قصة حب ماصل

قصة حب ماصل كاملة مكتوبة

أعزائي القراء لكي تتمكنوا من قرائة هذه الصفحة بكل وضوح يرجى منكم أعادة ضبط ساعاتكم الى سبع سنين للأمام … المكان عيادة دكتور نفسي ( زعبولة الاؤله ) في شارع الخزان …الساعة 6 المغرب من يوم الخميس . الشخصيات الموجودة ..الدكتور زعبوله الاؤله على الكرسي وعلى الأريكة ( حلوة أريكة) أنا عبدالعزيز والمدام العنود وكل واحد مننا ماسك من الأريكة كتر (كتر= طرف ) وصاد بوجهه عن الثاني….

الدكتور: جرالكم ايه يا أولاد انتا لساكم عرسان جداد وصغيرين على المشاكل والخنائات ..آه منك يا واد يالئيم انتا مزعلها ليه بس نفسي أفهم …وانتي يابنتي مكشره ليه ..نفسك في حاجه خوديها من حباب عينه.

أنا: يا دكتور الله يطول عمرك أنت فاهم السالفه غلط لا اعمري زعلتها ولا استجري أزعلها بس هي تدور شي علشان تزعل مني ..اذا لبست ثوب صوف في الشتاء قالت الالوان تضايقني وانت تبي تضايقني وأذا قلت لها تعالي نسافر في الصيف لأي ديرة قالت ايه تبي ترمي العيال علي اصاليهم( يصالي = يقابل يعني يشيل هم ) في الملاهي وأنت تلاحق البنات ..وأذا شريت لها هدية قامت تشمشم فيني كانها من سلقات المرور تقول أكيد مسوي عملة ولا وشوله تجيب لي هدية.الله يرحم أيام الخطبة تقول عن ثوبي الصوف الجاهز اللي لونه أخضر انه يهبل وعن عطري وهو كولونيا حقت المغاسل انه روعه وكل ويك اند تقول سافر أنت وربعك وسع صدرك ولا تخلي نفسك في شي …وأذا جبت لها وردة من حديقة بيتهم طارت فيها وقامت تحظن فيها لين تتقطع الوردة من يدينها …

العنود ( المدام ) : لاتصدقه يا دكتور ما عليك منه يا دكتور وش أقول عنه بس طلع زي أي زوج سعودي يحفظ له كلمتين أيام الخطبة واذا جا الزواج يبان على حقيقته كل همه ربعه والسهر وشغله …تصدق يا دكتور كذا مرة جاني يبي يروح لدبي مع ربعه ..أقول له خذني معك يقول لا رحلة شبابية بنتقضى أغراض ولا صديقي بيشتري سيارة ..و هذا هو يا دكتور ..الله يرحم أيام الخطبة كل يوم ورد ويدق على جوالي الساعة 12 ويسمعني أغاني ام كلثوم واذا قلت له يا مجنون انتبه للفاتورة ..قال تفداك …والحين اذا ركبنا في السيارة يشغل لي ميحد حمد ولا بشير شنان وأذا سألته عن ام كلثوم قام يسب ويسخط و يقول ماخذنا منها الا كسر الظهر في الفواتير لا بارك الله فيها .

الدكتور: يا أولاد جرالكوا ايه بس متنشنين كده ليه بس نفسي أفهم …هي المسأله شكلها حاجه عويصة …ممكن أعرف ازاي اتعرفتوا على بعديكم يعني أزاي اتخطبتوا …ائول أنتا ياعبدالعزيز أصل الستات بينكسفوا من الحاجات دية.

أنا: الله يسلمك يا دكتور كنا نتعشى في مطعم مكسيم في باريس ..انا واصدقائي على طاولة ونأكل لحمة راس وعكرة ضب وكباب وحمّص ورز بخاري …بس ماش ما عندهم بيبسي مافي الا كوكا كولا وأنا متعود الط من هالبيبسي المهم ,هي أهلها على طاولة ثانية الظاهر ياكلون مصقعة وفراريج ومعكرونة ..ويشربون عصيرات كوكتيل الا أبوها ماغير يبيلبع من البد وايزر الله يصلحه …المهم واقزها بعيوني وتخش مزاجي ,اقول يلعن أمها هالبنت موت احمر ..و اقوم اؤشر لها يالله نروح المغاسل يالله نروح المغاسل بس هي صتيمه مافهمت اشاراتي ,في الأخير ناديت الجرسون وعطيته ورقة فيها رقمي علشان يوصلها لها …وعطاها الرقم في حين غفلة من أهلها ..وتنادي هي الجرسونة وتعطيها ورقة لي ويوم وصلتني الورقة القا مكتوب عليها ..عندك كاشف و لالا ؟؟ احلف يا ولد…وارسل لها مع الجرسون (هذا واحد ثاني ) والله ماعندي كاشف بس دقي قبل 12 لن خويي عبدالله مواعد اللبنانية خويته 12 … وقامت تهز رويسها وتضحك فرحانه ..وانا ارعا في البقدونس اللي مع الكباب ..ويوم رجعت للفندق وتدق علي الساعة 10 ونص ومن هناك بدينا التعارف ..وحبينا بعض وكلمت اهلي عنها ..ويوم وصلنا الرياض رحنا نخطبها وبس …

العنود: لا يا دكتور ترى كل اللي قاله نصب في نصب اصلا شكله شكل واحد يروح مكسيم هذا اذا طب فدركرز قام يحط يده على راسه خايف من الفاتورة …وأنت قل الصدق ترى هذا الدكتور.

أنا: لاحووول مو أنتي تقولين اذا سئلوك أزواج صديقاتي ولا ربعك قل لهم هالقصة علشان نطلع بصورة رومانسية ونحفظ برستيجنا ولا بتغيرين كلامك الحين ..على العموم الصدق يا دكتور …مرة من المراارير وسط الأسبوع كنت زهقان والعصر على خبرك الفيصلية يسمحون للشباب يدخلون وبالفعل رحت هناك وأنا كنت مشخص عاد ذاك الوقت كل السوق عيال مافي الا كم بنت وكم عجزه ..لقيت واحدة جسمها حلو ..وعيونها تهبل قمت ألحق فيها الغريب أنها كل شوي تلتفت يمي وتضحك وتهدي واذا قربت منها أسرعت وأذا ابعدت عنها رجعت تهدي و صارت تناظرني أكثر ما اطالع فيها ..المهم وتدخل البنت للمخرج قلت يا ولد بس الحقها …صح شوي شكيت وخفت انها تلعب كاراتيه وبتجلدني وتلعن والدي بس قلت يا ولد من لم تجلده الهيئة جلد بغيرها ..وأدخل المخرج ومافي المخرج الا أنا وهي وتوني ادور ورقة علشان أكتب فيها رقمي ومالقيت الا فاتورة المغسلة .واشق طرفها اللي تحت وبابدا اكتب رقمي ..الا وتقول لي كيفك يا عبدالعزيز ..والله وصرت تكشخ وتدل الفيصليه يرحم زمان يومك في الشميسي …وقتها طقتني النفاضة من وين ذي تعرف اسمي واني كنت في الشميسي وأنا اهوجس وتقول لي لاوالله كاشخ يا ولد وين ايام اذا بغيت تكشخ بشماغ ابوك تطق بنت البكار انت وثوبك اللي مشقوق من ورا يقال لك ثوب العيد …قلت لها هي أنتي وش دراك ومن أنتي …وتضحك وتقول نسيت العنود بنت أبو صالح اللي كنت تبوس الارض علشان تحن عليك بنظرة ..وأزعق بأعلى صوتي العنود الخبله هلا كيفك يالعنود ..والله زمان يأم الظفاير صرتي تعرفين تلبسين عقب ما تطلعين الحارة بعباية امك مغطية بها راسك وطالعه سيقانك أنتي وقميصك الازرق اللي منشقه ركبته …وترد علي ازين منك يابو نشقة وكل شوي تمسح خشمك بكم ثوبك ..قلت لها ولا أنتي عاد واللي يرحم والديك ياللي ما تغسلين وجهك الا في الأعياد الرسمية والمناسبات الوطنية ..و لا اذا جلستي يطلع سروال السنة اللي كنتي تلبسينه ..في بنت تلبس سراويل أولاد …وترد علي لا والله اصلا ذاك السن مافي فرق بين الأولاد والبنات, بس أنت اللي تلاحق ريهام بنت استاذ ماهر السوري بس كفوك طنشتك وراحت لولد خالها هيثم وتركتك يادلخ ياللي كنت تشتري لها ايسكريم .. و مطنشني رديت عليها ما عاش من يطنشك يا حلو بس كنتي أبي احرئصك شوي ولا ذيك البرصا كفو اقارنها فيك لا شعرها فيه قمل ولا ورى اذنها في وصاخة ولا تنشق الا في منديل ..ثانيا ناسية اخوك عبيد كل ما شافني اقرب حولك الا يجلدني ..ضيع برستيجيي في الحارة…

العنود: آه يا دكتور كانت هذي البداية ..ياليتني ما شفته ولا صار اللي صار ..

الدكتور : اخرسي يا بت كمل يا عبدالحليم ئصدي يا عبدالعزيز ..وبعدين ايه حصل ايه …

أنا: ابد يوم شفتها خقت واسئلها وين راحوا يسكنون …قالت لي العليا قلت بلا نصب قالت يوه لو ما كنت تحلف ..قالت عند شارع الوشم ..علمتها أننا نقلنا لظهرة البديعة وزرفت لها الرقم وقلت دقي عاد ولا ترى ادل بيت ريهام وهيثم .. وترد علي ووعععع كفوك قلت امزح والله يا بعد عمري ..قالت ما اسرع صرت بعد عمرك أجل يالله طس من السوق ولا عندك نية ترقم بنات غيري ..قلت لها يلعن ابو أبليسك ما اسرع تغارين أنا بطلع الحين بس انتي اشتري واطلعي على طول ترى السوق مليان شباب عيال كلب يغثون بني العالم ملاحق …قالت لي طيب يالبريء يالله طس بس …واطلع وانا اقول الا متى بتدقين دقي بعد 12 أحسن ..انتظرك يا عمري والله انتي يالعنود……..وبس تعبت يا دكتور هكذا بدت قصة التعارف بيننا ..

الدكتور: ايه اللي بس يا واد احنا لسانا في بداية الئصة والله شوئتوني نفسي اعرف ايه كمان ..ئولي يابت يا عنود ايه كمان ….بس استنوا شويا عاوزين بوب كورن ولا حاجه تشربوها بصراحة ئصتكوا يا أولاد حاجة كده بتاعة فيلم هندي.

العنود:ابد يا دكتور مدري وش خلا قلبي يحن ويرق له مدري له ولا لأيام الشميسي المهم دقيت الساعة واحدة وربع و توني ابي اتحسف الا يلقط السماعة من أول رنة ويقول هلا وغلا ومرحبا ويسمعني أغنية على البال كل التفاصيل على البال ..صراحة بديت اضعف قدام هالذئب البشري قلت له اسمع ترى أدري عندك كاشف دق على هالرقم تراه جوال أمي موب تفضحني …وبالفعل دق علي ومن زين الطبايع دق علي من رقم أهله يقول أوفر للمصاريف ما يبي يدق من جواله …المهم جلسنا ساعتين نرطن عن أيام الشميسي وطلع الباشا فضايحه اثري خبله السالفة مو بس ريهام السورية ..الا خذ عندك ليلى بنت ابو خالد وبسمة من الحارة الثانية من صغره وهو اللهم لك الحمد بعد ساعتين قلت له تصبح على خير بروح ارقد ..وقعد يا دكتور يترجا فيني اني ادق عليه ثاني يوم ويقول الله يخليك اوعديني انك بتدقين علي ويترجا في ..لين ما حن قلب له كالعادة.

أنا : بشويش يا ايهاب توفيق وش يترجا في الا ما صدقتي أقول لك دقي ..رديتي علي أي وقت يناسبك نسيتي ولالا .

الدكتور: اسكت انتا يا واد ياعبدالعزيز كملي يا بت ياعنود سيبك منه ما يهمكيش وبعدين.

العنود: الحمدلله انك شفته بعينك يا دكتور دايم يقاطعني المهم صرت أدق عليه وصار يفتح هالمجلات الشعرية ويقرا لي ويهديني من هالقصايد ..الله يفشله يقرا شي ولا يعرف وش القصيده عنه ..مرة أهداني قصيدة خلف بن هذال في مدح ناقته ..وقال ان هالقصيدة راكبه علي بس كنت أرحمه يعني اذا مثله مالقى من يحن عليه ويرحمه وش يسوي حرام كل شي يروح للشباب الكشخه …المهم بدت القصة تكبر يوم بغيت افتك منه قلت له جاني خطيب وشكل اهلي بيوافقون عليه ..الا ويقعد يبكي ويبكي قطع قلبي والله تبي الصدق يادكتور لا جاني خطيب ولا شي بس مليت منه بصراحة وما دريت الا هو يقول لي انا مستعد أخطبك استغربت ساعتها من جراته وبيني وبينك يا دكتور اعجبتني شجاعته ..وكبر في عيني لأول مرة ..بيني وبينك شباب التخصصي والعليا حدهم تدييت وبس, بس عيال الظهرة الواحدة تقدر تجيب رجله لين بيت اهلها ..المهم ساعة ما قال لي مستعد اخطبك حسيت قلبي بينتق من صدري له وقلت له صدق بس وش بنقول لأهالينا وشلون نعرف بعض … رد علي بكل ثقة انه بيقول لأمه انه شاف اخوي وتذكرني وجيت على باله ,,المهم شكل أمه كانت مالة منه ومن حاله المايل توه ما جاب طارينا الا متصلة نفس ذيك الليلة الساعة 11 الليل وتقول بازروكم بكرة وبالفعل كل شي تم بسرعة حتى أبوي خيب ظني ووافق وجت الخطبة والله لا يوريك يا دكتور عماد حمدي ورشدي اباظة في شخص واحد كل يوم يجينا بورد ولا علبة حلاو ولا اسطوانات موسيقية يا ملحه ذيك الأيام يا دكتور كان يترك الدنيا كلها علشاني …

الدكتور: ايوة وبعدين ايه اللي جرا ..وخطبتكوا استمرت اد ايه يا أولاد ؟؟؟

أنا: يا سلام يعني أنا اللي كنت وش حليلاتي أيام الخطبة ..وأنتي اللي كل ما شفتيني هلت الدمعة من عيونك من الفرحة وصرتي تنافضين كانك ماسكة سلك كهرب اما على الوردة تراني اقطعها من حديقتكم وتقعدين تشكرين لي وتقولين ليه تكلف على نفسك باقة ورد وفخمة بعد ..وفي كل ليلة تدقين علي من الساعة واحدة وتغزل وكلام حلو ويا فارس احلامي ومدري ايش ..والله يا دكتور في العمل انصكيت خصمين بسبتها وكذا مرة المدير يقعد يحجر لي في هالصبحية علشان التأخير ..وجلسنا على ذا الحال حوالي السنة لين موعد الزواج…وهنا انقلبت على حقيقتها تصدق يا دكتور ايام الخطوبة الح عليها أقول يالعنود خلينا نروح ماربيا في شهر العسل الناس كلهم يمدحون ماربيا وتقول لي لا يا عبدالعزيز ما علينا من الناس حنا أولى بفلوسنا وش فيها السياحة داخل المملكة وبالفعل عقب الزواج طمرت بها لجدة ..واحنا في جدة ثاني يوم يا دكتور الله وكيلك جلست تقول لي وش معنى بنت خالي تروح لندن في شهر العسل وانا جدة,,, افهم فيهم اذكرها بكلامها مافي فايدة يا دكتور قامت تصايح علينا بالفندق انت ما تحبني وانت ما تغليني لين ماتجمع الفندق كله عند غرفتنا …ساعتها ما ردني الا اقرب مكتب سفريات ولقيت لندن وماربيا وكل أوروبا فل وما في حجز قلت يا ولد مالك الا ماليزيا ..ورحنا ماليزيا ويا ليت ما رحنا ..اذا وديتها للسوق نتمشى . قامت تحلطم ايه يا حظي الردي الناس بجنيف و باريس وانا في جستنغ علشان الرطوبة والحر واذا رجعنا للفندق قالت أنت مسفرني علشان تحبسني في الفنادق .وعلى ذا الحال ليل نهار..

الدكتور : يا بني دا دلع بنات مابالك بئه بالعرايس ..وهي بتئول الكلام ده من عشمها فيك يا بني يعني كده وكده ؟؟

العنود: فهمه يا دكتور بس اسئله هو وش سوى فيني في ماليزيا الله لا يوريك يا دكتور أذا رحنا للسوق وشاف شي زين يقعد يقول لي أمي تحب هالاشياء شكلي باشتريه لامي ..هالقماش أمي تحبه ..وهالساعات أمي تعزها .. و هذي وهذي أذا جت الساعة تسع يقوم يتثاوب ويقول يا حبيبتي وش رايك نروح الفندق علشان ننوم اقول له بدري يقول وش الي بدري احنا عرسان لازم ننوم ونشبع نوم اقول له يا عبدالعزيز اذا رجعنا للرياض ننوم على كيفنا ..يقعد يرد علي ومن بيصبر لين نرجع للرياض ..وبس جلسنا اسبوعين في ماليزيا من السوق للفندق ومن الفندق للسوق الا الحق ينقال مرة وداني لحديقة الحيوان ومرة للسينما ومرة لسوق السمك ويوم رجعنا الرياض ..القى صفة اخوانه كلهم في المطار مع اننا متفقين اننا ناخذ ليموزين نروح لشقتنا ثم بعد كذا نطلع نسلم على أهالينا ..بس وش اسوي به يوعد ويخلف تعودت عليه ما يتوب.ويوم رحنا للشقة طلع على حقيقته المرة .. قال لي من أول يوم لازم نروح نسلم على أمي وثاني يوم على عماته وثالث يوم على خالاته لين طفشني صحيح اني ماخليت اول يوم يمر لين رحت سلمت على أمي وأخواتي وثاني يوم على عماتي وثالث يوم على خالاتي بس ولو ماله حق يجبرني أننا نروح لاهله يعني المفروض يشوف اذا ودي اروح ولا لا .

أنا:يا دكتور القضية مو هنا مسألة شهر العسل أوالزيارات الأسرية لأنها مسألة وقت محدودة بفترة معينة بس المصيبة يا دكتور اللي راسها يابس ..احب يدينها ورجولها يا بنت الناس خليني اجيب لك شغالة تريحك وتساعدك بدل ما ترجعين من العمل وبعدين تطبخين وعلى ما يخلص طبخك الا الساعة 4 العصر ..بس ماعندها الا لا ولا وأنا أغار عليك من الشغالات ومن هالخرابيط ..يا دكتور الحق ينقال طبخها زين ويهبل بس يوجع البطن انا يا دكتور لي فوق عشرين سنة اكل من يد الشغالات أجي على آخر العمر وأكل من يد زوجتي وين صارت هذي بتسبب لي تلبك معوي ..بس اللي في راسها في راسها ..وفوق هذا كله كل يوم تطلع لي بفنتك جديد مرة تقول لازم تساعدني في شغل البيت ومرة عليك غسيل الملابس ..واذا فتحت فمي تقول لي وش فيها رجل أختي يساعد أختي في الغسيل ..يابنت الناس وش علي برجل أختك أنا لي سنة احب يدينك نجيب شغاله تريحك وتريحني بس ..ماعندك أحد.

العنود: ما عليك منه يا دكتور بكرة لو جبنا شغالة بيقول هي تساعدك أنتي ادفعي لها راتبها من راتبك وبعدها بيقول أتعب وأنا اوديك واجيبك فبعدها بيقول لي جيبي سواق وسيارة من فلوسك ..اصلا أمثاله عارفتهم زين وفاهمة طرق تفكيرهم ..ثانيا أترك هالمسألة يا دكتور الرجال بالعادة يسهرون كل ليلة برا مع ربعهم بس رجال زي هذا ما شفت ياحبه لجلسة البيت ما غير حاضن هالريموت بيده ويقلب في القنوات واللي يقهر اذا صديت عنه شوية ارجع والقاه يطالع قنوات لبنانية واذا جيت عنده يقلب على طول على اليمن ولا السودان هبل فيني يا دكتور ..نفسي من مرة يقول لي بأطلع استراحة مع ربعه ابدا لا يمكن ما يطاوعه ضميره وأذا طلع ما يطول ابد نص ساعة بالكثير ويرجع ويقول لي مليت واشتقت لك يا حياتي ..غير هذا وهذا أذا رحت عند أهلي قام هو استلم الانترنت ومن شات لشات ..تصور يا دكتور وصلت به الوقاحه رافض يعطيني الباسوورد حقت الايميل تبعه ..قاهرني طيب ليه ما في ثقة…وغير هذا وهذا يا دكتور لنا سبع سنين ما عمره فرحني بهدية تملا العين اللهم اسورة يوم يفوز فريق الشباب بالدوري وساعة يوم عطوة ترقية في العمل وقطعة قماش يوم زواج أخته وجزمة يوم عيد ميلادي ..بس موب شي والله موب شي تخيّل يا دكتور عيد زواجنا الثاني ناسيه ..أحد ينسى عيد زواجه ويوم اذكره به في السيارة يوقف جنب عربية ذرة ويجيب لنا حبتين يقول هذي هديتك بمناسبة عيد زواجنا …آه يا قلبي وفي عيد ميلادي الرابع والعشرين احم ..احم الثاني والعشرين ناسيه ويوم أذكره يقول خليني أكمل مباراة الهلال والنصر ..أجل كراعين هاللاعبين أولى من أنه يقوم يجيب هدية لزوجته حبيبته ..شايف يا دكتور الكذاب الخاين وشلون تغير بعد الزواج طبعا يحق له ضمني وين بأروح يعني هو يدري لو أنه مسوي هالحركة في الخطبة لأصنه بالدبلة على جبهته.

أنا: يا سلام يا أختي تمسكني تمسكني أجل يا دكتور الله يرضى لي عليك أبي اروح للعمل القا زرار الثوب مقطوع أقول لها خيطيه تقول لي البس ثوب شتوي وخل ثوبك أخيطه بعدين ..أجل أروح للعمل في عز الصيف عز اغسطس بثوب صوف وش دعوى جالس في الرياض ولا فيينا لا ومن زين الطبايع تأخذ ثوبي معها للمدرسة وتعطيه أبلة الاشغال تعطيه لتلميذاتها يتدربون عليه أجل ثوب أبيض صيفي يركبون عليه زرار أخضر مقاسه 4.5 سم ×5 سم ..بس من أشره عليه طالبات ابتدائي ..اترك هذي اقول لها مشتهي بيالة شاي وش فيه الشاي بأتابع برنامج ياليل يا عين ..ترد علي في الثلاجة علبة بيبسي حجم عائلي رح افتحها وجب كأسين لي ولك ..أقول لها بس أنا مشتهي الشاي تقول لي وش فيه البيبسي .. ما علينا أجل يا رمة تشوفين المنتخب يتأهل لكأس العالم بطلعة الروح وأنا أطامر في كل البيت وفوق الكنبة لين طحت وبغت الطاولة تشلخ رأسي ولا فكرتي تقولين لي مبروك ولا تسوين لي كيكة ومن زين الطبايع تقولين يالله تمسى على خير بروح أنام .مشّ هذي ..يوم حملت بطفلنا الأول (صنيتان ) الله لا يوريك يا دكتور كل ما ناظرت في المرآية طقتها بكوة وتقول راحت رشاقتي آه يا جسمي وين رحت,,ولا كل ما زارتها واحدة من صديقاتها وقالت لها بدى جسمك يسمن مع الحمل تصير تغلي وتنطبخ وتجيني تهوش وتقول كله منك ..كله منك أنت السبب طيب ماراح أنسا لك فعلتك…طول الحمل وهي كذا ,,وشرّف صنيتان بالسلامة وكنوع وكدليل على التعاون صدقني يا دكتور كنت أغير لصنيتان بالتناوب معها مرة عليها ومرة علي وساعات أذا راحت عند أهلها ولا زراوها الحريم تلعب علي وتقول لي غيرت لصنيتان 3 مرات ,انا متأكد بكل ثقة أنها تكذب وما غيرت له الا مرتين بس ومع هذا أعوضها وأغير لأبننا الحبيب 3 مرات .بس يا دكتور ما يعجبها العجب …يوم حملها بنتنا العزيزة وثاني خلفتنا (مزنة ) طول ماهي حامل ما أحد يأخذ باله من صنيتان الا أنا شايله بعيوني بس هي مغير مقابله المرآية وتنوح وتسألني عبدالعزيز أيهم أنا أسمن هالحمل ولا يوم حملي بصنيتان أن قلت لها هالحمل قامت تنوح أنها ماعرفت تنظم أكلها و اذا قلت يوم تحملين بصنيتان قالت كله منك قلت لك ما أبي أحمل مرة ثانية بس أنت راسك يابس وعنيد .وعلى هالحال ياباش مهندس اقصد يا دكتور الآن يا دكتور صنيتان عمره خمس سنين ونص ومزنة عمرها سنتين ونص ..ومع هذا باستثناء مزنة وصنيتان تقريبا بيتنا ماله حس أنا أجلس اناظر التلفزيون وهي تقرا بالمجلات يعني مدري أحس أننا صرنا باردين مع بعض وعلشان هيك احنا جينا لعندك اليوم قبل خراب مالطا يمكن تلقى لنا حل صرنا نحس بأن علاقتنا الزوجية بدت تفتر …حتى اللي انت خابر يا دكتور نسوية من دون نفس يعني كنوع من المجاملة لبعضنا البعض …تكفى شف لنا حل يا دكتور والله أنها بنية طيبة وأنا بعد بس مدري وش جانا هقوتك انها عين صابتنا.

الدكتور: عين ايه بس يا بني,, دي خيبتكوا بالاؤي …يا أولاد اللي عندكوا حاجه كده بتاعة نئص حنان ورومانس أنتوا ما اكتفيتوش من الحب والرومانسية ودخلتوا اؤام في السسبنس بتاع الحياة شوفوا أنتوا ماكنتوش مهيئين للسسبنس أد ما كنتوا محتاجين للرومانس عشان كده الحل الوحيد لكل مشاكلكوا هو انكوا ترجعوا لحياة الرومانس وتنسوا السسبنس شويا ..انتوا فاهمين أنا بئول ايه.

العنود:هو هو هو يا دكتور والله ان السيكس اللي تقول عنه ماشي حاله وش زيننا في الليل نهبل مو هذي مشكلتنا تراك فاهم المسألة غلط,, على بثارة عبدالعزيز بس في هالشغلات يعجبك ماشالله كنه توه معرس .

أنا: يا عنوودتي وش سيكس وش بيقول عنك الدكتور ,,الدكتور يقول سسبنس يعني أثارة الدكتور قصده أننا تركنا الحياة الرومانسية وطبينا على طول في اثارة الحياة وبلاويها يعني اللي انا فهمته الدكتور يبينا نرجع للحياة الرومانسية …بس كيف يا دكتور نرجع للرومانسية اللي افتقدناها.

الدكتور: عفارم عليك يا واد لئطتها وهي طايرة …اما عن حكاية أزاي انا حئولكوا انتوا تاخدوا اجازة شهر وتسيبوا العيال عند اهاليكو وترجعوا ئبل أيام الخطوبة يعني تعاكسها وتغازلها وتهشكها وتبشكها وماتبخلش عليها بأي حاجة وانتي كمان يا مدام ارجعي عيلة وانسي انك جبتي بيبيهيات ..وعامليه على انه بيعاكسك وبيشاكسك وانتي كمان ما اوصكيش اديه ريئ حلو وكم كلمة يا حبيبي ويا هنايا ويا عمري واللازمنوه ..وارجعوا لي بعد شهر فاهمين يا أولاد واذا احتجتوني في حاجة نمرة تليفوني عندكم ادوني الو.

العنود: هو هو يا دكتور تبيه يلاحقني في الأسواق ويرقمني ويغازلني وجع وش بيقولون عنا الناس ..بس تدري يا دكتور وناسة ويصيرون الشباب يلاحقوني الله بافتك منه ..اصبر ياعزيز والله لاوهقك مع الهيئة واخذ ارقام الحلوين.

أنا: هاي يا دكتور زعبولة أنا على بالي بتقول حطوا عيالكم عند أهاليكم وسافروا لكم شهر عسل مو تسكعوا في الأسواق وترقيم,, ثانيا يا دكتور خلك واقعي وشف مدامتي قالوا لك كاريس بشار على غفلة يا دكتور بالله فتح عيونك,,ارتدادات البودي حقها طلعت من يدها ياخي معليش هي زوجتي بس لا الخلفية تؤهل ولا المقدمه مثل اول ياحبيلها مابقى من سحرها الا عيونها صح الحول بدى ينط عليهم بس ولو يعبرون ..يعني والله ما يطاوعني قلبي أني الحقها في سوق من السواق واترك العصيفيرات في حالهم يعني ولو ترى النفس أمارة بالسوء ..يعني أخاف يقلب العلاج اللي توصي عليه أني ادبلها بزوجة ثانية ….

العنود: شفت يا دكتور علشان لا تلومني عيونه زايغة وش اسوي به اذا قدام عيني يحط القنوات اللبنانية تبيني أخلي له البيت على أمل انه يرقمني ويغازلني والله لا يقلب الشقة… ولا خلني ساكته.

الدكتور: يا أولاد ما تخافوش دي طريئة متجربة ما يهمكوووش وحتئلوا الدكتور زعبولة ئال,, يا سلام هو احنا بنلعب ولا بنلعب بس انتوا اعملوا اللي أنا بئولكوا عليه.

أنا: شورك وهداية الله يا دكتور بس وش رأيك من وين نبدى الحكاية ….الفيصلية ولا العقارية ولا صحارى الرياض ولا أخليها تمشي في شارع الحوامل ولا وش رأيك بمركز سعود التجاري تراه فاضي وصاد عن عيون الخلايق كلهم.

الدكتور: اللي يعجبك يا واد…اتفئوا على حاجة واعملوها

وبالفعل ودينا الأولاد لبيوت أهالينا ويالله يالله صنيتان عند أمي ومزنة عند حماتي أم العنود …واتفقنا أننا نقعد في بيوت أهالينا واذا جا اخر الليل نرجع للشقة أنا ارجع بروحي وهي مع أخوها بس كل مننا في غرفة في الشقة ولا نشوف بعضنا في الشقة الا يالله يالله نتكلم بالتليفون.

وبالفعل أول يوم اتفقنا أنا والعنود نبدا بالفيصلية ولأن أخوها كان مشغول اضطررت أنا أني اوصلها بنفسي وعلشان ما يخرب العلاج قررنا نسوي تمويه نزلتها عند البوابة الرئيسية وقلت لنفسي باخذ لفتين حول الفيصلية بعدين بأدخل يعني قال لك ما يدري ان زوجته هناك وتوني بأدخل السوق الا و يلقطني السيكورتي ويقول لي نعم وين رايح قلت له سلامتك بأدخل السوق قال ممنوع دخول العزابية قلت له بس الله يسلمك كذا مرة دخلت (نسيت اني وقتها مع زوجتي) قال لي مو غلطتي أجل قلت له طيب سو نفسك ما انتبهت يعني مشني واللي يرحم والديك …ويبتسم لي ويقول لا وأطلع له ورقة بميتين ريال يعني قال لك من تحت لتحت ويبتسم لي ابتسامة عريضة وأقول لنفسي بس وافق وتوني بأدخل الا يقول لي ماقد أحد مردغك قدام بوابة سوق قلت لا والله ما حصل لي الشرف ويقول لي أجل انقلع قلت له ياباش مهندس سيكورتي بس زوجتي داخل رد علي العب غيرها قلت له وقسما بالله أصلا ما تذكرني أحنا اللي جيناكم في رمضان الماضي …قال لو أنك صادق كان دخلت معك زوجتك ..قلت له ياخوي صدقني يعني بأكذب عليك والله أتكلم جد..ويقول لي بتطس الحين ولا وشلون… ساعتها مالقيت حل الا اني ادق على جوال العنود علشان تطلع لي وتدخلني علشان نقدر نكمل العلاج. وياليتني ما دقيت

أنا: طووط طووط طووط ..هلا العنود كيفك حياتي وحشتيني موت أقول ياعمري السيكورتي رفض أنه يدخلني ياليت تجين عند البوابة وتدخليني يالله يا حياتي انتظرك.

العنود: وجع من أنت وشلون عرفت رقمي صدق أنك قليل أدب ترى أن دقيت علي مرة ثانية بابلغ عنك الأمارة.(مندمجة في الدور وبقوة بعد)

أنا: حبيبتي وش تخربطين أنا عبدالعزيز زوجك وش اللي من وين عرفت رقمك ثانيا وش بتبلغين الأمارة على زوجك .. أقول يالله بس بلا دلع تعالي بسرعة تراني خست برا لا يكون الجو داخل بس جاز لك تراني أعرفك زين مالك أمان وتخقين بسرعة…

العنود: بصراحة ايه شباب يهبلون ويجننون يوم ما شفت احد حولي الا وارفع النقاب واتلثم وبدوا اثنين يمشون وراي قلت يابنت هي خربانه خربانه أنتي في الفيصلية يعني حسبة لندن شيلي الطرحة من الوجه السموح ..وااو يا عبدالعزيز وراي قطار بشري يجي عشرين واحد يا حظي ..وأنت خل كاريس بشار تنفعك أجل انا ارتدادات البودي حقي فقدت السيطرة عليها…عن أذنك في واحد مملوح يلاحقني يبي يرسل لي رقمه بالانفرا ريد خلني أوجه جوالي .. والله يا عزوز لو تشوف قطار بشري وراي.

أنا : حبيبتي لا واللي يرحم والديك ورانا علاج بنسويه حبيبتي لازم تضحين يالله يا عمري ( منتهى الذل)

العنود: اوكيه يالله رحمتك ..ترى علشان العلاج بس مو تروح تتشكى عند الدكتور بكرة اعرفك..

وبالفعل نزلت المدام بكل وقار وقالت للباش سيكورتي ترى هذا معي ( قوية بحقي هالكلمة ) ودخلت معها وتوني أدخل الا من جد كأنها ماتعرفني انطلقت وتركتني وراها ..وقمت الاحق فيها من كتر لكتر ومن سوني الى منير للمجوهرات وتنزل يم هارفي نيكلز وترجع الى نينا ريتشي وأنا اللي امشي وراها و ووراي قصدي وراها معي كم جحلوط ( الجحلوط نوع من الشباب ماله داعي في الحياة بالمرة ) ويمر في تلك الهنيهه شاب طويل ونظيف شكله ولد نعمة ويوقف عند فاترينة ..محل جي سي بيني والعنود مشت من عنده ولا يجلس يتأمل فيها البلوة مو هنا المشكلة العنود وقفت قريب منه يعني ما بينهم شبر وجلست تطالعه بعيونها شوي وتاكله وهو يتبسم لها ويطلع الكرت ويؤشر لها به وتغمض عيونها بحيا يعني موافقة ..وانا اللي كاتب رقمي على منديل كودو وأبي اعطيه لها..ولا أطالع زوجتي وهي هايمة بذاك الحلو ويقترب منها ذاك الولد بكرته ومرتي ما كذبت خبر مدت يدها بتلقطه ساعتها انا ثار الدم في عروقي لا أبوها لا أبو العلاج وأنط في ذاك الولد وأقول له احترم نفسك ..ويقول لي خير عسا ماشر قلت تدري هذي من ..و يجاوبني بكل برود يعني من أنت لا تقول خويتك القديمة تراكم كذا يا عيال الرياض قلت لا يا حبيبي هذي زوجتي وتنط علي العنود وتقول لا لا تصدقه هذا يلاحقني من يوم دخلت السوق وهو يتبلى علي ويلتفت علي ذاك و على وجه ابتسامة عريضة ويقول أجل يتبلى عليك ..شباب و يجينا حوالي 6 شباب كلهم طول بعرض والمشكلة انهم متفاهمين يعني ماقال لهم اجلدوه هو أشر بس من بعيد وعينك ما تشوف الا النور ..وطااخ طييخ طووخ وصارت عيوني زرق من التكفخ ..وطلعت من الفيصلية على أسعاف المستشفى العسكري ولحسن الحظ طلعت العنود بنت ناس وركبت معي في سيارة الأسعاف المهم في المستشفى شوي وبغيت افركش العلاج كله لا بارك الله فيه بس العنود صارت تحط يدها على شعري وتقول لي عزوزي حبيبي ليه زعلانه الحلوة ( على فكرة زوجتي اذا خقت تدلعني بالحلوة ) واقنعتني نكمل العلاج بس شرطت عليها نروح مكان ما فيه شباب كشخات يعني نروح للمعيقلية ولا الثميري يعني ما قدامها الا أنا والشياب والشيون … وأنا علي أني أغازلها بأقصى ما عندي وبالفعل رحنا للمعيقلية وللمعلومية لمن هم خارج الرياض المعيقلية منطقة تجارية راقية في وسط الرياض ناحية الجنوب,المهم في المعيقلية مو بس مافي عيال حلوين وهذا الزين بس بعد مافي بنات حلوات يعني زوجتي هي الوحيدة المملوحة والباقيات اللهم يا كافي يروعون لولا العبايات لكنت راهنت أنهم رجال متقمصين أدوار نسائية ..المهم جلست أدور المدام حسب ما اتفقنا أنها بتجي مع أخوها بس ما علمتني وين وجلست أدور عليها وسط هالسكن ( السكن مو مكان اقامة السكن جمع سكني يعني جنّ) وشوي شوي وأتعب ولا حصلت زوجتي اللي أنا متأكد منه أن العنود بيضا بينما كل اللي في السوق يا سمر يا عبندي وألمح واحدة بيضا بس لابسة برقع غريب ..بس الجرم ( الجرم= البودي) جرم العنود قلت بس هذي هي بنت اللذين مسوية حركة تموية يعني مو هي و أقوم الحقها وأقول لها حن يا جميل من وين لك هالثقل كله ارحمي القلوب ..بس الحرمة ولا عبرتني وشوي شوي وتدخل وسط بسطات حريم يبيعون فصفص وقريض ولا قدرت اتغلغل في ذيك المنطقة لانها كلها حريم المهم جلست اصفر واؤشر لها من بعيد يعني اطلعي لي في أحد الأسياب الفاضية وهي تناظرني وترجع تصد عني قلت بس بنت الكلب حابكة الدور بس على مين بتلعبها على مين يا بنت الناس المهم استمرينا أنا اؤشر لها وهي تناظر وتطنش وشوي وتخلص من البسطات وجت تطلع من هالزحمات بس من الجهة الثانية واسرع ابي اروح لها الا واصطدم بعبدة براطمها لين ركبتي وتقول لي يلعن ابوك وش حلوك أطلع بالرقم يالله قلت سمي طال عمرك وش رقمه ..قالت أبك لك ساعتين توشر لي وتحايلني لين ماحن قلبي لك جاوبتها بكل بلاهه انتي لك قلب ؟؟؟ قصدي وش علي من قلبك ..أصلا انا ما كنت اؤشر لك أنا اؤشر لذيك مو لك أنتي اللي فاهمة غلط ..وتلتفت وتقول يعني أنت كنت تؤشر على ذيك البيضا ابك يا ذا الورع ما تاخذ الا بلون اللحم وعلى طول ما يملى عينك الا البيضات ترى فيهم من الشين الله لا يوريك …جاوبتها بكل براءة لا الله يسلمك أنتي مو فاهمة الوضع كما ينبغي ذيك الله يسلمك زوجتي بس انا أتلكع وأغازلها فهمتي طال عمرك ..ردت علي وهي زانطتني صدق ما تستحي أجل صارت الحرمة مرتك قلت أي والله بس دلع عرسان ..قالت ماعلي بتطلع الرقم ولا لا قلت لها يا مدام قالت لي آنسة لو سمحت .قلت يا آنسة والله العظيم ذيك زوجتي واذا مو مصدقتني اسئليها وتشدني المرة من علباي ( العلبا = أعلى الرقبة من الخلف ) وتروح بي لم ذيك الحرمة وتقول لها هيي أنتي يالبرصا صدق هذا رجلك .. وتشهق ذيك الحرمة بأعلى حسها ..شووو العما شو عم بتحكي من ئال انو هيدا المضروب زوجي …وأصارخ أنا يا عنوودتي واللي يرحم والديك موب وقته الان هالمزح ماني ناقص انطق مرة ثانية ..وذيك البيضا تصارخ ياعالم يا جماعة شوفوا هيدا عم بيتبلى علييّ لك العما من وين بتعرفني بس من وين ..وانا كذا الا والعبدة تشيل فيني وترميني على الارض وتوطاني برجلها ..وتقول لي أجل تكذب علي وتقول هذي زوجتك كل هذا لأنك ماتبي ترقمني ..ونازلة سعابيلك على هالبرصا ..وأنا أصارخ عنووود واللي يرحم والديك قسما بالله لأمشي لك على الصراط المستقيم والعبدة هي ورفيقاتها يوطون فيني والبيضا تلطم وتنادي على الناس لين جت الهيئة ..وسمعوا القصة طبعا من الحريم وأنا احلف لهم والله هذي زوجتي قسما بالله اسمها العنود بنت عبدالله ……وفي حبة خال في خدها الايسر وجرح سكين في اعلى جبهتها من زين الطباع قال ايش براءة البنات ..المهم شوفوا وتأكدوا ورجال الهيئة جزاهم الله خير ما غير يقولون يا فاسق تنشر الفساد وتتبلى على نساء المسلمين ..ويوم شافوني خقيت وخذتني العبرة ويودوننا مركز الهيئة علشان يتأكدون هي زوجتي ولا لا وللاسف طلعت مو زوجتي طلعت سيدة سورية …وطبعا انجلدت وتختخت في التوقيف وكم تعهد على بعض . وبعد هذا ودوني لمستشفى الرياض المركزي قسم العظام لا تخافون مو من طق الهيئة الا من توطي الطقاقات أقصد العبدات اللي فوق ظهري …وجت عنوودتي تزورني ..

أنا: حرام عليك والله وش سويتي فيني ليه ماجيتي زي ما أتفقنا ..يعني يرضيك ثاني مرة أتكسر يا حياتي.

العنود: والله غصبا عني يا حياتي رحت مع أخوي ويبنشر كفر سيارته عند أول الحارة قام نزلني عند الباب وراح يصلح الكفر وتأخر وكنت أبي أدق عليك علشان أعلمك بس حبيت أتغلى عليك يعني مسوية نفسي ثقل .

أنا: أي ثقل الله يهديك انطقيت طق يا حياتي الله لا يوريك ما أعرف ارقد ولا أجلس كل مافيني يعورني لا بارك الله فيه من علاج أنا بس هونت , خلاص بس بوقف العلاج ..ماني مستحمل طق زيادة .

العنود: لا يا حبيبي صدقني قطعنا جزء كبير من العلاج …تصدق عاد بديت أحبك زي أيام الخطوبة .بس بقالي بعد نتيفة ( نتيفة = جزء بسيط ) يالله عاد لا تصير بايخ .

أنا: اوكيه بس بشرط …موب في الرياض لا وبرى المملكة كلها صراحة ماني مستحمل انطق ,,ثانيا تفتشين مو تخربينها عاد يعني تحجبي على الأقل علشان أعرفك ولا أسوي أي حركة الا على اساس علمي وخطة مدروسة وفق المنهج العلمي الصحيح ( والله العظيم ما أقصد بعض الناس اللي في بالكم ..الله يوفقه ويتأهلون لكأس العالم هالمرة ) هااه موافقة ولا لا.

العنود: يعني وين قصدك يعني نروح سوق حراء في جدة ولا الراشد في الخبر ولا مجمع مكة في مكة.

أناك صدق أنك خبلة بذرك تبين تنتغازلين أقول لك برا المملكة ..يعني يالسيف في البحرين يا سوق شرق في الكويت ولا برجمان في دبي ..و ماعندك خيار ثاني ولا تسأليني ليه هذولي بس لي اسبابي الخاصة وأن كنت أفضل البحرين ولا دبي لأسباب خاصة (صدقوني ما عمري شربت من القوارير ) …وش تختارين.

العنود: خلاص نروح دبي شورك وهداية الله بس اسمع بننام في غرفة واحدة لأني أخاف أنوم بروحي في الفندق فاهم علي مو تتركني بريحاتي .

وبالفعل رحنا لدبي ورسمنا الخطة اللي على أساسها بنلتقي في مركز برجمان في دبي وكيف أنا وقتها باتصرف وأغازلها …وصار ما يلي.

سبقتها أنا طبعا لمركز برجمان بنص ساعة على أنها بتآخذ تاكسي وبتجي …وقعدت أدور في المركز قبل ما تجي زوجتي ..صحيح السوق مليان أشكال تفتح النفس ,وأخرى تروع اللي ما ينتروع …وجلست افرفر علشان أعرف كل صغيرة وكل كبيرة في المركز ..وشوي وتقبل المملوحة أقصد زوجتي يا حبيلها سعودية وبتفتش , أنواع الألوان يا حياتي أول مرة أشوف واحدة حاطة روج بنفسجي على البرطم الفوقاني وروج زهري على البرطم اللي تحت قال لك موضة ..والخدود كل خد عليه طماطة يعني حمرا رباني ..المهم هي أقبلت وأنا اللي ارتز وراها وكتفي يحاذي كتفها ..وأنواع الكلام اللي يطيح الطير من السما ..

أنا: يا غزال يطامر في السوق مطامر ارحم تيس ساري وراك …يا وردة فتحت في وسط دبي ..حني على نحلة مقبلة …يا كاس عصير كوكتيل ارفقي بالمصاصة قصدي اللي داعس براطمه في المصاصة يبي يشربك … يا ارضي احفظي ما عليكي ..

العنود: يووه يا بيخك ..وأنتم يالسعوديين ما تشوفون واحدة حلوة الا نشبتوا لها ..

أنا: يلعن ابوتس يالطخما افتش لتس قلبي تشوفين بعينتس وش سويتي فيه من يوم شافتس والله لو يشوفتس خلف بن هذال أن ما يرقد الليلة الا مطلع فيتس ديوان ..اطلع لك المعروض كود تقبلينه يا مال العافية ..

العنود: ( وهي تضحك بغنج مالت عليها ) يووه لو ما تحلف بس يالماصل يالله طلعه قبل لا يشوفني أخوي .

أنا: وجع يا بنت اللذين أخوك وش جابه معنا ..ومتى جا وعسى مو بيرقد معنا في الغرفة …صدق مالك أمان.

العنود: وشو ياربييه منك بس كذا حركات ..وش بيقولون الناس جايه دبي بروحي وين صايعة ولا مالي أهل ..مالت عليك لا وتقدم لي معاريض ومن زين الطبايع يالسياحي جوالك 054 خير وكل أرقامه مختلفين عن بعض كل رقم متزاعل مع الثاني ..والله بتقوم الساعة …

أنا: وش دعوى الأرض بتهتز من هالجمال اللي يمشي فوقها ..(واهمس لها ) أقول يا بنت الكلب تراك مصختيها عاد خذي الرقم لا العن والدينك هنيا ..

العنود: يمّه منك وراك بزرت عيونك وجع لا تكون بس شربت قبل ما تجي تراني أعرفك انت والشراب نملة تمشي على ريح الدسم قرب فمك باشمه خلني أتأكد قسما بالله اذا صرت شارب والله ما خليك تنوم معاي في الغرفة .

أنا: لا لحية وش شارب أحد يشرب العصر الله يشفيك بس …اقول بس افتحي يدك بامسك يدك لا تقولين لا ..تراها حركة رومانسية هابين فيها هالأيام .

العنود: خير انشالله تمسك يدي كذا بلوشي ,,تشوف ذاك المحل حق المجوهرات فيه خاتم ألماس راح اشتره لي وقدمه لي قدام الناس زي الأفلام الأمريكية واقعد على ركبتك ساعتها يمكن أخليك تمسك يدي …

أنا: وش ذا وش تخربطين عنوودتي عسا ما انهبلتي بس …ثانيا بكم الخاتم انشالله بألف ولا ألفين .

العنود: أي ألف أو ألفين ثمنه يا حبيبي كاش 15 ألف ريال وبالتقسيط يجي ب17000 ريال انشالله غالي علي لا قلها قلها شكلك ما تحبني مواريك كذا ايه تبي الرياض تشتري لي أسوارة ب800 ريال ويطير بها عقلي مابي مابي يالخاتم يا يفتح الله .

أنا: ابشري ,,حكم القوي ..يا غزال يا غزال الحب حلال …

وبالفعل رحت للمحل وطقيت الخاتم اللي قالت لي لي العنود عنه …ورجعت لها بالخاتم علشان أسوي اللي قالت لي عنه ..وبديت أمشي وراها وأشر لها بالخاتم …وتشوفها بطرف عينها يعني أنا مسوي لها مفاجأة ما كنها هي اللي قالت لي عنه…..وتوني باعطيها الخاتم والا المفاجأة ….طنطنطططاااا …الا وقطار من البشرية يمشون ورى واحدة سبحان من خلقها ..واللي يقول تكفين صورة يا بنت الناس وحريم يزغرطون وبزارين يتنططون وأفتح عيوني أبي أشوف منهي الا وهي كاريس بشار ..ساعتها تبرجلت وانصرعت وجاتني كل أنواع الحرارة اللي في الدنيا ..والعنود المسيكينة تمدد في يدها تبي تآخذ الخاتم ..وتوها تلمس العلبة بأطراف أصابعها الا واسحبها منها وانطلق للمحروسة كاريس ..واجلس على ركبتيني قدامها ..وأقول لها كاريس ياحبي أنا ردي على الولهان لا يهون بك تعذيبه وتضحك الله لا يخلين من ضحكتها وتقول لي شوو بك يا مضروب ..قلت مضروب ايه يحق لك ناديني باللي تبين لي فوق عشرين سنة ما أشوف الا غبرة وكيعان تقل كيعان رجال وحريم ايديهم مليانة شعر ..لكني أنتي غير طبعا يا حياتي غير …وترد علي : يوه ئد ايش شفت معجبين بس متلاتك ما شفيت …قلت لها ماني معجب أنا بأتقدم لخطبتك وهذا عربون حبي لك ..وأمد لها الخاتم هي شافته ولا تدوخ وتقول لي ييه موافئه موافئه ..وأنا اخمخم فيها واحضنها ..والعنود تصارخ باعلى حسها.

العنود: عبدالعزيز حبيبي حياتي ارجع لي ارجع يا كل الحب ..والله أتوب لأرجع لك خاتم في يدك لأدلعك وأسوي لك كل اللي تبي بس أترك عنك هالبرصا.

أنا: أجل البرصا تموتين وتصيرين برصا ما غير تلططين من هالكريمات بس من وين لتس على العموم الله يسلمك الليلة نامي أنتي بروحك أنا باحجز لي ولكاريس في فندق برج العرب وعلى فكرة التذاكر لرجعة الرياض بتحصلينها عند الريسبشن لأني ناوي اطلع من دبي مع كاروستي على لندن نقضي أجمل شهر عسل ولا تنسين تسلمين لي على الدكتور زعبولة الأولة وتقولين له يقول لك عبدالعزيز هالمرة علاجك نفع يا دكتور ..صدق التغيير في الحياة الزوجية شي حلو ويكسبها طابع السعادة والبهجة….

ومشينا من السوق أنا وكاريش والفرحة شاقه خششنا ( خششنا = جمع خشة وهي الفم +اسفل الخشم ) والعنود تذرف الدميعات أربع اربع ..وتولول …

نصيحة خاصة من بلاك هورس للمتزوجين وخصوصا الجدد منهم أذا ما صادفتهم مشاكل زوجية أن يتوجهون ألى عيادة الدكتور العربي العالمي (زعبولة الأولة ) وأنا أكبر شاهد على كفاءة هذا الدكتور الرائع الجهبز

تحياتي بلاك هورس

تاريخ كتابة القصة عام 2002م / 1422هـ

جميع قصص بلاك هورس خاصة بموقع قصص قصيمي نت والحقوق محفوظة