قصة آه يا القوطي

قصة آه يا القوطي كاملة مكتوبة

بدأت هذه القصة في يوم من الأيام وراحت ولكنها بمعناها باقية الى أجل أتمنى أن لا يكون طويل …انشاءالله .

في عز البرد خمس شباب جالسين على رصيف طريق الثمامة لو تعصر رووسهم عصر ما طلع شي مفيد المهم شابين نار وجالسين كل واحد بفروته يبي يتدفى ..وبينما احنا جالسين الا واحد من الشباب (تركي ) يشرب بيبسي ويشرب ويشرب آخر شي يوم خلص منها تغر ورماها والا ما دريت بنفسي الا اصرخ عليه..

أنا: تركي ويحك ماذا فعلت ( ترى القصة مو بالعربية الفصحى بس مع البرد كني قمت اخذرف ) الا تعلم أن حكومة خادم الحرمين الشريفين لا تألوا جهدا على جعل بلادنا نظيفة ففي كل كتر من اكتار ديرتنا الحبيبة يوجد برميل للزبالة فمن الأدب يا صديقي عندما تفرغ من قوطي البيبسي أن ترميه في برميل الزبالة ..هيا قم لا أبا لك وارفع قوطيك من الأرض وضعه في الزبالة ..

تركي: يا عبدالعزيز هل كل مرة سوف توبخني هكذا ..واللهي ما عادني طالع معك ..ما صارت يعني الآن ينصهر هذا القوطي ويصبح بعد كم سنة نفط لأحفادنا ..اليس كذالك …

أنا: آها بس يا أحمق اذا وضعته في برميل الزبالة فسوف تضع الحكومة كل القواطي في جهة معينة لكي تصبح فيما بعد مصدر للنفط لأجيال المستقبل ( الله من التفكير ) ..هيا قم لا الفعك …

وبالفعل قام تركي بيروح يجيب قوطيه واذا به يصرخ يقول يا شباب في قوطيين قوطيي وقوطي مو قوطيي ( اتحداكم تقولونها عشر مرات ) وقلنا له يالعجاز حط الاثنين في البرميل يعني وش بيضرك ويقول تركي لا أنا علي من قوطيي أما قوطي الناس وش علي منه ويشوته برجله بقوة وياليته ما شاته …..وتطلع ذي الغبرة دخاخين ..كاننا محششين ..وصرنا الخمسة نكحكح كأن فينا ربو ..وشوي شوي ما نسمع صوت واحد يقول لنا (بوووووووو) واحنا الخمسة مترصصين على بعض .. ويجاوبنا أنا العفريت خوفتكم صح ..والله اني رهيب

احنا الخمسة : وش عفريته غربلك الله في عفريت يقول بووووو نخبر يقول شبيك لبيك مو بووو ..

العفريت: اقول قبل لا نتفاهم أبي اعرف من قليل الحيا اللي شاتني الله يغربله .

احنا الخمسة : لا ما أحد شاتك بس خوينا جا بيشيل القوطي الا ويتعرقل بحصاة … والا أحد يشوت قوطي وين احنا .

العفريت : المهم يا شباب أنا قدر الله علي وطلعتوني أنتم يا ماني قايل من القوطي .هاه وش تطلبون أي طلب علشان أحققه لكم ..

احنا الخمسة : ( وبنفس واحد ) بنات بنات نبي بنات وحلوات واستراحة بدال هالرصيف وجو على كيف كيفك الله لا يهينك ..

العفريت : اقول مالت عليكم بعد فوقها كش ..بنات بنات صدق ما شفتوا خير والله وطبت عليكم الهيئة وش تسوون ساعتها ولا بتوهقوني معكم وتقولون أني أنا اللي دبرتهم لكم ..وساعتها يجرجروني من العالم السفلي بسبتكم وجلد في الأمارة و لا يقعدون يقرون المصحف كله فوق راسي لا واللي يرحم والديكم ..ثانيا أنتم متفائلين أنا بس باحقق طلب واحد بس لواحد منكم مو كلكم مو تتقاطون أنتم الخمسة ماشالله عليكم .

خالد: يعني وشلون تحقق طلب واحد مننا والباقين يدقون أصبع يتفرجون عليكم والله عفاريت آخر زمن ..أنا جدتي الله يغفر لها ويرحمها طالع لها عفريت صغير ما بعد بلغ حقق طلباتها و تقضى لها مقاضي رمضان بعد وفوق ذا كله جاب مقاضي الحارة كلها وقبل ما يمشي قال لهم السموحة واستروا على ما واجهتم .. شباب هذا شكله عفريت تقليد الله يرحم العفاريت الأصليين …

بقية الشباب : أي والله شكله عفريت تقليد عفريت سكة ولا في عفريت يتوزى في قوطي ..

العفريت : شباب احترموا نفسكم تراني عفريت محترم وولد حمولة عفاريت …صدقوني ..

احنا الخمسة : يالله يالله بس تقلع الله يستر عليك عفريت عفريت,, انتبه وراك قطو اسود لا يكون مسكون بس..

العفريت : طيب طيب لا بارك الله فيكم من شلة شباب مدري أي حظ رماني في قوطي عندكم ..بأحقق لكل واحد منكم طلب بس طلب واحد لكل واحد فيكم …يالله كل واحد يفكر ويقول لي وش يبي ..

تركي: ابي سيارة فيراري حمرا كومفورتبل ..وابي اللوحة من القدام ورقمين ..ومظللة كل أبوها تظليلة سوداء ..ومعها ورقة عدم تعرض..

العفريت: فيراري وحمراء وكمفورتبل واللوحة رقمين بعد وتظليلة كاملة ماشالله وش قالوا لك الوليد بن طلال على غفلة ..لو عندي قيمة جنوط فيراري كان ما شفتني في قوطي لي كم سنة خايس ..احتريكم تطلعوني يا شلة الرصيف …شف يالحبيب تبي تيرسل ومستعملة بس استعمال نظيف حياك الله ..ما تبي توكل على الله …

تركي: الحين عفريت طول بعرض وما قدرك الله الا على تيرسل طيب موافق بس واللي يخليك اهم شي التظليلة كلها تكون مظللة ..واللوحة من القدام من أمهات رقمين ولا ثلاث ارقام بالكثير …

العفريت : ياحبك للبهذلة يا ورع لو جبتها لك مظللة كلها ..مصيرك بيوقفونك المرور في تفتيش وبيخلونك تفك التظليلة بيدينك قدام عينهم ..ولا أنت ناسي أنك راعي تيرسل ..أما اللوحة فما راح تكون رقمين الا بتكون ( ت ب ن 010) اذا تعرف أحد في المرور كلمه يمكن يدبر لك لوحة مميزة يا لوح ….المهم يالله اللي بعده ..

سامي: أنا أنا بصراحة ابيك تخليني اصير وسيم ومملوح وطووويل مرة وكل البنات يحبوني يذوبون فيني ذوب طلبتك لا تردني ابي اذا مشيت في الشارع كلهم يصارخون الله سامي سامي ارحمنا يا سامي وعطنا وجه… تكفى قل تم.

العفريت : والله حالة يالحبيب تراني عفريت ماني حلاق تركي في شارع الثلاثين ..ما تبي بعد كريم يشيل الحبوب اللي في وجهك … ترا في لوشون للجسم توه واصلنا بريحة اليوسف افندي …على العموم يابو الشباب مني باحاول ادبر لك واحدة ترضى بك ..بس لا تتميلح عليها …

ويرن جوّال سامي ويطلع رقم غريب ..كلنا شهقنا بصوت واحد أبوك يالعفريت ..بس طلع المتصل هم الأمارة يقولون أن في واحدة مشتكية سامي لأنها يغازلها مع أن سامي خبز يدينا ما عمره كلم بنت الا أمه وأخته الكبيرة ..المهم سامي بيروح يراجعهم ثاني يوم ..وجا دور فارس علشان يطلب…

فارس: أبي فلوس فلوس فلوس أبي جبل كله فلوس أبي .طول الفيصلية جبل فلوس بس لي ..ابي الوليد والراجحي والعليان اذا شافوني يقومون من الاحترام والغنا ابي بيل غيتس يصير يحتك فيني …

العفريت : وين الله رماني على شلة هالملحطين ..تبي فلوس أجل موب ازين لك بعدين يتهمونك بالأرهاب ويشفطون فلوسك قصدي يجمدون ارصدتك وفضايح وسجون والله ما تسوى عليك.

فارس: افا أجل وش اسوي مليت من الفقر …اذا جت فاتورة الجوال أقوم اتنافض من الروعة ..

العفريت: شف يابو الشباب يعني خدمة مني لك …بادبر لك واحد في الهاتف يكنسل فاتورتك هاه و ش رأيك اعجبك صح عفريت ماجابته ولادة ….

فارس: بس ماني بنت يعني ما أظن حقين الهاتف يسوون مثل هالحركات الا لخوياتهم هذا اللي أعرفه الواحدة فاتورتها 4500 ريال وخويها يخليها بقدرة قادر الى 213 ريال والباقي يوزعه على الضعوف من خلق الله شختك بختك وتطيح في راس الضعوف …

العفريت : ما عليك بيني وبينك هالرجال اللي أعرفه مو مضبوط يعني مو راعي بنات المهم اعتمد أنت يالله يا شباب اللي بعده كلنا البرد ,,كل واحد منكم بفروته وأنا ملحط طالع من القوطي ماعلي فانيلة وصروال صيفي ومن زين الطبايع شورت بعد ..

سلطان :أنا ابي مزيد من الديموقراطية والحرية والانتخابات وحقوق المرأة …ويكون هناك انتخابات لمجلس الشورى وانتخابات أخرى ..ل………

العفريت : اسكت يلعن ابو شكلك ناوي توهقنا ..القوطي بحل عند المكان اللي ناوي تقربعنا فيه ..

وتو العفريت ما كمل كلامه ..الا جيب أحمر ( جيب استخبارات عسكرية ) طاير على طريق التخصصي شالوا سلطان من بيننا وسألونا اذا نعرفه طبعا احنا الباقين والعفريت قلنا لهم بصوت جهوري لا والله هو أصلا شكله غلطان أو مضيع ربعه ..كان يسال عن استراحات الحاير تكفون ودوه لها شكله ولهان …

وراحت خمس دقايق من الصمت الرهيب ..وبعدين قرب العفريت مني بهدوء وأدب وأنا ماسك مجلة المجلة الصفحة الفنية ادربي راسي في الصور

العفريت : وأنت يا حلوة يا بطة ,, وش طلبك ما بقى الا أنت هاه وش تبي..

أنا: الله يسلمك ما أبي الا سلامتك ..تحيا وتدوم ..أنت تبي مني شي..

العفريت : يعني ما تبي مني شي أي شي معقولة …قل لا تستحي اذا اقدر عليه باسويه لك..

أنا : لا الله يسلمك ما أبي أكلف عليك ..يعني عاد أول مرة تطلع من قوطي وأكلف عليك ..خلها لفرصة ثانية انشالله.

العفريت : غريبة يعني ما تبي شي بالمرة مو ناقصك شي أي شي فكر زين يابن الناس قبل لا أمشي ..

أنا : لا الله يسلمك أهم شي كسبنا شوفتك من يحصل له شوفة عفريت بشحمة ولحمة من العالم السفلي قل آمين الله يوفقك في دنياك وآخرتك ..

العفريت : على العموم يابو الشباب براحتك أنا قلت لك بس أنت شكلك ما تبي يالله سلام.

أنا : وين هييي لا تروح ..لو ما تحلف وتلزم علي الله يسلمك بس ..عندي طلب صغينون كبر تسذا وانشالله ماراح يحققه لي الا عفريت مثلك وشرواك طال عمرك ولد ستين عفريت ..

العفريت : آمر بس لا يكون طلبك أني أرجع لك سلطان تراني واللهي مدري هو وينه بأي أرض وأخاف اروح عنده ماعاد أطلع …وأخيس جنبه ..

أنا: لا يخسى سلطان أن كان ودك خذ الثلاثة الباقين بعد ..أكبر همي ..طال عمرك والله يحفظك ويسلمك ..أنا تخرجت العام من كلية الطب ولا لقيت لي وظيفة يعني العام ما أحد قبلني ..و هالسنة ما بقى الا شوي و تنتهي فترة القبول فياليت الله لا يهينك تفزع لي وتدبر لي وظيفة تراني صاير عاطل باطل في هالبيت ..والله يا سفا السبع سنين ..جالس أهش ذباب وجهي..

العفريت: بس كذا ..ومستحي يا شيخ لو أنك طالب شي عليه القيمة ياخي حرام عليك تضيع فرصة تقابل عفريت مثلي وتضيع على نفسك فرصة طلب على وظيفة على العموم أنت اللي اخترت يالله نروح الحين باشغلك..

أنا : الله يسلمك بكرة الصباح انشاءالله خبرك الدنيا ليل يعني مافي الا اقسام الأسعاف ..ثانيا الله يهدينا أنت تعال معي البيت وأرقد معي في الغرفة ومن النجمة بكرة نطمر علشان توظفني الله لا يحرمني منك قل آمين .

العفريت : أنوم معك في الغرفة ..خير يابو الشباب .وش أنت ناوي عليه ..اسمع تراني عفريت ايه بس ماني راعي هالحركات ولا يكون على بالك لأني عفريت ..ماعرف شي لا اصحى يا بابا ..

أنا : لا لا يروح تفكيرك بعيد من زينك تراك رحت ولا جيت عفريت ..عموما تبي تنوم في ملحقنا ..الساحة الحوش اللي يعجبك المهم نروح للمستشفى من الصبحية …

وبالفعل من صباحية اليوم الثاني صحيت عفروتو وفطرته ..واثبت انه عفريت أفطر على دجاجتين وطلعنا وسالني بكل كبرياء هاه وين تبي تشتغل تنق وما عليك وطق صدره .جاوبته لك اريحية التخصصي تكفى الله لا يهينك شغلني في التخصصي وأنساني ..

العفريت : وليه التخصصي بالذات وش معنى وش فيه زود عن غيره ..هلا أوضحت يا بني .

أنا : بصراحة الأمكانيات الهائلة والكوادر الطبية اللتي يزخ بها ذالك المستشفى العظيم هي السبب…

العفريت : عيني في عينك هذا هو السبب … عادي قول الصدق والله ما أعلم.

أنا : لا والله يعني السر في بير ..فيه قطع ( القطع = جمع قطعة أي بنيات جروح يهبلن ) ورواتب زينة ولا تلقاها في ايي مكان ثاني وفوق هذا كله مكانه اذا عندك مناوبات أطلع لك أي مطعم و لا راح غازل في شارع التخصصي ..وفوق هذا وهذا عندهم محل فيديو شي يجيبون أفلام جديدة توها ما نزلت للسوق …

العفريت : لا اذا كذا تنبلع على العموم ونعم الاختيار

أنا: الا أنت من دولابي ما أعجبتك الا هالبيجامة ..اللي لونها رمادي و اخضر كان اخترت شي كشخة أحسن

العفريت : ياخي حسيت أنها مريحة وش اسوي القلب وما يريد .. وندخل عند مدير القبول والتوظيف ..رجل محترم ووسيم ومكتبه كشخة فيه كنديشنين ( اثنين جهاز تكييف ,,صرنا هنود ) وبابتسامة عريضة يسئلنا المدير نعم وش تبون؟؟

العفريت : الله يسلمك ويطول عمرك ( ما صار عفريت صار طرارة على غفلة ) نبي نشغل الولد عندكم ..تراه ونعم ولد ذهين فطين ودكتور للمستقبل انشالله ..غير كذا سعودي يعني خريج جامعة الملك سعود وش تبون أكثر..

المدير: سعودي احلف يا شيخ ..والله ما درينا كان طلعنا نفرش له بساط أحمر .. ..شف اذا نسبته اقل من(4.9) من خمسة ما نبيه غير أنه يفضل يكون عنده شهادة أمريكية ولا كندية أحسن ..واذا على قولتك من جامعة الملك سعود يعني يا ليت عنده شوية خبرة ..تراها بتفيده …

العفريت : ( يهمس في اذني ) انشالله نسبتك فوق (4.9) تكفى ولا اقول لك انت جب فوق 4 وما عليك أنا أكسر خاطرهم لك ما عليك ..

أنا: والله مو 4 ولا حتى 3 يعني الله أمر بالستر المهم أني نجحت وتخرجت صح ولا لا هذا على ما أعتقد أهم شي.

العفريت : طل عمرك يعني ترى الخبرة أهم بكثير من الدراسة الدراسة ضغوط وسترس ..يعني الله يطول في عمرك لو تعطون الولد فرصة وتدربونه صدقني بيعجبكم تراه حمار شغل وهذا هو عندكم خذوه لحم وردوه عظم ..أنت بمثابة الأب له ..وأنت القدوة وأنت النبراس ( قايل لكم سحنته مو سحنة عفريت شكله طرار من اللي يترززون عند القصور في شهر رمضان )

المدير: بالعربي معكم واسطة ولا لا

العفريت : لا طال عمرك بس من تبي الواسطة منه وأنا أجيبها لك في لمح البصر افرك يدي و تصير الواسطة عندك .

المدير: شف أحنا ما نقبل الا أربع واسطات بس يعني اربعة من عمانا والغاليين على قلوبنا ..واذا مرة مرة نبي نجامل نكملهم بخامس نقبل واسطة ولد الغالي …

أنا: حلوة اربعة بس وين بيلعبون بلوت ..طيب الخامس يدخل معهم ولا يمسك احتياطي..

العفريت : وش القصة يا جماعة من الأربعة ومن خامسهم تراني مو فاهم شي

المدير: يعني تبي تفهمني أنك ما تعرفهم ولا لا يكونون مو عاجبينك بس ولا مالين عينك ..

أنا : لا الله يسلمك هذا عفريت يعني عنده معزبين ثانيين غير معزبينا هو جاي هنا على باله فزعة ولا يهمك أنا اعلمه من تقصد بالخمسة ..واوشوش للعفريت بأسامي الخمسة ..

العفريت : الله يخليهم ذخر قل آمين ويحفظهم فوق رووسنا

أنا : لو سمحت طال عمرك لي كلمة مع العفريت برا شوي عطنا دقيقة وراجعين الله لا يهينك ………واطلع بالعفريت برا وأقول له يالله يا عفروتو هذا وقتك أبيك تفرك اصابعك الله لا يحرمني من هذي الأصابع الذهبية اللي يستاهلون التبويس اصبع اصبع …

العفريت : تبيني أفرك أصابعي أجل وأجيب لك ورقة منهم ..ايه هين مش خشمك وبقوة بعد ..والله لو افرك نفسي كلي ساعتين ما جبت ورقة فاضية من دواوينهم وش أنت ناوي علي تقضي علي ..

أنا: خل الأربعة على جنب أبي وريقة من الخامس ولد الغالي ..هذا هو ماشالله كل يوم ألف ورقة تطلع من مكتبة ابو الشباب لكل جهة ووزارة ماشالله يمون ..يالله شد حيلك وافرك اصابعك خلني اتعين في التخصصي ..

العفريت : يابو الشباب ناوي أنك تنومني في الحاير ..وش الحاير تهون لو وقفت على الحاير يالحبيب مابي اهلي والجماعة يفتقدوني واللي يرحم والدينك ..

أنا: الزبدة وش تقدر عليه اخلص علينا الرجال داخل ينتظرنا ..

العفريت : تعال معي ..وندخل عند المدير ويقول العفريت للمدير وش رايك طال عمرك ولد عمي عفريت يحبه قلبك يشتغل عندك ( حفنتكوش ) وزير العمل حق العفاريت وش رايك نوطد العلاقات بيننا وبينكم يعني أنتم تقبلون تشغلون هالولد عندكم ..وبالمقابل جاكم مريض حالته مستعصية ما لقيتوا له علاج ..أحنا نشوف شغلنا معه يا نخليه يطيب يا ناخذ روحه بس بشرط ما تجيبون له مطوع يقرا عليه ..

المدير : أقول ممكن تقضبون الباب ..وعلى فكرة ترانا استوفينا العدد المطلوب ..الحمدلله قبلنا عشر أطباء هالسنة يعني فوق العادة باثنين وش نسوي الواسطات اللي جابوها كانت جامدة ماقدرنا نرفضهم …

أنا: طيب ما دامكم استوفيتوا العدد ليه ما علمتنا من أول مو تاخذ وتعطي وشروط ومعكم واسطة ولا لا ؟

المدير: والله وش درانا عن واسطتك ولا ناوي توهقنا مع اللي فوق ..يعني يمكن تكون انت أقوى واسطة ساعتها وش نقول رفضناك ليه لا والله نكرش غيرك ولا نكرشك ..

أنا: اها يعني اللعب طلوع الله يسلمك ..ياخي أنت ريحت ضميري كنت احسب اللعب حكم ..على العموم احنا ماشين الحين واذا بغيت شي من العالم السفلي ترى الله موهقني بهالعفريت السكة …

ونطلع ونركب السيارة ويقول لي ابو العفاريت ..معليش يا عبدالعزيز وسع صدرك ولا يهمك أدبر لك مستشفى ثاني أنت بس تآمر كم عندي من عبدالعزيز ..

أنا : أنت قد الكلام اللي تقوله ولا حكي عفاريت يتبخر …ذي المهزلة اللي سويتها من شوي ..أجل (حفنتكوش ).

العفريت: لا ما عليك اعتمد ازهلها يا رجال لكل جواد كبوة …والجايات أكثر انشالله

أنا : يالله أجل ورنا مهاراتك في مستشفى الملك فهد للحرس الوطني ..أبيك تبيضها أبيك توظفني ..عارف أن ما وراك بعثات بس ولو وظيفة الواحد يأمن بها مستقبلها ..

العفريت : أنت بس تنق القسم و الوظيفة اللي تبيها وما عليك حتى الراتب بيكون على كيف كيفك؟؟

أنا : والله ما يندرى عنك على العموم المية تكذب الغطاس ..قل آمين جعل مواريك خير ..والله لو تخق ولا تسوي شي ولا تفشلنا في الحرس اني لاشغل لك شريط الحذيفي وهو يقرا سورة البقرة فوق راسك .

ونوصل مستشفى الحرس و وطول ماحنا نمشى في الأسياب روائح زكية وعطرة ووجوه تفتح ا لنفس .ونوصل عند المدير الطبي ( اللي يقبل الأطباء ) طبعا أنا لي ذكرى معه من السنة الماضية لأنه كرشني .المهم دخلنا وسلم عليه العفريت ..وبكل هدوء ساله اذا في وظايف لطبيب واعد ( طبعا هو يقصدني ) ..رد علينا المدير بكل سعة صدر ..

المدير : لا طبعا من يقول في أماكن شاغرة للأطباء عندنا,,هذا أكيد واحد مغرض وقصده سيء طال عمركم هالسنة بنقبل طبيبين في اقسام الجراحة ..و3 اطباء في اقسام الباطنة ..وواحد في قسم الأشعة …وواحد في قسم الجلدية ..وأحب أن انوه ان وظيفة الجلدية متقدم عليها الى الان 54 طبيب وما نبي منهم الا واحد …

أنا : طال عمرك ما تدرون أن كلية طب جامعة الملك سعود بس تخرج في السنة فوق 70 طبيب يعني اذا أنتم بتقبلون 7 وغيركم بيقبل 7 الباقين وين يروحون ..غير اللي جايين من برا وش يسوون يبيعون جح في عتيقة …

المدير: والله موب شغلنا ماحد طقهم على يدهم وقال لهم يدخلون طب هذا اللي ناقص بعد لو تكفلنا بكل واحد يتخرج من كلية الطب وش بنبدي عليه آها بس ..

العفريت : ما عليك منه تراه شاب طائش المهم الله يسلمك ويحفظك وش شروطكم يعني النسب المطلوبة كم ووش الشروط الأخرى ؟؟

المدير الطبي : صدق أنك خبل الحين أقول لك كلهم على بعضهم وتقول وش النسب المطلوبة بس احتياطا لو قبلنا أحد لازم يوقع على تعهد أنه ما يطلب مننا نرسله بعثة علشان مو بعد كم سنة يصجنا ,,وشوف يا حبيبي اذا معك واسطة حياك الله وبيّاك ما عندك اقضب الباب …

أنا : اها طيب عن اذنك شوي يا طويل العمر أبي العفريت حقي في كلمة راس ..ونطلع برا المكتب شوي …شف يا عفروتو طلبتك هالمرة عاد ما قالوا لا خمسة ولا يحزنون ابي منك خطاب ..تكفى بيضها ما شفت ام تنورة زهرية واحنا داخلين بأموت لو ما اشتغلت هنا وصبحت عليها كل يوم 10 مرات …

العفريت: وش تبيني اسوي أنت ناوي علي ما اقدر أسوي اللي في بالك وأزور خطابات والله حتى العفاريت ربعي ما يصيرون يعرفون عني شي واللي يرحم والديك …

أنا: مابي منك تزور خطاب من ولي العهد ولا نائب الحرس ولا حتى من متعب بن عبدالله طلبتك يا عفروتو تجيب لي خطاب محترم من خلف بن هذال وبس هذا اللي ابيه ..

العفريت : وين وش خلف بن هذال هذا عندنا في البلاك ليست عندنا ياخي ينقزنا في الجنادرية كل سنة تنقيز اذا انطلق يقصد كأنه رشاش ما ندري هو والله يسبنا ولا يمدح فينا ..

أنا: يابن الحلال وش تبي به أنت بتناسبه . الله يهديك اكتب هالخطاب وشك هالتوقيع ..اللي كانه بصمة جمل وجزاك الله ألف خير ترى أم تنورة زهرية خلت قلبي يتنافض ومتحجبة ..يعني البنت تلمح واللي يرحم والديك شف لنا حل .أبي اشتغل هنا ..انا من هالارض تكفى بليييييييييز…

العفريت : والله ما أقدر على خلف على العموم تعال نرجع للمكتب وانشالله بالقى لك حل ..وندخل للمكتب ويقول العفريت للمدير الطبي ترى الولد مدعوم ومدجج بالأمل ..

المدير الطبي : (بعد ما فز ووقف ) مدعوم من من الله يسلمه ويحفظه تفضلوا استريحوا وراكم واقفين الله يهديكم بس وما تقولون من اول ليه بس..

العفريت : مدعوم ومدجج بالأمل والطموح وهذا انشالله بيجعل منه طبيب مشرف للمستقبل

المدير الطبي : اجل مدعوم بالأمل قم أنت واياه لا ارقدكم في مستشفى الأمل من الطراقات ..صدق ناقصين عباطا

أنا: والله لو معنا عباطا كنت متوظف من زمان هارون الرشيد ( تراني ما اقصد شي ) .. بس طال عمرك لو دخلت دورة العسكريين الجامعيين انشالله بالقى وظيفة عندكم …

المدير الطبي : أدخل ليه لا اذا قبلوك اصلا واذا قبلوك والله ينسونك الطب كله سنة عسكرية وسنتين لفلفة في البران كل مرة حاطينك مع 10 عساكر تقيس لهم الضغط ..قال ايش بيدخل دورة عسكرية ..الله يوفقك .

ونطلع أنا والعفريت خايبين الرجاء …منكسرين الخاطر …وأركب سيارتي وأقفل أبواب السيارة قبل لا يركب العفريت ..وهو يطق النافذة ( الدريشة ) يبي يركب وأنا اقول له لو أنك عفريت اركب السيارة بدون ما افتح لك الباب ..والله مافيك ريحة العفاريت .. واحرك السيارة وهو وراي بالبيجامة وساعتها يكسر خاطري وأوقف وافتح له الباب ..و رحنا للمستشفى العسكري ونفس النتيجة بس الصدق ينقال أنهم بيقبلون هالسنة 8 اطباء ونفس النتيجة الوظايف محجوزة مسبقا وكل واحد يمش خشمه وبعده رحنا لمستشفى قوى الأمن ..ولا شي جديد يبقى الوضع على ماهو عليه ..ورحنا نتغدى أنا والعفريت ( عفريت طفس همه بطنه ) وبعد الغدا ركبنا في السيارة والعبرة على وجيهنا ولقيت عفروتو يقول لي وسع صدرك انشالله بنلقى لك وظيفة ..لو في الشميسي ..الا وش فيه الشميسي ليه ما تشتغل هناك مستشفى كبير ومشهور والكل يمدحه وش عيبه …

أنا : أبدا ما فيه شي ونعم بالشميسي بس البلا أنه تبع وزارة الصحة يعني يا قلبي يا كتاكت …راتب زي وجيههم ودوام يوم الخميس والبدلات ناسينها ..وتقل ماهم وزارة صحة الا وزارة زراعة اللي ماعندهم مؤتمرات وسفرات وغير هذا مشجعين السعودة في التمريض بس بشكل ثاني ..اذا شفت الممرضة مقبلة عليك ترتاع ما تدري هي طقاقة ولا ممرضة .. و أدوية ناقصة وأسرة مكسرة ..بس هذا ..

العفريت : يابن الحلال وظيفة في الجيب أحسن من لا شي ثانيا تكتسب خبرة هناك صدقني ..بكرة يتطاقون عليك كل المستشفيات اسمع كلامي بس ..ثانيا يقولون دوام الشميسي سعة صدر صلاة العصر بالكثير الا أنت في بيتكم وش تبي بعد هاه نقدم لك هناك..

أنا: كلامك صحيح بس ولو ياخي شميسي يعني وقت الغدا المستشفيات الثانية ياكلون فيلية وسمك وكباب وأنا ارعى تميس وفول يا خوفي بيجيني امساك من كثرة التميس والفول … بس على قولتك شي أحسن من لا شيء وننطلق للشميسي وندعس لنا هندي على الطريق ونوصل هناك ونقابل مدير التوظيف في الشميسي شخص طيب وحبوب ومكته يكسر الخاطر ما يجي قيمة الكرسي حق المدير الطبي في مستشفى الحرس ..ووجيه يخلف الله عليها بس ولو شي احسن من لا شي

العفريت : طال عمرك هذا دكتور واجهة مشرفة للشاب السعودي الله يبارك فيه ..ورجل رفض كثير من عروض البعثات ليه تعرف ليه ؟؟ لأنه يبي يخدم وطنه وهمه علاج وصحة ابناء وطنه ؟؟ وايش كمان ؟ لأنه يؤمن بأن العلم يأتي بالممارسة وما في مكان في العالم مثل هالمستشفى الله لا يلد أحد عليه ..بس حيل الله أقوى وين يروحون الناس المستشفيات الثانية يا بفلوس يا للعسكريين والأيمان والأمير سلمان ما ينراح لهم …بس ولو نرجع نقول هذا الشميسي صرح جبار وعظيم ..هاه قبلتوا الولد انشاءالله.

مدير التوظيف: يا أخوي الله يسلمك وش فيك قلبت كأنك برنامج سعودي أنت وهالبيجامة اللي عليك أنا أقول بس عينوا من الله خير وتغدوا معنا ترانا تونا جايبين كبده يحبها قلبك من عند دوار الشميسي ومعها شوية مرقة شي مو طبيعي ..يالله سموا بالله ..

أنا: واللي يخليك لعين ترجيك لا تسمي ترى خوينا على جريف ان سميت بالله تبخر ..يا أخوي السالفة وما فيها قدر الله علي ودخلت كلية الطب وتخرجت …والحين طال عمرك أبي وظيفة في أي شي في أي تخصص الله يخليك تكفى

مدير التوظيف: والله والله ودي اقبلكم كلكم لكن ما بيد الحيلة الوزارة مزكنة ( مزكن = يعني ماعطة اذنهم بقوة ) ما أقبل الا عشرين دكتور بس وجايبين ..

العفريت: خلاص أجل انحلت 20 دكتور يعني أكيد بنلقى له مكان عندكم يالله يابو سعود ..وش تبي جراحة ولا باطنة ولا أطفال ولا نساء وولادة يا خبيث شكلك ناوي عليها . عاد النفس وما تشتهي …

أنا: الله يقرفك وش نساء وولادة أحد يدخلها الا اللي عايف نفسه ..ثانيا فرحان مرة ب 20 طبيب يا بابا كم دفعة هالسنة وكم دفعة فرع أبها والشرقية …وعليك الحسبة ..

العفريت : والله أنك دلخ وش دخل اللي يجون من أبها واللي يجون من الشرقية …وراهم ما يقعدون بديرتهم ابرك لهم .

مدير التوظيف : طبعا كل واحد يبي يأمن مستقبله ويدخل برنامج ويتخصص في شي …لازم يجي يا للرياض يا لجدة ياللمنطقة الشرقية ..ولا بيبتل على وضعه طبيب عام …ولو دخل برنامج وهو في أحد المدن الثانية فمصيره للسقوط لأن اللي يختبرون بس من هالمدن الثلاث …

العفريت : يعني كل هالمدن الباقيات مالهم دور الا اذا الواحد خلص تخصصه صح ولا لا ,,,لا تقولون بيبقى شي ثاني .

أنا: وأنت على بالك اذا الواحد قضا نص عمره في احدى هالمدن بيقدر يرجع لمدينته الأصلية أولا ما يقدر لأنه تعود على حياة المدن الكبرى وثانيا عياله تعودوا على المكان بعد ثالثا من بيترك فرصة أنه يشتغل في مستشفيات خاصة يا بابا اصحى بديت أشك فعلا أنك عفريت

العفريت : يعني الزبدة مافي وظيفة لك في وزارة الصحة هذا الكلام المفيد يعني عزووزي يالله مشينا اسبقني وحم السيارة فيما أزور لي سكنية دخلت في هندي أحول ..وأروح زي أي شخص محطم غبي وأركب سيارتي وأشغلها انتظر عمي العفريت يقبل علي ويجي عمي وهو يتمختر في مشيته كأنه طاووس ويركب ويقول لي تصدق ياعزووزي يمكن أنها خيرة يوم ربك ما كتب لك تشتغل في الطب الواحد ما يندرى وش مكتوب له …

أنا : يعني بتشغلني وزير ولا بتخليني أمير استلم رابت بلووشي كل شهر وكل مصاريفى على الدولة …ولا انشالله بتخليني في مجلس الشورى …………………….. مع الشباب اجتمع كل راس شهر ..خلنا من هذا وهذا تقدر تحطني في المنتخب ألعب كورة كل بطولة العب خرطي واذا فزت دبلوا مكافئتي ..واذا رجعت للنادي قاموا حقون الغربية الأهلي والاتحاد يطاردون فيني ..بالملايين.. ولا مطرب أناهق وفي كل مسرح أطامر واصفق واخرتها فلوس ودلع وفنادق ..ولا شاعر يمدح في ذا ولا ذا وان زعلوا العمان على واحد طاح سب فيه وشرهات كل شهر تكفي وزيادة .

العفريت: وأحد قال لك يالخبل تصدق كلام أهلك والتلفزيون وتذاكر دروسك اول بأول تجتهد وتشد حيلك …ما تدري أن البهايم رزقها على الله يدبر لها أكلها …

أنا : اهيء اهيء اهيء ترى فيني البتسوة ( البتسوة = الصيحة ) ابي اشتغل يا عفروتو أي شي مو لازم طب أي شي والله حالتي صارت صعبة …الشغالة وهي الشغالة لها راتب أنا ماعندي شي صرت استحي اطلع من بيتنا مافي فلوس من وين اصرف …ما اقدر اغازل بجوالي مافي أحد بيسدد فاتورتي ..وما اقدر وما اقدر …..والله ذبحنا …….. يا عفروتو الواحد وده يتزوج ..ركبنا اذا مشينا صارت ترقل من اللي أنت خابر ارحم حالتي ….

العفريت : وهو يصيح ..بس بس قطعت قلبي ..طيب قل لي يا عبدالعزيز وش تعرف غير الطب قل لي ..تعرف كمبيوتر ولا لغات ولا تعرف تطبخ ..ولا وش تعرف….

أنا : كمبيوتر كمبيوتر الله يفتح عليك اعرف كمبيوتر …يعني الحمدلله عندي موقع ..واعرف كذا برنامج في الاوفيس ومستعد اتعلم زيادة بس انت قضبني أي شي أي شغلة بس وما عليك …

العفريت :ابشر ودني بس لأكبر شركة كمبيوتر عندكم في السعودية وأنا اوريك انا اشغلك هناك زي السلام عليكم

وننطلق يم أكبر شركة كمبيوتر في المملكة بكبرها وندخل عند مدير شئون الموظفين ويقول لنا خير وش بغيتوا ويرد عليه العفريت البرم نبي نشغل هالولد ..عندكم تراه خطير في الكمبيوتر يعني بين قوسين فنان

المدير: ومن قال لسعادتكم ان عندنا وظايف ولسعوديين بعد لا يكون احد بيسوي فيكم مقلب وقايل عندنا وظايف للسعوديين …الحمدلله النسبة المطلوبة ومحققينها والشكوى لله …

العفريت : وش نسبته يعني في الشهادة ؟؟الولد خريج طب مو حاسب بس فتيت كمبيوتر يعرف للوورد وبرنامج المايكروسوفت شات وبرنامج الام أي ار سي والماسنجر الجديد …الولد فله وعنده موقع يا شيخ اقبلوه وما جاكم علي ..قولوا ما قاله العفريت …

المدير: يا شين أنت واياه قالوا لنا لازم خمسة بالمية من الموظفين يكونون سعوديين وعلى شوفة عينكم نجمع من هالرخاص اللي يمسك سنترال واللي يمسك سيكورتي واللي ماله أي شغلة بس رازينه في وجه مراقبين وزارة التجارة تصدقون يا جماعة الخير سكرتيري سعودي أي والله يا فضيحتي عند بقية المدراء ..استحي اطلب منه يصلح لي شاهي أو يغسل لي سيارتي …

أنا : طيب طال عمرك أنتم أكبر شركة كمبيوتر في المملكة يعني المفروض تشغلون سعوديين في الوظايف المهمة والمتعلقة بالكمبيوتر هذا ألزم عليكم من موظف السنترال ..السنترال بالطقاق هندي ولا باكستاني ..

المدير: نعم يالحبيب وش تقول يالغالي ..يعني موظف سنترال سعودي ما عنده الا شهادة متوسطة وراتبه 2500 ريال يعني تدري كم مابينه وما بين مدير قسم البرمجة والانظمة الا 500 ريال وذاك الهندي خنت حيلي عنده 16 شهادة جامعية في الكمبيوتر وفوق هذا كله موظف السنترال يتغافلني أحيانا ويوقف سيارته السيدريك في موقف سيارتي المظلل ..بينما الهندي اذا مريت من عنده يفز من محله ويناديني يا عمي …هناك فرق.

أنا : لا تصدق هالحكي الفاضي أنت متأكد أن الهندي يسوي شغل خاص فيه من تحت لتحت ويطلع ألوف وأنتم نايمين غير أن بدلاتكم ومميزاته تفوق راتبك أنت بكبرك ..يعني بدل السكن وبدل المواصلات وتذاكر السفر و الأقامات.

العفريت : طيب الحين اذا أنتم عينتوا الهنود هنا في السعودية هم في الهند بيعينون سعوديين … بس السؤال أنتم ليه مكلفين بالهنود لهم ديرة وحكومة تصاليهم ( تصالي =يعني تواليهم أي ترعى شئوونهم )

المدير: بس الهنود أرخص وأفهم ..وشوله نجيب سعوديين أغبياء ما يعرفون يشتغلون كل همهم الراتب والفركة من الدوام كل شوي واحد يجيك يا امي مريضة يا بجيب اختي من الكلية …يا زوجتي موصيتني على مقاضي.

أنا : ومن قال لك أنهم ما يفهمون ..يعني أنت ياللي ورى هالمكتب تفهم ..على الأقل بينك وبينهم التجربة وشف هم يفهمون ولا لا ..والله حرام طوابير خريجين الحاسب واقفين كأنهم في مخبز تميس عند ديوان الخدمة .

المدير : اقول شوفوا شغل ما هنا شغل وبعد اسبوعين جايبين دفعة مبرمجين من الفلبين يحبهم قلبك عيونهم مشخطة وشعورهم تناثر وأغلى راتب فيهم 1200 ريال يا بلاش والله لا ودوامهم 12 ساعة في اليوم ..الله يديم الرخص ..أما عن السعودة اذا شركات طال عمره وطال عمره وابقاه الله ذخرا لنا ..طبقت نسبة السعودة الادناه ساعتها انا اسفر الهنود كلهم وأعين بدالهم سعوديين ثاني يوم . أما الحين .يالله وروني مقفاكم ….

ونطلع انا والعفريت من المكتب وننصى السيارة ..ويركب العفريت قدام جنبي …

أنا :اقول يالعفريت جزاك الله خير وش رأيك انصا بك طريق الثمامة واحطك في أول قوطي ويا دار ما دخلك شر والوجه من الوجه أبيض لا كني عرفتك ولا كانك عرفتني .

العفريت : ليه عسا ما شر بدر مني شي يكدر لا سمح الله …

أنا: لا سلامتك المشكلة ما بدر منك شي قبل ما ندخل تطق صدرك وتقول ولا يهمك ابشر واخرتها خرطي ..ياخوي حطمتني ..ما تسوى علي أدخل الأماكن نافخ صدري بزعمي معي عفريت وآخرتها لا يسمن ولا يغني من جوع ..أجل عفريت طول بعرض يروح لمستشفى التخصصي وهو لابس بيجامة ..لا وأصغر من مقاسه وسره طالع للناس.

العفريت : وش اسوي ياخي البيجامة شكلها معجبني غير انها مريحة ..ثانيا يا اخي اكتشفت أني اقدر اشغلك طبيب في الصين بس ما أقدر اشغلك هنا في السعودية …ياخي أنتم شيون وقويين عين ..نص دياركم مافيها مستشفيات ونص مسشتفياتكم أجانب ومع هذا وظايف للسعوديين مافيه .

أنا : الصين مرة واحدة صدق عذر البخيل رمضان …..طيب على يدك الكمبيوتر وما نفع ..جب لي أي وظيفة …أي شي انا راضي .

العفريت: أجل ودني للي قال عنه الرجال يوم كنا عنده ديوان الخدمة ..اللي يعطي الناس وظايف وأنا أطلع لك شغل واذا ما دبرت لك شغل ابد ما أصير عفريت ..أصير طفاية سجاير هاه وش قلت

أنا: اقول يا عفروتو خلك من ديوان العمل الحين وقل لي … أنتم صح ما تاكلون الا هوا وتمشون بينكم وبين بعض زلط ملط يعني من دون ملابس وعروسكم ببلاش يعني لا مهر ولا تأثيث بيت ولا يحزنون ان ضاقت بكم الدنيا نصيتوا عبوة بيبسي حجم عائلي وغطيتوها بجريدة وهذي كل السالفة صح ولا لا

العفريت : الا بس ليه السؤال وش انت تبي تعرف بالضبط ؟

أنا : اقول وش رأيك تسوي لي خدمة وتخليني أصير عفريت مثلك على الأقل يعني لو باصير عاطل ولا اشتغل ما تفرق غير أني لو صرت عفريت باعجبك والله لا اسوي شي ما سواه قبلي أي عفريت .أني لا أخلي ابليس بكبره يتقاعد يا شيخ اني لا أفجر بالخلق ..

العفريت: لا ما اقدر هذي الخلطة السرية حقتنا …يا شيخ تحسب ان كونك عفريت يعني وناسة وسعة صدر ..شوفة عينك 10 سنين في قوطي بيبسي الحين لو موديني لأعادة التصنيع وعارصيني في مفرمة الحديد وش بيكون وضعي .ثانيا لا يغرك زواجنا صحيح مافيه تكاليف بس تراه خرطي ..في الليل لا قمصان نوم ولا أسرة ولا شي نجلس نقابل بعض ثم ننفخ في وجه بعض أبد وتقوم العفريته وتحمل على طول ..يعني لا مصارخ آخر الليل ولا وجع ظهور ولا شي . خلك على ما أنت عليه اصرف لك صدقني .

وننطلق ونوصل ديوان الخدمة ..اللي للأسف ما صار ديوان عمل صار مشهد رمي الجمرات ..عالم وأمم وملفات علاقية تطير في السماء …وناس تصارخ و نعال تنطلق من قواعد أرضية كأنها صواريخ ارض جو ويقول لي عفروتو أصبر هنا شوي ..عند دورات المياة وأنتم بكرامة ..وشوي ويرجع لي عفروتو ويقول لي ..هاه وش رأيك يا عبدالعزيز موظف في وزارة الكهرباء ..مدري وش تسوي هااه نعتمد لك الشغلة ..وأنا أرد عليه ايه ايه ايه ..ويروح عفروتو ويجيني ويقول لي ..عبدالعزيز خل أيمانك بالله قوي ..الوظيفة طار بها واحد مدعوم من موظف كبير هنا في الديوان بس ولا يهمك لقيت وظيفة في أمانة الرياض …شكلك بتصير على آخر عمرك تجلد الناس ..وأنا أرد عليه الله وناسة موافق موافق والأسواط أجيبها من فلوسي … ويروح العفريت ويرجع ويقول لي معليش عبدالعزيز ولد أخت أمين مدينة الرياض دق عليهم يقول الوظيفة بيعطيها و احد من أخوياه ..عادي لقيت لك وظيفة كاتب في المرور ,بتسجل المخالفات في الكمبيوتر هاه نعتمد ..أنا أعتمد ولو أنها بلشة بيصير كل واحد من العايلة والربع يدق علي تكفى أمسح مخالفاتي من الكمبيوتر وأنا انسان أواجه مشكلة مستعصية مع ضميري بس يالله شغلة والسلام ..شف عفروتو احتياطا لو واحد لطش هالوظيفة ولقيت غيرها لو حارس مزرعة ..اقبلها بدون ما تشاور ..زين يا عفروتو …

العفريت : بصراحة مدري وش أقول لك …الواسطات في هالديرة مدّهرة ..راحت الوظيفة وززز طارت بس ولا يهمك مصدر موثوق صرّح أنهم بينزلون 12 وظيفة مدرس في الرياض هاه وش رايك نعتمد لك واحدة منهم ..

أنا : والله أنا مالي في التدريس بس الواحد ما يتبطر على نعمة الله وش زين وظيفة المدرس وخصوصا مدرس الأبتدائي الساعة 1 بالكثير الظهر خالص وأجازات على كيف كيفك والأختبارات استلعان وآخرتها الفطور تميس وفول . واذا على المستوى ماحد داري عنك .ولو جاك موجه نافق له وتميلح معه وباشر عليه بشاهي و سندويش بيض وابشر بالتقدير اللي يحبه قلبك … موافق موافق بس مدرسين ايش …

العفريت : في مدرس قراءة ابتدائي و انجليزي متوسط وجغرافيا ثانوي … وش تبي منهم ؟؟

أنا : يا وجد قلبي على قراءة وابتدائي تكفى طلبتك ..أنا أعرف أتعامل مع الصغار خبرة ..بس احتياطا لو أحد لطش الوظيفة ..مافي مانع من انجليزي متوسط ..واذا مرة مرة جغرافيا ثانوي أي شي بس اخلص علي بوظيفة ..

العفريت : ابشر ..( ويروح دقايق ويرجع وعلى وجه علامات الخيبة ) ..والله مدري وش اقول لك يا عبدالعزيز بس والله ما قصرت بس الحظ وياي قصّر على العموم في أستاذ رسم ..في الدخل المحدود تبي …

أنا : اقول اها بس تلعب علي يالله تعال معي بس قال ايش قال عفريت ..والله ما حصلت فارة ميته ..ونركب السيارة ..والتفت على العفريت واقول له تدري وش ودي أسوي بك ؟؟

العفريت : لا والله .. ترانا عفاريت بس ما يعلم الغيب الا الله ..الا قل لي وش ودك تسوي بي ؟؟أنشالله خير ؟؟

أنا : أربطك في غرفة بيضا واشغل لك استريو 500 واط وأحط فيه الشيخ السديس يقرا فوق راسك لين تتبخر ..كود يبرد قلبي ..وأخلص شوي من ثاري عليك …صاجني عفريت وعفريت ووخروا عن العفريت ..ومن شات القوطي ومن طلعني …وبوووو ..وشبيك لبيك … كش عليك بعد كش عليك ماني رادها عنك ..والله العظيم خانقتني العبرة .. منك.

العفريت: يؤ وش سويت ..أنا حاولت بقصارى جهدي بس ديرتكم ماهنا شغل ..مدري وش قصتكم متجمعين في هالرياض كنها جنة الدنيا وهي حر يذبح في الصيف وجمدة في الشتاء ..وفوق ذا كله اللي يخططون لكم مدري وش يبون هم يخططون لكم ولا يخططون لديرة ثانية ..المدارس الحكومية صايرة تروع الفصل الواحد يوصل لسبعين طالب ..والمستشفيات ماهنا أسرة ..والشوارع لو تصدم ما تحصل شرطي مرور ..وموظفين الحكومة شياب ..كل واحد عنده عشرين دوا ..وكل ما تقاعد واحد حاس وجاب واسطات الدنيا علشان يمددون له سنة ..وكله كوم والواسطات كوم .ما تمشون الا بالواسطات ..القهر اذا ما تمشون الا بالواسطات فليه من اساسه تدرسون وتدخلون الجامعات وتتعبون أنفسكم ..أبي افهم …

أنا : اها بس ناوي تودينا في ستين داهية صدق أنك عفريت قليل أدب وبايعها …أصلا القائمين على هذا البلد لا يئلون جهدا من أجل انماء ورفع شأن هذا البلد المعطاء ….الحمدلله …وش ناقصنا قل لي وش ناقصنا ..احد عنده كهرب برخص كهربنا ولا تليفونات فواتيرها تجيب الجلطة زي فواتيرنا ..ولا مساواة زي اللي عندنا ..الحمدلله يارب مافي مكان في هالديرة يفرقون فيه بين الأمير واللي مو أمير ..كلهم سواسية ..هذا يحصل حاجته و المواطن ابن الكلب بس تنفقع مرارته الحمدلله يا رب ..اللهم دمها نعمه واحفظها من الزوال… المهم خلنا من السياسة ..وخل نفكر في مصيبتي ..أنت أثبت بتفوق فشلك في أيجاد وظيفة لي عادي تعودت صارت عندي مناعة ..طيب عندي طلب بسيط ..ممكن تساعدني نفتح مشروع في السعودية على الأقل منها أربح شوي وأصير رئيس نفسي اضافة الى يمكن بكرة أصير شي وتكبر مشاريعي وتتوسع ثروتي واصير من رجال المجتمع .ويسعى الكل الى انه يشاركني سواءا بالطيب ولا بالقوة …

العفريت : آمر وش تبي بس كذا غالي والطلب رخيص …وش رأيك افتح لك كابينة هاتف ولا وش رايك افتح لك انترنت كافيه أنت بس تدلل علي…

أنا : ( يوووووووهااء = مسكت فرامل بقوة ) أقول أنزل أنزل من سيارتي لا بارك الله فيك من عفريت ..أنت عفريت ولا أهبل ..الحين في أحد عاقل يفتح هالأيام كابينة اتصالات ..والله أول مرة أدري أن العفاريت مخفات يصدقون كلام الوزراء أجل لتوظيف الشباب السعودي وآخرتها نكبو عفشهم بالبطاقات .أما الانترنت كافيه فحدث ولا حرج ..الهيئة مستلمتك كل شوي تشوف الناس وش يسوون أحد يتصفح مواقع ممنوعة ..طيب أنت وش ذنبك واحد قليل أدب جا وقام يحوس يدور مواقع وصخة راعي الانترنت كافيه وش ذنبه … غير كذا الساعة 11 الليل تسكر يعني ما سوينا شي في اليوم كله الدوام ما يجي الا اربع ساعات بالكثير .. وفوق ذا كله شلة المبزرة يجي الواحد منهم عندك ويقوم ينزل صور وبرامج وملفات ونصها فايرسات وتنحرق أجهزتك وأنت تتفرج ..لا واللي يرحم والديك ماني ناقص ضغط ..عندي أصير صاحب مصنع خمور أصرف من أني أكون صاحب انترنت كافيه …الا وش رأيك تخليني صاحب بنك مو فكرة حلوة.

العفريت: بنك مرة واحدة ..اقول ترى العليان يبي شريك له مو ودك نخشرك ( يخشر = يشارك ) معه ترى ولد ناس أجاويد ..ولا وشوله تحصر نفسك في الأقليمية ..بيل غيتس ينشد عنك ..ويقول وين ابو غرة جنان أبيه يشاركني .. تراك من جد مغتر بنا يالعفاريت على بالك احنا زي ما تطلعونا في الأفلام اذا نفخنا في شي يصير ..معصي,, هذا أيام الطفرة أما الحين والله لو ما ننافخ ..والله لو نكحكح ونعاطس ما سوينا شي ..وأنا ما اقترحت عليك كابينة الاتصالات أو الانترنت كافيه ..فلأني شفت محلين مكتوب عليهم للتقبيل وقلت في نفسي انا وشوية عفاريت نتقاط لك ونشوف ناس من أهل الخير يساعدونا علشان نجمع القيمة الكافية … ولا لو تنفضني ما تلقى معي الا ريالين من المعدن حقات مناسبة المئوية .

أنا : افا وأنا اللي شاد بك الظهر والعفريت وما أدراك مالعفريت ووخروا عنه … تراه أطلق واحد يقول بوو ..آخرتها مافي راسك الا الدجة … طيب يا عفروتو ..وش رأيك تخلين خوي …

العفريت : وش الخوي ؟؟ لا تكون شغلة سياسية بس ابعد عني بس..

أنا : لا وش سياسيته ..هذي طال عمرك ما ينطبق عليه المثل أكل ومرعى وقلة صنعة ..يعني ما تسوي شي غير أنك تجلس مع واحد الله منعم عليه .. يا رجل أعمال يا أمير يا مسئول كبير..وتتغدى و تتعشى كل يوم على حسابه واذا سافر أي ديرة تسافر معه تونسه وتضحكة .واذا كان طال عمره من اصحاب المواهب يعني شاعر أو رسام أو عضو شرف في نادي ..يبي لك شوية زعاق وصياح ونفاق ..وانت مو شاعر طال عمرك أنت ساحر ..تصدق وأنا في طريقي لقصركم طال عمرك شايف عشرين بنت منتحرات في انتحار جماعي وكل واحدة حاضنة صورتك ومعها قصايدك .. ولا لوحاتك تعبر بكل صدق عن الواقع الأنساني المعاصر ..ولا فريقنا بأذن الله وما دام أنت وراهم انشالله بطولة الدوري ضامنينها في جيوبنا الله لا يعوق بشر ..وشرهات ورواتب وانتدابات وواسطات وتذاكر وأوامر اركاب على كيف كيفك والله يعز الحكومة ..هاه بتخليني خوي ..واللي يخليك تنق لي واحد زقرت ….

العفريت : الحين يالهيس ( الهيس من عيال عم التيس ) شايفني لي كم يوم منطق معك وقبلها كم سنة في القوطي بالله عليك لو أني سنع مو كان دبرت لنفسي واحد مريش أصير خويه وكل ليلة أوسع صدره بكم ( بوووووو ) بكذا طريقة مو اصرف لي يالشين ..اطلب شي اقدر عليه ولا اسكت …

أنا : والله ما منك نفع صدق يا سفا بيجامتي عليك افصخها يالله افصخها ..يالله وش تنتظر ابيك تموت برد ..وش تقدر تسوي غربلك الله فهمني لا وظيفة ولا خرابيط ما غير ألف بك كأنك متخلف وأنا انحاش بك عن الجوازات ..الا والله فكرة شكلي بارميك عند بوابة الجوازات الله عاد يلقطونك ويسألونك عن اثباتك وأنت ما عندك ياهم بيوسعون صدرهم فيك توسع هاه أرميك هناك ….

العفريت : لا واللي يرحم والديك تراهم قبل سنة وشوي لاقطين عفريت من الجماعة ..مردغوه تمردغ والبلا كل ما قال لهم بووو تفلوا في وجهه والأردى من ذا وذا كل ما سألوه أنت من وين وقال لهم أنا عفريت ..علقوه من اصبع رجله الأوسط وتمسيط وجلد على ظهره ..آخرتها سألوه وش انت قال لهم كلب داخله سكني ..ودوه لشيخ علشان يطلع الجني قرا عليه المصحف مرتين ..الغريب الغريب …انه صار كلب…. واللي يرحم والديك كل شي الا الجوازات اطلب اللي تبي هالمرة لو تبيني احرق أصابعي العشرة لك شمع ..أنت تآمر.

أنا: اممممم شف أبي منك طلب لي ولآلآف غيري ..أبيك يوم الاثنين الظهر تروح لقصر ابيض كبير يسمونه قصر اليمامة طال عمره ..بتشوف مجلس فخم ودائري يوسع الصدر ..وفي ناس محترمين ( عماني وعمانك ) ابيك توسوس لهم أنهم يقرون هناك رواتب للبطالة والعاطلين لين يتوظفون يعني مبلغ زي مكافأة الجامعة الواحد يمشي به أشغاله الضرورية …بس وساعتها الوجه من الوجه أبيض تبي ترجع لقوطيك ..ولا ،جيب لك برميل جديد ..ولا أحطك في كورة الفيصلية اللي فوق تكفى قل تم .

العفريت : أقول ودني للقوطي بس لا باركت فيك ولا في ساعة عرفتك فيها هذا اللي ناقص تبي تموتني ..أنا وش سويت لك غربلك الله ..عنك لا أنت ولا باقي العاطلين عشتوا ..أجل تبيني اروح قصر اليمامة ..لو افكر اعدي البوابة ..مو يلعنون والديني ..مو يتفلون بوجهي …مو يقطعوني تقطع الا يمحون شي اسمه العفاريت من الدنيا كلها ..ان ما يكفيهم أن يحشرون العفاريت اللي في الدنيا كلها وتحرقهم حرق … هذا اللي ناقص أقول انطم بس ودني للثمامة خلني ارجع لقوطيي تراني ما أعرفك ولا عمري شفتك يالله هناك بس ولا أقول لك باخذ ليموزين ولا بروح مشي …مابيك وقف السيارة اخلص..

أنا : يابو الشباب اصبر شوي خلنا نتفاهم يعني يمكن في الموضوع لبس هد أعصابك بس و عين من الله خير ..خلاص انسى كأني ما قلت شي بس خلك معي هنا .. ( وراح العفريت واختفى ) وينك يالعفريت ارجع ارجع يا كل الحب …وينك عفروتوووووووووووووووو …اختفى العفريت آه يالقهر ..آآآه ه ه يا عفروتووووو و آآآآه يالقوطي.

وتقبلوا خالص تحياتي

ترى هالقصة خيالية ولا لها علاقة بالواقع ولا صارت ولا راح تصير اصلا من فينا يؤمن بالعفاريت من أجل ذالك وجب التنويه

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة