قصة شريطة ونجمتين وتاج

قصة شريطة ونجمتين وتاج كاملة مكتوبة

السلام عليكم ورحمة الله وبركاته..في حلم قديم في حياتي يؤرقني على كثر ما حاولت أدّعي أني ما ابيه ولا أفكر الا أنه يظهر دائما على السطح ( مو سطح بيتنا بس يعني زي سطح المخ مدري شي فوق الجبهة المهم ) ..وهذا الحلم أني البس بدلة ( مو أي بدلة ) بدلة عسكرية أيا كانت ..مرقطة ..سادة ..أي شي ..كذا عسكري و على كتفي نجوم ولا قمر قصدي تاج ..ومعي سلاح أخوف الناس به ..وشديت حيلي في الثانوية علشان هالحلم الجميل .وجبت نسبة فوق التسعين ماشالله علي ويحرسني من شرور خلقه ..وانطلقت باقصى سرعتي لوزارة الدفاع مرة واحدة .. من أجل خدمة الوطن ورفع رايته خفاقة ,وأقدم ملفي ويحددون لي موعد للمقابلة ..وبعدها اللي بيقبلونه بيسوون له اختبار مدري فحص طبي ..وبعدها بينزلون أسامي المقبولين …خذيت المواعيد ورجعت لبيت أهلي وصرت اسوي رياضة علشان أجتاز الفحص الطبي بكل نجاح ..صرت ألعب كرة طائرة ..وحبشة ..و نط الحبل وتعلمت رياضة مهمة بتفيدني في حياتي العسكرية اذا انشالله قبلوني الا وهي لعبة البلوت ..وبعد اسبوعين وحسب الموعد المحدد للمقابلة الساعة 5 ونص ..( عسكريين من أولها ) وعلى ما جا واحد يعبرنا ويدلنا وين نروح ووش نسوي كانت الساعة 11 الظهر واحنا في عز يوليو ..الواحد صارت تحته بركة من العرق والبعض استغل الفرصة وتعيجز يروح دورة المياة وأنتم بكرامة .ومشاها مع العرق ( ولا من متى خبرنا عرق أصفر )و وزعونا على قاعات وصالات .. و حطوني في صالة 3 ج انتظر يجي دوري ..والا يجي واحد من البثرين ( اسمه حمود) اللي يطقون حنك يجلس جنبي ..طبعا أنا على أعصابي .وهو يبي يحكي ويتكلم معي

حمود البثر: يوووه يا أخي العسكرية هذي عجيبة ..لها هيبة …

أنا: ايه طبعا لازم كذا ولا وشلون بيسوون منك عسكري محترم تقدر تدافع عن بلدك.

حمود البثر: تصدق حتى المقابلة حقتهم تروع يا أخي قبل ما يقابلونك يكونون عارفين كل شي عنك كل صغيرة وكبيرة ..مرة تدري ليه .. أنا أقول لك الا وش اسمك بالخير …

أنا: اسمي عبدالعزيز و يدلعوني ربعي فريد …ثانيا هم ما يعرفون الا المعلومات اللي تكون أنت معبيها في التقديم بس ..بس انت شكلك من اللي يهولون الأمور.

حمود البثر: لا يا عزيز ( يمون بقوة ) أنا أخوي ماشالله عليه أخلاق وتعليم وثقافة بس ما ضيعته الا المقابلة ما درى أنهم يعرفون عنه كل شي نصب عليهم نصبتين وكشفوه .الغبي ما كان يدري أنهم قارين ملفه من المخابرات .

أنا: اها أخوك موظف سابق ولا له ملف في المخابرات . يمكن علشان كذا يعني حالة استثنائية .

حمود البثر: لا والله بس أنت اللي على نياتك أنت ما تدري أن لكل مواطن ملف في المخابرات يسجلون فيه كل شي عنه ,, أي والله اني احكي معك صادق ..حتى الواحد لا منه سافر الظاهر والله أعلم انهم يلزقون فيه شي علشان يقوم القمر الصناعي يراقبه وما يضيعه ويسجلون كل تحركاته وهو برا الديرة.

أنا : يا أخوي شكلك نصاب وما عندك سالفة وش هالخرابيط وش كل مواطن له ملف ويسجلون كل تحركاته لا يكون بس أخوك راعي حبوب ولا من اللي يقضمون .ثانيا أنت مقدم على العسكرية يعني خلك انسان محترم مو تتكلم كلام وسلام ما تعرف وش خطره.

حمود البثر: بكيفك لا تصدقني بس انا باقول لك أولا أخوي لا راعي حبوب ولا خرابيط بالعكس أجيد واحد في عايلتنا متخرج من الثانوية بنسبة 77 % و أدبي هذا شي ثانيا يوم راح وقابلوه سئلوه ..قد تتنت ..وأخوي بطعا قال لهم ما تتنت ..سئلوه مرة ثانية متأكد انك ما قد تتنت ..قال لهم والله العظيم أني ما عمري تتنت اذا ما أنتم مصدقين تعالوا شموا ريحة فمي ..قالوا له لا ما يحتاج بس..وش كنت تسوي يومك في مقهى حوش العنز لصاحبه ابن عز يوم الأحد الساعة 11 ونص قبل 3 سنين ..اوف ساعتها أخوي تكتم ..وقام يحلف لهم أنه ناسي وما يذكر وواحد من ربعه خلاه يجرب وأنه بس كان يجرب قالوا له اللي بيجرب ما يشرب زقارتين ..المهم مشو له هالسؤال ..ويصكونه بسؤال ثاني قد سافرت برا المملكة ..قال لهم ايه مرتين مرة لدبي ومرة للبحرين وكلهم مع الأهل يعني ما خربطت ..رد عليه النقيب قال تذكر يوم تسحّب أنت وأخوك دحيم _على فكرة أخوي دحيم أكبر مني في جامعة الأمام قسم مكتبات _ من شقتكم الساعة 2 الفجر وتروحون لمرقص الوزة العايمة في دبي ويوم تسألكم أمكم قلتوا لها جاكم أرق ورحنا نتمشى على البحر .هاه تبينا نذكرك وش أنت مسوي بعد, يوم تترقصون على أغنية تريد الهوى ..ساعتها حنك أخوي طاح على الطاولة ولا عرف وش يقول وما شافوا الا غبرته …وتقول لي ما عندهم ملف من المخابرات على العموم نصيحة مني لك يا أبو سعود والله الشاهد أني لا أعرفك ولا تعرفني بس ارتحت لك اذا شفتهم مشددين معك في سؤال ..تراهم صايدينك مسوي شغلة وقتها لا تعاند ترى والله يشوتونك ولا تقول حمود ما قال لي وما نصحني.

ساعتها ..جتني حالة تتنيح وصابتني حالة روعة و توني بادي أفكر بكلام حمود اللي وينادون على دوري في المقابلة.وأدخل على اثنين ما عرف وش رتبهم بالضبط .وقدامهم ملف يناظرون فيه أنا شفتهم ..ساعتها طاح قلبي زيادة فوق ما هو طايح ..و ما قعدت الا بقيت واقف من باب الهيبة لهم أن واحد منهم يقول استرح ولا أجلس ابدا ما تقول مقدم على على كلية عسكرية الا كني طرار في أول شهر رمضان .

الضابط الأول: أنت عبدالعزيز ….اللي اسمك هنا ولا لا؟

أنا: طال عمرك ( ما تقردنهم الا بطال عمرك والله يسلمك ويخليك ) أنا عبدالعزيز تآمرني بشي

الضابط : طيب بلا كثرة هرجة وتفلسف ماله داعي,, الا أنت سعودي أصلي يا عبدالعزيز .

أنا: أي نعم سعودي أصلي مواليد مستشفى الشميسي بالرياض وعلي ختم الجودة …

الضابط الثاني: أنت فاهم سؤالي زين يا عبدالعزيز ولا لا هل أنت سعودي أصلي وهل والديك سعوديين أصليين ..يعني أبوك سعودي أصلي ولا تعتقد هاااه قل الصدق .

أنا: والله يا طويل العمر انشالله أنه سعودي صورته في البطاقة بشماغ حتى في الجواز مصور بشماغ.

الضابط الأول: ركز يا نفر الضابط يسئلك أنت متأكد أنك سعودي أصلي ولا تعتقد هالشي …

أنا: ( بيني وبين نفسي أفا شكل حمود البثر طلع صادق وعندهم معلومة مؤكدة في ملف المخابرات حقهم يا والله الورطة) أقول طال عمرك لحظة لو سمحتوا شوي بطني يوجعني باطلع دقيقتين وبارجع لكم…..وووزززز اطلع برا المكتب ..وأدق من جوالي على البيت ..وترد أمي ..وأقول لها يمّه نادي أبوي بسرعة أبي أكلمه ..

أبوي: هلا عبدالعزيز عسا ما شر لا يكون صدمت بس ولا خربت سيارتك ..

أنا: لا أقول خلك من ذا الخرابيط ..وابعد شوي عن أمي وحريم أخواني …وجاوبني بصراحة وضمير أنت سعودي أصلي ولا هيك وهيك ..

أبوي: اقطع واخص ( معناها افا يا ذا العلم ) وش تقول أنت ووجهك لعنة تلعنك وش رأيك أجل فيني لا أكون مصري ولا خواجة .ايه سعودي يا جعلك العما ..

أناك زين الله يبشرك بالخير ..اقول يالله باي بس لا تبعد خلك حول التليفون يمكن أحتاجك…..وارجع للمكتب ..وأنا مبسوط وأقول للضابط الأول الحمدلله الواحد كان تعبان وارتاح ..وش كنا نقول طال عمرك ايه متأكد أن الوالد سعودي أصلي مو تايوان ..

الضابط الثاني: تقول لي أجل متأكد ان أبوك سعودي أصلي ..شف يا عبدالعزيز ترى مو زين لك اذا كنت تخبي الحقيقة عننا ترى ما أحد يروح فيها الا أنت يمكن تنسجن .

أنا: ( شكلهم عندهم معلومات أكيدة) آآآيي يا بطني عن أذنكم ..بطني بطني تصدقون طال عمركم بطني كان زين بس من هيبتكم طال عمركم مدري وش صار له ..دقيقة بس الله لا يهينكم ووووززززز برا المكتب وادق على البيت ويرد علي أبوي وهالمرة اسئلة وأنا معصب ..الحين يابو الشباب لا تنكب عفشنا اذا أنت مو سعودي قل الصدق ترى ذولي ماتخفى عليهم خافية اللهم يا كافي .عادي اذا ما قبلوني اشتغل في مطابعهم بس لاتوهقني وبعدين انسجن

أبوي: وجع يوجعك وش شايفني قدامك سوري ولا مصري ولا انشالله زول .

أنا: تذكر يوم قبل سنة يوم على العشاء على بالك تستخف دمك وتقول بدي اتعشى جبنية وزطون وشوية كبة ..والله ما يندرى عنك أخاف ذاك اليوم رجعت لأصلك .

أبوي : جعلك العما كنت أمزح مع أمك وأنت صدقت على طول.

أنا: والله ما يندرى عنك بس ترى أن طردوني من العسكرية والله والله لاحملك وزري كاملا الى يوم القيامة وهذاني حذرتك على العموم باسكر ويمكن أدق عليكم مرة ثانية خلك قريب من التليفون. ووززز ارجع لمكتب المقابلة وأقول الحمدلله اللي لا يحمد على مكروه سواه أبشركم ..وش كنا نقول ايه متأكد أن الوالد سعودي اصلي 100 % وعليه ضمان الوكيل بعد…

الضابط الثاني: طيب يا عبدالعزيز وبالنسبة للوالدة وشلون هي بعد سعودية اصلية ..يعني ما فيها عرق كذا ولا كذا.

أنا: والله يا حضرة الضابط هي بيضا بيضا الحمدلله البياض نعمة من الله بس آآآييي يا بطني ..لحظة طال عمركم ..ووززز واطلع برا المكتب وأدق على البيت ويرد علي أبوي وانزر في وجهه ما ابيك ابي أمي ..وتجي أمي تكلمني .

أمي : خير يا ولدي عساهم انشالله قبلوك وانا أمك قل لهم أن ولد خالتك عبدالرحمن ..ترى اذا قرايبك مانفوك هالوقت متى بينفعونك.

أنا: يمّه تراس ذبلتي كبدي بولد أختس عرفنا أنه كان الثاني على معهد المعلمين قسم الأحياء بس هذا وش دخله في العسكرية المهم تعالي يالبيضا ..انتي سعودية ولا فيك عرق لبناني ولا تركي.. اعترفي.

أمي: وجع يقطع نحرك وش تركية ولا لبنانية الا سعودية أصل وفصل ..لا يغرك أن جدك وائل وجدتك ميار بس لا ينفي اني سعودية اصلية …

أنا : يعني أعتمد طيب على مسئوليتك اسمعي يمّه أنا بسكر الان بس خلك قريبة من التليفون لا تروحين بعيد. ووززز وارجع للمكتب وكشرتي وصلت مترين واقول لهم بثقة أي نعم الوالدة سعودية أصليه حتى بالمارية جدي وائل ابو أمي كان أطلق نجار في الديرة وجدتي ميار كان تصلح له اطلق قرصان في الديرة …

الضابط الأول: طيب يا عبدالعزيز اوكيه طلعت مسلم وسعودي اصلي .الحين بنسألك شوية اسئلة؟؟ انتا فين تشتغل؟

أنا : اشتغل وش اشتغل طال عمرك لو اشتغل كان قدمت عندكم ..انطقيت في شغلي ..أنا توني مخلص ثانوية تبي أقول لك كم كانت نسبتي .

الضابط الأول: لا مانبي نعرف كم نسبتك ..الا قول لي يا عبدالعزيز ليه تبي تدخل القطاع العسكري ليه مارحت الجامعة زي معظم الشباب .

أنا: والله طال عمرك من أجل خدمة هذا الوطن المعطاء ورفع رايته خفاقة وحمايته من كل الشرور والتصدي للأعداء والحاقدين ( موضوع تعبير كتبته أيام خامس ابتادئي خذيت عليه 9 من عشرة ) غير كذا طال عمرك العسكرية اذا تخرجت بكرة ما أحد يقول لك دور على وظيفة واقلب وجهك مو مثل التيس اجلس دور على أحد يضفك ..وتلقى خريج علوم أدارية مقضبينه استعلامات في شركة وطنية يالله سعودة ..حكي من ابو بلاش ..

الضابط الثاني: طيب يا عبدالعزيز راح نسألك شوية أسئلة ونبيك تجاوب بصراحة ؟؟ وش علاقتك بالسياسة وش الصحف اللي تحرص على أنك تقراها ؟

أنا: بصراحة طال عمرك أنا مع أن ثقافتي عالية بس بيني وبين القراية عداء يعني ..نادرا ما اقرى بس قسما بالله أني ماقرى الا الصفحات الرياضية وأحيانا الكاريكاتير ..بس في المناسبات الوطنية أقرى الصفحات الاولى العناوين بس ..

الضابط الأول: متأكد بس هذا اللي تقراه. قل الصدق لا تكذب .

أناك بصراحة بصراحة اقرى مجلة ماجد ومجلة باسم …..( بس ماش عيونهم تلاقط فيني ..) ..شوفوا عاد مدري وش مكتبو قدامكم في هالملف بس ..الله يلعنك يا ابليس كله من ولد عمتي الدلخ خالد اذا راح لبنان مع أهله يجيب لنا مجلات مدري وشلون ياخي الواحد يضعف بس من مطالع الغلاف بس هي مجلات محتشمة ( وعيونهم مازالت مبزرة فيني ) يلعن ابو الذل قريت مجلة بلاي بوي بس كم عدد مو كثير يعني من العدد 1411-1534 وبعدين من 2406 – 2600 والعدد السنوي الخاص بانتخاب ملكة جمال الشواطىء الأمريكية بس ..والله على ما اقول شهيد . واللي يرحم والدينكم لا تطالعوني كذا خلاص ..يمكن عدد أو عددين ناسي كم أرقامهم .هذا كل شي واذا عندكم شي ثاني في هالملف ترى مو صدق والله ..

الضابط الأول: يا عبدالعزيز أنت ماشالله عليك ولد كبير وناضج ..وعمرك الان حوالي 18 سنة ما عمرك فكرت تقرا بعض الأفكار الهدامة اللي تجي مع النشرات الملوثة من برا سواءا في الانترنت ولا شي من هالقبيل .

أنا : طال عمرك ما فهمت يعني ياليت توضح قصدك ؟؟ يعني تتهمني اني معارض ليه مكتوب في الملف حقي كذا

الضابط الثاني: لا قصده مثلا مثلا ما أنت متأثر باسامة بن لادن معجب ببعض افكاره تقرا بعض نشراته.

أنا: أولا طال عمرك قل المذكور ولا تقل أسامة بن لادن ..ثانيا ما شفته الا في قناة الجزيرة من زمان ..ثانيا الكذب خيبة الاحتكاك الوحيد بيني وبينه هو طريق الهدا ما كنت أدري ان ابن لادن هو اللي مسويه يوم انتصفناه قالت لي امي هالمعلومة ساعتها توهقت لا اقدر اديور وارجع ويعلم الله أني كملت الطريق على مضض وأني كنت متنكد والله .حتى لو تدور طال عمرك في الملف اللي قدامك بتلقى هالفقرة أني كنت متنكد بالحيل مرة .

الضابط الأول: يعني يا عبدالعزيز بيني وبينك انسى أننا في مقابلة ما عمرك جلست مع ناس قاموا يشتمون الدولة ولا ينتقدون بعض سياساتها قل الصدق لا تخبي؟

أنا : قسما بالله ما صار هالشي والله العظيم …طال عمرك تأكد هذا ملفي ولا لا اخاف عطوكم ملف واحد غيري ..انا كل أهلي وطنين بالمارية اذا فاز المنتخب نطلع كلنا نشجع حتى الشغالة أي والله

الضابط الثاني: تذكر يا عبدالعزيز أحسن لك مانبي نقول لك شي ترى أحسن اذا انت من نفسك قلت.

أنا: طال عمرك مدري مرة كنت جالس مع خالي ..باجيب امي مدري كان الخال ذاك اليوم متحمس وقام يقول الكهرب غالي وأنهم سرقونا وقطعوا ظهورنا وأن الهاتف صار سرقة عيني عينك وأنهم ماصاروا يخافون الله.

الضابط الاول: ايوة من اللي قطعوا ظهوركم وسرقوكم وما يخافون الله مين اعترف ..

أنا : وشو مدري والله مهوب أنا ذاك خالي روحوا احبسوه ..صدقوني الله لا يوفقني أني كنت أهديه واقول له يا خالي الدنيا كلها غلا ..واننا الحمدلله بخير ونعمة كل شي رخيص البنزين رخيص والكهرب رخيص والهاتف رخيص حتى الموية الحمدلله بيشملها قانون الشرائح مدري الفئات يعني ناوين بكل عزيمة أنهم يرخصونها الحمدلله اللهم احفظها نعمة ..والله أننا ارخص من غيرنا تصدق طال عمرك جزيرة ماستوسشي عندهم دقيقة الجوال بريال وستين هللة وقت الذروة ..يلعن أم الرخص اللي في ديرتنا ..بس تعرفون طال عمركم يعني الشياب واجد يخذرفون ..

الضابط: عبدالعزيز كيفك وكيف الخرابيط معك ..تدخن تشرب راعي بنات ..اعترف.

أنا : لا راعي أولاد ..قصدي كل ربعي أولاد ولا أروح للبحرين الا علشان اشوف سينما ,,بس مرة طال عمرك كان الجو عندهم غيم ومطر.

الضابط الثاني: وش دخل المطر والغيم ..في روحتك للبحرين والسينما .

انا : يعني يكون قمركم الصناعي السري صايد واحد زوله زي زولي وطوله نفس طولي داخل أحد هالمراقص تقومون تحسبونه أنا ..تعرف شباب طايش ..الله يصلحهم بس ويهديهم .

الضابطين : وش قمره ترى لك نص ساعة تخذرف الملف والقمر الصناعي وش أنت تحكي عنه؟

أنا : طال عمرك مدري والله الشباب اللي برا يقولون لا تكذب على اللجنة ترى قدامهم ملفك اللي عند المخابرات وانهم يعني المخابرات اذا الواحد سافر برا الديرة ..أنهم يصورونه بالقمر الصناعي ..مو ذا ملفي اللي عندكم..

الضابطين : وهم يضحكون ..الله يستر عليك وش تخربط هذا الملف اللي فيه اسامي المتقدمين وأوراق علشان تقييمهم ولا عندنا ملفات من المخابرات ولا من هالحكي ..ثانيا وش ذا القمر الصناعي اللي بيصور السعوديين في كل مكان .. يا عبدالعزيز رح بس انتهت المقابلة الآن و بكرة موعد الفحص الطبي والسبت الجاي نعلمك النتيجة النهائية .

طلعت من عندهم وأنا ودي شي واحد أشوف حمود البثر و أترفس في بطنه ترفس ..وبالفعل رحت لبيتنا نسيت المقابلة علشان ما يجيني ارق وقعدت أكمل تماريني وأبشركم قدرت اسوي ضغطتين قبل لا تشرق شمس اليوم التالي ومن صبيحة اليوم التالي رحت لمقر الاختبار الطبي وعبيت الاستمارة ورحت لدكتور ياحليله يسئلني أنت بتدخن قلت له لا قال بتعفر قلت له حسب الظروف ..وسئلني عن وزني واذا عندي أمراض معدية ..كنت احسب كل المسألة زي هالدكتور بس المحطة الثانية شفت واحد يقول افصخ ثوبك وفنيلتك وافصخ ( بيني وبينكم احد أجمل هواياتي هي الفصخ ) ويسوي لي فحص على صدري ويقول لي كح وأرد عليه بكل عفوية بس مافيني كحة يا دكتور.. وهو يبني بئولك ايه كح يابني مابلاش غلبة …والله يا دكتور لو فيني كحة يعني تتوقع باقصر من دواعي سروري أكح في وجهك …وهو يقنع فيني وبعدين معاك يا بني حتكح ولا ايه وبعد جهد جهيد واقناع عطست في وجهة ..المهم ما علينا ..بعد كذا انتقلت الى محطة اخرى بس مدري وين راحت فنيلتي ..ووقفوني جنب مسطرة بيقيسون طولي طبعا الخط الأدنى حتى ما وصلته وجلس اللي يقيس يتمتم بينه وبين نفسه اعمل بيه ايه ده انتا يا ئصير ائزعة افرد نفسك كمان يمكن نطلع لنا ب2 سنتي زيادة اهي نوايا بتسند الزير ..واتفردت على الاخر لين سمعت طق في اسفل ظهري ..مدري ريح براد ولا وشو المهم والمصري اللي يقيس يئول اعمل فيك ايه بئه فهمني ..قلت له عادي حطني 180 سم من بيدقق ..ويرد علي واللهي مش عاوز أكتر وحياة ربك لتشاور عئلك جرا ايه يابني انتا حصلت 170 ( الحد الأدنى ) علشان تتفرعن وتعوز 180 المشكلة مش عارف ائيس طولك ازاي ..قلت له اشقلوني وقيسوا طولي بالعكس والفرق نقصوه من 170 .وكأن الغبي أعجبته الفكرة وينادي 3 عساكر من القدامى ويشيلوني ويثبتوني عن الحد الدنى ثم يقيسون طولي .ماني قايل لكم كم طلع المهم ما علينا بعد مسالة قياس الطول والوزن ..رحت لمحطة فيها دكتور العيون ..جلسني على كرسي وقال لي لما ائشر لك على علامة ئولي فتحتها من فين ..اتفئنا بني ..طبعا هو بدى بالأولى يعني اكبر علامة ونظرا لأن الشوف شجر وحفظا لماء الوجه قلت له …فتحتها من فين …ويرد علي الدكتور ايه فتحتها من فين انا اللي لازم اسئلك وانت تئول لي فتحتها منين ..يالله دية ..

أنا: هذي يا دكتور اوكيه فتحتها منين ,,كذا كويس

الدكتور : يبني ايه ماتنرفزنيش .أنت تجاوب بس هي فتحتها منين فوء تحت شمال يمين وكدا .

أنا : اها اوكيه مفهوم يا دكتور نرجع للأولى تبي تعرف وين فتحتها ..اممم كده

الدكتور: كده يعني ايه حدد انهي كده يبني في الدنيا يجي الف كده انت مش تئول كده وتسكت ائشر بايدك ئول حاجة.

أنا: يا دكتور أنت قلت يا فوق يا تحت يا شمال يا يمين يا كده ..أنا عن نفسي شايف فتحت هالعلامة كده والله اذا أنت شايف شي ثاني كل واحد يتمسك بوجهة نظره واختلاف وجهة النظر لا يفسد للود قضية.

الدكتور: ياربي منك الصبر يارب أنا عملت ايه في دنيتي لما كنت في مصر رامييني في كفر ميت غمر ..وئال ايه لو سئطت واحد فيهم ئاموا عليا ودلوئتي بتبعت ليا ناس عمي ليه بس يارب .. يا بني ركز في العلامة اللي أنا عمال بأشر عليها بالعصاية .

أنا: هو في عصا بعد يا دكتور ..طيب وينها في أي اتجاه فوء ولا تحت ولا شمال ولا يمين ولا كده.

الدكتور: ايه ايه مش شايف العصاية كمان يألف نهار ابيد يا بني أنتا ايه شين وئوي عين ولا ايه ..يابني كل زمايلك اللي عامل عملية ليزر واللي لابس عدسات بيرفيكس ..وانتا جاي كده وياليت نظرك حاجة بتشجع ولا حاجة عليها الئيمة يابني انتا أعمى الا ربع أمل فين جمعية المكفوفين عنك جتك مصيبة أمشي من هنا وانا حافرجك أن ما عملتش نظرك 6 \6 عشان يئبلوك وتموت لمن تيجي أول حرب و حتشوف يا أنا يا أنتا .

وبالفعل طلعت من عند دكتور العيون ..لدكتور ملامحه يا من أهل الشمال يا عراقي ..ساكت وكانّ ( مو مهرجان كان كان يعني هاجد ) في مكانه وأول ما دخلت عليه وسلمت ..قال لي أفصخ ..طبعا أنا أهون ما على قلبي أني أفصخ بس يوم ناظرت مالقيت على الا صروال السنة ..ولا فوقه ولا تحته ..وأقول للدكتور طال عمرك ما علي الا هذا بس ..ويقول واحنا شنريد نفحص غير اللي تحت هذا …

أنا: اوكيه يعني وش بتسوي ..تعرف لازم الواحد يكون على بينة وش بيصير له ؟

الدكتور: وهو يلبس قفازات بدي أمسك ال…..وأفحصها زيييييييييين …يالله يا حبيبي لا تعطلنا .

أنا : أقول طال عمرك بأقو لك شي بس لا تزعل مني ..أنا يوم كنت صغير أبو عشر سنين…اللهم العنك يا أبليس طاح في يدي ..الله يلعنك يا ابليس ..فيلم كله رجاجيل في وضع موب زيييييييين على قولتك كلش مو زييييين ..من يومها جاتني حالة قرف وتعبت نفسيا وقمت استفرغ لمدة أسبوع ..الحاصل ..أن ال……كل ما شفت رجال يقرب مني ولا يبي يفحص ال…..و ال….. تقوم ال…… تنكمش ..أي والله..

الدكتور: يعني شنو شو تحجي أنتا ..هاي شنو تنكمش شو خرابيط انت هسه تحجيها.

أنا: بالعربي يا دكتور معليش يعني لو سمحت ما أبيك تفحصني ..رجاءا لا تعتبره موقف شخصي .

الدكتور: والله قولها كمان بالله شنو ما تسمح لي مين أستأذنك هذي عسكرية ما فيها تخيير يا روح أمك يالله نزل ملابسك بسرعة.. لا هسا أنده لك الرئيس حق اللجنة يتفاهم معك .

أنا: أقول أني انزل ملابسي قدامك وتقول ..بيدك تمسك ..ال …… انسى واللي يرحم والديك لاو بعد تسوي لي حركات عيال منفوحة ..ال…….تبعي أكبر …من ال………ك ,,واذا تبي تنادي رئيسك من الحين ناده ماني خايف .

و يجي الرئيس دكتور سعودي محترم ..بكرش وهو يقول ايه ايه الحكاية ..اوعكم تكون هناك مشاكل . ويقول له الدكتور العراقي سيدي هذا ما يردنا نفحصه مادري شنو قاعد يخربط ..سيدي أشك انه شارب ..

رئيس اللجنة : يا سلام يا حبيبي اش بك جاك البلاا في شكلك ليه مش راضي الدكتور يفحصك هاه قول يا ولدي عامل حاجة بطالة ولا ايش …

أنا: لا والله يا دكتور بس أنا فهمت الدكتور بصراحة صارت لي قصة في طفولتي ومن وقتها ما أطيق رجال يفحص ال…يعني بلا أحراج اذا معزمين تفحصون ال……..جيبوا دكتورة ولا انشالله ممرضة تفحصني بس رجال يحط يده في الشغلة لا وألف لا اسمحوا لي.

رئيس اللجنة : بس كده يا حبيبي والله على بالي شغلة كبيرة ثواني يا حبيبي أدق تليفون على التخصوصي يجيبوا لنا كزا دكتورة لبنانية على ممرضات كذا تشكيلة على كيف كيفك ولا أقول لك اهم حاجة عندنا راحتك طال عمرك ..أدق تلفون على الوليد أقول له ابعت لنا من الموديلات حقونك اللي في مستشفى المملكة بيقولوا أطعم ولا بدك نسوي لك طلبية خاصة يا روح امك.

أنا : يا دكتور لا تتريق علي بس يجب أن تراعون شعوري كانسان جاد يعني يرضيك والدكتور يفحص ال…تقوم تنكمش بين يديه ساعتها انا انحرج والمصيبة لو هو ضحك وشلون بيكون شكلي ..وعلى الدكتورات ما ابي خلاص جلسوني … ورى ستارة بيضا شفافة وحطوا وراي كشاف قوي ..وأنا عن نفسي بافتح بين رجولي بأقصى ما عندي وشوفوا وقارنوا بيني وبين العينات السابقة بس لمس وواحد يقعد يمسك ال….بتاعي ويقلبه بيده لا وألف لا

رئيس اللجنة: يابني والله كل ال….بتتنكمش لما راجل يجي يفحصها عادي ايش فيها ..حتى الدكتور هازا بزات نفسه ..بتنكمش معاه ..مش مصدقني تعالى نسئل زملاتك ..يا شباب مين فيكم ال……. بتاعته ..لما الدكتور مسكها بيده ما أنكمشتش …يابني واللهي دا فسيولوجي مش حاجة الواحد يستحي منها…يالله ,,الله يرضى عليك يا ولدي نزل ملابسك بسرعة لا تعطلنا خلينا نفحصك …

أنا: هلا والله حتى أنت تبي تفحص ال………لا يفتح الله لا أنت ولا هو …اقول خلكم ثقل وتكانة ..ثانيا كل واحد مننا عنده ال… صح ولا لا ..خلاص يروح بعيد ويفحص ال …..حقته على كيفه …

وللأسف ما تميت كلامي الا لقيت اربع عساكر مكتفيني و ماسكيني وقدر الدكتور ورئيس اللجنة يفحصوني براحتهم ..وانا اصارخ خلوني بس ما في فايدة ..وطلعت من الفحص الطبي ..على أن موعد النتايج بكرة بيعلقون الأسامي على الجدار المقبولين وغير المقبولين وأجي ادور اسمي بين المقبولين ( قمة التفائل ) ولا القاه قلت هين هين يالضبان رفضتوني بس ولو بادور اسمي في قائمة المرفوضين ولا حصلته هاه لا يكون اسمي سقط سهوا والقى ورقة أكبر من حقة المقبولين والمرفوضين مكتوب فيها اسمي وتحتها بالخط العريض يرجى عليه مراجعة وكيل شئون التسجيل والمتقدمين واروح يم مكتب العميد ..ويستقبلني ويقول لي اعرفك يا عبدالعزيز على اللواء سعد من المباحث العسكرية ..بصراحة من المقابلة الشخصية والفحص الطبي وقفنا قدام سؤال محير أنت ليه مقدم عندنا يعني تتريق ولا تتجسس ولا وش قصة اللي جابوك ..والمحقق يبي يسمع جوابك ولا بيظطر يسجنك.

انا: افا ليه عسا ما شر وش صار ..وش سويت حالي حال باقي المتقدمين وين المشكلة بالضبط.

المحقق: أولا خربطتك في المقابلة الشخصية بنغض عنها البصر وبنركز على الفحص الطبي ..يا عبدالعزيز أنت أعمى تدري وش معنى أعمى لا ومن زود الطبايع جاي بدون نظارة وش قصدك يعني تتريق ولا أهبل.

أنا: طال عمرك والله أنا ما احب العدسات تضايقني وعملية الليزر أخاف منها ولو جيت بنظارة بتسقطوني لانكم مانعين اللي بيجون بنظارات وقلت بيني وبين نفسي والله فتح الله على بصيرتي ونجحت خيرة سقطتوني في الشوف عادي حطوني في سلاح القصف العشوائي ..أنفعكم

المحقق: طيب اترك هذي خذ عندك لسانك طويل وعلى نياتك وقصير ..وماصل مدري تتميصل مابي أحد يكشف على ال…وال… أنت داخل عسكرية ولا فرقة كشافة ؟

أنا: لو سمحت يعني المفروض انتم تقبلون أي واحد يتقدم لكم والمنة عليكم كل اللي حولكم جيووشهم تروع وأنتم مية الف برجال الشرطة ما وصلتوا ,,ثانيا أمريكا بح عقب اللي صار عندهم والله ما يروحون جندي عندنا الا بتأمين راسين مقابل الراس الواحد وفوقه عشر براميل بترول ولا نفتح عندهم اشتراك …والله يستر لا يبوننا نرسل لهم جنود مساعدة …فأنا اقترح عليكم تقبلون أكبر عدد ممكن من المتقدمين واذا على التكلفة ..خلكم منطقيين مو تاخذون واحد من عند أهله وترمونه في ديرة ثانية وتعطون بدل انتداب ..اللي من الرياض حده الرياض ولا حولها واللي من الجنوب خلوه في الجنوب وهكذا ثانيا اقترح تغيير جذري في …

المحقق: اقول يا شين وش رايك تطلع وأنا بسوي نفسي ما سمعتك لا والله ألحطك في سجن عشرين سنة أهلك ما يدرون عنك ..قم انقلع ……………………وما شفت الا غبرتي ..عند دوار الثمامة من الروعة

وشوي شوي بدى حلم العسكرية ..يتلاشى بس باقي أمل ..قلت في نفسي يا ولد أن راحت عليك وزارة الدفاع باقي أمل في الحرس والحرس ووزارة الدفاع عيال عم كلهم عسكرية وانضباط .وخدمة للوطن ( قلبت برنامج سعودي ) وبالفعل رحت لقيادة الحرس مكتب التسجيل ..وبالفعل معنى النظام بأدق تفاصيله الاستمارات منطولة على الأرض ..وحوسة ولا تعرف وين تروح ووين تجي ومن تكلم ..وأشوف اثنين عسكريين واسئلهم بكل أدب لو سمحتوا وين التسحيل من أي بوابة الله لا يسفهكم …ويردون علي أنت بتقدم للحرس يا ورع ..أنت وجرمك ذا ( يعني جسمك الصغير ) على العموم ..شف أذا أنت عتيبي ولا رشيدي بوابة رقم واحد واذا أنت مطيري ولا عصيمي بوابة رقم اثنين ..واذا أنت عنزي ولا شمري ولا ذيباني بوابة رقم ثالث ..واذا أنت شيباني ولا قحطاني بوابة رقم 4 ..واذا سبيعي ولا مشتقاتها بوابة 5 واذا أنت جنوبي بوابة رقم 6 مع أن الفرصة ضعيفة ولو تنصى وزارة الداخلية يكون اصرف واذا أنت قصيمي أحسن لك تروح الحرس الملكي .. رديت عليهم بكل بلاهة طيب واللي مثلي تركمستاني وين …طبعا هم ما فهموا وش انا أقول وخذيت ملفي ونصيب بوابة رقم واحد وانطقيت في صالة الانتظار بملفي العلاق وجلست في حالي .. ما دريت الا واحد ينغزني بأصبعه بقوة ويقول لي سوعال يا بو الشباب الحينا ..اللي معه شهادة ثاني متوسط ..ما ينقال عنه معه كفائه صح ولا لا ..رديت عليه بكل عفوية طبعا لا وما أمداني أتم لا الا لقيته ناط في سجي ( سجي=حضني) وش تقول انت هاه وش تقول أبك الكفائة مو 3 سنين أنا خلصت منها ثنتين يعني تقريبا تقريبا خلصتها ..طبعا أنا وخرته عن سجي وقلت وأنت صادز بس وخر يا حبيبي ..ويسئلني واحد ثاني ألا أنت وش بك غاير من هالشاب الوسيم ..وش معك شهادات .رديت عليه بكل بساطة شهادة ثانوية علمي وما شفته الا يشاهق .ثانوية يالظالم ..يا ورعان هالحضري معه شهادة ثانوي وعلمي بعد وجاي ينافسنا في رزقنا أبك ليه ماتروح الجامعة ..وش تبا بالحرس أنت ووجهك ..وواحد يسئل اللي جنبه ..وش يعني شهادة الثانوية العلمي…ويرد عليه خوية شي حاجة كوذا زي الجامعة ..ايوة تعرف معهد الادارة العامة ..اذا تخرجت من عندهم يعطونك شهادة ثانوية ..ويرد عليهم ثالث لا يا غشما ..الثانوية يعني جامعة بس من برا ..يعني من الأردن سورية ..مصر ..وفي تلك المعمعة نادوا على اسمي علشان يقابلوني وادخل بملفي العلاق معي ..وأجلس ( على فكرة ما عندهم في الحرس كراسي و طاولات ..عندهم داخل الغرفة خيمة صغينونة فيها بساط ومساند وشبة حطب ) ويقدمون لي أنفسهم ..أبو جلعد وأبو خماش ..ولا قالوا لي وش رتبهم ووش مؤهلاتهم واتسند على المسندة ويناولوني فنجال قهوة.

أبو جلعد: أنت يا ورع من تكون ..وش ينقال لكم ..من أي فخذ ..

أنا: والله يا طويل العمر في خلاف حاد يدور في اروقة العائلة …كل واحد يقول شي بس عن نفسي الحمدلله ما تهمني هالسخافات .

أبو خماش:أبك يالحضري ..وش سخافاته لأسفك بقوطي البيبسي ..ماش شكلك من ربع الهمبرقا ( الهمبرجر ) .. باتسر اذا انت في معركة ومعك ثنين خويا طخهم العدو من بتنقذ أول مو اللي من قبيلتك ..

أنا : لا والله وش قالوا لك ما عندي ضمير ولا أنسانية ..ابك اذب اسلاحي وانصا الاثنين جميع واقول لهم تمسوا على خير واستروا ما واجهتم والعطة يا بطة …بعد باشتغل انقاذ …هذا اللي ناقص

أبو جلعد: ماش وش نقول بس حضري يالله الخيرة ……طيب يالحضري ..وش شهادتك متوسطة ولا ايش..

أنا: شهادة ثانوي علمي تقدير ممتاز….

أبو خماش: يا وجه الله ..شهادة ثانوية و جاي للحرس ابك تبا تصير لواء عندنا ..أنا مثلا وعمك أبو جلعد ما معنا الا شهادة سادس ابتدائي و الاشياء معنا حلوة زي الطحينية ..جاي أنت تبي تلطس علينا بشهادتك …طيب يا عبدالعزيز الا أنت أبو ايش انشالله ..

أنا: ما بعد أعرست طال عمرك ..ثانيا العسكرية حلمي منذ نعومة أظافري والله على ما اقول شهيد .

أبو جلعد: ما بعد أعرست ابك يوم أنا بعمرك بزري كان بطولي …

أبو خماش : افا لا تكون بس ..الله لا يبلانا ترى الطب تقدم في علاج لمثل هالحالات ..

أنا: وش اللي لا واللي يرحم والديك تراني صاغ سليم ..لو تحطني مع ثيران أن اخليهم يحكون عربي بس الزواج مسئولية ومصاريف وانشالله اذا تخرجت واشتغلت انشالله اتزوج …وش ورانا .

أبو جلعد : ابك يالحضري الحين ضاقت بك الدنيا علشان تجي الحرس …المهم بنهرج معك شوية زين …عرف الأماكن المهمة لأي نفر من أنفار الحرس ؟ ووش أهم شعارات الحرس

أنا: سهلة أولا الخشم العان ثانيا الجنادرية ثالثا قصر طول الله عمره علشان أقدم معاريضي .., أما شعار الحرس الأول ..فهو حنا جنود الحرس يا زين حنانا ..قصدي رشاشنا

أبو جلعد: طيب وش تعرف تساوي من التالي ..تقول شعر ( مدح ) , تضبب , تقنص بالبندق .

أنا: .أعرف اقصد بس لو تعطوني فرصة في الجنادرية أن أصير لواء من أول مرة ..وبالنسبة للتضبيب فلك علي شوي أما البندق فمن يوم صكيت على أصبعي ببندقية خالي وورم وصار لونه أزرق وانا ما قربت أي بندقية بس انشالله باتعلم .بس عندي مواهب ثانية ..اعرف اطلع الجيب اذا غرز في الطعوس ..وأعرف اجربع بعد ..واعرف اضبط الكبسة ..واعرف.

أبو خماش: طيب السؤال المهم لو أنت في طعس وحاصرك العدو من كل الجهات ومعك رشاش وخنجر وشماغ وش تسوي معهم …؟؟

أنا:أجدع الخنجر ..في الارض لانه في هالمواقف ماله لزمة وبعدين الف بالشماغ على راسي ..يعني وضعية الاستعداد .بعدين اشيل رشاشي بيدي ..ثم اجدعه في الأرض وأقول للعدو في وجه الله داخل عليك يالسنافي لا تقتلني ترى وراي عوال ..

أبو جلعد : اقطع و اعقب يالحضري ..يطلقون عليك نار قبل ,,بالأول تجدع الرشاش يالذهين … ..وفي آخر المقابلة خلوني أقدع من التمر ( يا زين رجالات الحرس) وبعدين ودوني لاختبارهم الطبي والميداني اللي سقطت فيه بالثلاثة ..تبون تعرفون ليه سقطت.

مقر الاختبار بر الثمامة ,,أدوات الأختبار …سواطير وسكاكين وخيام …وحبال وأوتاد ..وكان الاختبار كيف تطق لك خيمة وتذبح خروف وتقصبه وتعلقه ..في نص ساعة ..طبعا أنا ضعت كلي في وتد الخيمة وشلون اثبته ..المهم بعد هذا السقوط المر ..ضفيت وجهي وملفي ورحت لآخر أمل لي في الحياة العسكرية لا .تقولون البحرية لآني أساسا ماعرف اسبح علشان ابز عندهم رحت لكلية الملك فهد الأمنية بملفي العلاق وألقى طابورين ..كل واحد أطول من الثاني واحد للجامعيين والثاني لحملة الثانوية العامة وأصف مع حملة الثانوية العامة ,,خبري أول الأمر كانوا المتقدمين عاقلين وكل واحد راكد ..بس مع الظهريات الظاهر طقت الشمس روس الشباب ما وعيت الا بدوا يتراجمون قوارير الماء على بعض والجامعيين يقولون لحملة الثانوية بنطلع أحسن منكم ملازمين أول ( من زين اللغة العربية ملازمين ) وحملة الثانوية بما فيهم حضرتي نرد عليهم يالمسابيه يالشياب ما يمديكم تتعينون الا على القبر بس المستقبل لنا والواسطات على قفا من يشيل ..وجلس الطابورين على ذي الحالة المزرية الى أن جا واحد والله العالم أنه نقيب أو رائد على كتفه نجمة وتاج زي اللي على علب قشطة التاج ( من جودتها دائما متماسكة ) المهم هالمدري وش رتبته معه شوية عساكر وبدى يهاوشنا بس المشكلة ان نص تفاله ( وأنتم بكرامة ) رايح على طابور حملة الثانوية العامة ..حتى العساكر نص هواشهم على طابورنا ..وحلا للمشاكل وتفاديا للصدامات ..قرر اللي مدري وش رتبته أنهم يمشون طابور الجامعين في المقابلات ثمن يلتفتون لطابور حملة الثانوية العامة و بقى طابورنا ثابت ما تحرك منه أحد الى الساعة 4 ونص العصر وعلى ما جا دوري الا عقب صلاة المغرب ..وأدخل على ضابط برتبة رائد يقابلني ويوم شفت انه بروحه واتفائل خيرا …

الرائد: ايوة يا عبدالعزيز ايش جابك عندنا ..ليه ما رحت للجامعة ولا أي معهد عالي مش انفع لك.

أنا:والله يا طويل العمر حلم البدلة العسكرية يراودني منذ نعومة أظافري ..ما تتخيل لما أشوف عسكري معه سلاح أني أذوب شفت احساس بنت ثانوي شافت واحد وسيم مفتول العضلات لا وجايب لها وردة بعد..هذاك شعوري طال عمرك ..شوي الا أخق ..

الرائد: طيب يا عبدالعزيز هل أنت مستعد لحياة الضابط في المستقبل ؟ يعني بكرة بتصير ضابط تحقق في قضايا الناس ولا تكون في قسم الجريمة ؟ ولا في المرور ؟

أنا: وشو طال عمرك وش أحقق وبكرة أجلس بين اثنين يحلفون ويصارخون وكل واحد يلبس الخطا للثاني ..ولا تحطوني في قسم الجنح والجرايم وشوله.. طال عمرك ولا عليك كلافة ابي قسم الحرب.

الرائد: خبل أنت ولا صاحي وش قسم الحرب يا شاطر ما عندنا ,لا قسم حرب ولا يحزنون احنا أمنية يعني أمن داخلي , لا يكون قصدك مكافحة الشغب بس .

أنا: وش مكافحة الشغب أنت ووجهك أجلس حاط يدي على خدي لين يفوز المنتخب ولا يتأهل لكأس العالم علشان أكفخ لي واحد ولا اثنين .طال عمرك ما سمعت عن مصطلح اسمه حرب الشوارع ..اخشروني في ذاك القسم أبي قسم كله حروب ابي طلق نار وزنط وملعنة خير مو تلطعوني ورى مكتب .

الرائد: يا ولدي وش شايفنا في العراق احنا ولا في اسرائيل ..ترى الديرة كلها من يوم تأسست ما دخلت الا حرب واحدة ..ثانيا وش تفاول علينا بحرب شوارع الله يحرقك ناوي تودينا الحبس أنت وكلامك .

أنا: لا والله طال عمرك بس لو أدري أنكم ما تطلعون الا ضباط مكتبيين وحقين تحقيق ما كان جيت يا خي استحوا على وجيهكم كل واحد معه سلاح وفاضي مافيه ولا رصاصة على الأقل لو عندكم قسم تعذيب محترم كذا تحجر فيه للمتهمين وتلعن والدي والدي الواحد ولا عندكم قسم اعترافات ..تحطون لي المتهم في غرفة ومربط بحبل .وأنا أطيح فيه بوكسات وأعظ خشمه ..

الرائد: يا ولدي أنت متخلف ولا يتهيأ لي احنا شغلتنا غير تخصصنا غير …التكفخ والطق تركناه لغيرنا ..احنا نحقق ونحافظ على القانون بس ونمنع الجريمة.

أنا: ووووووزززززز( صوت تفحيط أرنب ) أجل بس تحققون وتراعون الله في تحقيقاتكم طيب يا طويل العمر ابي اصير ضابط بس بشرط يكون معي سلاح فيه ذخيرة ..انشالله لو تمسكوني تفتيش في شارع التخصصي بس يكون معي سلاح فيه ذخيرة يعني كل شوي انعنش شوي بكم طلقة في السماء منها تغيير جو ومنها كشخه و منها ترويع للبزارين . اترك هذي وش رايكم تشغلوني عندكم وتعيروني كمحترف لوزارة الدفاع ولا الحرس يعني تورونهم عينة من الرجال اللي عندكم ..منها خبرات ومنها طال عمرك لو لا سمح الله تطاقيتوا معهم تكون لكم عليهم عين جاسوسية ..يعني واحد يجيب لكم كل أخبارهم ..هاه وش رأيك بالفكرة.

الرائد: أقول أنت يا المستلج تراني بأسوي نفسي ما سمعت شي وبأشر على أوراقك علشان تدخل الأختبارات الميدانية والفحص الطبي زين يعني الأسبوع الجاي تجي أحسن

وفي غضون أسبوع سويت عملية ليزك لعيوني علشان أتفادى الفضايح اللي صارت لي في وزارة الدفاع وفعلا جيت لهم ونظري ستة على ستة واشتركت لي في نادي رياضي في دورة أعداد للكليات العسكرية ..و جيت على موعد الاختبار الطبي والميداني .. وابشركم نجحت في فحص النظر والطول و الكشف الطبي حتى فحص ذاك وش اسمه ضغطت على نفسي وخليتهم يفحصون اللي يبون عادي الأشياء تكون منكمشة ولا لا .وفي الأختبار الميداني وفقني الله وعديت ونجحت ودخلت الكلية وانلطعت فيها لين تخرجت بتقدير جيد مرتفع وطلع تعييني في أم الجماجم و بالواسطات ( ولد عمتي اللي في وزارة الزراعة ) المهم وينقلوني للرياض على رتبة ملازم أول و يقضبوني أشارة عند تقاطع العليا مع التحلية ومبسوط معي شوية عساكر اذا جا أسبوع المرور نوزع على السيارات ورد ومنشورات مو سياسية أقصد نشرات توعية الى في يوم من الأيام وأنا متسدح في قهوة المساء أشرب هوت شوكولات والا يجيني عسكري وهو يقول لي يا حضرة الضابط ( أنا مفهم الأفراد العساكر أن ينادوني قدام الناس يا حضرة الضابط ..) وافز له وأقول له نعم يا عسكري يقول طال عمرك ( نفس الشي مفهمهم يقولون لي بعد طال عمرك ) في حادث عند التقاطع فياجرا سودا (2001) مع هونداي بيضا 96 .وراعي الفياجرا مستلم راعي الهيونداي طق وتافل في وجهه . وأطمر من الكوفي شوب و أنصى اشارتي و بالتحديد مكان الحادث .وألقى شاب كشخة ريحة عطره واصلة السويدي ..ونازل يطق في الشاب الثاني راعي الهيونداي ..الغريب ان راعي الفياجرا ماسك جواله حتى وهو يكفخ في راعي الهيونداي وطبعا أنا من هول الموضوع قلت بصوت عالي نادوا الشرطة في حادث اتصلوا على الشرطة يرسلون دورية وما وعيت الا مواطن بريء يقول لي وأنت وش شغلتك ,,طبعا تذكرت أني شرطي العفوا قصدي تذكرت أني ضابط وأنزر في راعي الفياجرا ذيك النزرة.. هييي أنت اترك الرجال لا أكلبشك الحين الدنيا مو فوضى علشان تطق الناس.

راعي الفياجرا: اقول اهجد لا اتوطى في بطنك أنت بعد هذا اللي ناقص عسكري ويتلفسف .

أنا: وش عسكرية احترم نفسك ما تشوف الرتبة اللي كبر راسك ..لو سمحت يا تناديني حضرة الضابط ولا ملازم أول ,, المهم هذا مو موضوعنا المهم وخر يدك عن الرجال وخل نعرف وش صار ..

راعي الفياجرا : أقول يا زينك لو تروح في شغلك لا يصير لك شي مو كويس .

راعي الهيونداي: يا حضرة الضابط الأشارة كانت خضراء بالنسبة لي و توني ماشي في طريقي الا والأخ قاطع الأشارة وطاير طيران ويالله أتفاداه بس ما أمداني الحمدلله أن الله فكني منه بس زي ما أنت شايف جنب سيارتي كله انعدم وهو ما جا سيارته الا خدش وبسيط ومع هذا زي ما أنت شايف طايح فيني طق.

راعي الفياجرا: اقول انثبر أنت وأياه لا أوريكم شغلكم هذا اللي ناقص يا ملاعين الوالدين.

أنا: اسمع عاد شف لا تقول عني ملاعين الوالدين تراني ملازم أول ئد الدنيا ووراي ظهر ولد عمتي بوزارة الزراعة في المرتبة العاشرة ..بس اذا فيك كلام قل لراعي الهيونداي ملعون الوالدين ..ثانيا وش عليه تنفخ أنت ووجهك تراك أنت الغلطان وباكتب هذا في التقرير وباشرشحك وشف قلة أدبك وطولة لسانك وشلون بتفيدك ..

راعي الفياجرا : اقول تراك مصدق نفسك بقوة .ترى راسمالك ما تجي زي سواق أختي فهمت ولا لا وتقريرك بله واشرب مويته ولا اقول لك لفة لفة . وماله داعي أكمل

أنا : بس لا تكمل أنا اوريك,, قدامي للقسم وهناك تعرف من الملازم أول عبدالعزيز بن بلاك هورس .

راعي الفياجرا:اقول انقلع أنت وخشتك هذا اللي ناقص القسم لك ولاشكالك ؟؟ حط في بالك لو نروح القسم موب أزين لك ترى؟

أنا: لا عاد تراك مصختها الحكي معك ضايع الآن أرسل للعمليات يرسلون لك فرقة خاصة تشيلك وتكلبشك وعلى المركز ومن المركز على توقيف الناصرية ونشوفك يالمملوح هناك ….وأروح لسيارتي وألقط اللاسلكي وأرسل للعمليات علشان يرسلون مساندة يسحبون راعي الفياجرا …انا ما مداني اقول عمليات حوّل الا لقيت 3 دوريات مساندة وصلوا للموقع وطبعا وقتها أنا شفت نفسي ورجعت يم الولد وانا ماسك جهاز الأرسال من ذيله ( الأريال ) وقلت له بصوت يشبه صوت افتيم قريطم مذيع البي بي سي ..عرفت الآن وش اقدر اسوي بك يا بزر يالله يا أفراد كتفوه وحطوه في السيارة وأشرت يمه بأصبع يدي اليسار الصغير ..وتوني بأنزل أصبعي الا وأحس أني مرتفع عن الأرض والتفت وألقى الأفراد شايليني أنا ويبون يكلبشوني ..وأقول لهم أنتم حمير يا حمير ..كلبشوه هو مو أنا ما تشوفون رتبتي يا بهايم ..بس ولا عبروني ولو حتى بالتفاته ..ورموني في أحدى الدوريات في المرتبة الخلفية ..ورحنا لقسم مرور الشمال ..وهناك نزلوني بنفس الطريقة اللي حملوني بها الا ويرموني عند مدير القسم ( من نمونة أبو تاج وفوقه نجمة أو نجمة فوقها تاج من الروعة ما صرت أذكر ) وتوني على بالي بسوي التحية العسكرية ..الا بكندرة من ذوليك الكنادر اللي يلقّون ( يلق يعني يلمع تشوف وجهك فيها كانها مراية ..) جاية في خشتي ..انا طبعا ولا كأن شي صار وقمت اضحك يعني مو نفاق بس مجاملة اجتماعية وما دريت الا أبو تاج يقوم من كرسيه ..ويصرخ علي.

أبو تاج: يا حمار ..يا كلب يا ثور يا بهيمة ..ماعندك عقل أنت؟

أنا : جزاك الله خير من طيب اصلك سم طال عمرك ..الا طال عمرك تبيني ارجع لك كنادرك؟ ولا تبيني ألمعها؟

أبو تاج: أجل يا حمار تتعرض لعمك وتعطله في الطريق ياللي ما تستحي على وجهك ما تعرف عمك ؟

أنا: طال عمرك والله العظيم ما عطلته بس القصة وما فيها أنه طال عمره سوى حادث وأنا جيت باحقق بس هو ما أعطاني الفرصة تصدق الله يخليك يا أبو تاج أني توني باسئله وش صار الا انطلق في وجهي كأنه مدفع .وقام يغلط علي ..تصدق يا طويل العمر شرشحني قدام الناس متجاهل بذالك رتبتي العسكرية .

أبو تاج: مزدي فيك أجل يا ثور توقفه وتبيه يجي معك للقسم .ما تعرف منهو ..صدق أنك ما تستحي على وجهك انت يبي لك طق وتفل في وجهك على فعلتك..أجل توقف عمك وتبي تاخذه معك للقسم.

أنا: طال عمرك بس هو قطع اشارة وصدم رجال ثاني ..لا وتصدق مظلل القزاز الأمامي وماعلى سيارته لوحة يعني ماشالله كذا مخالفة في وقت واحد

أبو تاج : وانت وش دخلك انشالله يصدم الناس ويمشي أنت وش عليك منه ليه تعطله وتشغله أنت حمار ولا ما تفهم.

أنا: الاثنين طال عمرك حمار وما أفهم بس هذا لا يمنع طال عمرك أنه مخطي مخطي مخطي أنا ما حرق أعصابي الا هالمواطن البريء راعي الهيونداي هالوحش يقطع الأشارة ويصدمه ويطقه طق قدام العالم .. وأنا أتكلم ما دريت الا بطفاية السجاير محلقه على ارتفاع منخفض وتصك في المنطقة بين خشمي وجبهتي .وأخبط على الأرض من قوة الطقة ..ويقول لي أبو تاج وشلون تفتري على هالآدمي المسكين وتقول عنه أنه سوى وما سوى يا أخي اسئل راعي الهيونداي اذا شي من هذا صار له ولا لا ..

أنا: يا راعي الهيونداي هالمجرم راعي الفياجرا طقك واعتدى عليك ولا لا قل الصدق لاتخاف؟

راعي الهيونداي: أبدا والله ما صار شي الرجل كان محترم وقام يتفقدني حتى أنه طلع لي دفتر الشيكات وتوه كاتب لي شيك بميتين ألف ريال بس الله يهديه الملازم عبدالعزيز طمر علينا وقام يشتم ويسب واعتدى على الرجال وشقق دفتر شيكاته الله يصلحه بس .. وأنا اللي أبزر عيوني في راعي الهيونداي وأقول له أنا ويسهب راعي الهيونداي ..و يقول يوم جيت أفك بينهم الا الله يصلحه بس الملازم عبدالعزيز ويطقني بس والله أعلم انه طقني بالغلط ولا كان يقصد الله يسامحه ويهديه بس .

أبو تاج : ياللي ما تستحي على وجهك تدري على أفعالك تدري وش عقوبتك يا قليل الحيا يا مستهتر أجل كذا تسيء لمهنتك ولأفراد القطاع العسكري كلهم أنا باتغاضى عن أفعالك وتحويلك الى محاكمة عسكرية.

أنا ك وشو محا …محا…محاكمة عس ..عس..عسكرية بس أنا والله ما سويت شي ترى كل اللي يقولونه كذا قسما بالله والله العظيم يا أبو تاج ان كل اللي يقوله راعي هالهيونداي خرط في خرط وافتراء علي وبهتان ..

أبو تاج: ما علينا المهم عقابا لك قررت أني أنزل رتبتك الى ملازم بس و أنقلك الى بلدة أم الجماجم لاو بتمسك الدوار اللي عندهم ودوامك بيصير 16 ساعة ويا ويلك و يا سواد ليلك لو جاني خبر أنك تارك دوارك ..حتى لو انحسرت لا تزحزح من مكانك اقض حاجتك في وسط الدوار يالله تسمّد النباتات ..طبعا أنا رحت هناك أسبوع وما لقيت شقة عزاب أنطق فيها ..ومشيت هالأسبوع كله أنوم في المسجد الجامع ..لين جا الهندي ودرني ساعتها قررت أن الموت أهون من الحياة الشقية وتركت أم الجماجم وتركت وزارة الداخلية بكبرها بس ما تركت الحياة العسكرية ..تبون تعرفون كيف ..اشتغلت سيكورتي في بنك والحمدلله معي سلاح ( عصا خشب) ومبسوط صحيح الراتب مو مرة بس ولو عندي مناوبتين في الأسبوع ويومين أمسك مراقبة مدخل النساء ..و الحمدلله حتى راعي الوانيت الدردعة أناديه طال عمرك ..يالله اسمها عيشة … والبال مرتاح.

ملاحظة: اذا هناك خطأ في بعض المعلومات فالأمر يرجع الى قلة خبرتي بالقطاع العسكري بالشكل المطلوب حاولت أن اتحرى الدقة في المعلومات وهذا ما خرجت به كم القصة الخياليه

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة