قصة قصيدة يامنير ماجاكم عن الترف ذكار
قصة وكلمات قصيدة يامنير ماجاكم عن الترف ذكار من سلسلة قصص سالفه وقصيده من الحياة قديمة مكتوبة بالعربية
وقصة القصيدة قديمة جدا و بداية القصه عن فتاة بدوية من اهل المنطقه الشماليه كانت تسرح عند إبل اهلها يوميا
وكانت هالبنت تحب شخص وتقابله دايما وهي مع الابل وهي تحبه ويحبها حب عفيف
وكان الشاب يخطط على خطبتها بس العائق الوحيد ان واحد من عيال عمها محجرها وحالف ان قرنها الاشقر ما يلتوي الا على يمينه
وهذا اللي يحبها مهوب من جماعتها
وفي يوم من الايام يوم رجعت من البل لقت في جنب بيتهم ( بيت الشعر ) بيت جديد مبني
سألت امها عن البيت من هو له
قالت لها امها ان ذا بيتها هي وهباس ( اسم ولد عمها )
قالت لأمها انها تحب واحد وحالفه انها ما تزوج الا هو
قالت امها هباس في بيت ابوه روحي واطلبيه يفك حجرك وتعوذي منه يمكن يفكك .
راحت له البنت ولقت عنده رجال ودخلت عليهم وقالت اني طالبتك بوجيه الرجال اللي عندك انك تتركني في سبيلي” ما ابيك “
ضحك هباس وقال انا قايل ان هالقرن الاشقر والله ما يلتوي الا على ذراعي حيه والا ميته .
رجعت البنت للبيت وجهزت السم وراحت به لأمها وقالت لها اللي صار معه
وقالت انا حالفه انه ما ياخذني وانا اسلم عليكم وشربت السم وماتت بلحظتها
هباس ولد عم البنت قبل ما يدفنونها طلع قرنها ولواه على يمينه وهي ميته وقال يميني ووفيت به
أهلها ما لقوا احد يسرح عند ابلهم بعد وفاة الفتاة
واستأجروا واحد من عيال جيرانهم يسرح عند البل وكان الولد صغير سن .
حبيبها صار يتردد على ابلها وفاقدها
ومير يلقى الولد وسأله يا ولد وين البنت اللي كانت تسرح عند البل
سأله الولد ليه تسال
قال لاني مضيع لي ابل ويذكرون ان فيه بنت جتها الابل وطردتها وابي أسألها عنها وين طردتها
قال الولد البنت يقولون انها شربت سم وماتت
ما صدق الشاب وقال في نفسه أكيد ان احد شافني معها وردوها لا تسرح وقالوا للولد إذا سأل عنها احد قل انها شربت سم وماتت
فقال في نفسه احسن لي ارسل قصيده لواحد من ربعها اللي امون عليهم واسأله وش صار بالضبط
قال يا ولد تعرف واحد اسمه منير
قال الولد أعرفه
قال انا بعطيك رساله وصلها له واذا قراها وحصل البل بيرسلها لي
قال الولد هاتها
استلم منير الرساله الا هو يقول فيها
يا منير ما جاكم عن الترف ذكّار
هو صدق والا صخيّف الروح غادي
هو صدق والا “طنطنة” علم قمّار
او جاء عنه راع العلوم الوكادي
تقل ضربت الكبد نطحٍ بمسمار
من يوم قيل الموت للترف صادي
وانس على كبد كما حر مخطـار
شي جرا جاب البـلا مـن فـوادي
ودك لو الدنيا تصنـت للاشـوار
والموت ياتي لـه نذيـرٍ منادي
يوم قرا منير القصيده ما كان يدري من هو البنت اللي يعشقها ويسأل او من كان يحب بس قال اكيد ان اخر من مات اللي شربت السم وانه كان يقصدها
ورد عليه يقول
صدق ولاهي طنطنة علم قمار
انا عنه راع العلوم الوكادي
دنياك هذي ماتصنت للاشوار
تضرب على مشهاة نفسه عنادي
لو شاورتنا كان والله ماصار
نفدي بناسٍ عن ظبي الحمادي
ياحيف ياعضودٍ تقل وصف جمّار
يودعهن القبر المهبا سمادي
ونهود حدر الجيب غضات الاثمار
الدود ياكل مغترات الفنادي
وشقرٍ ضفرهن طولهن خمسة اشبار
يعبا لهن غير الرشوش الزبادي
ياحيف ياهباس للترف قبار
لمسن قرونه عقب ماهن بعادي
المراجع والمصادر
القصة ذكرت في العديد من كتب التراث وحياة البادية قديما وافواه الرواة مع اختلاف بعض التفاصيل بينهم
مرتبط
