنات اللي يقولون عنكم شي يا منقهرات منكم هم بعد يا انهم .من ربع من برا الله الله ومن جوا يعلم الله ..اما الحريم الكبار ..ما راح اقدر احكي عنهم لانهم امهاتنا ومهما قالوا فهو من خوفهن علينا ..
س: هلا مدري وش اسمك انا عندي سؤال و قاهرني ..ليه أنتم يالبنات السعوديات على شيانتكم وهالشعور اللي في أيديكم ورجولكم تتدلعون ومسوين فيها ..اللي ما تستحمل عنف ولا تبي تحتفل دايما بورد,, ولا كنها من رجلها لراسها غرقانة في الرومانسية أجل لو أنتم في جمال البولنديات والسويسريات ..وش كنتم بتسوون ..على فكرة معك ماجد من الرياض للمراسلة 055\\\\\\\\\
ج: لا والله معك حق السعوديات هن ووجيههن على من يتدلعن .. ذكرتني بواحدة المسكينة تدعي انها رومانسية وتحب الرومانسية أعرست وجابت 9 عيال وبعد 40 سنة مافيها ولا هدية ولا كلمة شكرا زواج زوجها لها هدية تدري وش هي ..ضرة لا ومن زود الطبايع أجنبية عمرها 18 ..يا مويجد ياللي تبي الناس يراسلونك بالجوال يعني قصده اس ام اس ..السعوديات على صبرهم انشالله لهم الجنة ولا والله لو اني سويسرية وكل يوم حبيبي بيرقص معي وبيجيب لي ورد ..كان مابي من الدنيا شي .بس صدق من قابل هالوجيه اللي ما حلاها ربي…. ما شاف خير .
س:هلا بنوتة انا طاقة كبدي وواصلة معي ..أخواني يسافرون ويروحون ويجون على كيفهم وأنا لا لانهم عيال وانا بنت ..حتى في الجامعة شيكي اللي هو شيكي لازم أدخله ومعي دفتر العايلة ..أبي سيارة وابي حرية وابي اصير زي اخواني اروح وأجي على كيفي ..متى تتوقعون أمنياتي بتتحقق؟؟ المعذبة من الرياض.
ج: أقول ورى ما تتركين هالخرابيط عنتس وتقومين لمطبخ وتصلحين كيكة بمناسبة ..عشرين سنة على من أجمل سنين العمر والله يعز الحكومة ويديم الخير ….>>>عقب انفجارات أمريكا كل شي يخوف.
موضة بنوووتة
* بصراحة ماعندي شي كثير في الموضة اضيفة لان الموسم موسم شتا يعني ماشديتي البسي وتدفي لايجيك الصفري ويخبطك على الفراش وتفوتك الجامعه وحرمان وغياب ووصايات الماما يعني الوقاية خير من العلاج
· للمناكير يفضل استخدام اللون البنفسجي الغامق حيث ان هذا اللون يدل على الاكتئاب والاسوداد اللي تحسينه كما ننصح بان يكون الروج اخضر للشفة العليا وازرق للشفة السفلى دلالة على التناقض الملموس في المجتمع والمنبثق من اللاشعور اللي ينبعث في الحراشف التنفسيه ….
· لون الكنادر وانتن بكرامة بس العيال لا……. يكون احمر ومشجر بابيض ليييه؟؟علشان تشبه شمغ العيال يعني انتم يالاولاد تحت جزمناااا…..احسن احسن احسن…….
· لون الشعر اقصد صبغة الشعر …لون هالسنة اللون البرتقالي لون الخريف يعني ياناس ياجماعة الخير والله شيبتوا بنا قبل الاوان يمكن نقدر نكسر خواطر اهالينا شوي لانه لازم يحسون فينا….. ويكون في الشعر مناطق اكثر اغمقاقا من المناطق الاخرى علشان تدخلين جو.
نداءات
· الى شركة الاتصالات ترى والله ماصارت حشى محنا بناتكم ولاماحنا سعوديات ولا تبريتوا منا يعني الحين تخفضون المكالمات الدوليه وخطوط الصداقة للعيال وعلينا تقولون لازم للبنت كفيل غربل اللله ابليسكم وش كفيله يعني بالله اذا ابوي مسافر اخذ السواق كفيل لي على ايه له راتب الف ريال وانا لا ولا اخذ الشغاله تكفلني اسمها حريمة بتعطف علي …يعني بالله عليكم وين بننحاش سفر من هالديرة بالف طعش ورقة لنا ومع كذا يقولون اننا يمكن مانسدد شوفوا كم ولد مطنشكم وكم بنت وبعدين تعالوا تفاهموا معنا …اقول بس ياللله تعوذوا من ابليس لاصنكم بدعوة على روسكم تخرقها…….
· الى وزارة الصحة المبجله اولا احب ان اشكركم على جهودكم الواضحة في القضاء على شلل الاطفال ومرض حمى الوادي المتصدع بس احب ان الفت نظركم الى اننا كل عام بل كل شهر نخسر عدد من فتياتنا الجميلات كوفيات او مرضى من الصدمات والسبب غربانكم اقصد عيالكم في هالديرة الواحد طاق له كاميرا ومايك لاومخزن لنفسه كذا صورة في جهازها وماغير تحجير لنا وتخريع فينا ياصوت زي الغراب ولا وجه زي القرود والغوريللات وبعدين ترقدونا في المستشفيات وتلزقون صور براد بيت وريكي مارتن في غرفنا لاماينفع كذا تحتروننا نهبد وبعدين تعالجوننا لازم من الوقايه اما تسحبون الكميرات من هالشيف او علىالاقل تلزمون كل راعي كاميرا ان يلبس قناع ولا يطق تظليلة رجاءا رجاءا….بلييييييز
· الى جامعة الملك سعود وبقية الجامعات وديوان الخدمة …ترى ياجماعة الربع ماصارت كرف ودراسة واختبارات واخرتها صفي على جنب ماهنا وظيفة ياتدرسين بنيات مثلك ولا اقضبي ارضك والعذر اختلاط بالله أي اختلاط حطونا في مبنى خاص وصكوا علينا بعد وان بغيتوا قفلوا علينا بعد الى نهاية الدوام بس شغلونا يعني مع هالغلاا والفواتير جوال وانترنت واخرتها الواحد من المكافاة الشهريه وهي الف الى لاشي وخرطي فرجاءاء رجاءا جربونا ترانا ابرك من هاللي مرتزين في الوزارات ومايخلصون الشي الا بطلوع الروح.
ردووووود سريعه
الى الحايرة:والله كون البوي فريند حقك يعايرك ويقول لك انه يمزح معك فصراحة هذا استهتار العن والديه وقولي له وانا بادلك المزاح ياروحي اما تحترمني كعمة لك ولا اطس لابارك الله فيك ولافي ابو جابك…..
الى سوسن وغاده:في البداية اشكركم اما عن سؤالكم عن اخر قصة حب لي فانا ولله الحمد ماحبيت ولاظنيت في ولد يخلي قلبي يطرقع وماظنتي بالقى بس هذا لايمنع اني اتعرف على عيال واستعبدهم واوريك شغل الله فيهم.
الى ديمة:واللله قولتك ان كل صابح جديد تشوفين الف رقم جوال وتليفون في الايسيكيو عندك فهذي قطرة من بحر فلاترتاعين ولايكون في خاطرك بس ما اوافقك انك تلوثين الانفو حقتك وتخلينها ميل يعني رجل فلا والف لا واسمحي لي فهذي غلطة شنيعه مابقى الا كذا واخزياه بس ياوخيتي…
الى بحر الغرام: انا اقدر كيف ردة فعلك لما اكتشفتي ان اعز صديقتين تعرفتي عليهم في النت طلعوا عيال بس انا اوريك فيهم لاتخليني ولا ولد تعرفينه في الايسيكيو او الايميلات الا وارسلي لهم معلومات هالبنات المسترجلات وافضحيهم الله يحرقهم..
الى جميع العياال واعني كلمة العيال اللي ارسلوا لي وقالوا عني متمرده ومدري ايش واني قليلة حيا وماتربيت ولا اللي قال ان هذي حرة من مقالب العيال فيني فارد عليهم بمايلي
ياجبل ماتهزك ريح
والقافله تسير والكلاب تنبح (امسكوا اعصابكم)
واخيرا قول الشاعره الجهنميه فستقة اللوزاني
يناقروني و يحايلون فيني على بالهم اني بانهز لكلامهم في الايميلات عنييييييييييييي
الا كم من واحد يموت ويتلوى بس يحاكيني بس انا اتغلى وارد عليهم نييينيي نين نيني
فخذوها مني مادمت حيتنا (ماني ثعبانه بسم الله علي) سوف اكبلكم العناء كلمتن كلمتنااا
فوالله وتالله العظيم ترى حكيكم (ياكثره) ماهزني ولاعبرته فاقولها لكم ريحوا بالكم
وسلامتكم
مصطلحات بنوتة عن الشباب
· سيكوند ايديشن second edetion:معناها سياحي وعله وغثيث وثقيل دم وبثر وماله اية داعي …ايه وبعد متخلف
· D .M.S وتعنى بلغة النت del5 m6yer shnbahلاني شايفتها صارت موضة عند العيال من زينهم عاد صاروا يحلقون شنباتهم مو كل من حلق شنبة صار ريكي مارتن ولاعاصي الحلاني حتى..
· خفاش:هذي ترمز للهاكرز اذا كان معك هاكرز في نفس الشات وتبين تحذرين البنات منه ..مثال يعني تقوليين ترى في الشات خفاش يابنات.
· مظلل: يعني هالولد مشبوه ومشتبهين في هويته انه ولد نعرفه
· ولد معمم: يعني متاكدين من شخصيته وهويته ومتاكدات انه تم التبليغ عنه من قبل فتاة ..اكيد مسوي لها شي
· 2 63:وتعني 27san lik_6s _3ny
· Gr-gr: معناها قروي ويحب القرقرة يعني ماينعطى وجه يسوي نفسه يمون
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
