المهنه:طالب جامعي في كلية التربيه ..سابقا بعد قرارت الاحتراف ومن ثم المكافائات (مروّس)أي عقيد ايقاع شرقي
العمر:25 سنة ومن مواليد شهر ذي القعده ويتفائل بشهر شوال ..
قصة الحب السابقه:::فتاة عاديه تعرف اليها عن طريق الترقيم في اسواق المعيقليه …..وبعد ما مشت الامور بينهم زي العسل ..اكتشفوا انهم كانوا ينصبون على بعض ..هي تقول ان ابوها وزير سابق وهو يقول ان ابوه دكتور .وهي تقول ان سيارتها فياجرا ذهبي ..هو يقول ان جواله نوكيا رهيب..(بيجر زجول) بس كل شي كان ماشي تمام التمام لحد ماقدر الله وتقابلوا صدفة من غير ميعاد امر كتبه رب الكون في سوق الزل هو كان يدور على طيران وهي تبيع شروخه مع اختها الصغيره..شافتها مامسكت نفسها قالت بعد شهقه عاليه …سعود (قايل لها اسمه سعود) والاخ كان يجرب احد الطيران ..استلج ..ياسعود وش علام الحلويين متغليين ..يا سعود لايكون وقتنا راح ………..ياسعود شفت في غيابه الغرابيل والبين ….ياسعود فرقا الغالي ملت خافقي جراح,,,
وعندئذ حلوة عندئذ هاااه حصل الاصطدام الرهيب هي بكت من الالم وسطرته كف هو من الحزن خبطها بالطار على راسها…فكوا بينهم عيال الحلال ..بس اختها الصغيره سنافيه طلقت عليه 12 صاروخ من بعد…..
المواصفات:مروّس موهوب يؤدي 3 نغمات في وقت واحد وبيد واحده….جرح سطحي في الجبهه من اثر الشروخه..
مواصفات فتاة الاحلام:أي شي ,بنت والسلام,أي لون ,أي عمر,أي اسم,,,بس مايكون لها أي علاقة بنشاط ومزاولة وتجارة الشروخة.
المهنة:طالبة جامعية في كلية الاداب..بس الله يشهد ويعلم على انها جابت مجموع عالي في الثانوي وكان ودها تدخل طب الاسنان بس مشكلتها تقرف بسرعه….فشلون بتستحمل تطلطل في خشش (جمع فم ) خلق الله
العمر:19 سنةهذا بالهجري بالميلادي يطلع اقل بحول سنتين يعني من 17 ونازل
قصة الحب السابقه:تعرفت على شاب ..من مدينة جده (الله يسامحه على انه مايستاهل) عن طريق الانترنت فهمها انه شاب سبور(بيني وبينكم هي تكره السيدان) وانه متحضر وانه ابن اصل وفصل (فصل مو صف) وكذا شهر وهو يطارد وراها على فويس شات (موخروف) واخيرا وافقت من حبها له ..بس (لا قطو) لاحظت حكيه مو ذاك الزود سعودي بس مكسر ..واتضح فيما بعد ان خواله هنود…واعمامه اندونيسيين..حصلوا على الجنسيه من زمان…بينما ولد عمه الى الان معاملته في وزارة الخارجيه من اجل الحصول على جنسيه..ومن ذاك اليوم هجرته وقررت ان تتركه للابد ليس علشان اصله (لاتصدقونها الا علشان اصله بعد) والبنت منصدمه بشكل غير متوقع ..صارت كل ماشافت الشغاله وهي تصلح لها الاكل ..تحس ان هذي كانت يمكن تصير خالة عيالها.. .وكل ماركبت مع السواق كانت تحس انه هذا كان يمكن يكون حماها او عم زوجها…..مسكينه لها كم شهر لاتاكل ولاتشرب الا معلبات وماتروح الا مع ابوها او ماتطلع خير شر..غرفتها وصخه ..مانعه ان الشغاله تدخلها…
المواصفات::مثقفة ..تقرا مجلة ميكي ..حلوة بس نحيفة مرة ..وبالذات بعد اكل المعلبات……بنت نعمه …شعرها اصفر…(صابغته)
مواصفات فتى الاحلام::يكون سعودي ,,,ومقتدرعلشان اذا تزوجها يجيب لها شغاله وسواق من بلاد الحبشه..و.ان يكون عسكري ..(علشان يكون مضمون انه سعودي اصل وفصل..)على فكره هي ماتطيق العلاقات الطويله ,,يعني لاحد يحاول يتلزق اذا فكرت انها تطيره..
الاسم:خالد DaNgErOuS
المهنه::DaNgErOuS ,يعني صايع لاشغل ولامشغله
العمر:::23 سنة من مواليد مستشفى جنيف المركزي بجنيف في الصيف يوم كانوا يسيحون هناك
قصة الحب السابقه::: تعرف على بنت ناس على قد حالهم…بس صدق ماينعطى وجه كل شوي يتتريق عليها وعلى ابوها واهلها …في عيد فالنتاين جابت له الضعيفه ورده حمراء ,,بس الشين ولانه شين سألها مالقيتي شي اثمن من هالورده ..الا بكم شاريتها..حطم البنيه…..,حاول يراضيها جاب لها مزهريه وقال لها حطي وردتك فيها قبل ماتذبل …البنت ماتماسكت نفسها رمت المزهريه على الارض وكسرتها له…تعرفون وش سوا المرهف الحساس ….رمى الورده وقام ينطنط عليها كانه خبل ,,,مسكته الهيئه وطلع طبعا …لانه ((…..))
المواصفات:غني وسيم,,دب ,,مكررررش,, ,مثقف-امحق معه شهادة ثانوي- لزقه صوته يحكي من اعلى سقف حلقه …حكيه ماصل …..تشخيصته بالشماغ مايغيرها لو يموت ابوه
مواصفات فتاة الاحلام:: فتاة محترمة من وسط اجتماعي ووعائلي راقي…ويفضل ان تكون افضل ادنى منه بشوي لانه مرة حاول ان يحتك بواحده ارفع منه ..مرمطت به الارض لانها كانت DaNgErOuS اصلي مو تقلييد زيه…
الاسم:مايا MaYa
العمر :21 سنة الا كسور يعني 4 اشهر ,6 اشهر ,8 اشهر,10 اشهر ماهي متاكده
المهنه::طالبه في معهد المعلمات بجده….يعني هي من جده ام الرخا والشده
قصة الحب السابقه::: شاب حليوة وسيم تعرفت عليه يوم كانت في درة العروس تلعب بالجيت سكي ويوم طاحت في البحر والا ينط الشاب الشهم المنقذ وينقذها من الغرق وبس قامت تسبل لها ويسبل لها وقعدوا يالله لاتخزينا يسبلون لبعض نصف ساعه..ومن ذاك اليوم هي تسميه الشهم وهو يسميها الفاتنه. ..وصارت قصة الحب بينهم تنمو وتترعرع الى ان وصلت للخطوبه وفعلا خطبها…وفي حفل الخطوبه والبيت لايص في ناس وحفله ووناسه وموسيقى ,,,ويفاجئون ببنت كانت ترقص تسقط مغمى عليها ..ابو الشهامه ماقصر راح شال البنت واخذها للمستشفى وطول ماهي في الاسعاف هو يسبل لها وهي تسبل له…هنا وهنا فقط حست مايا انها طاحت في يد واحد مسبلاتي يعني ماراح يجيبها لبر…..وصار اسمه واللقب حقه في العائله المسبلاتي بدل من الشهم…ومن يومها …ياحياتي تكسر الخاطر لابسة نظارة شمسيه..علشان ماتسبل لاحد ولا احد يسبل لها.
مواصفات فتى الاحلام:: يكون مثقف زيها يقرا لنزار قباني انشالله مايكون فاهم شي بس يقرا له …ولايكون رافض فكرة انها تشيش…بس اهم شي يا يكون اعمى يا نظره ضعيف يعني بالعربي مايعرف حتى معنى تسبيل بالعيون…ولايكون شهم ياليته يكون نذل مايهمه الا روحه حتى هي تتعهد انها ماراح تركب جيت سكي الا وهي لابسه عوامه…اهم شي لايسوي نفسه فيها ..ابو الفزعات.
الاسم:الصقر العربي حسين hussain Arabian sager
العمر:22 سنة من مواليد ابها بس يدرس حاليا في الرياض في كلية الطب البشري بالرياض…..
قصة الحب السابقه:: الكلام له((ايش حب هاذا اش كلام فاضي انا مابعرف أي شي عنه بس مادام انه ما يلهي ولا يشغل عن الدراسة مايضرش ..ايام كنت في ابها..كانوا دايما يقولوا عمشة بنت عمتي لي وانا لها …بس اييييه عمشة ماتت بسبب حمى الوادي المتصدع ..الله يرحمش ياعمشة فراقش صعب صعب..صحيح اني ماحضرت حتى جنازتها ..خايف من المرض وثانيا كان عندنا اختبار مادة التشريح بعدها باسبوع…على فكرة انا سالت احد الشباب معي بالكليه عن الحب وجلست اقول له ايش اللوف يعني…والله حتى هنا هما في الكليه ماعندهم فكره عنه يقول انه في فيروس في الانترنت اسمه أي لوف يو…شوفوا اذا هذا هو الحب ما بديش منه….)) ما اقول الا الله يخلف على بنت تنهبل وتحبه..
المواصفات:::ولد نشيط ومقتدر ابوه عنده مزرعة نحل ومحل بيع عسل,,وذكي معدله فوق 3,7 الى الان ياربي ماينزل …..الوسامه امي تقول لي حلو وخالتي تسمي علي كل ماشافتني…حتى بنات الرياض كل ماشافوني وانا اشتري عشاي من طريق الامير عبدالله يعجبون فيني ويقولون كش عليك…
مواصفات فتاة الاحلام::يفضل فيها ان يكون ابوها دكتور…وماا احب ان البنت تكون مزعجه ومقلقه….واهم شي ان تكون مطيعه ..مو كل شويه تقول لي لا ولا تراددني ..انا راجل حمش وابويا معودني ان الحريم في بيتنا نناديهم هيش…
ملحوظة::انا ماني عارف ايش خلاني احط اعلان هنا يمكن لانه ببلاش ولا لانه الناس تحكي عنه كثير بس من جد والله ماني شايف فيه فايده علميه مذكورة…
الاسم::عبير ….((الساحره))AbErR thr magic
العمر :::25 سنة …تعمل في روضة اطفال …وامها تقول شرفت على العنوسة…
قصة الحب السابقه::هالبنت تعاني من حاله انفصام في الشخصيه غريبه,,…اذا حبت واحد أي شاب ما اسرع تتخيل شخصيته في طفل صغير من اللي عندها في الحضانه.,,.مثلا حبت شاب اسمه خالد ,,من بعدها راحت تتعلق وتدلع ولد في الروضة عندها اسمه خالد تلعب معه وتشتري له العاب ,,,ولما صادت خالد يغازل في احد الاسواق..,,,قررت انها تتركه مو بس كذا الا قلبت على الولد الصغير اللي عندها في الروضه ,,,ياما تطقه يا تجلده يا تحبسه في دورة المياة, ,المهم اخر قصة حب لها ,,حدثت كارثة حبت شخص اسمه عثمان يعمل مضيف جوي في الخطوط السعوديه,,كل يومين مسافر ,,في الايام اللي يسافر فيها عبير تتعلق بالولد الصغير اللي عندها في الحضانه اللي اسمه عثمان بعد,, لدرجة وصلت انها تكلم عليه في البيت …وتغار عليه اذا جا يلعب مع العيال الصغار ,,المهم كان حبيبها عثمان في الطيارة السعودية اللتي اختطفت وراحت للعراق ,,ولما عرفت جن جنونها,وجتها الحاله راحت الى بيت اهل عثمان الصغير ولما شافته ,,ماقدرت تستوعب ان عثمان هذا طفل وحبيبها الاصلي في بغداد ,بل جتها وساوس ان عثمان اللي قدام عينها (يعني الصغير) يبي الفكه منها وماشعرت بنفسها الا تطيح في الطفل الصغير طق وهي تناديه ياخاين تبي تهجرني ليه انا حبيتك هذا جزاي ولما حاولوا اهل الولد ينقذونه طاحت عليهم طق…ومن بعدها ادخلت مستشفى الاعصاب ,,ولما عرف عثمان الكبير قرر انه يهجرها….بس كل الحقد اللي في قلبها على عثمان الصغير….
ملاحظات:::البنت ميب صاحيه بالحيل يعني عليها طلعات وطلعات…تخوف احيانا تعامل اللي قدامها بكل الحنيه واحيانا تنط على اللي قدامها تعظه.
المواصفات::حلوة جدا,غيورة,شكاكه,,حكمتها في الحياة دافع عمن تحب بكل ماتملك ,,وايضا توافق احمد جميل ومحمد الخليوي وعبدالله سليمان في الحكمة الشهيره ..اذا راحت الكورة لاتروح الرجل…
مواصفات فتى الاحلام:: شاب سعودي يكون وسيم وحنين ورجل بمعنى الكلمة,,,بس بشرط مايكون اسمه يشابه اسم أي طفل في الروضة عندها يعني اسم زي (فلاديميي,روستيف,,مارك,توم) لانها تلخبط في الشخصيات من الاسماء .
الاسم::وليد المملوح WlEeD alsalty
العمر 27 سنة ويعيش حاليا في المنطقة الشرقيه
قصة الحب السابقه:::قصة غير شكل احداث غير متوقعه…الولد هذا على كثر ماغازل وعرف بنات الا انها كانت مجرد علاقات عابره,,بس اول حب حقيقي عاشه كان مع البنت اللي عطته اول كف وكان هذا في سوق الراشد..مر من عندها طلع كرته ,,وشوي وشوي وبيحطه في يده الا وطراااااااااااع (كف على وجهه) طاح وليد على الارض من قوة الكف..ومن ساعتها والبنت داخله مزاجه ..قام بعد الكف وصار يلحق البنت مو هدفه انها تاخذ رقمه ولا انها تتكلم معه ..بس يبيها تعطيه كف ثاني على الخد الثاني علشان يصير عنده توازن,,,البنت حسبته واحد خفيف دم خذت رقمه ..المهم صار من ذاك اليوم كل ماكلمها يلح عليها ان يتقابلون ,,ليه؟؟علشان تعطيه كف ..بهذلها كل ماراحت للسوق ارتز قدامها لين تصكه بكف بس علاقتهم كل شوي تتطور ..طلب منها تجرب تخبطه بشنطتها وبعدين ترفسه بكندرة كعب شوكتها 10 سم الولد اخر مرة طلب منها ان تقابله على الكورنيش وان تبستف به اخر بستفه ..بس البنت اخر مرة بالغت شوي جابت معها جزمة بوت وما امداها تخبطه بالوبت الا وادخل الى المستشفى على قسم الطوارىء …المسكينه خافت ان تمسكها الشرطة. .ومن ذاك اليوم توارت عن الانظار…بس الولد مازال متيم وهيمان بها…….
المواصفات::فتى طموح ووسيك كان رفيع ومسلوع ..بس سمن شوي علشان جسمه يتحمل طق زياده,,,فرحان هاليومين بكلمة قالها له دكتور نفسي ,,قال له انت ماسوشي ومن ذاك اليوم ووليد ماغير يغني انا ماسوشي انا ماسوشي,,,يحب المراه المتسلطة أي والله العظيم يحبهم حب
مواصفات فتاة الاحلام::ان تكون بنت عضلات الجمال بالنسبه له شي ثانوي..ويفضل ان تكون على خبره او عضوة مشاركة في WWF ,,اذا ماحصل بنت يكون عندها حزام اسود في الكاراتيه ..تكفخ بروسلي,, ..ماحصل على الاقل بنت لسانها بذيء ومتبري منها واحده عليها لسان ولا لسان بياعة فصفص في سوق الحمام وحده قشرا
ملاحظة:::الكونسلتو النفسي اللي اشرف على علاجه في المستشفى يقولون ان حياته معظمها قضاها دلع وسعة صدر ..فانحرم من العنف في حياته..وهذا هو السبب.
الاسم::مرام MaRaM
العمر:::16 سنة على فكره مرام اماراتيه..وتعيش في الفجيره…
قصة الحب السابقه:::مرام زيها زي أي بنت خليجيه تسال نفسها ليه العيال الخليجين يغازلون ويعرفون بنات عربيات واجنبيات بينما البنات ماعندهم الا خيار الولد الخليجي غير كذا مرام عندها عقدة اللون الاشقر من زمان,,قدام بيتهم مطعم لبناني كل اللي يشتغلون فيه عيال عيله(مزراحي) واشين واحد فيهم لونه ابيض وشعره اشقر وعيونه زرق…استاذها الخصوصي في مادة الرياضيات ..من زحله على انه شايب ابو 57 سنة الا انها اطلق من جميع اهلها ..دخلت الجامعه الامريكية بالشارقه ..تحطمت زياده وزياده..عندها مقرر (105 ريض) كل القاعه شقر وبيض وحمر عطر الا هي خنت حيلي سمراء ..المهم اخر قصة حب البنت باعتها وراحت رقمت ولد لبناني اسمه (طوني رزه) الولد قام يتمصلح ويكلم ويمدح فيها ويقول فيها شعر لايليا ابو ماضي ونزار قباني وعمر ابو ريشه يبي الجنسيه ولا الاقامة الدائمة,,,صحيح انها نص الحكي ماتفهمه بس تمشيه ,,المهم فاتحها طوني بالزواج ولما فكرت تعلم اهلها ,,ومادروا اهلها الا عصبوا وحمقوا بس من ردات حظ مرام ..ان ابوها صديق كفيل ابوك ياطوني فقام سفره ترحيل وخروج نهائي..ومن ذاك اليوم ومرام مرتزة على الانترنت تبحث عن طوني وقلبها متحطم على غيابه …المسكينه من اللي زاد مصيبتها نقلوها من الجامعه الامريكيه بالشارقة الى جامعة ابو ظبي..المسكينه في مقرر (103 فيز) كل الشعبه اللي معها سمر هي ابيضهم (خنت حيلي).
المواصفات ::فتاة سمراء مثقفة من عائلة ذات مستوى اجتماعي واقتصادي رائع,,,بس المسكينه صارت مثل الغراب اللي ضيع مشيته ولاطال مشية الحمام حكيها ماينفهم اذا هو لبناني ولا اماراتي
مواصفات فتى الاحلام:::اولا يكون اشقر واذا يالله يالله ابيض ولا بني فاتح,,ثانيا وهو الاهم يا يكون معه جنسية خليجيه ولا يكون كفيله ,,,عدو ابوها او غريمه يعني مو ااذ ابوها درا يقوم يسفره على ديرته بشخطة قلم,,,
الاسم:::طحيمر بن شارد بن مغيليث soory inable to write it in in English
العمر::::24 سنة …من مواليد حائل ويعمل حاليا في الرياض
قصة الحب السابقه:::حبيبة القلب والوجدان والروح ….وفاء من سوريا تعرف عليها في مطعم في ابو رمانه ..بقششها بخمسمية ليره علشان يطلع قدامها شقردي(يعني سنافي يعني فلته ) المهم ويهديها كل يوم في مايطلبه المستمعون في MBC FM وكل يوم وهو يهدي لها اغنية شكل ,,وهي مطنشة قام يهدي لها اغاني في برنامج مجلة الاغاني في التلفزيون السوري وكل يوم ثلاثاء سابقا ويوم اثنين حاليا يتصل عليهم ويقول لهم اهدي الاغنية الفلانيه الى حبيبتي وفاء …وبرضك مافي امل …فقرر طحيمر ان يروح لسوريا علشان يشوف حبيبة القلب ليه تغيرت,, وراح للمطعم على طول ..واذا به يشوفها وهي تضحك وتبتسم لشاب خليجي اخر جالس مع شلة اصدقاء (كويتييين) والا الشاب يطلع لها بخشيش 1000 ليرة وتقول له ميرسي الك تئبرني ياحبيبي انتا.,, ..طحيمر من الروعه والفجعه غص بالكبايه اللي كان ياكلها …ولما فكر يدفشها بالعصير انكب على ثوبه …..طحيمر ما مسك اعصابه وراح يتطاق معها ..فزع لها الشاب الكويتي قام طحيمر طقه..قاموا الكويتيين اصدقاء الولد على طحيمر وطقوة..قاموا السعوديين اللي في المطعم مع الكويتيين اللي في المطعم على بعض وكسروا المطعم فوق راس بعض…..وخليجنا واحد وشعبنا واحد ..يعيش يعيش فليعيش الله اكبر ياخليجي ربنا.
المواصفات:::دبدووب شووي,,مو غني بس دايم اذا سافر يحب يسوي نفسه سقردي..يبخشش .. مثقف يحكي عربي 3 لهجات سعودي وسوري وشوية كويتي لانه سمع الكويتين يوم كانو يطقونه يقوول يوّده يامعود يوّه ايه طقه جذيه على راسه (يحسب انها شتيمه).
مواصفات فتاة الاحلام::::تكون رومانسيه حلوة حمرا عطرا ..ولاتحب لا ماديات زي بعض النساء واذا بتلعب بذيلها تكون مع ولد واحد علشان يتفاهم معه صح مو واحد جالس مع ربعه…وطحيمر ضد أي حركة نسائيه ويرى ان البنت مكانها البيت والسوق اما العمل فيقول لا لا لا لا لا لا .
تركي .ن.م العمر 23 سنة المدينة:الرياض صاحب قلب محطم جدا 4مرات
المواصفات:مغرورمصدق عمره ,ولد نعمة ,صريح فوق اللزوم ,الطول 176سم الوزن ماله داعي الفضايح
اخر قصةحب:تعرف على بنت حلوووة وبنت فعلا فعلا تجنن لكن بسبة صراحتة سالته من احلى هي ولاكلوديا شفر رد كلوديا شيفر وانتهى الامر على هالشي .
ملاحظات :غبي يتفلسف ولو مدحه احد صدق نفسه .بقوووووووووووة
فيصل بن عبدالرحمن بن ع ال س
العمر 21 باز بعايلته فوق اللزوم يظن بنات الناس يموتون فيه يتفاخر بسياراته الخمس واخرتها صدم في طريق الامير عبدالله وراحت الجاكوارهوطالب في جامعة الملك سعود كلية العلوم الادارية لكنه دايم يدور عند مدارس التربية للبنات
مرض بعييييييد عنكم
اخر قصة حب:هو مو وجه حب تقدرون تقولون تعرف على بنت كانت في الصيف الماضي في باريس علاقة دامت ساعتين لانه واعدها في مطعم وجاب معه ولد عمه ببساطة البنت اعجبت بعقلية ولد عمه
ملاحظات:حلووووو بس خشمه طويل وناوي يسوي له عملية تجميل صوته يقهر زي صوت اهل الرياض يتكلم دايم من فووق
غادة بنت ف ال م.. بنت اقل مايقال عنها انها تهبل انووثة كاملة روماانسية حالمة تعيش في الحلم عمرها 18 سنة حلووووووة طولها 168سم وزنها تحت الخمسين عيبها الوحييييد انها كما يقولون صديقاتها اذا حبت واحدة تنشبت له تخااف عليه وتبي تعرف عنه كل شي حبت مرتين الاولى حبت نزار قباني ما امزح حبته من جد كانت ترسل له رسايل وعمرها 12 سنةالى ان مات الثاني تعرفون القصة
اخر حب:الثاني سنة وثلاثة شهور في اليوم تكلمه مالايقل عن 33 مرة وكل مرة مالايقل عن نص ساعة
وفي الاجازات تسافر وتشووفه برا
انتهت علاقتهم انها كانت سبة سقووطه دقت عليه وهو يختبر في الجامعه اربعين مرة على الجوال المراقبين حسبووه يغش سقطووه الولد انهار وانهى العلاقة غاادة ماقصرت رقدت في المستشفى اسبوعين حاليا تفطر على عبدالحليم وتتغدى فيرووز وتتسحر على ام كلثووووم
ملاحظات: البنت كما يقول الاطباء معرضة لحالة عاطفية جياشة اكثر من الاول الامر الذي يخوف بصراحة
حمزة ابن المهندس بكر من جدة العمر 21 سنة الان صايع لاجامعه ولا غيره فشل في جامعة الملك عبدالعزيز وفشل في الجامعه الامريكية في القاهرة يخطط على بيروووت مشهووور بسيارته الفيراري يقول ان له علاقات كثيرة مع البنات طالع بموضة ان البنات السعوديات مايناسبونه
اخر قصة حب: في القاهرة تعرف على بنت من مكة حاول يتمادى معه عطته استمارة 6 احسن يستاهل
ملاحظات البلا مافيه شي زين علشان ننتقده
هنادي بدوية الاصل لكنها ماتعترف اصلا بعايلتها لقبها اللي تحبه الاميرة فعلا فعلا هالبنت شايفة نفسها وعصبية زيادة عن اللزوم ومتقلبه المزاج تعشق خالد عبدالرحمن والان تمووت في شي اسمه راشد الماجد لها علاقات كثيرررة اول ماتعرف شاب تقول علاقتنا مو لازم تزيد عن شهر
اخر قصة حب:تعرفت على شاااب صدق تنحسد عليه بستفت فيه وصبر عليها تهينة ويتحمل اما انها تلعن والدية في مطعم بيانو قدام خلق الله وترش العصير لانه قال لها انتي تموووتين فيني الضعيف كان يمزح معها الولد اخر من شافه يقولون انه اطلق لحيته وتاااب
مواصفاتها :عصبية بزووود تتبرى من اسم عايلتها احد اكبر عائلات البدو في المملكة متغيرة المزاج جمالها مو ذاك الزووود
فارس شاب من اسرة متوسطة الحال من الرياض كامل والكامل وجه الله اخلاق ادب علم لغة عيبه الوحيييد ربعه ايه ربعه مفشلين انفسهم ومفشلينه مثلا عرفوا مره انه بيطلع خويته لحقوة طول اليوم وقاموا يحدونه في شارع الثلاثين ويدقون عليه الجوّال
اخر قصة حب:ايضا تفركشت بسبب ربعه كل ما كلم خويته نط له واحد قال خلها تعرفني على زميلتها ضاق صدر خويته وقالت له انت محتاج طبيب نفسي علشان تتخلص من سيطرة ربعك,وفعلا الان يتعالج في مركز النخبة
ملاحظات :تجيه حالات يبدى يدعي انه ولد نعمة لكن هو ولد نااس عاديين سيارته كريسيدا مو ذاك الزود بس مثل ماقلنا عيبه ربعه ربعه ربعه
نجلاء بنت صالح ال.. من الحوطة اصلا تعيش في الخبر بنت غير طبيعية لقبها البنت الفولاذية تلعب كاراتية وتايكوندو وتعرف قتال الشوارع مالها في سوالف البنات يعني بنوووتة متعصبة للسيارت وللكورة هي نصرااويةومتعصبة جدا على فكرة هي تسوي بودي بيلد مطربتها المفضلة ديانا حداد لاتسئلوني كيف يقولون صديقاتها ان قلبها طيب مررررة
اخر قصة حب:مو واضح كيف انتهت الاكيييد انها ملت من انتقادات حبيبها لها بانها تترك الرياضة وحركات الاولاد ومينعرف من ترك الثاني هو ولاهي
ملاحظات:على كل اللي قلناه الا انها قروية ماتلبس بنطلونات الا اذا جت تلعب ريااضة وتحب الاكل جسمها جسم اولاد
سطّام ومسمي نفسه سامي اكبر واحد في العالم يفتخر بغيرة اخوي سوا كذا ولد عمي عسكري قد الدنيا ممل ممل يسوي نفسه يعرف كل شي وهو يامولاي مثل ماخلقتني غاية طمووحه انه يعرف اي بنت تذكرون فيصل اللي فوق هذا خويه ودايم معه يعني عند مدارس تربية على انه ولد ناس الا ان احلى وصف له انه خوييعني تااابع
اخر قصة حب:فيصل عرفه على بنت عم واحدة من خوياته علاقة استمرت 10 دقايق ماتحملت البنت كذبة طفشت
ملاحظات:دب دب دب دب زبوون دائم في برجر كنج وكنتاكي صوته صوت ثور توه قايم من النوم واللي يقهر انه يحضر الحفلات الغنائية في الخليج ويقوم يرقص ويصدم في خلق الله الله لايوريكم
راندة العمر 17 سنة خفيفة دموحلووووة وكل الاشياء الزينة فيها عيبها انها تاخذ على الناس بسرررعة والناس اقصد الشباب يفهمونها غلط مثلا ورت واحد صورتها مع عاصي الحيلااني في حفلة قام يقول لها وش رايك نطلع استرااحة بنت حلووة سااابقة عصرها ابودها دكتور في جامعة الملك سعووووودومالها الااخوان اولاد بس مالها اخواتها وتعيش في حرية 100%فري طولها 166سم وزنها 57كجم
اخر قصة حب:كانت علاقة عابرة كشفت ان اللي يكلمها يكلم 3 غيرها فتركته بهدوووء بس هبلت فيه بطرييقة عصرية واعدته في سوق ان يوقف وهي بتجية وبتسلم عليه المهم جابت 5 من زميلااتها وكلهم نصواا الولد في نفس الوقت وكان هالكلام في السووق الولد من الرووعة انحاااش وتفشل قدام الله وخلقة
ملاحظات:البنت ذكية جذا جذا جذا سابقه سنها بمرااحل حكمتها في الحياة اذا حاولت ان تعبث بقلب امراة فالنتيجة انها سوف تعبث بحياتك كلها
تحياتي بلاك هورس
تاريخ كتابة القصة عام 2002م / 1422هـ
جميع قصص بلاك هورس خاصة بموقع قصص قصيمي نت والحقوق محفوظة
